|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الرشيد محمد الخير)
|
يا الرشيد يااااخ
اسي دا وكت تفاجئنا بيهو
بكل هذا الفرح
وهذه الدموع
الله لا تريحك
ياسلاااااااااام الانحناءة والذوبان أمام هذا التجلي الهام عبد الخالق المعلمة المبدعة والمطربة الجليلة والمناضلة الجسورة والـ يااااااه لا زالت ترن في أذني "مداخلاتها" قبيل أركان النقاش أيام الجامعة
بمقاطع دنقلية على شاكلة
معلق أنا على مشانق الصباح ورقبتي بالموت محنية لأنني لم أحنها حيا
التحية للبيت السعيد : الهام عبد الخالق وطه جعفر وجعفر الصغير
على هذا الابداع الأبيد !!
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: فتحي البحيري)
|
Quote: ياسلاااااااااام الانحناءة والذوبان أمام هذا التجلي الهام عبد الخالق المعلمة المبدعة والمطربة الجليلة والمناضلة الجسورة |
الجميل فتحي البحيري لك التجله والاحترام صدقت القول الهام عبد الخالق المعلمه هي السماء ننشدها المطر والنجوم وهي الزاخره بنورها فهذا العمل اول مولود لها فالف مبروك لنا والوطن ونحن ننتظر الاستاذه لتسليط الضوءعلى التجربه وتفاصيل تكون الملامح مرة اخرى لك الجمال واجمل الرحيق
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الرشيد محمد الخير)
|
الاريب محمد المرتضى حامد لم تذهب بعيداَ فيما قلت فهذه الإلهام تبث الفرح أينما حلت , ستتسع الدائرة لملايين اخرى في مختلف الحواري و المدن امنياتي الصادقة
أبو مازن - مساء الخير و مشكور على المرور
الحبيب الاستاذ الموصلي : لك الاحترام و التحية و انت تشرفنا بأن تستمتع معنا
الرائع استاذ خطاب لا أملك إلا أن اقول لك مما قلت (حا تجي البت الحديقة), شكراً لك
الاخ ترهاقا : الجمال نابع من جمال روحك
الاستاذ عادل عاطي : قريباً ستكون هنالك إضاءة حول هذا العمل مع جزيل تقديري و شكري
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: عبد الخالق عابد)
|
الف شكر ومرحب بيك يا رشيد وانت تدلف لهذا المكان عبر بوابة النغم و الجمال .. قلمك قطعاً سيكون اضافة قيمة وضوء جديد ساطع وانت تدلق اول حبرك نغماً وفرح .. التحية للأخت للمبدعة الهام عبد الخالق على هذا العمل الممتاز، والله غنية تريح الأعصاب وصوت يدغدغ المشاعر، اتمنى ان نسمع منها المزيد .. وبالله يا رشيد قول ليها الصاوي قال ليك كان ده ياهو المانعك من الكتابة هنا اصلك ما تجي تاني ..
الصاوي
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: elsawi)
|
ان الاماني تصطحب الفرح الاتي ...من مراسي الفن والابداع ... مثلث الابداع .... الرشيد والفنانة الهام وصاحب الكلمات احمد العربي ...هكذا بدا علينا الغيث الهام فنانة حد الثمالة كلمة وصوت وصورة تطرب وتشجي وتدعمك حماسا حظيت بها في التسعينات (ربما مجموعة ساورا )..وقريبا كانت في امارة الشارقة ..نفس الابداع ...ادعو لها جميعا 0بوركت وبورك فيك وفنك )لتغسلي اذاننا من .....و....(امييين ) الرشيد .. شكرا وشكرا وشكرا
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: نعمات حمود)
|
سلاااااااااااااااام اهل النغم الطروب يا ناس حمد الله على السلامه الهام سلامات وحمد الله على السلامه التحايا للاخ طه و تحايا خاصة جدااااااااا لجعفورى بالله لكن والله ما ساااااااااامعه اى شىء الظاهر عندى مشكلة .. لكن شوقتونى بى مداخلاتكم الجميلة المشوقة معقولة بس انا الاقرب وما اسمع ؟؟؟ ما تستغربى لو جيتك ناطة بكرة الاخ الرشيد لك التحايا والود وانت تعطر الساحه بصوت الهام الشجى الهام مبدعه بكل ما تحمل الكلمه من معانى .. وصوتها جد مميز لها التحية وامنياتنا لها بمزيد من التقدم والابداع تحياتى واشواقى اسماء الجنيد / مسقط
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: elsawi)
|
Quote: التحية للأخت للمبدعة الهام عبد الخالق على هذا العمل الممتاز، والله غنية تريح الأعصاب وصوت يدغدغ المشاعر، اتمنى ان نسمع منها المزيد .. وبالله يا رشيد قول ليها الصاوي قال ليك كان ده ياهو المانعك من الكتابة هنا اصلك ما تجي تاني ..
|
الصديق الذي ينتمي لازمان جميلة .. تعرف ياصاوي المانعني من الكتابة هنا هو الكتابة نفسها الكتابة سواء ان كان هنا اوهناك تصيبنا بحالة نرغب ان نخرج فيها من داخلنا اجمل ما نملك ليس الجميل بمعني الحالة الجوانية فرح حزن او احباط او فكرة حتي الحزن وحالات النوستالجيا احيانا نخلق معها الفة وود ونابي ان نخرجها كيفما اتفق وانا اتحين زمان واضح انه لن ياتي وفي ملفات تانية ربما هي حالة الهروب للامام ...
اما الغناء فهو حالات الانجذاب التي تصيب الواحد منا وتسكننا وتابي ان تظل كامنة داخلنا لم اهرب للامام ابدا كنت اصر ان اتحكر معه مفترشين الطريق كيفما اتفق لكن بروقة شديدة .. وواضح انه هذه الازمان التي ننظر يجب ان نصنعها نحن وانا بحاول هسي اعمل كدة
ياصاوي كم من الشوق ونفتقدك كمنجتك ارجو ان تكون مازالت قريبة منك
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الفاتح الجنيد)
|
الاصدقاء الاعزاء شاعرتنا الشفيفة سوما ..
الاخ الفاتح الجنيد ....
تقترب خطواتنا وتبتعد عن الوطن لكنا نلتقي هنا ... ونعقد العزم ان هذه الغربات لن تسلبنا الق انتمائنا .. وجودنا معا يشكل واحة نحاول ..نبتكر.. نخلق تلك العوالم ونزعم انا طالما معا قادرون علي ان نقهر ذلك البعد المكاني عن الوطن ...
دمتم وسعيدة انا برفقتكم هنا في مسقط ..وسعيدة بانكم تسمعونني واسمعكم ...
اسماء الحنينة (لو عارفة ياشمس النهار ) تلك القصيدة الرائعة تاخذ بتلافيف اللحن وتستعد شمسها للبزوغ ... عندها ساكون كالشمس في تماهيها مع لونها والقها...
دمتم
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: سيف بخيت موسي)
|
يا فتحي يابحيري زمانين مابين الاغتراب وشارع الجامعة ونحن بعد في محاولات لترتيب الذات شكرا علي المرور الداعم ..
محمد المرتضي حينما نغادر الامكنة التي نحب نحمل منها بعض مانحب وماينقصنا نكمله معا ...وجودك ونفسك في لمتنا( النادي السوداني بمسقط )يدوزن بعض اوتار ربما تصاب في عتمة الخليج ببعض الذبول لك ولهالة الرائعة والاولاد حفنة الوان وحب ممتد.
عبد الخالق عابد التقيت بك وسط مجموعة رائعة شباب متقدين لايدخرون جهدهم ومايملكون حتي يبنون نادوسهم لك ولهم وللمرور الجليل اعمق تقدير .
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: سيف بخيت موسي)
|
Quote: والغريب ساكت الهام الفترة دي كلها لكن تاريها قاعدة ليها فوق راي |
اخي سيف بخيت ... لك كل الود علي الجية لهذه المساحة التي اتقدم فيها علي استحياء مع كل الكلام الجميل ...
فعلا لم اكن هنا او في اي جهاز اعلامي داخل الوطن ..عندما غادرت السودان نهاية التسعينات حملت حقيبة وجيتار ..حقيقة وانا احمله كنت اعلم اني ساغني لكن اين وكيف ومتي؟؟؟ لم اكن اكيدة من كل هذا الا ان جمر الغناء كان هناك يحافظ علي بعض دفء بشكل ما وينتظر اشتعال نمه ودوبيته ومردومه.....الخ وكل ايقاعتنا التي نحب ...
اما الراي الاكيد الكنت قاعده فوقه هو اني ساغني.. سعيدة باني غنيت وصدقني كنت اغني لي وللاصدقاء واتحرك بين هنا وهناك . الا ان فكرة تقديم هذا الغناء بحيث يسمع كمشروع كانت تتحين مجموع ظروف او قل وقتا ملائما حتي تطلع ببعض الروقة ...
لك كل الود
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: حيدر امين)
|
الحبيبة الهام عبد الخالق ....
الحمدلله كل ما أتذكرك أكون زعلانة من كونك ما اتسمعتى للناس وما أخدتى امر الغنا ده بى جدية ....
لكن الفرصة الجابت هنا دى طيبة وبداية ممتعة للاستماع لك ...لصوتك الممتد فى الفضاء كالحدائق المعطرة ...
وصوتك ما صوت وبس ...مدعوم بفكر وظرف ولطف وعزف جيتار واهتمام بمفهوم الفن والغنا كقضية وموقف انسانى ...
ما علينا الانشجعك ...ونرجع الكرسى لى ورا ونجيب تسالى .... يللا أدينا منك كتير .....
ولك التوفيق...والنجاح
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Tumadir)
|
يا حبايب في الحقيقة انا سعيدة بوجودكم كلكم واحد/ة واحد/ة كنت انوي المرور بالترتيب عليكم لاني احس حقيقة انه بيني وبين كل منكم مجموع تفاصيل وحوارات يجب العبور منها وعليها علي اي حال شكرا ليكم تاني وبرضو حااحاول ..
*عادل عبد العاطي لك كم من الود الممتد والشكر علي استماعك الجميل .
*الطيب شيقوق سلام وود بالكوم وموعدنا في النادي .
*مايا يافتاة الغيوم اي يوم هذا الذي سمح ان نلتقي اخيرا هنا دة يوم جميل بدون شك واسفة لعدم قدرتي ان القاك في الوطن ..تخيلي السودان بكل جريه والتزاماته وبكياته ومجامالاته + اصرار علي الغناء وسط كل هذا لكي العتبي حتي نلتقي .
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الطيب شيقوق)
|
Quote: صحيح الاخت الهام رقم فني بلونية متميزة في الكلمة والصوت . للاخت الهام مساحة فنية خاصة بنادي الجالية السودانية بمسقط التحية لكل من ساهم في هذا العمل العظيم ... |
استاذنا الطيب شيقوق مساحة بحجم كل هذا التواصل لك مرورك الجميل اسعدني .. واتمني في القريب العاجل ان اقدم لكم هذا العمل ومجموعة اعمال اخري في النادي بمسقط فانتم اهلي اللذين ما توانو عن دعمي ودفعي لتقديم كل ماهو جديد ...
ومعاك في المساحة دي ازجي تحية حب وتقدير لدكتور احمد طراوةالذي كان اول من قدمني لاهلي هنا في مسقط في جلساته المميزة التي تعتبر بحق توثيق لمسيرة الغناء في السودان ..
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Tumadir)
|
Quote: الحبيبة الهام عبد الخالق ....
الحمدلله كل ما أتذكرك أكون زعلانة من كونك ما اتسمعتى للناس وما أخدتى امر الغنا ده بى جدية ....
لكن الفرصة الجابت هنا دى طيبة وبداية ممتعة للاستماع لك ...لصوتك الممتد فى الفضاء كالحدائق المعطرة ...
وصوتك ما صوت وبس ...مدعوم بفكر وظرف ولطف وعزف جيتار واهتمام بمفهوم الفن والغنا كقضية وموقف انسانى ...
ما علينا الانشجعك ...ونرجع الكرسى لى ورا ونجيب تسالى .... يللا أدينا منك كتير .....
ولك التوفيق...والنجاح |
كدي باللول قولي لينا انتي وينك واخبارك شنو ولك الجمال وعلينا المحبه
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Tumadir)
|
Quote: الحبيبة الهام عبد الخالق ....
الحمدلله كل ما أتذكرك أكون زعلانة من كونك ما اتسمعتى للناس وما أخدتى امر الغنا ده بى جدية ....
لكن الفرصة الجابت هنا دى طيبة وبداية ممتعة للاستماع لك ...لصوتك الممتد فى الفضاء كالحدائق المعطرة ...
وصوتك ما صوت وبس ...مدعوم بفكر وظرف ولطف وعزف جيتار واهتمام بمفهوم الفن والغنا كقضية وموقف انسانى ...
ما علينا الانشجعك ...ونرجع الكرسى لى ورا ونجيب تسالى .... يللا أدينا منك كتير |
الرائعة المبدعة تماضر سعيدة بزيارتك الماهينة دي واعتذر لكي عن التاخير (انها عشم الروقة التي لن تاتي )...
كنت اعرف انك ستاتين حاملة معك فرح يعطر المساحة هنا ..اذكر حين التقينا في مسقط ببيت الحبيبة عاشة بت المبارك ..غنينا جميعا ثم غنيت انا وكانت بعض من (عشرة مقاطع للحياة) وبعدان انتهي الغناء ابتدرتي الكل بقولك (ياجماعة حرام عليكم البت دي لازم تعملوا ليها بروموشن وتودوها لي قدام )....كانت شهادة عزيزة علي قلبي وكانت معها كميات من الاسئلة..فالفن كالتزام يعني عمل منظم ومخطط يؤدي في النهاية ان يخرج من كونه انتاج خاص نتيجة لتفاعل الفرد مع محيطه وذاته الي عمل عام يمتلكه الكل او باالاصح يكتمل بان يضيف اليه كل فرد من وجدانه بعد خاص به ..والكلام هنا كتير وداير روقة تاني ..ز
المهم ياتماضر حين التقينا واعتقد دة كان في 2005 كنا قد التقينا قبلها في فينا وكنت قد غنيت هناك بمصاحبة رشا والوافر ..ثم بعد ذلك في اسبانيا حين دعتني الحبيبة اميمة شيخ الدين فغنيت مع (فرقة كمبلا) في غرناطة ... يعني ياطمطم المشروع ماشي ويتخذ في اشكال اكثر جدية ..
اما الحضور الاعلامي سواء داخل الوطن او خارجه فهي المسالة التي فعلا تحتاج لمجهود ناس كتار وليس فرد .علي العموم بداءت في الترتيب لذلك وارجو ان اوفق
الحبيبة تماضر عطرتي الساحة لكي كم من الود بحجم الوطن
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: mekki)
|
Quote: الطيب شيقوق مساحة بحجم كل هذا التواصل لكم مرورك الجميل اسعدني .. واتمني في القريب العاجل ان اقدم لكم هذا العمل ومجموعة اعمال اخري في النادي بمسقط فانتم اهلي اللذين ما توانو عن دعمي ودفعي لتقديم كل ماهو جديد ... |
في انتظارك ،اختى الهام مع بدايات الموسم الجديد، لتعطري سماءنا بادائك الفني المتميز
لك منى اطيب الاماني
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الطيب شيقوق)
|
الرشيد الصديق الوفي ... سيدة الالق والابداع ..الهام ....ها مرة اخرى اعاود الحضور ...كما قال الشاعر ك اذا حققت في خل ودادا ..فزرة ولا تخف منه ملالا وكن كالشمس تطلع كل يوم ولا تك في زيارته هلالا .. الهام ..الفكر والابداع ..سيدة الفن ....عتبى لكل الظروف والحظ الذي غيبك فترة من الزمن عن جمهورك ..رغم انك لم تبتعدي عن الغنا ولكن ربما كان هناك تقصير في الساحة السودانية هناك في السودان (بسبب البعد المكاني ) ولكنني هنا احمل بشارة لكل اهلي انك قادمة ومعك الخير ...والعافية ..في الغنى المتعافي ..كلمة وصوت ولحن ..لا نريد منك الا ان تتفرغي بعض من وقتك وبيتك ...ولنا عليك حق ان نتمتع بهذا الجمال ..بورك فيك الاتحرميني .. الهام الالق والجمال ...عفوا (الماسنجر ).. لكي وللرشيد محبتي
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: نعمات حمود)
|
سعداء بانضمامك لينا يا الرشيد وأكيد نحن موعودين بالكثير المثير.. التحية عبرك للفنانة المبدعة إلهام عبد الخالق سعدنا واستمتعنا بالحفل الذي اقامته قبل شهور بالشارقة ما زلت أتذكر أغانيها التي اختارتها بعناية فائقة في ذلك الحفل جيناك (في حضور شاعرها الاستاذ فضيلي جماع) جيناك نعبر ليل زي الطيور عايدين فاكرين تكوني الجنة بالحنو ليك راجعين وتكوني عش قمرية يحمي جنا الوزين.. ألحان الربيع، بت ملوك النيل، قطار الشوق وغيرها من الروائع.. وأنتهز هذه الفرصة لأشكرها وأشيد بذلك الحفل.. ومزيداً من الإبداع والتواصل.. وشكراً على الهدية..
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Nasruddin Al Basheer)
|
Quote: ما زلت أتذكر أغانيها التي اختارتها بعناية فائقة في ذلك الحفل جيناك (في حضور شاعرها الاستاذ فضيلي جماع) جيناك نعبر ليل زي الطيور عايدين فاكرين تكوني الجنة بالحنو ليك راجعين وتكوني عش قمرية يحمي جنا الوزين.. ألحان الربيع، بت ملوك النيل، قطار الشوق وغيرها من الروائع.. وأنتهز هذه الفرصة لأشكرها وأشيد بذلك الحفل.. ومزيداً من الإبداع والتواصل.. وشكراً على الهدية..
|
الاستاذ نصر الدين اشكرك اعمق الشكر واعتذر عن الرد المتاخر
كنتم في الشارقة جمهور محفز لكل ماهو جميل فرحت بكم كثيرا كذلك الاستاذ الجليل فضيلي جماع لذا كان الغناء في باحاتكم ذو طعم اخر ..تفاعلكم وذلك التقدير الذي وجدناه هو مادفعنا لتقديم اجمل مالدينا .... لك ولسوداني الشارقة واسركم اجل تقدير
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: نعمات حمود)
|
Quote: اذا حققت في خل ودادا ..فزرة ولا تخف منه ملالا وكن كالشمس تطلع كل يوم ولا تك في زيارته هلالا |
وانت هي يا نعمات شمس تعلن عن زيارتها التي نشتهي فتحضرين بهذا الفيض من الحب الجميل والدعم الذي لايتواني ..سعيدة انا بوجود نعمات هنا وسعيدة اكتر بان يتزامن وجودي وقلمي في معية هذا الزخم الجميل ...تعرفي ان طلتك تؤكد ان مساحة الحب الغير مشروط مساحة مؤكدة وما اجمل دعمك وتشجيعك اؤكد ان مساحة الالتقاء تتسع وان الق الابداع يتوهج حينما تتطلين .. فاحضري ماتسني لكي ذلك وامنحي هذا المكان بعض القك ....دمتي
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: mekki)
|
Quote: الصديقه القديمه الهام : الإتجاه نحو الغناء الخاص نشجعه....لكن كزول قديم أنصح بالإسراع بتقديم ما يوجد فى الوصله أعلاه فى أسرع (البوم)....عليك الله اسمعى ابلغ بيت شعر قالته (الأعراب): حبيب الروح لا أقوى على حَمل الهوى وحدى
|
صدقت ياصديقي ..هذا اجمل ماقيل في الغناء السوداني ....وصدقني مرة اخري انا اسمع هذه الاغنية يوميا بصوت الكاشف العظيم ..واحفظها تماما يامكي وكنت انوي ان تكون من اوائل الغناء المسموع التي سوف اغني ...
يبدو اننا ورغما عن اختلاف المدن بنا الا انا مازلنا نلتقي في الكثير ..تحياتي لك ولكل الاسرة
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: rosemen osman)
|
لا أذكر آخر مرة سمعت أغنية جديدة وأعجبتني هذه أستولت عليّ تماما... وحقيقة رائعة..
مجرد ملاحظة من أذن مستمعة وغير فنية (البته) ريحة وطن في أول مرتين لم أستطع أن أفرزها فصوت الموسيقى (في تقديري) ربما كان درجة أعلى من الصوت لكنني قرأتها في الكلمات المكتوبة... وفي المرة الثالثة سمعتها واضحة
اتمنى للأخت إلهام المزيد والمزيد من الإبداع وأنتظر أن أسمع الكثير من الأغنيات الرائعة قريبا اليوم... خلقتي مني معجبة...
شكرا لناقلي الفرح
معزتي غادة
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: غادة عبدالعزيز خالد)
|
Quote: لا أذكر آخر مرة سمعت أغنية جديدة وأعجبتني هذه أستولت عليّ تماما... وحقيقة رائعة..
مجرد ملاحظة من أذن مستمعة وغير فنية (البته) ريحة وطن في أول مرتين لم أستطع أن أفرزها فصوت الموسيقى (في تقديري) ربما كان درجة أعلى من الصوت لكنني قرأتها في الكلمات المكتوبة... وفي المرة الثالثة سمعتها واضحة
|
الغالية غادة عبد العزيز
شهادة اعتز بها واسعد بها تماما دمتي واشكرك علي هذا الدعم الغير محدود .
ياستي انا مع انه اذنك فنية ومرهفة.. فعلا في التسجيل الكلام في بعض الحتت غير واضح او قد تكون مخارج بعض الحروف غير واضحة في بعض الكلمات ...
ذكرت سابقا ان هذا التسجيل تسجيل اولي للعمل وانا بصدد اعادة تسجيل وادخال مزيد من الخطوط به ..يعني تقريبا العمل ماخوذ من بروفة ..اطمع ان اكمل هذا العمل وبعض الاعمال الاخري واخراجها في كاسيت ...
ياسلام ياغادة سعيدة ان تكوني من معجبيي واتشرف كثيرا بيك
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: khaleel)
|
ياخليل الجميل ..تعرف وانا بكتب في الردود والسلامات ...كلامك عن ذلك الحب الجميل صحي حاجات جميلة... تذكرت الجامعة ورحت اتخيل خليل دة ممكن يكون منو من ناسنا العزاز الذين التقيناهم في سنوات الجامعة الجميلة وقلت ارسل مسنجر تاني قت كدي لمن طه يجي اساله المهم ياخلي مانسيتك حاشا وماعبرت فيك .. كنت دايرة اعرفك بالضبط منو حبيت ادردش معاك ...لك العتبي يا خلي .
نحنا ذاتنا بنحبك مقدما
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Ilham Abdel khalig)
|
يا وردة طلت من شباك الدنيا اطلعى ونازلى الغنا انزلى فى الساحات واطربى الاذن البتسمع كل جميل منك غنا يا الهام يا عب خالق زمان طويل وجميل سرمد بيننا لكننا نتواصل اسال عنك واسائل عنك منذايام احمد تاور عليه الرحمة والضل الوريف فى المعهد فى قصر الشباب والاطفال نقرشات الصوت بتطلع وتدخل القلب تستريح وديرك اويا الفريد والجيتار ومسابقة فى العزف واحمد تاور ايام ان كنتى طالبة بعد فى جامعة الخرطوم سكرنا بتلك الاغنيات فى العصريات الفالته ايام كان للحياة طعم وكان للغناء بهرج لا ينتهى بانتهاء الاغنيات تحلقت بنا طائرات الفراق ورمتنا كل فى برزخ يبحث عن تمائمه ووجدتك اخيرا تقفين على اعتاب الغناء الذى ما فارقك ولن يا اجمل الصديقات ودا لكل لتلك الايام عبق رسمتينه سيظل فلك الغناء ولنا شرف ان نقعد فى ضراك نستمع
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: سلمى الشيخ سلامة)
|
Quote: يا وردة طلت من شباك الدنيا اطلعى ونازلى الغنا انزلى فى الساحات واطربى الاذن البتسمع كل جميل منك غنا يا الهام يا عب خالق زمان طويل وجميل سرمد بيننا لكننا نتواصل اسال عنك واسائل عنك منذايام احمد تاور عليه الرحمة والضل الوريف فى المعهد فى قصر الشباب والاطفال نقرشات الصوت بتطلع وتدخل القلب تستريح وديرك اويا الفريد والجيتار ومسابقة فى العزف واحمد تاور ايام ان كنتى طالبة بعد فى جامعة الخرطوم سكرنا بتلك الاغنيات فى العصريات الفالته ايام كان للحياة طعم وكان للغناء بهرج لا ينتهى بانتهاء الاغنيات تحلقت بنا طائرات الفراق ورمتنا كل فى برزخ يبحث عن تمائمه ووجدتك اخيرا تقفين على اعتاب الغناء الذى ما فارقك ولن يا اجمل الصديقات ودا لكل لتلك الايام عبق رسمتينه سيظل فلك الغناء ولنا شرف ان نقعد فى ضراك نستمع
|
ياسلمي الشيخ .. صديقة حبيبة تنتمي لزمن لم يكن البوار احدي مفرداته ...اظنك عرفتي اني هنا انتظر حضورك ..وكيف لا وذاكراتنا تشتبك .. وتلتقي حميمة موهطة يسكنها ثلة من الاصدقاء الصديقون ..وبعض درازن من الشعر وبحار من الغناء ...
احمد تاور عليه الرحمة افتقدته حين عدت للسودان ذات يوم ولم اجده ..رجعت للوراء بكيت كثيرا .لم يسعفني الوقت لاحزن فراح حكيم ويوسف فضل المولي واحمد المجذوب ,,,ووو ..ورحنا نحن مابين المدن ...
لكنا حين نراوح هنا بين مانكتب ونهرق من روح وبين التزامنا وانتمائنا لما نحب..واجدك منتمية لقلمك مفعمة بايمانك به ...واجدني ابحث عن اغنيتي التي لم اعلن يوما عن فقدها _اجدني قوية بما يكفي لاحرض نم الروح وجراريها ... سعيدة بان لقيتك هاهنا ولنمسك في ثياب بعضنا الي ان نلتقي .
لك الود كما كان دومأ
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Manar Mahsoub)
|
خلي السحاب في حالو.. وابقي الشعاع للدنيا.. غطي الظلام بالضو... تتحقق أجمل منية... خليكي زي يوم عيد... كل الخلوق دي تعيد.... وتردد أجمل غنية.... خلي السحاب لحالو
الاستاذه الهام عبد الخالق اها الكلام ده كان مع زولا شمس وهو بيهديهو ليكم كل الاماني الحلوه
منار محسوب وعبرك كل المحبه ليكم والله دايما طاريكم لكن بيتكم ده فترني ولا لقيتو مقفول ولا مقفول المهم قريب بصلكم عاطر الاماني
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Yasir Bastawi)
|
Quote: النقاء الثبات البساطة النضال واااااه ياوطن |
وااااه ياوطن ...ياسر يا بسطاوي الصديق العزيز ..ذلك النقاء ..البساطة ..النضال ..و .... هو مايجمعنا ...
التقينا قي زمن وزمان كل منا يحمل حلم ..وتلتقي احلامنا فنلتقي ونجاهد ان يخرج بعض منها ويفترش ارض الحياة ...
مسارب الضيء مشروعنا الاول ..والذي سرب لداخلنا الكثير من ضوئه ..
فحين افترقنا كنا نعلم انه وريثما ناخذ انفاسنا سنصنع حلمنا في الغناء ..
ربمانتعثر هنا او هناك لكنا نحب الغناء والوطن مااستطعنا اليهم سبيلا ...
ياصديق افتقدك وليك وحشة .... وعليك الله اسمع وقول لي ... ولو ممكن تسمعنا انت كمان بعض مايتيسر حيكون اجمل ...
ومليون سلام وود وسلام كمان من طه
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الرشيد محمد الخير)
|
يا بت عبد الخالق البديعة : (هل غادر الشعراء من متردم)... خطر لى ان ابدأ هكذا باعتبارى فى اللحظة دى اخر المتداخلين و ما عارف ماذا بامكانى ان اضيف لما قاله الاصدقاء الكتيرين الجميلين لكن بكل تاكيد بوسعى ان اعيد (كتابًٍة) ما قلته لك فى بيتكم العامر والذى كان حرفيا اننى اعتقد ان ام كلثوم السودانية ويا لسعد الصدف طلع اسمها صديقتنا وجارتنا وبت حارتنا الهام عبد الخالق ونحن طبعا ب نريدا... تحياتى وفى انتظار المزيد
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: Ilham Abdel khalig)
|
Quote: الاخت الهام ...... سلامات طبعا نحن ناس اضنينا ديل مابسمعو حاجة مابعرفوها يعني فنان الشباب بتاعنا وردي الي الان ..... اها سمعت وقدرت اتابع ودي يااختي شهادة كبيرة بالمناسبة لانك حركت حجر كبير مابفهم في غناء اليومين ديل . نجي للمهم لقد وعدنا الصديق طه بزيارة برفقتك طبعا والكلام ده طول يعني كان مفروض ظهورك الاول يكون في الدوحة ..... لظروف خاصة بطه واعتقد بيك انتي كمان تاجلت الزيارة لاجل .... اها الاجل ده بقي غير مسمي واحسن ترجعي لطه وتسموه لينا..... تحياتي لطه ومرتضي وسامية |
الصديق بهاء بكري اولا شكر وافر علي الجية وشكر كتير علي توسمك الخير وخوض تجربة السماع الجديدة وياخي انا قايلاك قدامي حتي في سمعك المموسق .علي العموم سعيدة انو الاغنية وجدت طريقها لداخلك ودة كلام يطمن خصوصا انو الصمود بجانب وردي او وراه امر صعب بالحيل ....
بخصوص الجية للدوحة دة مشروع قائم واول خطوة جوة في الجوار هنا حتكون ليكم وهسي بنضبح خروف ونسمي الاجل المامسمي .. اتوقع جمال وحضور وريف وفاهم
لك كل الود
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الرشيد محمد الخير)
|
العزيز الرشيد .. اولا شكر كتير وماليه حد ...
تانيا وصدقني لي شرف انه انت اول من قدمني اسفيريا .... لمعرفتي بروحك الجميلة وانتمائك التام لما تفعل واصالتك التي هي اول مايلمس كل من يلتقي بك ... لم اكن املك اواخطط لكيف ساقدم بعض اعمالي في هذه المساحة .. ولكني كنت اكيدة انها مساحة جديرة بالحضور فيها وانها تضم بين صفحاتها وفي عضويتها حضور ماساهل من ابناء وبنات الوطن .... فجعلت هذا ممكنا بل اضفت اليه الق من القك ...
فلك الشكر كله والود اكمله
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الرشيد محمد الخير)
|
الاخت الهام ...... سلامات طبعا نحن ناس اضنينا ديل مابسمعو حاجة مابعرفوها يعني فنان الشباب بتاعنا وردي الي الان ..... اها سمعت وقدرت اتابع ودي يااختي شهادة كبيرة بالمناسبة لانك حركت حجر كبير مابفهم في غناء اليومين ديل . نجي للمهم لقد وعدنا الصديق طه بزيارة برفقتك طبعا والكلام ده طول يعني كان مفروض ظهورك الاول يكون في الدوحة ..... لظروف خاصة بطه واعتقد بيك انتي كمان تاجلت الزيارة لاجل .... اها الاجل ده بقي غير مسمي واحسن ترجعي لطه وتسموه لينا..... تحياتي لطه ومرتضي وسامية
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: بهاء بكري)
|
الهام ...... والرشيد ...دي عيديه والله رمضان كريم ... وانا شوقي مهما اذداد برضو شايفو قليل وانا حبي مهما زاد برضو شايفو قليل يا الهام انعمي وانغمي على قلوبنا واسماعنا الخربة بما وهبك الله من نعم ...وكلو في ميزان حسناتك الدنيا رمضان ... شكرا الهام تمنيت ان يثبت هذا البوست هناك (فوووق) شكرا الوفي دايما الرشيد ...هكذا انت كريييم حد الثمالة شكرا على النغم انغم الله عليك محبتي
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: سيف بخيت موسي)
|
اخي الرائع الرشيد الاخت الهام
Quote: مرة اخرى الرائعة إلهام عبدالخالق بصوتها الدافئ تحاور هذا الجيتار المتميز |
الله يخليك يا الهام على هذا الابداع والله يا الرشيد انا اول مرة اسمع دمعة الشوق من المبدعة الهام واكتشفت انو ناس مسقط اصلا ما محتاجين لاستيراد اى صوت من الخارج الا لزوم الفنكهة ساى والدلع ساى.
الاخت الهام فنانة مبدعة بحق وحقيقة وزى ما قال ليك اخونا سيف (عايز تكتكل ليك زوى في رمضان ده ولا شنو ؟)
تاني يا الهام اختى يانا الباقين ليك في رقبتك ومتلحنك عديل .
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: الطيب شيقوق)
|
استاذنا شيقوق الكلام دة ماترجع منو ..لانو مرات بتجي الحالات بتاعت (مغني الحي لايطرب ) انا شخصيا بكون سعيدة باستيراد اصوات من الخارج خصوصا النسائية منها ..لكن مايطلع مقلب زي بتاع يومتها .
Quote: تاني يا الهام اختى يانا الباقين ليك في رقبتك ومتلحنك عديل |
ما في مانع دة اذا سمحت لينا باجراء اختبار صوت ليك عشان نشوف اهليتك لكورال عيد الاستقلال الجاي ولاشنو.
| |
|
|
|
|
|
|
Re: المبدعة إلهام عبدالخالق ( تحلق بنا في فضاءات جديدة ....الف مبروك) . (Re: khaleel)
|
جيناكم يا حبايبنا .. بصراحة واحتكم لطيفه ووريفة تجبر العابر انه يجيكم صادى مرات ومرات الشكر اجزلة لك اخى الرشيد لفردك هذة المساحة الرائعه من الجمال ولى الهام كل الامنيات القلبية الصادقة بمزيد من الابداع والتوفيق ان شاء الله معجبيــــــــــــــن نحن حد الدهشة .. وفى غاية الطرب والله التحية للجميع وكل عام وانتم جميعا بالف خير رمضان كريم عليكم تحياتى اسماء الجنيد / مسقط
| |
|
|
|
|
|
|
|