|
ماذا قال عبد الرحيم محمد حسين عن زيارته للسعودية حول كجبار .... (في بيت بكا)
|
يوم السبت (اول امبارح) مساء واثناء جلوسنا في عزاء احدي قريباتناحضر السيد عبد الرحيم وزير الدفاع وبعد تقديم واجب العزاء جلس وحوله مجموعة من الارزقية وبدأ يتحدث عن زيارته للسعودية قائلا: في البداية واجهونا بهتافات لا للسد لكن انا سكتهم وقلت ليهم انت الواحد فيكم ليوه كم سنة قاعد هنا ويتكلم عن السد ... انتو اولادكم وين اولادكم شافو البلد؟ يا قاعدين معاكم هنا يا قاعدين في الدروشاب وما بكونوا شافوا البلد وما برطنو .... وفي واحد اسمو صلاح محجوب اتكلم كلام انشاء كتير وهو زاتو ما عندو دخل بي سد كجبار هو من السكوت وهنا انبري له الارزقية قائلين (ده ما التسييس عاوزين يسيسوا الشغلة) فقال ايوة تسييس لكن انا وضحت ليهم الحقائق قلت ليهم ده ما تهجير السد ده اعادة توطين وعندما ساله احد الحاضرين حتوطتنونا وين قال في سهل كوكا فيه 15 الف فدان وفي 30 الف فدان جنب الدبة حناخد 15 منها نوطن ناس المحس وبعدما شرحت الحقائق الناس الكانوا بكوركوا سكتو وحتي في واحد ما عارف اسمو التالت غريب كده (علمت لاحقا انه يقصد ولياب) قالو ده المسؤول الاعلامي للمناهضة الدولية ده قال لينا اذا كلامكم البتقولو فيه ده صاح احنا ما حنعارض السد....
وبعد داك قالوا لينا الشهداء قلت ليهم يا اخوانا ما في تنمية من غير تضحيات احنا اخوانا الشهداء ناس الزبير محمد صالح واخوانهم قدمو ارواحهم عشان البلد والناس الكتلوهم الليلة قاعدين معانا مشاركننا في الحكم فلازم الناس تضحي عشان التنمية ....
ثم قال محاولا شق الناس يا اخوانا القري الحتغرق دي القري شمال قرية اردوان غرق كامل اما جزيرة اردوان فالغرق حيكون بس في الجروف وحتي جزيرة سمت ايضا الغرق في الجروف اما جنوب بدين او ابتداء من الحفير ليس هنالك تاثير علي الاطلاق (هنا ساله احد الكبار كيف جروف اردوان حتغرق وسمت وبدين البتغرق بي فيضان ما حتتاثر ) فقال ما سمت واردوان في مستوي واحد...
ثم قال احنا عايزين الناس الفي السعودية ديل نجيب زي عشرين منهم علي حسابنا ونوديهم سد مروي عشان يشوفوا بي عينهم التنمية الحصلت ... احنا بنعمل لي مصلحتهم يا اخوانا عاوزين ننميهم ... تصدقو قالو امبارح في واحد من البرقيق جا لحدي الخرطوم بي عربية تيكو...
احد الطاعنين في السن كان يجلس بعيدا وسال عن ماهية حديث عبدالرحيم فقالوا له انه يتحدث عن زيارته للسعودية حول سد كجبار فعلق في لغة نوبية ساخرة (هو مش وزير دفاع ده سد ولا حرب)؟؟؟
لا تعليق!!!!!
|
|
|
|
|
|
|
|
|