اتحننتوا ..؟؟ اتدخنتوا..؟؟ اتكبرتوا .. ؟؟ (بوست غير ممعيَّر )

Quote: قالوا ليك مدثر كاريكا عقب المباراة اجتمع بالسيد جمال الوالي ...وحدد مدثر كاريكا علي ضوء هذا الاجتماع مشاطيب المريخ حيث قضي كاريكا باعارة النفطي وشطب كلتشي وطمبل وطارق مختار والباشا ...واعطاء فرصة اخيرة لسفاري. كما ناقش مدثر كاريكا الابعاد الهندسية للمقصورة. غايتو جمال الوالي مرتاح في دمو... مدثر كاريكا يسجل ليه ويشطب ليه. القرارات التي اصدرها مدثر كاريكا في العاشر من يونيو كانت علي هذا النحو: هيثم طمبل ...شطب طوالي. كلتشي ...شطب لكن بعد ما تقعدوا معاه. طارق مختار...شطب. وارغو شطب وجلد. العجب ....شطب وتكريم. محمد كمال.. شطب واعمال شاقة. الباشا ...يشطب ويرجع القروش الشالها. النفطي ...اعارة. لاسانا ...منحه فرصة اخيرة. كاربوني... توجه له لوم عتاب شديد اللهجة. جمال الوالي ...انذار اخير. هلالابي (مفتح) قال لمريخابي (عادي وعيشة زيادة) ..شفت (تنقا) قبل ما مدثر كاريكا يجيب القون عمل في عبدالسلام حميدة شنو؟. المريخابي (العادي) قال ليه : تنقا ذاتو ما لاعب ...انت من زمن تنقا. الهلالابي (المفتح) قال ليه : اول عبدالسلام حميدة كان لاعب. تعريجة جائزة نجم المباراة من الهلال شالها (مهند الطاهر) وجائزة نجم المباراة من المريخ شالتها (الكشافات) واستلمها نيابة عن الكشافات (سفاري). يا سفاري لو باريت (الكشافات) حقتكم دي ما بتخلي ليك جائزة حايمة في البلد. والله يا ناس الهلال (محمد كمال) برضو مفروض تعطوه (جائزة). كرموه علي الاقل بي (درع). محمد كمال مسكين فاكر بعد هدف مهند الطاهر وقع فيه (صاروخ). عشان كدا صاحبكم دا قنع من ناس الباشا وطارق مختار وسفاري ونجم الدين ويقعد يضرب في تلات تسعات. الاهداء قال جول رينيار : ( الانسان الحر حقيقة ، هو ذلك الذي يرفض دعوة للعشاء دون ان يذكر عذرا..). ناس المريخ ما احرار عشان رفضوا (العشاء) وقالوا السبب (كاريكا). كاريكا يبقي ليكم (فطير بي لبن). كاريكا في عينك. محمد اقتراح اقترح علي أي مريخابي ان يعمل ليه (كمينة طوب) ويقعد تحتها يغني : (الليلة الليلة وحرق بي نار الكماين ديل). نحن بنفهمو انو قاصد مهند الطاهر. مهند الطاهر ذنبو شنو؟. هسع دا اقتراح دا. احتمال مريخابي مشي لطبيب امراض نفسية ...وقال ليه: والله يا دكتور كل ما اشوف لي (ديك) بحس بي رجفة وحمي وبشعر رأسي بلف...واستفراغ. الدكتور قال ليه : احسن تقعد مع (الديك) وتحل مشاكلكم الاسرية بصورة ودية ...قبل الموضوع ما يتطور ويصل اعلام الهلال. هسع دا احتمال دا. افتراض جماهير المريخ فريقهم لاعب مع اتراكو جدعوا بالحجارة ...فريقهم لعب امام زيسكو جدعوا بالحجار...امام الترجي جدعوا بالحجار...امام الامل عطبرة جدعوا بالحجار ..وامام الهلال جدعوا بالحجار. انا عرفت يا دوب ليه المنتخب وقت لعب امام (فلسطين) كان تشكيلة المنتخب كلها من المريخ. تدربوا في (فلسطين) وتجوا في الرد كاسل. هسع دا افتراض دا. المباراة تحت رعاية (سوداني ون)...مع ذلك كانت نتيجتها سوداني تو (مهند ومدثر). حرف الميم يا صلاح. نظام شنو؟. نظام أي حاجة نحن عندنا بي نظام. الناس الما عندها (كرت) برضو ممكن تشوف معانا (الروشنة) دي. هدف مهند الطاهر طبعا كان (تشاهد غدا)..لكاس العالم ...قولة خير للكأس. ما شفتوا الجزيرة بعد الهدف دا قالت في (تشويش)...ومن بعد فكت (التشفير). محمد كمال دا قدر ما اتبرجل ...ما قدر يثبت الكورة. انت يا مهند (الصواريخ) دي موش حصل منعوك منها. في ناس عندها عوايل وفي اطفال...تهديفة (غير قابل للصد). تهديفة زي (قطاع الطرق)...الباشا اتحاشاه ...وسفاري عمل نايم. اما هدف مدثر كاريكا فهو كما قال الاخ عمار طنون ...(الشروق مرت من هنا). شو ...شوووووو...هدف حسم أي حاجة. هدف زي (الجماعة عقدوا). يعني أي جاحة انتهت. خلاص خلصت. انتهت. رفعوا الجلسة طوالي بعد هذا الهدف. انت يا نجم الدين طلعت أي كلام ...جاري ساكت. تقول عاوز يظبط اذاعة ام درمان. زي الزول البشوف ليه ناس بتصوروا بقول ليهم : صوروني معاكم. بدخل ساكت كدا. يعني عبدالرحمن الدعيع في فترة علاج ...نزل وشارك بعين واحدة دون ان يكتمل شفاه باذن الله ويعود كما نحب. صلاح ادريس طبعا ما عندو حق يزعل من المعز محجوب. المعز محجوب عارف أي حاجة. نظام نحن شفوت. أي حاجة عندنا بي نظام. المعز محجوب قالوا ليك قال لي صلاح ادريس ...ناس وارغو ديل عبدالرحمن الدعيع بي فد عين بقضيهم. الموضوع ما بحتاج. ما بستاهل. ديل ما عاوزين ليهم زول بشوف. الكشافات دي عملوها لي شنو؟. الحارس لو لعب ليهم (مغمض) عديل ما بجيبوا فيه قون. قون شنو البجيبو وارغو ...هو وارغو فاضي لي من (الكشافات). يكشف كدا ويشوت في الكشافات. تقول صرتو مدفونة في (لمبة). كشافاتكم دي تعبت مع وارغو...قالوا ليك منير ام بدة فتر عديل من (الصنقيع). الغريبة وارغو كل ما يشوت ليه كورة في الكشافات بعاين لي كرعينو. نظام الولد (فلتة). فلتة شنو؟. انتي (فتة). بعدين وارغو ما براه...بلة جابر ذاتو بقي يعكس في (الكشافات). لاقين الهملة دي وبهدفوا في الكشافات. انتوا مالكم يا الهلالاب ...كانت كشافات ابوكم. ان شاءالله نخللها. هسع في الموضع دا كلو ....جبت ليكم سيرة (الايميل). انا بتكلم عن (الكشافات)..مالكم انتوا. العجب يا حليلو ...مسكين كل يوم يقلعوا منو (الكابتنية) ويعطوها لاعب تاني. طارق مختار بقي كابتن المريخ. ونجم الدين بقي كابتن للمريخ. هملة. هسع طارق مختار دا في السلة بديهو الكابتنية...بعد دا كلو عاوزين العجب يجيب ليهم قون. اما السعودي فهو (لا بجدع ولا بجيب الحجار). يحدع وين مع ناس سامي عبدالله ؟. سامي دا عشماوي بس. قالوا ليك سامي عبدالله لقي ليك عبدالحميد السعودي شال منه اللوحات والرخصة. السعودي بقي متل سواق اللوري البدخل ليه في شارع غلط (اتجاه واحد). ما بعرف يتخارج. ما بعرف يتصرف كيف؟. دا كلو ما بهم. تعالوا نبدأ (التحقيق). يا سفاري انت مالك بتسرح ...البسرحك شنو في (البرد) دا؟. سرحان عبدالبصير. ايوة يا بيّ... يا سفاري انت ما عارف (سادومبا). سادومبا دا تقول فاتح ليه (طاحونة). سادومبا هو لب لب. سفاري : يا سيادتو انا ...في الحقيقة انا. سرحان عبدالبصير. ايوة يا بي... في الحقيقة انا ... في الحقيقة شنو؟...مية مرة اعلام المريخ قال ليك ما تسرح يا سفاري ..ما تسرح يا سفاري ...ما تسرح يا سفاري. سرحان عبدالبصير. انت تشيل وتسرح. ما عارف (امبيلي) شغال (غربلة) ...سفاري من الباشا ما بفرز. يا سيادتو انا ...انا بمر بي ظروف صعبة. سيادتو في عينك...بعدين نحن ما حذرناك من مهند الطاهر ...قلنا ليكم ما تخلوه يشوت. يشوت ليه ...انت واقف ليك حامد بريمة. محمد كمال دا لو شاتو ليه (دو) بنزل. محمد كمال دا (الحصوة) ما بعيدة منو. الاعراض ظاهرة. يا سيادتو دا كلو من الباشا. الباشا في عينك ...بعدين خليني اكمل كلامي ...ما تقاطعني....انت والباشا كلو واحد اتكل علي التاني ...وانت عارف (الباشا) ما عليه تكل...هو كان عليه تكل ناس الهلال كان شطبوه. انا ذاتي قلت كدا. قلت شنو يا سفاري؟. قلت ناس سادومبا ديل ما بتمسكوا...يا سيادتو ..انا سادومبا دا شيء اشوف وشيء ما اشوف. سادومبا هو لب لب. امبيلي ذاتو بدخلنا في حتة صعبة...كمان انا يا سيادتو عندي (وجع ضرس). يا زول مشاكلك الخاصة دي ما تقولها لينا هنا ...عندك وجع ضرس دي حاجة ما بتخصنا. موش شلت قروشك ...موش اخذت حوافزك ...الناقصك شنو؟. هسع (المقصورة) دي في برشلونة موجودة. الاذاعة الداخلية ..رأيك فيها شنو؟. جمال الوالي ما قصر معاكم ...عمل ليكم سور واذاعة داخلية...ومقصورة. تاني بس يعمل ليكم شنو؟. يتقطع يعني. يا سفاري انت ناس المريخ ديل قالوا بقيت السبب ...اي هدف يدخل في المريخ قالوا انت السبب. يعني يا سفاري بقيت زي (بهاء الدين). امشي يا سفاري انتظر برة ...ونادي لي الباشا. انت الباشا؟. نعم انا الباشا يا سيادتو. ما شايف أي باشا. انتوا بتسموا ساكت. باشا علي شنو؟...انت ليه بتعمل كدا ...مالك الحاصل عليك شنو؟..عشان مستواك يدهور بالشكل دا؟. يا سيادتو انا سادومبا دا ما بقدر اثبتو. شنو؟. ما بقدر اثبتو. وامبيلي. وامبيلي برضو ما بقدر اثبتو. وكاريكا. كاريكا دا بالذات ما بقدر اثبتو. طيب انت وقت ما بتقدر تثبت الجماعة ديل مشارك في المباراة دي ليه ...كنت تعتذر وتقول للمدرب ما قادر اشارك. كنت تقول ليهم (ما قادر اقول ما قادر اصرح ..يمكن قون يروح ويمكن قون يجرح). كنت تصرف. يا سيادتو انا قلت ليه. وقال ليك شنو المدرب؟. المدرب قال لي ما عندك مشكلة...حكم الرأية ما بقصر معاك. وبعدين؟. حكم الرأية فعلا ما قصر معاي ...لكن محمد كمال دا ما انستر...المباراة كلها يرجف. شفيق يا راجل ...انتو كنتوا منتظرين محمد كمال ..يعمل ليكم حاجة. شفيق يا راجل. يا زول امشي ونادي لي طارق مختار. نعم يا سيادتو انا طارق مختار. يا طارق انت طارق (محتار) ...ما طارق مختار...بتعمل كدا ليه؟. بعمل شنو يا سيادتو؟. بتتلفت المباراة كلها ...تقول حاجب في محكمة...بعدين (التقلة) دي شنو؟. التقلة دي ما منو؟. من منو؟. من سرعة سادومبا. انت وقت سادومبا دا بتخافو منو كدا ...ما تقرأو طب. طب في عينك. معقولة تحرسوا (الاميل) وتخلوا الاصل. الباشا تلميذ ما حصل شفنا لينا (باشا)...شيخ غفر ....احرجتنا ساكت مع عدنان حمد يا الباشا. في مصر انتهت الباشاوية بعد حكومة محمد نجيب ...وتم تجريد الباشاوات من ألقابهم وارضيهم الزراعية في حكومة جمال عبدالناصر. هنا سادومبا (بعيد عنكم) سحب لقب (الباشا) من احمد الباشا ليكون احمد (شيخ الغفر). باشا علي منو لكن. في باشا وصيف. في باشا بمسك من الفانلة. الباشا دا ذكرني بي (خرج ولم يعد) المباراة كلها (رايح). قلت ليكم قبل كدا كتروا (جكوك) الموية للباشا ما صدقتوني...قعدتوا تغالطوني. السنة كلها تغالطوا. لكن برضو مفروض تحمدوا الله ...عارفين لو (كاسروكا) كان لاعب كان حصل شنو؟. كان الحجار التي جدعها جمهور المريخ في الملعب كلها كان وقعت وقعت في رأس (كاسروكا). كاسروكا فلقوا المعز محجوب ...ربط رأسو. زول حساس شديد. احتساب سفاري قالوا شال (جائزة) باعتباره احسن لاعب في المريخ. دل ...دل ...دللللللللل. الجائزة دي يكون ادوها ليه ناس الهلال...او تكون هذه الجائزة جائزة احسن (سارح) في المباراة. علي كدا ...كان تعطوا طارق مختار جائزة علي اساس انه (اتقل) لاعب في الاستاد. غايتو يا طارق مختار لو لعبت القمة القادمة ...كاريكا بصبح هداف الدوري. انا اول مرة اشوف لي لاعب اتقل من (المقصورة). المقصورة هسع ذنبها شنو؟...سألتك. مريخابي (مفتح) قال والله الزمن البدل الضائع مفروض يكون نص ساعة ...طارق مختار براه لمن يلف عاوز ليه عشر دقايق. نحن قلنا ليه (لف). عشان تاني تجيبوه من امل عطبرة. اصبروا ...(الباشا) انا ماشي عليه. ما تضيقوا. قصة بايخة جدا واحد وقعت فيه (صاقعة)...قام بعد اربعة ايام زي (الملوخية) المورقة ...وقال مية مرة محمد كمال دا حذرتكم منو؟. محمد كمال دخلو شنو بالصاقعة يا اخوي... عاوزين ليكم سبب ساكت عشان تشطبوا بيهو محمد كمال. محمد كمال دا لو شطبتوه مهند الطاهر بزعل. حكمة اليوم الكيشة قدمو بي 6 نقاط ...واضربو. تنويه صلاح ادريس سافر نيالا ...المريخاب قالوا عشان كدا اتغلبنا 0/2. يعني كان سافر روسيا كان عدنان حمد الي الان بتحدث عن (الناقة) التي قيل انها سوف تضبح لهم اذا فاز الهلال. ناقة ...ما (ديك). هسع الناقة ذنبها شنو؟. الناقة خلوها ....نحن ذنبنا شنو يا عدنان حمد عشان تخلي المقصورة والعجب وقلق والسعودي وسفاري ...وتقعد تحدثنا عن (الناقة). المباراة كلها يتحدث عن (الناقة). تقول المباراة منقولة من (قندهار).