Quote: في تراث كردفاني حيرني اندريا دا ... إيه قصة اندريا .. وهل هو موجود في اصل الأغنية وبرضو بسأل هل لكلمات الأغنية بقية
الاخ الفاضل سنقاوى كلمة اندريا تستعمل كغيرها من الكلمات فى اغانى الجرارى والعنقالى والطمبور الحمرى لزوم اللزمة ومثلها الليمونى والبلابل ديل ويا الله وجمال الرايقة والزول منو الخ.... اما بقية الكلمات فيمكن ان تضيف اليها ما تشاء مع مراعاة التقيد بنمط الاغنية .. هذا اغنية لجرارى خفيف بصوت الفنان الحمرى المبدع عبدالمنعم سليمان المهتم كثيراً بالتراث الحمرى وله الكثير من الاغنيات ذات الطابع التراثى
مع تحياتى
04-10-2011, 12:11 PM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: كلمة اندريا تستعمل كغيرها من الكلمات فى اغانى الجرارى والعنقالى والطمبور الحمرى لزوم اللزمة ومثلها الليمونى والبلابل ديل ويا الله وجمال الرايقة والزول منو الخ....
شكرا يا عمكـ خليفة على الإضافة والتوضيح والفيديو كمان!
04-02-2011, 03:17 AM
محمد على طه الملك
محمد على طه الملك
تاريخ التسجيل: 03-14-2007
مجموع المشاركات: 10624
Quote: ياتو عربيه ....القناه ...ولا السايقا الما سمعت فيها قصة عوضيه سمك
ههههههههههههههههههههههه طارق يا عمكـ .. شايف موضوع عوضية دا مزعلكـ شديد! يا زول إم بي سي شنو كمان الواحد يقعد يسمع فيها! نحن شغالين Ufm ـ Cds ولو كتّرت بنقفل أي حاجة وتسمع نقة أم روان!!
سـلام يا شباب.. للشباب البسألوا عن حكاية أندريا، أصلها شنو ولاّ من وين ما عارفها والله،، لكنها من أشهر وأقدم (لزمات) الجراري، وأول غنية جراري سمعتها كانت بنفس اللزمة وبتقول: الوادي الأضلم ديه (يا اندريا) درب أم حنين جابت بيه كان عمرك خايف ليه هاك عمري سافر بيه الخ.. يعني يمكن مقارنتها ب(الليموني) في : كباشي كان برضى، أو بالليمونة (الليلة يا) التي تؤديها الفنانة حرم النور.. وكثير كثير من اللزمات المشابهة، يعني دي طبيعة غنا الجراري كدة.. وكل غناية أو فنانة أو حكامة (تنجـر) ما شاءت من كلمات جديدة أو تستخدم نفس اللزمات الموجودة وتؤلف عليها.. أتفق أيضا مع الأخ خليفة حمدان في أن (الفرقة ما أصلية) وذكرت الكلام دا أيضا في بوست الأخ فيصل نوبي، وحتى لو نانسي ذات نفسها اعتذرت عن أداء الغنية لعدم وجود الفرقة فهذا لا يؤكد أن فرقة اصلية من ناس بتاعين جراري محترفين لأننا على الأقل سمعناها وبنفرز الزولال (بزوم) عديل من الزول البتعلم أو ال(بِـكُـرْ) لأول مرة! (غايتو الناطقين بغيرها يتصرفوا).. والأخ خليفة حمدان قاليكم هو من خماس البغنوا عليها دي زااتا.. يعني مافي داعي تغالطوا أهل بيت الله كما تقول النكتة والتي ربما لاتصلح لتحكى في مكان عام زي البورد!.. ملاحظة بدون زعل للأخ جنابو الشهير بعمر عثمان: ياخي أنا عندي حساسية شديدة من ال Autoplay في البوستات، يعني مرات تكون داخل ليك بوست شكلة تجيك غنية ناطة..فإن شئت عدلته وأن شئت تركته..
Quote: الأغنية دي شغالة تلاتة يوم (رِبيت) في العربية!!
ربيت ولا ودك يا محمد؟
04-02-2011, 10:47 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
ياخ إتا فتحت البوست دا لأنو عجبتك البنية وربما صوتا العميق دا لا أكتر ولا أقل جوك خبراء وذويقة الفن وعملوا من فسيخ البوست شربات فراولة .. طوالي بس إتلببت الموضوع وعايز تعمل فيها ناقد فني زيك وزي هيثم كابو .. قال لمزيد من الأراء قال بطلوا اللبط والتسلق دا .. ومن زواية حادة : إختشوا .. ............... والنشوفك تاني ما ترد على مداخلتي في أي بوست ليك ..
التحية لصاحب البوست وكافة المتداخلين هذه الأغنية من نمط الجراري بشقيه الثقيل والخفيف فمثلاً رمية "أندريا أو في بعض الأحيان لاندريا" وهو كاتب الدونكي أندريا لور من دينكا مطقة أبيي وهو من أسرة سلطان كان يعمل كاتب دونكي الغبشان في دار حامد وكانت أول أغنية من بنات العريفية عن الإبل التي تشرب وتصدر: شربن قامن صدريا من دونكي أندريا وانتقلت الأغنية كالعادة في كردفان وتطور وتزداد في المقاطع والرباعيات حتى وصلت منطقة دار حمر فكانت: يا الزارعنك في الصريف أندريه.. بسقيك بلا خريف كان ما الصبر تكليف اندريه.. من بيتكم ما بقيف حلاوة القرطاس اندريه.. يا الفي الخشيم تتماص لو ما كلام الناس اندريه .. برحل معاك خماص نشلعه ونبنيه أندريه.. وما تقولوا عاجبني همك طاردني اندريه ..تفسيرك غالبني القمري قوقا وطار اندريه .. خلاني للافكار خلاني للافكار اندريه .. بالكبري قوقا وطار اللوري جا منقل اندريه.. وشايل قزاز الخل اموت ويدفنوني اندريه.. قدام شركة الشل فمثلاً كلمة الصريف هنا فيها تورية المعنى القريب وهو الصريف أي تقسيمات الحوش داخل البيت والبعيد هو الصريف جمع صرفان كصريف خازوق وصريف عنكوش من أجمل المناطق في الخريف. وهنا يقصد حلاوة البنات وخاصة الجميلات في مناطق خماس حلاب والدونكي وحبيل وكافة الخماسات وأم لبانة والخوي ومركب وعيال بخيت والحمرة والدودية وقليصة والسعاتات. أم شركة شل هنا المقصود بها مكتب شركة شل في منطقة الخوي وهو شرق المدرسة الشرقية بالقرب من القيزان وشارع الأحيدب (الأبيض دارفور) حيث كانت بنات المنطقة يخرجن لملاقات البقر بعد عود الراعي في المرواح (المداناة) وكان المكتب مخصص لتزويد السيارات بالوقود في الزمن السابق إلا أنه تهدف وكسر في هذا العهد البالي. وتتمرحل الأغنية من فترة إلى فترة حتى تصل إلى: هجينك الساعي لا تدقه لا تكاليه أندريا ياريته كان عندي نسقيه عصير هندي أندريا ساق النعام مدروك الفادنية ما بمشوك أندريا ودووك صعيد جابوك قلاب بلا صندوك أندريا فالتحية للفنانة نناسي عجاج على الاهتمام بأغنيات التراث والتي ستعزز من موقفها الفني لأن الشعوب ثقافات والثقافة ترتكز على عدة أعمدة أساسها التراث. أحمد التجاني ماهل مترجم وباحث في التراث الكردفاني ملتقى كردفان الثقافي http://www.kordufan.com/[/B][/B][/B]
04-09-2011, 01:16 PM
إبراهيم عبد الحليم
إبراهيم عبد الحليم
تاريخ التسجيل: 10-31-2008
مجموع المشاركات: 3563
Quote: سـلام يا شباب.. للشباب البسألوا عن حكاية أندريا، أصلها شنو ولاّ من وين ما عارفها والله،، لكنها من أشهر وأقدم (لزمات) الجراري، وأول غنية جراري سمعتها كانت بنفس اللزمة وبتقول: الوادي الأضلم ديه (يا اندريا) درب أم حنين جابت بيه كان عمرك خايف ليه هاك عمري سافر بيه الخ.. يعني يمكن مقارنتها ب(الليموني) في : كباشي كان برضى، أو بالليمونة (الليلة يا) التي تؤديها الفنانة حرم النور.. وكثير كثير من اللزمات المشابهة، يعني دي طبيعة غنا الجراري كدة.. وكل غناية أو فنانة أو حكامة (تنجـر) ما شاءت من كلمات جديدة أو تستخدم نفس اللزمات الموجودة وتؤلف عليها..
عيسى يا عمكـ مشكور شديد على حبيب على المعلومات الثرّة والجميلة دي! يا أخوانا التراث دا إنتو نايمين عليهو كـدا مالكم؟ نحن نضيع ساي معاكم؟ تعالوا أكتبوا وورونا الحاصل شنو؟ شكرا والله يا نانسي الطلعتي لينا الحاجات دي!!
تعال يا عمكـ راجع وأدينا الباقي!
04-11-2011, 10:30 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: فالتحية للفنانة نناسي عجاج على الاهتمام بأغنيات التراث والتي ستعزز من موقفها الفني لأن الشعوب ثقافات والثقافة ترتكز على عدة أعمدة أساسها التراث.
يا سلام ياخ! أحمد التجاني يا ماهل .. والله ما قصّرت معانا تب!ّ الله يديكـ العافية وشكرا على المعلومات الضافية الوافية! يلا كمّل معانا وأدونا باقي التراث .. ورونا الناس زمان! الحاجات دي هسي بقت ماشة للاندثار ومن الواجب تلاقي زول يطلعا مرة تانية .. فما تمش بعيد وكمّل يا حبيب شكرا ياخ!
04-11-2011, 09:48 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: بتخيل لي دا أول بوست أعملوا في البورض دا ويطلع بالمعلومات دي كولها! ياخ أنا متحير زاتو أرد على منو وأخلي منو! يلا نمش قدام كملو لينا الحكاية دي!
كلام صاح يا ود الصايم .. ما متذكر ملاسي قال ليكـ كل ما أخش الفيسبوكـ بتذكركـ!! أها كويس إنكـ عملت ليكـ حاجة مفيدة وأهو طلعنا منها بكمية معلومات نجيضة عديل!!
إن شاء الله مبسوط يا عمو!
04-11-2011, 09:49 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: وتلاقيك إتمنيت تكون أنت أندريا البتغني ليهو نانسي
غايتو يا ندوية بالغتي عديل!! تعرفي ذكرتني النُكتة بتاعت الزول الفاز بمليون دولار وما عارفين يكلموهو خايفين يتلحس ليهم .. أها واحد ضرب سدرو وقال أنا بكلمو ليكم تب.. مشا عليهو وقال ليهم: يا عمكـ .. لو ربحت مليون دولار ح تعمل بيها شنو؟ قال ليهو بديكـ نُصها .. صاحبنا بب جا واقع!!
أهـو أنا الواقع دا!!
04-11-2011, 10:00 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: والنشوفك تاني ما ترد على مداخلتي في أي بوست ليك ..
أها كيتن ليكـ يا مسكين .. ح أرد عليكـ! وهذا بالتأكيد يدل على إنو مداخلتكـ دي محض نقة كتيرة منكـ ساي! ودا مردو وبعد التمحيص والتدقيق يعود لأنكـ زول كيسكـ فاضي!!!
وهذا لا يمنع من إنو الزولة دي سمحة!
04-11-2011, 10:05 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
عدو شنو يا عمكـ .. قاعد أشوف الرد دا ح ينزل وين! ياخ عمكـ أب صلعة شال لينا الرد في آخر البوست والردود كولها بقت ورا بعض .. عشان ترد للناس إلا تفتش محل رجلكـ وين!! هسي ناس الصفحة الأولى ديلاكـ ح يلاقو ردودهم هنا .. وهكذا دواليكـ! فكل واحد يشيل ردو يا جماعة .. التفيش على مسؤولية صاحب المداخلة
04-11-2011, 10:40 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
شكرا ود الصائم على ايراد الاغنية التراثية الرائعة هذا النوع من اللحن الثراثى كما سبقونى الاخوة خليفة ومهل هو لحن الجرارى الواسع الانتشار فى دار حمر و دار حامد (ابناء العمومة) دار حمر هى منطقة النهود و غبيش وودبندا و خماسات وابوزبد و الخوى و فوجا وعيال بخيت اما دار حامد فهى مناطق بارا و ام قرفة و طيبة و ما جاورهم.
تؤدى الاغنية من قبل كورس مكتمل من النساء تتوسطهن الحكامة وهى تنشد الاغنية ويساعدها الكورس بترديد المقطع الاساسى و الرمية وفى المقابل صف اخر من الرجال يؤدون رمى الهسيس او الكرير النمط الذى نسمعه همم همم همم فى خلفية الاغنية ويصاحب عادة بضرب الارجل على الارض. وكما ذكر الاخوان من قبلى كلمة الاندرية هى فقط رمية لضبط ايقاع الاغنية و يمكن ان تتبدل باى كلمة اخرى تحفظ تماسك الاغنية على سبيل المثال نحن فى مناطق ودبندا وهى الريف الغربى لمدينة النهود نستخدم كلمة الفنجرية عوضا عن كلمة الاندرية , مثل ان تقول
زارعنا فى الصريف الفنجرية نسقى بلا خريف الفنجرية
او لو ما كلام الناس الفنجرية بسكن معاك خماس الفنجرية
و الفنجرية هى الحسناء الجميلة و يطلق ايضا على الشاب الوسيم وهو الفنجرى و هى غاية فى الجمال و الحسن وجمال الطبع .
هذه الاغانى التراثية كما معلوم برز فى ايصالها الى مسامع الناس الفنان عبدالرحمن عبدالله كما فى اغنية (كباشى كن برضى) للحكامة المرحومة الحاجة حبيبة ابراهيم وهى من منطقة حاج سليمان ريفى ودبندا ولديها دونكى مشهور بدونكى حبيبة و يقال ان الرئيس نميرى فى احدى زياراته الى المنطقة استقبلته الحكامة حبيبة بسيل من اغانى الثراث بصوتها العزب تشكوا معاناة الاهالى فى البحث عن الماء فما من نميرى الا ان قرر بتشيد دونكى للمياه بمنطقتها و صار الدونكى من يومها بدونكى حبيبة و هو ما زال موجودا صرحا ضخما وتوفيت الحاجة حبيبة العام قبل الماضى فبكتها المنطقة كما لم تبكى من قبل.
الاغنية هى:
كباشى كن برضى وصلنى ودبندا الليمونى
زولا سرب سربه و خلا الجبال غربه الليمونى ناولونى لى شربة خلى النقص دربه الليمونى
سامعلى صوت كوراك خلف الجبال ديلاك الليمونى يا زول جريت و راك خليت شريك لباك الليمونى
زارعنا فى البورة وطاطا ممطوره الليمونى زولا جميل صورة بالفاتحه مندوره الليمونى
زارعنا فى بارا و ساقينا اباله الليمونى زولا ستر حالة يا ود الصائم فى الغربة البطالة الليمونى
وايضا اغانى صديق عباس مثل اغنية مطر الرشاش الرشا اليمونى شوقى للمراح النشا الليمونى السايقنه ناس عشه الليمونى
وغيرهم من فنانيين التراث الكردفانى .
خلاصة القول السودان غنى بتراثه و ثقافاته وغالبا هى مشتركة الى حد بعيد على النحو الذى شاهدنا فى هذه الاغنية فهى قد حركت وجدان الكثير من ابناء بلدى بادائها الحنيين دون ان يدرى الناس ان هذه الاغنية تكاد ان تؤدى بصفة شبه يومية و فى كل مناسبات اهلنا فى دارحمر من اعراس وختان الاولاد واحتفالات مواسم الحصاد وغيرهم الى هذا اليوم فهى يا ود الصائم لم تندثر و لكن غياب تسليط الاضواء وعدم الاحتكاك صورها للناس و كان الاغنية خرجت من ايام سرور و كروما.
عموما تشكر ود الصائم فقد اثرت شجوننا بتذكر تلك الديار والاهل و الاحباب و نحن فى الغربة لم نراها لسنيين عددا , و الشكر من قبل للمبدعة ابدا نانسى عجاج و اذكر لما حضرت نانسى عجاج الى امريكا فى جولتها الاخيرة اقمت لها حفلا عاما فى نيويورك وحضر الحفل معظم ابناء حمر فى امريكا من مختلف الولايات و كان اخونا خليفة موسى حمدان من و لاية فرجينيا من ضمن الحضور والان فهى تكافئنا بهذا الجمال من تراثنا, لله درك بنت عجاج من ابداع مدوزن حتى الثمالة.
Quote: الصادق يا المهل .. حبابكـ ياخ! وتعالوا كلكم بالـ (كواريكـ) نبحت مع بعض!! أبقى متوهّط!
شكرا ودالصايم
يا ريت نشيل كواريكنا ونبحت لي الدهب في شرق وغرب وشمال وجنوب كردفان ووسط السودان فهناك الكثير والجميل والقيم من تراثنابتعدد موروثاتنا وثقافاتناولغاتنا ولهجاتنا... فلنبدأ من هذا البوست البحيت وللفنانة الباحثة الرائعة نانسي بدر الدين كل التقدير وأن تتحفنا بالمزيد من أغاني التراث
04-11-2011, 11:16 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: عموما تشكر ود الصائم فقد اثرت شجوننا بتذكر تلك الديار والاهل و الاحباب و نحن فى الغربة لم نراها لسنيين عددا , و الشكر من قبل للمبدعة ابدا نانسى عجاج و اذكر لما حضرت نانسى عجاج الى امريكا فى جولتها الاخيرة اقمت لها حفلا عاما فى نيويورك وحضر الحفل معظم ابناء حمر فى امريكا من مختلف الولايات و كان اخونا خليفة موسى حمدان من و لاية فرجينيا من ضمن الحضور والان فهى تكافئنا بهذا الجمال من تراثنا, لله درك بنت عجاج من ابداع مدوزن حتى الثمالة.
الصادق الزين يا عمكـ .. بالغت ياخ!ّ هسي تُشكر أنا ولّ تُشكر إنت دا؟ تحياتي ياخ على المساهمة الأوسكارية دي ومشكور عليها شديد وتحياتنا للتراث السوداني كلو ويا ريت نعمل كلنا على المساهمة لإخراجه بالصورة المطلوبة وتوصيله للجيل الجديد
شكرا شديد والله
04-11-2011, 11:18 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: يا ريت نشيل كواريكنا ونبحت لي الدهب في شرق وغرب وشمال وجنوب كردفان ووسط السودان فهناك الكثير والجميل والقيم من تراثنابتعدد موروثاتنا وثقافاتناولغاتنا ولهجاتنا... فلنبدأ من هذا البوست البحيت وللفنانة الباحثة الرائعة نانسي بدر الدين كل التقدير وأن تتحفنا بالمزيد من أغاني التراث
حمد ود إبراهيم .. حبابكـ يا عمكـ ويلا .. كل واحد يدخل يدو ويمرق بي حاجة! طبعا نحن قصة التراث دي يمكن تكون عندنا زي 10 في المية ما أظن تكون فاتت أكتر من كـدا .. وعشان كـدا دايرين الباقي!
الكوريكـ يا عمكـ .. جيب الكوريكـ وتعال!
04-11-2011, 01:13 PM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
العزيز ود الصايم تعتبر أغنية أندريا من أغنيات الجراري ولكن الكورس المصاحبة للفنانة نانسي لم يجيد الكرير بالصورة الحقيقية لذا قال بعض المتداخليين أنها طمبرة وهي جراري وليس طمبرة لأن الطمبور عندنا في غرب السودان نوعان طمبور غرباوي وبحاري ويمكن أن نوضح الفرق بينهما ونعطي عليهما نماذج لاحقاً. ونرفق أدناه جزء من ندوة عن التراث قدمتها بالنادي السوداني أبوظبي وبها بعض نماذج الجراري .
الملتقى الفكري أبو ظبي - مارس 2009
تفعيل مفردة التراث الشعبي في ربط النسيج الاجتماعي وفض النزاعات
أدب الأبالة ( غرب السودان نموذجاً )
إعداد: أحمد التجاني ماهل ملتقى كردفان للتراث والثقافة والفنون
إن الشعر الشعبي هو الكلام الذي يقال باللهجة المحلية اليومية للتعبير عن ما بوجدان الناس حيث أنه لا يبتعد كثيراً عن الفصحى وهو كذلك يسمى بالشعر العامي النبطي أو البدوي، أما في السودان فيختلف باختلاف القبائل وطبيعة البادية والسعيه التي تربى فيها. أما عن لغته حسب النحويين هو شعر عامى استنبط من الفصحى. وفي بادية كردفان ينقسم إلى قسمين هما أشعار الأبالة وأشعار البقارة هذا من ناحية الترحال. أما أهل كردفان القاطنين القرى والجبال والمدن فيتعاطون الشعر الشعبي منه البدوي ومنه الشعبي المحلي في الجبال (حسب لغات القبائل وأعراقها). والشعر الشعبي في كردفان عبارة عن لوحة فلكورية متداخلة الألوان تفسر ذاتها للقارئ قبل أن يتمعنها ولكنها لديها جانب خفي لا يخطر ببال المفسر إلا عند ما تظهر ريشات من يرسمها. وهنا سأتناول منه قسم الأبالة فيما يتعلق بالأبل والنساء والخيل: (1) إلبــــل والبــنـــــات والخيــــل ديل جنة الشايل النهار والليل البهديني من جنس المسائل ديل ذنبي عليهو يا قصبة مدالق السيل ********************* إلبــــــــــل ديـل سمحـات هيـبـــة إلبل سلاحهن قرمصيص ما حريبة إلبـــــــل جيابات اليوم أبو دعكيبة سمحات يجنك في القرب واريبة. ********************* شبلنا قرانا وبى غرب الجبال مدينا لفحنا التاية فوق كلسن تلاحظ عينا كان أمسينا ولى وليم البنات شاشينا المحن الكبار دايرات صبُر يا زينا ****************** الليلة البكار بالقران انشــــــكن مدن بى دَمَاسَ لمن حمارهن دكن كان شافن الكرب الحجارو سككن بقدلن قدلة الكانن حزانى وفكــــن ******************* ديـك حفرة طارت كالسحاب جَبَــــالا زاد في السرعة عارف سيدا ما برتالا أم كزمة الزى رطين دارفور نقر حجالا أرح سويــلــها زوغـات المدرج رالا. ******************** خريــر دومــك نزل مجـــــرور وسيدك من فُرق الحبيب محسور بلد السيدة قربت وجاتك أم قرقور أرح سويلها شِيت رقاصة الطمبور ********************* اكسر الهُربة والهيش أم دبيبن ساكن أيديك بتعبو يا العاطن جوالسك وكاكن مخروط الحشا العند الفنايـــد ماكــن ودنا ليهو يا الهباب النجوم اتاكــن ******************* التيس البسرق الخب طلق شوباحا يتقوشل عصار قايلة وهبوب قرواحا عانى الشقَ قرنو ورش بى أرياحا المن عسل النحل يا داري أحلى مزاحا *********************** قام من الحمير وأدلى في خريبانة جاهم زاحى أبو عجلة المسك دندانة قدامـــك زواملن بالقرب مليــــانـــة ما تضيعها راجياها الخلوق عطشانة ********************* دويماتـك بحاكن بهيــل الرىّ أيدياتك يقلبو الدغنة فوق كُرعىّ بعد ما أخر الجَبال لعب أم سى سىّ عانى الديسو خِلقة ربُو مو جورسىّ. ********************* رسنك دير ومن سير الوحش كرابك بى كلو انمغيت بيهو ونفض ركابك الصي والنقوع ما بحملنو غيـابــك ضايق هجمة الناس البقولو حبابك **** بعد ما آخر الكــــــتر أبشديرن رٌوس نشر الداخرو وأصبح في الحشا مدسوس المخروط ضميرها وريدها لينا خسوس عليها أتافح مثل ###### الجرى الممروس ****
يوم تلقانى قادل والبنات لامات ويوم تلقانى ماسك مقرح العقبات اليوم البجرجنا والدموم سايلات بنفرح بى يا فلانة والقلوب ثابتات
وعند أهلنا في البادية أنواع من الجمال (عربيات = 20-22 سنة، بشنديات = 25 سنة، عنافيات = 30 سنة وبشاريات = 30 سنة) أما ألبل (حديثات الولادة تسمى لقحات، والتي أكملت سنة تسمى مرابيع، الدارات أو المخاض تسمى دوار، والباريات تسمى برية أو فدرة) حيث يتدرج البعير في السن (حوار، مفرود، ود لبون، حق، جدع، تني، رباع، سديس، أول شق، جامع وأكثر من عشرة سنوات يسمى ثلب للجمل وفاطر أو قص الروية للناقة) وكذلك الناقة تسمى ( سهيت = لا تحلب وتترك لتربي حوارها، الدوخة، نذرة، مربيت) ويتضح ذلك في أغاني الجراري : ود نذرة مُو (مربيت شِق أمك ليك سهيت يا بشاري وين أمسيت كيف عصارة الساقية الزيت. أنواع الجري: أم طقة، الخب أو الطبق، أم تومتين أو أم زمباق، الترير أو السى سى، القرب أو الواريبة، الربع أو استربع. عدة وفرش الجمل: الرسن = يسمى الكسير – الدير ويصنع من القد. العقال = يصنع من اللحى – القد – الحبل – الصوف. القيد = يصنع من اللحى – الحبل – الصوف – القد – الحديد. السرج = يسمى الكور – الباصور ويصنع من الحميض والجوغان. البطال = يسمى الغردة ويصنع من القد أو القاش. المحقبة = وتسمى الحقاب وتصنع من القد أو القاش. الجباد = يصنع من القد أو الجلد. اللبب = يصنع القد أو القاش. المردفعة = تسمى التركيبة أو الضامنة تصنع من الجلد وتستخدم لتثبيت الفرش. الطواف = تصنع من الجلد. المخلوفة = وتسمى الرقبية. الفروة = تسمى فروة الريف وأنواعها: تويلى وهي السوداء، المرعز وهي الحمراء، أرو وهي البيضاء أو السوداء. المخلاية: تصنع من الجلد أو المشمع.
الاحرام: يصنع من الغزل وبه عدة ألوان. وتقول أغنية الجراري: الركب الكلو تويلى يلقى البادية سهيلى وكت ما شفت السيرى دماعى بـــل سديــــرى. الحشرات التي تصيب الإبل: الشعرانة، الدلم، القراد والصهيب. الأمراض: الجرب = يصيب الجلد الجفار = مرض في الدم يعرف بالبول ويضخم الجسم ويرفض الماء والمرعى. الهلاع = دود يوجد في النبات يورم الحلق والزور ويدمع العيون وينزل الأذنين. الغداد = التهاب. دِمبل = يدمع العيون ويرفض المرعى. الكسارة = يكسر الشجرة برقبته ويثنيها. الرطل = يرخى الأعصاب المحفورة = يطق الرأس. الهدب = شطور في الفم. اللسنة = ورم في الحلق الشعرة = جنون.
البنات:
أمك سمتك اسمن حقيقي ودايم وأني سميتك النعسانة عين النايم لمحة فاطرك البرق السقالو بهايم وخضرة جسمك الدرمة أم نباتن قايم *********************** بدور ليك زمن يا ديفة القنـــــاص بى خط الرمل حفيتِ أصابع الناس رميتى القلوب يا جاهلة بالرصاص خليتى العيون دائماً غميضهن حاس *********************** بـــلتنا بــــلالة وبــــلانا الشوق مالت وانثنت قالت دي كبدة نوق طبع العرب خايل فيها رباية وذوق جملها الخالقها فوق خلقة المخلوق ******************* سنـــــــــك مداحــــــــــــي الفقع وريقك مسخ السكر بعد ما أتنقع عرجون دنقلا العالي ما بـــطقع سيد الريد مقدد قلبو ما بتــــرقع ************** الناس كلهم وجدوا الحظوظ والراحه وأنا الليلة غايراني أم قدود بسلاحه الخلاني اساقد النجمة لى بيــــــاحه بلا تِذِكِر فلانـــه وربتها الميـــاحه. ***************
شبــــهك في البتاريــــــن بعنايــــــة مقزز وخصرك طي حجاب وعنقك طويل ومحزز الجرحــــو غور بـــي لا انفتـــق لا نـــــــزز وينـــــو ويني حتى طيـــــفو البزورني تعزز ***************** وين الهافو ضامر وصدرو جاب تجميحه جبد البُرصة من وجنات طبيعي صبيحة اتخيلتو صيد صواً وطاتــــو قبيــــــحة خلا أكبادنا بي رماشو بايتـــــة جريحة *** بايتـــــة جريــــــحة ليها ليــــــــــالي شالها قلوبنا أبو كزمة الردايفو عوالي النظراتو عنــــــــــــدي غــــــــــوالي عاشقو بـــراهو نساني البعاد وحوالي. *** بـــــــــــــــــــــعاد وحـــــــــوالي مببقولي زي زولا ملامحو غزالي يامخروطة لو عارفة العلي وأحوالي ما بجافي كان حنيتي لي طـــــوالي **** اللبادة:
عادة تبدأ بكورس جماعي للمقطع الأول أو العصا ثم تغني الفتيات ويرقصن ويكر الشباب ويغنون فرادى ومجموعة وأصل هذه الأغاني من منطقة دار حمر ( ود الحليو وسالم ود أم خريف) وانتقلت إلى دار المجانين فأصبح النيل ود أحمد (السوقي) من أشهر كراري اللبادة:
كورس جماعي (نساء ورجال): بريق العينة التور أم سرجيــــــن طراني زولاً زي شارب الشمسين مقطع نسائي:- جـــــــدى العيشوبــــــــــــــــه دمـــــــــر مشاريع النوبـــــــه الليل الطويل شايلا بنقص في دروبه *** سيـــــــاد أم ميــــــــــــــلىِ صب خريفهم ليـــــــــــــلىِ متحلفين مابرعو قش القيلىِ ***** الــــــــــــزول القـــــــــــــوني أبـــــــــــــلونن يشبه لـــــــــوني لموني في خلو الباعوضة تنوني *** قـــــــــــــول يــــــا خشمي جيب الحديــــــث الرسمي متهوم بى ود العزاز المسمي *** البـــــــــت ديفة الوقل مولانا عز وجـــــــل عليــــــــــــها ما وكل بى أيـــــــــــدو اشتغل سوالها ضميــر وقعر ومن فوق سدرها فــر يـــــا حليلك يا تومتي بقــــول على تومتي أم سدرن بقوت ويجي نوريكي يا تــومتي طرف الهدم جــــرى حتى الرقيص طلقى. الجالسة:
من أغني الشيوخ الذين يجلسون تحت الأشجار ويجترون ذكريات الصبا: عانس الـــدفر شوقر على كاشــــا كسار للحدود لمن لحق ساســـــــا عيال جاد الله أهلها والفرزة حشاشا أتى بتشيهى القامولا قناصـــــــــا جفل توقر بعيد ضاربنو رصاصا زى ماسورة الدارعنو بى قاشـــــا أنى الزول الظريف ماسكني هلواسا نبقى سير ورق يكربنى فوق راسا قــــــت قولك معاى تاريكى غشاشا قـــــــــــــت مغذيات تاريكى فشفاشا ما شفتى كفل العنكس الفى الشاية رداسا تمشى هج ورج والتــــــــــالته رقاصا سدرها زى ركوب الأيـــــــــدو هباشا مطلوق من درت لمن لحق ساسا زولة الفرك أيــدو ونصل فاسا لو ما حُكم جابر بقى حساسا والله العظيم ما منـــخاف باسا
التوية:
غناء يتماسك فيه الفتيان بأيديهم من الكتوف في شكل دائرة كبيرة ويقف في نصفها المغني (طقاق تويه) ويبدأ بالصلاة أو العصا ويردد معه الجميع في شكل كورس جماعي ويكون المقطع من أربعة أبيات أو أكثر أو مقطوعة طويلة وعند المقطع النهائي يردد الجميع العصا وهو يضربون الأرض بالأرجل ضربات جماعية موزونة: عصا: الشهر وأزن النجمة طراني بسمة أم كزمة أو النجمة السايقة أبوريه ضوايه على النجوم هيه أو الزول الأيدو تلالها قول بأم بدحه جراها مقطع طقاق توية: جقـــــــــلة البينا أبعدتى على ناس "مور" تحدرتى رعيــــــتى القش تفزرتى نهارك كلو هــــــــجرتى وفى الأسهام تخيــــــرتى صعيد ميدوب وريح برتى أو دليـــلنا للخلوف شايل ركبناالبقرش الدايـــــر حزمنا الرقهن عايـــل قطع وادى القداب سايل خلينا أم قرقدن جايـــــل بخر دماعها متسايـــــل
الجراري:- يــــــا نفسي مـــا تنـــــــــــــــعلى في وكتن قريــــب من الصعيد تنقلى كان للفرقة فرقتي أمات ليهجن يسلى والدينهن يكرمو الضيف قبل ما يدلى **** الزول القــجة قرونـــا أبـــداً مــا بشيقونــــا عجبى الدافن المونــا يحامر الزول بى عيونا *** الدنيــــا دار القــش علمتى أبويا الحــش بعد ما كان بعقر القش فوق المصع ورش
الكدنداية: كردفان الهبَ نسيما ذكرني زولاً بريدو ديما **** كسر بى أبوزعيمة وادي الملك قالوا الريد جريمة وادي الملك كسر بى أبوزعيمة الزمبلك قالوا الحب جريمة وداي الملك *** الجمرة وقعت في الحزه الزول بلا هله شن عزه.
السيار: هز عليّ بــالسنـــــــــــين سمح الدبال فوق أم حنين الفارس والخواف يبــــين *** جدوك من قام طلع تندل عيـــــــل الخيل معا إلبل. **** صقر الجو الحمر كُرعيه قــــول لرفيقه جــدن جيه
04-13-2011, 11:54 AM
tmbis
tmbis
تاريخ التسجيل: 10-19-2002
مجموع المشاركات: 24862
Quote: العزيز ود الصايم تعتبر أغنية أندريا من أغنيات الجراري ولكن الكورس المصاحبة للفنانة نانسي لم يجيد الكرير بالصورة الحقيقية لذا قال بعض المتداخليين أنها طمبرة وهي جراري وليس طمبرة لأن الطمبور عندنا في غرب السودان نوعان طمبور غرباوي وبحاري ويمكن أن نوضح الفرق بينهما ونعطي عليهما نماذج لاحقاً. ونرفق أدناه جزء من ندوة عن التراث قدمتها بالنادي السوداني أبوظبي وبها بعض نماذج الجراري .
.. سلامات يا أحمد التجاني ماهل .. وشكرا جزيلا .. للعلامات الفوق دي .. وشكرا للتخصصية تعرف انا لما دخلت البوست دا قبل كم يوم كان أول مرة استمع لي نانسي في الأغنية دي .. .. حجزت لي مكان وقلت امشي واجي راجع .. بي رواقه لي ود الصايم .. لكن ما لقيت يدي بس .. أول ما شداني في العمل المصاحب .. الكورس المصاحب .. والذي لم يقوم بتوصيل الفكرة كما هي .. انا شخصيا انضرسته عديل كدا .. لقطت من ضمن كلمات الأغنية مفردة (خمـــاس) وهي منطقة اعتقد انها (لقبائل الحمــر) في كردفان .. المفردة رجعت بي شديد جدا لي وراء .. وانا عمري تقريبا اطناشر طلطاشر سنـة .. كان جيرانا في الموردة (حمـــر) ... تقريبا من منطقة (خماس الدونكي) .. كنا بننتظر اي مناسبة سعيدة ليهم .. علشان نستمتع بالجراري .. والكرير المظبوط جدا .. والكدنداية .. وإلخ من ضروب التراث الجميل جدا .. استمعت قريبات دي .. بالصدفة لي .. مغنية جديدة كان جابوها في برنامج رمضان بتاع اغاني وأغاني .. اسمها صباح على ما اعتقد .. ويبدو انها من نفس المنطقة .. زيادية أو حمرية ما متأكد .. لكن المهم اني استمعت ليها في عمل جراجري زي دا .. وصلت بيهو الفكرة بالضبط .. بالرغم من انو كان من غير كرير واظنها من اغاني المنطقة .. المهم .. كان علي نانسي عجاج انها تراجع نفسها كويس .. والكورس المصاحب .. قبل ما تدخل في تجربة زي دي .. واعتقد انها اكبر من امكانياتها الصوتية .. دا طبعا كلام زول ما متخصص لكن متابع وسمع .. الغناء لما يتنقل .. مفروض يتنقل كما هو .. ولو في اضافة من الفنان ما تحسب خصما على العمل .. ..
يا ود الصايم شايف طنظير فاتح ليهو مناحة بي هناك برضو .. كان تتلمو لينا في مكان واحد علشان يسهل رشكم ..
Quote: استمعت قريبات دي .. بالصدفة لي .. مغنية جديدة كان جابوها في برنامج رمضان بتاع اغاني وأغاني .. اسمها صباح على ما اعتقد .. ويبدو انها من نفس المنطقة .. زيادية أو حمرية ما متأكد .. لكن المهم اني استمعت ليها في عمل جراجري زي دا .. وصلت بيهو الفكرة بالضبط .. بالرغم من انو كان من غير كرير واظنها من اغاني المنطقة
تعـرفت يا تمـبس ـ بعد التحايا الطيبة ـ كنت فكرت أجيب أغنية صباح دي لمزيد من التوضيح للزمات الجـراري، مع ظني أن (منعوني سـلام حميدة) دي عندها خصوصية أكتر من باقي اللزمات الشائعة وقد تكون خاصة بشاعرة الأغنية، وأظنها خالة صباح كما ذكرت.. المهم دي للغنية:
بالصدفة لقيت برضو نمـوذج لغنا التوية والذي شرحو الأخ أحمدـ طبعا كل الناس بعرفوا أغنية راقصين التوية بس! ـ طبعا شاكرين لأخونا سيمبا مجهوداته في حفظ الأغاني لكن زي ما قلت فالفيديو أغنية توية وليس جراري..
04-13-2011, 03:24 PM
سلمى تاور
سلمى تاور
تاريخ التسجيل: 09-02-2010
مجموع المشاركات: 1067
تعرف يا تامبا أنا لاحظت برضو إنو الكورس المصاحب بعمل ليهو زي تايم أوت مرات مرات كـدا .. طبعا وبحكم إنو أخوكـ بسمع ساي فمشيتا وقلت يمكن دي الطريقة الطبيعية للنوع دا!
الشكل العام للأغنية وطريقة الأداء لنانسي لا يُعلى عليها يا عمكـ!
_ وطبعا دا رأي مستمع ساي زيي كـدا
04-18-2011, 11:20 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: انت كاتب ليك 14 مداخلة re tmbis وبعدين تجي تقول للناس التفتيش على مسؤوليتكم؟
حبابكـ يا رمّانة .. وكيف أخباركـ تعرفي .. أخونا في الله بكري أبو بكر زمان كامن عامل أيقونتين لـ (أضف رد)! الأولى في المداخلة نفسها .. زي ما هو حاليا، والتانية في آخر البوست! الناس ترد على البوست كلو من النهاية .. وصاحب البوست يرد على المتداخلين من الإيقونة الداخلية للمداخلة نفسها .. قووووم يا بكري حصل ليهو شنو ما عارف شال التحت وخلا لينا الفوق .. أها لما يجو 20 متداخل ورا بعض .. ماف طريقة إلا تسرق الرد في نص مداخلاتهم .. زي ما عملت أنا في الرد على الناس كلها بعد مداخلة تمبس الأولى .. وياهو لقيت الفرصة برضو بعد مداخلتكـ .. فرديت على الناس السبقت كلها مع المحافظة على ترتيب الرد على المتداخلين! وهكذا دواليكـ!!
فـ .. كلمي قريبكـ دا يرجع الأمر زي ما كان!
04-13-2011, 06:03 PM
willeim andrea
willeim andrea
تاريخ التسجيل: 05-01-2002
مجموع المشاركات: 3813
ياخى بالله يا تدعم البوست بي صور زى بتاعت حبيب نورة يا فرتك. سلامات ياخ والله نفسى الاقيك . بلدنا دى ياكافى البلا كان قلت ليك لى زول نكته يضرب ليك نص الليل عشان يوريك انو فهم النكتة بتاعة الصباح ويقعد يقرقر .
04-21-2011, 07:47 PM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
قلت أجي أشكر الإخوة الساهمو بمعلومات عن أصل وفصل الأغنية وبالأخص أحمد الماهل ورغم إنه كلامه مقنع شديد (في الحتة دي) إلا أنني أورد هنا مساهمة وجدتها في سودانايل بعد إذن الكاتب والموقع
أندريا ونانسي عجاج .. بقلم: محمد سليمان محمد موسى الجمعة, 29 نيسان/أبريل 2011 13:36 Share أغنية (لو ما كلام الناس برحل معاك خَمَّاس) التي غنتها ناسي عجاج هي أغنية حَمَرِّيَة من أغاني الجراري المعروفة في منطقة دار حمر. و الجراري هو نوع من الأغاني الشعبية التي لا تزال رائجة في كثير من مناطق حمر الريفية، وينقسم إلى جراري خفيف (أو عنقالي) والذي منه هذه الأغنية، وجراري تقيل. وتتكون أغنية الجراري من أربعة أشطار قصيرة متفقة في الوزن والقافية. ولكن الفنانة ناسي عجاج أتت في هذه الأغنية بكلمة (أندريا) فما حقيقة هذه الكلمة؟ طبعاً في الأغنية الأصلية لا وجود لكلمة (أندريا) وإنما عبارة (مَنْ دريه) بمعنى مَنْ يدري، أو لا أدري.. وهذه العبارة مستخدمة كثيراً في اللهجة الحَمَرِيَّة. ولضرورة اللحن نجد أنها تُنْطَق في الأغنية الأصلية (مَنْ دريا). كما إنَّ لحَمَر عبارة أخرى مشهورة في لهجتهم وهي (لا مِنْ شَاف لا مِنْ دِري أو دِريه): وإذا أراد أحدهم كتم سره أو إذا حدثك حديثاً وأراد منك ألا تبوح به إلى شخصٍ آخر فيقول لك: " ترا الكلام القلته لك دا " (لا مِنْ شَاف لا مِنْ دِري) أي لا تبوح به لأحد. ونشير إلى أن كلمة (مَنْ دريه) الواردة في الأغنية الأصلية هي مجرد (لَزمَة) تضاف إلى أغنية الجراري لضرورة اللحن، وتتكرر في جميع أشطار الأغنية، لذلك نجد في أغاني حَمَر كلمات تسمى بـ (اللحن) وتُعْرَف بها الأغنية ولكنها في الأساس كلمات زائدة تَرِدُ لضرورة اللحن فقط ومن ذلك: (الليموني)، و(الحبيبوني)، و(يا سلام) و(آح يا روحي)، و(الزول منو)، و(المريود) و(خضار اللالوبة)، و(النجيمة)، و(القماري قوقن)، و(الليل بوبا)، و(قمر بوبا) و(مَنْ دريه)، وغير ذلك كثير. وفي السنوات الأخيرة تغيرت عبارة (مَنْ دَرِيه) إلى (النارية) ولضرورة الوزن واللحن تنطقها المغنية النَّرِيَة بحذف الألف مع تشديد النون.
لذلك أغنية (أندريا) التي غنتها نانسي عجاج تكون في الأصل كالتالي
الزارعنك في الصريف النارِيَة.. بسقيك بلا خريف النارِيَة كان ما الصبر تكليف النارِيَة.. من بيتكم ما بقيف النارِيَة حلاوة القرطاس النارِيَة .. يا الفي الخشيم تنماص النارِيَة كان ما كلام الناس النارِيَة.. برحل معاك خَمَّاس النارِيَة نشلعه ونبنيه النارِيَة.. وما تقولوا عاجبني النارِيَة الهم الضاربني النارِيَة.. تفسيرا غالبني النارِيَة القمري قوقا وطار النارِيَة .. خلاني للأفكار النارِيَة خلاني للأفكار النارِيَة.. بالكبري قوقا وطار النارِيَة اللوري جا مِنْقَلْ النارِيَة.. شايل قزاز الخل النارِيَة اموت ويدفنوني النارِيَة.. قدام شركة الشل النارِيَة
شرح المفردات: الصريف: ركن الحوش، أو هو سور من القصب يحيط بالمنزل تكليف: واجب، شيء لا بد منه، يعني هي مكلفة بالصبر تنماص: تذوب خَمَّاس: قرية في منطقة دار حمر غرب مدينة الأبيض نشلعه: أزيل عنه القش وأتركه هيكلاً مِنْقَلْ: مُسْرِع
محمد سليمان محمد موسى من أبناء منطقة النهود – ومقيم بمدينة جدة المملكة العربية السعودية ___________ وزي ما بيقول المثل الشعبي الكلام كتره سمح في القراية
05-01-2011, 08:15 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة