الليله صليت الجمعه مع الـشـــيــعــه ، رايكم شنو ؟

مرات بجرب مساجد عديده وبسوق أخوي الصغير معاي ، قمنا دخلنا للجامع ولاحظنا أنو المكرفون ما بطلع الصوت برا لباقي الحله ، نشوف هاك يا عالم و أمم و من الجهة التانيه برضو كميات من النسوان مبالغ فيها ، والله قلت لأخوي باين دا عرس نقوم نصلي برانا ونتخارج ، وشويه عيوننا اتعودت على الاضاءه نلاقي ليك كل زول خاتي ليو قطعه حجريه مدوره صغيره قدامو وبسبحو كلهم في حين الامام يخطب ويدعو
قلنا نقعد ، أخوي قال لي الناس ديل شكلهم بخوف ، وقام كب الزوغه قدام الناس وطلع
أنا اتشالقت وصنقرت وسبحان الله لابس بنطلون أسود وقميص أسود وطاقيه بيضا ، يعني زي الامام أسود في أسود بس عمتو سوداء
قلت في نفسي ياخواني دا شنو دا ، طبعا ما اتخيلت في نص الشارقه المتكوزنه جدا في الامارات و جامع بالحجم دا بصلو فيهو شيعه و جمعه
زولنا خلص الخطبه والدعا وفجأه الناس كرروا ثلاث مرات الصلاه على النبي بصوت عال لما اتخلعت
بعدها بدأت الاقامه : الله أكبر ... أشهد أن لا اله الا الله ... محمد رسول الله .... علي ولي الله ... أبناءه المعصومين حجج الله ... حي على الصلاه .. الفلاح .. حي على خير العمل .. الله أكبر .. لااله الا الله

وقاموا على حيلهم قلت أسوي شنو هسع ، هل الناس ديل بصلو زينا واحد كدا ؟ وهل اذا عملو حاجه غريبه أقوم ما أعملها و أواصل صلاتي عادي
زي ما بعرفها ؟ والله واقف في نص الصف لغاية ما انتهو من الفاتحه بفكر
استغفرت الله اجتهادا قبل ما أبدأ وقلت كدي نبدأ وربنا يسهل ، تعرفو مواضيع زي دي خطره لو الواحد ما عندو علم بيها، واتذكرت فعلا قول المصطفى : من يرد
الله به خيرا يفقهه في الدين
to be continued..