|
Re: نـــــــــــــــزار....الخـــــــــــواض (Re: Dafi)
|
دافي ...
ومن بعد السلام...
كل ما إحتاج ليك بجي هنا وأسمعك جواي من صداك .... ما إلا الغربة نخلي ديار ونمشي ديار ..
تتذكر هنا أمدرمان ؟ الساعة أربعة وشوية بعد عالم المرأة , في ضل الأوضة بعد الغداء , في إيدك كباية الشاي ومافي مزاج لي الدافوري , والرادي في حضنك حبيبة , وتجيك عصافير الخريف تملاك شجن , رحلت عشانا عصافير خريفنا , ورحلت انا كمان معاك , ولسة ضل العصرية ممدد , محكر , مكسر فوق طرف العنقريب وباقيهو واقع في واطتنا , والرادي متكي فوق المخدة التحتها الجريدة صفحة الكلمات المتقاطعة ولسة بشدو لي عصافير الخريف , الملاية فوق العنقريب تهبهب فيها نسمة من الشمال عندكم ... في إنتظارك
أبنوسي
|
|
|
|
|
|