|
Re: الأسماء لا تعلل .. كل من له رأي ، في اسمه أو اسم غيره ، يجمع هنا .. (Re: welyab)
|
أخوي ولياب ..
سلامات ..
أسمي ده عاجبني عجب
و ينطق عُـــــزاز ...
سمايتي كانت حدث على مستوى مديرية عبري لانو اتولدت يوم السوق و اللواري نقلت خبر مولدي بين القرى كشريط اخباري متنقل وعلى شرف قدومي ضبحوا عتوتين و أولمت الولائم و القراريص ... المشكلة كانت أنهم لغاية يوم السماية ما كانوا لاقين لي اسم! عملوا قرعة كانت فيها مجموعةاسماء ..
(زينب) (هاجر) (صافورا) (غادة) (عزاز) و اسمين أجنبين نجاني الله منهما ...
و سحبت بنت اختي اسمي 3 مرات و بها صرت عزاز!
العاجبني انو مافي عزازات كتار ولما زول بيناديني غالبا بيكون قاصدني ما قاصد الجنبي لانو احتمالات وجود عزاز ثانية في نفس المكان تعادل احتمالات دخول غنماية لاجتماع مجلس الوزراء ...
____
ليه بدين بأخونا ح ح ح ح ؟؟ عندك اعتراض انو اتعدى الحد المسموح بيه في الحاءات؟؟
|
|
|
|
|
|
|
|
|