01:31 PM July, 10 2016 سودانيز اون لاين حسن محمد عمر-السودان مكتبتى رابط مختصرعيد مبارك على الجميع وكل عام وأنتم بخير / ياأخوانا الحاصل شنو ؟ ناس الفضائيات ديل جنو من ( الجن) يعنى 9أيام بالتمام والكمال قضيتها مسمر فى البيت قدام الشاشة من تصبح لامن تمسى كلها مزازيك وغنا من مغنين لم يحدث أن سمعت بهم إلا مع ظهور الفضائيات الملت البلد وكلهم صبيان الواحد فيهم ماشاء الله جضوم وشعر مسبسب وغرقان فى الكريمات لشوشتو ويفنجط لينا بعبارات غليدة ( جمهورى وجمهورى وأنا كنت وأنا قمت) الأغرب من كدة النصوص غير مفهومة او متجانسة لقيط من هنا وهناك وأسماء وكنيات من شاكلة ( أمجد المسلمية / وائل الفتيحاب / سمر الكلاكلة وهكذا ) قعدت أترحم على الفن السودانى الأصيل وأقول فى نفسى حليل أبوداوود وأحمد المصطفى ووردى وأبواللمين وكابلى وبلوم الغرب الأصيل عبدالرحمن عبدالله والعطبراوى وخوجلى عثمان وحسن عطية وإبراهيم عوض وغيره من جيل العمالقة الذين أثروا الساحة الفنية بإبداعاتهم التى لازالت ترددها الأجيال حقيقة شىء مؤسف أن تفتح هذه القنوات أبوابها وتتركها مشرعة لكل من هب ودب دون ضوابط أو إحترام للذوق العام ياأخوانا ماكل من إمتلك الأورغن مع بدلتين نسمى فنان ارحمونا شوية يافضائياتنا ودا كوم والمدائح كوم تانى والله شىء مخجل تسمع كلمات مامفهومة من شاب أو شابة بألحان مزعجة وتجد خلف المسكين صورة للكعبة المشرفة أو المسجد النبوى لزوم أن هذا الأداء مديح .. أرحمونا ياناس وبطلوا الهبل البتعملوا فيه دا . عموماً مر العيد بسلام وبعد داأحسن الواحد يشمع التلفزيون ويرتاح من الغم وكل عام وأنتم بخير
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة