|
|
 الايحاء في ( عصر ) العولمة
|
سال احدهم الشيخ محمد حسن الامدرماني ، كيف يمكنهك الكتابة مع هذا الايقاع العصري الحديث .
تنحنح الشيخ في جلسته وقال:
اسمع هنا ، الإيحاء ده مر بمراحل متعددة، على سبيل المثال لا الحصر زمن ناس قيس وليلي ، وامرؤ القيس
الزمن داك البلد خلا والإيحاء يجيك تووووووووووووووش داخل والهم واحد
خمر وناقة ومرأة فما في أي اشكال ، والكلمات سهلة والمفردات في متناول اليد زي كدة :
احبها وتحبني ويحب ناقتها بعيري
اما الاباحي زي ده :
فقبلتها تسع وتسعون قبلة
وواحدة أخرى وكنت على عجل. ( ابوها جا) ( ما يجيني واحد مؤتمر وطني يقول لي ابوجا مالها)
أما ناسنا ناس
وبقينا في ونسة وضحك لا من قسمنا الليل
وقسمة الليل دي تلقاها يا دوبك الساعة بقت حداشر ، وحداشر اليومين ديل تكون يا دوب استعديت عشان تقعد تنتظر أخبار الساعة واحدة بتاعة قناة الجزيرة فالايحاء بقى صعب جدا
والمعوقات كثيرة منها:
فضائيا : السما مليان تكنولوجيا يعني الايحاء عشان ينزل يتضاير جنس مضايرة شي اقمار صناعية للتلفزيونات والقنوات الفضائية ، وشي اقمار تجسس
وشي اقمار لي حاجات نحن ما عارفينها ، واذا الايحاء قدر يتخارج من الاقمار الصناعية وما شابهها ودخل في المجال الارضي يا ويله، شي صوريخ ارض جو ، شي طائرات اشكال والوان منها الشبح ومنها غيره ، طائرات شحن، طائرات عمودية ( يا حليل عمود الغدا)، طائرات خاصة ( عقبالك يا محمد يا ود حسن)
ينزل شوية عمارا ت، ناطحات سحاب ( لمن هو ذاته الايحاء بقى يغني : نطلأ كايرو أمارات فوق – مثلما نطقتها المغنية الامهرية) ينزل الإيحاء شوية يلقى عربات اشكال والوان زي ما تدور يعني لو قدر الايحاء يوصلك سالم، قبال ما يخليك تكتب يقول ليك عليك الله كدي اديني موية ابل ريقي.
طبعا لو نزل ليك وانت في السودان بكون خايف وقلبه مقطوع من الرسوم الكتيرة والضرايب . يعني مثلا اتخيل انه ايحاء زايغ في الطريق السريع تقابله نقطة تفتيش يتم بينهم الحوار التالي
اسمع يا اخينا انت ماشي وين
انا ايحاء كتابة ماشي للشيخ محمد حسن
طيب دفعت الرسوم
رسوم شنو
رسوم العبور
لكن انا معفي
الاعفاء عندنا الا تجنيد اجباري وبرضو بقروش
طيب اعمل شنو
يا تدفع يا نحبسك
انا ما بتحبس
ليه ما بتتحبس
انت شكلك ما حتفهمني المطلوب شنو
تدفع او تملُص
يازول أملُص كيف ما عيب عليك ويتذكر قصة ( أركب العربي )
ما تملص هدومك يا غشيم تملص جيبك
ما عندي جيب زاتو
يعني ماشي ميطي
اها بي قدرة قادر يقنع بتاع المليص ويتخارج منو. يصل قدام يقولوا ليه ضريبة ، يتخارج من الضريبة يقولو ا ليه زكاة ، يقول ليهم يا جماعة انا ما تميت حول ، يقولوا ليه حنتمه ليك نحن .
المهم يصلك الايحاء في حالة يرثي لها وأول بيت شعر يديك ليه :
( كلااااااااااااااااااااام يا عوض دكااااام)
ده لو الإيحاء لقاك فاضي
لكن في الغالب بتكون عندك مليون مشكلة ادناها
مثلا تكون اجتهدت جدا انك تنوم العيال بدري عشان تدخل الغابة أو الخرابة كما يحلو للسيد وزير الري أن يسميها ، فإذا جاك الإيحاء في مثل هذه الحالة، بصراحة ، يكون إيحاء ما عنده دم.
وفي الظروف العادية بجيك وانت سايق العربية او قاعد في المكتب بين الاذان والصلاة (لانو ده الوقت الوحيد البتكون فاضي)
فبجيك بمفردات العصر:
حبيبي مسمس لي (Missed call)و انا اضرب ليك
أو
انت رسل لي ايميلاتي (E mail)
والصور العندي شيلها
وفي حالة العتاب
رسلت ليك اجمل مسج من نوكيا ردك ما وصل
زعلانة ولا رصيدك كمل؟
ونفتح الباب للنقاش
|
|
 
|
|
|
|
|
| العنوان |
الكاتب |
Date |
| الايحاء في ( عصر ) العولمة | د.محمد حسن | 06-11-08, 12:21 PM |
| Re: الايحاء في ( عصر ) العولمة | ابو جهينة | 06-11-08, 09:28 PM |
| Re: الايحاء في ( عصر ) العولمة | د.محمد حسن | 06-12-08, 08:00 AM |
| Re: الايحاء في ( عصر ) العولمة | مجدي عبدالرحيم فضل | 06-12-08, 08:25 AM |
| Re: الايحاء في ( عصر ) العولمة | د.محمد حسن | 06-13-08, 03:05 PM |
| Re: الايحاء في ( عصر ) العولمة | ismeil abbas | 06-13-08, 05:57 PM |
| Re: الايحاء في ( عصر ) العولمة | د.محمد حسن | 06-15-08, 10:17 AM |
 Re: الايحاء في ( عصر ) العولمة | عواطف ادريس اسماعيل | 06-15-08, 11:58 AM |
| Re: الايحاء في ( عصر ) العولمة | ابو جهينة | 06-15-08, 12:46 PM |
| Re: الايحاء في ( عصر ) العولمة | د.محمد حسن | 06-15-08, 02:43 PM |
| Re: الايحاء في ( عصر ) العولمة | ابوبكر يوسف إبراهيم | 06-16-08, 10:13 AM |
 Re: الايحاء في ( عصر ) العولمة | عواطف ادريس اسماعيل | 06-16-08, 12:49 PM |
| Re: الايحاء في ( عصر ) العولمة | ismeil abbas | 06-16-08, 01:02 PM |
| Re: الايحاء في ( عصر ) العولمة | هاشم أحمد خلف الله | 06-16-08, 01:49 PM |
| Re: الايحاء في ( عصر ) العولمة | د.محمد حسن | 06-18-08, 03:45 PM |
|
| |
د.محمد حسن
فيس بوك
تويتر
انستقرام
يوتيوب
بنتيريست