|
|
|
 Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
ليلى بنت مهدى بن سعد بن مهدى بن ربيعة ، وكنيتها أم مالك ابنة عم الشاعر قيس بن الملوح
وحبيبته ، واحدى افضل نساء عصرها أدبا وأملحهن شكلا قال قيس فى وصفها
* بيضاء خالصة البياض كانها ... قمر توسط جنح ليل مبرد
* موسومة بالحسن ذات حواسد ... ان الجمال مظنة للحسد
* وترى مدامعها ترقرق مقلة ... سوداء ترغب عن سواد الاثمد
* خود اذا كثر الكلام تعوذت ... بحمى الحياء وان تكلم تقصد
( خود الفتاة الحسنة الخلق )
د / أحمد طراوة سوف يتحدث عن ليلى السودانية _ وعن الحياء فى الغناء السودانى
| |
 
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
| Quote: الغنا دا يا هو الجناح البنحلق بيهو فوق واقع الازمة و بنعبر بيهو بحر الهزيمة! هزيمة الخمسين سنة الفاتت ، لانو ماهو غنا وبس ، بل جزء اصيل بشكل منظمومة وعينا ! وهو يهُز الارض من اعماقِها ! لانو بالفعل حركة و فعل، بل و روح الامة .. وقال ابوصلاح كيف الامة تعشق بلاكا .. يا مراهم جروحا .. و يا مِلكا و ملاكا |
الأعزاء - عثمان موسى ود. أحمد طراوة .. تحياتي لكما
وشكراً على هذا البوست التثقيفي المريح.
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... يا ودعدلان .. بينا وبين الصورة التانية بلود العندو فوقنا حقوق .. على سكر نبات الفى العلب مدقوق .. قمارى الجالسة اليلة صبحن يسون قوق !! دي صورة فيها بالحق ناس مكانتم كبيرة و دورهم مسطر باحرف من نور ..
.. جلوس من اليمين للشمال : خليل فرح ، العبادى ، سرور في السنتر ، الامين برهان عصفور السودان , و كرومة
.. واقفين من اليمين : داؤد ، و حسين , و سامى ، و شريف اولاد علي نصر ( وديل اخوان زول ورد اسمو في اغنية لخليل بقول فيها : دهبا داقنو صُر .. دق شريف ودعلي و د نصُر ! و دا نوع من الغنا اسمو غنا الاخوانيات بجى فيهو اسماء لناس و اصدقاء ضمن التفعيلة و القافية ، و حنفرد ليه جزء من الحديث و النقاش ) الزول البعد الاخوان الاربعة دا الدرديرى احمد سعيد ، و في النهاية الشاعر عبد المنعم عبد الحى اللي عاش في مصر .. و كتب اول اغنية لابوداؤد في مصر و كانت بالله يا اهل الهوى بوجود برعى اللي لحن الاغنية ايضا
.. حننتظر ياسيكو يرفع اغنية فاطمة خميس دمعي اللتشتت المسجلة في الثلاثينات بايقاع التم تم ، معاد توزيعها بالعشرة بلدى و باداء علي ابراهيم اللحو .. و ليه الاوزان الشعرية السودانية بتتغنى بالتم تم و بتكون جميلة .. و نفس الاوزان بتتغنى بالريقى و بتكون جميلة برضو ! ؟ فعلا سؤال عاوز اجابة ! ؟
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. إكسبرس البحث فى مسار النهضة الغنائية للمدرسة الاولى لازم يقيف في محطة ديمترى نقولا ( اللي عُرف بالبازار ) ! اصلا هو من اسرة قديمة من زمن التركية ليها علاقة بسلاطين ، وهو اللي كان بودى الفنانين لمصر لتسجيل اسطوانات الفحم القديمة علي خلفية تعاقدات مع شركة ميتشجان و بيضافون .. جابوه لدنيا الغنا السودانى ناس مصطفى بطران لمن زاملم في مدرسة غردون القديمة ..
... البازار هو اللي اقنع والد عشة الفلاتية بانو ما يقيف حجر عثرة امام مستقبل البنية المشحون بالاشراقات ! عشة كانت بتسندا في معركتا اختها جداوية ، وهى من ابرع عازفات العود في ذلك الزمن ( ساعدتا في تلحين عنى مالم و التجنى .. اجمل اغانى عشة موسى الفلاتية ، كلمات التنقارى ، يا سلام على تحالف عشة - التنقارى ! زى تحالف سرور - العبادى ، البنا - كرومة ، عبد الرحمن الريح - حسن عطية ، الكاشف - عبيد ، بازرعة - عثمان حسين ، وردى - اسمعيل حسن ! و السودان ياهو بلد التحالفات اللي بدت بتحالف عمارة دنقس - عبد الله جماع تحت شجرة بمنطقة جبل موية
و يا سلام علي بوتقة الفن السودانى اللي اتصهرت فيها عشة الفلاتية و البازار النمساوى - الاغريقى بهدؤ و سلاسة .. جداوية موسى كان في حين ذاك معاها برضو سعدية العوادية و اسماء حمزة الصغيرة بت الحلفاية قريبة بشير عباس و اللى علمت بشير ضرب العود !!
.. نقولا ديمترى كاتافنيدس ابو البازار دمتري اسمو الحقيقى محمد عبد الله كاتافنيدس ، و الموضوع دا بفتح علينا دوائر السيرة المدهشة لحال المجتمع السودان عند التركية و فترة حكم الخليفة !!
.. المفتش الانجليزى لمركز دنقلا هو اللي شال الولد الصغير من الخلوة في الشمالية وجابو الخرطوم و رجع اسمو لى نقولا في اطار مسح كل تراث المهدية !! ودى قصة طويلة في إطار فكرة المحاضرة الغنائية اللي هى بتعتمد على منهج قراءة التاريخ كظواهر و علاقات مترابطة .. ( الغنا في اطار مجمل علاقات التاريخ الاجتماعى للبلد )
.. فاطمة خميس كانت في الخط الغنائى النسائى بتاع رابحة التم تم ( ربوحة ) ، و ميري شريف
.. و دا خط بختلف من خط سارت فيهو مهلة العبادية و فاطمة الحاج ، و عشة الفلاتية و آمنة خير الله اللي عُرفت بمنى الخير !!
.. في المحاضرة حنلقى الضو علي الخلفية التاريخية لتمايز الخطين ديل و الاسباب ورا هذا التمايز في علاقتو بغنا شريفة بت بلال اللي كانت موضوعة في الاقامة الجبرية في المسالمة بواسطة الخليفة عبد الله التعايشى !!
... و الغنا ذو الاطار الاوسع اللي اسمو ( الغنا اللي ما معروف سيدو ) بحتل برضو مساحة مقدرة في المحاضرة ، و من ضمنو اغنية دمعى اللتشتت اللي وزنها الشعرى بتماهى بجاذبية عالية مع ايقاع التم تم عند فاطمة خميس و مع العشرة بلدى عند اللحو ...
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... محمد يا ود عثمان .. تشكراتنا للإسناد الفنى - الغنائى المستمر .. و بقاءكم في خط الذوق الغنائى عالي المستوى ..
.. ام الحسن الشايقية تخيل سافرت مصر و سجلت اسطوانة مع عبد الله الماحى !! شوف المقدرة ! هو الذوق برا ؟ ! ما هى آية وبس حكاية !! كلمات للراحل حسن الزبير ..
.. حنرجع لام الحسن الشايقية . . و قطاعة الخشوم .. و شريفة بت بلال برواقة
في علاقة قديمة و ثيقة وخيط رابط بين الريقى ، و الدليب .. و النقرزان .. و العشرة بلدى !! و هى كلها علاقة طبول افريقيا القديمة .. دا برضو موضوع للنقاش !!
الطبول الجننت محمد عبد الحى و ناس صلاح و علي المك .. ياها الطبول الجارية في دمنا ، و سر اسرار الوجدان الطروب ! .. طبل العز ضرب هاوينا في البرزة .. و غير ضرب ام كبان انا ما بشوف عِزة !! قول لبت المكاوى شاعرة سودانية و مغنية في التركية ..
.. قيل ان اول مغنى سوداني هو اسماعيل الدقلاشى ( الفقير سيد الربابة ) الواردة حكايتو في كتاب الطبقات ! دا موضوع عاوز نقاش برضو !!
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. في الفاشر الكبير قبل 250 سنة كانت البت الفوراوية الجميلة ست اللهيج السُكري البتشبه خُدرة الورتاب بتغنى في بكائية حزينة و بتتشفع لامها و عمتا حواء يخارجوها من مأزق الزواج الاجبارى لعجوز ذو حظوة ..
يا إية راعي ليا .. عشان هوان نموت بلا زُرية !! جبدنى مسك ايدى طارت بُقاق .. يا عينى على المنقو اب جلدا دُقاق !! ... و الهوان ياهو الراجل العجوز الي ما معاه ولادة و زرية ..
الميلوديا ( غنا الفم المُلحن ) اللي غنت بيها بت دارفور اغنية عمتى حواء ، هى ذات اللحن اللي بنى عليهو صول سلاح الموسيقى في التركية و الكان بعرف النوتة، معزوفة مارش ود الشريف !! و الصول شال الاهزوجة بتاعت دار قِمر المخصصة لوصف محنة ود الشريف و حولها للمارش الشهير :
.. ود الشريف رايو كمل .. جيبو ليو شالاتا من دار قِمر .. اهل الجبال جاكم بلا .. بشارة جاي مع سيدى محمود ورا ... خليل فرح ختا لحن المارش في مقدمة اسطوانة عزة مستخدما البيانو !!
.. المارشات العسكرية خماسية المقام هي مِحور تاريخى هام لتطور الموسيقى و الليّرك السودانى يا سلام علي عدنان احمد عبد الله ، و زقل ، و بادى ، و احمد مرجان و جماعتو .. يا سلام علي اولاد قبائل نوبا الجبال و جنوبنا الحبيب الشكلو تيار الوطنية السودانى الصريح داخل المجموعات الاولى لقوات دفاع السودان و الجيش الوطنى لاحقا و جابوا ناس علي عبد اللطيف و الماظ !
... المحور التانى الهام هو غنا ناس الشيخ العدار ، وبت المكاوى ، و احمد ود بعشوم رواد الغنا في التركية ، و اللى بربطم خيط الوجدان الغنائى السودانى مع غنا السلطنة الزرقاء اللى صدح بيهو الفقير الصوفى اسماعيل الدقلاشى ( سيد الربابة ) و العاشق للبنية الجميلة تهجة !! .. الامر المحير فعلا ، منو الكتب داك الكلام الجميل قبل 180 سنة .. الموز روى .. قايم سوا .. فاطرك ضوا .. يا ناس بالنار قلبي إنشوا !! الكابلى بغنى الموز روى بذات الميلوديا الاولى بتاعت التركية !! المجد للكابلى و للرجل رقيق الحال محمد شعفوفة اللي بمرق السير و الاخبار المدهشة للغناء الشعبى القديم !! و اصلا ود حاج الماح كان فنان طمبور قبل ما يتحول للمديح على نهج علي ود حُليب , و شيخ العاقب
... المحور التالت الهام ياهو محور الدوباى و الشعر القومى وصوت الحكامات اللي شق فضاءات السودان منذ قديم الازمان !! في الدوباى بجى غنا علي ود محلق في السمحة تاجوج في فترة ما قبل التركية
فويطر العنجك الملح الرشيدى .. تاجوج ما اتلقت يا خميلة زيدى !! واضح انو حركة التجارة كانت بتوصل ملح رشيد و دمياط المصرى لحدى السودان و المحلق وصف بياض و جمال اسنان تاجوج بملح رشيد !! يا سلام علي الميتافور و الصورة الشعرية
في المحور دا برضو بجى غنا و دوباى الحاردلو و ابراهيم ود الفراش ..
.. يا خالق الوجود انا قلبى كاتم سرو ، و قلبى المن نشوه للبنات هواى ، و الشافك قبيل ميت عليك باحساسو .. و الحسه لِقاك ظنيتو يقسى خلاصو !! و الزول السمح يوم الخميس واعدنا ! و كل غنا ود الفراش في معشوقتو الدون لِحق و شتن السمحة !!
نهر الغنائية و جُمل اللحن الخماسى السودانى الجارى عبر التاريخ و بشيل من كل تراث و تقاليد القبائل و الجهات الاربعة واصل مسيرتو لغاية تخوم امدرمان ما بعد المهدية ! ودا النهر العامو فيهو ناس محمد ود الفكى و سرور و العبادى و ابوصلاح في بداية القرن العشرين !!
.. كيف انتقل العبادى و ابو صلاح من الدوباى و الرميات الي رحاب الاغنية الكاملة ، ما هى المؤثرات و اسباب ذاك الاستدعاء التاريخى للتجديد ! ؟
.. ليه المغنين و الشعراء انتقلوا الي كبوشية في فترة الحضانة و التشكل الاول ، ثم عادوا بعد داك لامدرمان ! ؟
.. هل السِيرة الهلالية و تغريبة ابوزيد المنتشرة كغنائية في دار قبائل غرب السودان هى سبب لرسوخ و بقاء السلم السباعى العربى في تلك الديار !؟ في اغنية الموز روى كابلى بقول : سِيرة زناتى مع هلال .. ! هل ام كيكي ( الكمنجة ام وتر واحد ) هي حاملة السباعى في غرب السودان ّ ؟
المحاضرة الغنائية هي بالاساس محفل للتحليل و التفكيك ، و اعادة القراءة بمنهج علم التاريخ الاجتماعى ... المحاضرة ساحة النقاش و البحث و طرح مزيد من الاسئلة الحساسة ...
... و ببقى السودان كما قال فضل المولى زنقار : اعز شى عندى .. من برقو للهندي .. !
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
أذكر أن د. طراوة حينما كان معنا
بالسلطنة بخرناه بالقرض و اللبان
حتى يفوق من العين التي أصابته بينما
كان على مسرح الجالية السودانية يمخر
بنا عباب الحقيبة ..
وحقا أنها كانت عين كافرة و لئيمة ، حيث أن
طراوة فجأة (إتشنقل) من على خشبة المسرح و ضرب
ا########## ضربا مبرحا بينما هو يرتجف من الأخمص للمنكعين
و كأن به داء (الابليبسي) التي يتسبب فيها ابليس
حينما ينفث سمومه داخل مسامات الضحية خلال عين الحسود ..
المهم-ما اطول عليكم-الدكتور احتاج علاوة على القرض
و البخور لمعالجات ادرينالية و ستيرويدية عاجلة ، من
دونها كان الآن مبدعنا يجوب في عوالم أخرى ..
وهكذا تم التخلص من العين اللئيمة ، و أوصينا طراوة
على أخذ الحيطة و الحذر (من جو جونو و كده) ، وعدم
الظهور مرة أخرى على أيتها مسرح مهما كانت عظمة
الحقيبة و سوقها الحار ..
الآن اخوتي في أمريكا ..
أنتم تتوفرون (حلوة الكلمة دي) على الادرينالين
و الستيرويدات ... لكن أين لكم باللبان ، ناهيكم
عن القرض العزيز ؟؟؟؟؟
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
والله العظيم الكلمة الواردة بين
كلمة ضرب و كلمة مبرحا في مداخلتي
الواردة اعلاه ، و التي تم شطبها،
لا كلمة بذيئة ولا عنصرية ولا حاجة ...
معقول القرض يكون بذئ ؟؟؟
(كمبيوترك) ده جن ساكت يا بكري !!!!
يعني كلمة ا########## دي فيه شنو ..
ما كلمة سودانية أصيلة و مهذبة ..
انشاء الله المرة دي ما يشطبوها لي ..
كدي نشوف ..
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
أها أنا نسيت طراوة و حقيبته بالمرة ..
ذلك لأن الموضوع قد دخل الحوش ..
هل ترضون (لكمبيوتر بكري) أن يسئ
إلى شخصي الضعيف ، و مرتين على
التوالي ؟؟؟؟
جاملناهو في المرة الاولى ، يقوم
يشطبها مرة تانية ؟؟؟
هذا أمر جلل لا ينبغي السكوت عليه ،
خاصة و أن تداعياته بدأت تظهر الآن
و بقوة و كثافة ..
اتصل بي العديد من الاحباب و قالوا لي
ما عهدناك يا القرض بذيئا .. بل عاشرناك
حلوا سمحا مهذبا حين تشتري و تقتضي ...
(اعدائي) في (السلطنة) و في هذا المنتدى استغلوا
الفرصة و هاك يا تبشيع ..
و لشد ما آلمني أن الأخت منى خوجلي تأففت و امتعضت
و قالت أنها تصوت الآن لسحب الثقة عني ..
والدتي المسكينة اتصلت من الشمالية و قالت لي
وا خسارة عبشنا ما اكلوا الجراد و الحكمة متيق ..
الوالد اتصل و ذكرني بأنه قد أحسن تربيتي
و تنشأتي وهو الآن في حيرة من أمره ، كيف
وقد انحرف ابنه البكر عن جادة الطريق ..
شكيت كمبيوترك لله يا بكري ..
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
الاحباااب
دكتورة طرااوة
عثماان موسى
و ما زلنا متاابعين هذه السيااحة الجميلة
فى التااريخ الجميل,,,
و فى انتظااار سيرة ابو صلاااح و بدور القلعة
و الاربعة العظاام الذين ذكروا فى نفس الاغنية
لتكون المحطة التاالية الدنيا منى و احلاااام
و نور و زهور و استلم المجاال..
و محطتنا النهاائية قوقك هالة كلك ضئ...
و يلا منتظرين الحكى الجميل...
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... اخى محمد ابراهيم قرض .. هون علي نفسك ! و رغم انى ما فهمت القصة بتاعت مسرح نادى مسقط دى ، لكن بالضبط الكلمة اللبت تتفك شفرتا دى رسلا لي علي البريد الخاص ! يعنى واليها انت بالصد و الاهمال ! حسب قول البديع خضر بشير في اغنية الزوزو رمز الالف !
.. و اقبل سلامنا و انقلو لناس مسقط !
.. الشيخ محمد ود الرضى عندو نوع من السلام فريد في امرو :
السلام يا روح البدن .. يا غصين النقا يا لدن .. احكي ليك اياما عدن .. الامان يا جنة عدن .. جاز سربا زانو الفطن .. الاحتفال بقرب الوطن ! ربنا يجمع شملنا في وطن النجوم ، وطن صفاء الانفس و العقول ، و طن التعددية و السلم الوطيد
.. ود الرضى افتتح مدرسة الوطنية السودانية مبكرا باغنية يا حليل الجيش الرحل .. بعد داك عبيد عد النور كتب: يا ام ضفاير قودى الرسن .. و بعدو يوسف مصطفى التنى كتب : في الفؤاد ترعاه العناية .. و بسببا كتبت احد النساء الامدرمانيات اغنية : كان طلعت القمرا .. الخير يا عشايا تودينا لاهلنا بسألوك مننا ! وهى فى امر الصراع مع الاستعمار الانجليزى ! الغنية بتمجد اصرار اولاد البلد الكانو على شاكلة تمساح الكبلو الضارب اللّية ، انو يختو الطاقية و العمة في راسهم عند دخول دواوين حكومة المستعمر في مخالفة صريحة و شجاعة للامر الادارى القصد إزلال الرجال !!
.. حنعرج ونميل علي مظاهر و اسباب الازمة الاولى في الغناء اللي حلاها كرومة بعبقريتو ! و برضو الازمة التانية اللي حلاها برضو الكاشف بعبقريتو ! و حنبرز الخيط الرابط بين كرومة و الكاشف !
.. منتظرين يس ياسيكو يرفع وصف الخنتيلة ! توزيع و اداء الكابلى بايقاع الرقى في استناد تام علي الميزان اللحني الاول بتاع كرومة !! شئ عجيب يا النور !
.. الخنتيلة ! اللي خلت قلوب ناس ابوصلاح هزيلة و عقولم كتر زلزيلة .. و نواصل سبر غور صالح عبد السيد ابو صلاح .. اللى ما اتعرف حتى الان سبب جروحو التسعين ، حين انو الناس جروحم عشرة بس !!
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: أحمد طراوه)
|
| Quote: * بيضاء خالصة البياض كانها ... قمر توسط جنح ليل مبرد |
يحكى أن أحدهم كان يحب زوجته المليحة حباً جماً، فقال لها ذات يوم : إن لم تكوني أجمل من القمر فأنت طالق ،وذلك لشدة إعجابه بها ، وقد تعارف الناس علي أن القمر هو أجمل مخلوق ، فما كان من الزوجة الجميلة إلا أن جمعت أمتعتها وذهبت لبيت أبيها علي أساس أنها مطلقة ..والزوج المغرور الفار نقز في عبو ، فجمع له كل العلماء ليفتوه في أمره ، فأجمع كلهم علي أن الزوج طالق لامناص ، إلا عالم واحد ظل ساكتا فلما أستنطق قال: يقول سبحانه وتعالى و لقد خلقنا الإنسان في أحسن تقويم)
وبذلك فكت الحجنة القوية ، فليت قيس علم أن هناك خلق أجمل من القمر ..
واوحيحى ووا وجع قلبى
ـــــــــــــــــ
من صيدة القنيص الفترت كلبى
ــــــــــــ
القارى العلم من دينه بتسلبى
ــــــــ
والماشى الحجاز من جده بتقلبى
ــــ
يذكرني هذا بقولهم :
تمرة كريمة البي سبيط عرجونك
لوكان أمنوك زاهد الدنية بخونك
يابسيبة الوادي الروايا مرونك
حب المنقا والأنناس حلاتك ولونك
أستدعيت الإحتياطي الإستراتيجي من مخزون الذاكرة حيث لم تسعفني بديهة حاضرة بما يتناسب وإسمكم، فلم أفلح ، عدت أدراجي حيث لاينفع إقدام ولا حذر ، لأقول :
شكراً عثمان موسى .. بدون ألقاب ..
أعلم أنه ليس بإمكان مانكتب أن يرقي لقامتكم ، ولا نطمع في أن تنحني سوامقكم له ، ولكن ندلف من هذه الرياض لا لنقتطف ، بل لنتنسم شيئاً من عبقها الفواح الذى ضمخ أماسي مسقط في ليالٍ خلت ، حيث عرفنا أحمد طراوة الأديب فبل أن نعرف د. أحمد طراوة الطبيب ، على مسرح النادي السوداني بمسقط الذي مازال صامداً رغم عصف جونو به مستمداً عافيته من ترابط أعضائه ، يشد بعضهم بعضا ، ويابدر بالله أسطع لي وياسهيل أرجوك أسمع لى ، فأقمنا فيه حفل وداع د. صفية ساتي التي غادرتنا إلى كندا ، وصدح لها مهيار بمصاحبة فرقة النادي الموسيقية بعزاز علينا وشالوا نوم عينينا ، فراقم جبري لالا مابإيدينا ، وكان آخر وصاياها لنا المحافظة على اللمة في هذا النادي وقد وعدناها بذلك فيكفي النادي فضلاً علينا أننا تعرفنا فيه عليهم ومازلنا على العهد ...ونحو المزيد من الإبداع يادكتور طراوة .
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... او كما قال صلاح : في بلادنا ترتاح .. و ضل الدليب اريح سكن !
.. جاءت هذه التعبيرية الفذة في سياق حالة الاشفاق الذى اعترى الشاعر وهو ينظر طيوره المهاجرة عبر تلك المسافات البعيدة !
.. و الاشد غرابة يا عدلان ان عبد الخالق محجوب و الذى امتلئت كل خلايا دماغه بتفاصيل البرنامج الثورى للتحولات الاجتماعية ، كان قد كتب مقالا صحفيا عند تلك الستينات رصد فيه الدلالات الجمالية العميقة اللتى تجلت في اغنية الطير المهاجر نظما و لحنا !!
. .. الطير المهاجر و الحبيب العائد لوردى ، و من ثم اغنية وحياة ابتسامتك يا حبيبى لمحمد الامين ، و نابك ايه لعثمان حسين كلها مثلت اعلانا صريحا لدخول المدرسة الثانية للغناء السودانى مرحلة النضوج و تبلور الشخصية السودانية الفريدة علي الصعيد الاوركسترالي !!
المدرسة التانية هي اجمالا مدرسة تعدد اللونية ! كل منهم كان ذى نكهة ! بالفعل ما كان فيهم واحد بشبه التانى ! و كلِ جميل و فريد و حالة قايمة بذاتا ! احمد المصطفى ما زى حسن عطية ، و الكاشف ما زى عثمان حسين و لا الفلاتية ، و ابراهيم عوض ما زى وردى ، و خدر بشير وصلاح بن البادية كل منهم غنى الاوصفوك بتاعت عتيق بطريقة مختلفة تماما عن الآخر !!
التمايز دا و اللي بيعكس الثراء ، عندو اسبابو و مصادرو و خلفياتو االلي حنوضحها في المحاضرة باستخدام النماذج الغنائية ..
الفراتيرناتى واللي ياهو الخوة المرهفة ، بطل من بين تعابير منصور المفتاح و سمية بت طلحة .. حسبنا سجع رمضان ود زايد وهو يترنم بتلك الفانتازيا الزاهية : يا يمة يا حوا .. سيد ريدي شن سوا .. لو فتحو القلوب جوه .. بلقوا الصورة خوه !
.. و دى حزمة من الاغانى المصنفة ضمن ما يعرف بالغنا اللي ما معروف سيدو !
... مذهل الراحل رمضان زايد وهو يردد كلمات مبارك المغربى : انا ليتنى زهرُ في خدِك الزاهى .. انا ليتنى نهر تنسابو امواجى .. اشتاق في صمتِ .. و احبُ في همس ! الموصلى بحر العلوم قال لي ذات مرة : اللزمة الموسيقية اجمل ما تكون في اغنية مبارك المغربى اللي اسمها : مرت الايام .. كالخيال احلام ! اللهم وسع مرقد عبدك عبد الدافع عثمان الذى اسعدنا و اشجانا !!
شكرا يا معاوية علي الاسناد المستمر .. سنعود لابوصلاح اللي كتب وصف الخنتيلة ، المتكاثفة رياحها القادمة من وادى عبقر ليلا .. علي لوح خشب تمت تسويته عاجلا بفارة النجارة في ورشة النقل النهرى ببحرى صباحا ! و بالفعل كتابة الشعر لها احكامها !
...
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
حدثنا يا طراوة عن الثنائيات و بداياتها
احكي عن عوض و ابراهيم شمبات و عطا كوكو و محمود عبدالكريم و عن الثنائي الخرافي ميرغني المامون و احمد حسن جمعة
القي لنا بظلال المعرفة عن عوض الجاك و ابراهيم عبدالجليل
احكي عن غرق الصوفي ود الرضي و يا ليل ابقالي شاهد
احكي عن التنافس الشعري بين هؤلاء العظام الذي اهدانا الروائع
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
1955 _ عندما أعزف يا قلبى الأناشيد القديمة
ويطل الفجر فى قلبى على أجنح غيمة
سأغنى .. آخر المقطع للأرض الحميمة
للظلال الزرق .. فى غابات كينيا والملايو
لرفاقى فى البلاد الآسيوية
للملايو ولباندوق الفتية
لليالى الفرح الخضراء
فى الصين الجديدة
والتى اعزف فى قلبى لها ألف قصيدة
____
سوف يتحدث ويتحدث عن رائعة الشاعر د/ تاج السر الحسن _ وعن احلام ابنا
السودان فى تلك الايام الخالدات 1955 والسودان دولة تشابى نحو التحرر
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
| Quote: اخى محمد ابراهيم قرض .. هون علي نفسك ! و رغم انى ما فهمت القصة بتاعت مسرح نادى مسقط دى |
عزيزي أحمد طراوة ..
في الاحوال العادية يمنعني (تواضعي الجم) من توضيح
(الشكر) الذي نسوقه من باب التقدير و الاعتراف بفضل
الآخرين و تميزهم ..
وقصدت من (قصة مسرح مسقط)-وهي خيالية بالطبع-أنه من شدة تمكنكم
و تميزكم في سبر غور الحقيقة في الحقيبةو التوثيق لها ، فلقد
أصابتكم العين .. أ و ليس المتميز في كافة المجالات عرضة لعين
الحسود التي فيها عود كبير ؟؟؟
و ذهب خيالي أن تلكم العين كانت من (التركيز) بمكان لدرجة
أنها طاحت بكم على الأرض-و بالدراجي على ا########## !!! بينما كنتم
أنتم وقوف ساعتها أمام النظارة تملكونها ناصية الحقيبة ..
وقع ليك يا احمد ؟؟؟!!!
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
الثراء المعرفي لدكتور أحمد طراوة أمر لايخلتف عليه إثنان ( ولا برفعولوا الضو ) محاضراته دسمة ، شاملة لكل ضروب المعرفة تاريخيا وسياسيا ناهيك عن الجانب الأدبي الذي يحشد له الجيوش الجرارة لمؤازرته ، ومعروف عنه إنه متفاني ودقيق جدا في جمع كل شاردة وواردة ، لا زال الكل في مسقط يذكر محاضرته الأخيرة أو ليلة الأغنية الوطنية ، علي مسرح النادي السودانى بمسقط ، مارس / 2005 حيث جمعت هذه الليلةالجمال والكمال من أطرافه بإجماع أهل مسقط الذين أصابتهم بتخمة جعلتهم لايستسيغون بعدها شىء ...
فهنيئا لكم بغذاء معرفي لاظمأ معه ولا خواء بعده .
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
... يا سلام يا بت طلحة .. سامية النفس و الافعال !!
العبادى .. جبل الشعر المتحرك ، و بوشكين السودان بقول في نهاية اغنية شيخ ريا امرك من فخُر :
" بى عودة يا بت العُزاز .. ترجع ليالينا اللُذاذ .. " !
ليلة الاغنية الوطنية تلك بنادى مسقط اصلا قامت على اكتاف كتيبة النساء .. انتى ، و وداد الزاكى و د. هالة الزين زوجة ود حامد المرتضى و الاخريات خلف الكواليس .. ثم رفيعة المقام شاعرتنا المرهفة سوما ، والهام عبد الخالق اميرة المسرح (و جوان بيز ) تلك الاغانى من شاكلة عروس الروض ، و قام محمد بشر , و بت ملوك النيل ، و الفينا مشهودة .. ويوم تجلت بت دهب خيرى الصغيرة الحلوة فادهشتنا و انزلت علينا مطر الغنا الجميل المُقدم مع الهام في كامل الانسجام و الثنائية البارعة اللي ذكرتنا زينب و خديجة !!
.. ظهرت لي محبة و زادت حبة حبة .. و فتقت بقت وردة في مدنى شارع القبة .. المجد لثنائى النغم و يالها من جراءة تسير على ذات خط مهلة و الفلاتية و شريفة بت بلال اللي قاتلت مع الرجال سنة حرابة سنار
.. انطبق علي الهام و بت دهب في تلك الامسية قول ابو صلاح
" ... يا الجاهلة طِيبك عبق .. سِنك براقا يسوى بق .. ترمحى تشبهى مهر السبق .. الليل اليل يا جمال الليل .. الجاهلة فوقك عهود .. بر و طه و يس و هود !! و يا لجمال و زهو الصورة القرآنية في شعر الحقيبة .. ودا موضوع قايم بذاتو في المحاضرة الغنائية ! "
لكن الرميات برضو امرها لعجب : طابق البوخة ، يا زميل دقق .. الجمال و الذوق فيها متحقق .. ، حالي العلى ما اظن يزول .. و ما بهمنى قول العزول .. هنا برضو يظهر تمسك ناس ابوصلاح ، و ود الرضى و العبادى بعشقهم القديم للقصيدة المربوعة الصغيرة بالغة التعبير اللي اسمها الرمية ، جنبا الي جنب مع صيغة الاغنية الجديدة الطويلة اللي ابتدر حركتا العبادى سنة 1921 ! و يا لجمال الرمية عند كرومة و بادى و محمد احمد عوض و الاستثنائى عوض الجاك : يقول عوض الجاك بصوتو اللي يصعب تصنيفو ، و فى مقدمة اغنية يا جميل يا مدلل لعبد الرحمن الريح ..
" درجو جابو قمنا نتشرف .. نور الحفلة للمكان شرف !! " و شرف الاولى جاية من الشُرفة ( المتاوقة ) و شرف التانية ياها الشرف و الاُبهة ! يا سلام علي ود الرضى في افاق الجناس و الطباق و عاطر المحسنات و البديع
و قصيدة العبادى المهداة لعمر شيخ الجزارين ... شيخ ريا
" لله درك يا عمر .. سوق الادب بيك إنعمر .. ضرغام و ابهى من القمر .. اجمل و الّذ من السمر "
ذاك اجمل ما كتب في وصف حفلات العِرس في عشرينات القرن الماضى ! بيت الحفلة اب رتينة ضوايا كان ساحة النشاط الروحى للرجال و النساء وذلك بالنظر لمحدودية و ضيق واقع الحركة الاجتماعية !
.. الغنا كان رئة كاملة للمجتمع بتنفس بيها الاوكسجسن الضرورى لعمليات الاحتراق الداخلى المُحركة لعجلات عربة الحياة و الانتاج و العمل .. الغناء كان وليد الانقسام الاجتماعى التاريخى الكبير التالت للعمل !! هنا بنلجأ لمنهج علم التاريخ الاجتماعى و شقه السيسيولوجى لفهم ظاهرة المدرسة الاولي .. !
هنا بنلاحظ نفس القسمات اللي ميزت تاريخيا لحظة ناس شكسبير و كورتريدج و بليك ! ناس محمد ود الفكى ، و العبادى و ابوصلاح و البنا كانو ايضا هم الاقدر علي ممارسة التجريد و التعميم و بناء الانساق و المفاهيم المعرفية ! صحيح هم كانو اجمالا بعكسوا الواقع و محكومين بيهو ! بس بعكسوه باستقلالية و تفرد متجاوزين للمباشرة السقيمة ! ياهو كان ذلك هو الابداع
و بالنتيجة إنو حركة الغنا و اللّيرك السودانى .. سابقة و متجاوزة و ارفع شأنا دائما مقارنة بالحركة الاجتماعية في محاور اخرى ( التجارة ، السياسة و كورة القدم ، اللي استخدما العبادى مبكرا كصورة شعرية دالة و جميلة : عمل القلوب كورة قدم .. يلعبها و هي في العدم .. كهربنا و الصف انهدم .. سوانا قُتلا و مافى دم ! .. )
.. بعد ظهور سرور ، البنات بقو يقومن للرقيص براهن دون انتظار العريس اللي كان زمان هو صاحب الحق !
" انا شايف انها كانت حالة مبكرة لانتزاع الحقوق بمقدار عالي من البداهة و العفوية المستبطِنة وعى انسانى عميق ! "
.. الخروج من الترسيم الذكورى اللى كان قابض علي كل مفاصل حياة المرأة ، هذا الخروج العقلانى المتدرج و المشروع واكب تطور حركة الغناء و استمد منها المبادرة و العزم !!
.. و الجراءة النسائية دى وصفا العبادى في نفس حفلة زواج عمر شيخ الجزارين بالخرطوم سنة 1924 لمن البت الجميلة قامت لوحدها للرقيص :
" بادر ظبى شغل القلوب .. بى لطفو للانظار جلوب .. كم بلحاظو هزم تلوب .. و قتل اسود و عاد بالسلوب !! شبه اريلا حاول فزاز .. عينيك و جيدك جام قزاز ! مما رايت تلك الوجان .. انا عقلى فرّ رِكبلو جان !!
بيت العرس ( الحفلة ) حلقة مفتاحية في مسالة غناء المدرسة الاولى و تطور هذه المدرسة علشان كدا حنفرد لهذه الظاهرة السودانية الخاصة حيز من الحديث في المحاضرة مستندين علي حدباى عبد المطلب اللي كان شديد الاهتمام ببيت اللعبة !! يا ريت نلاقى في محاضرة واشنطن او فيلادلفيا واحدة من كريمات ذاك الجيل من نساء السودان حبوبات صغارنا الحاليين ممن حضروا بيت العرس لمن كان عشرين يوم !!
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
تعرف يا طراوه إنت طاقه لا يطيقها هذه المنبر لهمبريبها الذى يسرق سيدو وينوم بالظهر والعصر والمغرب والعشاء ويقوم فى الثلث الأخير بتلمس حقائق الأحلام لا أضغاثها....عزيزى هذه هى الأرجل التى نقف عليها فى أزمنة الهزيمه المصنوعه بجهل فى حاضرنا الباهت...عزيزى هذه ملكات وثروات هائله وعلم يمكن أن ترقع بها شملة كنيزة الوطن ولا أدرى إن كانت كنيزه أو عنيزه...عزيزى أسافر معك سفر الرهو عندما تأتيه شارات الفصول بحاسته التى لا تخطئ سفر من تتبع رحلة من عشق من الأسكله حيث حل بابوره الذى كان عشاؤه بالقطينه ثم تابع معه الرحله بكوستى والجبلين إلى الرجاف وما بعدها وأوصاله ترتجف من خيط وصل ما كان له أن ينفك عنه وهيهات له هيهات...عزيزى وتهزنى من الرميات مكتنزة المعانى الطروبه الجذابه( سبعون قصرت الخطا...وتركننى أمشى الهوينة ضالعا متعثرا...من بعد ما كنت الذى يطأ الثرى زهوا..,.ويستهوى الحسان تبخترا) والأخرى يا بنت عشرين والأيام مقبلة...ماذا تريدين من موعود خمسين ...وتحرك ثبات الجبال فى نفسى أغانى الحزن التى يبدعها الطيب عبدالله...فيا شيخى ويا ولى هذا المضمار إنا لك حيران فأمرنا ما شئت..........................
والشكر لك يا عثمان والسلام للجميع
منصور
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Moawia Mohammed)
|
بسم الله الرحمن الرحيم
الجالية السودانية الامريكية
سكرتارية الشؤون الثقافية
منتدى الجالية الثقافي
يسر منتدى الجالية الثقافي دعوتكم لحضور الندوة الكبرى التى يقدمها
د/ أحمد محجوب (طراوة)
الباحث و المتخصص فى مجال الغناء السودانى
بعنوان
وقفات في مسار و تطور الغناء السوداني
المكان :
أكاديمية الجالية للكمبيوتر
6295 Edsall Rd #220
Alexandria, VA, 22311 الزمان:
الساعة السادسة مساء
السبت 21 يوليو 2007
( الرجاء من الجميع الحرص على الحضور في الوقت المحدد لمنح فرصة المشاركة لأكبر عدد من الراغبين/الراغبات ، سوف تمنح فرص المناقشة بأسبقية الحضور)
الأراء والأفكار التي تطرح في جميع منتديات الجالية سواء كانت من ضيوف المنتدى أو أعضاء الجالية أو أعضاء اللجنة التنفيذية لا تعبر عن موقف الجالية انما تعبر عن أصحابها فقط ………………………………………………………………………….
د/صلاح الزين
السكرتير الثقافى للجالية السودانية الامريكية
| |
|
|
|
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Moawia Mohammed)
|
Quote: د/ أحمد طراوة سوف يتحدث عن شيخ المتيمين المرقش السودانى العبادى
والشاعر العبادى :
امدرمانى النشاة من القلائل الذين رسموا حوريات النيل . |
عثمان ود موسى خلى د. طراوة يحكي لينا عن زيارته لسنجة والرماش التي اطلق فيها اغنية سائق الفيات؟
بالمناسبة انا عملت محامي بين السوكى وسنجة وكل مرة بمشى بالدرب التحت واتوقف لدى شجرة هجليج وارفة الظل وبعاين في بيت ناس هوندا متاملا ما قاله العبادي عنها .
فهل لك اخى طراوة ان تروى لنا كل خلفيات المناسبة ؟
عميق مودتى
| |
|
|
|
|
|
|
| |
Osman Musa
Moawia Mohammed
yasiko
Mohamed Abdelgaleel
Bashasha
أحمد طراوه
munswor almophtah
ابراهيم عدلان
الطيب شيقوق
فيس بوك
تويتر
انستقرام
يوتيوب
بنتيريست