ود الشلهمة

Quote: أحمد ياودابحريرة السلام جاك سابق.. وسيدو يحبى فى حضرة هذا الولى اللسمو ود الشلهمة. يازول البحر الغايس فيهو دا طول نفسك وواصل فى قلع الدر لسع راجيك فى دفتر البطاحين كتاااار بعد تخلس ود الشلهمة وتقبل على ودجماع. سعلتنى: يا بله أدينا رأيك في البيتين الأخيرين ديل ياخ احسب في النجوم الطالعه والاتدلتْ لامن عُقدَةْ الليل بي الشُعَاعْ انِحَلّتْ وجوابى انو النضم دا لدنى وقالوا الصادق ودآمنة لمن يكون حايصلو مسدار ولا كليمة بتكلم وبتدور حول نفسو ويصنقع فى السما ويردد (جات.. جات.. جات..) وعينك ماتشوف إلا الشعاع البحل عقدة الليل. أها آخوى الحالة دى قالوا مابتحصل إلا للرسل فى لحظة نزول الوحى. فالكلام الموحى به له مفسرون ومجتهدون وعارفون بالتأويل ولهم حظ من العلم وإجازة. واحد منهم حاسد إسمو نزار حسين مابدور الشرح عشان ينوم بالدر براهو حلالى!! والتانى غتييييت إسمو شنتير دا يخمش ويدس وان داورتو يديك بالقطارة!! وآخرين فى بوستك دا منهم ودحماد وبت طلحة وود المحرب وود شيقوق وود النعيم وقيسان. أها ديل قال كبيرهم: احسب في النجوم الطالعه والاتدلتْ لامن عُقدَةْ الليل بي الشُعَاعْ انِحَلّتْ فوالله هذا القول لا يقل عما قاله ابو فراس الحمداني ولا عنترة بن شداد . وتناهو طبيقو وقال: واظنه ايضا يعنى: أقلب طرفى فى السماء لعله ** يوافى طرفى طرفها حين تنظر وجا ود المحرب أمن على قولم (مكوتا) له. لكن والله ووالله لم أجد أى شبه فى الجودة والجرس وروح الشعر والمعنى الغميس فى البيت المذكور وهذين الشطرين. كدى شوف عقدة الليل بالشعاع انحلت دى والزقا فى أى مكان تلقاها لافقة حتى لو هتفت بيها فى مظاهرة ضد حكم ديكتاتورى يمثل عقدة الليل. أو جرب أكتبا حجاب لمريض هالكو الإكتئاب النفسى وكتر فى الكتابة من (بالشعاع إنحلت) وخليهو يلبسو أسبوع واحد. لومنى ياابحريرة كان مانفض المرض وقام صاغ سليم!! ود شيقوق; بل قل: والله هذاالقول لم يقله أبوفراس وعنترة ومن لف لفهم(حلوة لف لفهم دى..الأيام دى بقت موضة فى عناوين المنبر). فى زول بتسلل هنا بشوييييش وبتخارج نرجو القبض عليه حيا أوصافه محسن فى المعانى وخالد بين الأدباء.

(عدل بواسطة Ahmed Yousif Abu Harira on 03-09-2007, 11:08 PM)
(عدل بواسطة Ahmed Yousif Abu Harira on 03-10-2007, 06:09 PM)