الصفايح في البــورد ..

Quote: تيسير السلام عليكم.... اتسخافى واتصاحفى واتفاصحى ما شئتى بس ما تخلى السلام اول شىء انا ما جيتك انت انا جيت للفاحه ديك اوضح ليها ما اوضحت.. بعدين انت يا تيسير شنبى وشيبى ديل شوفتيهن؟ كتر خيرك طيب مادام انت الصغيرة دى ما جيتى لى عمك و احترمتى شيبه وشنبه وجيتى تلبعى من طرف، و وصفتى كل الناس بلا استثناء بالصفائح وامعاناُ لسبق الاصرار والترصد شرحتى الصفائح بلغتين حيات تحمدى ربك ، يبقى شيبى وشنبى ديل تهكم واللا شنو؟ لانو مفروض المبادى لا تتجزأ ، القدرك ديل اولاد وبنات انت مخيرة فيهم لكن ابو شنب وشيب ده بماسنجر داخلى حتى بعد كتبت كان اعتذار فى شكل توجيه كان كافى جداً وما كان فى زول جاء دخل خشمه؟ لكن انت عارفه يا تيسير الزول لما تاخده العزة بالاثم بقول كلامك ده ، كيف بتحبى النصح مجاهرة؟؟ يعنى اقوم اغير عنوان البوست واكتب تيسير قليلة الادب تسب شيخ فى عمر ابوها؟ ياريتنى كان عارفك بتحبى المجاهرة .. وبعدين شايفك مصرة بتورينى انك مافارق معاك لا شنب لا شيب بجملتين الاولى كتبت لى انك وجهتى لى الكلام ده لاتك عارفانى ما كنت قاصدك ، يعنى لو كنت قاصدك كنت اشوف شوف مش؟؟.. والتانية مغيوظة عشان ما زعلتى منى لى هسة ، طيب انا حا اتجاوز التانية دى وبوردها ليك مورد داير تلطفى بيها كلامك لانو فى بعض الكلام الزول لما يكون عشمان فى زول بحس كلامه ما بقراهـ، يعنى انا عاينت لى اسباب النزول لانى اعرف ان الكلام حمال اوجه.. طيب اها انا قاصدك وداير اقول ليك يا تيسير ما تحاولى تنصحى الناس اصلاً الا فى نطاق اضيق من سم ابرة، وان اضطررت لانهم يهموك لا تفعلى ذلك الا سراً وان اجلتيه لانه مافى منطق القاك لابسه ليك توب ما يعجبنى انا شخصياً وفى نص حفله اجى اقول ليك توبك ده ما محترم او لايناسب سنك او شفاف اكثر مما يجب او صارخ لدرجة الفتنه وان كنت شقيقك او زوجك... ولا اظن ان ذلك سوف يبقى مكاشفة ولا يعدو اكثر من إسأة مغلفة.. فيا تيسير فرض الوصاية المعلن لن يقبله منك ناس خصوصاً جلهم لم تقابلينه ولا فى اسكايب حتى او تلفون فحدود معرفة الشخص بالاخر هى البتحدد نوع الكلام البتوجهيه ليه ، وهسه لو فى دبى بتمشى لى دكان صاحبه صفيق لدرجة بعيدة وان كان ينفرد بصنف لا يبيعه غيره فعلاقتك بيه لا يمكن ان تكون الا احد امرين : اما تتحملين صفاقته او تقاطعى شارع محله واللا كان تكونى شايله بسطونه وحايمه بالمحلات، تصدقى علاقتك بالكثيرين هنا وان تمنيتى ان تقابليهم كلهم او بعضهم وحتى يهىء لك الله ذلك ليس اكثر من علاقتك بصاحب المحل المذكور انفاً، مهما كان حرصك عليهم وعلى هدايتهم. أو حبهم.. تصدقى انا ما مغيوظ لانى لى يوم الدين ما حا ازعل منك ، والله برضو لو ما اضطريتينى ما كنت حا اكتب ليك هنا، كنت كايس لى عضم تلفونك وكنت حا اشد ليك سلك طويل واقول ليك كلامى ده كلو. و الباقى الموفرو لسه.. حقيقى انا ما حصل لى الشرف اعرفك وان عرفتك من خلال ناس اثق تماماً فيهم لكن اعرف مها المتحامره معاها ومتحامره معاك دى والله انت غلطانه عليها بنسبة 70% ، خمسين منها اعزيها لعدم معرفة كل بالاخر الذكرتها ليك والخمسين التانية اى زول قرأ مداخلتها الكتبتها يحس فيها انها لم ترد عن قصد تماماً، بما فيهم انت شخصياً وبمستوى فهمك انا متأكد اى زول بعرفك عن قرب بكون بفكر وبفتش عن سبب الغضبة المضرية دى ، ونفس كلامك الكتبتيه ليها ده انا كنت عايز الحقه بماسنجر اقول ليها امسحى مداخلتك واعتذرى لتيسير لانها لم تتداخل هنا ولو لا مداخلتك التى جاءت عنيفة ( انا صدمت فيها بالجد ) مع اعترافى الكامل انه من حقك ان تنفى عدم تداخلك فى البوست المذكور الا اننى لا اجد اى مبرر ان تكون بالنحو الذى اوردتيه مقارنة مع فهمك ولباقتك ، وبرضو انا كنت عايز اكتب ليها ما تبهتى تيسير لم تتداخل معنا..وبعدين بعد اعتذارها لك ، ما اديتييها احساس انك قبلتى عذرها ( لانك قاصدة اخرين) وهى لما لقت اعتذارها ما مقبول داست بنزين وده الخلانى اقول ليك هى غلطت 30%... تيسير اخيراً قيل لخالد بن صفوان من خير اخوانك؟ قال: من غفر ذللى وقبل عللى .. ونحن بالبلدى بنقول اخوك كان غلط فتش ليه مية عذر ماتحاول تجرمه ويبقى الود،،،