|
Re: أغاني وأغاني.. للقدامى والمستجدين.. (Re: سارة علي)
|
عاصم ابدع كالعاده,
افراح صوتها خانها الليله
عصام احييي انا دي كرفته ولا شال ولا حبل ستاره, لكن اداء ما بطال ولد سيد خليفه اسأت لاغاني والدك, بصراحه مافي اي داعه انك تغني نادر الليله جميل, و كمان شكرا على البدله خليك كده طوالي
فرفور مسكين الليله
| |
|
|
|
|
|
|
Re: أغاني وأغاني.. للقدامى والمستجدين.. (Re: سارة علي)
|
يا ابوعبد الله وداعه الامين ياوديع مشكور كتير أ كتير وانت تتحفنا بموهبتك لتشجينا
تصوم وتطفر على خير يابطل
الزول يازول يازول انت واين ماشي انا ماشي الديش انت وين ماشي __ يازول تحليل وجميع الاخوان متعت البوست . ____ يجماعة انتو معاي انو ود البنا انموزج للفنان نظافة ،اناقة , تطريب عالي ( واحده قالت والله قميص ود البنا مع الكرفته بس التقول لابس زفاف ) قولوا ماشاء الله . ___ نجوان يظهر شغل البيت كتر عليها ومافي تعليقات . ساره علي اتفضلي ومُشرفه نيابة عن ست البوست
سلام .. سلام
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
كان ممكن الكلام يكون عن سيد خليفة ممتع و مشوق دون الحوجة لاستضافة ابنه العجيب ده .... و عايز يثبت انو ولد سيد خليفة بتقليد حركاته بضبانتها ...لا حافظ و لا صوته و لا ليه داعى ....
المغصة الكبرى الليلة برضو حيكون مواصل ...
ليه عمنا السر قدور ما عمل لزيدان اكثر من حلقة...
افراح الشعب سمحة نعم ...بس زى الما كانت مرتاحة فى صوتها....
رغم كل البوهيات و الاثاثات و الاروات و زيت صباح و كسرة الرقبة من رفعة الراس لكن يعتبر من انجح البرامج ....
| |
|
|
|
|
|
|
Re: أغاني وأغاني.. للقدامى والمستجدين.. (Re: Manar Mahsoub)
|
- أفراح كانت مارقة من فيلم ياباني مثلت فيهو دور واحدة من فتيات ( الجيشا ) .. أو " بت ام لعاب " .. و نانسي عجاج كانت تطل من بين أشباح صوتها كل شويتين .. و الشويتين الباقيات تمرق يا سميرة دنيا أظنها ، يا كمان كمال ترباس . - عاصم الجميل .. ياخي إنت بتلمع من غير الهدوم سكر سكر و خرطوم بالليل و البرادعي .. أجمل ما تكون و يكون صوتك و إنت عفوي و مرتاح . - بتاع الكاميرا ده ما يقيف لينا ورا راس فرفور .. أريتو راس العدو . - منتصر خليفة ... أخ خ خ خ خ خ خ خ .
| |
|
|
|
|
|
|
Re: أغاني وأغاني.. للقدامى والمستجدين.. (Re: Manar Mahsoub)
|
Quote: رغم كل البوهيات و الاثاثات و الاروات و زيت صباح و كسرة الرقبة من رفعة الراس لكن يعتبر من انجح البرامج .... |
قصدك الوحيدوني الممكن نتابعو ... الا لو اعتبرتي برامج مع شركة فلان وترتكان في الحسبة .. قناة فضائية 11 شهر ما عندها برنامج يمكن كمتابعته بشكل راتب او الاعتماد عليه كعمل اعلامي ثقافي ترفيهي ..الخ ؟؟؟هل ذلك مرده لغياب في الخلق والابداع ( ونحن يعني من دون خلق الله يس كدة فاقديين خلق وابداع يعني ؟ ) ام اصرار علي اهدار القليل الفضل من الامكانات وحتي الشعب (مع الاعتذار للفاتح جبرا صاحب "الشعب الفضل " ) ام سوء ادارة ؟ ام غيظ سااااي ؟؟؟.. دة كوم والكشاكيش والالوان في الاوجه واللبس المعلوق كوم ؟؟؟
____ حاشية : نشكر لقناة النيل الازرق تقديمها لهذا البرنامج ونشكر لها اكمال حلقة الامس من غير بنوت عصير اروا وزيت صباح وارفع راسك والفائز ووادي الجندي والمحيميد وسط الاغاني .. اها خطوة لقدام ونقول يا كريم
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
سلام يغشاكم ورمضان كريم
والله يا جماعة الامتع من اغاني واغاني هو البوست ده
لكن حقيقي ولد سيد خليفة صراحة زود العيار كوزين وشوية في محاكاة الراحل سيد خليفة الحكاية ما محاكة بضبانتها
المسالة روح الاحساس والاغنية
فرفور حقو شوية يرحمنا من فكرة الرجوع ( برأسه للخلف في حركة صنقعة ) ثم العودة ليطلق حنجرته بطبقة صوت غياظة جدا
المهم في الامر انه فكرة استضافة اكتر من ضيف في البرنامج فكرة جميلة جدا
ما زلت اصر انه عمنا السر قدور بيضفي روح مرحة للبرنامج ..
حلقة الفنان زيدان كانت بجد جميلة ربنا يديهو الصحة والعافية
| |
|
|
|
|
|
|
Re: أغاني وأغاني.. للقدامى والمستجدين.. (Re: maia)
|
انتو في ولد سيد خليفة واللا نجوان الاختفت بعد حفلة زيدان ؟؟؟ وبعدين البوست دة من غير ريس والزمن دة يجي واحد انقلابي راكب كيبورد ويستولي عليه ريس مدي العمر ؟؟؟ اها شايف ودالعباسية الدورة دي مجاور ....
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
Quote: وأنا على طول إنتبهت لي محمدية أداهو عين عشان يراجع البيت تاني ولكن صاحبنا دور في الكوبلي التاني علي طول. |
اكيد ما في غيرو ... نادر !!
امبارح ما حضرته الحلقه ... والحمدلله زي ما قالته ليك يااااانجوان (( انو اولاد الفنانين لا عوامين ولا بعرفو السباحه )) لووبط بس ..
| |
|
|
|
|
|
|
Re: أغاني وأغاني.. للقدامى والمستجدين.. (Re: عبدالله كع)
|
ازيكم كلكم.. غايتو نادر خضر اجتهد ... وظهر اكتر من ود سيد خليفه ..
ولد سيد خليفة ده فنان كيف ...؟
نادر خضر ظهر في غناء سيد خليفة اكتر من ولده ... سيد الشيء زاتوووو . بعدين الحمدلله ما كانت في اي حبيبوووووو في غناء نادر ...
عموماً كانت الحلقة ظريفه ..
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
ود سيد خليفة كان متشنج أمس (ماعارفة ليهو سبب غير إنه بيحاول يثبت ذاته) أدوهو فرصة او اسمعوهو في اليوتيوب عاصم زينة ساكت خلى الرقشي لكن فتن فيهو عصام محمدنور غنى بإبداع وجمال ...شفت ياعاصم التعسم ماسمح كيف ؟ والبساطة مافي أشيك منها شكرا للشخص الامس كان واقف قدام التلفزيون بي جردل بويه بمبية... ماقصر مع بنياتنا أداهن إتجلبطن لامن قالن كفى أفراح عصام أكلت المايكرفون .....ماممكن ياناس التلفزيون تجيبوها جعانة ونعسانة عمي السر لقى إيدو إتكلم لما قال كفى نادر ختيييير وفنان الاغنية بتاعة ياوطني أدوني إحساس بتاع ناس كيرلس والمفروض يعملوا حاجة ماحبين يعملوها
| |
|
|
|
|
|
|
Re: أغاني وأغاني.. للقدامى والمستجدين.. (Re: Rawia)
|
سلام ..
نشوف اليوم الرابع شكله كيف بعد ان هبط بنا اليوم الثالث لأرض الواقع.. (الله يسامحك يا ابوالزيق كان مسخّت علينا الباقي)
______ يا باش نحن موجودون نحمد الله.. والبوست ده كلكم اسياده .. وصراحة عندنا محلّلين ومعلقّين وفنّيين هنا يسدوا عين الشمس.. (وأيضا كوميديين من الدرجة الأولى بتعليقات سنينة بشكل!)
واشاركك في تقديم الشكر والتقدير لقناة النيل الأزرق لهذه الأمسيات.. وللرأفة بنا وتقليل الإعلانات المؤلمة ..
النيل الأزرق تستمع لمشاهديها
| |
|
|
|
|
|
|
Re: أغاني وأغاني.. للقدامى والمستجدين.. (Re: نجوان)
|
وعن أفراح الشعب..
أفراح دي بتذكّرني زينب الحويرص.. فنانة موهوبة جدا (أي زينب) عندها قدرة عالية على التطريب وأسلوب أداء خاص جدا.. لكن.. صوتها ضعيف.. ومع اوركسترا كاملة تحتاج مجهود لتوصيل صوتها..
وعكسه لما تكون في دندنة بالعود مثلا، تتكشّف لك امكانياتها وملكات صوتها ..
أفراح كده بالضبط.
| |
|
|
|
|
|
|
Re: أغاني وأغاني.. للقدامى والمستجدين.. (Re: فيصل نوبي)
|
Quote: أفتقد فرفرة فرفور ... |
وجدعة إيدو ورا الكنبه يا نوبي بمظنة ومقولة ( أنا المِنَقِطا) ويا أستوديو ما فيك إلا أنا. والشُراب الأبيض ، حتى حسبته جبصا كما قال حموده،Quote: والقاليك انه الكواريك مرادف لكلمة موهبة، كضّب عليك. |
يا نجوان قاصدا تقولي ليهو( "الكلَّمَك" ظلمك ظلمك)؟ نجوان ، أعلم أنك تدرين أن صوتا يعادل 20 ديسيبل يكون هو صوت الهمس وبتاع الكلام العادي بيساوي 60 ديسبل وضجيج الديسكو 120 تقريبا وصوت الطائرة النفاثة بقربك يعادل 140 ومرفق لك ما يفيد في هذا الإتجاه . لكن (جيمي ) يقع خارج التدريج ( الإسكيل) لأنه أعلى من ال 160 ديسيبل واللهم لانسألك رد القضاء ولكن نسألك تخفيض ذبذبات وديسيبلات صاحبنا دون عتبة الألم. http://www.mawsoah.net/maogen.asp?th=0$$main&fileid=sta..._18&ImgNo=18075518_1
| |
|
|
|
|
|
|
Re: أغاني وأغاني.. للقدامى والمستجدين.. (Re: فيصل نوبي)
|
Quote: يا دكتور سلامات
Quote: يمين سوتلها ضرضير السكر في الفطير بالسمن
Quote: والبصاص بتاع الاورغ عنده نقرشة دقاقة كدي زي الرتة ألت كعك العيد
في انتظار الترجمة لغير الناطقين بها ،، و معاي الخال أبو بكر ..
|
الصحافة تلاتين اها نترجم ليك شفت الفطير لمن يكبو فيهو السمن لو اكلتو ما بكون لذيذ زي لمن يضرضروا فيهو السكر وقع ليك
والرتة ألت الكعك الحتراب البيبقى مع الكعك المكسر والسكر دك والزول يشيلو يسفو
اها في زول تاني شعادة عربية
| |
|
|
|
|
|
|
Re: أغاني وأغاني.. للقدامى والمستجدين.. (Re: Emad Abdulla)
|
يا رب .... في حلقة الليلة السر قدور يدي فرصة لأفراح عصام والفحيل.
يا جماعة عندي طلب بسيط إن شاء الله السر قدور يحققو لي.... إنه افراح عصام تغني لينا ربيع الحب.
أنا متأكد لوغنت الأغنية دي ح تكتل ليها زول وأولهم أنا طبعا... لان الشجن الفي صوتهامبالغة وإبداع
ما بعده إبداع.
ويالله يا منتصر شد حيلك الليلة وأركز ... جبتا لينا الكلام ... الناس دي هنا كلها فنانين
وموسيقيين وبفهموا غنا كويس شديد.
أنا شايف ناس كتيرة إنتقدت منتصر إنه بقلد والده في الحركات يا جماعة بالنسبة لي الحركات اللي
بيعملها منتصر هي ليست تقليد لوالده ... فلقد ورث منه هذه الحركات وهو إبنه البكر وده شي طبيعي
لأنه ولده ، حتى حركاته في البيت وطريقة الكلام هي نفسهاأيضا... فرجائي أن لا تظلموهو أدوهو
فرصة ... وإن شاء الله يقدر يطربنا.
نجوان ... شكرا إنك أعطيتنا هذه الفرصة في هذا البوست الرائع كي نعلق على هذه الحلقات الممتعة..
تصومي وتفطري على خيرأنتي وجميع الأعضاء.
| |
|
|
|
|
|
|
Re: أغاني وأغاني.. للقدامى والمستجدين.. (Re: معتز القريش)
|
Quote: ياخي .. ما في حولك زول من نوع أبو ( لما تشتاق ) .. و صوتو يكون ياداااااب نط عتبة السمع ، نمرة عشرة ما لحقا .. و ينضم .. ديسبلاية ديسبلاية .. !! مافي ؟ |
آاااخ يا عمده، يا عماد دعنا نتعرض لنفحات هذه الأيام الطيبات عسى يصطفينا المولى مع التقي من العباد، نوع (لما تشتاق) نمره 10 ديسبل لا تصلها إلا على (جسر من التعب ) كما قال أبوتمام ، تقودنا يا عمده إلى خمائل الغواية منشدا: (هيمانُ "بالراحة الكبرى" .. و جنّتها ظمآنُ للمجدِ في كأس ٍ من الحُرَق ِ
مشتاقُ! هل من رسولٍ مدلجٍ حذر ٍ يقطّر الهمسَ في آذان مُسـترق ِ ؟)
اليقطرن والبنضمن (ديسبلايه ديسيبلايه) ديل يا العزيز نفسهن من يذرن في السمع قولا لايلحظه حتى الوريد ،
يا عمده ، شيل باقيها أفطر بيهو وربنا يتقبل منك صيامك وقيامك و.. قيامك: (إن جئتُ ، يامجدُ، يوماً أمتطي تعبي و أشربُ الحارقَ الهطّالَ من حُدقي
فغط ِّ عُريَ زنودي .. ثمّ خذ بيدي و نفّض الحزن و الأشواكَ عن خِرقي
قل لي عن الكونِ..حدّثني ..كيف يُرى ؟ سرْ بي على السورِ نجلو شرفةَ الأفق ِ
قدني إلى الشُّهبِ .. صغ لي بضع أرديةٍ من الغيوم .. و تاجاً من سنا الشفقِ
و اروِ جدبَ فضولي .. و اشفِ أسئلتي و غضّ طرفكَ عن موّالها النّـزِقِ
أو غبتُ ، يا مجدُ، يوماً فأتِ في حلمي لا بأسَ في مجدِ رسّام ٍ على الورق ِ .
قالت: (زر قلبي كما تزور داري)
| |
|
|
|
|
|
|
Re: أغاني وأغاني.. للقدامى والمستجدين.. (Re: حسن إبراهيم خليفة)
|
Quote: فلقد ورث منه هذه الحركات وهو إبنه البكر وده شي طبيعي |
اعذرني يا اخ حسن ابراهيم خليفة...عندي أسئلة *شخصية* محرقة روحي.. واحد: الفنان الراحل سيد خليفة غنى في عرس الملك فاروق...كيف يكون الشاب الصغير دا إبنه البكر؟؟!!
إتنين: في واحد في البوست دا قال انو منتصر لابس باروكة...انا بصراحة ما لاحظت الحكاية دي... لكن لو الكلام دا صحيح ...ممكن يوٌصف دكانا لي فرفور و عصام و محمد المرتضى !؟؟؟
| |
|
|
|
|
|
|
Re: أغاني وأغاني.. للقدامى والمستجدين.. (Re: omer osman)
|
سلامات كلكم ورمضان كريم
البوست بتاعكم دا بقى عامل زي ليالي الحلمية زمان من غيرو رمضان ما بيبقى
منتصر خليفة لو طلع من قصة تقليد حركات والدو "النسّتو الغنية" ممكن يجي منو صوتو حلو وفي آخرو في حاجة من سيد خليفة
"تحميسات" السر قدور للمغنين وكلماتو التشجيعية وروحو الأبوية بتدي الحلقات نكهة لكنو نضيضيييم
نادر صوتو حلو بس لما يحاول يتلاعب بالصوت القصة بتطلع من يدو خالص
لو إتلموا صوت فرفور "أبو بحة الأنا بحبو" + هدوء وإرتياح عصام في الغنا يبقى تحفة
نجوم الغد لسه بيصفقوا بنفس طريقة البرنامج بتاعة ناس كنبة ورا
أفراح الشعب زي السكر وصوتا حلو جداً بس السلالم العالية نهائي ما بتنفع معاها والدليل أسألوهو
زيدان بقدر ما أمتعنا في حلقتو بقدر ما حسيت بيهو "إتضرس" من الناس الغنوا معاهو
محمدية وأحمودي متعة قائمة بذاتها
كلللهم في اللبس بيق زيرو !!
| |
|
|
|
|
|
|
Re: أغاني وأغاني.. للقدامى والمستجدين.. (Re: mamkouna)
|
عاذرك يا أخت ممكونة أسألي ذي ما عايزة ... سيد خليفة ده حق الكل، الله لا جاب حراق الروح.
عمي الراحل سيد حليفة عليه رحمة الله ، غنى في عرس الملك فاروق ولم يتجاوز عمره العشرون عاما حيث
كان في ذلك الوقت يدرس الموسيقى بمعهد فؤاد الأول.
تزوج عمي من أمدرمان ومن أسرة مشهورة وأقربائنا في نفس الوقت ( أسرة ناس قساية المشهورة في
الملازمين بأمدرمان وكان ذلك في الستينات من القرن الماضي ، ولكنه لم يوفق في هذا الزواج ، وظل
فترة طويلة غير متزوج كرس فيها حياته للفن وفي العام 1976 تزوج من قريبته في الدبيبة وأنجب منها
منتصر ومنية ومشاعر ومحمد وآخر العنقود نايرة.
ثانيا : بالنسبة للباروكة .... الله أكبر عليكم ده شعرو يا جماعة الراجل شعره غزير ولسه الولد
صغير طوالي لبستو باروكة؟
وأنا ماري في البوست قريت كلام الباروكة ده ... ضحكت ضحك شديد فيها والله ، لكن ليك علي ولا يهمك
يا ممكونة اتصل ليك علي منتصر بعد حلقة الليلة واشوف معاهو حكاية الباروكة لأنه والله أنا مغيوظ من
المصور اللي مركز علي صلعة فرفور.
قصرت معاك يا ممكونة؟ إن شاء الله تكون روحك بردت (وجه ضاحك) .. تصومي وتفطري على خير.
| |
|
|
|
|
|
|
Re: أغاني وأغاني.. للقدامى والمستجدين.. (Re: حسن إبراهيم خليفة)
|
السلام عليكم ...... أنا سعيد بوجود الأخ حسن إبراهيم خليفة بيننا وروحه الطيبة في الرد على أسئلة اختنا الممكونة _ مواصلة للأسئلة الشخصية المحرقة الروح عّرفنا السر قدور بعمك الفنان سيد خليفة أن اسمه الحقيقي هو علي محمد الأمين وأن اسم سيد خليفة هو اسم فني بحت ولكني الاحظ أن أن اسمك هو حسن إبراهيم خليفة وشكلو كده لقب الخليفة غلب على اسم جدك الحقيقي وعليه فإن اسمك الحقيقي هو حسن إبراهيم محمد الأمين ولّ عمنا السر قدور ده أكلنا حنك ساي؟
..... وبالمناسبة السنة دي شايف (فردتنا) عاصم البنا مسجل غياب وأرجو أن لا يكون زعلان من تعليقاتنا التي ربما تكون حادة وقاسية أحياناً ونفتقد أيضاً الأخ عبد الله البنا إبن الفنان أحمد البنا (الفرجوني) الذي كان مشاركاً في العام الماضي _
| |
|
|
|
|
|
|
Re: أغاني وأغاني.. للقدامى والمستجدين.. (Re: الزوول)
|
Quote: مواصلة للأسئلة الشخصية المحرقة الروح عّرفنا السر قدور بعمك الفنان سيد خليفة أن اسمه الحقيقي هو علي محمد الأمين وأن اسم سيد خليفة هو اسم فني بحت ولكني الاحظ أن أن اسمك هو حسن إبراهيم خليفة وشكلو كده لقب الخليفة غلب على اسم جدك الحقيقي وعليه فإن اسمك الحقيقي هو حسن إبراهيم محمد الأمين ولّ عمنا السر قدور ده أكلنا حنك ساي؟
|
شكرا أخي الزول على إستفسارك ... بالنسبة للإسم الإسم الحقيقي هو على محمد الخليفة الأمين
عندما أخذ سيد الإسم الفني من إسم جدي عليه الرحمة ظل إسمه الموجود في الأوراق الرسمية سيد خليفة
محمد الأمين ،ولكن بحكم شهرة سيد خليفة ، صار الناس ينادون والدي بإسم إبراهيم خليفة بدلا عن
إبراهيم محمد الخليفة الأمين وهو الإسم الموجود في جواز السفر والأوراق الرسمية.
وعمنا سيد دائمابيحب الطرفة و كان يقول إنه بيحمل جواز مطربين وهما سيد خليفة ومحمد الأمين
إشارة لإسمه في الجواز (سيد خليفة محمد الأمين).
يعني يا الزول عمك السر ما أكلك حنك.
تسلم يا غالي.
| |
|
|
|
|
|
|
Re: أغاني وأغاني.. للقدامى والمستجدين.. (Re: mamkouna)
|
Quote: شكراً كتيراً و جزيلاً يا اخ حسن خليفة على سعة صدرك و روحك الحلوة... اهو فضولي و حراق روحي خلانا نطلع بي معلومات مهمة و نتعرف اكتر على عائلة الراحل سيد خليفة.
لك كل الود و التقدير.
|
نحن تحت الخدمة يا أخت ممكونة ...كل سنة وإنتي طيبة.
| |
|
|
|
|
|
|
Re: أغاني وأغاني.. للقدامى والمستجدين.. (Re: الزوول)
|
الحلقة بدت وعمكم السر لابس زي امبارح والفريق هو ذاتو بتاع امبارح وفيهو ولد سيد خليفة فبالله عليكم الله خلوه في حالو اكراما للمرحوم والده وانا سمعتو مرة في برنامج عن والده وغني كما والده فبالله خلووه ..
كسرة : ارفع راسك وتميز بانجازاتك ومن عند هلا هات وبس خلاص.. الاسبيرات مارينا في السوق الشعبي بحرؤي وين شرق السكة حديد ارح ودينا ...دة شنو دة؟؟ دة مكتب دة ؟؟ماشاء الله مكتب جديد اكيد من المحميد .. ارو ارو برتواان ومشمش امردين ...سابنتوود توفر لك الحلول .... اليونتات غرف الاطفال وقريبا مفاجاة المؤمن الكبري ..النصر للتمليك العقاري ...بويات الشرووق ..جودة تحسعا ... زيت صباح في فرق في الريحة ...الاسطي عارف النقاش فنان اتعلم يحس الالوان عارف احاسيس الالوان لانها الوان الشروق ....لما ايدي جات في ايديك قلت ايه كل الجمال دة تلاجة سامسونج .. الفائز الفائز ابقي ليهو زبون ...دهان بوماستك من الشروق ...دواجن ميكو متعة التذوق ....ضوق طواجن القوصي ضاجن الضاني ياعيني عليه ...اورنجا امر ادين لكن اناناس اورنجة احسن اناناس .. من سوريا والان في السودان معجون بشري يجعل البياض انصع ...شوف سفاري طفي ناري باح ...صحي والله الموضوع ظاهر مهم التامين الصحي اخد الدوا بربع القيمة... البشائر تقابل الناس بالبشائر تشوف تقول واحلالي واخر موضة السراير ...مجمع سعيد قدالة التجاري ..بشري سارة علي برامج اكاديمية كلية الملتيمديا... هذبتني بلصبر ياشهر الصيام تصومو وتفطرو علي خير مع تحيات بويات الشرق
نكهة شاي غزالتيين كوفتي ياهو دة شاي دانا خديجة .. احنا خطفنا خديجة .. خلو خديجة عندكم ..خد خديجة....
الان نعود الي
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
الحلقة الثانية عن سيد خليفة ... ذكاء سيد خليفة ومعرفته بالجمهور ..
طشقند 58 الوفد السوداني سيد خليفة لوحدو وعندما غني ازيكم والمامبو السوداني اذهل الجمهور اول الاغنيات ازيكم كيفنكم ..اسماعيل حسن ..سيد خليفة .. السامبا .. فردتنا يغني ازيكم ....
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
فردتنا قاطع عمكم السر .. الحقو ... اشار الي القبول الذي وجدته الكلمات الموجزة كازيكم كيفنكم شعرا من قبول خارجي بينما في الداخل الجمل الغنائية طويلة قاماذا لا يكتب الشعراء اغاني بكلمات موجزة لتنتشر الاغنية السودانية خارج الوطن
عاد عمنا الي موضوع طشقند
نادر يغني جاري وانا جارو ومعاها الولد الفنان شريف (والله الواد دة تمام التمام خلي محمدية يبتسم علي طول ) نادر وشريف في جاري وانا جارو تمام التمام
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
______
Quote: بمجرّد ما يرفع فرفور راسه قبل إطلاق الصراخ.. تمتد يدي لا إراديا -وأيادي الكثيرين I'm sure- لتخفيض الصوت..
معليش يا جيمي.. رسالة لابد تصلك.. tough love |
رسالتك وصلتك ياوجن ضحك وبيسلم عليكم وبقول ياجماعة دي الحاجة الوحيده العندي لما اغرق في الغناء وانت عارف ياوليد انا عارف لكن البقنع ناس نجوان منو ___________ بحكي ليكم عن هذا الموهبة في ما بعد
سلام .. سلام
| |
|
|
|
|
|
|
Re: أغاني وأغاني.. للقدامى والمستجدين.. (Re: وليد عبد اللطيف)
|
كما غني سيد خليفة الكلمة الفصحي فلقد غني اغاني التراث
منار تغني الفارس الجعجاع ... البنية غناية ومتمكنة ...
اها جا دور متتصر سيد خليفة "انا مالي ومالو".... نكهة سيد خليفة .. لغة الجسد ..
الواد تمام واخر السطة فبالله وقفو اي هجوم ..هذا الشبل من ذاك الاسد .. هكذا صاح عم السر
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
الجماعة شكلهم كانو مقيلين عشان يتمو الحلقة الثانية عن سيد خليفة عمك.. بدلتو ياها زااتا واول مرة انتبه للكرفتة القاطعة من راسو دى.. عصام وفردتكم طلعو الجاكتات لكن يا ربى: علقوها ويين عصافير بابكر صديق بنفس الازياء.. بس اعادو الشكة منتصر شكلو كان مجهز القميص الاسود غيار لاى طوارىء جارى وانا جارو.. حبيبو عدادك رامى السنة دى وكدا عصفور بابكر صديق دمو خفيف نهرة عمك لمنتصر دى ما كان فى ليها اى داعى منار اغانى الحماسة ما بغنوها كدا عصام: دائماً هنالك فرق فرفور اها اجرى عقد اللولى دى فيها مساحة كواريك
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
عصام محمد نور في "ياحبيب مالك مشغول بالك " تمام التمام ...
اغنية علي ميرغني "ياعقد اللولي" يغنيها فرفور ....يشاركه فيها عصام احمد الطيب (الواد دة صوتو اخر تمام وزولا صبوح )..تحمست الفرقة الموسيقية .. اشترك منتصر ليضيف نكهة ابوالسيد عليه الرحمة ....عصام احمد الطيب ومنار فاكهة الحلقة رغم اشتراك قصير ...
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
شكرا النيل الازرق للاستجابة لرغبة الجماهير الاسفيرية والمحافظة لليوم الثاني علي زمن الحلقة الاساسي دون ارفع راسك والجماعة
______________
حاشية :اهو الواحد يتمحلس كدة بشان ما يغيرو رايم ويجونا ناس وادي الجندي وينطو في حلق الحلقة
| |
|
|
|
|
|
|
Re: أغاني وأغاني.. للقدامى والمستجدين.. (Re: وليد عبد اللطيف)
|
ود البنا ورجع ود البنا الى تواضعة في الاداء الغنية تليق مع نجوم الغد وانا بشوف يعصر على غناءالحقيبة وعلى السيره والعرضة وغناء الرجاله والعتاله . نادر وشريف في جاري وانا جارو والله عسل وذكرونا اغاني الحفلات والهجيج منار البت دي داسنها وين مع فوق الوسط وموهوبة مننصر (سيد خليفة) انا مالي ومالو ويناس مالكم انتو و مالوا ياجماعة الولد اتقدم وانتفض عصام محمد ياحبيب مالك مشغول بالك قالوا الحب غير حالك ياخي انت ملك البهجةوتفصّل غناء الغير عليك ياجماعة شوفو الشجن والصفا وهذا الفرق بينه وبين ود البناوالصوت البدوي فرفور معلم ومعلم والله يستحق لقب فنان الشباب الاول ويتربع على عرش الغناء ياعقد اللولي جات بسكتنا الحلوه في الروض تمشي وتمختر واتمختر يافرفور زي ماعايز في الغناء شفت الكواريك يا(نجوان )هنا كيف عجبتك . السر قدور ياجماعة ود قدور ده كان ممثل ومللوجست وشاعر يعني ماتستغربوا الحركات والكفشات
سلام .. سلام
| |
|
|
|
|
|
|
Re: أغاني وأغاني.. للقدامى والمستجدين.. (Re: وليد عبد اللطيف)
|
فى البداية وقبل اي شئ ،،، اسجل اعتراض كبير جدا جدا ،،
والعنده اتصال بى الناس ديل يكلمهم ،،،
مافى اختلاف انه سيد خليفة فنان كبير وقدم للفن السودانى الكتير ،،،
لكن ياخى 3 حلقات ،، معقول بس ،،،
وزيدان دا مالو ،، ما بعملو ليه 3 حلقات دا مفروض يعملو ليه 6 حلقات ايه رائكم ،،
غايتو ،،سويتوها ظاهره يا ناس اغانى واغانى ،،
_________________
الليلة قاعد ومتحكر وتابعته الحلقة التانية لى الفنان سيد خليفة ،،
ويا خال ،، المرة دي نحن لحام ستليين بس فى البوست دا ،،، اصلو مافى كدا ولا كدا
نادر وشريف اخر حلاوة او نقول شريف هو الحلاوة كلها ،،،
منار برغم انه الاغنية غناها عصام السنة القبل الفاتت لكن ما قصرت ،،
فرفور كان الموزع لى اغنية يا عقد اللولى ،، ونشكره شديد لانه ادي الفرصة للولد
المسكين اخو عماد محمد الطيب ( اسمو منه هو )
منتصر ود سيد خليفة ،، انا اتفق تمام مع انه الولد دا الحركات دي غير مسطنعة
دي وراثة يا خوانا ،، يكفى انه يديك احساس ابوالسيد واقف قدامك بكل تفاصيله ما عدا
الصوت يمكن شوية ،،
عصام محمد نور ،، رائع بكل بساطة ،،
وبكرة تانى ابوالسيد ،،، دي ان شالله بتكون مع الشعر الفصيح ،،
وياخال اظن ناس بوهيات المهندس ديل دافعين كتير خلاص ،،
| |
|
|
|
|
|
|
Re: أغاني وأغاني.. للقدامى والمستجدين.. (Re: ودالعباسية)
|
Quote: وزيدان دا مالو ،، ما بعملو ليه 3 حلقات دا مفروض يعملو ليه 6 حلقات ايه رائكم ،، |
اكان ما قلت كدة ياودالعباسية كان تحييزك يطلع فشنك ...؟؟ عمكم السر اتعنصر للقاهريين بحكم انو مقيم هناك ديشليون سنة وكدة يعني ...
| |
|
|
|
|
|
|
Re: أغاني وأغاني.. للقدامى والمستجدين.. (Re: ودالعباسية)
|
Quote: (الواد دة صوتو اخر تمام وزولا صبوح ).. |
قلنا الكلام ده يا أبوبكر لكن الجماعة كاتلاهم السماحة ساكت أفراح دي بالذات ما عندها أي مؤهلات فنية تخليها تشارك في برنامج زي ده .. ريماز و شريف ما بطالين لكن عصام ده أفضل واحد فيهم
| |
|
|
|
|
|
|
Re: أغاني وأغاني.. للقدامى والمستجدين.. (Re: ودالعباسية)
|
Quote: مافى اختلاف انه سيد خليفة فنان كبير وقدم للفن السودانى الكتير ،،،
لكن ياخى 3 حلقات ،، معقول بس ،،، |
معقولة ونص كمان...
يا سيدي سيد خليفة مدرسة تتعلم منها الأجيال .
سيد خليفة يستحق أكثر من ثلاثة حلقات.
سيد خليفة قدم مع عمر الجزلي خمس حلقات من برنامجه الناجح اسماء في حياتنا ولم تكن كافية ليحكي
لنا قصة خمسين عاما من الفن الجميل الهادف.
سيد خليفة هو سفير الأغنية السودانية في الخارج فهل تستكثر عليه ثلاث حلقات
سيد خليفة قدم الكثير والكثير لهذا الوطن ، فلا يمكن أخي عباسية تعترض على منحه ثلاثة حلقات وهي لا
تسوى شي نظير ما قدمه طوال خمسين عاما من الفن الراقي الرفيع.
لك الحق ان تعترض بخصوص منح الفنان زيدان حلقة واحدة من الحلقات الثلاثين وتجدني من أكثر المؤيدين
لك ، لانه زيدان إبراهيم فنان جميل وأغانيه رائعة جدا وأنا من اشد المعجبين بفنه وقدم ايضافن جميل
وراقي ولكن أن تعترض على منح سيد خليفة ثلاثة حلقات من البرنامج فهذا ما يدعو للإستغراب !!!!
أنا هنا لست مدافعا عن ابو السيد فأغنياته الجميلة فيها الرد الشافي كما أن منحه ثلاثة حلقات هي
أبلغ رد على هذه الجملة المستفزة (معقولة بس).
أتمنى يا أخ عباسية أن تتصل بي الفنان زيدان إبراهيم وحتما سيرد عليك بأن ثلاثة حلقات لسيد خليفة
غير كافية وكلم ناس النيل الأزرق كمان بالموضوع ده ... ونحن منتظرين الرد.
| |
|
|
|
|
|
|
Re: أغاني وأغاني.. للقدامى والمستجدين.. (Re: وليد عبد اللطيف)
|
سلام للأغانياب..
يا تيسير ياخ إنت معاي في نفس الخط Quote: لو إتلموا صوت فرفور "أبو بحة الأنا بحبو" + هدوء وإرتياح عصام في الغنا يبقى تحفة |
فرفرة فرفور و مزج موهبته مع موهبة عصام بتطلع حاجة ما تخلص بصراحة بكون قاعد في قمة سعادتي و مبتسم زي الاهبل براي لامن يكونو الاتنين عاملين (دويتو) و خاصة لامن يكون الاتنين في مزاج للغني و في الغالب فرفرة فرفور بتدي عصام قوة دفع ما عادية ..
__
Quote: اغنية علي ميرغني "ياعقد اللولي" يغنيها فرفور ....يشاركه فيها عصام احمد الطيب |
الأغنية دي تحديداً فاكهة الحلقة و الحلو بتاعها .. تمنيت أن يغنيها (عاصم البنا) لأنها تكون أجمل في (الصوت البدوي) .. لكن فرفور و عصام عملو دويتو رهيب و الأجمل معاكسات فرفور لريماز (علي ما أظن) عشان تشاركـ و إتضح إنها ما حافظة أو غلبها تظهر ...
_ أحمودي و محمدية اليوم إنبسطو جداً .. محمدية باسم و أحمود ينقز ساااااااااي
_ سلام سلام يا وليد ياخ الحركة دي معناها شنو ما لاقي ليها إرتباط بمداخلتكـ بكون ماشي اقرا و أقرا فجاءة تلاقيني سلام سلام دي بتحسسني إنه الصبح أذن و الصيام بداء ياخ.
| |
|
|
|
|
|
|
Re: أغاني وأغاني.. للقدامى والمستجدين.. (Re: فيصل نوبي)
|
..... ______
Quote: بمجرّد ما يرفع فرفور راسه قبل إطلاق الصراخ.. تمتد يدي لا إراديا -وأيادي الكثيرين I'm sure- لتخفيض الصوت..
معليش يا جيمي.. رسالة لابد تصلك.. tough love |
_____
يا نجوان يا اختي موضوع كواريك فرفور دي أظنها تقليد لطريقة غناء كمال ترباس وقبله علي ابراهيم اللحو ما عارف أذا كان فرفور بيقصد يؤدي بالطريقة دي أو انها صارت مكتسبة ولكن أظن انه من الصعب عليه أن يتخلى عنها ولكن كمال ترباس واللحو يجيدان هذه الطريقة وغالباً ما يهربان بها من مواقف محرجة أحياناً تصل بهم إلى درجة الهمس ولا تفهم ماذا يقولان ولكنهما يحتفظان بالسلم ويتركان الموسيقى تعبر نيابة عنهما ثم يعودان في المواضع السهلة للأرتفاع بصوتهما(ولكنهما غالباً لا يصلان ل160 بتاعة مرتضى ) ويكون كل ذلك في سبيل الحفاظ على الصوت ومخافة التحشرج .... بدأ وردي بعد عودته الأخيرة يلجأ لهذه الطريقة للتغطية على شيخوخة الصوت كما حاول الاستعانة بكورس البنات ليؤدوا بدلاً عنه الطلعات المحرجة ولان وردي كان يتميز بصوت سلس قوي غاية في الجمال ولا يحتاج إلى تغطية (اسمع التسجيلات القديمة له) لذا لم يستسغ الكثيرون أداءه الجديد .... وأنا أولهم .... اها بعد الكلام ده كلو يا عمك جمال فرفور نستنتج انو الجماعة ديل مجبورين انت الجابرك شنو ؟ .....
| |
|
|
|
|
|
|
Re: أغاني وأغاني.. للقدامى والمستجدين.. (Re: نجوان)
|
الأخوة ناس البوست شكرا على هذا البوست الخلانى أتابع البرنامج لانى بعيد عن الوطن وما عندى قناة النيل الأزرق البرنامج ماشى كويس وأدهشنى تطور نادر خضر أعتقد سيغنى من حلقة لآخرى بثبات مثل عصام محمد نور وباين نادر عندو أستاذ للصوت فمتمرن كويس
ولكن...
أخوتى لو كنت مكان عصام محمد نور ووجهت لى الدعوة للمشاركة فى هذا البرنامج لأعتذرت للأسباب الآتية البرنامج سيزيد من انتشارى أعلاميااوكى ولكن سيكون خصما على مسيرتى الفنية وهو الأهم سيرسخ للمستمع أننى أغنى للكاشف ألخ وليس شخصى ثانيا كيف يمكن لأغنياتى أن تنتشر لو كنت انا نفسى لا أقدمها و أصر على تقديمها
بعدين ما هى الفائدة الجناها والتى سيجنيها مستقبلا زيدان إبراهيم من خلال مشاركته فى البرنامج بهذه الطريقة أنا لأ أقصد أعلاميا بل فنيا والأغانى الآن صارت فى عصرنا هذا موثقة ومتاحة مثلا اليوتيوب ولسنين طويلة
رمضان كريم
إبراهيم عبد الحليم
| |
|
|
|
|
|
|
Re: أغاني وأغاني.. للقدامى والمستجدين.. (Re: إبراهيم عبد الحليم)
|
_
Quote: سلام سلام يا وليد ياخ الحركة دي معناها شنو ما لاقي ليها إرتباط بمداخلتكـ بكون ماشي اقرا و أقرا فجاءة تلاقيني سلام سلام دي بتحسسني إنه الصبح أذن و الصيام بداء ياخ. |
فيصل نوبي سلام الله عليك مع السلامه مع السلامه ++ وما تنسي لي ترسَلي يسعدني إنك تذكريني ++ وعني دايما تسألي
وتعيش والدنيا كلها في( سلام ) ومن غير تمزق وحروب لكن عايز اقوليك حاجة بس ماتكلم زول ابسط حاجه تقول ده زول وهم .. مخستك .. وكمان بتعني حاجات كثيره .وتخيل في ناس فكوا الرموز وعجبتهم ولكن لو ماانت عجبتك تاني لو شفتها تعال اقرصني في اضاني الشمال دي . كل شيْ ولا في بوست (نجوان ) واحد يزعل مننا .......
تصوم وتفطر على خير يافيصل نوبي
ودمتم.... ( كده كيف يافيصل نوبي حتى ترضى )
| |
|
|
|
|
|
|
Re: أغاني وأغاني.. للقدامى والمستجدين.. (Re: محمد المرتضى حامد)
|
عاصم الليله ضعيف, الاغاني دي ما بتناسبك و خصوصا اه اه الكل شويه دي ما في زول مفروض يقلدها غير سيد خليفه, معليش يا فردتنا
فرفور غايتوا الليله عقد اللولي ادتك مساحه تكورك على راحتك, رغم اني لاحظت تحفظك على الكواريك يبدو انك متابع معانا البوست
شريف صوتك جميل و انشاء الله السيسون الجايي يمكت تترقى من الكنبه الوراء
نادر خضر فلسفه شديده في الغناء انت صوتك ما بطال لكن ما تحاول تتفلسف شديد كده, الليله برضه اللبسه بتاعت امس كويسه
منتصر ارحمنا و الله بتشوه اغاني المرحوم, انت و عزالدين احمد المصطفى مصرين ان الغناء يورث, ارخ سيرت والدك بس خلي غناه.
منار اداء جميل بس صوتك لا يناسب الحماسه خليك في الرومانسيه و الطبقات المنخفضه.
عموما كده لازم لمن تكون في حلقتني تجيبوا غيارات, يا ناس والله فترنا نقول المظهر مهم جدا و الجلسه و البوسشر
| |
|
|
|
|
|
|
Re: أغاني وأغاني.. للقدامى والمستجدين.. (Re: عبدالله وداعه الامين)
|
سلام يا شباب عاصم البناالاغنية ما كانت بتناسبو نهائي ما عارف بس طبقات صوته ما كانت بتتواكب مع الاغنية دي
عجبني فرفور في انه اتاح لي نجوم الغد انهم يظهروا مواهبهم وانا مع الراي البيقول البحة في صوت فرفور جميلة ومع نوبي في انه لمن فرفور وعصام يشتغلوا دويتو مع بعض بيطلعوا حاجة كدة مولعة عدييييييييييل
ود سيد خليفة عادي جدا معليش حتى لو الراي كان حاد يظل راي مستحيل الفن يورث عنده حضور لكن صوته مجلي خالص ومشكلته الكبيرة انه ابوهو سيد خليفة
نادر خضر عمل شغل كويس مع نجم الغد (اعتقد الفحيل) والود دة موهوب شديد
اخو عماد احمد الطيب احسن من عماد الف مرة واجاد في الاغنية الاداها
اكتر شي عجبني لحظات تطريب احمودي اداها كم نقزة كدة يمين كيفتني في ضلوعي
| |
|
|
|
|
|
|
Re: أغاني وأغاني.. للقدامى والمستجدين.. (Re: Alsa7afa_30)
|
* السر قدور ( عدو الأسئلة و المقاطعات ) أكل فردتنا حنك و دخل بي حمد و مرق بي خوجلي...و مع فرفور( عمل رايح ) !
* شريف خالد الفحيل..صوت دافيء..حضور هاديء...رزانة..إتزان.
* منار صديق..أحلاهن..ربما لإستغناءها عن طبقات المكياج بوهيات الشروق و حواجب الساحرة سونيا!
* في رمضان الفات تألق منتصر سيد خليفة في برنامج ( سرٌ الغُنا ) على قناة الشروق..و قدر ينافس أصوات قوية زي هشام درماس و ياسر تمتام و ابوبكر سيدأحمد ( الما رطاني )...لكن بصراحة في الحلقتين الفاتو كان مضطرب..متجهجه..ملخوم ..مربوك..صوتو محشرج.. هل للماكنتوش و اللكوم و الجالاكسي جواهر... دور في الربكة دي !!؟؟؟
| |
|
|
|
|
|
|
Re: أغاني وأغاني.. للقدامى والمستجدين.. (Re: وليد عبد اللطيف)
|
Quote: كان كده قول لفرفور مافي داعي تغرق في الغنا، خليك مطفّح ساي..
بالله سلّم عليه وأطبع ليهو مخطط محمد المرتضى وقول ليهو ده كلام علمي.. ومن مصلحتك تتعاون! (وجه بيهظر ساي) |
عليك الله ياست الحوش نحن نكلم منو ونخلي منو تعالي نحكي ليك في يوم من الايام جمال فرفور صاحبنا عمل شريط يالعود وكسر الدنياوكان به اغنية (صديق الكحلاوي) ( الصبا النجدي ) وفي مقطع بدل (قنابل النهدي ) (بقول قنابل الهندي ) فزعلت واتصلت علية وقلت له ماهذا قال دي لجنة النصوص عايزة كده يعني السودان اصبح مهزله حتى في الغناء. صراحة حاجات تمغص والتانية برضو في اغنية الكحلاوي يازهره تتحدى النجوم === ياقمره فاجه وسط غيوم وجمال يقول يازهره تتحدي النجوم === ياغيمه فاجه وسط غيوم وهنا انتطفت حلاوة البيت وبرضوا زعلت واتصلت وكرر نفس الكلام ___ ولكن يانجوان جلسنا ومعنا عصام محمد نور وود البنا والله تسمعي غناء.بس تتعجبي . وبالمناسبة في زواج جمال فرفور عملنا جلسة في بيت ناس جمال فرفور وفي الجلسة طلبت من عصام ود البنا اغاني وسألني انا من وين بجيب الاغاني البطلبها منو دي ولم يعرف انا حافظ له كل اشرطته واول اغنية طلبناها منه (يارشا ياكحيل ) وبعد داك اصر ان يعمل حنه لجمال في منزلهم (اولاد البنا) بامدرمان وكانت حفلة حفلة . لكن يانجوان ماتزعلي وما تتحاملي شديد على جمال واسألوا فردتكم عنه . وتأثر فرفور بابن بحري المرحوم ايوب فارس والمرحوم ميرغني ومبارك حسن بركات وجمال كان يحي الحفلات زمن كان بغني شعبي احيانا من غير ساونداو مكبرات صوت وهل عصام او ود البنا او كل الفنانين الشباب يستطيعوا وهذا لقوة صوته وبحة الحزن والحنيةالتي تحتويه .
| |
|
|
|
|
|
|
Re: أغاني وأغاني.. للقدامى والمستجدين.. (Re: mamkouna)
|
Quote: الحواجب دي ماشفتها إلا عند الساحرة سونيا , ريا و سكينة , نعيمة الصغير..و..زوزو حمدي الحكيم !!! |
البنية كانت تمام التمام قبل العشرة كيلو وايام تصفيات نجوم الغد ودي هسع بس من فرحة الانتشار خلوها شوية وهي اكيد لو قرات الكتبتو ممكونة وراوية حتخس ويمكن يجيها فقر دم .. يا ممكونة قلتي نعيمة الصغير ؟؟ لا حولا ....ليه كدة بس ؟؟ ان نقدهن عظيم
| |
|
|
|
|
|
|
Re: أغاني وأغاني.. للقدامى والمستجدين.. (Re: Rawia)
|
Quote: وداعة ياغالي معليش عاجباني الاغنية وروح الوليد العسل شريف عشان كدا نزلتها تاني تو إمفسايز*Emphasis ماي آدميريشن توردس ود الحلة وتجليات نادر خضر |
راوية يا بت العباسي
التحايا يا غالية وليك وحشة زمن منك ومن اخبارك ان شاء الله طيبة وناس مصر طيبين
رمضان كريم وتصومي وتفطري على خير
شكرا ليك والادمريشن دا ياخ و والود شريف ونادر ما قصرو ابدا
يديك العافية وتسلمي والتحايا لي العقاب والبت رجاء
| |
|
|
|
|
|
|
Re: أغاني وأغاني.. للقدامى والمستجدين.. (Re: وليد عبد اللطيف)
|
والله يا وليد مرافعتك في حق جيمي ما هينة.. صادقة وبليغة..
بس معليش.. دخلت بالأضان دي وطلعت بالتانية.. (أقصد طلعت بنفس الأضان، لأنه الأضان التانية بعافية شوية من كواريك جيمي..)
Quote: لكن يانجوان ماتزعلي وما تتحاملي شديد على جمال |
زعل وتحامل كمان؟ يا وليد الله لا جاب من ده.. احنا في حضرة الفن والجمال.. ورفقة سمّار رائعين في هذا البوست..
بس ما زالت هناك مشكلة اسمها كواريك مافي داعي ليها.. اجمع عليها الكثيرون.. وتعرف.. النقد الموضوعي غالبا بيكون من أشخاص لا يعرفوا الفنان بصورة شخصية.. فيكون نقدهم في ضوء المنتج القدامهم فقط.. دون أي مؤثرات خارجية..
______ لكن يا وليد عشان مرافعتك والذكريات الحلوة دي، بوعدك ما أجيب سيرة البحر لمدة 24 ساعة كاملـــــة!
| |
|
|
|
|
|
|
Re: أغاني وأغاني.. للقدامى والمستجدين.. (Re: ليلى عز الدين)
|
والله امبارح فرحت فرح لاخو عماد احمد الطيب لمن ادوه فرصة يغنى هو زاتو كان عايز يطير من الفرح...انا زيك يا ود العباسية محتجة و محتجة ليه زيدان بجلالة قدرو حلقة واحدة بس .....ونصهارافعين راسنا و مرشوشين ببوهيات الشروق و شاربين برتان و امر الدين...
يا جماعة نادر خدر كان قمة فى الاناقة ....اما ود سيد خليفة ....غايتو حاسكت عشان خاطر ود عمى ابوبكر ....
| |
|
|
|
|
|
|
Re: أغاني وأغاني.. للقدامى والمستجدين.. (Re: نجوان)
|
والله يا جماعة امبارح ولد سيد خليفة غناهو كان كويس يعني جاري وانا جارو دي اتقطع فيها للامانة
الحلقة بدت كويسة لكن فجاة كدا قريب نهايتها في ركود حصل من جانب عاصم البنا نادر خضر وعصام محمد نور شكلهم ناموا في النص والا الواحد ما فهم الحصل شنو
على راي عمنا السر قدور ( يا جماعة وين عصام محمد نور مشى والا شنو )
لسه بينقصهم معنى المحافظة على مستوى حماس الحلقة بنفس المستوى في لحظة كدا بيذكروا الزول بالناس القعدين مجموعات يتونسوا وفجاة كدا في النص تلقا صمت حصل وتلاتة اربعة منهم اخدوا ليهم تكية وناموا
بس في زول يفهمني ليه فرفور قايم بدور المايسترو وتنظيم الدخلات في الاغاني ؟؟
معليش شوية بس حاختلف في الراي حول صوت الفنانة منار الزولة دي نوع طبقات صوتها ما عميق يعني في الطلعات العالية بتتعب
محتاجة لسه لتمارين شديدة ذكرتني اسرار بابكر في البدايات والقطعة في الاغنية لضيق النفس
بس عموما الحلقة كانت كويسة
بسجل معاكم صوت احتجاج اشمعنى الفنان زيدان ما ادوهو مساحات حلقات اكتر!!
| |
|
|
|
|
|
|
Re: أغاني وأغاني.. للقدامى والمستجدين.. (Re: maia)
|
Quote: بس في زول يفهمني ليه فرفور قايم بدور المايسترو وتنظيم الدخلات في الاغاني ؟؟ |
فردتنا تنازل ليهو عنها ... فيها حاجة دي ....؟؟ يابنات الهي ما يرمي زولا غلبان بين اضراس نقدكن ...
___ انت بس خلن ود ابوالسيد الله يرحمو -.مشاركة منتصر انتهت بنهاية الجزء الثاني- خوة مافي ؟؟
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
Quote: بسجل معاكم صوت احتجاج اشمعنى الفنان زيدان ما ادوهو مساحات حلقات اكتر!! |
ياناس النيل الازرق والله شاكرين و عشمانين بعدما طفشتو ناس وادي الجندي وارفع راسك من عضم البرنامج ممكن بالله وحات محنتكم في هذا الشهر الفضيل تجيبو لينا زيدان تاني ...عندنا وليد (ود العباسية) وبنيات كتار كدة زعلانين تب من عمايلكم .. كيفن زيدان حلقة وحيدونة اها في ذمتكم نسمع شنو باقي الشهر..انا ذااااتي دايرو يغني تاني وتاني وسامية (شريكتي) اها قالت زيدان تاني والا ...اها نبقي في الزي دة والواحد في اواخر كهولته وماداير لروحو البشتفة ...ممكن بالله ...
| |
|
|
|
|
|
|
Re: أغاني وأغاني.. للقدامى والمستجدين.. (Re: abubakr)
|
قريبنا ابوبكر
مساكقمي
لا والله امبارح طريقة ولد سيد خليفة كانت جميلة
شايفة الليلة الاغاني حتكون اغاني الراحل سيد خليفة بالفصحى بس دعواتي وامنياتي العميقة انه التركيز ما يكون على فرفور في الاغاني البتحتاج لطبقات عالية
| |
|
|
|
|
|
|
|