يا جرجير مش قلتا ليك اتا داخل غلط من البداية وحتي النهاية .. اتا قالوا ليك انا ناكر اني أهل عوض وسيد باغة وخرج والذي منو ؟؟؟؟ أبدا أنا ما بنكر أهلي عشان أية حاجة يا حبيب .. أهل العوض دا قلتها أنا للأستاذة دينا خالد عندما قالت أهل العوض ما بشتروا فرش المعجون للناس الجاية من بعيد .. لكن في نفس الوقت والله ما مستعد أصهين من مزاعم المخلوعين من الوافدين لخرتومنا العندنا فيها أملاك ومنافع عشان يبقوها حقتم غلاط ساي .. الخرتوم دي ما شايف أي زول من الجماعة القاعدين يكوركوا هنا ديل عندو فيها حصحاصية صغيرة .. ديل كلهم جابم سيل الوادي وأناخوا نوقهم قدام بيوتنا ثم سوروا بعرها .. وادعو انو البعر دا من أملاكم في الخرتوم .. الخرتوم دي بالقديم حقتنا جلد ورأس .. وبالجديد أملاكنا ياها ديك قاعدين نمش نجيب حق ايجار كل غرة شهر .. اتا دا جرجير دا أفيدنا أفادك الله .. جائي مع منو والموضوع شنو هو ذاتو ؟؟؟؟؟؟؟؟؟؟؟؟
جدة البعيدة ديك خليها:) !!!! عمر دا ياخ توتى ما شافا!!!
عندى صاحبى جزايرى,, إكتشفت ليك إنو الراجل دا طلع صغير من حلة تعداد سكانا 3 ألف نسمةو على باريس راس,, قال الجزاير العاصمة ما شافا كلو كلو ولا حتى ترانزيت ما جا حايم جنبها!!
مصنف (قرب تعال )بمزاج..
06-18-2013, 03:30 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: يا حنان .. غني لي اومحمد .. غني لي اومحمد ..
يا تمبس ياخي ناس مدني ديل معروفين خطرين من زمان
زمان لما يكون في فريق زائر لي مدني من أمدرمان أو الخرطوم
ولما البص يحصل التفتيش القبل مدني داك بيقوموا أتنين ثلاثة من لعيبة مدني بيركبوا في البص وبيلعبوا ليك مع الفريق الزائر دا مان تومات في الممر بتاع البص الفي النص ديك
بيقوم واحد بفتح الحنفية البتسقي النجيلة ويغرق ليك خط 18 بتاع الفريق الزائر لما يحصلوا مدني والحكم يصفر بيكون عندهم جناح سريع واقف بممرروا ليهو الكورة على طول بعكسها في خط 18 بتاع الفريق الزائر
هنا الحارس بتاع الفريق الزائر بنزلق لأنو النجيلة مبلولة في اللحظة ديك الكورة بتقلش منو وتدخل
طبعا بعد داك القون بيكون بقى أم بريش ( المايك مع عصام جبر الله لو موجود)
أما بعد
انا مكيفني ليك طلحة عبد الله
لأنو بذكرني بالمقولة البتقول : ما ضاع حق وراه مطالب
بالله شبك ليك الناس دي أرحلوا من مضاربنا أرحلوا من مضاربنا
لحدي ما أساسي طلع ولحقو محمد البشرى
الله يستر على زرايب ناس صلاح عبد الله
06-18-2013, 06:01 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: اتا قالوا ليك انا ناكر اني أهل عوض وسيد باغة وخرج والذي منو ؟؟؟؟
يا تنظير اي نعم البوست ونسة وغلاط لكن كمان ما غلاط ساي شوبة منطق ومعقولية لا تضير اهل عوض دي لا تستقيم مع قولة خرتومنا, اسياد الباغة من مستشفى سوبا ولا ورا بعدين قصة جدي جدي الما عارف اسم جامعه دي ما تخوتنا بيها ساي و تحشرها حشرا بمناسبة وبدون فا روق قلنا ليك وارجا دوركم ساي
06-18-2013, 06:39 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: يا مولانا انت رمادي بتاعة البورد دا قايله مسبّة!!
كويس كدا ؟ اهو عمر الفاروق معنوياتو بقت في السما .. ^ ـ ^
Quote: اظنك متابع فضائح المناضلين و الأسماء المستعارة الأخيرة (اوعى تعمل رايح راجين لينا ادانة قانونية فااهمة ههههههههه)
لو تهديفكم زي اساسي مافي مانع ^ ـ ^. : تونسي شنو يا وليد البتأرخ بيهو لامدرمان .. هاك التاريخ المن امو وابوه ..
Quote: وأظهرت الحفريات الأثرية آثارا سودانية منذ حوالي عام 3100 ق. م إلي 2000 ق. ونجد أن جنسـاً زنجيـاً إتخذ أول خطوة معروفة نحو الحضارة في السودان بصناعة الفخار وإستعماله . ومن الجماجم التى وُجدت لهؤلاء الناس يتضح أنهم يختلفون عن أى جنس زنجي يعيش اليوم . وكان هؤلاءالسكان,وهم سكان الخرطوم القديمة وكانوا يعيشون على صيد الأسماك والحيوانات بجانب جمع الثمار من الأشجار . أمـا سكان الشهيناب فيختلفون عن سكان مدينة الخرطوم القديمة ، حيث تختلف أدواتهم الحجرية والفخارية ، و كانت حرفتهم الصيد . في 1966 م عثرت بعثة جامعة كلورادو الأمريكية في خور ابوعنجة على أدوات ترجع لعصر الحجري القديم ، كما عثر فيه على أثار ترجع 12،000 ق.م ،
مرجعية تاريخ امدرمان خور ابوعجة والشهيناب . كونو إنت وتمبس واب شنب بتاع الزريبة من سلالة اجدادنا القدماء وارد .. بس اساسي وعمر الفاروق ديل ما ظنيت ^ ـ ^
06-19-2013, 06:17 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
متواضع الادراك يا وليد متواضع شديد , وليس غريبا ان تكون متواضع الادراك لانه يشفع لك في ذلك كونك من امدرمان القرية التي صنعت حديثا لذا لا تدرك قيمة الصور التي تنزلها بل لا تستطيع ان تقراها كما ينبغي ويجب , الصورة التي انزلتها للخرطوم والخرطوم بحري وتوتي يا وليد بداية القرن السابق صور متسقة جدا مع واقعها وواقع تلك الفترة من التاريخ الطبيعي للسكان في تلك المناطق , مشكلتك يا وليد و ( لـ ضعف استنباطك وسذاجة تفكيرك ) تحاكم اقرأ هذه الكلمة جيدا ( تحاكم ) التوزيع السكاني لتلك الفترة بما تراه حاليا في الخرطوم وبحري وتوتي , تلك الفترة يا وليد سكان الخرطوم وتلك المناطق لم يتجاوزوا المائة او مئاتان الف نسمة يقلن عنها او يزدن ولكن ذلك تعداد سكان الخرطوم في تلك الفترة (تقريبا ) انت في ذهنك عند قراءة تلك الصور وتلك الخرائط الخرطوم الحالية وفات عن ادراكك ان اجدادك واجداد طلوح بتاع ارباب العقائد لم يفدوا ( نازحين) الي الخرطوم من قراهم بعد , لذا كانت بيوتات الخرطوم وبحري وتوتي عبارة عن بيوتات اسر او كما يطلق عليها عرفا ( حيشان) يعني حوش الشريف الهندي في بري مثلا حيث يضم الحوش الاسرة الممتدة وهكذا في بقية مناطق الخرطوم فتجد بري عبارة عن عدد من الحيشان الكبيرة التي تفرعت منها الاسر الممتدة فيما بعد وانفصلت بمرور الوقت وزيادة افراد العائلة الي اتى الي الخرطوم الوافدين اليها من حلال السودان المختلفة وتشكلت الخرطوم التي تعرفها حاليا وتحاكم بها الخرطوم القديمة , لذا من المنطقي جدا بل هو الاصل ان تكون عدد البيوت في ذلك الوقت بسيطة وبما انه العمارة في ذلك الوقت والعمارة اقصد بها طريقة بناء البيوت في ذلك الوقت كانت تعتمد علي الطين فمن الصعب جدا ان تستنبط من هذه الصورة القديمة الواقع الحقيقي للبيوتات فالصورة ماخوذة من مسافة بعيدة واظن من طائرة لذا هي تعطيك الشكل العام للمنطقة دون تفاصيل واضحة وهذا لا يمنع ان الصورة متسقة مع الواقع كما ذلك انفا لكن بعد كل هذا وكل هذه الصور فامدرمان لا يظهر فيها بناء قائم في الصورة التي انزلتها لك وتظهر علي انهاء فسحة كبيرة وصية ساكت مما يدل علي ان القرية الكبيرة امدرمان لم تصنع بعد في ذلك الوقت القريب بخلاف الخرطوم وبحري وتوتي بسيط يا وليد ومتواضع وجابت ليها سذاجة ادراكية كمان
06-19-2013, 08:17 AM
اساسي اساسي
تاريخ التسجيل: 07-20-2002
مجموع المشاركات: 16468
بالنسبة لصورة خوركم يا تمبس زمان في النصف الثاني من الثمانينات وبداية التزعينات , كنت اذهب مجبرا مع الوالدة حفظها الله الي امدرمان في زيارة لها لبعض اخوتها الذين دقسوا وسكنوا في مدينة امدرمان , كنت اذهب ذلك المشوار قسرا فالوالد رحمه الله جنو وجن تلك القرية الكئيبة الراقدة غرب النيل وكانها تحتضر فكان من سؤ طالعي ان ارافق الوالدة في ذلك المشوار البائس , ما ان تنتهي الحضارة والعمارة والثقافة بدخولنا الي كبري النيل الابيض الا ويتبدل الحال وكانك انتقلت من النعيم الي لظى , يبدا البؤس والرتابة ومظاهر البداوة تطل براسها من كل مكان , اذكر جيدا في ذلك المشوار في ذلك الزمان وما ان يدخل البص الكبري الصغير الي ذلك الخور الذي استفرغه النيل علي مضض او ما يسمى خور ابوعنجة الا وانا اري جمهرة من الصبيان( البؤساء) العريانين ملط ( تيوبلس) لا يستر عوراتهم شي يتقافزون في ذلك الخور من تلة قريبة ورغم انهم وصلوا الي مرحلة البلوغ تقريبا الا انهم لا يتورعون عن العرى كحالة عادية متسقة مع كل ما حولك من بؤس وبداوة وقروية تشيع في المكان , فهم كوافدين الي تلك المنطقة حديثا لم يتعلموا بعد المدنية ولم تغشي اذهانهم الغرة ضرورة ستر عوراتهم علي الاقل من المارة او من بعضهم البعض ولكن يبدو انه الحالة واحدة عندهم ولا حرج في ابدائها اي عورتهم فالامر بالنسبة اليهم ليس عيبا من واقع بيئتهم , وبقراءة سريعة لهذا المشهد اكاد اجزم ان تمبس احد هؤلاء ( التيوبلس) بحكم سكنه القريب من ذلك الخور بل اكاد اتخيله وهو يقفز من تلك التلة الصغيرة في الماء ويعوم بطريقة ابو رفاس البدائية التي تصدر اصواتا اكثر منها عوما ( دمبلوغ ...دمبلغ ..دمبلوغ ...دمبلغ ) كنت اشاهد هذا المنظر كل خريف اذا جبرتني الظروف الي زيارة اؤلئك المنفين من خيلاني في تلك الاصقاع المنسية من القرية الكبيرة امدرمان . وقتها انا كود خرطوم كنت احد فتيان الكشافة البحرية يا تمبس يا بتاع خور ابوعنجة حينما كان كشافنا الاكبر هو ابوكم نميري هيم سيلف الذي تتفاخر , بالرغم من انا تعلمنا السباحة في اهداب النيل الازرق في ذلك المنحني الشهير الذي انزل صورته وليد الا انا جودناها في حوض الثقافة وحوض الفندق الكبير ولاحقا في حوض البركس , بالاضافة الي النشاطات والتخييم التي تقام دوريا في مجري النيل ابتداء من امدوم وحتي منطقة شلال السبلوقة الداير اقوله ليك يا طمبس البتنادي في قراءة لوحة الخور الفنية انه الوقت داك لو اؤتي لفنان ورسم ذلك المنظر الذي طالما مررت به , لرسمه كما ينبغي ولاجتهد في رسمك بصورتك التي خلقت بها عاريا كما خلقك الله وسط اقرانك العراة (الغرلا)* ــــــــــــ * الغرلا = الغير مختونين
06-19-2013, 08:19 AM
اساسي اساسي
تاريخ التسجيل: 07-20-2002
مجموع المشاركات: 16468
يعني واحد زي تمبس لحدي بداية التزعينات كان كل حافلات الخرطوم الموردة والبصات السياحية وبصات ابورجيلة وكل البكاسي والدواب البتمر من الطريق دا بتمر بيهو وهو عاري كما ولد يجي يتكلم ليك الليلة عن الاسكريم . بت اللذين امدرمان
06-19-2013, 08:21 AM
اساسي اساسي
تاريخ التسجيل: 07-20-2002
مجموع المشاركات: 16468
طبعا عمر الفاروغ كما اشار الي بيتهم جمب الجامع الفي نهاية الخور بي طريق الاربعين , اكيد بيكون برضو كان بيشاهد كتيوبلس لعابري طريق الاربعين ويسأل عن هذا الكلام ركاب حافلات شعبي الخرطوم شعبي امدرمان وسوق ليبيا
06-19-2013, 08:50 AM
أيمن الطيب أيمن الطيب
تاريخ التسجيل: 09-19-2003
مجموع المشاركات: 5845
Quote: كلية غردون ثم كبري بحري ثم ثكنات الجيش الانجليزي(لاحقا جاء مكانها مستشفي العيون وسلاح الاسلحه ومدرسة الخرطوم القديمه والخرطوم التجاريه و وزارة التربيه والتعليم وداخلية البركس) ثم يأتي بعدها البابور مويه (محطة بري الحراريه) ثم حي بري المحس فبري اللاماب )
يا وليد الصورة أعلاه ليس ظاهرا بها برى المحس أو برى اللاماب !!كل الظاهر فى الصورة منشآت وثكنات تابعة للجيش البريطانى,, فى غلاط تانى ميتان كدا مافى داع ليهو,,
يا أساسي ناشدناك أنك تضربهم ..وز زاوت ميرسي ..بس كمان ما قدر دا ــ آآمنت بالله كدا ضربتهم في غرولاتهم .. قلت لي الجماعة زي أبو الرفاس غرولاتهم زمانئذ بتعمل دمببببلغ ...دمبببلغ...دمبلللغ وبي كدا قطعت لي الشك تــب بإنو صورة دبي كانت تيوبليس .. والله يا الخور العملّتها فيهم ....ياخ خور بكري مافيهو حاجات زي دي....قال فينسيا قال ـــ ود مدني ياااا ....أجمل خبر
06-19-2013, 09:06 AM
اساسي اساسي
تاريخ التسجيل: 07-20-2002
مجموع المشاركات: 16468
خلاص يا جماعة .. أعلن استسلامي في مواجهة الغلاط والمكابرة وغتغتة الحقائق وكسر رقبتها عمدا الممارسة هنا من قبل المدعو جرجير .. جرجير تقول ليهو عندنا أملاك في الخرتوم قديما وجديدا يكذبك عديل كدا غلاط بس ودون أن يطرف له جفن حياء ويلصق ليك عبارتو الواحدة الماعندو غيرا ( ما تخوتنا ) .. لا أعرف والله سببا واحدا يجعل المدعو جرجير يكذبني في قصة جدي ( ارباب العقائد ) وأملاكي القديمة والجديدة في الخرتوم اللهم إلا من باب الغلاط والمكابرة ومحاولة أن يبقي على تحشره هنا حاضرا من باب أنا اغالط فأنا إذا موجود مع الناس .. لكن على جرجير أن يعرف أنني لا أدعي ما ليس فيني أو لي بل على العكس أميل دائما لأخفاء أو عدم المجاهرة بالكثير مما أملك وما هو لي لأنني لا أحب المباهاة والمشي بين الناس مرحا لثقتي الكبيرة جدا في نفسي والحمدلله . ويا أساسي أنا ليس (بتاع) أرباب العقائد أنا (حفيدو) يا حبيب وأجدادي القدماء هم الذين أسسوا الخرتوم وأجدادي البعدهم والبعد بعدهم لغاية القرن الحالي دا سكنوا فيها وجعلوا لهم أملاكا آلت فيما بعد للعائلة المنتشرة في كل بقاع الخرتوم بمن فيهم جدي ووالدي وأخوالي وأعمامي ولو عايز أسماء وخرط وعنوانين قول بدل تقعد تغالط الغلاط الشين بتاع جرجير دا . ...................... بالمناسبة : أفخر جدا بكوني سيد جلد ورأس في الخرتوم وأفخر أكتر كوني أسكن البشاقرة غرب على بعد 60 كيلو متر والراقدة على ضفاف النيل الأزرق وفوق رأسها مباشرة يمارس شارع الخرتوم مدني صخبه الأبدي .. خرتومنا ندخلها قبل أن يرتد طرف ناس الثورات وأم بدات وما شابه ونعود إلى بيوتنا قبل أن تبرد كباية الشاي بتاعت الصباح .
06-19-2013, 08:45 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
حال طلحة تنظير ومحمد جرجير في هذا البوست كحال اتنين بيبيعوا تسالي في استاد الخرطوم يوم مباراة للمريخ والهلال , والمباراة في اشدها وتنظير وجرجير ماسكين تلابيب بعض وكل واحد فيهم بيشجع فريق مرشح للهبوط من دوري الليق في ميدان عقرب , لو سمحتوا يا تنظير وجرجير الكورة هلال مريخ ما مباراة الشعب وام القري
06-19-2013, 09:10 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: يا وليد الصورة أعلاه ليس ظاهرا بها برى المحس أو برى اللاماب !!كل الظاهر فى الصورة منشآت وثكنات تابعة للجيش البريطانى,, فى غلاط تانى ميتان كدا مافى داع ليهو,,
اها ده السيك ذاتو !!!
يعني ناس حلتهم شكلها شنو ما عارفنو ؟ يا ايمن انت ماسك الصورة دي بالقلبة ياخ
هاهاهاهاهاهاهاهاهاهاهاهاهاهاها
الله يفضحك محل الاسهم الحمراء الخاتيها دي بحري المزاد والوابورات
الصورة دي عكس الصورة الاولى
جيب من جوه يا حبة
06-19-2013, 09:20 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
لكن اصلا الصورة لبحري عشان كدا الفوكس علي بحري وبتظهر العمارة بوضوح , اما بري بزاوية هذه الصورة وكما ذكرت طبيعة البناء الطيني المشابه للتربة المحيطة ما بتديك الصورة الحقيقية للواقع وكما اسلفت ليك انه الناس في الزمن داك شوية و يعيشوا في حيشان هناك بري الدرايسة وبري المحس لا تظهران في الصورة جيدا لانها قريبة من النيل ولو مشيت للمنطقة بتاعة بري الدرايسة والمحس بتلقي البيوت مبنية من زمن الانجليز بنفس النسق البنيت بيهو جامعة الخرطوم والوزارات , الداير اقوله ليك انه الصورة ما بتوضح بري بصورة جيدة , اللهم انها بتخدم مصالحك بس عشان كدا اخترتها كونها صورة لمدينة بحري كما يظهر ذلك في عنوان اللنك حقها , جيب صورة للمنطقة بزاوية تانية وتعال غالط
Quote: يا وليد الصورة أعلاه ليس ظاهرا بها برى المحس أو برى اللاماب !!كل الظاهر فى الصورة منشآت وثكنات تابعة للجيش البريطانى,, فى غلاط تانى ميتان كدا مافى داع ليهو,,
أقرا الكلام دا تانى وقصة الأسهم دى بالله ما تلصقا لأخوك لأنو كدا بتبقى خرخرة ساى,,
ماسك الصورة بالقلبة!!!! ياخ معقولة!!!
لكن أقول ليك حاجة!!
الغلط ما منك
خلي البيش وخلينا نشوف صورة حلتكم سنة 29!!
06-19-2013, 09:34 AM
اساسي اساسي
تاريخ التسجيل: 07-20-2002
مجموع المشاركات: 16468
طبعا يا وليد مافي حاجة كانت توديني القماير ولا الكباجاب عشان اشوفك في الوقت بتاع ناس تمبس وعمر الفاروغ بيسبحوا في خور ابو عنجة , اكيد بيكونوا شافوك ناس الريف الشمالي بوضعك داك كونك جزء منهم ^_^
06-19-2013, 09:36 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الليلة شايفك عاوز تعمل ليك مخارجة زي تمبس من الحورية لكن يا عمك قصتك ما بتشيل
يا اساسي
السوال المهم ما عن شكل بيوت بري كيفنو
السوال الاول عن حجم بري القادينا بيها وانت في صورة ماخودة بالجو من منطقة الاملاك ما قدرت تفرزها السوال التاني وهو المهم : علاقة الكم بيت الما ظاهرات ديل بالخرطوم شنو ؟
الشاهد انو سنة 1929 عندما لم تكن لبري علاقة بالخرطوم سوى انها تقع في الضف الغربية للنيل الازرق وكانت عبارة عن خمسة بيوت مجتمعات كانت امدرمان بتأسس للاغنية السودانية .. وبتنقلها من الطنبره للاغنية المعروفة ... لياتي اساسي سنة 2013 بعد ما بري اتلصقت مع الخرطوم ويفتح بوست باسم شفوت والله يشيد فيه بالاغنية السودانية التي طورتها امدرمان في العشرينات عندما كانت بري عبارة عن خمسة بيوت مجتمعات لتصبح في هذا الشكل الذي يعجب اساسي
06-19-2013, 10:26 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
زمااان قالوا بص تاتا ماشي بي شارع الموردة وكعادة الكمساري بينده بي المحطات .. ولمن وصل الدايات بقا يكورك : الدايااات يا حد نازل؟؟ في واحد عمك كده بي صوت واااطي بيقول ليهو :أيوة والكمساري يشييل وينادي : دايااات يا ..دايااات حد نازل ؟ وعمك براااحة بيقول ليهو أيوة.. دايااات يااا .. دايااات يااا حد نازل؟؟ الراجل كورك بي صوت عااالي وقال ليهو : يعني إلا نقول ليك الله لي؟؟؟؟ ما قلنا لييك اااي نازلييين ياااخ ..
وحكينا القصة دي ليييي؟؟؟ عشان يا وليد الجماعة ديل إلا يقولوا ليك الله لي؟؟؟ الناس ديل اتعصروا عديييل كده فياخ أعتقهم ...
06-19-2013, 10:31 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: وحكينا القصة دي ليييي؟؟؟ عشان يا وليد الجماعة ديل إلا يقولوا ليك الله لي؟؟؟ الناس ديل اتعصروا عديييل كده فياخ أعتقهم ...
يا عمر .. ده حاتو لسع ما اتكلمنا عن امدرمان !!
نحن لي هسع بننضم عن بري بس ... يعني يا عمر هب مثلا قلنا نعمل مقارنات
وقلنا كل زول يكتب لسته بـ الرؤساء في منطقتهم ، والشعراء في منطقتهم ، والفنانين في منطقتهم ، والاندية في منطقتهم ، ولعيبة الكورة في منطقتهم ، ومدراء الجامعات في منطقتهم ، ورؤساء الاحزاب في منطقتهم ... وعييييييييييييييييييك
باقي ليك .. هسع الكورة دي كانت بتكون كم كم ؟
06-19-2013, 10:37 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
اولا يا تنظير هاك دي لأنها بتفقع حاجاتك : ما تخوتنا :) ثانيا انت شكلك ما فاهم الموضوع شنو, قصة انو جدّك ارباب العقائد وانت تمتلك الخرطوم وشنو دا كلام هبوب ساي, لأن الفيصل انت من وين ونشات وين وتشرّبت بياتو ثقافة , انت أهل عوض دي كتبتها بخط يدك وقلت ما ناكرها, قلنا ليك أهل العوض من المستشفى و انت نازل, يعني لا يستقيم انك تدّعي انك من أهل الخرطوم وثقافتك وعاداتك من عاداتهم أنا مثلا والدي و أهلي من أمدرمان وعندهم ورثة وأملاك فيها لكن لأني نشات في الخرطوم لا ادعّي اني من أمدرمان فهمت يا كيشة
أساسي هلكتنا ياخي بكورة الكشّافات دي و الهرجي دي, اولاد قلبها بعد خسرو الماتش عديل نفخت فيهم الروح باللعب الجايط دا, ما عندك كورة واطة بالله اقعد برة ارتاح شوية و اتفرج هههههههههه
Quote: وقلنا كل زول يكتب لسته بـ الرؤساء في منطقتهم ، والشعراء في منطقتهم ، والفنانين في منطقتهم ، والاندية في منطقتهم ، ولعيبة الكورة في منطقتهم ، ومدراء الجامعات في منطقتهم ، ورؤساء الاحزاب في منطقتهم ... وعييييييييييييييييييك
أيوااااا يا شفت دا الكلام, خلينا من الصور و العاك عيك عايزين مقارنات واحصائيات ومعلومات مفيدة, حتى لو جابت الاكاديميات الدمّها تقيل برضو ما مشكلة, في النهاية الفايدة حاصلة بس من اسي نتفق المن المنطقة مقصود بيها مولود فيها ولاّ ساكن فيها حاليا عشان بتفرق
06-19-2013, 11:07 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: أيوااااا يا شفت دا الكلام, خلينا من الصور و العاك عيك عايزين مقارنات واحصائيات ومعلومات مفيدة, حتى لو جابت الاكاديميات الدمّها تقيل برضو ما مشكلة, في النهاية الفايدة حاصلة بس من اسي نتفق المن المنطقة مقصود بيها مولود فيها ولاّ ساكن فيها حاليا عشان بتفرق
اي حاجة نحن معاكم فيها
انت ختو شروطكم .. ونحن بنمشي معاكم فيها
06-19-2013, 11:33 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
هههههههه يا ود الفاروق ركبك زاتها بالتكسّرها ليك, اسي تجي صور امدرمان انت زاتك ح تشبكنا خلّينا منها
يا شفت في موضوع الفن مثلا اغلب شعراء وفناني زمان سكنوا امدرمان لكنهم ليسوا من مواليدها فا عايزين نتفق على طريقة تصنيف واحدة, هل المقصود بإبن المنطقة المولود وقام فيها ولاّ من انتقل ليها وصارت سكنا له انا بقول نبقى على الأولى عشان امدرمان تقعد في السهلة ساي :)
06-19-2013, 11:50 AM
omer osman omer osman
تاريخ التسجيل: 06-09-2007
مجموع المشاركات: 15218
في امدرمان والكلام ده جد ... كانت تقدم للضيافة حاجتين ... الحاجة الباردة... والبوم الصور
فالله الصور دي معروفة في المنطق مناسباتها صورة عمر 7 يوم صورة عمر 6 شهور صور في عيد الميلاد الاول صورة في عيد الميلاد الثلث صورة الطهور صورة في سنة اولى وصورة للعرس
06-19-2013, 12:02 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: يا وليد : الجماعة ما لقوا بيوتهم في الصور الجبتها ..بقا اييي زول يقول ليك خلينا من الصووور .. احححححيييا .. أضحكي يا ركبي .سنوني مكسسرة :) :) :)
يا عمر
خليناهم من تحديد بيوتهم خيهم يورونا علاقة بري الفي الصورة دي .. بالخرطوم حقت الخواجات شنو ؟
ما عندك اي مشكلة خلينا الصور نقلب صوت بس
ارفع ليهم تسجيلات كرمة وسرور في العشرينات ... ولا برضو حا يشبكوني خلينا من الغناء
06-19-2013, 12:23 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
يا ود البشرى هاك دي عشان تقيم انت حا تدخل المنافسة ولا اخير تشتت من هسع
محمد بشير عتيق من مواليد ابورف ابو صلاح من مواليد الموردة عمر البنا من مواليد بيت المال عبد الرحمن الريح وسيف الدين الدسوقي من مواليد حي العرب احمد فلاح ومحمود فلاح من مواليد حي البوسته عبد الله النجيب من مواليد ود البنا عوض جبريل حي الدباغة
دي من طرف الشعراء بس يا ود البشرى
06-19-2013, 12:33 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: تمام يعني اتفقنا على مواليد المنطقة, معاك ارمي بياضك
أبو حتوت إنت جادي ؟؟ بياض شنو اللي ح يرموهو ياااا دوبك كدا الأمدرمنجية ح يبدو يبيضوا ــ
أكان كدا منتظرّنكم ياناس كرش الفيل وحضرّنا الطرب الطالع الأيام دي في الكفر .... وياريت القطر القالو حمد كان لسّه شغال علشان تجو بيهو .. قال بلوبلو بت حلتهم قال و..مدني ياااااا
06-19-2013, 01:26 PM
tmbis tmbis
تاريخ التسجيل: 10-19-2002
مجموع المشاركات: 24862
غايتو يا وليد .. ويااولاد سنترا بالغتو .. .. انا اشك انو اساسي دا بلعب مع ود البشرى في فريق واحد .. يا اما كمان اساسي بيحب يبيع .. وسياسة البيع معروفـة من زمـن بري كانت في الأولى .. .. دخلته قبيييلك الصباح .. ولما كان عندي مشكلة في السيرفر ما قدرته ادخل تاني .. امتعوني اولاد سنترا .. حتى والواحد غايب بيضمن انو باقيهو بيلعب .. ..
06-19-2013, 01:19 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
محمد بشير عتيق من مواليد ابورف ابو صلاح من مواليد الموردة عمر البنا من مواليد بيت المال عبد الرحمن الريح وسيف الدين الدسوقي من مواليد حي العرب احمد فلاح ومحمود فلاح من مواليد حي البوسته عبد الله النجيب من مواليد ود البنا عوض جبريل حي الدباغة التجاني يوسف بشير من مواليد حي العمده الصادق الرضي صديق مدثر حي الهاشماب عبيد عبد النور سيد عبد العزيز حي العرب ابراهيم العبادي حي الشهداء الامي حي الركابية أحمد محمد صالح ( النشيد الوطني ) الشهداء
Quote: وبحر شنو القاعد تقطعو عشان تطلعنا نحن الغرقانين ديل ..؟ شوف يا تنظير الكلام دا تقولو لي اساسي .. لانو انا القدامك دا لما البحر يزيد زي ناس اساسي ديل بجو هناك جمب عتبات قليج محل عاملين لينا دايفن من الشوالات قاعدين ندق منو راسات .. ناس اساسي ونوعيتك دي بيجو شان يتفرجو بعد شوية الواحد يملص هدومو وقايل المسالة ساهلة ويجي ناطي .. بعد شوية يقعد يكورك اللحقوني .. اها انا القدامك دا .. كل ما البحر يزيد كنت بطلع لي بالميت عشرة حداشر وهم في الرمق الأخير ..
في الصفحة التاسعة من هذا الاحتفال كتبنا اعــلاه .. ونحن لما قلنا لي حسبــو امتعتنا بي خور ابوعنجـة .. كنا نعرف ما هي المتعـة في خور ابوعنجــة ... ولو شئت قول البندقيــة او قول فينيسيا .. عندما يبلغ الشفت فينا سن الفطام .. الواحد ابوهو بيشيلو في ضهرو وبيدخل بيهو نص خور ابوعنجــة .. وبرميهو جوه البحر ويجي طالع .. اكان حتل بي وشو .. دا ما ود سنترا ويجب اعادة صياغتـه .. واكان جا مارق كمان شفوت قلبا ظاهرين من هم صغار .. اهـا انا القدامك دا .. ما رموني شفته كيف ..؟ انا القدامك دا لما عمري كان سنـة ودقداق كدا .. كنت بطلع براااي في حديد كبري ابوريش .. وبجي ناطي .. طبعا لو قعدته اوصف ليك في كبري ابريش ما بتعرفو .. هو بي اختصار الكبري البعد عوضيـة سمك ، لانو انا متأكد تماما انك بتجي تعضي سمك في عوضيـة ولا يرمش لك طرف ..ولا جفــن .. عصرياتنا في خور ابوعنجــة كانت عصريات عجيبة .. على طول الشط .. كبابي الشاي السادة وانواع مختلفة من البسكويتات ينتظرو بها المغربية وما ادراك ما شاي المغربية .. والتورتات والكيك الانقليزي .. ايووووووون الكيك الانقليزي .. وللمعلوميـة الكيك الانقليزي دا برضو كان ما عرفته تاكلو كويس يا ما عرفته تاكلو من بي ووين ممكن عايدي جدا يعمل ليك وجع راس بالجمبـة برضو .. زيو وزي اي اسكريم .. شفته كيف شان بعدين ما تقول ما كلمتك العصريات الناس بتلقاها مقيله على الشط .. شيب وشباب وكذا القيد الاماليد والحسان الحور .. امدرمان دي ما بغنو ليها ساااكت .. عارفنها اهله .. بالمساء .. وانت ماشي على بالليل .. مراكب وقوارب .. تمخر عباب الخور .. جية وذهابا .. من الكبري لي الكبري .. واحب انوه هنـا لي .. شجرة ناس عمر الفاروق دا .. اي وايم الحق شجرة ناس عمر دي كان الناس بتجي توصله كمعلم بارز وتاخد منها يمين عشان تمشي الفاتح الكوتش عليه رحمة الله .. قوارب تمخر عباب النيل برااااحـة جدا .. مع اصوات الموسيقى لترقص انعكاسات الكهارب على الخور من بيت ناس فرح والمامور وناس صلاح تراوه فوووق وسلالم قليج .. وإلخ إلخ .. منظر مثل هذا .. مثقل بالجمال .. لا يمكن توفره إلا بالجنــة .. وجنة عدن على وجــه التحديد ..
06-19-2013, 01:59 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عليييك الله يا تمبس وعليييك الله باااقي ليك الناس ديل ح يفهمو يعني شنو خور ابو عنجة بعد المغرب في أيام الخريف والفيضان ؟؟؟؟ تتخييل إنو ممكن يفهمو إنو كل بيوت الموردة والعباسية وبانت وحي الضباط وابكدوك والهاشماب وحي الأمراء بتكون خاااوية على عروشها تماااماً شيباً وشباباً رجال ونسوان أولاد وبنات كللهم قاعدين على امتداد خور ابو عنجة في كرنفال أقل ما يمكن ان يوصف بيهو إنو ضرب من ضروب السحر .. تتخييل ممكن يفهمو صوت الطبلة والإيقاع في نص الخور ومركب تصدح بي الغناء بينما يشاركهم كللل الناس الجالسين على امتداد الخور؟؟ تفتكر ح يفهمو إنو ولمدة شهرين متواصلين ويا قول ناس البنوك 24\7 اااي 24 ساعة طواال الاسبوع الناس بتكون في هكذا حياة .. تفتكر ح يفهموا إنو حياة كاااملة مكملة علاقات إنسانية جكس..حب خطوبات حفلات أعراس كلللها كانت شهادة الميلاد قد حررت بجوار شعيب للسمك وميدان قلب الأسد وميدان ابوعنجة؟؟ ياخ والله بالجد جد يا علاء حسيييت الناس ديل بعيييدييين ونحن تعبانين معاهم ساااي ..
06-19-2013, 02:03 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ياخ اقول ليك حاجة يا علاء.. الناس ديل لو شافوا الدورة الرمضانية بتاعت البراعم في ميدان ابو عنجة والتنظيم والحضور الجماهيري واللبس بتاع اللاعبين والمستوى بتاع الدورة والله كان عااادي قناة الجزيرة الرياضية بثتها في +9 و +10 وبي رسوم إضافية ..
06-19-2013, 02:10 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: يا ود البشرى كل تأخييرا فيها خييرا ..علييي مهلتك وليد ده اصصصلو ما مستعجل :)
هههههههههه هي لكن قوقل يشيل ويجيب صفحات فيس بووك و الفيس مقفول في المكتب ثم بعد دقسة جكسا و الربيع تاني معلومة ما متاكد منها واراجعها مرتين تلاتة ما بكتبها
يا شفت بديت بالجواكر شكلك لكن النبشّرك العشرة طوييييييلة ولسّة الفنانين و لعيبة الكورة و السياسيين و الإعلاميين والمعلمين والأطباء و العلماء ..... وعييييك
06-19-2013, 02:16 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: تتخييل ممكن يفهمو صوت الطبلة والإيقاع في نص الخور ومركب تصدح بي الغناء بينما يشاركهم كللل الناس الجالسين على امتداد الخور؟؟
لا حووووولا يا عمر لا حوووووووووووووووووووولا .. هيجت اشجاني يا رجـــل .. والله يا عمر هيجت اشجاني .. بت الكــــــــلـــب التقنية جايانا حسع دي في الالفينات .. يوتيوب .. وايفون .. واتش دي .. وكاميرات فيري هاي ريزلوشـن والله لو كان بس مهلتنا شوووية .. كان خور ابوعنجـة دي نطلعو ليكم من عجائب الدنيا .. واول اعجوبــة على يدك الشمال .. لكن بس نحن حقنـا ضايع في الرجليـن ..
06-19-2013, 02:10 PM
tmbis tmbis
تاريخ التسجيل: 10-19-2002
مجموع المشاركات: 24862
بعدين تعال هنــا .. ياتو .. مسبح .. وياتو حوض سباحــة ..؟ انت ما عارف نفسك بتتكلم ليك مع تمساح ..؟ ااااي تمساح راسو عديل .. انا القدامك دا تمساح .. نوووووووو .. نووووووووووو جدا .. ما ليك اي علاقـة بي اي مسبح ولا كشـــافة امسكم ليك واحد واحد .. واديك ميزة تانية .. من شدة ما بمسكم ليك .. بعد ليك المسبح الواحد فوقو كم رخامه .. اضف لذلك .. بشيل كم لتـر مويـة .. هل تعلم انو البكتب ليك في المداخلـة دي كان من ضمن مجموعة مفروض تمثل السودان في منشط السباحـة .. في جمهورية مصر العربية وقتئذ ؟ ما بتصدقني .. تمثلك وانت الوكت داك ما عارف المويـة فيها كم ذرة اوكسين وكم ذرة هايدروجيــن .. تشرب سااااي وما ناقش اكان قلت لي دربك منو سباحــة .. بعرفك .. اكان قلت لي كان بنزل معاك منو في المسبح من دورك .. بعرفك .. اكان قلت لي كان منو في البنيات وقتئذ برضو في منشط السباحـة برضو بعرفك .. واديك ميزة تانية .. انا طبعا ما ح اذكر ليك ولا اسم مدرب ولا مدربــة .. لحدت ما تجي تقول الكلام دا .. وفي كل المسابح القلتها دي .. كنا من المسبح .. ومعانا سباحاات السودان وقتئذ ، ولاعبات الباسكت والطايرة في نفس الوكت معظمــن .. والاهم من كدا .. وحيات ابتسامتك كنا مرات بنقطع حصـة السباحـة عشان نلحق حصة التدريب حقت تنس الطاولة على ايدي الخبراء الكوريين في صرحنا العظيم قصر الشباب .. يعني تخيل اهتمامات زي دي في وكت زي داك ـ تنس طاولة كرة طايرة . باسكت ... وجمبار مرات مرات .. وكرة قدم تطلع فيها وهي ماشــة .. وحيات ابتسامتك الوكت داك حايم مع زولك بتاع العمارات داك ابو مارسيدس ونجفـة وقاشر بيهو وعامل بتفتح بيهو ختاها ليك في النهاية بالحتة الفيها الحديدة .. اما ناس طلحــة .. داك الوكــت الواحد قلوبيتو وسبيب حصانو في مخلايــة .. (وام بليل) في الجيب حق العراقي .. نحن والله لو عارفين في الفين وطلطاشر بنكتب معاكم .. الواحد كان وثق شهاداتو دي في المجلس البلدي بتاع امدرمان ويجي يعمل ليكم ليها اتامشنت هنا دا ..
06-19-2013, 02:18 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: هي لكن قوقل يشيل ويجيب صفحات فيس بووك و الفيس مقفول في المكتب
والعجب نوع البتشوف الحاجة الدايرة ظااهرة في قوقل نقط نقط ..تخش اللينك يقول لك الرجاء التسجيل لرؤية المرفقات وتصفح المنتدى ونسخ المعلومات مع تحيات أولاد اللعوتة ..
:) :) قوقل ده بقا ماسوة كبيييرة يا عمك ..
06-19-2013, 02:27 PM
tmbis tmbis
تاريخ التسجيل: 10-19-2002
مجموع المشاركات: 24862
ياتو كشفــــــافة في الكشافات ..؟ واللا كشافتك دي إلا تكون كشافــة استاد الخرتوم .. اها اديك ميزة .. بمسكه ليك من البريــة ايام كابتن سكــر ... وبطلع ليك بي الجويــة ايام كابتن شادية وكابتن معاوية سطيح .. والجوالة عاطف عبد المجيد الكشاف الاعظم حاليا .. ودا المسمين عليهو عاطف منصور اللي هو اخوي الصغير .. االي هو طلع كشاف وسباح عظيم .. وحائز على بطولة الجمهورية في الجودو .. تيمنا بي عاطف عبد المجيد .. المكنى بي عاطف جودو لانو كان بطل جودو عاطف دا .. الكشافات دي كلها كانت حكرا على اولاد امدرمان .. وبعض التلاقيط من اولاد الخرتوم ... وبالمناسبة .. اولاد الراحات من اولاد الخرتوم ... زي صاحبك بتاع المارسيدس والاسكريم داك .. يعني الوكت داك .. نووووووووووووو .. انت مافي والان .. الان .. بي تلفون صغير ، نتصل على كابتن مصعب الكشاف البحري الخطير .. وندقك فتاشة .. وتاريخ الكشافة البحريــة .. نشوفك كنت في ياتو كشافة معلق ومدلدل كرعينك .. شكلك دا من النوعية البتمشي الاستاد وشايله قصبة وتطلع في الكشافات وترمي قشر القصب عشان تأذي الناس مش كدا ..؟
06-19-2013, 02:30 PM
مرتضى احمد عبد القادر مرتضى احمد عبد القادر
تاريخ التسجيل: 12-30-2009
مجموع المشاركات: 2484
Quote: يا شفت بديت بالجواكر شكلك لكن النبشّرك العشرة طوييييييلة ولسّة الفنانين و لعيبة الكورة و السياسيين و الإعلاميين والمعلمين والأطباء و العلماء ..... وعييييك
طويلة شنو يا حبة ؟!
شكلك كده ثلاث شوتات وتنفض صلبك وتدينا ضهرك وانت ماشي تفك معاك اللزق ( على قول عادل امام ) وتفسح المجال لي مدينة تانية
هسع دي توزيعة الشعراء بعدها توزيعة لعيبة الكورة بعدها توزيعة الرؤساء
الرابع زاتو ما حا يوزع
هسع في الشعراء ديل .. ترمي ورقك وندكها ونعدها ليك 200 ولا ترجى الخمسين ونعدها كلها
06-19-2013, 02:43 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
يا وليد .. إنت كمان خليك تفتيحة .. ود البشرى شكلو حافظ ليهم اسم كم شاعر كده لكن ملاااوز يكونوا من امدرمان ..فقال احسسسن تجي منك ولو انت كتبتهم يبقا يا دار ما دخلك شر ويسقطهم من حساباتو .. لو تسمع نصيحتي اقيف لحدي هنا خلينا نغيير لون البوهية عشان ما نحت الأتو ..ويرمي كبيرو .. مع إنو بي حركاتو دي شكلو ورقو أبيض ..
06-19-2013, 03:39 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا علاء يا اخوي صدقني وقطططع شك اساسي ده بيكون قاصد الكشافة البيربطوها فووق راس الحمام لمن يكون عندهم " بارطي " بتاع ود أختهم جاب 57 % في الشهادة السودانية .. انا أدعم وأبصصصم بالعشرين إنو غالبية لو ما كل اعضاء الكشافة البحرية الجوية البرية ال ال ال كللهم من امدرمان .. وده عن دراية تااامة بالمناسبة
06-19-2013, 04:38 PM
عصام علي أحمد عصام علي أحمد
تاريخ التسجيل: 07-16-2006
مجموع المشاركات: 2419
Quote: ويمضي الدكتور أبوسليم سرده فيشير إلى أنه في عهد الخليفة عبد الله أستمر توسع المدينة وبدأت المنازل تشيّد بالطين والطوب والحجر مكان تلك التي كانت تشيد بالقش والجلد والشكاب وبدأ المكان يتحول إلى مدينة دائمة بعد أن كان معسكراً للهجرة في سنة1885م وهي السنة التي توفي فيها المهدي. بنى الخليفة عبد الله بيت المال والسجن المسمي (بالساير) وبعد عامين شيد الدور الأرضي من منزله بمواد أحضرها من الخرطوم
خليفتكم جاب مواد البناء من العاصمة
06-19-2013, 05:20 PM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
والله يا اولاد ام در شفاااته رجالة قلبتو غلبكم لي نصر ساحق باستغلال التناقضات في تيم الخرطوم وضعف اللياقة البدنية لي ابشنب اخوان والاستغلال الامثل لجميع الامكانيات المتوفرة ليكم مع انها حبة شوية لكنكم عملتو من فسيخها فخفخينا ، برغم مساعدتنا لي الخراطمة بي جيب الكورة سرعه من الاوت في حال هزيمتهم ، وتعطيل الكورة وتشتيتها في حال تقدم التيم الامدرماني . اهنيكم على التماسك واللعب الجماعي وعدم الميل للاستعراض والاستغلال الامثل للموراد ، ياخ حتى خور ابو عنجة البكون قبل الخريف كلو بولندا وهراري طلعتو فينيسيا وقصص حب وود والفه واكتسبتو تعاطف الجمهور الاقليمي المتعطش لمثل هذه الحكاوي الرومانسية . اهنيكم مرة اخرى .
ود البشرى مالك صعبتها على روحك ياخ ، كان تخليها سكن بدون مواليد ما كان اتبشتنتا ورا قوقل كدا وكان كسبتا ناس وردي وعثمان حسين وحسن عطية والخالدي والطيب مدثر وزكي عبد الكريم وود اليمني ومن الشعراء اسماعيل حسن وعبد العال السيد والزبير سعيد وعاطف خيري وكمية لا تحصى من شعراء وفناني الطبور .
غايتو لغاية ما تصل البيت اذكرك سميرة دنيا وهاجر كباشي اجمل اصوات نسائية في العصر الحديث ، شفت رغم هزيمتكم بنجيب ليكم الكور سريع من الاوت كيف :)
06-19-2013, 06:39 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
يا عصام شنو شايت على وين انا بحاول ألم في الكور البطفّشها اساسي :)
عاشت دنقلا العرضي وحفير مشّو يا حمد هههههههههههههه , ياخي السكن بضيّعنا ساي, ما مذكر في بداية البوست قالوا ليك الاراضي في ام در رخيصة العالم دي كلها سكنت هناك عشرة الشعراء دي الياخدوها ما مشكلة بنقشّهم ليك في عشرة الفنّانين و اللعيبة و المثقفين :)
يا شفت النصيحة ليك يا الله قوقل و الفيس بووك زاتو خذلني في الشعراء, خلاص سلّمنا بيها دي, لكن طالما بديت فا كمّل اللستة كنوع من التوثيق لمّا تنتهي خش على الفنانين
06-19-2013, 07:15 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا عمر ويا وليد الشفت .. شوفو لي معاكم الشاعرات .. خدو معاكم حكمت يس وخدو معاكم الراحلـــة ليلى المغربي .. على سبيل المثال
Quote: من موليد أمدرمان 1952 بالحي العريق الموردة,تلقت تعليمها حتى المرحلة الثانوية وزوجة وأم لولدين(أحمد وأسعد),مقيمة بالمملكة العربية السعودية.قرضت الشعر الغنائي وهي في الخامسة عشرمن عمرها.كانت عضواً في إتحاد شعراء الأغنية السودانية.تأثرت كثيراً بأستاذها الراحل الشاعر مبارك المغربي.
من أشهر الفنانين الذين تغنو بشعرها: شرحبيل أحمد عبدالوهاب الصادق كمال ترباس سمية حسن محمود تاور
.. والناس العايزه تقوقل ليلى المغربي ناس فروق الوقـــت ممكن يقوقلو .. ونحن بنوصف ليهم البيت عشان ما يجو امدرمان ويتضهبو ويروحو .. يا كمان زمان في برنامج اسمو نفحات الصباح .. يا اقوليكم حاجة ..؟ لما تفتحو الرادي الصبااااح .. في زولة بتقول هنا امدرمان .. اها هنا امدرمان دي قبال ما تقوله بي شويـة كنا بنلاقيها الصباح وهي مارقــة .. بالمناسبة انتو كنتو بتسمعو البي بي سي ..؟ ااااي البي بي سي الواحدة دي .. البتتذاع من نندن المتصور فيها وليد الشفت دي اها برضو في البي بي سي عوده راكب .. مش راكب بس .. دا كان اركــب عود وقتها .. وناس رانيا برغوت .. ولجين عمران وإلخ إلخ الوكت داك كانن .. ما عارفات الساعة كم زاتوووو
06-19-2013, 07:25 PM
tmbis tmbis
تاريخ التسجيل: 10-19-2002
مجموع المشاركات: 24862
نشيد العلم بتاعكم دا .. بتاع نحن جند الله وجند الوطــن .. البقولوهو ناس هيثم مصطفى والعجب .. وإلخ إلخ .. الكتبو ليكم منو واللحنـو ليكم منــو ..؟ ما اولادنـا برضو اولاد سنترا .. النشيد من تأليف الشاعر أحمد محمد صالح وتلحين العقيد أحمد مرجان من سلاح الموسيقى عام 1958م اها امشو قوقلو أحمد محمد صالح .. وعمنا أحمد مرجان ..
06-19-2013, 07:40 PM
عصام علي أحمد عصام علي أحمد
تاريخ التسجيل: 07-16-2006
مجموع المشاركات: 2419
يا مرض انا بتكلم عن جمهور جمهور بتاع دافوري انتا ما صدقتا زول قال ليكم شفوت وعشت الدور طوالي ولبستا روحك شنكارات واتخيلتا اضواء الشامبيونز وتوووشك خشيت ليك في فنلة وشنكارات وللا شنو يا فردة ، . ، اصحى يا مان انتا لاعبين دافوري دااااافوري انتا ما لاعب في المان هي هي اصحا اصحا .
06-19-2013, 11:40 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
هي لكن عاد يا حمد ده دافوري شنو ده يا اخوي الفيهو ناس بيجيبو الكورة ده ؟؟ انت قاصد دافوري ولا كافوري؟؟ بعدين يا عمك نحن أولاد سنترا ديل لحدددي الليلة وفييي الخور الجيبين ليك صورتو ده وحتتتى هذه اللحظة في دافوري ثابت بي كورة الشراب الأصلية .. طبعاً اتحداك لو بتعرف كورة الشراب الأصلية لأنو إنتو بتكونو النوع البيخت في شراب مقدود (ده شراب تاني غير شراب واحد أخونا كده ) بتختو دومة وتحشوها ورق مش؟؟ اسأل علاء الدين ده نحن كورة الشراب بتاعتنا بنخش ليها صندوق عدييل كورة مقييمة ما سائلة في كورة الفيفا ..شراباتا بتكون أصلية وجدييدة من اديداس يا مان ..ومحشية رز ولحمة مفرومة .. يا حمد الكلام ده صعب عليك فااا شنو كدي خلينا لمن تبدا الونسة بتاعت حش التمر ونندلا تحت وما ادراك ما البابور بعمل ليك (نص) كوول..
06-20-2013, 06:36 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: يا عمر وتمبس بصراحة ورائي شخصي جدا ... الغناء من ناحية فنانين ومن ناحية نوعية لو كان عندي حق ادي جايزة فانا بديها لمدني بدون ادنى شك
شكرا" ياوليد ..ياحقاني ــ و..حالتي محضر لستتي وجواكري وقاعد منتظر ..رغم تحفظي على اللستات الطويلة الخلاصة والزبدة تكفي وومكن أسرّب بعض من جواكري الكاشف الله يرحمو ويحسن إليه لمن جاكم ولقاكم لسه بتكشكشو في الحقيبة كشلو كشلووو...قال ليكم لا دي بتتغنى كدا..ونقل تاريخ الغناء السوداني نقلة نوعية
أها وفي الكورة ورغم إني لازلت بشجع كورة مدني ..وبعض من مريخية بالوراثة بس أكاد إعتقد وأجزم إنو التحت دا وألف رحمة على روحو ما ح يتكرر قريب ويشهد الله في أقوان جابها في استاد مدني شوف عيوني دي لو كانت موثقة ..أقل حاجة كان مفروض يلعب في برشلونة وإعتقد إنو أحسن من نيمار ولاّ شنو ياطلحة؟ ــ معليش السياسة أم الكبائر...إعتزلتها وممنوع منها بأمر طبي.... وبعد دا حقو تعملو منتخب تسمهو ..منتخب العاصمة المثلثة وتبقو مارقين على مدني وهههههه وماتنسو تجيبو معاكم حسبو ..بعد القالوا في مدني ..مطلوب "إن نيم"..من بعض شرامة مدني و...مدني يااااا
06-20-2013, 08:41 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
في الغناء .. شخصيا بدي الاجادة لمدني .. ما عشان الكاشف لقاهو كشو كشو .. قبليه ناس كرومة كانو دخلو الكمجة وحاجات بسيطة .. وهو فعلا عنده دور كبير في النقلة تجاه المسيقى .. والنقلة دي اكملها بصورة اقرب لصورتها الحالية ابراهيم عوض اجادة مدني في نوعية الفنانين البتجيبهم
الكاشف ود اللمين ابوعركي شاويش عصام محمد نور
واللسته طويلة
لكن دايما بكون لمدني في كل جيل زول لو ما كان الاول بين اقرانه بكون في مقدمتهم والاهم من ده انه بكون حفر درب مختلف وجديد في الغناء
في الكورة ماف ليكم طريقة لا من ناحية النوع ولا من ناحية الكم .. مع انو بتجيبوا اشراقات لكن لامدرمان القدح المعلى
06-20-2013, 10:40 AM
حسبو عكاشة حسبو عكاشة
تاريخ التسجيل: 04-25-2010
مجموع المشاركات: 1305
شايف الجماعة قلبوا في ناس هناي مننا وناس هناية جيراننا.. ناس الشاعر والفنان والكمندان، ثم الكوميديان.. ونسوا الموضوع الأساسي أن أم درمان ( مصنوعة ) حديثاً ، هسي الناس القالوهم ديل كللللهم جو متين؟؟ مش ياهو بعد (الصناعة).. وتيب.. خور أبو عنجة!!!! والله البيسمع النقة يقول ده فينيسيا أو خور دبي عديييل ، واللا البحيرة الفي الشارقة .. الكلام ده قولوه لي زول ما بيعرف.. قال أبو عنجة قال.. ياخي نحن أثبتنا ليكم إنو الحفريات بتاعتو طلعت إشاعة ،، الجماعة لقوا ليهم عضام كــلـب نافق ، و (كُدُر) بتاع تور وقال ليك كانت حياة ناس!! و عمر يقول ليك أبو عنجة في الأصيل والخريف والفيضان.. لاحظوا معاي خريف وفيضان دي في السودان شكلها كيف، وتحديداً في محلات زي الخور ده .. يا لطيف.. غايتو عمر صاحبي ده خيالو وااااسع بشكل ، قال ليك شوف لبس اللاعبين (هاهاهاهاها) والله أنا متخيلهم هسي غايتو ناس الجزيرة الرياضية غلتانيييين ، ما شافوا ناس (فريق الأحلام) أبو عنجة ياخ.. يا تامبا، بالله تخيل (أنت وعزيزك المشاهد) الفرق بين حديد كبري أبو الريش، والسباحة (الكيري) وبين أنو يكون عندك برنامج (سباحة ) بموافقة ومباركة الأهل ، مع تجهيز كل مستلزمات ممارسة رياضة السباحة وتحت إشراف مدربين معروفين، وفي الأماكن المحددة لها.. هسي أنا متخيل شكل أولاد أم درمان ( الشفع الصغار ) الشافهم أساسي في مشاويره القسرية الى أم درمان وتخيلت المنظر، فشكراً يا تامبا أن جعلت ذلك ممكناً.. ثابت عند أولاد الخرطوم الإستفادة من الإجازة الصيفية، وممارسة أنشطتهم في الأندية، والمعاهد الدراسية والهوايات(موسيقى، رسم، مسرح، مسابقات أدبية .... الخ) فرق ياخ بين تكون منتظر الإجازة الصيفية عشان تجدع شنطة المدرسةوتتفكفك من البرنامج خلال السنة، وبين إنو يكون عندك برنامج ملئ وتستفيدمن وقتك، فرق والله يا أولاد الخرطوم ، فررررررررررررق.. شكراً على المعلومة بتاعت الكشافة البحرية البقت تابعة لأم درمان دي !!!!! ياخ والله إنتو عينكم قوية بشكل .. ما فارات .. حضارتكم ناقصة ، ناقصة، ناقصة ، ناقصة..... ودعوني قبل أن أستأذن ، في الغياب القسري المؤقت، أن أعدكم بمواصلة الردم ، فأنا هذه الأيام مع الوالدة بالمستشفى بعد أن أجرينا لها عملية جراحية ناجحة والحمد لله.. يا وليد ، أمسح سريع (إنت وأمير) معلومة انو أحمد شاويش من مدني، كان جيت ولقيتها لسة في بتعبكم تعب شديد..
أخيراً ،، أسوأ حاجة إنعدام التناغم بين أفراد التيم الواحد، بيبوّظ الماتش..
06-20-2013, 07:59 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
الف سلامة للوالدة يا ابوصلاح ربنا يواليها بالعافية ويطمنكم عليها الشفت مستعجل عايز ينزل جواكرو كلها من اسي بعد الشعراء جاري على الرؤساء لكن خليه العشرة طويلة وحدّنا هاجر كبّاشي :) يا قول حمد
06-20-2013, 08:30 PM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
حمدا لله على سلامة الوالدة يا صلاح وربنا يطمئنكم عليها
ود الخضر لو ما استفدت من الويك اند دا وكربتا شغلك الشباب ديل بي تنظيمهم دا ومع انه والله مساعداتهم حبة وعاملين من الخلا جنة لكن بغلبوكم بغلبووكم والله ، فا شنو جرب محركات بحث جديدة يمكن يكون فيها حاجات ما في قوقل :) ، وبرضو حمبك وقول دايرين سكن ومواليد .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طلحة عبدالله
عمر الفاروق
أيمن الطيب
وليد محمد المبارك
حمد عبد الغفار عمر
محمد البشرى الخضر
محمد على طه الملك
omer osman
tmbis
مرتضى احمد عبد القادر
عصام علي أحمد
حمد فتح الرحمن
حسبو عكاشة
MOHAMMED ELSHEIKH
عزيز
فيس بوك
تويتر
انستقرام
يوتيوب
بنتيريست