|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
مساكم الله بالخير والرضا...
أُقدم لكم اليوم شاعراً أديباً رصين الكلمة والعبارة مُجيد فقط أُقدمه لكم ولأول مرة في حوش الشايقية مع ترنيمات الفُراق الحزينة ألا وهو الشاعر الشاب "محمد الأمين فضل المولى" ـ الأراك ـ...
ـــــــــــــــــــــــــــــــــــــــــــــــــ
حينما يشتد بنا صقيع الإغتراب نلجأ إلى دفء الحروف ولكن ....... حضن بلادى لا يعوَض
ِ طعم الفراق
منقوش على كف القدر ... مكتوب مسطر من زمان أمشى قبال الأوان وأسوق خطاى على عجل تانى وين ألقى الحنان ... وألقى العيون الكان بتدينى الأمان
يا حلوة ما أقسى السفر تلقينى واقف فى الرصيف .... طعم الفراق فى حلقى مُرْ يا غربة كيف ؟؟؟؟ يتحملك قلبى الرهيف واليوم يمُرْ .... يبقالى زى كمين شهر لكنى يا زولى الولوف ... جاييكَ لو فاضل عُمُرْ
زى الغمام .... وكتين يسيل بالشوق نزيف ... ينزل مطًرْ
وشوق البحرْ .... وكتين يفيض لحظة خريف ...
يهدى السلام لى أحلى قيف
وإن حصلْ ...
يا بنيه إتأخَر عليك خلى بالِك منى فيك دسينى فى عمق المسام غطينى بى رشرش عينيك وليكِ من قلبى السلام أصلى راجع بكره ليك
مدى بالأشواق إديك .... وناولينى من كاس الغرام
وبين الصباح ... وشوق نجمه هداها السَهَرْ...
نتلاقى والليل إنحسَرْ
نتغطى بالأشواق وشاح حتى القَمَرْ بالشوق سِكِرْ....
طالب من الليل السماح عند الفجر ....
يا داخلة فى البال إجتياح من قيد هواكِ ولا مَفَرْ...
أهواكِ فى زمنى اللِراح .... وأهواكِ لى اخر العُمُرْ
وأهواكِ لى اخر العُمُرْ
دبى - 2007م...
ومن أبي الحُسين تعظيم سلام وتحايا للأخ محمد الأمين ومزيد من الإبداع وربنا يديم هواكم ومحبتكم يا اخوي ويرجعك بالسلامة وتلقى الأهل والأحباب طيبين وتامين وترجع ليهم سالم وغانم ياااااااااارب...
قواسيب مودتي...
أبو الحســــــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
صبحكم الله بالخير والرضا...
أهديكم الجزء الثاني من قصة الكاتب الرائع عبد العظيم الطاهر "نوري" (مكجِّن السفر بالعربيِّي)...
..مشيت على العربيِّي دار أدورها وأنا إترنح من شدَّة النعاس .. متل الطرفايِّي الفي وسط البحر ..دخلتنا في العربيِّي شفع العرب جوا مبنقرين مارقين من وين آ بعرفن ..( يَهَا أليك الله تدينا شَرِيت ) .. بالله تدينا شريت حق قرآن ... شريط الليل قرآن ..برضي إتمحنت في الحكايِّي دي ..إشمعنا شريط قرآن ...؟ ياربي البطان ديل طالعين مولانات من أسع ..؟مالن ماهن دايرين شريط الغُنِي ..؟ طلعوا زي الرويجل العجيِّيز السعلني من المعجون داك ... حتى هُن يمشوا يبيعوهو ... دورنا ومرقنا من درديب وركبنا الزّلَط .. وأريتو الزَّلَط هو زلط الحاجي .. من درديب ولا كسلا مافي زلط شي ... الاسم زلط ... كلللووو إتزلَّط عِدِم الحبايِّي .. الحُفَر الفيهو يمُرقِن البترول عديل كدي ..العربيِّي تَغَتِس وتقلع .. بس الكرّوقه المطفحي فوق وشي الموية ...مرات أخلي الزلط أنزل بالواطا ضمّه .. ومرات تلقى الشاحنات ديل مرصرصات قدامك متل الجعارين , إن قلت تِتعدَّاهِن يقابلنَّك واحدات جايات من غادي ..قطر كريمي راسو عديل .. تقيف تحَرِسِن نامن يفوتن , النّاس يصلوا الضهر والعصُر وإنت واقف ... وصلنا كسلا دي , أنا عيوني محوصات ضمّه , الناس أشوف وِشياتن إتنين إتنين ..قُت للمرأة أنا جِسمِي روطَل .. خلاس .. بلابيطي وَقَّعَن .. كان ما أخدت لِي جَمَّه .. كُرَاعِي ماني قالعها من هِنِي .. وقفنا جنب مطعم كدي الطراوه فيهو صاااقطِي .. قَعَدّت المرأة والبطان وفطرنا فطوراً معلوم بالصِّحْ .. أها قُم مشيت كُست لي مُستراح آ زول إنجمّيت فيهو زييين وجيت مارق .. فرشت لي فرشه في البرندة اللّت المطعم وأخدت لي نويمه خلتني أشيل حيلي شويه .. واصلنا رحلتنا ... والطريق من كسلا ولا قِدام سمح بالحيل .. والواطا دي ما شاء الله تقول فارشين لهن فوقها قطيفة ... مخدِّرِي وخدارها ده يتراقص , الزول يقول أسع أمشي إندردق فيها متل الافلام الهنديه .. يا أنزل أدُق لِي خيمه هني وأقعد قبَلِي .. وماشين ... جينا بى فوق القضارف لقينا أباريق السماء دي كابِّي ... المطر يجيك نازل لُكَد .. لُكَد .. بالجمله .. شَوووووو ... والرَّعَدِي دي تفرطق تصُم الإضنين ... ولادي كَرَسوا فَد كَرسَه .. ومطيرين عِويناتن .. أول مرة يشوفوا لن مطره ورعدِي زي دي .. في جدة ما عندنا مطر شي ... فَنِّي في الدَهَر تجينا بتل الزول البيمصمص في خشمو وتاني ما نشوفها علا السَّنِي الجايه .. البطان كانوا جاي يِنزَوزَوا من الرَّعَدِي .. علاّ بقيت أقرالُن في ياسن .. بيني بينكن انا زاتي كُت ملاوذ .. بى نضاراتي ومَشَغِّل المَنَشّات وبرضي ماني شايف الدرب سمح .. تقول في زول قاع يغرف بى صفيحة اللّت جوز ويلشغ في قزاز العربيِّي بى قِدَام .. المنشات شغالات في الفاضي ساكت .. الله يكفينا شر التعب البلا عَوَض ... مشينا لا قدام لقيت لي عربيتين منطقشات .. شاحنتين .. والسّواقين الإتنين واقفين تحت في المطر ديك مبلبلين يقُطرُوا .. ويهرجوا مع بعضن ... مِتفَدغين .. واحد مَنَفِّخ شلاضيمو ورافع أصبعو في وَشِي التاني ...والتاني يعضعِض في سنونو ويلز في داك من قبلو ... وأنا قافل القزاز ماني سامِعُن قاع يقولوا في شنو ..؟ الشمار كاتلنا عِلا مافي طريقة نقيف لهن .. تجي عربيِّي تَكفُتنا حتى نحنا إن بقينا وقفنا .. مشيت لا قِدام لقيت شارع الزلط ده بقى خور عديل كدي .. المرأة قالت لِي درب السلامِي للحول قريب .. وَقِّف العربيِّي نامن المطر تقيف .. قُت لها السماء دا بتل القُطُن المنفوش مااا أظنها تقيف أسع ...أخير نتاتي شويِّي شويِّي نقرب المسافة ..أنا إن بقيت قعدتي طالت في السواقه دي بعدين علا تنزلوني من العربيِّي طَب العَصَب .. ربك رب الخير نحنا في زَحِيحنَا داك .. المطر كَرَسَت شويِّي , عامنو السماء متقايطِي ما إتفشت شي .. نزلنا في الفاو .. قلنا نَطَلِّق كرعينا , لقينا لنا واحد في قهوه .. مَفَوِّر لو لبن في حلةً قدر اللَّيلِي وباكِر .. الجَّمُوده اللَّتُو سادِّي بى فوق بييييضاء بس قماش اللّيل بوبلين تبارك الله , قُت للبطان تعالوا .. تعالوا شوفوا النَّعِيم ده .. تشربوا لِي في اللبن البتل السَّفُوفه داك لا فيهو فايدي ولا شي .. ولدي السَّغيِّير قال لي رِيحتُو مالها كدي ...؟ مصرصِر وشيهو .. قُت لو الرِّيحه دي نحنا نخرم لها آ ولدي .. وَزَقنا منو بُطُونَّا نامن إندشّينا وحمدنا الله وواصلنا رحلتنا... ونواصل...
أي كلمات قديمة عاوزة ترجمة حديثة أنا جااااهز ... وللقراء الكرام البريد الإليكتروني... [email protected] ــــــــــــــــــــــــــــــــــــــــــــــــ
لصديقي الجميل عبدو ولكم أحبابي الكرام رواد حوش الشايقية قواسيب مودتي...
أبو الحســــــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: هجو الأقرع)
|
Quote: ابو الحسين ، وكل اهلى الشوايقه ، وديار الشمال كلهم ، اسف للتأخير، لى ذكريات ومواقف مشرقه مع اهلى الشايقيه ، ود الحسين يخدر ضراعك ، ويكتر احبابك ..... ولى عودة . |
الغالي جداً هجو...
تسلم يا اخوي وزيارتك شرفتنا حد الشرف ما يصل ليهو حد... وبي غادي في حوش الشايقية "البركل دوت كوم" صورتك منوري الدارة... فلك يا عزيزي كميات مودتي... وتحيات خاااااااصة للإبن محمد الأقرع ونسأل الله أن يدوم المحبة والخوة بيننا ياااااااااارب...
لك قواسيب مودتي... وأبقى أظهر... وبجيك بي صور بي غادي...
أبو الحســـــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
أبو الحسين أخوى سلام ليك وللداخلين الدار السمحين -
وسلام خاس لخالد ود عمى محجوب ووليدو يحمد -
والله يقلع السفر والطيارات القطعن قلبى وهجمنى !
فى سفرتى الأخيرى لمصور ( مصر ) أمانى عاد ما ندم عليى ركوب الطيارة - وكت قامت - من الخوف قول فى سرى ( يا ربى انا ان كان مانى شقييى - حمارة جدى كمبال كانت مالا ? دحين مو كوت سافربها وسلم !?)
وطول السفرييى وانا افكر فى اللوارى - والركشات - والكوامر !
واقول يا حليل دحيشاتنا فى البلد .
واللا المضيفات الميسيكنات ! بس ضوعويفات جايات ينقسمن النص - هديماتن سوغويرات ميتل هديمات بنوت اللعاب يسعلنى الله !
ووكتين يجيبنلى الاكل ياربى بجيك وتسعلنى أقررب أديهن ياهو أقول يبقى البينيات سايفات من الجوع !
وصادالكون ...
ست البنات .
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: ست البنات)
|
بسم الله الرحمن الرحيم سلام ياهلنا...
حليل الفارقتهوم ...................
انا في منامي اذكرتهم يا حليل حليل الفارتهم المعز ومعاذ وامهم خالد وابوي وابوي انا كيفنهم انا أي طير جا اسالهم منهم انا قالي لي قاعدين في ضلهم قاعدين يلعبو جنب عمهم انا عارفوا ما بقصر منهم قول لي يا عمي وضوهم هي قمت لي منو عاد خالهم بالله يا ادم طلهم وانت اقرب زول منهم ود السيد عمي التلب المعز اوعا من الضرب في العقاب خليك مستند والعقاب اوعك يتخرب الجيلي خل بالك للصغير عمر الجا بيك مستجير لا تغيبوا من البيت كتير يبقوا زي صابر والزبير قسم السيد شوف البضربو للوليدات خليك ابو اوعك الاولاد يتعبوا والبيعد ليهم قربوا عايز اقوم انا اكتب جواب عنوانو عثمان عبد الوهاب انا عارفو ياهو البجري العقاب يبقى في بدل الابو الغاب عمي عبد الله تراك قريب والجواب مكتوب لي حبيب يا هارون اصلا لا يغيب خالد من بالكم لا يغيب قولي لي دفع السيد اناعارفوا عارف فرق الجنا بالله اغشى ام زين طمنا اوعك الاولاد من عنا ود ارباب يا عبد الرحمن اطرى لي خوتنا الزمان انت لا تغيب من المكان شوف اليبكي وشوف الجعان يا مدثر وفتحي وابزيد انا قولي لي جيران البريد انت يا قيوم ماك بعيد وخلوا بالكم لابن الوليد يا المبحر يا المقبل ياسائق العربية اتمهل انت من السرعة قلل اوع قدام الحوش طفل يا شباب حلتنا اجمعين ياالكبار ابقو لي سامعين اه انا اه انا اه انا الكاتلني الحنين للشمال الوطن البلد واهلي الطيبين . ............................ تحياتي... حاتم هاشم.
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
Quote: اه انا اه انا اه انا الكاتلني الحنين للشمال الوطن البلد واهلي الطيبين . ............................ تحياتي... حاتم هاشم. |
تسلم الخليفة أبو هاشم... والحن للوطن وأهلنا الطيبين فات الحد يعلم الله... نسأل الله يرد غربتنا وإياكم سالمين غانمين ياااااااااارب...
قواسيب مودتي... وعبرك أخي حاتم أتساءل عن أعمدة الحوش وساساته الدكتور/ ياسين محمد ياسين والأُستاذ/ خالد محجوب...
أبو الحســـــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
أخوي يس أخبارك و الصغار و الله أنا كنت فاكر براي المجرس من الغربة و لكن لقيت الزيي كتار و اولهم أخونا أبو الحسين أولادو ما معاه ولا نزلوا إجازة القرير شوف معاي جنس الجرسة في القصيدة دي
Quote: حينما يشتد بنا صقيع الإغتراب نلجأ إلى دفء الحروف ولكن ....... حضن بلادى لا يعوَض
ِ طعم الفراق
منقوش على كف القدر ... مكتوب مسطر من زمان أمشى قبال الأوان وأسوق خطاى على عجل تانى وين ألقى الحنان ... وألقى العيون الكان بتدينى الأمان
يا حلوة ما أقسى السفر تلقينى واقف فى الرصيف .... طعم الفراق فى حلقى مُرْ يا غربة كيف ؟؟؟؟ يتحملك قلبى الرهيف واليوم يمُرْ .... يبقالى زى كمين شهر لكنى يا زولى الولوف ... جاييكَ لو فاضل عُمُرْ
زى الغمام .... وكتين يسيل بالشوق نزيف ... ينزل مطًرْ
وشوق البحرْ .... وكتين يفيض لحظة خريف ...
يهدى السلام لى أحلى قيف
وإن حصلْ ...
يا بنيه إتأخَر عليك خلى بالِك منى فيك
دسينى فى عمق المسام غطينى بى رشرش عينيك
وليكِ من قلبى السلام أصلى راجع بكره ليك
مدى بالأشواق إديك .... وناولينى من كاس الغرام
وبين الصباح ... وشوق نجمه هداها السَهَرْ...
نتلاقى والليل إنحسَرْ
نتغطى بالأشواق وشاح حتى القَمَرْ بالشوق سِكِرْ....
طالب من الليل السماح عند الفجر ....
يا داخلة فى البال إجتياح من قيد هواكِ ولا مَفَرْ...
أهواكِ فى زمنى اللِراح .... وأهواكِ لى اخر العُمُرْ
وأهواكِ لى اخر العُمُرْ
|
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
بسم الله الرحمن الرحيم سلام ياهلنا... حبل الوصال ................
تاريهو ريدك كان كلو جور ونفاق كذابه ضاحكه على يا ناكره للميثاق وين جدول التحنان الكان بيروينا الضحكة ليك عنوان يا حليل عناوينا بدلتى كل الكان ماتت أمانينا كانت هى فى الأحضان اليوم على الأعناق ضاعت عهود الريده ليه تبقى كذابه حلم العديل والزين اصبح حكم غابة يا زهرة الياسمين ما عدتى خلابه دهبن لقيتو لجين الحق على الصياغ كان الضمير مرتاح من جور بنات حواء قلب الهوى النباح لا حول لا قوة سمكرتو و المفتاح ضيعتو فى هوة لا قلتا لزول ضاع لا يوم فتحتا بلاغ تاريهو جرح مابيبرى بى دكتور كل التسوى الليد يتحملوا المجبور جرحاً صبح تأبيد جوه القليب مهجور تلت علي القيد زعزعنى فى الأعماق التوبه يا قاسين لى تاني ما فى رجوع واشكى العلى لى مين والبوح حرام ممنوع اخفيهو تانى يبين عبرة وسروح ودموع قالوا القلب والعين بحر الهوي اللداغ اسف زمانى الضاع درب الرجوع قاسى وانا تانى ما بنصاع لى لوعة احساسى سر الدواخل زاع وانا زولى لى ناسى قلب المحنة خداع إنشره فى الآفاق . ....................................... تحياتي... حاتم هاشم.
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: سمية الحسن طلحة)
|
Quote: الأستاذ أبو الحسين سلام ويسأل منك الخير وانا بدوري بسأل عن الأستاذ خالد وبقية العقد الفريد البوست دا بقينا نكارنو نجيبو من الصفحة التالتي |
أهل الحوش سلام يا الزينين والله الشوق ليكم بحر ماليهو ساحل وأظنّو البحر الودر فوقو وليد بت ودخير حجابو وهو إجرجر في التراب
سنجك مية واربعطاشر الدكتور ياسين كيفنك وعلك طيبة ناشدين خبرك وكت غايب انتَ أظنك لي فترة مو بسيطة هديك البويتات الجميلات ديل
ديل نحن ناسّن الفوق خِشْومنا نقولوا بي قلبن سمح والضيف وكت لِزم الفراش بالحيل نباشرّو وشينا باش ومن المراح هاك ياضبح والكسري مهما تبقى في إنعاس فطيرّن اللِيل قمح
ولكم التحية ناس الحوش
خالد محجوب
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: سمية الحسن طلحة)
|
Quote: أبوالحسين وحوشو الملان سلام عليكم ياأهلنا القلبنا بريدكم ياطعامة حديثكم !!! والله ماجفيناكم ولاقليناكم لكن درب العشق ساهل ودرب الوصال صعبان الأتقسوا ياطه وقلبنا بريدن داروا المرقة بى السافل وأبوهو صعيدن أل شرك القماح قجيتو وأبى ما يصيدن حزموا النوق وأزعج نوم عيوني جضيضن المتاوقة دى مافيها طعم قلنا نتراوحكم بمهل نقعد يادونا ونصد باكرية على العقاب . أطيب التحايا. |
بت الخلفاء الغالية سمية الحسن...
يا هلا بيك وحوش الشايقية منور بوجودك وأهلنا الطيبين رفاقتك الكرام...
وأهديك هذه الإبتسامة من الأخ عبد العظيم الطاهر...
حمّد زين ... يوم الثلاثاء الصباح بدري ... فكّا العجِل الليلو من المراح ومرق ... يسوي في البوووووع .... بوووووع .... وقيع الله كان قاعد قدام أهلن ... حمد زين جاء مار بى فوقو ... * - أيييه .... ؟ وين ماشي آ حمد زين ....؟ * - ماشي سوق بلالة ... يبقى ألقى لي فيهو رزق حمد زين راح السوق وجاء صاد بعد الضهر ... سايق لو تلاتة غنمايات و أربعة حملان كاشَّهِن قدامو وماشي ... وكت جاء جنب أهل ناس وقيع الله .... وقيع الله سمع حِس الغنم والحملان يكوركن ... جاء مارق يتاوق من عند أهلو ... دار يشوف دا منو دا .... زولاً خبَّار بالحيل ... عاين لقى حمد زين كاش الشي ديل قدامو ... قال لو :- *- أيييه .... فكيت الورقة ...؟ * - حمد زين بى عكازو ... برطع ... برطع جرى على وقيع الله يسوي لو ... الله يفك رقبتك ... الله يفك رقبتك ... وقيع الله قفل الباب ودخل أهلن ...
مع قواسيب مودتي... وأبقي قريبة يا المبروكة...
أبو الحســـــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
Quote: الأستاذ حسن الطيب
سلام بالمناسبة شاعر القصيدة يعتبر ابن أختي وهو صغير السن ومهندس ما شاء الله عليه اسمه محمد الأمين فضل المولى الولد قلبو رهيف وبقى يحب قدام أخوالو لك الود والقومة لأبي الحسين الذي ينبش المكنونات |
يجازي محنك يا د. ياسين قلتلي قليبو رهيِّف... ديل بنات حواء آ اخوي يااااااارب تديم حنانِنْ وودَّهِن وتبعِد تكشيرتِنْ!!
لكن حقيقي يا أخي حسن الطيب صديقي الجميل محمد الأمين عندو قصائد جميلة جداً وهو من مواهِب منتديات البركل وإضافة حقيقية هناك وبإذن الله سيتواصل مشواره معنا هنا في حوش الشايقية برفقة خاله ورفقتكم جميعاً...
لك وله وللغالي حسن الطيب قواسيب مودتي...
أبو الحســــــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
بسم الله الرحمن الرحيم سلام ياهلنا...
المواجع ..........
لما نبكى من المواجع قلنا نرتاح فى بكانا قولى كيف نرتاح ونحن نبكى من شدة هوانا الليلة رحلة الأشواق بعيدة والشواطئ بعيد مكانه حتى فى بر الأمانى السنين هدت قوانا كنا نحلم بمداين فيها نرتاح من شقانا قولى كيف نرتاح ونحن نبكي من شدة هوانا القدر طاوع قلوبنا وخلى بحر الريد حدانا ونحن ماصدقنا قمنا نشرب فوق روانا دى المشاعر فينا فاضت غرقت فرحة صبانا ما النعم مرات بتشقى والله بالريد إبتلانا مرة طلت دارنا غيمة ونحن ياما الريد غشانا شايلة فى الخاطر محنة جات تعيش الريد معانا جات تصب فى الريدة ريدة لو قليل يبرد جوانا كيف يا غيمة نرتاح ونحن غلبنا فى هوانا ما غريبة على البريدو يلقوا فى الريده المهانة ياما كتير أحبه غرقوا فى بحور الذل عشانا فى الحقيقة الريدة مره ضقنا مرها فى غنانا ماهو قيس بكى من هواهو مانحن برضوا الريد أذانا يا زمن لو تصفى نصفى فى البوادى يعم صفانا والعيون تصبح مرافئ فيها نرتاح من عنانا رحلة الهم بينا طالت ملت التسيار خطانا نعمل آيه ما نحن غلبنا فى هوانا . ............................... تحياتي... حاتم هاشم.
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
Quote: يا زمن لو تصفى نصفى فى البوادى يعم صفانا
|
صديقي الجميل أبو هاشم...
تعرف يا اخوي البيت دا يحمل مدلولات عظيمة خلااااااس لو تمعنا فيها... يعني روقة الحال من روقة النفس... وأمااااني يا اخوي في كترة شواهد على الموضوع دا... في ناس تلقاهم حالتهم المادية ما قدر كدي لكن عندهم حلاوة روقة وترتيب في حياتهم... وفي ناس يا كافي البلاء عندهم خير الدنيا لكن طاقاهم بعزَقة وشلهَتة... نسأل الله العافية... فأكيد صفاء النفس يتبعه صفاء الحياة والمعيشة مهما كانت الحالة المادية...
لك قواسيب مودتي ونسأل الله يصفي نفوسنا ويغرقنا في اليقين ياااااااارب...
أبو الحســــــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
دعوة للمرح الأُسري الجميل يواصل الأُستاذ/ عبد العظيم الطاهر بين "هو & هي" وأترككم مع الجزء الثاني بين "هو وهي"...
(5) هي ......
لا تـفر ضرعـاتـك عليَّ ولا تسوي حـديس كلو نيّ ما لقيتني انا ماسكي إيـديّ وماني راقدي ونافضي كرعيّ بطني طـامي كفاي العليّ ولا تلحـقني انا ناس أفيّ مزرزرني انا في شنو .... ؟ و تشنفني انا لى منو ... ؟
(6) هو ....
أشكي وأبكي انا عاد لى منو في العواسة تخمجي العجين متل أكنك عاجناهو طين وماب تقومي تحمي العوين باقي وسط الحَي مرفعين وا شقاوتي انا طاقني عين قت كفاي انا هوي يا معين هابشاني انا في شنو ......؟ لايماني انا لى منو .........؟ .................................
(7) هي .....
بالشـناف نـشفت دمّي وبالكواريك زدت هـمّي قـدد إضني ولافاهو عِمِّي الحـديث دُرَّاب تـرمّي وبرضي صابري وماسكي خشمي إن بقيت مـاك ود أعمّي كت شردت ورحت لى أمّي مشنفني انا في شنو ...؟ شلتو حالي انا في شنو ..؟
(8) هو .....
الحـريم هـندام ومـكياج وإنتي حايمي وسايقي العجاج بس تقول مدعوكي في الصاج يا أم خـشيماً ديمي لجلاج ماب تروقي تعدلي المزاج قبل أشيب قالـوا لي يا حاج من وكرتي انا كيف الخراج داير أسـافر كايس العلاج سـائل الله كـريم وفـراج نابشاني انا لى شنو ......؟ وهابشاني انا في شنو ...؟
ــــــــــــــــــــــــــــــــ قواسيب مودتي لك أخي الحبيب "عبدو" مع بعض التحفظات على ما تحته خط ...
أبو الحســـــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: Souad Taj-Elsir)
|
Quote: الأستاذ الكريم أبوالحسين،
وددت فقط المرور لأسجّل إعجابي الجم بهذه البوستات الجميلة الرائعة بكل أشعارها الراقية ونثرها الأنيق. كل التقدير لكَ لإضافاتك المُميّزة في المنبر.
تحياتي وصادق مودتي.
سعاد |
أُستاذة/ سعاد تاج السر...
صبحك الله بالخير والرضا...
طلتك البهية ومرورك الجميل إزدان به حوش الشايقية بي جنباتو...
تشكرتي يا إحساس على هذا الشعور الطيب لما نقدمه من عمل متواضع نرجو أن ينال رضا الجميع وإستحسانهم... ولازم نكرم وفادتك بهذه القصيدة التراثية...
أُعجب أحدهم بإحدى الحِسان وأراد مدحها بالطريقة البسيطة المعبرة دي...
دايْر أجُر النَّم يا جِنات...
وسِتَّكِن عاجباني آبنات...
أُم لهيجاً سكَّر نَبات...
تَعَرِف الذوق سِت الوِهَاط..
أُم خشيماً ماهو غَلاَّت...
رُتْبَتا (رُتْبَتْها) القايْد الحرَابات...
وظِيطا من دينار غادي فات... (هييع)!!!
وتَكْرِم الضيفان بي ثَبَات...
البَقُول بَطَّالة لخْبَات...
ويِنْسئِل يوم جَبْد الصراط...
........................................... البقول بطَّالة يرفع إيدو عشان يِنْسئِل يوم جبد الصراط؟؟؟!!! .............................................
عليكم الله شوفو بساطة الكلمات دي وعمقها ومدلولها الجميل...
أنا غايتو في نظري ما تحته خط من أهم سلوكيات المرأة ست الذوق البتعرف الوهاط المُشَرِّفة...
أسأل الله يحفظ بنياتنا ويغتيهن من كل بلاء ياااااااااارب...
قواسيب مودتي... وأبقي قريبة شرفينا بمتاوقتك...
أبو الحســـــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
أهديكم هذا الخبر السعيد الذي أفرحني جداً وهو خمسة من أوائل الشهادة السودانية من منطقة القرير... وهم أبناء كل من:
1. حسن عبدالله محمد خير قمبور (إبنه محمد) 2. عبد الرحيم عثمان البرعي (بنته منى) 3. صلاح خضر عبد المجيد (بنته) 4. دكتور محمد صديق (إبنه) 5. صلاح عبد الرحمن اليمني (بنته سمر)...
تعظيم سلام أهلنا في القرير والتحية والتجلة لك أخي العمدة أباذر الكامل آل عكود... ونسأل الله أن يديم النجاح والأفراح يااااااااارب... ونتمنى لهم حياة علمية كلها توفيق...
قواسيب مودتي...
أبو الحســـــــين...
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
الغالي/ود الحسين تحيــة بنكهة نسمات فجرالشمال وبطعم رطب المــدين وبعمــق هذا البوست المميز 0 وأهنئ عبرك الابناء المتوفقين من القرير
1Quote: . حسن عبدالله محمد خير قمبور (إبنه محمد) 2. عبد الرحيم عثمان البرعي (بنته منى) 3. صلاح خضر عبد المجيد (بنته) 4. دكتور محمد صديق (إبنه) 5. صلاح عبد الرحمن اليمني (بنته سمر)... |
نحييك علي جهودك والاخوة في هذا البوست الذي يوثق لثقافة وتراث ضارب في جزور التاريخ 0 كما أشكرك علي رسالتك الخاصة 0 (راجع بريدك الخاص ) 0
قواسيب مودتي أو كما تقول 0
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: mahmed alhassan)
|
Quote: نحييك علي جهودك والاخوة في هذا البوست الذي يوثق لثقافة وتراث ضارب في جزور التاريخ 0 |
إبن عمي الجميل محمد الحسن...
تسلم يا اخوي على مرورك الطيب الذي زاد الحوش بهجة وفرحة بإنضمامك إليه بعد طول مدة منتظرين حضورك...
فبإسمي وإسم الإخوة الكرام المداومين في الكتابة في الحوش والقراء المتاوقين أرحب بيك حد الترحيب ما يصل ليهو حد قلم جميل يُستفاد منه الكثير...
Quote: كما أشكرك علي رسالتك الخاصة 0 (راجع بريدك الخاص ) 0
قواسيب مودتي أو كما تقول 0 |
تسلم أخي محمد الحسن على شعورك الطيب... بس بريدي من ناحية رسالتك فاااااااضي كَرَوْ!! لا يبقى الجَلاَء "البوستة" معطلة كدي علي مقاشي الجواب ما وصلني!!
لك قواسيب مودتي أخي الكريم وأبقى أظهر ولا تنقطع...
أبو الحســـــــــين...
| |
|
|
|
|
|
|
ولاد شايق سلام ومبروك ولي قدام
خالد
| |
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: ياخي البوست ده طولنا منو ومن صحبوا أين هو ؟
مجرد شوق وود
،،،،أبوقصي،،،، |
صديقي الجميل يا أبا قصي... سلامات وتحايا نواضر...
توقعتك أنت والحبيب خالد المنسي أول الحضور بعد رفع البوست...
فحقيقي يا عزيزي بطلبات من الإخوة القُراء الكرام جزى الله خيراً الأخ بكري أبو بكر بإستجابته لهذه النداءات ورفع البوست وعندو قصة مع كلمة done حقت بكري المسيخة بجي أحكيها ليكم...
فقط الآن أهنئ نفسي وإياكم والقراء الكرام برفع البوست التوثيقي دا...
وإلى أن ألقاكم قريباً قول يوم السبت الجايي أترككم في رعاية الله وحفظه...
للجميع قواسيب مودتي...
أبو الحُسين...
| |
|
|
|
|
|
|
|