|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: الرفاعي عبدالعاطي حجر)
|
احبتى عبدالفتاح زوماالعزيز عادل التجانى ود الجيران العديل المبروك معتصم محمد صالح وحات الله خجلانة منك ومن كرمك واصالتك عبدالله السفاح دحين انت من اهل العروس ياربى؟ عمر الشيخ او عمر منصور ياخ انت زول سمح بث محمد عبدالرحمن الغالى تمر السوق وكان قسمو ما بحوق سعيدة بيكم ونتلاقى فى الفرح الكبير عمر جهز العازفين من هسى والا سوف ترى والسلام يلا ودعتكم لامين الوداعة تغتيكم وتضاريكم وتجعل البركة فيكم ممنونة ليكم
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: الرفاعي عبدالعاطي حجر)
|
سفرٌ عزيز من أم حــــــنينة
كنتِ سيدتي : سلمى الشيخ سلامة كما أنتِ دائماً تتبسطين رفقة ، وتلهين بحديث العافية . نحن كلنا في حاجة لقراءة هذا السفر لكل عروسين في نشأتهما الأولى . الرجل والمرأة بالفعل متساويان . ولكنهما مختلفان . يحتاجان معرفة بعضهما ، والتدرب على عادات الآخر وموروثاته من مشاعر أنتجها تكوينه الهرموني، ودربة الحياة التي عاش كل منهما تجربته فيها . ثم الحياة وكيف يفسحان للقادمين الجُدد على فراش الطفولة . أن يتعلما كيف هي أمثل الطرق لرعاية الأطفال وتطبيبهم وتغذيتهم ، ومعرفة آلامهم . فالغريزة وحدها ليست كافية لإنشاء مهد لطفولة صحية بدنياً ونفسياً وعقلياً .
من هنا كان حديثكِ الثري ، مثقال ذهب في دنيا يقدم الأفراد فيها على الحياة الأسرية ببياض صفحات الذهن . فالبراءة طبع نبيل ، لكن أن نعرف موضع أقدامنا فهو أكثر نُبلاً . ألف تحية لكِ يا سيدة الثمار الناضجة ، وأم العروس بطبعة الألفية الثانية من نبات أهل السودان الذين يطمحون أن يكونوا في مستقبلهم أفضل منا ، وأكثر تطوراً مما نحن فيه . ألف تهنئة وألف تحية ، ومحبة من القلب . وإنها لمشاعر جديدة على النفس أن يتذكر طفلة تحبو وتنطق " ماما " ، ثم يمضي قطار العُمر فإذا هي عروس .
نهدي السنين من الصوت الدافئ : الطيب عبدالله
(عدل بواسطة عبدالله الشقليني on 12-20-2009, 03:52 PM)
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: Ishraga Haimoura)
|
Quote: انتى الان ستدخلين الى باحة حياة جديدة ، انتى الان زوجة فكونى لزوجك الصديقة التى حين يشتد به الضيق يلجا اليها ، والحبيبة التى تظل دائما قصيدة يكتبها كل يوم ، والاخت التى يحن الى حديثها و"محنتها" ، والام التى ينشد حضنها ، والزوجة التى يسكن اليها فى الشتاء ، كونى له الدفء، والنسمة فى الصيف ، وال"ضرى " فى الخريف ، ابحثى عن مكامن قوته واسنديها ، ولا تبحثى عن مكامن ضعفه فتنفذى خلالها ، اطعميه لحظة جوعه ،وارويه لحظة ظمئه ، وابحثى عن كل ما يسعدكما كونى قوية دون ان تفقدى انسانيتك ، وشرسة دون ان تفقدى انوثتك ، وحليمة دون هوان ، محبة وحافظة لكما ... فستجدينه يبادلك ما قدمتى اسعى دائما ان يكون بيتك آمن ، افرشيه بملاءات الامان والمحبة ، وتوسدا "مخدات " الفأل والامل ومعا ، اعملا على اسناد دعامات البيت بالصدق والوفاء اذا غضب فابحثى عن مواضع الحالة ولاتجاريه فى غضبه ، واجعلى الابتسامة شعارا ، والضحكة انيسا ، وضعى "شعرة معاوية" بينكما ابدا فان شدها فاجعليها ترتخى ، ولا تطالبيه بما لا يستطيع ولن يفعل ان فعلتى |
الأستاذة سلمى أعجبتني كلماتك جداً وتمنيت أن تحمل كل الأمهات رجاحة عقلك ألف مبروك
...
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: عادل التجانى)
|
كتبت سلمى الخضراء
Quote: اسعى دائما ان يكون بيتك آمن ، افرشيه بملاءات الامان والمحبة ، وتوسدا "مخدات " الفأل والامل ومعا ، اعملا على اسناد دعامات البيت بالصدق والوفاء اذا غضب فابحثى عن مواضع الحالة ولاتجاريه فى غضبه ، واجعلى الابتسامة شعارا ، والضحكة انيسا وضعى "شعرة معاوية" بينكما ابدا فان شدها فاجعليها ترتخى ، ولا تطالبيه بما لا يستطيع ولن يفعل ان فعلتى |
لقد نصحتيها يا صديقة
ولو انت ملتزمة بنصيحتك وتوجيهاتك وعائد خبراتك ف ح أفكر في أيجاد فرصة ثانية لك تستحقينها ، بشهادة وعيك الثاقب أعلاه
لأبنتنا السوميتة عزة كل التهاني وصالح الدعاء بأن يتم الزواج على خير وبالخير والفأل السعيد وللعريس علي الطاهر نقول ، لقد أخترت العروس التشرفك واخترت النسابة ال يعزوك وبهم تفتخر وفيهم أبوها صديقنا جعفر نصر رجل تضعه على جرح يطيب ويبرأ وأمها تعرفها فنانة صادقة المشاعر وأم رؤوم وإنسانة أبسط ما يقال.. أعز من النساوين الرجال وخالها صديقنا دكتور طارق الشيخ زول شامل يقنعك في الإقتصاد وفي الكورة وفي السياسة وحبوباتها مناضلات معروفات وفيهن الحايزة على الإحترام العالمي استاذتنا المناضلة فاطمة أحمد إبراهيم وعمتها آمال نصر مناضلة صلبة و مفخرة وعمها ياسر نصر وسيم الرأي والموقف
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: أبو ساندرا)
|
Quote: ولو انت ملتزمة بنصيحتك وتوجيهاتك وعائد خبراتك ف ح أفكر في أيجاد فرصة ثانية لك تستحقينها ، بشهادة وعيك الثاقب أعلاه |
الصديق الحميم ابو ساندرا بركوتة دحين ما بالغت معاى ؟ يا ود امى الحبيب عليك امان الله الطير وكتين يفر جنحينو "يطيربينا" تانى ما بقدر يقعد فى القفص من تالاى لقيت حياتى لا تحتمل "الاخر "فى متنها تخيل لمن تطلع من المدرسة المتوسطة وداخل الثانوى حلاتك تشاغل فى بنات المدارس ولابس "الردا"وقالو ليك بعد شهر ترجع المتوسطة كيف حيكون حالك ؟ اها دا حالى سعيدة جدا بوحدتى اكتب واقرا واسافر "على كيفى " حد الدنيادايرة اوصلو اكتب واشوف الدنيا هسى عندى كتابين طالعات والتالت تحت المراجعة اها كان جبت لى "الفة فصل " ماشه وين ؟اليوم كلو قاعدة تكتبى ؟ما عملتى ما سويتى ؟ مالى بالهم يا الحبيب على طنقوق رقبتى وارجا وليدات عزوز اشيل والعب واضحك حلات الدنيا على ولا ماكدى ؟
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: عاطف عمر)
|
Quote: نفضي جيوبو أول بأول عشان ما يفكر يعرس فيك " |
لاحول لله يا عاطف اخوى دا فهم اكتر من قاصر لانه الزول البفكر كدا دا زول عجيب او زولة عجيبة وفى تصورى البسيط الحياة شراكة وتبادل الاحاسيس ولو فكرنابالصورة دى اقل حاجة ما حيكون فى اتنين قاعدين مع بعض تعرف يا عاطف امهاتنا زمان كانوا انسانيات بشكل ما عادى الواحدة تلاقيها تعمل المستحيل عشان تحمى بيتها واسرتها رحم الله امهات الزمن داك واتمنى بناتنا يكونن على قدر المسؤولية
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: ضياء الدين ميرغني)
|
Quote: اسعى دائما ان يكون بيتك آمن ، افرشيه بملاءات الامان والمحبة ، وتوسدا "مخدات " الفأل والامل ومعا ، اعملا على اسناد دعامات البيت بالصدق والوفاء |
رسالة مفعمة بالدفء والمسئولية, فلله درك يا سلمي. هؤلاء العيال يعيشون في ظرف يكاد يكون كامل الإختلاف عنا وعن أساليب تربيتنا, ولا أعلم كيف يقع ما تقولين من كلام جميل في آذانهم, ليس لأنهم غير وحسب, بل لأنهم يعيشون في مجتمع تختلف قيمه عن قيمنا... وإن أعلم أن في الأفق قيما كونية تتبدى ملامحها هنا وهناك, بحكم الهجرة والتداخل بين البشر, لكنها ما تزال في طور إبتدائي ربما لا يسمح لنا بالتفاؤل حول سيادتها وغزير عنفوانها وسطوة أثرها ... لكنها في كل الأحوال رسالة عميقة وتعكس صدقا وهما بالغي الشأن , وهذا ربما يكون أقصى الممكن, في مثل أحوالنا هذه... فلك ... سلمى تنزع القبعة ... وتحضر التجلة.
أمنياتي للعريسين الشابين بزفاف آلق وحياة سعيدة.
... مع عاطر تقديري
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: HAYDER GASIM)
|
الغالية سلمى
قال تعالى في محكم تنزيله: ــــــــــــ بسم الله الرحمن الرحيم (ومِن آياتِهِ أن خَلَقَ لكُم مِن أنفُسِكُمْ أزواجاً لتسكُنوا إليها وجعل بينكُم مودَّةً ورحمة، إن في ذلك لآياتٍ لقومٍ يتفكرون)الروم21.
أختي سلمى
من نعم الله علينا أن جعل الزواج آية من آياته،وها هما عزة وعلي يقبلان عليها،فأسأل الله أن يجعلهما ينعمان(بالمودة والرحمة).
مبروك لإبننا علي مبروك لبنتنا عزة مبروك للجدة الغالية سلمى(رغم أنفك) مبروك لنا جميعاً....قبيلة سودانيز أون لاين
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: HAYDER GASIM)
|
Quote: هؤلاء العيال يعيشون في ظرف يكاد يكون كامل الإختلاف عنا وعن أساليب تربيتنا, ولا أعلم كيف يقع ما تقولين من كلام جميل في آذانهم, ليس لأنهم غير وحسب, بل لأنهم يعيشون في مجتمع تختلف قيمه عن قيمنا... وإن أعلم أن في الأفق قيما كونية تتبدى ملامحها هنا وهناك, بحكم الهجرة والتداخل بين البشر, لكنها ما تزال في طور إبتدائي ربما لا يسمح لنا بالتفاؤل حول سيادتها وغزير عنفوانها وسطوة أثرها ... لكنها في كل الأحوال رسالة عميقة وتعكس صدقا وهما بالغي الشأن , وهذا ربما يكون أقصى الممكن, في مثل أحوالنا هذه... . |
الصديق حيدر تحياتى اتفق معك الى حد ما لكن عزة نشات فى بيت منحتها فيه امى عصارة خبرتها واخرجتها للحياة ملمة باالامثال الشعبية والحياة فى بلادنا حتى اذا جاءت هنا كانت تعى الى حد كبير معنى ان تكون فى بلاد اضافت اليها الكثير ايضا فما كانت تلك البنت التى تبدو "غير " لذلك تجدنى متفائلة لانها انضج منى فى كثير احيان بحكم مزجها بين المزاجين الثقافيين على نحو يدهشنى احيانا حفظها الله ولك التقدير ياصديقى العزيز
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: Alsa7afa_30)
|
الاحبة والحبيبات انعام عبد الحفيظ ربنا يحفظ شبابك ويعليك ويقويك يا ست الخير
خطاب حسن احمد يا عشرة العمر معاك ببقى الزمن اجمل يجى العالم قريب منى يا ود يانيل سعيدة انك صديقى الليهو بشتكى والليهو بحكى يا سلام ياخطاب ابو العروس وخالها كمان يسلمك الله يا اجمل صديق فى الكون
سوما الشاعرةالجميلة عقبال نفرح باولادك بنجاحهم وسمحن
انعام حيمورة وانعام عبد الحفيظ معزتكن ما بقدراوصفا نتلاقى يوم فرحنا كلنا يا رب والاقيكم يوم 25 ثمح؟
رجاء العباسى زميلة الزمن الجميل مشتهية قدلة معاك فى القاهرة تعال نعملا مش فكرة كويسة ؟ ورينى جاهزة متين ؟ يسلم عمرك يا حبيبة
الابن الغالى الصحافة 30 عقبالك حبيب الكل
الصديق الاسفيرى الجميل مجدى احمد الشيخ بركة البقيت طيب حبيب وشاكرة ليك الجمال الاتحفتنا بيهو يسلم عمرك وتشوف نجاح وليداتك يا فاضل يا كريم الاخلاق
تسبمو كلكم ونتلقى فى الفرح الجميل
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: سامي صلاح محمد)
|
سلمى الرؤوم... حبيبتنا كلنا واختنا القريبة من القلب والروح...
فرحتنا بكم دائمة وراسخة زادها ألقاً ودفء زواج عزة وعلي ...
طالت هاماتنا -انا وندائدي- بذكرك لنا ضمن باقة اشواقك العظيمة وفي غمرة افراحك الخاصة ...كم نحن محظوظون بان يشملنا هذا الذكر وفي هذا الموقف الشفيف... وستجديننا دوماٌ كما نتمنى نحن بأن نكون اقرب من ردة طرفك ...تمتد افراحنا بك وبعزة وعلي بغير مدى ..لأنها افراحنا ...
اتمنى لهما ...لك ..ولنا .. حياة سعيدة...رغيدة...مديدة..واحزان بعيدة.. وان يجعل لهما الخير في كل خطوة ..ويفرش طريقهما بسمح الفال...وحلو العيال...ووافر المال..
عوض الله بشير حواء المنصوري
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: Awadallah Bashir)
|
Quote:Quote: اطعميه لحظة جوعه ،وارويه لحظة ظمئه ، وابحثى عن كل ما يسعدكما |
لكن ما ضغطى عليها شديد ؟؟؟
هو العطش والجوع الماسكو شنو فى امريكا ؟؟ هوووووى ماما سلمى بطلى الحقارات كل زول يقوم يشرب براهو .. وبطلى رسايل من كهوف التورا بورا لووووووووووووب بكلم ليك الامريكان ديل يرشوك .
ماما سلمى الف مبروك .. وعقبالى ..
ـــــــــــــــــــــــــ انتى على الطاهر دا منو ؟؟ دخلونا الفلم كامل ياخ !! معتصم !! كدا ما تجيب لى دبلة ..
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: كمال عباس)
|
Quote: نجاة الحبيبة يعنى وين حنهرب منو وين ؟ هسى شغالة على نص اسمه "حبوبة مع مرتبة الشرف" وما تتخيلى انى مستعجلة كيف ابقى حبوبة العمر مشى ياحبيبة اتمنى انك تكونى معاى اليوم دا بالجد اتمنى محبتى التى تعرفين |
غالية بت الغالية
وروناالعرس وين؟
تعرف يا سلمى قبل كم يوم لاقيت عموري (ود عشة) بقى ما شاء الله بسم الله راجل ارجعني الى ايام بعيدة وسعيدة
اطفالكم ديل من اشعلوا امومتنا ونالوا محبتنا الدائمة انت ومريم احمد الطيب وعشة المبارك وسوزوكي وتماضر ربنا يحفظ ليكم اولادكم ويفرحكم بيهم
نفسي في عرس يلم ناس المعهد لواحد من عيال المعهد لكن الدنيا شتتنا... اكرر تبريكاتي لبتي عزوزة بيت مال وعيال
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: كمال عباس)
|
احبتى اعذرونى للردود الجماعية ابدا بصحبى الجميل ابوبكر يا هندسة مشتاقين وشكرا على لقب ام العروس المثالية
الزول الشاعر الجميل محمد خليل تحيات كتار وشحمانات واتمنى ان نلتقى فى السمح
جعفر محى الدين يا غالى تسلم وعقبالك ولو انتهيت من الدوشة دى عقبال الوليدات
الشاعرة الرقيقة هند محمد دايما سباقة للخير تسلمى يا حلوة الكلمات
كوستاوى ،لقيك صعب جدا ، فى التوثيق ، الله يخليك لينا يا كرمبتنا
عماد الطيب ، تسلم حبيب ونجيك فى السمح ودايما سعيد
تيسير النورانى ضرور حنتلاقى باكر او بعد باكر ، ولازم تجى لازم نتلاقى ؟
عبد اللطيف بكرى ي صديق احب الناس لى تسلم ويسلم عمرك
كمال عباس الزول المحلل الامتن فى هذا الاسفير ، اغبطك على عمق قراءاتك شكرا لحضورك البهى
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: Tragie Mustafa)
|
ام حازم تحياتى يا بت امى العرس فى السودان انشا الله وحاسافر إنسان رخيصا لهذه البشرى
Quote: واعلم ان زوجتك اهم رسالة دكتوراه وماجسيتر بحياتك فاحرص على قراءتها الحقيقه
ومعرفة تقلبات طقسها.... واهتم بتغذية عقلك بكل المعلومات الحديثه حول تطور شخصيتها.
واحترم ارائها.....واياك ان تحرجها او تقومها قدام الناس...ده بيتم
في لحظات الحمميه وبعد لحظات مفعمه بالود ممكن يكون النقد يؤتي ثماره
واهم شيء انتقاء الالفاظ....وان تقلب كل نقاط الضعف وكانها نقاط قوة |
وصية من ام عندها خبرة شكرا ليك ام حازم ولا عدمناك يا ست الناس
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: سمندلاوى)
|
اهل العروس تعالو حبياتى وحبايبى حواء سليمان يسلمك الله ويخلى ليك وليداتك تشوفى السح معاهن يارب
ناذر الخليفة اوعه تعمل لى مجنون وحركات جيش حتجى وحتغنى كمان من هسى وعداد "بابو " شنو ليك ، عدادنا محبة وخلاس
ابراهيم النعيمة مشتاقين كتير وطولت ما ظهرت لا انت ولا صاحبك هاشم ودراوى ، غاتسين وين ؟
مريم الحبيبة ما اتعشيتى معانا عشان كدا اتضهبتى مرة تانية مش؟ العشا ابيتى تاكلى قلتى مستعجلةمحمود ما بسكت لامى ، بالله دا علينا نحنا ؟ اقعدى مع اخياتك ديل اتعشى واخدى ليك رقصة رقصتين وفرفشى معانا وامشى
محمد الطيب الزول الذى يخيفنى من الكتابة لانه مدهش حالاقيك فى السودان ضرورى خالس
الشايقى عاد خسيمك "النمل" كان ما اندليت علينا من بلادك دى ، وحات شيخى بلاك ما بتبقى تعال العشا وجيب معاك محمد جبارة ومحمد كرم الله ونسوى الفوت ، قلت كيف ياعشاى ؟ محمد جبارة دا خلو على بجيبو نعمنو ساكن جمبنا فى امبدة تعال انت فى عضمك
سمندلاوى هسى يعنى كان ختفت كراعك كدى يومين مالك يعنى وكمان كان جبت معاك قاسم نصر واحلالى يبقى فرحين
معتصم ود الجمام يعنى لا انت ولا وليداتك ؟ سمح لكين ليك على ان بقيت حية فى الدنيا دى امانة ما بجيك ونتشاوف واحلالى بيك
دينا خالد يا اجمل صديقةاسفيرية الدبل على بس قولى عوك شنو ليك ؟ يا اهلى الحنان اقعدو ما تمشو الحفلة لسه مدورة تعالو نفرح بى بنيتنا واختكم تسلمو
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: Awadallah Bashir)
|
عوض الله بشير الله عليك يا اعز الناس ورفيقة دربك حواء المنصورى ما زال صوتك يترقرق فى الاذن كاعذب ما تكون العذوبة منذ ان كنا فى المعهد وكنت رفقتكم كما تكون الاخت الكبيرة اذكركم بالخير دائما وحفلاتنا فى البيت التى ما تاخرتم عنها قط وحفلات زواج اخوتى وخؤولتى الله على تلك الايام لكم هى حقيقية ولكم انى سعيدة بكم
من هسى جهز العود وقول للحبيبة حواء تجهز الاورغ ونعمل عدد واحد حفلة قيدومة كاربة يوم الجمعة مساء لازم كنت اتمنى قاسم نصر يكون معانا وبلغ مجاهد تحاياى وعثمان النو والفاتح حسين اتمنى ان نلتقى على الحب دائما محبتى
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: بكرى ابوبكر)
|
الاحباء العزاز تحية واحتراما
عماد خليفة تسلم حبيب رغم انك نسيتنى ليك زمن لكن معذور عارفة جرى الشغل والتعب حاصل
ضياء يا ميرغنى تسلم حبيب ويزيدك سماحة وغنا "طالبه منك اغنية لحنتها ونزلتها هنا قبل فترة لنانسى عجاج ما الفى اليوتيوب ،التانية محتاجة ليها ضرورى رسلها لى فى الايميل ما تنسى حبيب
محمد فضل الله المكى تسلم وعقبال وليداتك يا كريم الخصال
عبد الله ابو شوارب رسل لى تلفون ناس البيت فى ودسلفاب ضرورى جدا
بكرى ابو بكر يوم شكرك ما يجى تسلمو ونتلاقى فى الافراح دايما
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: سلمى الشيخ سلامة)
|
Quote: حبيبتى عزة اتمنى لك من كل قلبى النجاح فى حياتك القادمة اتمنى صادقة لك كل الهناءة والرضا والسعادة ابنتى حين تزوجت لم اجد احدا يرسم لى خريطة القادم فتعثرت خطاى ، لا لسبب سوى ان امى كانت اصغر من ان تتكون لديها خبرات الحياة انذاك ، لها المغفرة ولها الرضوان من الله ، لذلك احرص ان افعل ، ليس بقصد ان تلتزمى حرفيا بما اكتبه لك هنا ، لكن ، ساحاول ان اقول لك ما تعلمته من هذه الحياة انتى الان ستدخلين الى باحة حياة جديدة ، انتى الان زوجة فكونى لزوجك الصديقة التى حين يشتد به الضيق يلجا اليها ، والحبيبة التى تظل دائما قصيدة يكتبها كل يوم ، والاخت التى يحن الى حديثها و"محنتها" ، والام التى ينشد حضنها ، والزوجة التى يسكن اليها فى الشتاء ، كونى له الدفء، والنسمة فى الصيف ، وال"ضرى " فى الخريف ، ابحثى عن مكامن قوته واسنديها ، ولا تبحثى عن مكامن ضعفه فتنفذى خلالها ، اطعميه لحظة جوعه ،وارويه لحظة ظمئه ، وابحثى عن كل ما يسعدكما كونى قوية دون ان تفقدى انسانيتك ، وشرسة دون ان تفقدى انوثتك ، وحليمة دون هوان ، محبة وحافظة لكما ... فستجدينه يبادلك ما قدمتى اسعى دائما ان يكون بيتك آمن ، افرشيه بملاءات الامان والمحبة ، وتوسدا "مخدات " الفأل والامل ومعا ، اعملا على اسناد دعامات البيت بالصدق والوفاء اذا غضب فابحثى عن مواضع الحالة ولاتجاريه فى غضبه ، واجعلى الابتسامة شعارا ، والضحكة انيسا ، وضعى "شعرة معاوية" بينكما ابدا فان شدها فاجعليها ترتخى ، ولا تطالبيه بما لا يستطيع ولن يفعل ان فعلتى اتمنى لكما حياة هانئة وسعيدة ابدا واتمنى ان اعود قريبا وسريعا "حبوبة " فالعمر تساقطت اوراقه ولم يبق سوى القليل ختاما محبتى لكما امكما سلمى الشيخ سلامة |
خلي كل الناس تغني والقلوب الحانه تبني تبني الحان من فرح بالعديل والفال تهني وليك يا سلمي الحبيبة اهدي أزهار من معاني ومن تمني ربي يسعد عزة بنتك بالعيال والمال وحسن ظني
ملياررررررررررر مبروك يا أعز أخت
| |
|
|
|
|
|
|
Re: رسالة الى ابنتى عزة وابنى على طاهر وهما فى الطريق الى الحياة الجديدة (Re: امل كرار ابراهيم فرح)
|
الأخت/ سلمى بت الشيخ...
أرجو أن تسمحي لي أن أدلف لهذا الخدر الدافيء
بحنو أمومتك الدافق... لأهنئك وإبنتك عزة
متمنيا للعروسين عمرا طويلا في المحبة والألفة
والمودة والسكن...
أما كتابتك عن العرس السوداني ما بين الأمس واليوم..
فقد حلقت بنا في أجواء الضريرة ورائحة المحلب الفوَاح
والعديل والزين... وهومت بنا على وقع عرضة في حضرة وحسناء
تتمايل في (سباتة).. وتبشير وبطان.. ودلوكة وشتم..
وحريرة وخرزة وسوميته!!!!
ألف ألف مبروك... ونشوفك حبوبة..
قولي آمين---------------
ما في سابق معرفة لكن محبة سودانية خالصة
| |
|
|
|
|
|
|
|