|
لعناية عصام جبر الله وسيف بشير: عشرة مقلون وعشرة اتمنى وجودهم هنا
|
جمعنا هذا المكان بأصدقاء قدامى واخوان وزملاء اعزاء قضينا معهم اجمل ايام حياتنا الجامعية بكل صخبها الحافل وضجيجها المجنون وافرحها واحزانها، ولكم رسمت تلك الفترة اروع لوحاتها على جدار قلوبنا ونقشته بطعم الزكريات الأنيق .. كنت امني نفسي بتواصل كثيف يعيد لنا ولو رقراق من ذلك الزمن الحافل الجميل بوجود بعض ممن شهدوا معنا تفاصيله العبقة في هذا المنبر، ولكن لا ادري سبب إقلالهم في الكتابة وفي بعض الحالات الإمتناع عن الكتابة رغم علمي ويقيني بأن ايا منهم قادر علي كتابة منبر بحاله وليس بوست فقط .. العشرة اعضاء المنبر المقلون في الكتابة هم:
1 ـ ادريس تبيدي 2 ـ الداف 3 ـ صلاح تمساح 4 ـ ابوبكر عثمان 5 ـ امير فاروق (امير الضب) 6 ـ خنساء الكارب 7 ـ عثمان حامد 8 ـ ابراهيم الحاج (ابراهيم السمين) لكن هسه بقى ضعيف 9 ـ صلاح الزين 10 ـ البروف
والعشرة الذين اتمنى إنضمامهم للمنبر كان بكري هون هم:
1 ـ إبراهيم فتح الرحمن 2 ـ مجتبى محسي 3 ـ مصطفى النقيب 4 ـ اسحاق النوش 5 ـ هاشم عثمان 7 ـ محي الدين الجلاد 8 ـ عبد اللطيف عثمان 9 ـ قرشي ادريس 10 ـ محمد ابراهيم حميدة (ابو النوم)
يلا يا عصام وسيف تعالوا نستفز الجماعة ديل عشان يبطلوا الكسل ويكتبو شوية و العشرة التحت ديل عايزين نوصلهم 100 وبكري كان ما اداهم كلمات مرور موقعو ده بنهكرو ليهو .. ويا العشرة الفوق باصويرداتكم دي ان شاء الله يدفنوها معاكم ..
|
|
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Inaam Saad)
|
الصديقة انعام سلامات
Quote: أبو البنيات سيف بشير مختفي ليهو فترة |
أبو البنيات سيف بشير ده قبل شوية شايفو بهناك شايل الفاتحة مع عثمان حامد في ابوه الله يرحمو
Quote: وعصام جبرالله ما فاضي من مناقرة أبوساندرا |
عصام جبر الله ده انا عاذرو، بكون قرأ البوست لكن بكون مفتكرني قاصد عصام جبر الله تاني .. مسكين لي هسه في جهجهتو ديك .. ودفع الله خطاب ده قبيل كان بتحاوم هنا ولما شاغلتو قام جاري .. وديل حا نضيفهم للعشرة التحت لهم التحية اينما كانوا
Quote: ناهد جبرالله معاذ عبدالرحيم هشام سليمان إلهام عثمان غادة كدودة محجوب البرلوم عبدالرحمن السمين بدرالدين أحمد موسى |
بالإضافة لغسان جعفر كده يبقى العدد 19
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Salah Abdulla)
|
اخي الفنان صلاح سلامات
Quote: الصاوي ... صاحبي
أتأمرون الناس بالبر وتنسون أنفسكم ؟؟؟ انت مفروض تضيف اسمك ضمن العشرة الاوائك قلمك رشيق فما تحرم الناس منو. |
يازول ياجميل ده من ذوقك بس، انتو يا اولاد عبد الله رشاقة الحرف والإبداع تفوتكم تمشي وين .. يا اخوي نحن ناس حريش ساي والمحرش ما بكاتل، بس عايزين نحرش الشباب الحلوين ديل عشان يكسروا حاجز الصمت ويسنوا اقلامهم شوية .. شكرا ليك كثير يا غالي
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
يا ساوي زصاحبك أبوشنب الفوق ده برضو من المقلين العظام خاصة في الآونة الأخيرة
يا إنعام انا فضيت منو
وأضيفوا للمقلين الغياب __________________________ 1- منوت 2- ودقاسم 3-عثمان تراث { بيظهر الفينة تلو الأخرى } 4- علاء سنهوري 5- سلمى 6- معاوية الزبير الطيب 7- ماهيتاب بركات 8- دريمز 9 ايهاب علي 10- اسامة معاوية الطيب
وللمأمول حضورهم وقبولهم : --------------------------- 1- دكتور صلاح أحمد إدريس 2- حيدر محمد الحسن 3- معاوية محمد الحسن 4- بشرى المكي 5- عواطف حسين { نجدي } 6- عوض نوبة
بس خلاص
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: أبو ساندرا)
|
ابو ساندرا صاحب احلى بنات شخصيا في دارنا؟ ياخي ده شرف كبير لينا والله
Quote: يا ساوي زصاحبك أبوشنب الفوق ده برضو من المقلين العظام خاصة في الآونة الأخيرة |
اول حاجة انا اسمي الصاااااااااوي ما الساوي وبعدين صاحبي ابو شنب بي سببو، سمعت انه من يوم ما مرتو ولدت لم يغمض له جفن، واظن ان هذا سيكون حاله حتى تبلغ مولودته سن الثالثة .. اها بالنسبة للمأمول حضورهم وقبولهم ديل
Quote: 1- دكتور صلاح أحمد إدريس 2- حيدر محمد الحسن 3- معاوية محمد الحسن 4- بشرى المكي 5- عواطف حسين { نجدي } 6- عوض نوبة |
لا يكفي التمني، بل يجب الضغط عليهم لتقديم طلبات التحاق وعلينا تثنية طلباتهم وضغط بكري حتى ينز الزيت من رأسه ـ انا ما جبت سيرة اي صلعة هنا ـ لينالوا عضوية المنبر .. بالنسبة للمقلين
Quote: 1- منوت 2- ودقاسم 3-عثمان تراث { بيظهر الفينة تلو الأخرى } 4- علاء سنهوري 5- سلمى 6- معاوية الزبير الطيب 7- ماهيتاب بركات 8- دريمز 9 ايهاب علي 10- اسامة معاوية الطيب |
انا معاك يجب ان نوجه لهم النداء، وارجو الا ننسى إضافة عطبراوي و عثمان محمد صالح فقد طال غيابهما ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
تعرف يا ابو الجيو بوستك ده شفتو من اول يوم ... و زغت منو
ياخى انحنا نحاول نتخارج من قصة الحنين للاصحاب والصاحبات دى انتا تجى ترميها لينا بردلبببب عديل كده؟
شفت الناس اللايصة في الانترنت دى معظمها رايحين ليهم اصحاب
الكاتلاهو الوحده ... يتذكر الاصحاب المفلس ... يتذكر الاصحاب
البردان... يتذكر الاصحاب
العيان... يتذكر الاصحاب
المنكرش... يتذكر الاصحاب
المات ليهو زول... يتذكر الاصحاب وال........ يتذكر الاصحاب
عارفك رايحة ليك ونسة دقاقة ... نفسك تطلع المرتبة في سطوح الداخلية (او سطوح ناس مجتبى) و تقعد نق نق نق نق .. و الخندريس يدور .... و لما المزاج يظبط تمسك العود و تقعد تغنى: اديتك القلب المعذب قلت لى المو بتذيلو يبقا في وارف رموشك فرحتو و لحظات مقيلو تبقا نورو تبقا فجرو تمنع الدمعات يسيلو اسه كان داير تسيبو حتى باقي العمر شيلو
اسمع.... نوع بوستات النوستالجيا دى اختاها ... بتعوق ليك زول و لا عوقت روحك ....
جيييو
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: محمد مكى محمد)
|
العزيز الصاوي تحياتي لك و للمتداخلين سوف أحاول المساعدة في حدود مقدرتي في جرجرة البعض للكتابة لكن بيني وبينك كلام عصام جبر الله ده بخوف و انا كان ما لعنت الشيطان كان هربت حكاية انو الداف عندو عشرة مداخلات و كان بكتب المتاريس لوحدة ذكرتني قصة طريفة عندما ذهب طلاب كلية الهندسة للتدريب في مدينة عطبرة لم ينقطع عمل الجبهة الديمقراطية و كانت المتاريس لسان حال الجبهة الديمقراطية بكلية الهندسة كشمس يتلالا شعاعها وسط مجمع سكن طلاب الكلية في مدينة عطبرة كان ان حضرت غنماية و بدأت تاكل في صحيفة المتاريس فطاردها الدف صائحاً هش...هش....هش... وظل مرابطاً امام المتاريس حماية لصحيفة الجبهة الديقراطية قائلاً يعني يا كيزان يا غنم ووعد الداف طلاب الكلية بأنه اذا تطاولت هذه الغنماية مرة اخري علي منابر الجبهة الديمقراطية ليسلقنها (من سليقة) أو ليذبحنها و يجعلنها و ليمة لجميع الطلبة. التحية للداف و هو يدافع عن المنابر الحرة الديمقراطية و لن أنساه و هو يطارد الكيزان من دار اساتذة جامعة الخرطوم و هو ينزف بعد أن اصابته يدهم الغادرة
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Hamid Elsawi)
|
Quote: سوف أحاول المساعدة في حدود مقدرتي في جرجرة البعض للكتابة لكن بيني وبينك كلام عصام جبر الله ده بخوف و انا كان ما لعنت الشيطان كان هربت |
عزيزي حامد تحياتي لك واسعدني وجودك اول حاجة انت ذاتك من المقلين ولازم تنكرب شوية، وكويس انت حا تساعد في عملية الجرجرة، وبعدين عصام جبر الله ده مطرطش ساي مسكين لي هسه في جنو وغباهو ما يخوفك كلامو .. اضحكتني كثيرا بي قصة الداف لما سكا الغنماية، وتذكرت قصتو لما سكاهو القطر وكان بلصق في ورق الدعاية بتاعة فاطمة احمد ابراهيم في الكبري .. انتا الداف حكايتو شنو؟ يوم ساكي ويوم مسكوك، والغريبة البسكهم والبسكوهو ما بني آدمين .. برضو تذكرت قصتك لما سكيت الكديسة بالليل في كازينو النيل الأزرق لما كنا بنجهز لليوم المفتوح العملتو الجبهة الديمقراطية بالجامعة .. انتو قصتكم شنو يا شباب الهندسة مع سك الحيوانات الأليفة دي؟ خليك قريب وجودك مهم في عملية الجرجرة ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
الصاوى انا من المعجبين جدا بباصات ود جبرالله البينيه
بختها ليك مع القون ،هسه امانة الله ما ختانا معاكم فى السطوح
اما السياسيه ديك فيها حكمه وفلسفه لا تجدها إلا عند 2 احدهم إنتقل للرفيق الاعلى له الرحمه
والمغفره (الراحل كمال دقدق) والثانى ود حبرالله ربنا يديم ليهو الصحه والعافيه ويمتعو بايامو
ويزيدنا من حكمو .
إنت ذاتك زول ما هين يا صاوى والواحد بحب كتابتك جدا.
تمنياتى لك بالتوفيق عامة وفى هذا البوست (الجذاب ) خاصة .
وقالوا قديما صاحب صاحبك ...شنو كده ما تتلبط !!!
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Atif Makkawi)
|
شكرا ليكم يا شباب يا حلوين وراجع ليكم واحد واحد لكن كدي خلوني ارد على عصام جبر الله ده اول شي لأنه احد المعنيين بهذا البوست ..
Quote: تعرف يا ابو الجيو بوستك ده شفتو من اول يوم ... و زغت منو
|
عارفك شفتو وصاحبك ابو البنيات ذاتو شافو
Quote: عارفك رايحة ليك ونسة دقاقة ... نفسك تطلع المرتبة في سطوح الداخلية (او سطوح ناس مجتبى) و تقعد نق نق نق نق .. و الخندريس يدور .... و لما المزاج يظبط تمسك العود و تقعد تغنى:
|
يازميل خندريس شنو؟ نحن ننادي في الداف ومصطفى النقيب تقول لي خندريس؟ بيني وبينك بعد ده إلا يشكونا لي الله ..
Quote: اسمع.... نوع بوستات النوستالجيا دى اختاها ... بتعوق ليك زول و لا عوقت روحك |
تعرف يا عصام انا مافي حاجة بتعوقني غير الكلام السمح ده
Quote: اديتك القلب المعذب قلت لى المو بتذيلو يبقا في وارف رموشك فرحتو و لحظات مقيلو تبقا نورو تبقا فجرو تمنع الدمعات يسيلو اسه كان داير تسيبو حتى باقي العمر شيلو |
حكى لي مصطفى سيد احمد رحمه الله انه عندما تقدم للإذاعة والتلفزيون لإجازة صوتة تم رفض طلبه في المرة الأولى، وطلب منه ان بعد المعاينة والإستماع له بواسطة لجنة إجازة الأصوات ان يتقدم بطلب جديد ويحضر للمعاينة مرة اخرى بعد اسبوع، ولتعجيزة طلبوا منه ان يأتي بأغنيتين جديدتين الأسبوع القادم .. قال لي مصطفى انه ليلتها لم ينم وظل يتقلب على فراشة وكانت نسائم الليل تأتيه بأصوات مغنين في حفلات اعراس في الأحياء المجاورة ليس لهم ادنى علاقة بفن الغناء فأحس بمرارة الظلم وهو ممتلئ بالغناء حد الطوفان، فغادر فراشة وامسك بالعود وعندما اعلن الآذان عن موعد صلاة الصبح كان مصطفى اعلن عن ولادة اغنيتي "واقف براك" و"المزار" .. الطريف في الأمر ان مصطفى عندما ذهب لإجازة صوته بعد اسبوع سأله احد مقرري لجنة إجازة الأصوات بقوله "جبت معاك غنيتين جديدتين؟" اجابه مصطفى قائلا "ابدا ما جبت غنيتين" فرد المقرر بشئ من الحدة "نحن قلنا ليك تجي بعد اسبوع ومعاك غنيتين" فرد مصطفى "انتو طلبتوا مني غنيتين لكن انا ما جبت غنيتين انا جبت ليكم عشرين اغنية"، فألقمهم حجرا .. ربما وضحت لك هذه القصة موضوع البوست .. ياخ البورد ده بنقرأ فيهو حاجات تجيب للزول قوب في قلبو، والواحد عايز يستفز الشباب ديل عشان يخلوا الكسل ويكتبوا شوية ـ ليس عن الزكريات الرايحة ولا عن الأيام الجميلة ولكن لمدادهم الذي نعرف طعمه وجماله ـ علهم يزينوا هذا المكان بألقهم وطيب كلماتهم .. هسه عليك الله نوع صلاح تمساح الدخل القش وما قال كش ده يسوو ليهو شنو؟؟
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Atif Makkawi)
|
Quote: يا أخوانا صاحبي وود حلتي الكنت بنزل معاه في البركس ما مذكور مع الذين تتمنون وجودهم ليه......وهو : عبدالحي عبد الساوى......علوم (جيلوجيا) وكمان أولا عمي (أولاد ابراهيم أبوعاقلة) محمد...وليد...عصام. |
مرحب بيك يا عاطف مكاوي وشكرا لإضافة اسماء جديدة بالنسبة لصاحبك عبدالحي عبد الساوى والله انا ما بعرفه لكن طالما هو من جلوجيا اكيد ما حا يحتاج لواسطة مننا وبكري حايفتح ليهو الثلاثة ضلفات بتاعة باب المنبر لانه اكيد بكون زاملو في العلوم .. اما فيما يخص ابوعاقلة اخوان فتمت اضافتهم للقائمة الثانية واتمنى ان يشرفوننا قريبا بتواجدهم بيننا، بالمناسبة اين انتهى بهم المقام؟ وياريت توصل ليهم تحياتي اينما كانوا ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
عزيزي الصاوي. انت لسع متذكر حكاية الكديسة, أسمح لي أن احكيها للشباب في البوست, عشان قصة حامد سكه الكديسة في كازينو النيل الأزرق ح تتفهم غلط خاصة من عصام جبر الله الذي لوح بذلك. القصة و ما فيها أعزائي كنا بنستعد لليوم المفتوح بتاع الجبهة الديمقراطية و مساهرين في الكازينو مساء الخميس لزوم التجهيزات ليوم الغد. كانت هناك مواد تموينية للبيع بسعر التكلفة من ضمنها دجاج مجمد و كنت مسئول عن المواد التموينية, بيني و بينكم الزملاء كانوا جعانين و نفسهم في الدجاج لكن عزت نفسهم أبت عليهم أن يتطاولوا علي الدجاج و اكتفوا ب سف الطحنية لزوم الطاقة. عموماً حضرت قطة (ما عاوز أقول كديسة عشان عصام ما يفهمني غلط) و سرقت دجاجة و فرت تجاه النيل الأزرق و بعد مطاردة بسيطة استطعت أن احضرت الفرخة (( كلمة فرخة دي أخير منها كديسة)) و الله أنا بكتب و خايف من عصام جبر الله قال أحد الزملاء الدجاجة دي لو ختيتها مع باقي الدجاج ح تكون خالفت قوانين الجودة رد عليه اخر الأمانة الثورية تستوجب أن نبعدها من الدجاج المعروض للبيع رد ثالث أنا ضد أي قروش حرام تدخل ميزانية الجبهة الديمقراطية في النهاية قرر الزملاء طبخ الدجاحة للعشاء ... و اقترحوا أن اطبخها لهم بحكم دراستي بمصر و معرفتي ب شئون الحلل. ذهبنا أنا و العزيز وليد أبوعاقلة لكي نبحث عن دكان لشراء أشياء يمكن أن تساعد في تسبيك الحلة و ايضاً لشراء عيش لان عدد الزملاء كبير. عموماً فشلنا أنا و أبوعاقلة في الحصول علي أي شيء و تهنا في شوارع مدينة بحري. اقترحت لوليد أن نطرق أحد البيوت و نطلب الأشياء العاوزينها... وليد قال لي أنت مجنون قلت في سري لو وليد بقول علي مجنون ناس البيت ح يقولوا علي شنو... طردت الفكرة من رأسي مباشرة و احساس الخيبة يكاد يمزقني. و في تلك اللحظة شاهدت مجموعة من الشباب امام أحد البيوت قاعدين في كراسي و اخر ونسة ... و بما انني كنت طول اليوم في حالة بروفات مسرح لفقرة المسرح في اليوم المفتوح خطرت لي فكرة قررت أن انفذها دون تردد ذهبت للشباب سلام عليكم //// وعليكم السلام يا شباب ممكن أطلب منكم خدمة ///// جداً اتفظل يا ابو الشباب ممكن تدوني شوية بصل + يهارات و شوية ملح و لو في صلصة يكون تمام رد أحدهم نعم نعم نعم حاولت ابحلق فيهم بعيون مفتوحة لأقراء باحساس مسرحي ردة فعلهم و شاهدت وليد أبوعاقلة ينتظرني في اخر الشارع من ضمن ذلك كان الطلب مفاجيء بالنسبة لهم خاصة و انه من شخص لا تبدو علية اي علامة من علامات الجنون و لا اختلال العقل. عموماً قبل ان يزول زهولهم المفاجيء عاجلتهم بالقول بانني لست مجنون كما قد يكون تخيل لكم و لكنني طالب بجامعة الخرطوم حكمت علي الدنيا بأن اقضي هذه الليلة في مدينتكم العامرة و دعوتهم لليوم المفتوح الذي تقيمه الجبهة الديمقراطية غداً بكازينو النيل الازرق و ان به مواد تموينية بأسعار التكلفة و دار بيني و بينهم حوار لطيف و النتيجة كانت صلصة + بهارات مما جميعه بصل توم و الاكثر اقترحوا يرسلوا لينا عشاء جاهز و لكنني شكرتهم و بالطبع لم أذكر لهم حكاية الجاجة التي انتزعناها من مخالب القط ...حاشية.. ((با لله نحن كنا مقطعين لهذة الدرجة)) (( لا و ألف لأ كنا طلبة أي واحد مننا كان يتمني أن يكون القرشي و علي استعداد متي ما حانت الفرصة)) عموماً كانت عشوة جميلة و طلعت حلة مسبكة بدجاجتين مش واحدة و أكثر ما أسعدني هو حضور الشباب و بعض أفراد اسرهم و استمتاعهم بفقرات اليوم المفتوح في اليوم التالي و بعد الفقرة المسرحية بالتحديد قال لي أحد شباب بحري ما تقول لي انت بتاع مسرح أنا قلت انت مجنون ... قلت ليه أنا ما بتاع مسرح... أنا طالب هندسة و اتمني أن اكون بتاع مسرح ... و حقيقة حتي الان أتمني أن اكون و حتي لا أسرح أتمني للبوست أن يمرح و أن يكون بكري يمزح و أن يتنسي البوست من ال مسح و لسان عصام جبر الله يكبح (( بضم ال ياء و سكون الكاف و فتح ال باء)) و الجميع يسعد
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Hamid Elsawi)
|
شكرا يا حامد على تسطيرك لبعض الزكريات الجميلة واعاد لي سردك الجميل تفاصيل لأحداث كدت ان انساها، وايضا تذكرت الزيارة المفاجئة لصديق الجبهة الديمقراطية ابوبكر الشوية للكازينو في تلك الامسية الخميسية ومعه ذاد الخميس المعتاد، بعد ان بحث عن الزملاء من شلتة وعلم انهم يحضرون لليوم المفتوح في الكازينو وخميسهم بيض، وبعد إنكراشات شديدة انضم له البعض بينما واصل الآخرين نصب الخيام والتجهيز لليوم، تذكرت ايضا صديقنا فتحي ود الآداب ـ لا اعلم اين قذف به الزمان ـ وكان من اوائل المنضمين لأبوبكر الشوية وبرر لفعلته بأنه خارج المجال بقولته الشهيرة "يا زملاء الحد البحر" .. واتذكر اننا اخذنا بنصيحة الزميل احمد المجذوب طيب الله ثراه الذي اشار لنا بلكنته المحببة "يا زملاء ترابيز البيع الت السلع الإستهلاكية دي وقفوا فيها الزميلات لانه جنس ناس مانديلا ديل اكان وقفتوهم ما بنبيع الحبة" وبالفعل تمكن الزميلات بقيادة نجوى ابراهيم و خنساء الكارب وناهد جبر الله من بيع كل السلع الإستهلاكية وكان يوما ناجحا استفادت منه الجبهة الديمقراطية في الجامعة كثيرا وكان لسان حال نساء بحري وربات بيوتها يلهج لنا بالدعاء .. خليك قريب يا ابو حميد ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Omar Bob)
|
Quote: سلامات يا الصاوي انت يا اللخو ما تقول بالمختصر كده انا عايز اعمل الجبهه الديقراطيه - فتره الثمانينات بجامعه الخرطوم -فرع سودانيزاونلاين |
قرقرقرقر ابدا والله يا عمر بوب القصة ما كده، لكن غايظيني ناس الداف وصلاح تمساح وعثمان حامد وعفيفي ودفع الله ومن لف لفهم من العندهم باسويردات هنا وكل واحد فيهم لابد ليهو في جحر وسايبين زي نوع سيف مساعد وصلاح غريبة ديل يتفسحوا فينا ويفقعوا مرارتنا، والغريبة كلهم بتاوقوا ومرة مرة تلقاهم محكرين في قائمة الحضور وبعد شوية تلقى الواحد قام جاري .. القصة ما جبهة ديمقراطية ولا غيرو لكن عايزين نستفزهم عشان يطلعوا من حالة البيات الشتوي البقت بالسنين دي ولانه الواحد عارف انه عندهم الكثير مما يمكن كتابته، يعني عاجباك لبدة الداف دي؟ عشرة مشاركات في اكثر من ثلاثة سنين ونص، نحن عايزين نجرجرو ان شاء الله يكتب لينا عن ال Fluid Mechanics برضو ما بطال ..
Quote: ازيك يا حامد الصاوي -مشتاقيين يارجل- ياخوي قبل ما تجرجر الناس كدي جرجر نفسك بالاول |
ياللخو انت مساخة الدناقلة دي لي هسه ما بطلتها؟ نظام الواحد بحامي لي اخوه وكده ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
كتب الساوي :
Quote: والله العظيم انا قايلك بطلت بعد بناتك الحلوات ديل!!! |
كلامك صاح وحليفتك في محلها بطلنا أو بطلونا ، فالنتيجة واحدة
وماكتبته انا بخصوص اللغة والكنكشة ، فهو من قبيل الأحلام المستحيلة والرغبات الدفينة التي لايمكن تحقيقها
ما خلاص ياخ
وبالنسبة للغياب أضف
غادة نصر ----------------- وانا ماعارف هذه غابت أم غيبها الزواج وينك يا عماد آدم ؟
وبخصوص آمال الربيع فهذه ان كانت بت حلتكم فإنها بت حزبنا وبت نقاباتنا فنحن اولى
وبالمناسبة آمال عضو هنا لكنها عضو سري
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: أبو ساندرا)
|
Quote: كلامك صاح وحليفتك في محلها بطلنا أو بطلونا ، فالنتيجة واحدة |
تعرف يا ابو ساندرا قصتك دي ذكرتني قصة واحد صاحبنا كده بقى ما بقدر على الشربة، وفي آخر ايامو بقى كان شما الكاس ساي بغني، واصحابو بقوا ما بدفعوه نصيبة في الشربة لانه ما يشربه لا يتجاوز الملعقتين وبعدها يقيف لط .. اها صاحبنا بعد ان اصبح مسخرة واضحوكة بين اصحابو قال انا خلاص بطلت الشراب .. فيا صديقي ارجو ارجو الا يمنعك كبريائك من التمييز بين عدم القدرة وعدم الرغبة .. يا كافي البلا لا عيون لا سنون لا سجم رماد بس ياهو لسانك ده الفضل غايتو ابقى عليهو عشرة ..
والله ما كنت فاكر بنتنا آمال الربيع عضو هنا، طيب ما تجرجرها شوية وخليها تكتب وتسيب العمل السري ده شوية، والله الواحد ما عارف الناس ديل عايزين يقعدوا مبلمين كده لمتين ..
بعدين ياخي انا جني وجن الناس البقولوا لي الساوي والصادق والضاوي بعد ده بضاربك عديييل كده ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: فيصل عثمان الحسن)
|
الخال العزير فيصل سعداء نحن بوجودك معنا، خليك قريب لأنه يظهر انه القصة دي حاتجيب ليها ضرب شديد مع مرافعين الديم، وبيني وبينك كده في ناس في الدنيا دي الواحد كان ما ضوقتوا يدك ما بمشي عديل والظاهر كده انه الديامه ديل ماسمعوا بينا بالرغم من انه الخال حسن كان مفروض يكون وراهم العينة ونوع الحليب الذي رضعناه .. اما في ما يخص هذا المرفعين الضبلان غايتو كان جاهو شلل في لسانه انا انصحة بأن يضع حدا لغربتة ويعود دياميا كما كان ويكتفي بكرسي متهتك امام البقالة التي جوار منزله ليرقب المارة إذا نجحت عملية زراعة القرنية التي سيقوم بها قريبا .. تحياتي لك ولأسرتك وعميق حبي ومودتي ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
كتب حامد الصاوي { كبيرة كان عشان فلان يشوف }
Quote: سأزوركم في الخليج قريباً أتمني أن نتقابل |
يا رييييت جوالي مسجل وممكن نديك ليه وللأخريات 009745052880 ما مطلوب منك غير تلفون قبل يوم من جيتك وح تلاقانا قاعدين في المطار
كتب الساوي :
يا ساوينا العزيز بمناسبة السجم الرماد الذي كال حامد وفاض في الكيل فإنك لو رأيته ح تتشهد وتقول : قادر الله ، يضع سره في أشين خلقه
انت بس بعدين سمي وتعوذ من الشيطان
أها تعال مع قريبك حامد ستجدون ما يسركم من حسن ضيافة وإستقبال وروائع وجمال
وكتب العزيز الغالي فيصل عثمان الحسن الزول السمح وزين
Quote: ممكن يوظفو لأغراض أخرى |
صدقت يا فيصل ، باللاهي كلم ود أختك ده وبالمرة قول ليه ابو ساندرا ناوي يعمل جراحة تجميل في لسانه وعايز يعمل فيه إضافات وتضاريس وكمان يزرع شعر عشان اللهط
وبمناسبة فيصل العسل ده ياريت كمان منح عضوية المنبر لشقيقه الكبير المناضل والزعيم وصديق العمر حسن عثمان الحسن الذي كنا نسميه حسن أبوعضل عشان كان بيشيل حديد وبطل في العاب القوى وخبير في المظاهرات ورئيس إتحاد طلاب مدرستين المقرن الثانوية والخرطوم الجديدة الثانوية
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: أبو ساندرا)
|
Quote: يا ساوينا العزيز بمناسبة السجم الرماد الذي كال حامد وفاض في الكيل فإنك لو رأيته ح تتشهد وتقول : قادر الله ، يضع سره في أشين خلقه
انت بس بعدين سمي وتعوذ من الشيطان
|
يا زول الله لا ورانا ليهو وبعدين شوف يا مرفعين نحن فاتحين البوست ده عشان نجرجر الناس ونجيبهم مش عشان نطفشهم .. اها بعد كلامك ده الكان عايز يجي خوف ساي حايزوغ خاصة الحسان من بنات الأسر وذوات الأخلاق .. ويبدو ان ود جبر الله كان بعيد النظر بقوله
Quote: تعرف يا ابو الجيو بوستك ده شفتو من اول يوم ... و زغت منو |
ولربما كان يعلم ما سينتهي به حال هذا البوست فأعلن انسحابه مبكرا حفاظا على حياته وحاجاتة، اما سيف بشير فأكتفى بالمراقبة من خرم الباب وفر هاربا بعد مجئ المرفعين .. التحية للخال حسن عثمان الحسن وندعو لإنضمامة للمنبر وغايتو كان الأخوال حسن وعبيد ومصطفى انضموا للمنبر حانعمل لينا إنقلاب عسكري في المنبر ده ولما تجوا الصباح حا تلقوا موسيقي الجلالات العسكرية ضاربة وحملة اعتقالات واسعة بين لأعضاء على رأسهم بكري ابوبكر وحملة بحث مكثفة عن جميع المرافعين الفارين والمختفين وبين كل جلالة واخرى تردد الإذاعة المنبرية قولها "بعد قليل سيذيع عليكم العقيد فيصل عثمان الحسن بيانا عسكريا فترقبوه" السوسة التاكل لسانك ذاتو قول آمين
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: أبو ساندرا)
|
شوف يا مرفعين انا جدي ابو امي اسمو وداعة الله الحسن، يعني اخو عثمان الحسن والد ناس حسن وفيصل وعبيد ومصطفى وانصاف .. يعني الشباب الحلوين ديل اولاد عم امي طوالي وبالتالي اخوالي .. اما حديثك عن انه ماممكن يرتكبوا هفوة الإنقلاب فما تضمنهم ديل اخوالي وانا عارفهم كويس العايزين يعملوهو بعملوهو وكان صنفت في راس اي واحد منهم ياكم الجيتو لقيتوها مقلوبة ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: فيصل عثمان الحسن)
|
Quote: شايف البوست سخن شديد ون تو بين الصاوى وبركة . يا بركة الصاوى وحامد ديل أولاد أختنا عديل , انت ما ملاحظ جرعة الثورية البائنة فى مواقفهما . بعدين ياخى ما تعمم معيارك الديامى الخاص بالخؤولة وحقوقها على كل الحالات , مثل الخال والد , خالى الحوتة , الخال خالى وأنا ود أختو ..... خالى أنا سعيد. |
عاذرو يا خال لانو المرفعين ده وصل مرحلة الخلخلة، وكما جاء في الأثر انو المرافعين لما تصل لمرحلة الخلخلة معاييرها بتاعة الخؤولة بتتخلخل وبتخلي اي حاجة وتقعد بس لي خراب البوستات ..
Quote: الصاوى يا عزيز بوستك ده الله يعوضك فيهو . |
عليهو العوض ومنو العوض بس البركة في شوفتك يا خال
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: أبو ساندرا)
|
العزيز أبو ساندرا تحياتى , معليش اتأخرت عليك شوية فى الرد . علاقتى بآل حفظ الله عن طريق والدتى ووالدى عليهما شآبيب الرحمة والمغفرة . والدتى هى المرحومة حليمة حفظ الله عباس , شقيقة كل من محمد حفظ الله عباس والد صديقك حفظ الله , وخالد حفظ الله عباس , والد راشد خالد . وعم والدتى شقيق والدها هو المرحوم حسن عباس , والد كل من زميلك المرحوم جعفر حسن عباس عليه شآبيب الرحمة والمغفرة وصديقك السر حسن عباس . يعنى أولاد المرحوم حفظ الله عباس هم أخوالى أشقاء والدتى وأيضا أولاد المرحوم حسن عباس هم أخوالى أبناء عم والدتى . جدى لآبى الحسن وجدى لامى حفظ الله هم أبناء عمومة , يعنى أبناء المرحوم حفظ الله من ناحية والدى هم أعمامى , والأمر نفسه ينطبق على أولاد المرحوم حسن عباس , حيث كان السائد فى ذلك الزمن أن يتم التزاوج بين الأهل فى أضيق نطاق ممكن , بالضبط زى ما عندكم فى العسال . بالمناسة كثيرا ما كنت أتردد على منزل عمك العمدة عوض القاسم والد زميلى اسماعيل فى مناسباتهم السعيدة منها والحزينة , وقرية العسال الوادعة لديها مكان خاص فى القلب لطيبة أهلها وكرمهم وأريحيتهم التى يغمرون بها كل من يأتيهم زائرا , والله يابركة انت ود عز عديل كدا , الناس فى المنبر دا متخيلنك مرفعين جد جد.
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: saif basheer)
|
عزيزي سيف انا لما كنت فاضي ليكم الإسبوع الفات قعدتوا تتزاوغوا، ولما انشغلت الإسبوع ده ظهرتوا، يعني اسوي ليكم شنو؟ كنت قد فقدت الأمل في انك تجي رغم انه اسمك مكتوب بالخط العريض في عنوان البوست واستغربت جدا ان تخطئة عيناك .. عموما يا ابو نبتة منور جدا ونا سعيد بظهورك ولو بطريقة الخمشات ـ كان المرفعين خلى ليك حاجة تخمشها ـ.
Quote: ألف مرحب بيك يا الصاوي ونتمنى انك تتمكن من احتمال البورد (طبعاً احتمال كبير يكون إتعمل ليك بوست ترحيب واحتمال كبير اكون رحبت بيك قبل كده)، وماعارف هسع الذكرني قصة سفرك لأديس ابابا شنو! |
قر قر قر قر قر ما اضحكني انه مش اتعمل ليهو بوست ترحيب بس بل المضحك انك كنت تتضرع في بوست الترحيب كما لو كنت صاحبه ولك فيه ثلاث مشاركات دسمة .. رحـــبــــــوا مــعــى بالمهــندس حــامــد الصــاوى ع...لمنبر واضافه نوعــيه مالك يا سيف؟ الحصل ليك شنو؟
اتفق معك تماما في ديل فهم مقلين جدا محمد عثمان دريج محمد النعمان محمود الزين واضيف لهم احمد عثمان عمر، وان كنت اعتقد ان دريج والنعمان واحمد عثمان استطاعوا ببراعة تعويض الكم بالكيف فما يكتبونه في موضوع واحد ربما يعادل ما يكتب في ارشيف ربع عام في هذا المنبر من حيث المنفعة و الغزارة المعرفية والاسلوب وطريقة تناول الموضوعات .. بالنسبة لي موضوعك "هل تتوفر في سودان اليوم مقومات الدولة-الامة" يا زول سمي وخش واكيد سوف يكون موضوعا شيقا واكيد سيتكالب عليك المهتمين بهذا النوع من القضايا ـ على قلتهم ـ، ولكني انصحك بالإنتظار لما بعد الأرشفة حتي يأخذ الموضوع حظه الوافي من الوقت والتناول .. تعرف يا سيف عبارتك دي
Quote: ياللا يا اولاد دفعتي وروا الناس الحوار المحترم في البورد دا كيف |
لخصت بها فكرة البوست الذي لم يتوفق عصام جبر الله ولا عمر بوب في إلتقاطها .. آسف لإنقطاعي الأيام الفاتت وياخوي البيت بيتك تضرع فيه كما تشاء ورد ورحب وازجر من تشاء .. وتحياتي لنجوى و للجميلات نبتة ونسمة ونالا وكل الأصدقاء والصديقات طرفكم ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
Quote: عزيزي الصاوي، لك الشكر على هذا الـ post ، فقد أعادني لسنوات و سنوات. آلمني جدا أن أعرف أن الصديق و الزميل احمد المجذوب قد غاب عن هذه الدنيا، له الرحمة و الغفران. التحايا لكل الزملاء و الزميلات الذين وردت أسماءهم .
المأمون أبوسن |
الأخ المأمون أبوسن تحياتي لك آسف جدا لم انتبه لمشاركتك سوى الآن لأنها انحشرت في وسط المداخلات فأرجو ان تتقبل عذري .. نعم لقد رحل عنا الأخ احمد المجذوب قبل سنوات في حادث حركة مؤسف في طريق شندي الخرطوم مخلفا وراءه سيرتة العطرة وتاريخه الناصع وسيبقى حيا في قلوبنا ما بقينا، له الرحمة ولنا الصبر ..
مرحبا بك اخي المأمون هنا وفي المنبر واتمنى الا تكون مقلا في كتاباتك ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Idris Tabidi)
|
Quote: تعرف يا الصاوي الزول عامل ذي ساقية جحا الوجع شديد من فقدان اعز الناس الواحد ذي الخاشي ليهو فيلم في البلو نايل وبعد شويه يبتهي الفلم وتمشي النشاط تلاقي كل الناس لكن الحكايه دي يبدو انها نهاية البداية ولا بداية النهاية الواحد ما عارف عامل ذي كل الناس اعني كل الناس حتي السنجاب |
تعرف يا تبيدي دائما ما ارخي لذاكرتي حبالها واتركتها طواعية لتسبح في بحر الزكريات الجميلة فتتفتق الجراح التي اندملت بفعل الزمن تحت تأثير الشجون التي عادة ما تأخذني الى عوالم بعيدة كانت حافلة بشخوص بعضهم طوته الأرض تحتها والبعض الآخر فرشت الأرض اميالها لتحول بيننا وبينهم .. هذه الآرض يا ادريس يا صديقي بقدر ما هي خيره وطيبة بقدر ما هي قاسية وعنيدة .. تعرف يا ادريس يا صديقي عندما ولجنا مرحلة الدراسة الإبتدائية نسينا بسرعة مرحلة ما قبل المدرسة واندمجنا في عالم جديد صاخب اكثر إثارة .. وعندما وصلنا للمدارس المتوسطة استصحبنا معنا اصدقائنا فلم نفتقد شيئا، وكذلك عند وصولنا للمرحلة الثانوية اغنتنا علاقاتنا الدراسية السابقة والتي في الغالب تكون هي نفسها علاقات الحي والمنطقة والمدينة عن التفكير في فقدان شئ، ولم يكن ذلك الإنتقال من مرحلة لأخرى شاقا بل كان اشبه بطي آخر صفحات كتاب ثم بداية كتاب آخر .. الأمر الذي سهل من ذلك الإنتقال عبر المراحل الدراسية المختلفة هو ان كل مرحلة كانت اكثر إثارة وجمالا من سابقتها .. ولكن لم يكن الحال كذلك عندما تخرجنا من الجامعة وعندما حملنا حقائبنا والقينا نظرة الوداع الأخيرة للجامعة كان رحيلنا اقرب لبتر الأعضاء دون مخدر، ولم يكن عالمنا الجديد مرحبا بل لم يكن حال البلد عموما ـ في اوائل سنوات الإنقاذ ـ يشجع على البقاء، فتلقفت المنافي اجسادنا وبقيت ارواحنا هناك .. نحن لو قدرنا نطور مقدرتنا الإكتسبناها في صغرنا على تجاوز المراحل الدراسية بدون ما تكون الزكريات عامل سلبي ومعوق ـ احيانا ـ للإنطلاق وخلينا محاولة التشعبط في الماضي الجميل واتعاملنا مع كل مرحلة زي كتاب الواحد لما يخلصو يختو بعيد ويمسك الكتاب البعدو لو قدرنا نعمل كده ما بتجينا عوجة .. سعيد انا يا تبيدي انه الواحد نجح في انه يستنطق واحد من الجماعة القصدتهم وياريت تحاول تكتب ـ في اي حاجة ـ كلما تلقى ليك فرصة ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: أبو ساندرا)
|
Quote: حاضر يا الحبيب ومايصير في بالك إلا طيب
أما قصة خؤولتنا ليك فنابعة من الرضاع المشترك بيني وبين خالك حسن عثمان حيث رضعنا على صحن فول في مختلف مدارس العاصمة |
خلاص انت برضو ما يصير خاطرك الا طيب موافقين على خؤلتك لكن ليس بالمعنى الديامي للخؤلة وبعدين بيني وبينك مرات الأخوة بالرضاعة من صحن فول او بوش واحد بتكون اقوى من الأخوة بالرضاعة من شطر واحد ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
الصاوي الحبييب:
Quote: تعرف يا سيف عبارتك دي
Quote: ياللا يا اولاد دفعتي وروا الناس الحوار المحترم في البورد دا كيف
لخصت بها فكرة البوست الذي لم يتوفق عصام جبر الله ولا عمر بوب في إلتقاطها |
تصويب:
دا ما كلامي أنا بل كلام اخونا بكري ابوبكر... واقتبسته لمناسبته لما كتبت... التصويب فقط من أجل حفظ لكل ذي حق حقه، وهكذا..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: أبو ساندرا)
|
اهو عندك واحد تاني مرق، بعد أو قبل ابوبكر عثمان، ما متذكر الترتيب....
ادريث تبيدي!
Quote: تعرف يا الصاوي الزول عامل ذي ساقية جحا الوجع شديد من فقدان اعز الناس الواحد ذي الخاشي ليهو فيلم في البلو نايل وبعد شويه يبتهي الفلم وتمشي النشاط تلاقي كل الناس لكن الحكايه دي يبدو انها نهاية البداية ولا بداية النهاية الواحد ما عارف عامل ذي كل الناس اعني كل الناس حتي السنجاب |
ما لم أفهمه، ماذا قصد ادريس بزج "معاذ عبدالرحيم" في حكاية البداية والنهاية بتاعتو دي.. (معاذ أطلق عليه عثمان حسن "تمساح" اسم "السنجاب الصغير" لما كان في البرلم، ثم ترقى لـ سنجاب في السنوات التالية)...
وباللفة كدا:
كيفك يا ابوبكر، اتمنى ان تكون بخير، زمن طويل... وعريض..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Abubakr Osman)
|
ابوبكر الظريف
Quote: السنجاب دى كانت زمان لو شفتو الان ما حتعرفوا الزمن فعل فعايلو |
في يوليو 2006، كنت في انتظار عبدالعزيز ومعي الصديقة منال احيمر في مكتبه... بعد لحظات جاء معاذ (التقيته قبل يومين من ذاك اللقاء امسية قدومي للسودان)، فبادر بالتحية لمنال وأدركت على الفور أنها لم تتعرف عليه، فاقتربت من اذنها هامساً "دا معاذ عبدالرحيم"... وكان مشهد "يقطع المصارين" بالضحك والدهشة!!
لكن من ينطبق عليه تعليقك "الزمن وفعايلو" هو خالد عايس: you have to see him to realize this
لو البوست دخل في حتة بتاعة صور وكدا ممكن تشوف...
"بعدين ياخ ما في طريقة تصغر صورة بروفايلك دي شووووية كدة؟ الاولاد اسمهم منو ومنو..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: saif basheer)
|
Quote: ما لم أفهمه، ماذا قصد ادريس بزج "معاذ عبدالرحيم" في حكاية البداية والنهاية بتاعتو دي.. (معاذ أطلق عليه عثمان حسن "تمساح" اسم "السنجاب الصغير" لما كان في البرلم، ثم ترقى لـ سنجاب في السنوات التالية)... |
Quote: في يوليو 2006، كنت في انتظار عبدالعزيز ومعي الصديقة منال احيمر في مكتبه... بعد لحظات جاء معاذ (التقيته قبل يومين من ذاك اللقاء امسية قدومي للسودان)، فبادر بالتحية لمنال وأدركت على الفور أنها لم تتعرف عليه، فاقتربت من اذنها هامساً "دا معاذ عبدالرحيم"... وكان مشهد "يقطع المصارين" بالضحك والدهشة!! |
نعم يا سيف لقد تغير السنجاب كثيرا واشتعل الرأس شيبا فكرة الصور جيدة لكن افضل ان نفتح لها بوستا منفصلا بعد الأرشفة وكل واحد ينزل الصور القديمة والجديدة لعندو، وصلاح تمساح والداف عندهم مجموعة ما بطالة من الصور وانا برضو عندي عدد من الصور ممكن اشارك بيها وبرضو الوالد ياسر حنا ده امد الله في ايامه
عندو البوم مليان صور وممكن ينزلها لينا
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: saif basheer)
|
Quote: والعشرة الذين اتمنى إنضمامهم للمنبر كان بكري هون هم:
1 ـ إبراهيم فتح الرحمن 2 ـ مجتبى محسي 3 ـ مصطفى النقيب 4 ـ اسحاق النوش 5 ـ هاشم عثمان 7 ـ محي الدين الجلاد 8 ـ عبد اللطيف عثمان 9 ـ قرشي ادريس 10 ـ محمد ابراهيم حميدة (ابو النوم)
|
as I Male feminist, I wonder why there were no women in this list I immediately thought about activists within your circle such as Sieren Awadalla and Zeinab Ayega....
mohamed elgadi
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Ameer Farouq)
|
Quote: وعصام جبرالله أكتر واحد عارف إنو أمير الضب هو أمير حسن |
كنت قد دعوت سرا بقولي اللهم اعز هذا البوست بضب او سنجاب او تمساح فاستجاب الله دعائي واكرمني بضب وما زلت اعشم في صلاح تمساح، رغم انني هاتفته البارحة وعرفت انه متابع لما يدور هنا وفكر في المشاركة ولكنه غير رأيه لأسباب غير مقنعة .. والله منورنا كتير يا امير، وبعدين يا خوي انت بتغيب كده بتمشي وين؟ فترات انقطاعك مرات بتكون بالشهور ..
Quote: بالمناسبة انت حكاية "ساوي" دي حرقتك ليه.. مع إنو أنا كررتها بدون.. مطر حبش .. ولا ديك حبش |
ابدا والله انا بقيت متعايش مع اسم الساوي بسلام شديد والأمريكان 12 سنة شابكني الساوي الساوي لانو حرف الصاد ده ما عندهم و بهزر مع المرفعين ابوساندرا ساي ..
Quote: صاوي.. لك الحب.. وكمنجة وعود شحمااااااااان كدة.. وأؤكد لكم أيها الأحبة.. أن ما غرسته فيني الجبهة الديمقراطية.. لم ولن ينبت إلا ما بجمال وروعة قاماتكم جميعاً ولا أعتبركم تاريخاً أو زمنا مضى.. وأشعر أنكم بجانبي.. دوماً وأنا أسعى لإضافة أضواء وألوان إيجابية في حياة جوري وعمر.. |
ونحن نبادلك حبا بحب يا امير فمكانتك في الفؤاد باقية ما حيينا، وياريت تنزل لينا صور السحالي جوري وعمر بس ان شاء يكونوا بيشبهوا امهم ..
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
محمد القاضي سلام
Quote: as I Male feminist, I wonder why there were no women in this list I immediately thought about activists within your circle such as Sieren Awadalla and Zeinab Ayega
|
لم انتبه الى عدم وجود نساء بالقائمة إلا بعد تعليقك الذكي، لكن العشرة ديل كلهم activists ولو قدرنا نجرهم لي هنا اكيد حا يكونوا مكسب كبير واضافة نوعية ممكن تغير كتير من وجه المنبر .. ونضيف للقائمة Sieren Awadalla Zeinab Ayega شكرا ليك كتير يا دكتور
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
والله شاكر ليك كتير يا صاوي.. على هذا الحوش الإتكاءة وأكيد بنكون محتاجين لحاجات زي دي.. دوماً شباب زي الورد زمان وهسة وبعدين إزيكم كلكم وأبقواعافية
أنا فعلاً كسلان في مسألة الكتابة دي المشغولية حاصلة ما في شك.. لكن لا أعتقد إنها تصلح شماعة عموماً الله يسهّل وإثباتاً لحسن النية يا صاوي دي صورة جوري (6 سنة وشوية)
ودي صورة عمر (5 سنة وشوية)
حبي لكم جميعاً..
الغريبة حاولت أزوغ من حكاية الضب دي.. مشيت أهبش بهناك مع طارق أبوعبيدة في بوست كدة برضو باغتني بيها..
ياخ ضب ضب المهم إني أنتمي لجمالكم وتاريخكم وعشمكم في المستقبل
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: elsawi)
|
عدنا و لا نامت اعين الكهول ـ ابوساندرا و صديق الموج و من لف لفهم -
شايف القصة بقت غابة عديييل كده سناجب و ضببة و تماسيح
كافي البلا مافي زول لقبو كروان و لا بلبل (وتذكر اسامة عصفور والقم نفسه درابة ـ و ده لقب لا صلة له بالزول ، مفروض يلقبوهو قودزيلا او زرافة او ما شابه)
المهم،
واحد من الذ ناس الايام ديك لميت في ايميلو و بدينا نتكاتب و جدع لي كم صورة كده، ده بعض منها
الايام الفاتت دى كنت في شبه غيبوبة، عشان كده احسن نسال، هل نزل بوست او خبر انو معاذ و ابو الليف انضموا للبورد؟
الاجابات بدون تريقة و طولة لسان
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: saif basheer)
|
شكرا ليكم كتير يا شباب اليوم الأثنين 31 مارس وهو اليوم المحدد للأرشفة وبعد سويعات سوف يذهب هذا البوست للمتحف ولن نتمكن من الكتابة فيه .. ولكن العزاء إننا نجحنا في اخراج الضب من جحره وتمكنا من جرجرة تبيدي وليس فقط استطعنا ان نجعل ابوبكر يدخل لهذا الفضاء بصورة شبه يومية ولكن يبدو ان جهود ابوبكر سوف تجعل امر وجود معاذ، ابوالليف، منعم وابوعلي بيننا هنا ممكنا وسوف يكون هذا الخيط قد حقق بعض اغراضه .. احبتي إنعام سعد محمد إدريس صلاح عبد الله أبو ساندرا عصام جبر الله محمد مكى محمد حامد الصاوي فارس موسى عاطف مكاوي المأمون أبوسن عمر بوب فيصل عثمان الحسن صديق الموج سيف بشير ادريس تبيدي سيف مساعد ابوبكر عثمان امير فاروق محمد القاضي سهام المجمر لكم جميعا عاطر محبتي وشكري على اهتمامكم بهذا الخيط ومشاركاتكم الرائعة واتمنى ان نلتقي في خيوط اخرى اكثر رحابة واتساعا تزينها اقلام المقلين والذين تمنينا وجودهم معنا ..
الصاوي
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: Samer Osman)
|
Quote: [قال أحد الزملاء الدجاجة دي لو ختيتها مع باقي الدجاج ح تكون خالفت قوانين الجودةرد عليه اخر الأمانة الثورية تستوجب أن نبعدها من الدجاج المعروض للبيع رد ثالث أنا ضد أي قروش حرام تدخل ميزانية الجبهة الديمقراطية في النهاية قرر الزملاء طبخ الدجاحة للعشاء ... و اقترحوا أن اطبخها لهم بحكم دراستي بمصر و معرفتي ب شئون الحلل. |
طبختوا الدجاجة وما في ســما عقب النار .بالعافية Quote: كانت عشوة جميلة و طلعت حلة مسبكة بدجاجتين مش واحدة |
السلام عليكم يا شـيبان و ونسـتكم ممتعــة بس اســمحوا لي اتحشـر شــوية واســألكم دفعتوا قروش الدجاج الأكلتوا دا ؟, ولاحظوا كانت دجاجة من فـــم الكديســة بقت دجاجتين ( بكرم حاتمي من حامد الصاوي ) والله يا حامد قلنا ندخل هنا ندفعك حق الدجاجتين كالآتي :- قيمـة دجاجتين × عـدد السـنين × معدل التضخم + غرامة تاخير = ؟ , يعني المفروض تدفع ذي مليون جنيه كدا ) والحســاب ولـد علشــان الواحد يقـرأ ونستكم دي من غير ما ينشـغل كتير بموضوع القروش دا , بس أدفع ســاي يا حامد
| |
|
|
|
|
|
|
Re: لعناية عصام جبر الله وسيف بشير: عشرة مقلون وعشرة اتمنى وجودهم هنا (Re: عبدالله احيمر)
|
الأخ عبدالله احيمر سلامات
Quote: اســمحوا لي اتحشـر شــوية |
يا زول حبابك الف والبيت بيتك وسل ما تشاء
Quote: السلام عليكم يا شـيبان و ونسـتكم ممتعــة بس اســمحوا لي اتحشـر شــوية واســألكم دفعتوا قروش الدجاج الأكلتوا دا ؟, ولاحظوا كانت دجاجة من فـــم الكديســة بقت دجاجتين ( بكرم حاتمي من حامد الصاوي ) والله يا حامد قلنا ندخل هنا ندفعك حق الدجاجتين كالآتي :- قيمـة دجاجتين × عـدد السـنين × معدل التضخم + غرامة تاخير = ؟ , يعني المفروض تدفع ذي مليون جنيه كدا ) والحســاب ولـد علشــان الواحد يقـرأ ونستكم دي من غير ما ينشـغل كتير بموضوع القروش دا , بس أدفع ســاي يا حامد |
انا متأكد يا اخ عبد الله من انه سؤآلك ده من باب المزاح ولكنني سأجيب عليه، لقد كنت المسئول المالي للجبهة الديمقراطية بالجامعة في ذلك الوقت والمسئول عن الأنشطة والفعاليات التي تقيمها الجبهة الديمقراطية بغرض ال Fund raising في ذلك العام ـ يعني حامد لا يعتبر مسئولا عن اي فروقات مالية او دجاجية ـ بعد نهاية الفعالية التي اشار اليها الأخ حامد قدمت تقريري الكامل المفصل لحركة الشراء والبيع لكل السلع التي تم عرضها وبيعها من سكر وشاي وصابون وسجائر ودجاج و أرز ودقيق وغيرها من السلع الإستهلاكية في ذلك اليوم وقد اشرت في تقريري لفرق الدجاجتين اللتين كانتا عشاء لزملاء جوعى ومفلسين ظلوا يعملون في التحضير للمعرض حتى الساعات الأولى من الصباح، وقد اجازت اللجنة المركزية للجبهة الديمقراطية بالجامعة التقرير و شرفتي وكل الزملاء الذين شاركوا في تنظيم ذلك اليوم بصوت شكر واشادة .. يعني المليون حقك ده حامد غايتو إلا يدفعه ليهم تبرع ساي .. بالمناسبة هل لك اي علاقة قرابة بمنال ورباب احيمر؟
| |
|
|
|
|
|
|
|