|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. الرقص قيافة .. و فيك لطافة .. يا الابس البمبى !
شرحبيل بمشى مشاوير الهارد روك السودانى عبر دمج الجمل اللحنية للخماسى الغربى - الامريكى ، و تخصيصا روك بلافونت في ايقاع التم تم السودانى ، و الدلوكة ذات المستوى الايقاعي المتعدد the multi - Rhythmic
.. لسبب غير معروف ، قام شرحبيل غنى في عرس بالخرطوم اغنيتو الجميلة : يا ما بكرة تندم .. و انا حالك بشوفو !
.. د. حليم كان من ضمن المدعويين ، نادى علي نور الجليل ( طالب الطب ) اللي كان بعزف جيتار مع شرحبيل و سألوا : انت يا ولد انا مش امتحنتك قبيل الصباح في الكلية .. نور الجليل قال ليهو نعم يا دكتور .. حليم قال ليهو : طيب يا ابنى بالعقل كدا ، في عريس بغنو ليهو يوم عرسو يا ما بكرة تندم ! ؟
جهود شرحبيل و ابداعو خلت المدرسة الاوركسترالية التانية تبقى مدرسة تعدد اللونية ! بالضبط مدرسة قوس قزح
.. رمضان زايد حبيب عوض دكان و منسوب ناس ( الزين قديم ) في بحرى ، و خليل احمد في فرقة الخرطوم جنوب دليل ، رمضان دليل ساطع علي جماليات التنوع في المدرسة التانية ! ببداء الغناء :
.. بكلام زي : يشغل قلبي حبك علي مر الزمان ... و بعرج علي كلام مبارك المغربى : انا ليتنى زهر في خدك النادى .. و فجاة بقلب الموال كلو و بكسر و يقول : الريدة ريدتنا .. و المحبة حقتنا .. ادوهو الاكيدة اتنين خمسة حارتنا !
.. بنذكر في اللحظة دى جماعة الصولفيج الاول : السر عبد الله من ضمنهم ! مات في ظروف اجتماعية و مالية سيئة ، و الاذاعة بتقول السر عبد الله في وضع صحى خطير و بحتاج لمتبرع بزجاجة دم فصيلة (أو - سالب )
.. السر عبد الله شال الكمان العربى المدوزن : صول ، ري ، صول ، ري .. و دوزنو علي وجدان السودان في المقام المتنوع و الاوسع : صول ، ري ، لا ، مي ..
السر و عبد المعين طلائع السودنة و الاختراق التاريخى و هم مع عبد الرحمن الريح و كرومة كانوا بوابة الدخول للمدرسة الاوركسترالية التانية
.. و للكاشف اللي كان رائد البوليفونيا نعود
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: أحمد طراوه)
|
تعال يا جميل ما تبقى بخيل يا لابس البمبى __ ايام الستينات ايام الايام كانت رواق . وكان شرحبيل فى ديك الايام يكتب الأغانى ويلحنها فى مكتب مجلة الصبيان فى شارع الحرية فى حى باريس . على بعد امتار من بيت البيه الكبير حسن عطيه وشرحبيل كمان فنان رسام وخطاط اتمنا يا محمد عثمان أن تجد له تسجيل يغنى فيه لعبدالحليم حافظ اغنية بهواك واتمنا لو انساك يغنيها اجمل من صاحبها عبدلحليم . شرحبيل فنان ماهل فى الافريقى والعربى _ بس يد الاعلام السودانى ملويه ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
الاخ عثماان...
سلااااام و حقا القلوب شوااهد و كأنك تقرأ افكاارى... احتفظت بهذه الاغنية و معها اغنية اخرى للفنان المصرى محمد عبد الوهاب بصوت الفنان احمد المصطفى منذ زمن طويل.. كنت استمع هذا الصبااح للفنان عبد الحليم حاافظ فى اغنية مين نبتدى الحكااية فتذكرت شرحبيل و اغننية اهواك..
Quote: اتمنا يا محمد عثمان أن تجد له تسجيل يغنى فيه لعبدالحليم حافظ اغنية بهواك واتمنا لو انساك يغنيها اجمل من صاحبها عبدلحليم . |
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: محمد عثمان)
|
يا سلام عليك يا استاذ محمد عثمان . ما عارف كلام د/ أحمد طراوة لكن الواحد بفتكر أنو الفنان السودانى لمان يغنى الأغنية العربية بغنيها احسن من صاحب الأغنية . الكابلى . أحمد المصطفى ومحمد الامين غنى اغنية (يا ناعم العود ) احسن من الدوكانى . اسمع الفنانه امال النور وهى بتغنى لفيروز شىء بجنن. سلامات ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... هام جدا دور ( ورش الغناء الموسيقى ) اللي كانت موجودة في السجانة و برى و ام درمان .. و برضو صالون خليل فرح الغنائى اللي انعجم فيهو عود زرياب علي نحو سودانى - خماسى - المقام
" زرياب دخل الوتر الخامس في العود " !
... هل دا ساعد لاحقا في دوزنة العود علي نحو سودانى ؟؟ !
.. مهم برضو دور الفرقة الموسيقية بتاعت طلبة كلية غردون التذكارية ! دى كانت تحت اشراف قائد موسيقى الحدود البريطانية مستر (بينه) .. فيها كان عبد المجيد إمام .. و صغيرون الزين , . و آخرين .. و الفرقة للحق اولاها الزعيم الراحل / الازهرى عناية خاصة لمن كان استاذ بكلية غردون ! و جند ليها صول الموسيقى محمد اسمعيل بادى ، و وصاه خيرا بالاولاد
" من تلك اللحظات و بجد الازهرى كان قائد أمة ! بشوف و بفهم و بعاين بعيد " .. هو بالمناسبة وراء حب ولدو محمد للموسيقى
ما غريبة الراحل ( محمد اسمعيل الازهرى ) كان عندو ثقافة موسيقية عالية ، و كان بدى موسيقى الكاشف اهتمام و عناية كبيرة !
في فرقة الازهرى ايام كلية غردون ، بهمنا تلاتة : عوض فضل الله ، و محمد احمد حجازى ... ديل هم اللي ربطو كفاحم الموسيقى مع الكاشف مبكرا و طلعوا من حيز الاكاديميا الموسيقى الضيق الي شارع السودان الملان في بداية الاربعينات بانفاس الحان كرومة و السر عبد الله و مساعى خليل فرح لدوزنة العود علي نحو خماسى
.. التالت البهمنا في فرقة الازهرى هو محمد آدم ادهم : لانو آدهم هو اللي جاب اسمعيل عبد المعين لعالم النوتة و الصولفيج و نصحوا يمشى معهد فؤاد الموسيقى العالي في مصر ( ادهم درس الطب في مصر وهو اول سودانى عزف فلوت و عمل سيمفونية سودانية كاملة إسمها الادهميات ! جراءة التجريب اللي جابت كل جميل و عجيب ) .. محور آدهم/عبد المعين كان دورو هام في حسم التطورات الاحقة لمعركة انتصار الخماسى السودانى علي صعيد الصولفيج ! ودا المدخل اللي جاب لاحقا الانفتاح و التطور الموسيقى علي يد الكاشف و عثمان حسين .. وصدق من قال ( هذا من ذاك )
... اجمالا نقول :
.. سلاح الموسيقى اللي فيهو الطلائع الوطنية ناس عدنان و ريحان و بادى و زقل ، فرقة طلاب غردون الموسيقية بتاعت الزعيم الازهرى ، محور أدهم/عبد المعين ، خروج خليل فرح في نهاية العشرينات من الصوالين لحركة الشارع و اجواء التم تم ، انفاس كرومة و عبد الرحمن الريح .. دي كلها الخلفيات اللي شكلت ما عرف لاحقا بوهج المدرسة الاوركسترالية التانية و ما عرف ب :
" عبقرية الكاشف " !!
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
ازمة الرتابة الغنائية الاولى The lyrical Monotony ... تصدى ليها كرومة !
.. كرومة فتح الباب لاتجاهات لحنية غنائية جديدة كثيفة و متعددة !
.. علشان كدا عبد الرحمن الريح طرح مشروعو الانتقالي اللي اتسم بالتنوع و المدى البعيد ، طرحو فوق قاعدة اتسمت بالسعة و المتانة ..
يعنى جدير بالملاحظة إنو عبد الرحمن الريح تناغم مع كرومة ، ثم حسن عطية ، ثم التاج مصطفى ، ثم فاطمة الحاج ، ثم ابراهيم عوض ، ثم عوض الجاك ، ثم عوض و ابراهيم شمبات ..
.. ازمة الرتابة التانية تصدى ليها الكاشف !
الكاشف تجاسر علي البحر الشعرى غير الصافى و لحن و غنى كلام عبيد عبد الرحمن :
" و إنت يا الناعسات عيونك .. الله لي عيونى السهارا ! افكارى الحيارا ضاعت باختيارأ .. حبيبى أه .. عقلي تاه .. في يوم الزيارة "
.. كانت نبؤة سرور حول ذلك الصبى الطالع في حيطة حوش ناس ابو جبل في ود مدنى و بغنى معاهو ( انة المجروح ) وقع الحافر بالحافر .. كانت بجد نبؤة صحيحة !
.. خلافا لاحمد المصطفى ، و الحاج / عبد الحميد يوسف ، و حسن عطية .. الكاشف كان بغنى في عدة سلالم موسيقية و ليس سلم واحد ! رغم انو ما بعزف عود .. كان لمن يجيهو اللحن من وادى عبقر بجرى لبدر التهامى جارو في بانت القديمة عشان يدوزن اللحن بنهج كمنجة السر عبد الله و يحفظو !
.. قال حيدر ود تاتا : يوم الهنا و السعد بتاع الكاشف رقيق الحال ، كان لمن جابو ليهو جهاز تسجيل صغير من مصر !
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
" عبقرية الكاشف .. جديد الفن "
.. الولد اللي كان بغنى مع سرور أنة المجروح .. واستلفت انتباه سرور في حفلة حوش ناس ابو جبل بود مدنى .. و كان بنط من حيطة لحيطة ... و الناس تكورك انزل يا ولد ! بتقع يا ولد !
" الولد دا يا هو زاتو ابراهيم ابو جبل "
اسامة حمد النيل الكاشف ، كان قال لينا في محاضرة مسقط بمشاركة عاصم البنا : إنو اصلا هم من قبائل صحراء سينا .. و كان كبارم و اجدادم ( كشيفين ) للقوافل التجارية :
.. قوافل التجارة القديمة بين مصر و السودان .. تجارة المسافات الطويلة .. و الملح الرشيدى اللي شبه بيهو علي ود محلق سنون تاجوج : فويطر العنجك الملح الرشيدى .. سن بلا مسواك برق المكادة .. و شعرا بلا دايوق هدل الوسادة ..
" الدايوق زيت جوه ثمرة الهجليج ( اللا لوبة ) بمسحوا بيهو البنات شعرم ايام بساطة الدنيا "
.. إذن تراث الناى و الحداء عميق وراسخ في وجدان ابراهيم الكاشف !
كان بلقط القطن في تفاتيش الجزيرة وهو صغير و بغنى : يخوض في وحل الشتاء .. فتى غرير ارعناء .. لا يتقى شر العيون .. و لا يخاف الالسنا ! واقف قدام الدنيا بما حوت و بغنى من جهلو : انا افريقى انا سودانى ..
.. غنى و لحن في مدنى للمساح : قومو يا احبة نسترق السمع .. ما بطيق القعدة و المايق دمع ، و كمان إنت بدر السماء في صفاك ، .. و كمان نغيم فاهك يا ام زين دواي .. و وصل الخرطوم جاهز و مكتمل .. جاء الخرطوم للاقلاع و ارتياد الآفاق و الانجاز و الإعجاز :
- واضح اثر الطريقة الاحمدية بتاعت ود مدنى عليهو .. لانو نقل ايقاع النوبة مباشرة لحقول الضرب الايقاعى اللي كانت اصلا متداخلة ! و واضح برضو انو جراءة لحن المارش اللي عملو اسمعيل عبد المعين لاغنية الصاغ محمود ابوبكر " صه يا كنار " ، هو الامر اللي مهد للكاشف تلحين ( المهرجان و توبة يا انة ) بايقاع السامبا .. الكاشف من البداية لامس وتر حساس جوه الوجدان السودانى .. وتر ضربة الطبل الافريقى الموحى و المُحرِك
- صحيح انو وجود استاذ الموسيقى عازف القانون و الكمان التابع للبعثة التعليمية المصرية ( مصطفى كامل ) كان ليهو اثرو علي الكاشف ! لكن من المؤكد انو جراءة الكاشف في الخروج من السلم الواحد الي عدة سلالم ( ودى الفات فيها الكبار و القدرو ) ، كانت انجاز بيُحسب للكاشف لوحدو ! الخروج من المقام الكبير الي المقام الصغير و بالعكس واضح في اغنية عبيد عبد الرحمن : فتنت بيهو ! الخروج من المقامات اصلا شغل بتهوفن في سيمفونية ( القدر )
- بنرصد برضو انو وبعد المساح مباشرة ، فان سيد عبد العزيز و عبيد عبد الرحمن و ابو الروس ، هم الشعراء الاساسيين لتلك الظاهرة الجديدة اللي اسمها الكاشف ! كتبوا اجمل الشعر الحديث للكاشف .. بتفعيلة ذات سلاسة لحنية عالية .. و جمل شعرية موجزة ذات إيحاء .. : ( القمرى غنا بكل ذوق ، و سط الزهور العاملة روق هنا يا الحبيب نجلس نروق .. و القمري سوى في نخيلا سوق .. اما السواقي بدت تسوق .. ! رجز مدهش ما بجيب إلا الحان اشد جمالا )
- لانو عبد الرحمن الريح كان مدرسة التم تم الجديد .. كان حليف حسن عطية .. الكاشف كان ببحث عن مواقع جديدة و دروب غير مطروقة ، و جمل لحنية مغايرة وذات كثافة ، و تتناسق مع ايقاعات خارج ضرب التم تم و الدلوكة ! او توحد فيما بينهم .. و بالله يا ناذر رسل لينا صابحنى دايما مبتسم بلونية عبد العزيز المبارك علشان نشوف تداخل الايقاعات ! سلفنا ليها يا ناذر من بوست عاطف بتاع الغنا .. سلفنا ليها بسعر فايدة ، او مرابحة ، او مضاربة ، كلو ماش في عالم الفن
- و بالتالي جاب المقدمة الموسيقية : كانت مقدمتو بتاعت داخل روضة غنا ، هى شعار الاذاعة و لفترة طويلة ! المقدمة دليل السعة اللحنية و النفس الموسيقى الطويل
- ولانو كان بولى - فونيك .. لذا قدر يلحن بحور غير صافية ! ناس احمد المصطفى و الحاج عبد الحميد يوسف كانو مونو - فونيك
- و حلق بلزمة كرومة الموسيقية في آفاق بجد مدهشة ! شوفو اغنية حبيبى اكتب لى .. وانا اكتب ليك ! القرار اللحنى الاول هو ميلودى الفم بتاع الكاشف .. بتعقبو واحدة من اجمل اللزمات في الموسيقا السودانية ، و الي تكاد تكون لوحدها اجابة كاملة علي ( القرار ) .. جهزا يا معاوية !
- ولانو كان شعبى و جماهيرى و بتاع غنا مفتوح .. اشرك الناس المستمعين في الترديد و المجادعة .. بقولو دا اسمو الباس Pass : يوم سفروك .. و الناس تقول ايوا .. بالقطر ودوك و الناس تقول برضو ايوا
- و طور الفرقة الموسيقية الاولي .. و كان اول من جاب الكورس النسائى : ناس الرضية سعد و الرحمة مكي ..
" كان عبقرية اللحن بالفم ! " لا عود ، لا كمنجة ! حكمة يا ابراهيم
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: ناذر محمد الخليفة)
|
ناذر الخليفة ود عمى العريس الذى شال شبابيل بنات البندر . حبابك عشرة . اريتنى كنت هناك . عرس حاشد بالكتاب والشعراء والفنانين كان حشدا لم تشهد الخرتوم مثله .. يا للعجب .. ارجو أن تضع لنا صورة الزول البعرض فى بوست تاريخ الغناء والكرباج الجد جد خت الصورة ليتعلم منها مايكل جوردن فن الطيران . _ استاذ ناذر الف شكر على الدخول الكريم تحياتى لعموم الاهل .
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. بلد الاُ ندراب يا سيدى شقيتا .. وجرح البطان المُغور لحقتا بريتا ..
يا ناذر ! دمت في نعيم مدة الدهر ..
... خيمة العرس النهارية ! بنطبق عليها كلام ابو الروس و غنا الكاشف :
" إتجلى في وسط الضحى .. تجد العليل نعنش صِحى .. الصاحى دون خمرة إنتشا .. يا فاضح البان يا رشا .. بقلبى افعل ما تشاء .. و الكون وراك طايع مشا .. نور الشمس نورك محا .. سعدت عيوني الشافتك .. " ا
مدرسة الغناء الاوركسترالي التانية .. قصة ما عندها اول و لا آخر ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: أحمد طراوه)
|
سلامات أستاذ طراوة ..
أنا والله من ما بدا البوست دا أبيت كلو كلو إتداخل وفضلت متايع بس عشان إستمتع وإتعلم من الفطاحلة والدكاترة والأساتذة المتداخلين ..
علا إنت ورطتني بي طلب أغنية ..
وعثمان موسى ورطني بي طلب صورة ..
وهسي داير أورط نفسي بي معلومة عن الخيم النهارية للناس الطولو من البلد وما متابعين ..
أعراس السودان من زمان معروف طقوسا وأياما وتراتيبا ..
علا الزمن إتغير وجات حاجات جديدة ..
عرس نهاري كامل دا أنا ما قابلني صراحة إلا في عرس أخونا عمر الفاروق والكان أيامات أحداث الغثنسن الأسود لمن كان الخرطوم فيها حظر تجول يبدا الساعة تمنية مساء ..
جينا العرس وطبعا بحكم المواعيد الدعوة غدا والفنان بعد الغدا والزفة والدخلة كلو بالنهار ..
ووكتها إتميت دايما كل أعراس السودانيين تكون بالنهار ..
حاجة روعة والزول ما بياخد هم الزمن أو هم الرجعة والمدعويين بيجو مرتاحين وفي زمن كويس ..
والفنان ما بيزنقو الحظر بتاع ممنوع الغنا بعد حداشر بالليل ..
الموضة حاليا في دعوات الغدا ..
زمان كان بعد الغدا الفي صينية مدنكلة كباية شاي .. الزول ياكل ويشرب الشاي ويتخارج لحدي مواعيد الحفل بالليل ...
هسي ما كدة ..
الغدا بقى كوكتيل وبعد الكزمكيل ما في شاي .. حاجة باردة .. وبعد الحاجة الباردة ما بتمشي طوالي ..
في برنامج مصاحب حسب عادات الأسرة صاحبة المناسبة .
الجعليين بعد الغدا بيدورو دلوكة وبطان لحدي المغرب (زي عرسي في الصور الفوق) الشوايقة بيجيبو طمبور وغنا حنين .. المحافظين شوية بيجيبو ناس يمدحو ...
جاييكم ...
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: ناذر محمد الخليفة)
|
نعم دى .. هلا هلا. شوف المسافة بين الأرض والكراع . الزول يا ناذر حلق فى عوالم الطرب . ده انجذاب فى الدلوكه والمديح والطبل والرقص . فى السودان لمان تجامل زول فى عرسو بتجامل من قلبك . .. عليك الله يا ناذر شن طعم سفرنا بعيد عن تلك الجنات ؟ شوف شجر النيم ده شامخ كيف ؟ .. كونك تكون فى السودان فى بلدك ده هو الربح . استاذ ناذر نحتاجك .. البوست يحتاجك كتير كتير سلامات وشكرا على صورة الدلوكه الكاربه .
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: ناذر محمد الخليفة)
|
عثمان وطراوه ومعاويه ومحمد عثمان (ناسنا) وكل الجميلين اللي كتبوا هنا سلام. والله يا ناذر مازلت أضحك على كلامك.
Quote: الجعليين بعد الغدا بيدورو دلوكة وبطان لحدي المغرب (زي عرسي في الصور الفوق) الشوايقة بيجيبو طمبور وغنا حنين .. المحافظين شوية بيجيبو ناس يمدحو ... |
إنت وكت الكلام كده مش تجيب لينا صوره من صورك وانت في (البطان)؟ كويس عرفنا الشايقيه حُنان ، (المحافظين) ديل ياتم؟
بعدين (الكزمكيل) دا شنو يا ناذر؟ الإثبات بالصور يا العزيز,
محبتي
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
عثمان موسى ...
Quote: فى السودان لمان تجامل زول فى عرسو بتجامل من قلبك .
|
أي والله ودي أجمل خحاجة في شعبنا الطيب دا ..
أخوي الكبير في زواجو سنة 1990 قبل طريق شندي .. كان السفر قاسي خلاص .. مشينا سيرة من الخرطوم ، قبل ما ندخل شندي وقفنا نصلي المغرب في حلة قبل شندي بي ساعة تقريبا .. أنحنا تلاتة بصات سفرية كبيرة وعربية صغيرة فيها الفنان عماد أحمد الطيب ..
في الحلة وبعد ما صلينا رجال الحلة وشبابا حلفو ما نتحرك طوالي .. فجأة لقينا الشاي واللقيمات والقهوة قدامنا !! جرادل العصير ما تديك الدرب !! الحلة جتتتتتتتت إتلمت وطلعوا الحروم والجنيات والعمد والأرابيب ولاحظ أنحنا ما بنعرف ناس في الحلة دي ولا من الاهل قريب أو بعيد !!
كبيرم زعلان وقال (فاكرننا جنايز تمرو فوقنا كدي ! عريسكم دا الليلة محتفلنبو هنا في الاوال قبال تدخلو شندي) !!
كباراتنا حاولو يقنعوهو وما إقتنع لا هو لا باقي كبارات الحلة ..! وكان عرس في الخلا ما في مثيلو ..
إتلمو النسوان ودقو الدلوكة وعرضو رجال الحلة مع رجال السيرة وشالو العريس في الكتوف في جو ومناخ تحلف تقول في العالم كلو ما في زيو ..!
بعد ساعة أو أكتر خلونا نمشي تودعنا كمية من التباريك والزغاريد والدعوات ..
وكان العرس الفجائي البرة شندي أجمل من العرس المرتب الجوة شندي من كل النواحي ..
منظر ما أنساهو طول العمر وأنا الوكت داك في تالتة متوسط ومسجلو بي ذاكرة فولاذية ..
Quote: عليك الله يا ناذر شن طعم سفرنا بعيد عن تلك الجنات ؟
|
ضريبة مفروضة علينا يا عثمان موسى ..
وإنشاء الله نرجع البلد لي شدر النيم نتلمى في ضلو عما قريب ....
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
سلامات محمد المرتضى ..
نديك صور خفيفة يا حبيب لزوم التصبيرة وكدة
الفنان عمر الحواري .. دلوكة وعرضة ..
عرضة مايكل جوردانية بسيطة ..
عريس + سوط بطان = حزفت باقي الصور مراعاة لشعور البعض ممنن لا يتحملون رؤية مناظر الجدل والدم
Quote: كويس عرفنا الشايقيه حُنان ، (المحافظين) ديل ياتم؟
|
ديل اللي ما عندهم علاقة بي شوايقة أو جعليين وما عندهم تراث خاص بيهم في الغناء أو جعليين وشوايقة لكن (ناس بندر ساكت) !! وأحسن ليهم المديح من تراث بلدم ..
Quote: بعدين (الكزمكيل) دا شنو يا ناذر؟
|
الله يجازي الكي بورد يا محمد المرتضى
قصدي الكوكتيل بتاع الغداء
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... و البوست صار صوت و صورة !
ناس ود فايت حسن ( جماعة العرضة ) !
.. البدخل في المحاصة .. اب جُلتن بارود .. صمد للبجن طابور .. شدولو فوق تاتاى .. مطروح الجبين لعرضو مو نساي ..
و طبل النحاس بتاع ( بت المكاوي ) البقى قاعد في طرف الزلط !
نحنا يا ناذر مآخدين بعين الاعتبار إنو فك التسجيلات بالمنبر علي الابواب ، بنقترح علي عثمان موسى يديك ذات المبلغ اللي اداهو الراحل عبد الرحمن شاخور للونق الشمال عبدو الشيخ .. !
.. لخص ود القرشى قصة و رسالة المدرسة التانية بتاعت الغناء الاوركسترالي لمن قال :
" بلقاك نفرح .. نتبادل الاشواق لهوانا نطرح .. مزمارنا يا دأؤد صار بيك و اصبح .. عهد الرشيد عدناه و صرنا انجح .. "
فعلا جماعة الكوكب الفضى ( شعراء و فنانين ) فاتو ابراهيم المهدى ، و اسحق الموصلي , و اصبحوا الوراث الشرعيين لقصر الرشيد بعد ان تمت سودنتو سودنة كاملة !
.. اولم يقل الرجل الامى رقيق الحال علي المساح و بدوافع حبو لام زين :
" ما ذنبي غير قلت النشيد و نشايد .. في مدحك بنيت قصر الرشيد الشايد .. جفيتنى ليه وانا ليك رايد ؟ يا غصن الرياض المايد ! .. "
. . 1953 ، و السودانين لم يلتقطو انفاسهم بعد بسبب مشاوير الكاشف .. أنشقت بطن السماء ، و اخرجت ابراهيم عوض عبد المجيد !
.. الفنان الذرى المنطلق بسرعة 7 ماخ !
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: أحمد طراوه)
|
الفنان عمر الحوارى ؟ عفارم عليك يا ناذر . الما ركز فى دلوكة الحوارى عمرو ما ركز . فى دلوكة الحوارى الجلد ينزل فى ضهرك بارد ومنعش لا تشعر وانت تحت البنج الكامل والانجذاب الجد . الزول ده يا ناذر فنان جد وما بريد الهيلمانه وهو شاعرنا ومادحنا. وهو فنان الحماسه ورسول السخاء والحياء . يا ناذر سلم لى على الناس ديل شديد. بعدين انا سعيد جدا بما يقوم به الفنان محجوب كبوشيه محجوب بجمع فى اغانى الحماسه بصوره جميله جدا الف تحيه يا ياذر
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
والله يا ناذر متكيف للصور دى جنس كيف _ عارف جماعتك وربعك ناس عرضة وناس بطان كان يا ناذر عندى عمى عليه الرحمه لامن جاوز التمانين كان بعرض . وكان يقول النجامل اولادى بالفرحة قبال ما سيد الامانه يشيل امانتو. كان يجد متعه كبيره فى العرضة __ وبعدين عندنا واحد يا ناذر ضهرو معور من شدة الجلد وكان تعبان . جا لى عرس ودعمو عشان ينجلد تانى الجماعه الكبار قالولو لا تنجلد عشان ضهرك كعب . قام حلف وقال ده عرس ود عمى وانا حالف لو ما جلتونى بالكرباج اكان احلف وما انجلد الا بالسكين __ وطبعن يا ناذر ما فى طريقه الا ينجلد تقولى شنو وتقولى منو.
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... ونحن نتحسس يوم بعد الاخر غيابهم الذى ترك خانات شواقر لا تُسد .. الي ارواحهم المحلقة فوق سماوات الوطن !
.. الي كل من : توفيق صالح جاويش ، علي المك ، عزيز الرفاعى ، بشار الكُتبى .. نهدى سيرة واحد من اعز الرجال و اشدهم جسارة و عطاءا .. إكسبريس الغناء السودانى ..
" ابراهيم عوض عبد المجيد "
... الي صديق محمد فرح رمرم ، و الي الهادى الضلالي ..
.. و هما برغم العوادى ، و توترات الواقع ، و انقلاب ( دنيانا الجميلة ) ، يواصلان دورهما التاريخى : كريحانة اصيلة للمجالس ، و ذاكرة حية تفيض بوقائع ذلك الماضى الجميل الذى ناخذ منه الدلالات و الدروس و العِبر
.. مثلهم مثل الراحل ابرهيم عوض تخصصوا دون اجر او مقابل في مهنة : جعل حياتنا محتملة و واقعنا اجمل ، و يومنا لا يخلو من فسحات الامل ..
1953 : انبثاق اضواء الكوكب الفضى الذى طاف بمدارات الغناء السودانى و فتح صفحة تاريخ تعدد اللونية الغنا ئية ، و التمايز الايجابي داخل المدرسة الاوركسترالية الثانية
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: ناذر محمد الخليفة)
|
استاذ ناذر سلامات اهو يازول كل ما يستفيض بنا الشوق نفتح بوست صاحبك/ طراوة .نشوف وجه امدرمان يتلألأ.. __ يا ناذر 1993 كان لى الشرف أن اقابل ( سيدة وجمالها فريد) صاحبة الأغنية المشهورة فى بيت المال ( كانت فى حوالى ال 85 اقسم با الله وهى فى التمانين لكن البريق لم يفارق وجههاالطيب . سيدة هى أجمل مخلوقة فى النساء . وهى ملكة من ملكات النيل ومعلمه من معلمات الفضايل والاعتدال ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. المسار الخرطومي للعود و تاريخ العود ارتبط إجمالا و إختصارا بضباط جيش الفتح و استاذ خليل بتاع حي الترس موظف البوستة و التلغراف القديم اللي تعرف بيهو خليل فرح !
.. ثم ظهور العود الخرطومي في يد عبد القادر سليمان و خليل فرح في مجالس الغناء المُغلقة :
.. ( ظهر إبتداء زي عود زرياب ذو النهج السباعي القايم علي مقامات النهاوند و البياتى و تحول عبر تجريب طويل و مجاهدات سودانية معقدة وفي الاجواء المبكرة لثورة التم تم الي عود المقام الخماسي السودانى ! )
.. لغاية ما وقع العود الخرطومي في يد حسن سليمان الهاوي و حسن عطية .. ابو علي عجيب ! كان عمرو 16 سنة شايل العود بعزف و خلفو فرقة موسيقية
.. المسار الامدرماني الفني - الرسمي للعود ارتبط برجل اسمو عبد ا لحميد احمد الحاج ! كان نجار في زمن الانجليز بمصلحة المخازن و المهمات .. و بعرف يضرب العود ، تعلمو علي يد أحد المصريين في حي المسالمة !
.. لكن كيف عبد الحميد من بعد ذلك تعلم العود علي النسق الخماسي ؟
و وصل حد إنو يفتح ورشة لصناعة و تصليح الالات الموسيقية منذ ذلك العهد القديم .. دا السؤال اللي عاوز اجابة ، و للحق دا الامر اللي عاوزين نمسك خيوطو و نعرف مداخلو !؟
... واهمية ذلك بتعود الي إنو و في تلك الفترة الامدرمانية ظهر عازف عود شديد المراس الفني - الموسيقى في حي الموردة إسمو حسن عمر سوميت !
.. سوميت كان ماسنجر العود المتحرك لانو كان جزء اساسي في ورشة الموردة الفنية اللي ارتبطت بمنزل الدرديرى عمر كروم اخو بروفسر حداد كروم .. سوميت هناك في بيت الدرديري تعرف علي ابوداؤد برعي برضو عرف ابو داؤد هناك !
.. و صار سوميت و الكاشف و ابو داؤد و يوسف عبد العزيز اخو سيد عبد العزيز اطراف اساسية في ورشة برى الفنية نواحي الخرطوم القديمة
.. الكلام دا كلو بقصد الوصول لبرعى احمد دفع الله !
.. برعى شاف العود في الموردة في يد سوميت و جلسات علايل الموردة ! ومن يوما ركبو جان العود ! العود بخصايصو السودانية كان قاعد جوه برعى !
صحيح إنو برعى تعلم العود في اساسياتو علي يد عبد الحميد و عبد الرحمن .. لكنو مشى في خط سوميت لفترة بسيطة و صار بعد داك مدرسة و لونية خاصة بذاتا .. عود برعى ذو خصوصية سودانية فريدة زى جبل الداير و شجرة الهشاب ولفة نهر النيل عند ابو حمد .. !
قال عازف الكمان السودانى ، الموسيقار - البرنجى محمد عبد الله محمدية :
" برعي لغز كبير .. طريقتو في عزف العود خاصة بيهو لوحدو "
.. شوفو العظمة و الاشراق في الجملة اللحنية ذات التجلي في الحان برعى الاتية :
- داك الصباح اهو جاك يا حبيب .. بتوزيع و طريقة حنان النيل
- ليل و خمر و شفاه .. يا سقاة الكأس من عهد الرشيد : توزيع سيد خليفة الجديد بمصاحبة الساكسفون
- الوصية : ولازال السؤال مطروح ليه وردى اللي لحن المية اغنبة بتاعتو براهو ، لمن جات اغنية الوصية وداها لبرعى .. يا لذكاء وردى و قوة حسو الموسيقى
- و قدامنا اهو جمال دنيانا .. اللي كانت توجهات لحنية جديدة انبثقت زى برق البطانة البرف عبادي
" برعي رقم صعب في معادلة التطور الموسيقي السودانى الاكثر صعوبة "
.. يا ناذر بالله مع الصورة الجاية جيب لينا جنني و غير حالي ، بتوزيع ود الحاوى الجديد .. جيبا لينا بطريقة سوق ليبيا و سوق تمبول كسر عديل ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
عثمان موسى والله إنت زول محظوظ خلاص .. خليتني أحقد عليك عدييييل كدة !!
Quote: يا ناذر 1993 كان لى الشرف أن اقابل ( سيدة وجمالها فريد) صاحبة الأغنية المشهورة فى بيت المال ( كانت فى حوالى ال 85 اقسم با الله وهى فى التمانين لكن البريق لم يفارق وجههاالطيب . سيدة هى أجمل مخلوقة فى النساء . وهى ملكة من ملكات النيل ومعلمه من معلمات الفضايل والاعتدال .. |
والزمن داك ما كنت شايل ليك كاميرا دجتال مالك
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
صراحة يا دكتور طراوة النقطة دي دايرة تفصيل وإسهاب شوية :
Quote: و تحول عبر تجريب طويل و مجاهدات سودانية معقدة وفي الاجواء المبكرة لثورة التم تم الي عود المقام الخماسي السودانى ! )
|
دي حتة لا بد من أنها تذكر للتاريخ .. مش تاريخ تحويل العود للمقام الخماسي وبس .. لأنو بكل تأكيد التحويل دا هو الساعد على بلورة الأغنية السودانية عشان تظهر بي لونيتا اللحنية الحالية ..
المعروف أن أغلب الفنانين والملحنين الكبار بيعتمدو على ألة العود في تلحين أعمالم و طبعا بيستخدو العود الخماسي بتاعنا ... طيب لو كان العود لسع ما تم تحويلو !! فهل كانت الألحان السودانية حا تطلع من إطار التشابه ولا حا تظل كما هي ؟!!!
لاحظ أنا بقصد طريقة العزف وإستعمال أوتار العود كاملة .. مش الألحان ..
العود ذو المقام السباعي بيديك مساحات اوسع وحرية في العزف والتنويع والتلوين غير محدودة مقارنة بي العود الخماسي .. طبعا دا لو إستصحبنا طريقة عزف الفنانين والملحنين المتشابهة لي بعضم إلا ما ندر وفلتات زي ناس برعي وحسن عطية والكابلي واحمودي وغيرم ...
الغريبة إنو المرحلة بتاعت التحويل دي أعتقد بيكون حصل فيها مخاض طويل وعسير وفترة لا زم تتوثق كويس !! والغريبة إنو البحث النال بيهو دكتور الماحي سليمان درجة الدكتوراة عن ألة العود من جامعة السودان ما إتطرق للحتة دي !!
فهل في ضبابية ونقص معلومات في الفترة دي يا دكتور ساهمت في عدم التوثيق بصورة مركزة ؟!!
تسلم كتير ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... معليش علي التأخير وشكرا لابقاء البوست زى متاريس اكتوبر !
عاليات شامخات في بلادى
دي يا ناذر : ياها الاسئلة المفصلية في مسار تطور الموسيقى و الغناء السوداني .. و اسئلة تانية اخريات ننظما و نطرحا تباعا .. اصلو دا هدف البوست طرح الاسئلة الكبيرة .. يا ريت نقدر نطرحا صاح !
" لانو الحكماء بقولو طرح السؤال الصاح هو نصف الاجابة ! "
كيف جماعة الكوكب الفضى و الصولفيج السودانى البسيط الاول قدروا يكسروا اسنة رماح المقام السباعي المتسلل قديما من البوابة الشمالية و حديثا مع جيش الفتح .. وكيف قدرو يفتحو الباب لنهضة و مسار المقام الخماسى في لونو السودانى !
تلك كانت واحدة من معارك الهوية السودانية !
" لكن كيف السلم السباعى قعد في مزيكة غرب السودان ! شوفو غنا عبد القادر سالم : الزول اب فاطرا صب .. مكانو جوه القلب ! "
الاجابة تدقيقا هي تخصص ناس الميوزكولوجى و الدارسين النقد الموسيقى - الفني - الغنائي
نحنا ابلغ ما نبلغو يا ناذر هو إننا نطرح الافتراضات و نعمل المقاربات من مواقع علم التاريخ الاجتماعى و المدخل السوسيو - ثقافي السوداني
.. بنعمل في حاجة اسمها : ( المرشد لفهم تاريخ و مسار تطور الغناء السودانى ) ..
مبدئيا حنوصلو ل د. الفاتح الطاهر ، عوض بابكر , و وردي ، و الموصلي .. و آخريين ممكن تقترحوهم علينا بنديهم اسئلة المرشد و اشرطة تسجيل و ممكن حجار بطارية افريدى ابو كديس او تكاليف كرت الجمرة الخبيثة !!
زي مرشد الراحل بروفسور عبد الله الطيب !
تصورو عبد الله الطيب في اربعينات القرن الماضى اقنع مراقب الاذاعة السودانى انو يخلي عثمان الشفيع يغنى رائعة ود القرشي ( وطن الجدود نفديك بالارواح نجود )
قال ليهو ما تخاف من ناس القلم السرى و يوم البث المباشر (اصلا ما كان في اجهزة تسجيل في الاذاعة وقتها) اقعد في البيت و اعمل عيان ! قال ليهو في اللحظة دى من تاريخ الوطن الشعب محتاج لنوع الغنا دا !
و صدق حس عبد الله الطيب السياسي : الناس كلما تسمع الشفيع في مسرح السينما بتطلع شايلاهو في الاعناق و بتهتف و راهو بعد الاغنية يسقط الاستعمار ..
" تغشاك الرحمة و افضال الوطن و دعوات الغبش المجاذيب القائمة مدى الليل يا عبد الله الطيب "
بنرجع اكيد لمقاربة التحول من السباعى للخماسى و المأثرة الاولى اللي عملا السر عبد الله لمن دوزن قبل العود الكمنجة الاروبية - المصرية علي نحو سودانى
شعارنا كلام ود البادية : أي سكة نواصلا .. لما بكرة نحصلا
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: ناذر محمد الخليفة)
|
الف مبروك اولاد الطيب شيقوق فى العيد عرسان وندوة الفناء بتنتقل الى بيت العرس تسجيل . وتصوير وشربوت نبارك لعمهم عبدالماجد محمد الحسن وعمهم ناذر الخليفة وعمهم د / أحمد طراوة وعمتم بت الشيخ / سميه طلحه وعمهم سيد الخيل البتجى فى اللفه د/ أحمد القرشى وعمهم سيد الحيشان التلاته المن ناسنا استاذ محمد المرتضى ود حامد وكل عام والدلاليك لى السماء السابع تحياتى
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
استاذ ناذر الخليفة العيد مبارك عليك وكل عام وانت وعموم الاهل بالف خير استمعت الى حسين شندى وفرفور .. توزيع لنج التقول حسين شندى دخل الكهرباء فى الدلوكة كما فعل أبو عبيده حسن فى الطمبور عليك الله لو سمح د/ طراوة نزل لينا الأغنية _ البتقول .. غنى يا بنيه .. فوق الولد الشكرو ما شويا الخيل قلبن .. والسيوف طايفا وغير الاصم .. عيونى ما شايفا غنى يا بنيه الأغنية دى يا ناذر بالتوزيع الجديد بعد سمعتها كنت عايز اعوم ال ATLANTIC OCEAN وما اركز الا فى مشرع شندى أستاذ ناذر خلى بالك ايام العيد بتكون فى برامج جميلة .. تحياتى
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... يا سلام يا حيدر ! يا سلام تانى و تالت .. للغنية بنعود ، ليها بنعود .. و تاني بنعود و عند الاصيل لازم نعود
عثمان موسى ، يا سيد الدار ... بالله ذكر بكرى ينقل لينا البوست الي الامام ضمن باقى بوستاتك المنتقاة ، و ضمن حركة الارشفة و التنظيم في المنبر ، لا نزال في مربع واحد بالنسبة للمدرسة الاوركسترالية التانية
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
نترحم على كل من رحل عنا والعام 2007 ينطوى . ___ اتمنا من رب العرش العظيم أن يكون العام 2008 عام خير وسلام على السودان الحبيب عام يتعافى فيه الجميع يتصالح فيه الكل يعم فيه العدل _ تتوقف فيه الحروب _ يتفق فيه الجميع على بنا سودان جديد قوى موحد ___ واتمنا بعون الله ومساعدة الشباب أن يتابع د/ أحمد طراوة السير فى شعاب تاريخ الغناء السودانى . ثم العربى . والأفريقى والعالمى اتمنا التوفيق فى عمل شىء يجد القبول . وسودانيز أون لاين الان تتمدد فى كل مكان .
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. عودة معاوية
.. نازلا بعطائه الجزيل من جُرح الغناء الجميل و تفاصيل الحِراك الاوركسترالي السودانى ..
سعيدين لا نزال بوجود ناذر معنا في ذات خندق صراع الهوية و نهضة و مآلات المقام الخماسى السودانى .. و نفتقد بحق جراب الاغانى محمد عثمان .. بنحسب ليهو في ايام شهر الغياب زى حساب الناس الزارعين علف ابو سبعين ..
أنساني ! الحلوة القضيتا معاك تصير مُرة .. نتقاسم مرارة البين انا و ياك ..
.. أنه برعي في مسيرة تاصيل الخماسى علي نحو سودانى فريد !
" كان برعى واحدا من اشد قوى الدفع الموسيقى - الاوركسترالي مضاءا و فعالية "
.. لو قِليب فراكِ .. انا بطراكِ .. يا قِمير في سماكِ ! حافلة بالاسرار و ما تنفك تطرح الاسئلة الحساسة الدقيقة ، تلك هي تجربة عبد القادر سالم و أبا .. !
.. عبقرية توطين المقام السباعي من فوق ضربة المردوم !!
كيف إنسرب المقام السباعى ، وكيف استقر و تمكن في ديار غرب السودان !! ؟
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
أخ معاويه الف حمد الله على سلامتك وعيد مبارك والسنه العلينا دى عريس _ الف شكر على النشاط بعد الرحول المتعب تحياتى ___ أخ ناذر الخليفة سلامات احاول التواصل _ لكن ايميلك معصلج وحارن _ ارجو ارسال تلفونك على الفاكس بتاعى ( 3999 379 703 ) _ دايرين تسجيلات دلاليك كاربه دايرين صقريه وعرضه تكون ليها عجاجه دلاليك حاره تمرقنا من تلج البلد دى _ شايف صاحبك حسين شندى بحرو طامح . تحياتى ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. دمت يا احمد الامين .. و جزيل الشكر كونك بتقرأ البوست بعيون الحرص ، ونحنا حنواصل نغرِق لمن نلاقي عين الموية
.. بقترح ما يلي :
- نحاول نرصد و نميز كل شعر عبد المنعم عبد الحي الغنائي و نحاول نفهم اسرار و تاريخ تواجد تلك المجموعة من الضباط السودانين في مصر في تلك الحقب من تاريخ العلاقات المصرية - السودانية ، خاصة اللي ارتبطو هم او آبائهم بجيش السودان في مصر تحت مظلة الكوندومنيوم - الاستعماري المصري الانجليزي
- نعم ! نتابع نشأة مسيرة الكاشف و ملامح تشكلو الفني - الغنائى في مدني .. نعيد سبر اغوار ظاهرة الكاشف في علاقتو كشيال علي نهج المدرسة الاولي بتاعت سرور خلف الشبلي ، و إعجابو بطريقة غناء عثمان فرفشة الحديثة نسبيا ! و نحاول نكتشف اسرار نزعة المزيكا و الاوركسترالية جوة الكاشف !
تعرف يا احمد ، إضافة ل كتاب الفن و سحارة الكاشف بتاع ابو العزايم مهم برضو توثيق (عشرية) راصد الحركة الفنية - الاجتماعية لمدني السني و مدني كمركز اقتصادى - تجاري جديد بتمدد و ينمو في وثيق الصلة بالخرطوم
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. ونقتبس من بوست نآذر - الموصلي إشارات كتبناها هناك كمدخل لرصد قوى الفعل الاوركسترالي السوداني و مقاربة ازمة الهارموني و القالب الفنى في الغناء و الموسيقى بتاعتنا :
كرومة كان شديد الاصرار علي إدخال البيانو في الغناء السودانى لمن جاء يلحن ( دمعة الشوق ) ! خليل فرح كان عمل بيهو مقدمة عازة في هواك المستوحاة من ميلوديا مارش ود الشريف
لكن الكان عجيب بحق زول اسمو موسى محمد ابراهيم !
.. موسى بعرفو الموصلي كويس .. أصلا موسى جاء لعالم الاوركسترالية السودانية من موسيقى قوة دفاع السودان !
.. عزف الفلوت ، و البيكلو و البيانو منذ الاربعينات .. و حافظ علي عزف الاكورديون بنهج وهبة و محمد كوجان ، لغاية ما سلم مدرسة الاكورديون السودانية ( تامة لامة ) لقبانى ، و ود الحاوي ، و أكرت
عبقرية موسى محمد ابراهيم بتتضح في لحنو لاغنية ماضى الذكريات ( موتسارت لاقى بافاروتي .. موسى لاقى عثمان )
.. و بلغة شارع الليلة ( حديد لاقى حديد )
في ماضى الذكريات الارتجال بلغ قمتو ! و الكاونتر بوينت السودانى بدأ يشق طريقو .. و بالله يا ناذر ما تخلي الموصلي لغاية ما نشرب من خمرة عِلمو كؤوس الاندرينا
أذن بنحتاج نسمع ود الامين في اغنية ( وحياة ابتسامتك ) اللي كتبا محمد علي جبارة ! هناك فن الارتجال اللحنى - السوداني بالعود ببلغ شأوا عظيما
.. و لنسمع ايضا محمدية و عربي بمارسو زهو و تفانين الارتجال اللحنى - السوداني بالكمنجة في اغنية ( انا و النجم و المساء ) عثمان حسين / بازرعة .. كان ذلك إحدى لقاءات السحب السودانية
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. شكرا يا مسعود
.. نحنا سعيدين كونك معانا في بوست تاريخ الغنا ، حركة الغنا ، مدارس الغنا ، ازمات الغنا و مآلات و مصير الغنا
.. و معاوية بخفقة جناح فراش القاش ، جاب لينا وحياة ابتسامتك ، و معاها انا و النجم و المساء ، و كمان اغنية الكاشف البقول فيها :
" الكون هِدأ .. و نامو العِدأ .. و انا مالي و مالي و مال كدا "
.. دا الغنا اللي اتعمل في ورشة برى !
الشعر الجميل دا بتاع سيد عبد العزيز ، و فكرة اللحن بتاعت الكاشف ، و تفاصيل اللحن كان مجهود يوسف عبد العزيز اخو سيد .. و قعا علي شريعة الخماسى السودانى لحنا جميلا حسن عمر سوميت بعودو الساحر الآسر
1950 ----- 1955 عثمان الشفيع معاهو ود القرشى بفتحو في طريق جديد للكلمة و اللحن و ادب العشق المترع بالشفافية :
" يقصيك مغنطيسو و بعاطفة بتحس .. و يوريك بعيونو لفتات الجدى .. دا البروح تفتدى .. "
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Moawia Mohammed)
|
استاذ احمد الامين احمد عيد مبارك الف شكر ونحتاجك أخى العزيز .. طبعن يا أخ احمد عارف انو صاحبك احمد طراوة اول ما جا امريكا كان اشتغل فى شركة شيفرون فى مجال الحفر هناك فى كلفورنيا الرجل استفاد عرف كيف يتابع العيون والمنابع وعروق الذهب . وبفلاحة اولاد امدرمان عرف كيف يكون الحفر والى اى عمق ... اهو يتابع الحفر .. نحتاجك . الف شكر أخى العزيز
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
و من بوست ناذر و الموصلي و حمزة سليمان بنستلف ما كتبناه هنالك ..
.. شعارنا معاهم قولة الراحل عوض دكام : الدين للكتوف و الاصل معروف ..
و الاصل ياهو السودان ! السودان الافريقى و ما زي كينيا و زائير .. السودان العربى و ما زى السعودية و العراق
بقول حمزة سليمان :
اتقف معك فى الارتجال عند موسيقييننا لكن الارتجال عند الاستاذ الموصلى هو الارتجال الواعى الذى يمكن منه معرفة موازيرية الاغنية ومعرفة سلم الاغنية فى وضوح تام ومعرفة اساسيات الانتقال اثناء سير الاغنية لذلك الاستاذ الموصلى هو من الذين يعلمون الصنعة التى صادفت موهبة فيه حقة ومتينة ....اما بخصوص العود وانه ما اله اروكسترالية بقف عندها شوية وهى اساسا ما اله غربية ليصنفها الغرب ضمن الات الاوركسترا لذلك كان يمكن ان يكون شانها شان الايقاعات المحلية فى العالم الثالث التى اطلق ععليها الغرب مصطلح( الايقاعات الغريبة )لان هذه الايقات لم تكن فى وجدان الغرب فهى ايقاعات ذات خصوصية محلية لكل بيئة ولكل شعب ( مثل ايقاع الدليب الذى هو اصلا ما سودانى ) وهو ايقاع هندى اسمو النواخت وزمنة سبعة من تمانية وهذه الاشكال الايقاعية لم تكن موجودة ضمن السياق الايقاعى الغربى لذلك اطلق عليها اسم الايقاعات الغريبة ولو لم يكن لاله العود تراكمها النغمى المسموع من زمن بعيد لما اعترف بها واصبح يتطلع لها فى فضول طفولى لها فتجاوز العود التخت العربى ليكن ضمن الالات الاورسترالية فى ابتداع عربى واصبح يحاور الالات الغربية فى توزيع مهم للغاية كصوت تحتاجة الوتريات الغربية
التحية للاستاذ الموصلى وحقيقى من زمن بعيد كتبت بوست عن الاستاذ الموصلى وهو يستحق كل هذا الاهتمام من كل الموسيقين والمهتمين
... ( انتهى كلام حمزة المنقول من بوست نآذر )
.. و من احمد طراوه الي حمزة سليمان :
الموسيقي المطبوع حمزة سليمان
.. ناديتك يا حمزة بالخلفاء الاربعة ، ضاربي العود في السودان :
- ناديتك بعبد القادر سليمان و صحبو خليل فرح ، و صاحبو التاني البيه حسن عطية
- و ناديتك بحسن عمر سوميت .. ما سنجر العود المتجول آناء الثلا ثينات و الاربعينات من القرن الماضى .. و معاهو عوض فضل الله .. و الاتنين هم اول من ضرب العود خلف الكاشف . . و يوم غيابم الاتنين لظروف عابرة جلس برعى خلف الكاشف .. و يوم داك عرف برعى إنو حوبتو جات و زمانو بسم ، بالضبط لمن لقى روحو وسط الفرقة الماسية ناس خواض و حجازى و النقر
- و ناديتك كمان ببرعي ذات نفسو وهو بواصل في نهج عبد الرحمن الريح (عواد السودان الكبير ) برعى ورث من عبد الرحمن الريح الخصوصية و النكهة السودانية بتاعت الجملة اللحنية الطالعة من احشاء العود المدوزن خماسيا
- ثم ناديتك بوراث العود كاداة موسيقية سودانية تجاوزت التخت العربي القديم و بقت حسب قولك يا حمزة إحدى قوى الحوار الاوركسترالي ( رغم إنو العود و في نظر الغرب مبتدع الاوركسترالية ، ليس بآلة اوركسترالية )
.. ديل الوراث الشرعيين : يوسف الشيخ ، عثمان حسين ، التاج مصطفى ، محمد الامين الازيرق ، و الاستثنائي المتميز بلونيتو : بشير عباس وهو شايل عود الطليعية قريبتو بت الحلفاية العوادة اسماء حمزة ..
" .. المجد لسعدية العوادية ، و جداوية موسى ، و اسماء حمزة "
ناديتك بكل هؤلاء يا حمزة ،
.. ضرورة المواصلة في طرح و تناول هذه القضايا الحساسة و ثيقة الصلة بالميوزكولوجي السوداني و مسقبل الغناء و خصائص الغناء المموسق في الوطن العزيز ..
و سوف انقل مداخلتك الصغيرة بكل مؤشراتا الهامة الي بوست تاريخ الغناء ..
كيف العود تجاوز تاريخيا التخت العربي ؟ هل دا كان بسبب الوتر الخامس اللي اضافو زرياب لعود اسحق الموصلي ؟ !
.. وكيف العود صار في يد محمد الامين الازيرق ، إحدى قوى الحوار الاوركسترالي ! ؟
بل صار في يد برعى اشد قوى الدفع الاوركسترالي السوداني مضاءا و فعالية ؟ ! بل قائد الاوركسترا بقضها و قضيضها !
.. مش سيد مكاوى لمن يقعد وراء الست ام كلثوم بتتراجع حياءا كل الالات الموسيقية الاخرى و بقيف الزمن الموسيقى عن الدوران
خالص مودتي : احمد طراوه
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
يا معاوية فِك ( الرِيلة ) .. فكها ترمح في تصاريف و ترانيم طمبور وردى الضارب باوتارو في عمق تاريخنا !
" تاريخ انسان كرمة الجاب النوبة البجاي و البهناك ! انسان كرمة الجاب بعانخى و الكنداكة و باقى خليط الليلة الافرو - عروبى "
خليها لوقو و شعار .. سمع و طرب
وبقينا داخل روضة غنا ! حِزم من تفانين الغناء الجميل المنسوب للمدرسة الاوركسترالية التانية
يا رزينة الامة السودانية : خلي عينيك الحنينة ترسم الفرح المهاجر في عيون امدرمان القديمة !
و قال ليك محمد علي جبارة : قلبي حآذركِ ومن زمان سائل عليك ..
ود الشفيع معاهو ود القرشى : الق تلك الخمسينات .. نعود و نواصل
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Moawia Mohammed)
|
استاذ محمد وردى قال وهو طالب فى الاوليه . تعلم الطمبور تعلم الطمبور على يد واحد منصورى من المناصير كان يبنى الجالوص وكان يعزف عزف جميل . العزف داك دخل راسى . طلبت منو يعلمنى العزف وتعلمت . اذكر ذاك الحديث فى سنه 1978 فى يوم العيد وردى فى التلفزيون . وبعدها وردى غنى حتى الطير رحل خلانى .. وقال انا معجب بتلك الاغانى واغنيها فى البيت واطرب لها .. التحية لوردى هرم الغناء السودانى الكبير ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
" شن تشبه بلا الداسنو في بطن المطامير ! "
.. كلام اسماعيل ود حد الزين !
موسقة وردى علي ضرب الدليب ! الدليب وثيق الصلة بمقامات الخماسى الصغيرة و الكبيرة
.. يا جمال و رونق المقدمة الموسيقية اللي بعملا وردى بالطمبور ! الطمبور : الحامل التاريخى القديم للخماسى السودانى !
بس دا كيف حصل تاريخيا ؟ ! الخماسى الطالع من الطمبور .. وكيف الطمبور بسلاسة جرى في يد اوهاج ، و شيخ حاج الماحي ، و اسماعيل الدقلاشى ، و دينق منسوب القبائل النيلية ، واولاد دار الفور و الحمر !
المقدمة الموسيقية جابا الكاشف .. و ابدع فيها مبكرا التاج مصطفى في ( الملهمة ) و بقى سيدا بعد داك عثمان حسين !
" دفع اوركسترالي لا بتراجع لا بساوم "
مدهشة المقدمة الموسيقية بصولو الاكورديون في شجن .. و برضو في عاهدتنى .. لكن ليه عثمان لحن عاهدتنى بمقام (فا) الكبير .. ! ؟
يا للهول ! قتلو منذ حين اشد النساء اقداما و شجاعة في امر الديمقرطية : بنازير بوتو ! الما كان ابوها بخيل ..
كلما قتلو او آذوا احد فرسان الحرية و التحول الديمقراطى بصيبنا نحنا خوف شديد علي الغناء و مستقبل الغناء ..
الي روح بنازير و الي كل رزينات المنبر بنهدى كلمات سيد عبد العزيز :
" يا صاحبة الإكليل .. ما أظنو النهار العين تدورلو دليل "
وبدأ ود القرشى مع ود الشفيع يفتتح في دروب لونية فريدة مُغايرة و يقول في اغرب انواع الكلام
" يال الرموش العكسن إعتدالي .. هل حور ام انسان ام شى خيالي "
كان سألت ناس شيقوق و ود حامد اصحاب بوست ( الحب في المنبر ) ، بقولو ليك : و الله شى خيالي يا محمد عوض الكريم القرشى
| |
|
|
|
|
|
|
|