طولت جدا من المربع فيهو حاجات كثيرة لا يمكن المرور عليها (عبورا ) ولكننا نؤجل الخوض فيها لظروف زمن الدوام المداهم بس ما بنقدر نأجل تهنئة جدو بابكر عبد القادر بى عيد ميلاده كل سنة وانت طيب يا جدو وربنا يخليك لى ابوك ويخلى ليك ام ديمة هسى حا تقولوا لى اشمعنى حا اقول ليهم المعنى فى بطن (زول كده ) تحياتى ليكم
01-18-2010, 06:23 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
الشبابات و الشباب...العجوزات و العجايز...بفضل الله تعالى ثم بفضلكم وصلنا الى الصفحة التاسعة من هذا البوست...و ليس هنالك أدنى تسابق على الكم...بقدر سباق على الكيف..الكيف الذي يمثل لي شخصيا تواصلي الحميم معكم...خلق علاقات جيدة معكم فيها الكثير من الشفافية و الحب...و توطيد ما هو قائم من علاقات بنيت على أساس من المحبة الصادقة بيننا... التنوع في موضوعات هذا البوست كان الهدف الأساسي من انشاء هذا البوست....ثقافة...ذكريات...شعر...موسيقى...ونسة ساكت...كلام خارم بارم...الا السياسة...السياسة دي الله بيننا ما بينا...لأنها تفرق و لا تجمع...فالاختلاف يفسد كل قضايا الود و ان قيل غير ذلك... كان جدي يجمع أتباع الطريقة الأحمدية في منزله الكبير بالكوة...فيقيمون الحوليات...يمدحون و يذكرون حتى تتبلل أثوابهم و تتقطر أجسادهم عرقا ثم يتجمعون حول الفتة أم توم واللحم و اللقيمات و الرز باللبن...فيزردونها و يبتلعونها ابتلاعا...أكاد أجزم أن ليس كل الحاضرين كانوا من أتباع الطريقة الأحمدية...بل كانوا من أتباع طرق صوفية أخرى و لكنهم يأتون...من قلب رام الله أو من جبل الزيتون...يأتون ليجتمعوا مع آخرين يمدحون و يذكرون و يتسامرون و يضحكون...فتكون الحولية عبارة عن مؤتمر أو ملتقى انساني لأهل المدينة الصغيرة...بالمناسبة أهلي في الكوة لا يقبلون أن يطلق اسم قرية على مدينتهم....يقولون ان اسمها كان أليس و كانت عاصمة لأحدى الممالك القديمة... تصورت تلك الحولية وأنا أنشئ هذا البوست...لنلتقي و نتسامر و نتشاطر الضحكة و المعرفة و حتى الحزن...نريدكم هنا بأي حالة نفسية كنتم بها...مبسوطين كنتم أو حزينون...
01-18-2010, 08:38 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
الذباب من أكثر الحشرات المقرفة و الناقلة للأمراض ...لأنها تأكل من كل الموائد فهي لا يهمها كثيرا ان كان مخلفات حيوانية أو انسانية..جيفة متعفنة أو حتى آيسكريم...حشرة دنية جدا...فهي تنتقل بين الباسطة و كيس البامبرز دون أي تمييز بينهم...و لكنها لا تقترب أبدا من كيس السعوط...اذ أن نفسها لا تأبى الا السعوط مهما كان مصدره...سعوط نوري و لا الوطنية أو غيره... لا شك أن أعداد الذباب تتزايد في السودان عنها في دول الخليج و ذلك للأموال الكثيرة التي تصرف في الامارات بالتحديد للحفاظ على صحة البيئة و ترصد الميزانيات الضخمة لهذا الأمر...أما في السودان فتستهلك الكثير من مبيدات الحشرات بواسطة الأفراد دون جدوى حيث تظل أعداد الذاباب كما هي... بعد أن عشنا سنوات في الامارات أكاد أكون لم أشاهد أي ذبابة داخل شقتنا لسنوات طويلة...عكس السودان فانك عندما تحضر لتأكل و بمجرد رفع الغطاء من الأكل ترسل مجموعات الذباب اشارات الى بعضها البعض فيأتو مسرعين الى حيث الأكل الفريش...لا تعرف من أين أتوا...من كيس زبالة او (مستراح) قريب أو حمار جاء ماري بالقرب من البيت...ثم تبدأ بالهش و النش و أنت تأكل...حركة الهش و النش في السودان أثناء الأكل حركة طبيعية جدا فتجد الكل يهش و ينش...و أحيانا يقذف أحدهم بحتة شطة موحوحة داخل عيونك أثناء هشة لذبابة ثقيلة رفضت أن تهرب... من المشاهد المقرفة جدا التي كانت بالنسبة لي...أذكر أن جدي أو أبوي سيدأحمد كما كنا ننادية...كان يترك الذبابة حتى تهبط هبوطا كاملا مريحا و ليس هبوطا اضطراريا على يده اليمنى فيباغتها بضربة سريعة خاطفة بيده اليسرى فيقضي عليها قضاءا كاملا و تدفع هي ثمن سوء اختيارها للمطارات غير الآمنة...كان هذا المشهد كافي بالنسبة لي لأقول الحمد لله و أقوم من الأكل...كان ذلك قبل الحنكشة و القدوم الى الامارات فلكم أن تتصوروا ماذا يحدث الآن... عندما تدخل ذبابة الى شقتنا في أبوظبي يكون ذلك حدثا فريدا و أمرا مزعجا...مجرد ذبابة واحدة كافية لخلق قلق شديد داخل البيت و يبدأ أمنية و مهند بالصراخ...يا بابا الفلاي...يا بابا جيب العصايا..فأستجيب لذلك... قام أحد الجيران في أحدى الفلل المجاورة للبناية التي نسكن بها بتسميد حديقته بسماد عضوي مما أدى الى أن تنتشر أعداد غير مألوفة من الذباب بالمنطقة...احدى الذبابات يبدو أنها تغذت على مخلفات مخلوطة بمنشط من نوع ما فطارت حتى دخلت الى شقتنا بالطابق الثالث و أخذت تتلذذ بالجو البارد داخل الشقة فتطير هنا و هناك و تتقلب في الجو و كأنها احدى مقاتلات الF16 حتى خيل الي أنها أكثر من ذبابة واحدة لتواجدها في كل مكان... أول ما خطر ببالي أن هنالك خطر كبير تسلل الى منزلنا النظيف....لا أدري من أي مائدة أتت تلك الذبابة و قررت مع تشجيع أبنائي أن أتسلح بأسلحتي و أشن حربا ضروسا على المتسللين...تسلحت بشبشبي و من خلفي أبنائي...يالله يا بابا...يالله يا بابا... ما تخليها...هبطت الذبابة على الستارة بالصالون...حذرتني نجاة من اسقاط الستارة أو توسيخها...ابلغتها بأنه لا بد من التضحيات في سبيل القضاء على الخطر المحدق بصحة بيئتنا و فلذات أكبادنا...وهو أمر ليس معه تساهل و تهون دونه التضحيات الجسام...خفت على الستارة من الاتساخ و من أن أتلقى محاضرة في النظام العام و النظافة...قمت هشيت الذبابة لتطير من على الستارة و حاولت مباغتتها بيمينية خطافية..الا أني جليتها وهي طايرة...زمان بقولو جلاها وهي ثابتة...لكن يبدو اني فقدت الكثير من مهاراتي فجليتها...و الأولاد يضحكوا ضحك شديد...و يزداد التشجيع...و نجاة تخشى على البيت من الفوضى...طارت الذبابة الى المطبخ و أنا وراءها و شبشبي بيدي أتوعدها...حاصرتها في ركن المطبخ شعرت بأنني قد أطبقت عليها...قلت ليها يا حليلك الليلة خلاص بلحقك أمات طه...هل لديكي كلمات أخيرة قبل تنفيذ الحكم...و لكنها ناورت بمهارة تحسد عليها و هي تمد لسانها لتغيظني... و خرجت من بين يدي الى الخارج مرة أخرى و أنا و عيالي وراءها...ابتدأت وتيرة تنفسي تعلو و ضربات قلبي تزداد...فلقد ابتعدت لفترة طويلة من الرياضة...لقد ذكرتني هذه الذبابة بالعودة الى الرياضة مرة أخرى...دخلت الى احدى الغرف و أنا و الأولاد وراءها...أحسست ان أولادي طابور خامس..فهم الذين ينبهون الذبابة بأصواتهم العالية الى قدومي متسلحا بشبشبي...رغم أنهم ما زالوا يشجعونني...قلت ان لم أقضي على هذه الذبابة الآن فربما تهتز صورتي في عيون اولادي...لا بد أن أحاصرها الآن....توثبت و تربصت بها و هي ترتاح على احدى ستائر الغرفة و مشيت بخفة تحسدني عليها لبوة شابة...اقتربت شيئا فشيئا من الذبابة حتى أصبحت في مرمى نيراني ففردت يميني و بها شبشبي فأصبتها في مقتل...ثم أحضرت الكوريك و انتشلتا و من ثم ألقيت بها في غرفة القمامة... حزن عيالي ليس لمقتل الذبابة ...بل لانتهاء المطاردة المثيرة و التي كانت كما قال كانوا يقولونWe had fun يا بابا...
Quote: لكنها لا تقترب أبدا من كيس السعوط...اذا نفسها لا تأبى الا السعوط مهما كان مصدره...سعوط نوري و لا الوطنية أو غيره...
دى واحدة يا روش من مزايا الصعوط أو الفرح المعبأ فى الأكياس ، فى إجازتى للسودان قبل نحو ثلاثة أعوام إصطحبت أم العيال لسوق مدنى وأوقفتها فى ناصية وهرعت لمحل عبد الحق واشتريت ربع رطل غليد من الصعوط ، رمقتنى بنظرة وأنا أحمل الصعوط وباليد الأخرى كيس به بعض الخضروات ، مددت لها كيس الخضروات وأتبعته بالقول ( أمسكى لى النصلِّح توبى) وبين دهشتهاوضحكتها وقبل أن يرتد إليها طرفها تحكَّرت السفة لتفرض سياسة الأمر الواقع وأن لاصوت يعلو فوق صوت الصعوط والقريفة.
معليش بجيكم راجع لأنى قضيت أغلب الوقت فى متابعة صفحة 8 وما فاتنى من تسامر ، فأشبه حالى من فاتته ثلاث ركعات ، دعونى أكمل صلاة المسبوق و أبنجوا مع العفش
01-18-2010, 10:27 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
Quote: معليش بجيكم راجع لأنى قضيت أغلب الوقت فى متابعة صفحة 8 وما فاتنى من تسامر ، فأشبه حالى من فاتته ثلاث ركعات ، دعونى أكمل صلاة المسبوق و أبنجوا مع العفش
بكوري مرحبا بعودتك....
انت فاتك المولد كلو يا أخوي....ألحق بسرعة عشان تواصل معانا من حيث انتهينا...
01-19-2010, 10:50 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
Quote: لا أدري من أي مائدة أتت تلك الذبابة و قررت مع تشجيع أبنائي أن أتسلح بأسلحتي و أشن حربا ضروسا على المتسللين...تسلحت بشبشبي و من خلفي أبنائي...يالله يا بابا...يالله يا بابا...
يا رشيد ...ازيك
المطاردة دى ذكرتنى شقة غميسة فى واحد من جخانين لكوظ...كنا فيها انا وعبد الرحمن شاويش
شقة زى علبة الكبريت...انا كنت لما افتح شباك الاوضة القريب من الباب مابقدر اطلع لانو الشباك
بيقفل الباب...اكتشفنا فار صغير لابد فى الفرن والدنيا ليل ...وحقو تتخيل الشقة دى مطبخها حيكون
قدر شنو ؟وتسلحت بالمكنسة الطويلة ديك وقفلت باب المطبخ...ولما فتحت الفرن الفار راح ناطى واصطدم بالباب
وجا راجع للداخل وبقينا انا وهو فى المحيط الصغير ..والمطاردة مسخنة دغشت مفتاح النور والدنيا بقت ضلام
وانا والفار لافين فى الضلام ده ...وبقى يصطدم برجلينى والاتنين بقينا خايفين...وبقى ما معروف منو ساكى منو ..
وفى لحظة فتحت الباب ونطيت على كنبة الاستقبال الجنب باب المطبخ...وكذلك فعل الفار....
الذ من الموضوع ده كلو كان الطريقة البضحك بيها شاويش.
حبيبنا منص ... البركة بالعودة وحمد لله علي سلامتك ومبروك للعريس انشاء الله بيت مال وعيال يديك العافية ويباركو ليك جديد أولادك يايابا وجدو ياهو ولدك وما بتقصر .. أرجو مدنا بالنصائح والمعلومات المفيدة حول مثل زياراتك المكوكية ذات الأسبوع الواحد وما هي أفضل الوسائل والتكتيكات لتمضية مثل هذه الإجازات القصيرة بأقصى إستفادة ممكنة وطبعا بأقل خسائر ممكنة .. لآني ناوي أعمل لي زيارة مكوكية زي حقتك دي عشان أشوف الوالدة المريضة وأطمئن عليها وأجي صادي يعني حاجة بتاعة عشرة يوم كدة وبما أني ما متعود علي مثل هذه الإجازات المشحتفة لذا أرجو إسداء النصح يا جميل مع العلم أني ماشي براااااي ...
01-19-2010, 04:52 PM
عبد القادر بابكر
عبد القادر بابكر
تاريخ التسجيل: 11-08-2009
مجموع المشاركات: 462
يارش .. ياخي خف علي الذباب شوية ثم ثانيا الذباب لو عرف مافي السعوط لأتاه هرولة والشكر هنا للسعوط .. وطالما أن الذباب لا يقربه .. فهذا أدعى للوثوق به والإطمئنان له واستعماله دون خوف ..
Quote: تحكَّرت السفة لتفرض سياسة الأمر الواقع وأن لاصوت يعلو فوق صوت الصعوط والقريفة.
البركة بالعودة يا بكور .. صدق أنا مما شفتك عرفتك صحابي أصلو نحن الصحابه ما بنتوه من بعض .. عفيت منك يايابا ..
01-19-2010, 05:12 PM
عبد القادر بابكر
عبد القادر بابكر
تاريخ التسجيل: 11-08-2009
مجموع المشاركات: 462
حبيبنا الباكستاني .. غيب وتعال يا حبيب .. يا خوي انت شغال امتحانات ولا شنو مختفي كده ؟؟؟
اشاء الله يايابا يوم شكرك ما يجي ويباركو ليك جديد أولادك وتفرح بيهم وبي عيالهم وتحتفل بي عيد ميلاد أحفادك بس أوعى تقرب من التورته يا عجوز .. صدق كنت ناسي والله عيد ميلاد جدو !!! كنت مشغول بي عيد ميلاد أمنية الرشيد بابكر سيد أحمد وشغّال فوتوشوب ساااااي وفجأة ما عارف الحصل شنو إتذكرت إنو اليوم عيد ميلاد جدو ولا إشتغلت بالموضوع وواصلت في الفوتوشوب بتاع أمنية وقلت في قلبي جدو عندو أعمام فنانين زيك ممكن يقوموا ليهو بالواجب وفعلا ما قصرت يا حبيب .. هو فعلا بيحب التلي تبيز ديل ..
شفت رش ومحنو مع الذباب ( الضبانة ) ؟؟؟؟؟؟؟؟؟؟؟؟؟ مش بالله مفروض يشكرها ؟؟ على الأقل خلتو يجري ويخج كرشو شوية ..... قال ذبابة قال !!! قال فلاي قال !!! يعني لو دخل عليكم جقر من النوع القدر الكديسة داك أو حتى أب سيسي زي بتاع الكوتش الزراهو في المطبخ داك تعملوا شنو ؟؟؟؟؟ وما هو موقفكم من الصرصور الأمريكي اب شنبات والصرصور الألماني أب كريعات ؟؟؟ إجابة سريعة بالله يارش ...
لقيت يدي فيك الليلة ............ وده كله دفاعا عن السعوط وليس عن الضبانة ..
عودة الثنائي الجميل الى المربع...محمد عيد غاب أكتر من قدورة و جاء قال لينا ألغاز و مشى...مشغول في الشغل...أم مصطفى منعتو يدخل النت في البيت...عندو شد عضلي في العضلة الخلفية الضامة للأصبع الصغير في يده اليمين...الله أعلم كلها أحتمالات...
المهم العود أحمد...و مرحب بكم....تغيبوا تاني و الله أكتب ليكم كيف طاردنا بعوضة في الجزيرة وسط ملايين الباعوض...
تجوا و لا أرشكم...
01-19-2010, 05:44 PM
عبد القادر بابكر
عبد القادر بابكر
تاريخ التسجيل: 11-08-2009
مجموع المشاركات: 462
حسة يا قدورة المصيبة دي شنو الجبتها لينا دي...قربت أطلع شبشبي و أديها ليك ضربة بالباك هاند لمن تآمن...
طيرت لي من راسي الموضوع الكنت أكتب عنه الليلة...كنت عايز أكتب الأزواج زمان و الأزواج حاليا خصوصا لما يكونو متشاكلين بيحصل شنو بيناتم...و منو الفيكم شاف أبوهو مشاكل أمه...ما حصل أبدا و لا حصل شفت أمي مدمعة من شكله مع أبوي و لا شفت أبوي رافع صوته على أمي رغم ان أبوي صعب جدا... حسة الأولاد قاعدين ما قاعدين الدشمان مدور...يجي الولد يسأل أمه مالو يا أمي أبوي بيكورك كده...انت كمان أمشي كده البو اليفقعك انت و أبوك... و لا الزوج يصرخ بأعلى صوته أمام أولاده...انتي كرهتيني حياتي أمشي طيري ان شاء الله ما ترجعي...دي شنو دي..مش كفاية أنا مستحمل وشك السنيح ده...
أدلو بدلوكم لحدي ما أجيكم راجع...
01-19-2010, 07:14 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
يا روش محمد صديق فى مرّة من المرات بمدينة كسلا رميت ليهو كيس صعوط ، بالله الساعة القلَّع عويناتو ونطَ ، غايتو باقى الحكوة منتظر منّو الإذن عشان أتمَّها ليكم .
محمد عيد ........ أشكرك على تعزيتنا فى رحيل الأستاذ الراحل معتصم سودانى ، نسأل الله أن لايريكم مكروهاً فى عزيزٍ لديكم.
01-19-2010, 07:17 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
Quote: البركة بالعودة يا بكور .. صدق أنا مما شفتك عرفتك صحابي أصلو نحن الصحابه ما بنتوه من بعض .. عفيت منك يايابا ..
قدورة يا حبيب .........
سنة حلوة لجدو وعقبال إطفى الشمعة الميّة وانت الوكت داك شاب مليان صحّة وعافية ، تعرف يا قدورة نحن معشر الصحابة الأكثر تضرراً من مشكلة دارفور لأنها تجفف حقول الروعة المسماة مجازاً صعوط.
01-19-2010, 07:34 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
انت ما ناوي ترجع السودان و لا شنو...ابعد من الكوتش ده و الا شكلك كده حتنزل في مطار مدني طوالي...
تعرف يا روش من فوائد استيعاب الخريجين الجامعيين بكلية الشرطة أنها خرّجت ضباط على قدر من الوعى والإستخدام المسئول للسلطات التى بيدهم ، ده من ناحية ، ومن ناحية تانية زولى الكوتش زول الله وزاهد فى الدنيا وما بحب الملاواة والعكلتة ، مواقف كتيرة حضرتها مع الكوتش أكدّت لى تأدبه بفعل الثقافة والتصوف والتربية ، فى إحدى المرّات تحركنا مشياً من أكاديمية الشرطة للسوق الشعبى ، وكنا نسير بمحاذاة الزلط ، أتت سيارة مسرعة وانحرفت عن الطريق ولامست الكوتش ، واحد من أعمامك الذين يستشيطون غضباً للحال المائل "كم أحبهم" ثارت ثائرة هذا الرجل الذى أغضبه هدوء الكوتش وعدم إنزعاجه لرعونة السائق ، همست للكوتش أن هذا الرجل غضب من ردة فعلك ظنّاً منه أنك مواطن غلبان ، بكل تأكيد لن يصنفك تصنيفاً جندرياً منصفاً إذا عرف أنّك ضابط شرطة.
والمواقف تترى عن سماحة نفس الكوتش ( وده لا كسّير تلج لا محلبية يا ناس يا محمشاتية ).
سأعود للحكو عن الكوتش ومواقفه.
01-19-2010, 09:06 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
سمار الليل سلام عليكم وانتو ملمومين كدة إنشاء تتلموا دايما في السمح والزين ..
دخلة كدة على السريع قبل النونو.....
Quote: كنت عايز أكتب الأزواج زمان و الأزواج حاليا خصوصا لما يكونو متشاكلين بيحصل شنو بيناتم
تعرف يارش .. أشاركك الرأي فكل من في جيلنا والأجيال المتاخمة له قبلا وبعدا لم تعلق بأذهاننا مواقف إختلاف شاذة بين والدينا وده طبعا ممكن من جانبي وحسب رؤيتي أعزيه لععد من العوامل أهمها شكل العلاقة التي كانت قائمة بين والدينا في تلك الأجيال وما يحيط بها من خلفيات تربوية تجعل الرجل هو المسيطر وهو صاحب الكلمة والأمر والنهي يعني ببساطة سيادة الثقافة الذكورية لدرجة إنعكست حتى على شكل العلاقة بين الزوج والزوجة حتى أنها وصلت لدرجة التعظيم فنجد أن الزوجة لا تتجرأ حتى على نطق إسم زوجها مهما حاولت معها فيستحيل تذكر لك اسمه ولا يمكن أن تناديه بإسمه مجردا .. ولا ننسى درجة التعليم والثقافة لدى النساء في ذلك الزمان فالتعليم لم يكن متاحا بالكامل كما هو الأن يعني بالكثير ممكن تكون فكت الخط وقعدت في البيت .. كل تلك العوامل جعلت من شكل الخلافات هادئا لحد كبير لعدم وجود الندية كما هو في الأجيال الحالية فعند نشوء أي خلاف أو مشكلة كثيرا ما كان ينتهي لصالح الرجل بحكم الثقافة الذكورية التي كانت سائدة وأستسلام المرأة بالكامل للرجل واعتمادها عليه ..
جاييك ..
01-19-2010, 10:16 PM
عبد القادر بابكر
عبد القادر بابكر
تاريخ التسجيل: 11-08-2009
مجموع المشاركات: 462
ده من جانب الوالدين .. من الجانب الثاني بتلقى أطفال زمان لم يكونوا على درجة كبيرة من التواصل مع الواقع كما هو حادث لأطفال هذا الزمان بحكم ما هو متاح لديهم من أدوات تعليمية وتثقيفية تسهل لهم وتربطهم بالواقع وتتيح لهم تفسير كل الوقائع وفهمها فهما جيدا فطفل هذا الزمن يدرك وسائل التعبير المختلفة حتى نظرة الرجل لزوجته يمكن للطفل أن يقرأها ويدرك مغزاها ناهيك من حالات الشجار والمشاكل ..
01-19-2010, 10:18 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
Quote: كل تلك العوامل جعلت من شكل الخلافات هادئا لحد كبير لعدم وجود الندية كما هو في الأجيال الحالية فعند نشوء أي خلاف أو مشكلة كثيرا ما كان ينتهي لصالح الرجل بحكم الثقافة الذكورية التي كانت سائدة وأستسلام المرأة بالكامل للرجل واعتمادها عليه ..
قدورة يا صاحبى وصحابى
أتفق مع فيما خلصتَ إليه ، عاوز أكتب شوية كلام بس الموضوع ده داير ليهو روقة بال ومخ صاحى ومرتّب ، هسى أنا قايم أصلى العشا واقرا الجريدة وانوم ، نشوفكم باكر إن الله مدَّ فى العمير
01-19-2010, 10:27 PM
عبد القادر بابكر
عبد القادر بابكر
تاريخ التسجيل: 11-08-2009
مجموع المشاركات: 462
يا ريس أنا عادة ما بدخل بالنهار لانشغالي الشديد و بجي برد على المداخلات بالليل...و لكن مثلك لا يمكن أن يؤجل الى الليل... شكرا على مرورك يا ريس و الذي لا يشبعنا...نود أن تبقى معنا قليلا و تتبادل معنا الكلام الطاعم...و على فكرة معظم الناس ديل بيجو بالليل خالص....بعد ما ينومو بنات الشيخ...بس ما تكلم زول يا ريس...انت عارف منصور شيال حال...حسة يمشي يفضحهم في البوست العام....
في انتظار سهرة معاك يا ريس...
01-20-2010, 09:27 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
انت عارف طول الاربعة سنين فى الزقازيق انا ما كنت بعرف الشمال من الجنوب ولا الشرق من الغرب واظن ده حال الاغلبية وما بقدر اقدر الاتجاه الصحيح الا فى القاهرة لما اكون حزا النيل فقط
بعد البرررى االطويل ده عارف فى واحد بتاع عيش حوواشى وكبدة بالدقيق نهاية شارع لكوظ لو انت جاى من زراعة ، السندوتش بتاعو رهيب وبشبع شبع تمام كنا بنمر عليهو لو جايين من حفلة تبعكم لانو الوحيد البفتح لوقت متأخر
بس مافى ذباب ،،،
01-20-2010, 12:16 PM
محمد عيد
محمد عيد
تاريخ التسجيل: 05-03-2009
مجموع المشاركات: 2005
هووووووووووى النهار ده لا بتقدروا عليهو ولا حاجة خلوهو لينا بنجموا ليكم نجام شنو كده ما عارف ولا متذكر تقولوا ضبان نبقى بف باف تقولوا ناموس نبقى بايجون صرصار السايبرمثرين قاااااعد تجيبوا سيرة الشكل والكوراك فى البيوت نصن ليكم صنة بمناسبة الصراصير والقعونجات والحاجات بتاعت سكشن الحشرات الزمان والله ذكرتونى اختى وصديقتى وزميلتى حنان بابكر عبد الرحيم بما امننا فى مربع كاى الفاتح على مكتب دكتور احمد زكى بتاع قسم البلانت باثولوجى فاننا كنا انا وحنان بابكر ونورا سيد احمد وماجدة ونوال بادى وهاجر ونوال (رحمهما الله) كنا كلنا فى سكشن واحد فى سنة تانية حنان بابكر الله يطراها بالخير كانت صديقة عزيزة واخت كريمة وكان بيناتنا مناقرات ومكايدات عديدة لدرجة ان اسمى كان عندها منصور فقط ساعات الروقان اما ساعات ان تكون متغاظة منى فى حاجة فانها لا تعرف لى اسما غير يا صرصور تعال ويا صرصور امشى اين انتى يا اختى حنان بابكر التحية ليكى اينما كنتى نرسلها لك من مربع كاى
01-20-2010, 12:49 PM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
الموضوع بتاع الشكل بين الأزواج ما زال مفتوح لمن اراد أن يدلو بدلوه فيه...لكن و الله ما بقدر التزم بي موضوع واحد...الله خلقني كده...بحب النطيط من موضوع لي موضوع...و من فكرة الى أخرى...جني و جن أتحبس داخل موضوع واحد...عشان كده ما تشتغلوا بي..كان دايرين تواصلوا في الموضوع واصلوا و كان كمان ما دايرين مافي مشكلة...
مرات كده بحن ليك حنين شدديد خلاص للماضي و بقوم أطلع ليك الصور القديمة و أتفرج ليك فيها...و أي صورة أسترجع ليك معاها كمية بتاعت ذكريات كده عجيبة...و أبوي يطول الله عمرة و يمتعة بالصحة و العافية كان بحب التصوير الفوتوغرافي...و جراني أنا بالهواية دي...كان لأبوي كاميرا النوع البتعاين ليهو من فوق ديك...أبوي جاب معاهو الكاميرا دي من روسيا...و جاب معاهو صور كتيرة و ذكريات كتيرة من روسيا...و لو عايز أبوي يحبك أقعد أسمعه و هو بيحكي عن روسيا...كان كل ما يشوف نجاة حوفي يناديها ليك تعالي يا نجاة أنا حكيت عن روسيا...نجاة ملكة المجاملة تقول ليهو ابدا يا عم بابكر...و هو بيكون حكى ليها 514 مرة...يعني استنفذ عدد مرات الحكي... المهم هواية أبوي دي خلفت لي كمية من الذكريات من خلال الصور دي...من أيام عمري سنة واحدة و مرورا بالمراحل المختلفة لحياتي...صور عجيبة والله...لكنها لذيذة...و فيها ترويح غريب للنفس و و شعور بالسعادة الغامرة و أنا أشاهد تلك الصور...و العجب لو لقيت لي زول أورمو ليك...زي ما ابوي ما بيعمل...يعني أنا ورثت من أبوي هوايتين...التصوير و التوريم...
بجيكم راجع...معاي عبدالله...
01-20-2010, 04:42 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
مساء الخير يا جميلين..وكل سنة وجدو بالف خير.. جاية من الاخر على موضوع الصور بتاعة عمى بابكر الله يطول عمره.. انا بحبه جدا ودايما بتغدى مرتين فى بيت ناس الرشيد مرة مع الناس كلهم ومرة تانية المغرب لما عمى بابكر يجى من المصنع اول ما يسالنى يا نجاة حوفى اتغديتى اقول ليه لا منتظراك واجامله واكل واتونس القاه قام قبلى.. موضوع الصور وروسيا وامهانى.. حافظاه صم وبعد 15 سنة لسه بستمتع بيه اول ما يبدا يحكى لى القى ليك اخوان الرشيد واخواته هربوا الواحد تلو الاخر اما انا بحب اعطى اهتمام اكثر للناس البحبونى.. معليش البراية بتاعتى سنينة.. شديد الايام دى.. موضوع الازواج case by case البعودوا نفسهم يصرخوا على بعض من اول يوم حا يستمر الموضوع ويبقى عادى يجرح كل واحد احساس الاخر بدون اى مبالاة من الطرفين اكيد الحياة مليئة بالشد والجزب بين الازواج والاخوان حتى بس اهم شى كل واحديحافظ على احترامه للاخر فى طريقة الكلام وكسر خطوط الاحترام يودى الى شرخ بالعلاقة وجرح لا يمكن التئامه .كلنا نخطئ ونصيب والخلاف لا يفسد للود قضية.. بس الاحترام المتبادل ومراعاة مشاعر كل منا للاخر يقلل حدة الخلافات ويساعد فى نجاح علاقة الازواج مهما كبرت نقاط الخلاف.. من ابسط الاشياء ان يصمت كل عن الاخر حتى تهدا النفوس وتستعد لحوار موضوعى لحل الخلاف جزريا.. دمتم سالمين
01-20-2010, 07:26 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
الليلة البراية خلصت الامتحانات و جات باستراتيجية بري ما تخرش المية...و لكنها بنت الاستراتيجية بتاعتها بدون دراسة مسبقة لحالة البوست...فما لقت ليها زول يبادلها البري فاكتفت ببريتين و انسحبت... بريتها الهنا تناولت بري أبوي و الخلافات بين الزوجين و نست بري أبوها و حسن عطية...
غايتو جنس فرز...
01-20-2010, 07:33 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
ناس مربع كاى سلامات ، رصدتُ ظاهرة دخول الرشيد نهاراً ، ومداخلة نجاة حوفى بنظام ون تو مع الرشيد وعم بابكر والصور ، غاب زهير الزناتى وغاب محمد صديق ، يا كوتش ياخى أظهر وبان ، وبمهلك يومين لو ما خشيت أنا حكوة الصعوط دى واقفة لى فى حلقى وعلى قول بشير خفّة بصغِّر عقلى وبفكَّها والإحصل إحصل ، ويا رشيد ما خايف من محمد صديق لأنو بوليس السودان ما عندو سلطة على مطار الخرطوم ، وأسأل الكوتش ذاتو وزميلو الضابط إبن جنوبنا الحبيب الرائع ين يوم كنّا فى انتظار وصول شقيقى الراحل عمّار للسودان قادماً من السعودية فى إجازته السنوية من السعودية ، الوكت داك دخول المطار لى ناس المطار غير مسموح لغير أفراد الوردية العاملة فى ذلك اليوم ، فلم تنجح واسطتى الشرطية فى دخول المطار ، لكنّها كانت سانحة طيبة للتعرف على الجميل ين ، يا سلام عليك يا جورج لديك حاسة دقيقة فى إصطفاء الرائعين.
01-20-2010, 07:42 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
بكوري...انت حكوة الصعوط لو راجي محمد صديق يجي يديك الاذن...الظاهر عليك حتحكيها في مئوية مربع كاي...خليك ماهل لحدي ما يجيك الاذن... بكوري أسمح لي أقول ليك اخترت الواسطة الغلط لدخول المطار...انت عارف الكوتش ده جنو و جن استغلال سلطاته..و ده أروع ما في الكوتش..بس يا ريت الباقين يكونو زيو...لو شفت ليك سواق تاكسي من بتاعين المطار ديل كان دخلك المطار براحة...
الليلة دخلت بالنهار حصل لي صدمة النهار و ما قدرت أقول حاجة جيت منسحب انسحاب تكتيكي...أما الون تو مع بت شيخي...و الله حنيت عليها لقيتها براها تبرى و هي ما عارفة الليل بقى ما ياهو الليل بتاع زمان...حسهه تكون جرت بطانيتها و نامت...
01-20-2010, 09:42 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
يا سلام على أمير العود الراحل حسن عطية ... الحجِل بى الرِجِل ... يا حبيبى سوقنى معاك ، يا سلام على الغنا زمن الدقش كدَّارى ، موش زى ناس تقوم بينا العربية تودِّينا لى السادة ، عربية تودّيكم فى ستين داهية .
أمس قدّورة خليتو بيطفّى فى لمبات المربع بعد ماصحى الجهال النايمين ، إنتى منو ، أها أمنية بت الرشيد أرح شيلى أهلك ، يا جدّو قوم امشى بى كرعينك ما فينى حيل أشيلك ، غايتو بعد وزّع الشفع على بيوتم جرّا الباب ومرق ، أها الليلة أظنّو قرّش من بدرى .
صدقتَ يا روش الكوتش ممهول وبالو طويل وغِتِت ، غايتو بعد يومين كان ما جا أنا بفِّك آخرى ، سجن سجن ... غرامة غرامة
01-20-2010, 10:34 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
بكوري جبت الاذن من الكوتش....ضرب الليلة من الدمازين و قال حيقعد أسبوع في الدمازين...قلت ليهو بكري بفتش عليك عايز ليهو اذن منك عشان يحكي خكاية كده...قال لي هو بكري ده ما يحكي الحكاوي اللذيذة بتاعت الأكاديمية...قلت ليهو حكى جزء منها ما كلها...قال لي يا زول خليهو يحكي العايز يحكيهو...
ده يعتبر اذن و لا لسة...
01-21-2010, 07:43 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
جلست وحيدا بعد أن ودعت الشيخ صديق الذي زارني معاودا لي بعد أن عاتبتة صباحا...فلقد كنت أعاني من بعض الحمى نتيجة التهاب في الصدر...تناولت قدرا من شراب الكحة المعروف بالأكتفيد فغالبني النعاس و أيقنت انني غير قادر على متابعة مباراة الأرسنال في الدوري الانجليزي...رن جرس هاتفي فرديت بصوت أجش كصوت دجاجة ابتلعت قطعة كبيرة من الخبز دفعة واحدة...جاءني من الطرف الآخر صوت عذب رزين كالطفولة كالأحلام...كالصباح الجديد...كيفك يا رشيد ان شاء الله تكون بقيت كويس من الحمى...و هل يخفى القمر...لا أحتاج لأكثر من ذلك لأعرف أنها منى عباس المبارك...فاستفقت و قفزت الى خاطري أبيات أبراهيم ناجي في الأطلال... يقظة طاحت بأحلام الكـرى وتولى الليل والليل صديـق وإذا النـور نذيـرٌ طـالـعٌ وإذا الفجر مطلٌ كالحريـق وإذا الدنيـا كمـا نعرفـهـا وإذا الأحباب كلٌّ في طريق
سأكمل لاحقا .من الصعوبة بمكان الكتابة بالنهار.....
01-21-2010, 07:52 AM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
هوى يا روش ماتورطنّا ساكت مع ناس البوليس المتصلبتين ديل ، أنا محامى والإذن بالنسبة لى غير معتمد مالم يكن كتابياً وموقع مِن مَن صدر عنه مشفوعاً بشاهدين عدلين (هذا التعريف لايشمل زهير ومجتبى) ، وغايتو إحتياطياً لو متضايق يا رشيد بحكيها ليك فى التلفون.
شفتَ الطلّلة النهارية دى شكلها غريب كيف ، زى إعتقادنا زمان إنو الباسطة ما بتتاكل بى النهار ، والله لو عارف بجينى سكرى كنتَ أكلتها مع شاى الصباح وبعد شاى الفطور وبعد شاى الغدا ومع شاى المغرب ، إحرق أبو الأنسولين ذاتو ، أنا يا رشيد بحب الباسطة ومرة لقيت محل فى البحرين قال عندو بقلاوة دايت ، شلتَ لى كيلو وبديت آكل منو ، ياخى زى البتاكل ليك فى نشارة خشب ، غايتو السكرى ده شاحد الله يوم القيامة إكون ماشّى قدّامى فى الصراط المستقيم ، عشان أديهو ليك دفرة أجدع كرين ما إقدر إنتشلو.
ياخوى مسعول من الخير الكوتش ده عندو شنو فى الدمازين ، آخر عهدى بيهو كان شغّال فى إدارة مكافحة المخدِّرات ، يا ربى عاملين كمين بى سعر المصنع ولا شنو هههههههههههههههه
01-21-2010, 09:19 AM
محمد عيد
محمد عيد
تاريخ التسجيل: 05-03-2009
مجموع المشاركات: 2005
Quote: شفتَ الطلّلة النهارية دى شكلها غريب كيف ، زى إعتقادنا زمان إنو الباسطة ما بتتاكل بى النهار ، والله لو عارف بجينى سكرى كنتَ أكلتها مع شاى الصباح وبعد شاى الفطور وبعد شاى الغدا ومع شاى المغرب ، إحرق أبو الأنسولين ذاتو
و الله يا بكوري جيت بمزاج قلت الليلة أكتب عن منى عباس المبارك..و تلفون آخر الليل بتاع الكوتش على مدخل الدمازين...لقيت ليك نفس زي البنات الببيعو الفول و التسالي يبعوا شوية و يجروا شوية ما مريحاهم الكشة بتاعة البلدية.. و أنا مكتبي نفس الحكاية يطلع فوج و يدخل فوج آخر...فقلت مافي داعي أكتب في جو زي ده و خصوصا ان الكتابة عن زوله زي منى عباس...منى دي دايره ليها رواقة لأنها ما زوله هينة و لا مقطوعة لينة...
و الله يا بكوري ربنا يشفيك و يعافيك من السكري...بقدر ما هو مرض صديق الا انه ثقيل...أنا الحمد لله ربنا عافاني من السكري...و بحب الحلويات حب ما اعتيادي يا بكور...لكن بيني و بينك كلما أفرط القى نفسي مشيت للدكتور بأوجاع شئ ظهر و شئ قولون...و أول حاجة يقوله الدكتور نقص وزنك...عشان أنقص وزني طيب خليهم يقفلوا محلات الحلويات دي...خصوصا محلات الكنافة النابلسية يا بكري...اللــــــــــه من الكنافة النابلسية...و الله لما تمطها كـــــــــــــــده حاجة ما تخلص... الجمعة القبل الفاتت مشيت محل اسمه بلد الخيرات هنا في أبوظبي بيبيع الكسرة و الباسطة و السكسكانية السودانية ديك...خشيت ما خليت ليك حاجة...باسطة سودانية...كسرة سودانية..سكسكانية...فول سوداني...كل حاجة سوداني و خليك سوداني....
لما جيت راجع الشغل يوم السبت لقيت ليك نجاة رابطة ليها كيسين كبار...قلت ليها ديل شنو ديل...قالت لي تمشي تلقط لي في الحاجات البتسمن و تمشي تخليهم لي أنا...شيلهم معاك أسمن بيهم براك...
01-21-2010, 09:48 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
لا يطيق ان يسمع لحسن عطية .. ويتأوه شوقا لدرجة استجداء الزناتى
باحضار العجاج والكتاحة لمربع الجمال حتى ولو داخل جلباب مزعوم للكحلاوى الجميل ..!!
هل هى تناقضات العصر الغريب ..؟ ام انه الشوق الدفين لما كان ايام زمان ..؟
ويا رشا .. قول للزمان ارجع يا زمان
و الله يا حمادة ما قدرت أستمتع بي حسن عطية أبدا...يعني أنا أعشق عثمان حسين و أبراهيم عوض و أبو داؤود...لكن حسن عطية و التاج مصطفى ديل ما ققدرت أستمتع بيهم...رغم أن لهم أغاني جميلة...بس تغنى بصورة تشبه العصر...يعني أغنية زي المنعوك زيارتي دي أغنية جميلة جدا...لكن لو غناها حسن عطية بنوم طوالي...
و بعدين الكحلاوي مالو...عيبو لي...
يا عجوز...
01-21-2010, 10:01 AM
محمد عيد
محمد عيد
تاريخ التسجيل: 05-03-2009
مجموع المشاركات: 2005
والمطاردة مسخنة دغشت مفتاح النور والدنيا بقت ضلام وانا والفار لافين فى الضلام ده ...وبقى يصطدم برجلينى والاتنين بقينا خايفين...وبقى ما معروف منو ساكى منو ..
حراااااااااااااااااااااااااااااااااااااااااااااااااام يا مفترين الضبان والناموس ديل ما يعيشو معاكم ولا شنو دعوا الضبان وحاله دعوه ياكل دعوه يعيش
وكان منظر تلك الزميلة وهى تجرى فى حوش الكلية وراء فئرانها وهى تصرخ .. هوووى الحقونى ... البحث بتاعى طاااار ...!!
ثم ثانيا الذباب لو عرف مافي السعوط لأتاه هرولة والشكر هنا للسعوط .. وطالما أن الذباب لا يقربه .. فهذا أدعى للوثوق به والإطمئنان له واستعماله دون خوف ..
لقيت يدي فيك الليلة ............ وده كله دفاعا عن السعوط وليس عن الضبانة ..
حسة الأولاد قاعدين ما قاعدين الدشمان مدور...يجي الولد يسأل أمه مالو يا أمي أبوي بيكورك كده...انت كمان أمشي كده البو اليفقعك انت و أبوك...
لدرجة ان اسمى كان عندها منصور فقط ساعات الروقان اما ساعات ان تكون متغاظة منى فى حاجة فانها لا تعرف لى اسما غير يا صرصور تعال ويا صرصور امشى
بختك يا منصور السكشن بتاعك كلو جكس اها تخيل سكشنى فيهو منو عبدالدايم الوسخان السفاح بابكر نقا باك السجن مصطفى سكاشن حسين جاك بلانص ديل كلهم بيلعبو مدافعين صانع العاب ولا صانع فرح فيهم واحد مافى
ديدو ده سكشن ولا فيلم الباطنية...
يا رشا البنات ديل خليناهم عشان بيجيبوا الهوا .. جبنا ليك عمك الكحلاوي ينفع ده تأمين عشان لو جا تفتيش مفاجئ
وثانيا" نكاية فى محاولات التبشير العجاجـى التى يقوم بها زمرة من عجائز البوست قســـرا" ...
يعني أنا ورثت من أبوي هوايتين...التصوير و التوريم...
اول ما يبدا يحكى لى القى ليك اخوان الرشيد واخواته هربوا الواحد تلو الاخر
لو شفت ليك سواق تاكسي من بتاعين المطار ديل كان دخلك المطار براحة...
زى إعتقادنا زمان إنو الباسطة ما بتتاكل بى النهار ، والله لو عارف بجينى سكرى كنتَ أكلتها مع شاى الصباح وبعد شاى الفطور وبعد شاى الغدا ومع شاى المغرب ، إحرق أبو الأنسولين ذاتو
غايتو السكرى ده شاحد الله يوم القيامة إكون ماشّى قدّامى فى الصراط المستقيم ، عشان أديهو ليك دفرة أجدع كرين ما إقدر إنتشلو.
قلت ليها ديل شنو ديل...قالت لي تمشي تلقط لي في الحاجات البتسمن و تمشي تخليهم لي أنا...شيلهم معاك أسمن بيهم براك...
01-21-2010, 01:30 PM
محمد عيد
محمد عيد
تاريخ التسجيل: 05-03-2009
مجموع المشاركات: 2005
اقتحمت الموقع المميز لاخونا الاكثر تميزا عبد الحميد البرنس
فى محاولة لاجتذابه الينا من جديد ..
واعتقد اننا موعودون بزخم جميل فى موعد قريب ..
Quote: اخى عبد الحميد ..
أتابع بحب عميق اندياق أحرفك الرائعة
وعباراتك التى تشحذ النفس ألقا وأملا ..
لا اريد اعتراض انسياب ابداعك .. .
ولكنى وددت فقط ان احييك .. واجدد شوقى وأشواق كل الزقازيقاب
وترقبهم لمرور محبب منك اليهم فى دارهم ...
Quote: محمد أخي:
شوق لكم ولتلك الأيام، لا يحد. أطالع حروفكم كل يوم عبر زيارتي الصامتة فأطالع عالما بأكمله سبق لي وأن عشته بكل تفاصيله اليومية الحميمة. رهبتان تقفان إلى الآن بيني وبين الكتابة في وعن (ناس الزقازيق): فرحة وجودكم إلى جانبي عبر كل هذا القرب بعد تسليم لقانون الأيام وتقلبات الزمن. تخيل -مثلا- لدي أحاديث كثيرة أختزنها لمجتبى فاروق وفجأة أراه أمامي ولا أعرف من أين أبدأ ما انقطع ذات مساء بعيد. كنا وقتها في شارع متسع بين بيت الطالبات والاتحاد ناحية مساكن الجامعة. بعد أن افترقنا ناديته وودعته مرة أخرى. ورهبة مطالعة آثار الزمن على وجوه أصدقائي وصديقاتي مثل ما تكشف لي حال ودالجعلي. ثمة وعد بحضور معلن وكتابة مطولة لحظة أن أفرغ من كتابين أعمل عليهما منذ فترة. شكرا لحضورك .
01-21-2010, 02:25 PM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
أعترف أنا الموقع إسمي أدناه بأن ذوقي في سماع الغناء هابطاً ... وأن من يسموا كبار الفنانيين لا يطربوني ولا أحب سماع أصواتهم التي هي أقرب للقبح في أذني من الصوت الجميل .... ولا أسمع إلا من ود اللمين وردي وإنت نازل لتحت ... يعني ناس حسن عطية ومن جايله ما بياكلوا معاي عيش ولا حتي مجاملة ... نحب العجاج والكتاحة ... ومن لف لفهم ...
01-21-2010, 03:52 PM
محمد صديق
محمد صديق
تاريخ التسجيل: 05-03-2009
مجموع المشاركات: 3990
الله عليكم على اغنية الحجل بالرجل انا صاحبة اذن موسيقية ذى عمكم محمد حوفى.. الذى يقول دايما انه امير العود هو اعظم مغنى مر على السودان يسمعون صفوة المجتمع ( هو طبعا اولهم) حا ارجع ليكم عن برى ابوى بامير العود(الرشيد بايكر لا تفرز ولا شى ابوى بريه غير شكل )راجعه ليكم وانا على فكرة برااااااااااية ذى ابوى لانى علاقتى بيهه خاصة جدا الله يطول عمره.. راجعه ليكم بعد الغداء
01-22-2010, 01:00 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
لقاء مع الأستاذة الدكتورة أمنية الرشيد...و الأستاذ الدكتور مهند الرشيد...
انت جاهزة للقاء يا أمنية..
الليله حتحتفلي بعيد ميلادك... أيوه... حتعملي شنو...و ليه اتأخرتي في الاحتفال بعيد ميلادك... عشان كان في امتحان... حأنادي أصحابي...لينا...مزيونة...زينب...نور...و واحدة تانية نور...براءة...و واحدة تانية لينا... برنامج الاحتفال شنو...Party Program نلعب و نرقص...و نطفي الشمعة...و بس
لما تكبري عايز تبقي شنو... دكتورة... ليه عايزه تبقي دكنورة... to take care of my parents بس... أيو بس... ليه عشان ماما حتبقى عجوزة... انت ذاتك حتبقى عجوز... تداخل مهند...انت حتبقى عجوز يا بابا و حتموت و تصحى في الday of judgment .. لما تكبر عايز تبقى شنو يا مهند... عايز أبقى سبايدرمان.. ليه عايز سبايدر... to safe the world ده لقاء بايخ جدا...أنا ما مستمتع بيهو... أقفل على كده و لا عندكم اضافات.. How dare you say that
عشان بايخ...
01-22-2010, 03:11 PM
زينب التجاني
زينب التجاني
تاريخ التسجيل: 01-24-2009
مجموع المشاركات: 504
سلام ياناس مبع كاى سلام يا رشاويا عيد ويا بكرى ويا قدورة ويا منصور ويا نانى ويا زناتى ويا كوووووووولكم وانا بمر على البوست ولسة اجواء الاحتفال بامنية مسيطر على الاحدلث قلت ابداء بلباب حتى امر على رشا فى كاى
ربن يخليهم ليك ويخليك ليهم ويخليكم لبعض
مع انو عايزة اكتب عن زيارة منصور العزيزة والكبيرة عندى الا وانى اتزكرت فجاة وانا بمر على المداخلات مريت على بكرى
اتذكرت الثنائية الكان بشكلا مع هلا
وين هلا يا جماعة
طبعا من تواجدى مع بنات مدنى نانى وعزة كان دايما بيفرضو ناسهم علينا سواء فى الونسة الزيارات فى الاعياد المجاملات فجاة برز اسم بكرى وانا بكون مسطحة مرات كتيرة فى الربط بين الشخصية والاسم
كل ما يحكو اقول ليهم بكرى دة ياتو بس مرة كنا فى الاتحاد لقيت لمة وناس بيضحكو اتارى كل ما يكون بكرى وهلا فى مكان واحد بتكون فى قفشات مشيت من باب الشمار اشوف الحاصل واحد من زملاء حقوق قال لى ديل بكرى وهلا قلت ليهو ود مدنى وينو ياخ طيب ما بعرفو يلاقى معاكم طوالى.وبتونس معاهو
مليون سلام وتحية يا بكور
01-22-2010, 03:48 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
لا يطيق ان يسمع لحسن عطية .. ويتأوه شوقا لدرجة استجداء الزناتى
باحضار العجاج والكتاحة لمربع الجمال حتى ولو داخل جلباب مزعوم للكحلاوى الجميل ..!!
هل هى تناقضات العصر الغريب ..؟ ام انه الشوق الدفين لما كان ايام زمان ..؟
ويا رشا .. قول للزمان ارجع يا زمان
ده إدعاء المواكبة يا عيد ، أصبر خلّيهم الأيّام بتورّيهم ، يا سلام على حسن عطية والتاج مصطفى وعبدالدافع عثمان ، وأولاد الموردة وكل فنانى الزمن الجميل ، شايف نجاة حوفى قالت أبوها قال حسن عطية بسمعوهو الناس الصفوة شكلوا عمك ده مريخابى كمان لأنو المريخاب برضو صفوة الصفوة.
01-22-2010, 03:53 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
أول حاجة نرحب بعودة زوبا بعد غياب طال و طال... و الله يا زوبا شدة ما اشتقنا ليك لما غلبنا التعبير ذاتو... بلغني انك كنتي عاملة الحاردلو... بقول غلطانة...ده ما زمن الحاردلو... الناس دي بقت ناشفة الزمن ده...
مرحبا بعودة زوبا الظافرة...
Quote: ياروش إنتَ من مواليد الكوّة ولا هيروشيما ، يا روش بالمناسبة عندكم فى الكوّة زى الدويم صناعة (الجُبُن)
بكوري..مافي لعب مع أبراهيم شخص الدين شمشيا دهه...
01-22-2010, 04:12 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
Quote: الا وانى اتزكرت فجاة وانا بمر على المداخلات مريت على بكرى
اتذكرت الثنائية الكان بشكلا مع هلا
وين هلا يا جماعة
طبعا من تواجدى مع بنات مدنى نانى وعزة كان دايما بيفرضو ناسهم علينا سواء فى الونسة الزيارات فى الاعياد المجاملات فجاة برز اسم بكرى وانا بكون مسطحة مرات كتيرة فى الربط بين الشخصية والاسم
كل ما يحكو اقول ليهم بكرى دة ياتو بس مرة كنا فى الاتحاد لقيت لمة وناس بيضحكو اتارى كل ما يكون بكرى وهلا فى مكان واحد بتكون فى قفشات مشيت من باب الشمار اشوف الحاصل واحد من زملاء حقوق قال لى ديل بكرى وهلا قلت ليهو ود مدنى وينو ياخ طيب ما بعرفو يلاقى معاكم طوالى.وبتونس معاهو
مليون سلام وتحية يا بكور
مليون تعظيم سلام للبنت الجدعة زوبة ، تحايا صادقة لك يا زوبة ولأسرتك الكريمة ، بجيك بى رواقة لذكريات الزمن الجميل ، وتحايا خاصة لى شرور (شوش الصغيرة).
01-22-2010, 04:25 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
Quote: ده إدعاء المواكبة يا عيد ، أصبر خلّيهم الأيّام بتورّيهم ، يا سلام على حسن عطية والتاج مصطفى وعبدالدافع عثمان ، وأولاد الموردة وكل فنانى الزمن الجميل ، شايف نجاة حوفى قالت أبوها قال حسن عطية بسمعوهو الناس الصفوة شكلوا عمك ده مريخابى كمان لأنو المريخاب برضو صفوة الصفوة.
بكوري ...طالما في نجوم الغد و نجوم بعد الغد الحبة دي ما بتجينا...نسمع الغناء ده بعد ما أزيلت منه الرتابة و الكآبة....
01-22-2010, 04:33 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
سلام يا ناس مربع كاى تانى وشكرا يا رشا على الترحيب ورديت ليك عند امنية محاسن وافقة لى فى راسى عايزة الكمبيوتر وبتسلم عليكم وقالت لى لسة انتى مع اصحابك ناس العالم الوردى
بس حاخليها تقرا عشان تدخل للعالم الوردى دة
سلام
01-22-2010, 05:32 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
Quote: الله عليكم على اغنية الحجل بالرجل انا صاحبة اذن موسيقية ذى عمكم محمد حوفى.. الذى يقول دايما انه امير العود هو اعظم مغنى مر على السودان يسمعون صفوة المجتمع ( هو طبعا اولهم)
سلام على عمنا محمد حوفى أحد أبرز أفراد صفوة المجتمع ، إنشاء الله با نجاة إكمل لى الكيف واطلع مريخابى كمان وبحد أدنى يعشق سيد الأتيام أهلى مدنى.
01-22-2010, 07:09 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
بمجرد أن بدأت في كتابة هذه المداخلة جاء وردي على تلفزيون النيل الأزرق ليغرد بالطير المهاجر...غريب وحيد في غربته...و بدأت استمتع بالأغنية دون الربط بين حالتي النفسية يوم السبت و كلمات الأغنية... وبالرغم ان وردي يجلس على كرسي الا أن صوته يخرج من جوفه قويا صداحا...و الله وردي ده واقف قاعد ياهو وردي...يحتل الرقم واحد دون منازع و منذ زمن طويل...هذه لم تحدث حتى في التنس...فروجي فيدرر لم يستطيع الصمود طويلا عندما ظهر نجم كنادال يضرب الكرة بقوة و شباب فتصبح طوع أمره فيوجها حيث شاء و متى ما شاء....و القصة ليست قوة و شباب...فكم شاب و شاب قوي ظهروا قبل نادال و لكنهم لم يفلحوا في زحزحة فيدرر عن عرشة...القصة موهبة فنادال أطاع بعرش فيدرر بموهبتة... وردي لم يظهر نادال للأغنية السودانية بعد حتى يزحزحه عن عرشها....فسيطر عليها بقوة و بموهبة تزداد جمالا كلما تقدم به العمر...قيل عن وردي أنه شلال ألحان..و أي شلال هو هذا الوردي...شلال يخرج ألحان تنافس بعضها البعض...كل لحن أجمل من الآخر و لا يشبه أحدهم الآخر...فههنالك الكثير من الفنانين يلحنون أغانيهم و لكنهم بعد الحن الثالث أو الرابع يكررون أنفسهم...أما وردي فلا تجد لحنا يشبه الآخر أبدا...لذلك استحق أن يتربع على عرش الأغنية السودانية...و سيظل متربعا عليها لزمن طويل حتى يأتي و بقدرة قادر....نادال الأغنية السودانية...
و السبت البكجنو منصور ده...يوم زي كل الأيام كان عايز تكجنها حتلقى ليك ألف سبب و سبب و كان عايز تحبها كمان حتلقى ليك ألف سبب...
01-23-2010, 03:24 PM
عمر المهدى
عمر المهدى
تاريخ التسجيل: 11-08-2009
مجموع المشاركات: 403
العزيز الرشيد تحياتي لك والاسرة الكريمة والامنبات للصغار بالعمر المديد اشاطرك الراي في وردي لكن مش 100% لانو وردي الكيرف بتاعو مشي في النازل وبلغ القمة في حفلة اديس ولكن بالنسبة لجيلة لسة فيه رقشة لاكن ماوردي بتاع زمان زمان لما يعبي صدرو هواء ويقول يامراسي الشوق تعالي كل الناس بتقوم ليه لو تذكر حفلة الزقازيق مااظن كان في واحد قاعد يعني وردي زي مباريات مريخ هلال تلقي المدرجات واقفة طوال الشوطين الحبيب محمد عيد يامسافر براك شاقي المفازة بليل هاك قلبي معاك ليك ياحبيبي دليل بحق الموده حق الوفا والميل وسوقني معاك الحجل بالرجل درة من الدرر شكرا لك مربع كاي ماطلع زهور وبس
01-23-2010, 03:56 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
Quote: اشاطرك الراي في وردي لكن مش 100% لانو وردي الكيرف بتاعو مشي في النازل وبلغ القمة في حفلة اديس ولكن بالنسبة لجيلة لسة فيه رقشة لاكن ماوردي بتاع زمان زمان لما يعبي صدرو هواء ويقول يامراسي الشوق
ود المهدي...لو بايدي كنت خليت اسمك أطول فترة ممكنة كآخر متداخل..لكن كورة مانشستر على الأبواب
مسا الفل عليكم.. بكرى يا بلدياتى كيفك وكيف اولادك..احب اصحح للجميع انى اسمع حسن عطية منذ انا طفلة لانه اجبارى عندنا فى البيت لذا عند سماعى لاى اغنية لامير العود ياخذنى بساط الريح لحضن ابى اجلس معه فى حوشنا وهو فى غاية الاستمتاع لسماع اغنانى حسن عطية والدى عاشق لحسن عطية اما امةى الله يطول عمرها مجاملة وعلى قولها الاغانى دى بسمعونى فيها من انا عروس ( تعنى ووب الروب) احلى شى فى عمكم حوفى انه مع قهوة الصباح لازم يسمع حسن عطية ومعاها سيجارتين ثلاثة او علبة برنجى كاملة ولو المغتربين موجودين بنسون.. اهم شى الصوت عالى..والويل والهلاك لمن يحاول ان يخفض الصوت لانه هو بكون منتشى وبغنى معاه.. الصيف قبل الماضى جانا زيارة فى ابوظبى طبعا جاب معاه كيس الشرايط بتاعه.. كل صاحباتى بجوا اتونسوا معاه المساء يلقول ليك صوت المسجل طالع من باب البناية.. يبدا يحكى ليهم عن حسن عطية وانه كان وكان فهم بسمعوا على مضض ومجبرا اخاك لا بطل فبقولوا لى وبعدين؟؟ اقول ليهم ما فى حل برنامج من الامس اجبارى الى ان يعود عمكم حوفى الى السودان.. يوم زوجة محمد اخو الرشيد عازماه فى كوفى شوب جات تسوقنا بعربيتها فقال ليها الله نسيت اجيب ليك شريط حسن عطية تسمعيه ونحن ماشين فعاينت لى وقالت لى لا ما اتعرفت على ابوك.. برى .برى شديد قلت ليها برى ابوى برى ممتع يتعدى الخيال(العبارة دى يا بكرى بمناسبة السكرى مكتوبة فى باسكن روبنز-متعة تتعدى الخيال).اما يا بكرى محاولتك لانضامهلرابطة مشجعى ا لمريخ الا دى ما بتقدر عليها. راجعة ليكم انا البراية بت البراى
01-23-2010, 09:18 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
الليلة ما عارف ياتو فيهم النت و لا الكمبيوتر...اتآمروا علي و حرموني من التواصل معكم و ملا الأمور سلكت قلت قطع شك بكوري بيكون بيقرأ في الجريدة استعدادا للنوم و محمد بعد دخلتو الدخله دي تاني ما بيجي راجع أما قدورة فحدث و لا حرج الليلة مرور ساكت ما مر علينا... قدورة انت سمعت و لا جابوا ليك...
في زول صاحي و لا أعمل تلفون آخر الليل د أضربو لي نفسي براي...
01-23-2010, 10:11 PM
أبوبكر حامد الأمين
أبوبكر حامد الأمين
تاريخ التسجيل: 04-03-2006
مجموع المشاركات: 773
Quote: قلت قطع شك بكوري بيكون بيقرأ في الجريدة استعدادا للنوم و محمد بعد دخلتو الدخله دي تاني ما بيجي راجع أما قدورة فحدث و لا حرج الليلة مرور ساكت ما مر علينا... قدورة انت سمعت و لا جابوا ليك...
في زول صاحي و لا أعمل تلفون آخر الليل د أضربو لي نفسي براي...
يا دوبك يا رشيد صليت العشا وماشى أقرا الجريدة ، قلت آخد طلّة أخيرة فجاءنى صوت منى (يا راجل لسع عاوز تساهر)
نجاة حوفى قلتى لى شايل كيس الشرايط ، ياخى أبوك ده من الليلة صاحبى وفردتى عديل كده ، بعدين ما بلاش المحلات الإستفزازية دى ، أها النقول ليك يا نجاة حاجة غريبة ، السكرى ترا من الله ، لكن واحدة من مشاكلى المستعصية كرهى للتلج ، بشرب الموية بدون تبريد عكسى زوجتى التى تشرب الثلج مضافاً له الماء ، ساعات بنكون برا البيت بنشترى آيسكريم وبى طفاسة بشترى لى واحد آيسكريم ، أقوم أبدا آكل فيهو فتقاطعنى منى ( ياخى الآيسكريم ما بلوكوهو ) ، يا ناس لكن مصيبتى بحس بيهو ساقط فى سنونى أسوّى شنو ، تنفجر منى والعيال بالضحك.
01-23-2010, 10:37 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
بديت أتكلم عن منى عباس المبارك و لم أكمل لتداخل عدد من الظروف التي منعتني عن تكملة الكلام... منى عباس لمن لا يعرفونها شخصية عظيمة...رقيقة و لطيفة للحد البعيد و أنيقة و حكيمة و واعية وتملك من الصفات الجميلة الكثير...جمعتني بها و نجاة علاقة طيبة ثم أمتدت الى أسرتها و أصبح اخوانها اخواننا و و الديها والدينا... كنا نتردد عليها كثيرا...في البيت..مكتبها بجريدة السياسة أو عندما تعمل متعاونة بمعرض الخرطوم الدولي... في صائفة ما كان معرض الخرطوم الدولي في احدى دوراتة...كانت منى تعمل كمتعاونة مع المعرض...لها مكتب في كرافان خارج المعرض...كان معي الراحل ياسر الزين قررنا أن نداهم منى في المعرض...ذهبنا الى المعرض مساءا و تجولنا به و سألنا عن منى عباس فدلونا الى مكتبها خارج المعرض..فذهبنا حيث الكارافانات...سألنا عن الأستاذه منى عباس فدلونا الى مكتبها...دخلنا الى المكتب فوجدناها و معها شاب أسمر ذو شعر كثيف...عرفنا اننا حضرنا في الوقت غير المناسب من استقبال منى لنا و نظرات الشاب...كان كل شئ يدعونا الى الخروج و بسرعة...الا أن ياسر الزين و بروحة المرحة حول الجو المكهرب الى جو مرح و لذيذ...ابتدر منى بالسؤال ده الجكس و لا شنو...زاغت منى من السؤال و ردت عليه أعرفكم على الأخ مهدي..مهدي هذا هو زوج منى عباس الآن..لم نكن قد التقينا به من قبل...ياسر مصر على السؤال...الجكس يعني...و منى تتهرب من الاجابة...اتفضلوا أقعدوا...كانت عزومة مراكبية و شعرنا بها...ياسر مصرا على السؤال ما قاعدين نحن ماشين طوالي قلنا نسلم عليك و بس لكن ده الجكس و لا شنو...يا عيب الشوم عليك...و هي تحاول أن تسكته بأي طريقة...طيب خلاص أو كي ما تنقطعوا لو جيتوا تاني أنا قاعدة هنا طوالي...ما جايين تاني لكن ما قلتي لي ده الجكس و لا شنو..منى لا تعرف تضحك أم تبكي من زنقة ياسر الزين ليها...و عشان تتخارج منو قالت ليهو بتردد ااااي ده الجكس...طيب ما تقولي لينا انتي خجلانه مننا و لا شنو...
وطلعنا مشينا...هذه أول مرة التقي فيها بمهدي زوج منى عباس...منى ما أظنها بتكون متذكرة الموضوع ده خاصة و ان منى بقت نسايه لدرجة انها ما متذكرة قصيدتي الكانت عايزة تنشرة لي في جريدة السياسة...أنا كنت قاشر فترة طويلة بالحكاية دي...كنت بقول للناس القصيدة دي و أقوم أقرأ القصيدة...القصيدة كانت حتنشر في جريدة السياسة...فاذا به منى لا تذكر هذه القصيدة أبدا...في احدى زياراتها لأبوظبي سألتها هل تذكري القصيدة التي كنتي عايزة تنشريها لي في جريدة السياسة...قالت لي قصيدة شنو دي...
و لنا عودة مع منى يا تجينا براها و تكمل الافتراءات بتاعتي دي او تنفيها...
01-23-2010, 10:44 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
Quote: يا دوبك يا رشيد صليت العشا وماشى أقرا الجريدة ، قلت آخد طلّة أخيرة فجاءنى صوت منى (يا راجل لسع عاوز تساهر)
بكوري...أنا نجاة حوفي ما حصلت صلاة العشاء صاحية الا بعد العرس...زمان أيام الجكس كنت بمشي ليهم زيارة في البيت الساعة 7 مساءا يصحوها لي من النوم... حسة الساعة عشرة دي لو حصلتها بتسجلها في كتاب جينيس...
عشان كده لا هنا و لا في أبوظبي زول يهرشني مافي...
أساااااااهر ساكت و على كيفي....
01-23-2010, 10:49 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة