|
|
 Re: مربع كاي (Re: الرشيد بابكر)
|
أها وقفنا ويييين ...
وين الكوتش دخل الناموسية ولا شنو ؟؟؟
الحمد لله ضربنا الفول البيتوتي الجميل والله يستر من العواقب ..
بتذكر البرنامج ده كان اسمو تلفون آخر الليل في إذاعة صوت العرب وكنت بستمتع بالاستماع إليه قبل النوم وكان بيجيب ناس متوحدين زيك كدة .. وناس عندهم مشاكل البعجبني في البرنامج الصراحة الكبيرة في عرض مشاكلهم ... المهم كان برنامج ظريف في طريقة الطرح والنقاش الهادي ...
| |
 
|
|
|
|
|
|
|
|
Re: مربع كاي (Re: عبد القادر بابكر)
|
اتفقنا الليلة في الفول البيتوتي...تحملني نجاة بأكل يخرب معظمه في التلاجة بحجة ان أكل الطباخ بتاعنا السوري ما كويس...الليلة قلت أقوم على الفول ده...و قلت للطباخ ما تجيب لي عشاء..و ظبطت الفول بزيت السمسم و الجبنة السودانية و العيش المصري...حسة واقف ألف أحمر..
و الله يا قدورة عفارم عليك...من قبيل بفتش لي تلفون دي أبت تجيني...و كنت عايز أقول اذاعة الشرق الأوسط بدل صوت العرب...عليك الله الكركم ما لازمني...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا خوي لا كركم ولا حاجة
الفول بس يكون طفى ليك لمبة من لمبات الدماغ ودي حالة طبيعية وبترجع تنور تاني ..
عودة لموضوع الكوليسترول أنصحك نصيحة أخوية لله كده عليك بعصير الرمان الطازج يعني تشوف ليك محل بتاع عصائر فريش وتمر عليهو كل يوم وياحبذا كمان لو الصباح قبل الفطور وتضرب ليك كباية كبيرة وتركب الزلط ... وتواظب علي العادة دي لمدة طويلة .. عصير الرمان الطبيعي يمتاز بقدرة فائقة على خفض نسبة الكوليسترول إضافة لفوائده الأخرى المتعددة .. الدكاترة ديل ياخوي أحسن ليك تفك دربهم غير ما بدخلوا فيك الوهم ما بعملوا ليك حاجة .. كل ما ينفع الإنسان ربنا موفره في الفواكه والخضروات الطبيعية ...
جرب وحتدعي لي .....
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلامات يا ناس
يا رشيد ..يا حبيب ...صباحآ جميلا
| Quote: .بل لأنني بطبعي أبحث عن الرفقة... |
انت يا حبيب لا تبحث عن الرفقة فحسب....انت محبٌ لكل الناس
ولانك محبٌ صادقٌ فى محبتك ...لابد لك من رهق...ايما رهق
اشهد انى وكثيرون نحب كتاباتك ونهفوا اليها....غير انّا نفتقر
الى طاقة الحب التى وُهبتها...
لقدورة ...كل الود ولك ايضآ
| |
|
|
|
|
|
|
|
|
|
Re: مربع كاي (Re: محمد صديق)
|
سلام ايها الساهرون ...
اوعوا اكون بقيت ليكم زى القال عليها الشاعر القديم ..
وزائرتى بليل ...
ابرى واستبرى ما اكون ليكم حمى ... !!
خلل كبير بجهاز البيت لم ينصلح حاله الا قبل قليل
يا كوتش المسألة ما بعد ولا حاجة ...
لكن ما أشار اليه الرشيد فيه جزء كبير من الحقيقة ..
فمرحلة ما بعد المئوية .. لم نستطع التأقلم معها بالشكل المطلوب
رأيكم شنو لو نقسم المسائل ...
يعنى نعمل فريق يستلم تحريك البوست العام ...
وفريق يشتغل فى البوستات الداخلية .. وتكون منافسة شرسة
وبعدين نصـعّد المتفوقين لدور الـ 16 ثم الـ8 وهكذا ...
المهم كل فريق يحاول يكوش على المحترفين الموجودين اضافة الى الشباب الجدد
وغايتو انا من هســـه مسجل مع الخمسة التحت سن 20 ..!!!!
| |
|
|
|
|
|
|
|
|
|
Re: مربع كاي (Re: محمد صديق)
|
قدورة..سبحان الله تصور أنا من المحبين للرمان دون أن أعلم بقصة خفضه للكوليسترول دي...بس مش عصير..بنعمل الرمان و الفراولة مع بعض كده...أو سلطة فواكه مع الرمان...و تلقاني بقرقشو ليك بالحب بتاعو...
من الليلة عصير الرمان جاهو بلى...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا ناس يا عسل الباكستاني وصل ...
أبو العيد الحبيب مساك الله بالخير ..
الونسة ظريفة مع الرشيد والكوتش محمد صديق
كنا فاقدنك بس ...
أبو الكركم ذاتو .....
| |
|
|
|
|
|
|
|
|
|
Re: مربع كاي (Re: محمد صديق)
|
سلامات يا ناس
Quote: وين الكوتش دخل الناموسية ولا شنو ؟؟؟
|
يا قدورة ...صباحك جميل
اليوم ده عندى استثنائى ...ما عارف ليه تهيأت لهذه السهرة
رغم عدم امتلاكى لادوات السهر هذه الايام...
وزى ما قلت للرشيد فى [ ولمن فاتهم الاستماع ] اعلنت عليك السهر
انت برضو امشى بى هناك لانو اديناك لكزة ...
| |
|
|
|
|
|
|
|
|
|
Re: مربع كاي (Re: محمد صديق)
|
محمد عيد وصل...أحسن أمشي ألبس هدوم الشغل و أجي أقعد معاكم و من هنا للمكتب طوالي...
قبل شوية كنت عايز أقطع فيك يا حمادة و أقول الزول ده شايفو حايم بي برة..
| |
|
|
|
|
|
|
|
|
|
Re: مربع كاي (Re: محمد صديق)
|
قدورة الحبيب ...
واحشنا والله يا عجوز ..
غايتو عصير الرمان بتاعك ده والله قبل كده شربناه فى محل
بتاع شوام فى المدينة المنورة ...
والله لغاية الليلة لا انا ولا اولادى ما قادرين ننساهو ...
وعموما كلنا حنكون من رواده .. لانو الكوليسترول محاوطنا كتير
من تلاتة سنة وانا كل شهر اتجارى معاهو .. مرة افوتو ومرات ود الكلب يحصلنى ..
//////\\\
الكوتش الجميل ..
عدم تداخلى فى بوستك الطاعم سببه اننى فهمت معناه على انك ستقوم باستعراض مشاركات سابقة
والناس تعلق عليها ...
ومعظم ما تطرقت له حتى الآن سبق لنا التداخل والمناحرة فيه ...
ثم اننا كنا مجهزين النقنقة لغاية فبراير ..
وطالما انه وصل سريعا فحتما ستجدنا معك هناك قريبا
| |
|
|
|
|
|
|
|
|
|
Re: مربع كاي (Re: محمد عيد)
|
| Quote: قبل شوية كنت عايز أقطع فيك يا حمادة و أقول الزول ده شايفو حايم بي برة.. |
والله يا حبيب كنت عامل حضور لكن فى مشاكل فى الجهاز اتعبتنى شوية لغاية ما انعدلت
عموما خليك بالبيجامة الصوف وجر عليك بطانيتك .. انا لا نمت ضحوية ولا بعد المغربية الليلة
لكن من باكر انشاء الله .. نعيد سيرتنا الاولى .. ( بطل بكاء يا بكاى ..!! )
قبل قليل كنت اودع منص بالهاتف .. الزول ده التقول ماشى يعرس هو ..!!
متجرس جنس جرســة ..!!
| |
|
|
|
|
|
|
|
|
|
Re: مربع كاي (Re: محمد صديق)
|
تعرف يا كوتش ..
صاحبك الرشيد ده عندو إمكانيات هائلة واستعداد فطري ليجعلك تنجذب إليه وتسترسل في الحديث معه دون كلل أو ملل .. يعني شوف الراجل ده كتل قلبنا كيف بكلامو الفات داك والهضربة كما أطلق عليها وخلانا نساهر معاهو لا إيدنا لا كراعنا بالرغم من أنني مثلك يلزمني القيام الخامسة صباحا للاستعداد لرحلة المدارس لكن وجودك بطلتك الحلوة وكلامك الطاعم ووجود الرشيد بدموعه الظاهرة على خدوده من أثر التوحد كل ذلك أجبرني على نسيان الوقت والتمرد عليه علنا لا سرا .........
| |
|
|
|
|
|
|
|
|
|
Re: مربع كاي (Re: عبد القادر بابكر)
|
قدورة والله أنا عفيتك...قوم أمشي نوم و تعالوا بكره بدري...محمد عيد ده بكون صاحي الساعة عشرة مساءا...خليني معاهو و في الغالب الأعم حأتجرس أنا في الآخر..
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: قبل قليل كنت اودع منص بالهاتف .. الزول ده التقول ماشى يعرس هو ..!!
متجرس جنس جرســة ..!! |
انت ما عارف منصور سيد جرسة...
ما شفتو قبيل عمل ليهو خمسين مداخلة...قلت ليهو انت يا زول ماشي خمسة ايام ولا جاك اللوتري...
أمشي نوم و تعال بكره بدري...
تصبحوا على خير جميعا...
| |
|
|
|
|
|
|
|
|
|
Re: مربع كاي (Re: عبد القادر بابكر)
|
أبو العيد الحبيب الغالي ...
يعني بالله هسه نعمل معاك شنو جايينا الساعة 2 صباحا
وانت عارف انو كلامك علي قلوبنا زي العسل وونستك صعب انو الواحد يقطعها ....
ياخوي لو كنت واظبت علي الرمان ما كنت عملت ليك مخزن بتاع كركم في الشقة
وكنت وفرت علي نفسك مشوار العلاج الطويل ده ..
لكن لسه ما فات شيء ممكن تواصل فيهو
وعينك ما تشوف إلا النور ياحبيب ....
أنا بقترح السهرة بكرة انشاء الله في حوش الجميل محمد صديق رايكم شنو ؟؟؟؟؟؟؟؟؟؟؟؟؟؟
على أن يقوم المالك بتوفير صحن الفول وفتة الكوارع ....
مافي داعي للسمك هسه خليهو لامن نجيك بالدرب عدييييييل ....
| |
|
|
|
|
|
|
|
|
|
Re: مربع كاي (Re: عبد القادر بابكر)
|
Quote: أنا بقترح السهرة بكرة انشاء الله في حوش الجميل محمد صديق رايكم شنو ؟؟؟؟؟؟؟؟؟؟؟؟؟؟
على أن يقوم المالك بتوفير صحن الفول وفتة الكوارع ....
مافي داعي للسمك هسه خليهو لامن نجيك بالدرب عدييييييل .... |
موافق...
تصبحوا على خير...خلونا نقفل الدكان ده...
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: أنا بقترح السهرة بكرة انشاء الله في حوش الجميل محمد صديق رايكم شنو ؟؟؟؟؟؟؟؟؟؟؟؟؟؟
على أن يقوم المالك بتوفير صحن الفول وفتة الكوارع ....
مافي داعي للسمك هسه خليهو لامن نجيك بالدرب عدييييييل .... |
وانا كمان موافق ...
وكمان علىّ اجيب معاى صحن الجقاجق .. والرشيد يكتّر الشطة بالليمون ..!!
| |
|
|
|
|
|
|
|
|
|
Re: مربع كاي (Re: الرشيد بابكر)
|
قمت باكمال ما بدأت أمس عن موضوع ما قبل الهجرة...و قعدت أكتب و أكتب لحدى ما الشم خوخت و بردن ليالي الحرة...و عملت اضافة رد...في نص العملية الموضوع عصلج...ثم صفحة بتقول الاكسبلورر ما قادر يفتح الصفحة...رجعت لي وراء لقيت كلامي كلو ضاع...
قمت خليتو لحدي ما يجي مزاج تاني...
السهرة قبل و لا بعد مباراة ريال مدريد يا جماعة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
الحكاية دي عمرها أكتر من خمستاشر سنة..
و لكنها تنشر لأول مرة...
في شهر أكتوبر من العام 1994 قررت و معي نجاة أن يكون زواجنا يوم 5/1/1995 ...
كنت بعمل في كورس بتاع كمبيوتر في معهد بايت بالقرب من سينماء كلوزيوم...
كان في جيبي 25 جنية..يا دوب تكفيني للرجعة الى البيت...
دقيت سدري وقلت لي نجاة بكل ثقة يوم 5/1 يعني يوم 5/1...
لم نستطع الاحتفال بالمناسبة..لأني لا أملك الا 25 جنية حق البص...
و جدت نفسي أمام تحدي و كله كان مبني على محصول السنة في أبو زمام...
كنا أنا و نجاة قد جهزنا مسبقا و من حر مالي...الذهب و الشيلة و بعض العفش...
كنت أملك عدد من الخراف في المزرعة بأو زمام..كانت كافية لأي وليمة...
أقترب الموعد و كل شئ ماشي حسب الخطة و موعد الحصاد اقترب...
و لكن أهم شئ لم يجهز بعد...
بدلة العرس...
ماذا أفعل....ماذا أفعل...
وجدتها وجدتها...صرخت كما صرخ ارخميدس...
فقد ذكر في التاريخ أن الملك سيراكوس وهو أبن عم أرخميدس شك في أن الصائغ الذي صنع له التاج قد غشه وأدخل في التاج فضة بدلاً من الذهب الخالص وطلب من أرخميدس أن يبحث له في هذا الموضوع بدون إتلاف التاج.
وعندما كان يغتسل في حمام عام، لاحظ أن منسوب الماء ارتفع عندما انغمس في الماء، وقد قيل إنه خرج بثياب الحمام في الشارع يجري ويصيح (أوريكا، أوريكا) أي وجدتها وجدتها، لأنه تحقق من أن هذا الاكتشاف سيحل معضلة التاج.
أما أنا فلقد صرخت و أنا بكامل ملابسي... وجدتها و جدتها...
أرسلت خطابا بالبريد المستعجل الى صديق عمري منصور ...
ثم ألحقت خطابي بتلفون ...
لقد أقحمت نفسي داخل احدى كابينات التلفونات بالبوستة بالخرطوم..و أصبحت أصرخ..
هذه المرة لم تكت وجدتها...
بل كانت..الحقني يا منصور بالبدلة العرس قرب...
قال لي منصور ما تشيل هم حنمشي أنا و محمد عيد نجيب ليك البدلة..
رغم ضيق الكابينة شعرت بالمهلة و السعادة...
و كده تكون اتحلت كل المشاكل...
وصلت البدلة من السعودية....
لونها الأسود جميل...زرايرها الذهبية رهيبة...
و لكنها تأبي أن تدخل...
و حتى بعد دخلت بصعوبة...هي في وسط البطن..
تلك البطن التي لم تتحول الى كرش بعد...
يا أخوانا الناس ديل قروا معاي في KG1
يعني ما متخيليني أكون بقيت كيف بعد سنين عددا من التخرج...
يا ربي الناس ديل كانو متخاتتين البدلة دي و واحد فيهم ما دفع
قاموا جابوا لي بدلة بقروش زول واحد بس..
لم يتبقى وقت لارجاع البدلة ...
و دبرت نفسي بعد ذلك ......و لكن...
ذهبت صرختي أدراج الرياح....
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: كان حضور بكري الحدث الأجمل بعد المئوية فلقد تداخل معي في كل الليالي رغم مشغولياته... |
مبروك يا روش الميل السابع وعقبال الميل المية .
أولاً آسف للإنقطاع يوم أمس حيث تناولنا الغداء والشواء خارج المنزل ، وحين أقبل البرد لإستلام وردية الليل باغتناه بالعودة للمنزل ومعنا المدعوين على الغداء ، شربنا شاى المغرب وبعده عشرة ونسة إمتدت حتى الساعة الحادية عشرة مساء ، بعدها شعرت بالخمول بسبب عدم النوم بعد تناول الغداء حسب الروتين اليومى ، نظرت ناحية الكمبيوتر فوجدت الفاتح متربعاً على الكمبيوتر ويضع السماعة على أذنيه وهو فى غاية الإستمتاع ، فقلتُ فى نفسى : دعه يستمتع بعد أن أفسد فياريال ليلته ، ودعوتُ له من قلبى أن يتعثر ريال مدريد الليلة.
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
| Quote: ودعوتُ له من قلبى أن يتعثر ريال مدريد الليلة. |
بكري...ان كان ذلك يسعد الفاتح فليكن حتى و ان أفسد ذلك ليلتي...
افتقدتك بشده ليلة البارحة و جلست أنوح حتى حن علي الثلاثي الجميل قدورة و محمد صديق و محمد عيد...
أسعدني كثيرا أنك قضيت يوما سعيدا برفقة عائلتك...
| |
|
|
|
|
|
|
|
|
|
Re: مربع كاي (Re: طارق جبريل)
|
Quote: ياخي بيتكم دة زي الحوش الفيهو حفرة دخان
جيت ماشي داخل عليهو براااااااااااااحة |
جبريلا حسه يقولو ليك الفي راسو شنو...حيرتنا...
و الله كان ما جيت ياني الكنت ضارب لي كمال الشادي بالليل ده....
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: بكري...ان كان ذلك يسعد الفاتح فليكن حتى و ان أفسد ذلك ليلتي... |
يا سلام عليك يا روش وعلى روحك الرياضية ، داير أنداح إقوموا ناس المعارضة إقولوا محلبية .
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلام يا بتوع المحلبية .... دفقوا محلبيتكم ساي ... ما تشتغلوا بزول .... الفيديو نزل بعد ما قوم نفسي ... لكن عليك الله يا الرشيد ... رايك شنو في اللمبة البتولع في المسرح دي ما رهيبة ...
| |
|
|
|
|
|
|
|
|
|
Re: مربع كاي (Re: زهير الزناتي)
|
| Quote: سلام يا بتوع المحلبية .... دفقوا محلبيتكم ساي ... ما تشتغلوا بزول .... الفيديو نزل بعد ما قوم نفسي ... لكن عليك الله يا الرشيد ... رايك شنو في اللمبة البتولع في المسرح دي ما رهيبة ... |
أبو الزوز أنا عارفه دردقة...لكن الكاتل و الحاي الله...
انت قاصد ياتو لمبة...
| |
|
|
|
|
|
|
|
|
|
Re: مربع كاي (Re: زهير الزناتي)
|
أبو الزوز....
وكان اللمبة قالت بق .... تبقى اللمبة دايرى الدق
أبو الزوز...يرضيك... يرضيك الله
ما تستغل وحدتي دي و تجيب لي الهواء...
| |
|
|
|
|
|
|
|
|
|
Re: مربع كاي (Re: الرشيد بابكر)
|
من أكبر مشاكل الزراعة في السودان هما التمويل و التسويق...
هذا هو مدخلي الى تكملة ما بدأته أمس عن مرحلة ما قبل الاغتراب....
كنا مجموعة من الخريجين جمعتنا آمالنا و طموحاتنا...احباطاتنا و يأسنا...اجتمعنا معا لنغير من واقعنا...المكان جمعية أبو زمام الزراعية بشمال الجزيرة...الأرض لم تزرع من قبل...قناة الماء أو الترعة تم حفرها حديثا كامتداد لترعة الجزيرة الرئيشية و التي تسمى بالميجر....معظمنا لا يملك الخبرة الكافية في الزراعة...
اجتمعنا و وضعنا خطة لموسم صيفي ما يخرش المية...قررنا زراعة الذرة و الفول السوداني كمحصولين أساسيين و مساحات صغيرة تترك فيها الحرية للأعضاء لزراعتها بأي محصول مناسب...
التمويل من البنك الزراعي على طريقة السلم...و هو نوع من التمويل يقوم فيه البنك بتمويل الزراعة على أن يستردها عينية على شكل جوالات من الذرة...
أحضرنا جرارتنا من مخازن البنك الزراعي ببحري...كنت أحد الذين قاموا بقيادة واحد من ستة جرارات من بحري و الى موقع المشروع بالجزيرة و معي آخرون و قمنا بشراء لوري و شاحنة نصف نقل....
بدأنا بداية طيبة و جيدة و تم تأسيس المحصول على أحسن ما يكون...و عندما خارجت أول البادرات من على وجه الأرض غادرت نفوسنا آخر شياطين الاحباط...ففرحنا و ابتهجنا و كسحت الابتسامات الوجوه التي طال ليل احباطها...ثم هطلت علينا كذلك أمطار الخير و كان خريفا طيبا..لم يكن مهما لدينا المطر لأننا كنا نروي من النيل...زاد هطول الأمطار الأمر الذي أدى الى غرق محصول الفول السوداني الا القليل منه...كان بالمشروع مشكلة فنية..حيث لا يوجد مصرف للماء الزائد...و كنا في أمس الحوجة اليه عندما تزايد هطول الأمطار...ليس الأمطار وحدها...وبسبب هطول الأمطار يتوقف المزارعيين عن ري محاصيلهم الأمر الذي يجعل الماء المنساب من الخزان يتكاثر عند نهايات الترع ...تسبب ذلك في كسر الترعة التي تروي المشروع...حاولنا سدها فلم نستطيع..تغننا طول الليل و نحن نحاول سدها و عندما عجزنا تركناها ففاضت و غرق محصولنا...
نجا محصول الذرة بل و نجح نجاحا باهرا و حقق انتاجية كبيرة في السنة الأولى...و لكن عند تسوية الحساب مع البنك الزراعي ذهب 90% من المحصول للبنك و بقي لنا ما لا يسد الرمق...و لكن ذلك لم يفتر من عزيمتنا و فرحنا لنجاحنا في عامنا الأول وواصلنا المسير لنجهز للموسم التالي...
أقروا دي لحدي ما أكمل ليكم بكرة اذا أمد الله في الآجال...
| |
|
|
|
|
|
|
|
|
|
Re: مربع كاي (Re: محمد صديق)
|
ليه يا كوتش ...اشرح أبن أفصح...
لو كنت قايله زوغة فهي ليست كما تعتقد....هذا موضوع بديته في هذا البوست...و لم أكملة و هذه حلقة من حلقات سابقة له...مكتوب عندي من بعد المغرب و قلت أنزله قبل النوم...
| |
|
|
|
|
|
|
|
|
|
Re: مربع كاي (Re: محمد عيد)
|
إن العين هي وسيلة التخاطب إذا ما تعطلت لغة الكلام, وهي مرآة الروح التي تكشف لنا عن شخصية صاحبها..والعين هي مفتاح الشخصيات:
فالعيون الواسعة:
تدل على أن صاحبها شخصية حساسة و شجاعة وقيادية وهي مندفعة وراء العاطفة.
والعيون الكبيرة المبللة بالدموع :
تدل على أن أصحابها عاطفيين ويعيشون في حالة حب دائم.
أما العيون المتوسطة :
ترمز إلى الإعتدال.
والعين الضيقة الصغيرة:
تعكس الرغبة في الإبتعاد عن الآخرين, و لكنها إذا شعرت بالحب الحقيقي أخلصت مع أنها تتميز في الوقت نفسه بالغيرة الشديدة.
| |
|
|
|
|
|
|
|
|
|
Re: مربع كاي (Re: محمد عيد)
|
ان العيون التي في طرفها حور ------------- قتلننا ثم لم يحيين قتلانا
يصرعن ذا اللب حتى لا حراك به ------------ وهن اضعف خلق الله انسانا
اها خشوا يا سمار ..
| |
|
|
|
|
|
|
|
|
|
Re: مربع كاي (Re: محمد عيد)
|
بشار بن يرجوخ من كبار شعراء الدولة العباسية الذي مثل بشعره وحياته ومواقفه ظاهرة تدل على العصر الذي نشأ فيه فقد ولد هذا الشاعر في نهاية القرن الاول الهجري وكانت شمس الدولة الاموية تؤذن بالافول، وقد عاصر في مطلع شبابه موقف الدولة الاموية من تعصب للعرب على حساب العجم، وكان بشار فارسيا من ناحية آبائه واجداده،
عاش بشار بن برد ما يقرب من سبعين عاما قبل ان يقتله الخليفة العباسي المهدي متهما اياه بالزندقة وكان بشار الى جانب جرأته في غزله يهجو من لا يعطيه وكان قد مدح الخليفة المهدي فمنعه الجائزة فأسرها بشار في نفسه وهجاه هجاء مقذعا بل وهجا وزيره يعقوب بن داود وافحش في هجائه لهما فتعقبه الخليفة المهدي واوقع به وقتله.
روى بشار عن نفسه انه انشد اكثر من اثني عشر الف قصيدة ولكن ما وصل الينا من شعره لا يرى في هذا القول سوى مبالغة هائلة فشعره ليس كثير او يعلل بعض من يرون ان ما وصل الينا اقل بكثير مما قاله بشار.
ان الرقابة الدينية والسياسية والاجتماعية في عصره قد حذفت كثيرا من شعره بعد وفاته وهو متهم في معظمه خاصة في الغزل والهجاء.
وذات دل كأن البدر صورتها
باتت تغني عميد القلب سكرانا
ان العيون التي في طرفها حور
قتلننا ثم لم يحيين قتلانا
قلت احسنت يا سؤلي ويا املي
فاسمعيني جزاك الله احسانا
يا حبذا جبل الريان من جبل
وحبذا ساكن الريان من كانا
قالت فهلا فدتك النفس احسن من
هذا لمن كان صب القلب حيرانا
يا قوم اذنى لبعض الحي عاشقة
والأذن تعشق قبل العين احيانا
| |
|
|
|
|
|
|
|
|
|
Re: مربع كاي (Re: الرشيد بابكر)
|
حمادة مساك الله بالخير
جاهزين للعيون...أين قدورة و الكوتش...
بكوري حضورك مطلوب فورا...
جبريلا تعال كلمنا عن العيون في الغناء الشايقي الجميل...و أرجو انزال أمثلة مسموعة..
أبو الزوز....كلمنا عن العيون و نزل أمثلة عليها بس ما من نادي الشرطة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
عيونك زي سحابة صيف تجافي بلاد وتسقي بلاد
وزى كلماتا بتتاوة تتوة لمن يجي الميعاد
وزي فرحا يشيل مني الشقا ويزداد
وزي عيدا غشاني وفات عم البلد اعياد
وزي وطنا وقت اشتاقلو برحل لية من غير زاد
بدون عينيك بصبح زول بدون ذكري وبدون ميلاد
| |
|
|
|
|
|
|
|
|
|
Re: مربع كاي (Re: الرشيد بابكر)
|
عيوني وجعوني و زول جاء مارق مافي...
البتوحي الناس العيون ياحبايب .. هن أساس الريد والفتون
العيون البيض لو صفن .. يجرحنك ويتلاصفن
مرة نظرن لي وقفن .. شالوا نومي وما أنصفن
العيون السود كاحلات .. في دلالهن متهاملات
يجرحنك ما سائلات .. يتركنك متجاهلات
العيون الفيهن نعاس .. هن أساس معنى الجناس
هن بثيرن في الناس حماس .. هن بقودوا الزول للجنون
جنني يااخي العيون ياحبايب .. هن أساس الريد والفتون
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا عيد وياروش جننتوا العيون جن كلكى ، والله أغنية الحقيبة كيَّفتنى حتة دين كيف ، أجلستُ بجوارى بت شيخى وأوحيت لها أنها وأخريات معنيات بهذا القول ، تظاهرت بالتصديق مرة وتشاغلت مع العيال أحايين أخر ، ياعيد ياخى عليك دينك كتر من الغنا السمح ده ، ده تطريب صافى بدون ضجة موسيقى وتنقية شوائب الصوت عبر الساوند سيستم ، سأهتف على طريقة زهير الزناتى : أحب البيض العيون ذاتو هههههههههه
| |
|
|
|
|
|
|
|
|
|
Re: مربع كاي (Re: الرشيد بابكر)
|
حباب ناس مربع كاي الزينين
دائماً كلامكم جميل وشايلين الكاس
من زمن كلية الزراعة في السماحة والوجاه
بنمسي عليكم يا حلوين.
| |
|
|
|
|
|
|
|
|
|
Re: مربع كاي (Re: ميسرة سيد أحمد)
|
بكوري...كنت بتتعشى و لا شنو...هاك البيض العيون ده...
الريس ميسرة ...و الله طلاتك دايما تبهجنا...تعال ساهر معانا مرة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
رشا .. بكور والريس
مساءكم سعيد
معذرة بعد ان بدأت القعده ..
اضطررت للخروج من المنزل لطارىء الم بالجيران
وهذه عودتى ...
ارجو ان تواصلوا
فان سحر العيون مازال يشع بسناه
| |
|
|
|
|
|
|
|
|
|
Re: مربع كاي (Re: محمد عيد)
|
من أجمل ما قال بدر شاكر السياب
عيناك غابتا نخيل ساعة السحر ---- او شرفتان راح يناى عنهما القمر
عيناك حين تبسمان تورق الكروم ----------- وترقص الازهار كالاقمار في نهر
تنبض في غوريهما النجوم ويرجه المجداف وهنا ساعة السحر
| |
|
|
|
|
|
|
|
|
|
Re: مربع كاي (Re: الرشيد بابكر)
|
رش .. السؤال يبرق داخل العيون ..!!
أعتقد - والعهدة على الراوى - طالما انهم كوامر
فان الحديث عن العيون قد يجر الناس الى الحديث عن كبر السن وضعف النظر
واصحابك دقوا البيرق
...!!
| |
|
|
|
|
|
|
|
|
|
Re: مربع كاي (Re: الرشيد بابكر)
|
الاخوان الاعزاء
يا ساكني المنحنى والوادي
يا رواد الركن اليماني
مربع كاي
هدية خاصة
شوك الشوق-كلمات محمد الحسن سالم حميد
________________________________________
شوك الشّوق .. لي الشّوفه آ خي
ضارب في إطن النسج الحي
يا مُنقاشو أحزاني إنشرّت ..
وادي الفرح إتمدّدْ صيْ
يا راحلين عِنْ دُغُش اللّيل ..
ما لاقيتو جناياً زي
تكية نخل الفجر الجاسر ..
فوق لي المترة عراجين ضيْ
يا رعّاوة العرب الرُّحّل ..
ما لاقاكم في المطراني
في كاويق الجرف الأمحلْ
بين أسراب الرهو الرّاحل ..
ساند أكتاف اللّيل الميّلْ
عِنْ ساساق الغيمة عليكم
بين رقراق الخيمة معاكم ..
ما أديتوهو شوي بي حَرْجَلْ
آ رطانة الليلهم ليّلْ
ما لاقاكم في ونساتكم
بين الشّادي وبين كاساتكم
في صلواتكم ..
عِنْ دعواتكم
أو دقساتكم
عِزْ خلواتكم
زول زول الله إن ِمحِن آ بسألْ
الهبّاد لي غُلْب اخواتو
الفرّاح عوّان الحلِّي
الفدّار لي الليل ظلماتو
آ نجمات شِقّيشْ قولِنلِّي
ما لاقاك طالع مندَلِّي
المطعوم من طيبة أمّاتو
كالفَجّاج الندّ نباتو
موج البحر الأحمر هوجتو
وعِرْق العَرَق اللاّوي ثباتو
جانا الشُّدَر الأخضر منو
ونار الشُّدر الأخضر جاتو
راح شقيش أب قولاً واحدْ
ليش ما يرجع من غُرباتو
طوّل .. طول ما طلّ علينا
وقاطع مننا جواباتو
الغابات جات تنشد منّو
العُربان راجين جيّاتو
أديناهم عَلَقو وعَرَقُو
وصورتو يقلِّب في كتباتو
ضُل رشّاشُو ..
ركيزة زولو
ساعات سِلْمو ويوم حوباتو
سِنْ طوريتو ..
ولون أبرولو
وحِسْ طمبورو البي نغماتو
لهلب عشق النّاس الفُقَرا
وبرّد جوفِن ..
بغنواتو .. الدّخَلت فينا ..
تمرق جينا على جلاّتو
وجيداً جينا ..
طلقنا وشينا ..
ووش أطفالنا الليلة حلاتو
غني معانا غُنانا هويتو
غني العالم غني حياتو
لا ساومنا عليها قضيتو
ولا فكّينا من إيدنا وصاتو
ألف شليل يا نورا يفوتو
شان ما يجيكي شليلك ذاتو
ولما يجيكي .. شليلك ذاتو
| |
|
|
|
|
|
|
|
|
|
Re: مربع كاي (Re: محمد عيد)
|
مساء العسل عليكم يا سمار الليل ..
يا حرامية القلوب والمشاعر ..
تسطون على الصدور بليل ..
وتنزعون الغالي والنفيس........
معليش والله يادوووب فتحت ولقيتكم ما قصرتوا حتى كمان لسه ما تميت القراية
قلت ألحق بي باقي عويناتي ديل أدردق ليكم التماسي قبل ما أمشي أنوم..
بكرة إنشاء الله أدلي بدلوي في عيونكم ديل ...
| |
|
|
|
|
|
|
|
|
|
Re: مربع كاي (Re: عبد القادر بابكر)
|
كيمو الغالي أشكرك بحرارة على الهدية الراقية...انت عارف حميد ده مكسر فيني كم ضلعة كده شكرا يا كيمو...
و نرد لك الهدية بأغنية حقيبة...ايه رأيك...
أنا ما معيون
الشاعر سيد عبدالعزيز
-----------------------
أزاى وداوى خدود وعيون
يا ناس .. أنا ما معيون
حليف آلآم وعيونى عيون
دائى عظيم ودواى مصيون
سامى بعيد عن العيون
وانا عقلى بقاله رقيب وعيون
أغنى عليها وأبدى فنون
أفوق الساجعة حنان وجنون
أأمل ليمها الما مظنون
وسيف هجرانها على مسنون
تجدنى مغيب وحولى شجون
كانى اسير فى حب مسجون
أملى بكل قماح معجون
موتى دنى وسببى العرجون
زينة زكية حراك وسكون
تامى جمالها الما ملكون
لو عبرنا صفاتها تكون
هى أول غانية تضوى الكون
عفاف وترف فوق القانون
دلال وسبات وهياب وحنون
فى فاهاه الدر منظوم مكنون
ومدام ومسك وعسل مشنون
ناعمة جسيمها حرير ووهون
طبيعة بطيب الند مدهون
عزيز أرواحنا لذاك يهون
ملى اذا أًبح مهيون
لمكلة جنوده خدود وعيون
لحاظة تخيف قايد المليون
وترهب عنتر ونابليون
ليها سلامى بعد ما يصون
عاشق حب قمر محصون
وبعد ما غنى الطير فى غصون
يبقالها سمير وسرير وحصون
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: معليش والله يادوووب فتحت ولقيتكم ما قصرتوا حتى كمان لسه ما تميت القراية
قلت ألحق بي باقي عويناتي ديل أدردق ليكم التماسي قبل ما أمشي أنوم..
بكرة إنشاء الله أدلي بدلوي في عيونكم ديل ... |
قدورة مكنتك ما قسمت...لكن عشان عيونك سامحناك...
تعال بكره ...و كان لقيتنا في و لا مافي أدلو بدلوك...
| |
|
|
|
|
|
|
|
|
|
Re: مربع كاي (Re: الرشيد بابكر)
|
عيونك زي سحابة صيف تجافي بلاد وتسقي بلاد
وزى كلماتا بتتاوة تتوة لمن يجي الميعاد
وزي فرحا يشيل مني الشقا ويزداد
وزي عيدا غشاني وفات عم البلد اعياد
وزي وطنا وقت اشتاقلو برحل لية من غير زاد
بدون عينيك بصبح زول بدون ذكري وبدون ميلاد
&&&&&&&&&&&&&&
البتوحى الناس العيون
يا حلاتن .. هن اساس الريد والفتون
العيون البيض لو صفن .. يجرحنك ويتلاصفن
مرة نظرن لى اوقفن .. شالو نومى وما اونصفن
العيون السود كاحلات .. فى دلالن متهاملات
يجرحنك ما سأئلات .. يتركنك متجاهلات
العيون الفيهن نعاس .. هن أساس معنى الجناس
هن بيتيرن فى الناس حماس .. هن بيقودوا الزول للجنون
جننى ياخى العيون يا حبايب .. هن اساس الريد والفتون
| |
|
|
|
|
|
|
|
|
|
Re: مربع كاي (Re: محمد عيد)
|
حمادة لنعترف ان لم ترتقي الى المستوى المتوقع...و ذلك بسبب غياب الشباب و ثانيا لانشغالك بمسألة جيرانك...أليس كذلك ؟؟؟
أقترح أن نكتفي بهذا القدر لهذا اليوم على أن نعاود غدا في ظروف أفضل...و لا ايه رايك؟؟؟
| |
|
|
|
|
|
|
|
|
|
Re: مربع كاي (Re: الرشيد بابكر)
|
رش يا حبيب ...
صدقنى كأنك قريت الجواى .. كنت عاوز اقول ليك نفس الكلام
******
عموما كل سنة وانتو طيبين بمناسبة عيد زواجكم غدا
وتحياتى لنجاة والعيال
ولكن أعذرنى ...
فقد لا استطيع مشاركتكم الاحتفال
فيوم غد له ذكرى حزينة فى نفسى
غدا" الذكرى السنوية لرحيل والدى الحبيب
الذى فقدته فى مثل هذا اليوم منذ 6 سنوات ...
الوالده واخوتى يقيمون ليلة لتلاوة القرآن فى منزلنا مساء الغد
وانا اعتدت فى مثل هذا اليوم ان اقضيه فى مكة لاداء عمرة لروحه الطاهرة
والترحم عليه ..
آسف جدا .. لم أقصد افساد مناسبتك عليك
ولكنها هى الدنيا ...
| |
|
|
|
|
|
|
|
|
|
Re: مربع كاي (Re: محمد عيد)
|
حمادة...ليرحم الله والدك رحمة واسعة و ينزلة منازل الصديقين و الشهداء...
فهو ان كان قد رحل عن هذه الدنيا الفانية...فان عمله لم ينقطع عنها و قد ترك وراءه أبناء صالحين مثلك وأخوانك...بلغ الوالدة عني تحياتي وليلهمها الله الصبر الجميل..
يكفينا أن تتزكرنا و أنت تدعو لوالدك بمكة...
لك كل الود و الحب...
| |
|
|
|
|
|
|
|
|
|
Re: مربع كاي (Re: الرشيد بابكر)
|
زجاجة ميراندا و لمياء ادريس و قلب طفل
كنت في السنة الأخيرة في الكلية...لم تكن مشاراكاتي الاجتماعية كما كانت من قبل..ربما لاحساسي بأن الزمن قد تسرب من بين يدي و بدأت أجهز نفسي لوداع المدينة التي أحببت و عشت فيها أروع سني حياتي...الزقازيق ظهرت بها كثير من الوجوة الجديدة...أنحصرت علاقاتي في عدد قليل من الناس معظمهم أصدقاء لي في السنتين الأخيرتين...
دعيت الى الحفل الذي أقيم لا أذكر بأي مناسبة باحدى الشقق بالزقازيق...لم تكن لدي الرغبة في الذهاب أول الأمر...ثم غيرت رأي بعد ذلك و ذهبت متأخرا...
حضرت الى الشقة مكان الدعوة فوجدتها مزدحمة جدا...عدد الحضور كان كبيرا على الشقة الصغيرة الضيقة...وجدت نفسي واقفا بالكاد داخل الشقة...دخان السجاير الكثيف يمر عبري من الداخل الى خارج الشقة المزدحمة فيضايقني...عدد كبير من الوجوه لا أعرفها...سألت فعرفت أنهم برالمة...
تفاعلي بما في خارج الشقة كان أكثر من ما بداخل الشقة...قادمون جدد الى الحفل...منهم من أعرفهم و منهم من أراهم لأول مرة...أصوات الأقدام على السلالم صعودا و نزولا...اما قادمين أو راحلين...بالكاد أسمع ما يدور داخل الشقة...صوت العود و أحدهم يغني يأتي خافتا من الداخل...
قررت أن أبقى لخمس دقائق ثم أذهب...أنقضت الخمس دقايق و لكن قبل أن أدير ظهري ذاهبا لفت نظري برلومة سمراء فاقع لونها تسر الناظرين...لماذا هي بالتحديد...لست أدري...ركزت بصري نحوها...ثم فجأة اندلقت زجاجة ميراندا كانت بجوارها على جوربها...تضايقت و أخذت تبحث عن مناديل ورقية هنا و هناك حتى تجفف الميراندا التي بللت جوربها...تسابق من حولها في مدها بالمناديل...كانت معظم المناديل تأتي من البنات...قلت في نفسي...ما حدث كان بفعل عيني..فلقد ركزت عليها كثيرا..تمنيت لو كنت جالسا بالقرب منها لكنت خلعت لها قميصي لتجفف به هذا الجورب...
أنتهى المشهد و لم تتحقق أمنيتي و قررت الذهاب...استدرت للخروج فاذا بصوت نسائي يناديني...يا رشا يا رشا...كانت الأخت و الصديقة لمياء ادريس تناديني...طلبت مني الدخول للجلوس بجوارها...قلت لها ان المكان مزدحم و لا يوجد مكان...طلبت ممن يجلسون بجوارها أن يزحفوا قليلا فأفسحوا لي مكنا ضيقا ثم أخذت تلح علي بالدخول...دخلت بصعوبة متخطيا رؤسا و أرجلا و كراسي حتى وصلت الى حيث تجلس لمياء...استقبلتني بحفاوتها و قلبها الأخضر كعادتها...حشرت نفسي حشرا في المكان الضيق الذي فسح لي...لاحظت ان البرلومة قد لفت نظرها المشهد و لفت نظرها حميمية لمياء و مناداتها لي بيا رشا...لعلها كانت تضحك في سرها من هذا الاسم الذي نوديت به..
جلست أتبادل الحديث و لمياء...كنا قريبين جدا من البرلومة اذ يفصل بيننا شخصان أو ثلاثة...لم أعد أذكر من كان يغني ليلتها...فلقد كنت مشغولا جدا بالبرلومة...اسررت لصديقتي لمياء بذلك..فقالت لي انها برولمة زراعة...
انتهى الحفل و أوصلت لمياء حتى شقتهم ثم واصلت طريقي الى شقتنا و أنا استنشق الهواء البارد اللذيذ و النشوة تملؤني...فقلبي الطفل سعد بالجلوس قريبا منها حتى و ان لم أحادثها..
توالت الأحداث و طلبت من لمياء أن تأخذني لزيارة البرلومة بعد أن عرفت أنها تربطها بها علاقة طيبة فوافقت...ذهبنا الى شقة البرلومة و قدمتني لمياء لهم و من بعد ذلك كنت أذهب وحدي بدون صديقتي لمياء ...و نجحت في استمالة البرلومة و الظفر بقلبها...
أول تواصل بيننا كانت كلمات كتبتها لها على دفتر للمحاضرات...و هي ليست بكلماتي...كتبت لها لأنك أنتي زرعتك بالقلب شمعة فأنتي الملاذ الأخير و أنتي شروق الشمس في كل دمعة...و ما زالت هي الشمعة و الشمس اللتان تمدان حياتي بالضياء دون ملل أو كلل أو ذاتية...
ان البرلومة هي نجاة حوفي...
فلقد كانت زجاجة الميراندا و لمياء ادريس و قلبي الطفل من أهم أدوات القدر التي صنعت أنصع صفحات تاريخ حياتي...
التاريخ 5/1...
المناسبة...الذكرى الخامسة عشر لزواجي ورفيقة دربي نجاة حوفي...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا سلام يا رشدي علي الحكاية الحميمة ... بس حادث الميرندا ده لازموا شوية تحليل ... وأكيد ما عين ... يا البرلومة خافت من نظرات السنير ... وإما سحرها بوسامته وجاذبيته لأن معروف عن الرشيد بابكر زول قيافة ووجيه ... وانا أرجح الأخيرة رغم أن نجاة حوفي دفعتي وصديقتي ، إلا أن الحق يعلو ولا يعلي عليه ، ونجاة ذاتها زولة حقانية حا تجي تقول الحقيقة ، وإلي ذلك الوقت ... نهدي هذه العائلة الزقازيقية باقة من الورد والحب ... علي هذا الحب الجميل .. ونسعد كلما نشاهد عائلة زقازيقية سعيدة ونجحت في حياتها الزوجية والعملية ... نجاة والرشيد ثنائي لا يستحق منا سوي رفع القبعات والدعوات والأمنيات بأن يسعدهم الله أكثر وأكثر ... ولكما مني الود ,,,,
والموضوع ذو شجون ويستحق العودة مرة أخري
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: نهدي هذه العائلة الزقازيقية باقة من الورد والحب ... علي هذا الحب الجميل .. ونسعد كلما نشاهد عائلة زقازيقية سعيدة ونجحت في حياتها الزوجية والعملية ... نجاة والرشيد ثنائي لا يستحق منا سوي رفع القبعات والدعوات والأمنيات بأن يسعدهم الله أكثر وأكثر ... ولكما مني الود ,,,, |
أبوالزوز يا صديقي...
أشكرك على ثلاث...
رفع المعنويات...
و رفع القبعات...
و باقة الورد...
أما الود فنحن نبادلك أياه و بحب...
تحياتي و ودي لك و لعائلتك الجميلة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا رشدي ما تتخيل روحك أتخارجت مننا بشوية السطور ديل ... عايزين نعرف كيف طرحت للبرلومة وكان ردها شنو .؟ خليك شفاف يا حبيب ...
| |
|
|
|
|
|
|
|
|
|
Re: مربع كاي (Re: زهير الزناتي)
|
سلام يا رشيد القوم
| Quote: لا يستحق منا سوي رفع القبعات |
غايتو القبعات دي اترفعت لمن قالت الرووووووب
جمال فارح يقول قبعات و إنحناءات
الشادي يقول قبعات
الزناتي قبعاتو كلها رفعها فاضل القبعة العسكرية بتاعت صحبو الكمندان
يا جماعة ممكن الواحد يرفع طاقيتو و يخت طاقية زول تاني؟؟
أحبك يا الرشيد و صحبك أبو بكر
| |
|
|
|
|
|
|
|
|
|
Re: مربع كاي (Re: محمد آدم النور)
|
سلامات يا ناس
رشيد الحبيب....سلام
كل ذكرى وانت ونجاة والاولاد بالف خير
اللهم ربى ...احفظ هذه الاسرة ..وزد اواصر
المحبة التى تربطها....
تحياتى الى نجاة والاولاد
| |
|
|
|
|
|
|
|
|
|
Re: مربع كاي (Re: محمد صديق)
|
| Quote: أحبك يا الرشيد و صحبك أبو بكر |
أستميحك عذراً يا روش بتحية مولانا ومبادلته حباً بحب .
كل سنة وأنت ياروش ونجاة وبذور المحبة أمنية ومهند بألف خير ، لكن يارشيد لقيتك خترى مرّة ، نجاة دى من مدنى وناس مدنى لايعشقون من الملاكمة سوى وزن الثقيل ، الخلاّ نجاة تحب وزن الريشة وروش سرّو باتع ، لكما ياروش ونجاة كل الحب وأمنيات بدوام المحبة وصافى الوداد .
| |
|
|
|
|
|
|
|
|
|
Re: مربع كاي (Re: محمد صديق)
|
ثلاثة أردنيين و فلسطيني (هكذا يصنفون أنفسهم) سحبوني من دفء بيتي الى برد خيمتهم و سقوني من مر قهوتهم في ليلة نفسي أقرب فيها الى الميراندا أكثر من القهوة...الحوا علي باتصالاتهم لدرجة انني غيرت رأي في الموبايل الذي كان يجعلني أطمئن على أسرتي أينما كانوا..ففكرت أن أكتب مقال أسمية الموبايل اختراع يقض المضاجع و يوتر النفوس...
أبو الزوز...لم أكن يوما شفافا لأني كنت شاطر في المدرسة...دي زوغة يا حبيب...
جلا الحبيب...انت أرفع أي حاجة بنقبلها منك....ان شاء الله عمتك البتلفها ببراعة دي...
يا كوتش يا زواغ...اعتذر عن غيابك ليلة البارحة أولا...لكن أشكرك يا صديقي و بلغنا تحياتك لنجاة..
| |
|
|
|
|
|
|
|
|
|
Re: مربع كاي (Re: الرشيد بابكر)
|
بكوري الحبيب...شكرا لك يا حبيب...لقد كانت نجاة و ما زالت من الوزن الثقيل...أما أنا فلقد كنت أخف من الريشة...لذلك سقطت من أول لكمة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: أما أنا فلقد كنت أخف من الريشة...لذلك سقطت من أول لكمة... |
شفيق يا راجل ...........................
تعرف يا رشيد هذه القصة أعطتنى مفاتيح لشخصيتك التى تمتاز بالإصرار والمثابرة والتصميم على بلوغ المرام ، هذا فضلاً عن الجدية والمسئولية فى نظرتك للعلاقة وقيادتها نحو مآلات مفرحة وهذه الأخيرة إستقيتها من سردك سابقاً لظروف زواجكم وبدلة عيد ومنصور والسفر للإمارات وأنت لاتملك سوى دعاء الوالدين والرغبة فى ستر الحال ، ورجل بهذا الجمال حرىٌّ به أن ينجح وأن يُحب ، فيا سعدانا بك وبنجاة وبكل هذا الألق والبهاء.
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلامات يا ناس
| Quote: يا كوتش يا زواغ...اعتذر عن غيابك ليلة البارحة أولا...لكن أشكرك يا صديقي و بلغنا تحياتك لنجاة.. |
رشيد الحبيب....
ما كانت زوغة ولكن عطل اصاب جهازالكمبيوتر
اتواصل معكم اليوم من جهاز زميلنا بركية.....والذى
ادهشه هذا التواصل العجيب بين ناس تفرقوا فى هذه
الدنيا الواسعة.....
التهنئة ...كان لابد من تقديمها على الاعتذار....
غير انى اعتذر الآن ...
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: التهنئة ...كان لابد من تقديمها على الاعتذار....
غير انى اعتذر الآن ... |
يا كوتش...لقد افتقدناك كثيرا ولكنا عذرناك قبل أن نعرف العذر...فأنت رجل لا يخلف ميعادا...الا اذا الشديد القوي يمنعك...
| |
|
|
|
|
|
|
|
|
|
Re: مربع كاي (Re: محمد صديق)
|
Quote: فيوم غد له ذكرى حزينة فى نفسى
غدا" الذكرى السنوية لرحيل والدى الحبيب
الذى فقدته فى مثل هذا اليوم منذ 6 سنوات ...
الوالده واخوتى يقيمون ليلة لتلاوة القرآن فى منزلنا مساء الغد
وانا اعتدت فى مثل هذا اليوم ان اقضيه فى مكة لاداء عمرة لروحه الطاهرة
والترحم عليه .. |
الحبيب محمد عيد .... الرحمة والمغفرة لوالدكم الذى نسأل المولى عز وجل أن يسكنه فسيح جنّاته مع الصدّيقين والشهداء وحسن أولئك رفيقا ، وكما أسلف الرشيد أن ماتقومون به أنت وإخوتك سيكون من جنس العمل الذى لاينقطع به عمل المرء بعد موته ، حفظكم الله وجعل البركة فيكم لرعاية فسيلة الخير التى غرسها والدكم وهى بحوله تعالى أصلها ثابت وفرعها فى السماء تؤتى أكلها كل حين .
| |
|
|
|
|
|
|
|
|
|
Re: مربع كاي (Re: عبد القادر بابكر)
|
الاحباب .. بكور وود جبارة
جزاكم الله خيرا وبارك فيكم
ونسأل الله الرحمة لجميع موتانا وموتاكم وموتى المسلمين .
***********
قدورة يا أصلى .. ده الشــغل ..
والشغل الموجــه كمان او الناطق بلغة الفنانين امثالك ..
حقا" رشا ونجاة wonderful couple
ربنا يزيد سعادتكم ويمد فى ايامكم ويخلى ليكم اولادكم ..
| |
|
|
|
|
|
|
|
|
|
Re: مربع كاي (Re: محمد عيد)
|
رحم الله موتانا ورزقهم الجنة
ربنا أرحم أبونا عيد فأنت به راحم
اللهم آمين
Quote: ما باسألكم..
كميه من التلج خرافيه..
كتلتونا بالبرد.. |
ياخ جات كدا...إنت مش معايش فصل الشتاء هس ...و تيب!!!!
يا جماعة تشابهت علي البوستات
دا بتاع لمن فاتهم الإستماع و لا مربع كاي؟؟؟؟
| |
|
|
|
|
|
|
|
|
|
Re: مربع كاي (Re: محمد آدم النور)
|
| Quote: ديل 15 وردة حمراء ومن عندي زيادة وردتين إمعانا في استمرار السعادة |
قدّورة يا خترى ، عليك دينك دى عملتها كيف؟ براك ولا إستعنتَ بى صديق؟ ، كنتَ مصنفك معانا فى جماعة الأمية التكنولوجية ، ياخى أعمل لينا حصص تقوية وبضمن ليك معاى كمال الشادى وآخرين.
Quote: يا جماعة تشابهت علي البوستات
دا بتاع لمن فاتهم الإستماع و لا مربع كاي؟؟؟؟ |
لكن يا مولانا ما صعَّبتها كده ، كان إسم زول كنتَ بساعدك بس إسم بوست دى كتيرة ، إستنانى بجى بقودك من إيدك بسلمك للكوتش فى محلو ، اها قصَّرتا معاك؟
Quote: ما باسألكم..
كميه من التلج خرافيه..
كتلتونا بالبرد.. |
نشاغلكم تقولوا علينا وهم ، نمدح الرشيد تقولوا تلج ومحلبية ، الشكيَّة لى اب ايداً قوية.
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
Quote: كل عام وأنتم بألف خير
وعيد سعيد مع أمنياتي القلبية لكم بدوام السعادة والهناء
ديل 15 وردة حمراء ومن عندي زيادة وردتين إمعانا في استمرار السعادة |
يا سلام عليك يا قدورة....شغل جميل جدا و ليس بغريب عليك فأنت رجل فنان و مبدع من زمان...
أشكرك من كل قلبي على هذا العمل...و على كل الورود الجميلة....
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: ما باسألكم..
كميه من التلج خرافيه..
كتلتونا بالبرد.. |
حاتم المره الجاية لما تجينا عندك حلين....
يا تجيب معاك تلجك و تجي تكسرو عندنا هنا...
و لا تجي لابس تقيل....
لكن سؤال...شايفك ما جبت سيرة المحلبية؟
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: حقا" رشا ونجاة wonderful couple
ربنا يزيد سعادتكم ويمد فى ايامكم ويخلى ليكم اولادكم ..
|
شكرا يا حمادة يديك العافية....و يحفظكم الله و أسرتك جميعا....
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: لكن سؤال...شايفك ما جبت سيرة المحلبية؟ |
حليلي أنا..
حليل المحلبيه..
البي عيني ما شفتها..
حأكلم ليك الدومينيكانيه..
| |
|
|
|
|
|
|
|
|
|
Re: مربع كاي (Re: Hatim Gubara)
|
يا الرشيد
انا المرة الفاتت دقست
وإنت شايفني داقس وما وريتني الدرب
محمد عيد ملا لينا الشاشة المرة الفاتت بلالين
وأنا اشيل وابارك يا ربي ده عيد زواجهم والله عيد ميلاد واحد من الاولاد وأخوك ما فاهم حاجة
لمن كلمتك بالتلفون قلت لي ده عيد ميلادي انا
يا أخي بطل شكل ومشاكل
هههههههههههههههه
المرة دي والله ما ادقس
اول حاجة افهم كل حاجة بعدين اخش
عمك محمد عيد ده ملا لينا الشاشة زهور المرة دي في شنو ؟
على الطلاق ما ادقس تاني !!
| |
|
|
|
|
|
|
|
|
|
Re: مربع كاي (Re: كمال الشادي)
|
كيمو الحبيب...لو للدقسة انت دقست في ان الملا الشاشة ورود كان قدورة وليس محمد عيد...و عشان ما تدقس الدقسة التانية...المناسبة عيد زواجنا الخامس عشر..
أوعك تقول لي شكل و مشاكل...والله أكلم ليك طارق جبريل...
| |
|
|
|
|
|
|
|
|
|
Re: مربع كاي (Re: محمد صديق)
|
كده الواحد بقلب جامد
يقول ليكم و للاخت نجاة حوفي من على بعد
الف مبروك عيد زواجكم وكل سنة وإنتو بالف خير ومن حب على حب انشاء الله
ودي طبعا يا الرشيد عشان قاعدين نسويها ما بقول ليك شك شكل ومشاكل والذي منه
مرة تانية الف مليون مبروك
والله يديم المحبة بينكم
ويخلي ليكم اولادكم
يا رب
| |
|
|
|
|
|
|
|
|
|
Re: مربع كاي (Re: كمال الشادي)
|
Quote: ودي طبعا يا الرشيد عشان قاعدين نسويها ما بقول ليك شك شكل ومشاكل والذي منه
مرة تانية الف مليون مبروك
والله يديم المحبة بينكم
ويخلي ليكم اولادكم
يا رب |
كيمو يديك العافية...نشكرك يا شفيف على الكلمات الطيبات..
و بركة يا كيمو البقيتو بتعلموها ...الله مرقنا من الشكل و المشاكل...
و لا تكون خفتني أكلم ليك طارق جبريل...
| |
|
|
|
|
|
|
|
|
|
Re: مربع كاي (Re: الرشيد بابكر)
|
رسالة خاصة إلى الاخت نجاة حوفي
-----------------------------
العزيزة الغالية نجاة حوفي
الف تحية واحترام
والف مليون مبروك بمناسبة زواجك ال 15 من الوجيه الرشيد بابكر
----------------------------
شوفي يا ست نجاة
الراجل ده ابقي عليهو عشرة
على الطلاق انحنا اديناك راجل
يسد عين الشمش
اديناك راجل يوزن السودان كلو
أديناك راجل حنين ورقيق وكريم وإبن اصل كريم
أديناك راجل نقااااق
يعني بتاع نقه دقاقة
انشاء ما مقصر معاك في دي
أخيرا أديناك راجل لو نزل الانتخابات قدام شعبولا بتاعنا داك يفوز عليهو
| |
|
|
|
|
|
|
|
|
|
Re: مربع كاي (Re: كمال الشادي)
|
كيمو يا عسل...
أنا من أمبارح بحنس في نجاة عشان تقوم تفتح البوست ده...و كل مره تقول لي و الله ما فاضية...
ياخي عليك الله و لو دقيقتين بس...تقول لي أشوف...
لكن بعد الكلام السمح الانت كتبتو ده...بكره لازم أخليها تقرأ الكلام ده...
تشكر يا كيمو...الله يديك الفي مرادك...
| |
|
|
|
|
|
|
|
|
|
Re: مربع كاي (Re: الرشيد بابكر)
|
بعد أن قضينا اجازتنا في تركيا كنا في غاية الشوق للسودان و كان يوم سفرنا من استانبول الى الخرطوم...جهزنا أنفسنا مبكرا و قمت بعمل اجراءات المغادرة من الفندق الذي كنا نقيم به و أنزلنا العفش و جلسنا باللوبي في انتظار بص شركة السياحة ليقلنا الى المطار...تأخر البص قليلا و نحن في غاية القلق حتى حضر..كان اليوم مزدحم جدا في شوارع استانبول...قطع البص مسافة كيلو في نصف ساعة...تملك القلق سائق البص أيضا و هو يحاول تخطي السيارات في شوارع في غاية الازدحام...خيم الصمت علي و على نجاة خوفا من أن تفوتنا الطائرة...و لكي أخرج من حالة القلق هذه قلت لنجاة لو أراد الله أن نسافر اليوم سنسافر...اما اذا قدر لنا البقاء فليست هنالك مشكلة...اطمئنت نجاة كثيرا عند سماعها كلماتي...
أخذ البص يزحف و الزمن يمر سريعا حتى وصلنا الى المطار و لم يبقى الا 45 دقيقة...ركضنا ركضا عبر ردهات المطار و ساعدنا السائق التركي بالتحدث الى موظف الكاونتر ليمررنا سريعا...كان النداء الأخير للطائرة على اللوخات في المطار...تخطينا الكل و وقفنا أمام الجميع و تمت أجراءات المرور و تقدمنا الى كاونتر الجوازات و تخطينا الجميع كذلك...كان الكل يعبر عن ضيقة لما نقوم به...
هرولنا بل و جرينا عبر المطار في طريقنا الى البوابة....مطار استانبول من أكبر المطارات التي مررت بها في حياتي...مررنا عبر خمس من الأرضيات المتحركة...كنا فاقدي الأمل في اللحاق بالطائرة...
و صلنا الى البوابة و وجدنا مجموعة من السودانيين يقفون و هم يقومون باجراءات الدخول الى صالة المغادرة...ثم توقفت فجأة الاجراءات و تسائل الناس عن السبب فلم نجد اجابة...بعد نصف ساعة أخبرنا موظفو الصالة بأن السفرية قد تأجلت لساعتين...و جدناها فرصة لتجميع الأنفاس من الركض الطويل..و ألقانا بأجسادنا المتعبة على الكراسي خارج الصالة...ارتحنا قليلا ثم ذهبنا الى كافتريا قريبة من الصالة و تناولنا فيها بعض الساندوتشات و عصائر...ثم تغيرت اللوحة مرة أخرى لتعلن عن تأخير أربعة ساعات...ثم تغيرت بعد فترة ليست بالطويلة لتعلن عن تأخير غير معروف...
مجموعة من الشباب و الشابات السودانيين قادمون من دول و مدن متفرقة و قليل من الأسر هم ركاب تلك السفرية...بعد قليل تعارف ركاب الطائرة كعادة السودانيين...ثم تم الاتفاق على الذهاب الى مكتب الخطوط التركية للتحدث الى مدير الخطوط في المطار للاستعلام عن سبب التأخير...بعد التداول مع مسؤلوا التركية تم تجميعنا بالكاغتريا مرة أخرى و تقديم وجبة مجانية و لكن لم يحدد موعد اقلاع الطائرة بعد...
هاج الجمع مرة أخرى و قرروا الذهاب الى مكتب التركية و الاحتجاج على سوء المعاملة...و ذهبنا الى مكتب التركية و أخذ الجميع يصرخون بصوت واحد بانجليزية جيدة جدا...تضايق موظفوا التركية و ارادوا أن يمعنوا في اذلالنا فهاج الجمع...و صاح أحدهم اليست لنا حقوق انكم تسئون معاملتنا...فقالت له احدى الموظفات ليست لكم حقوق...كان ذلك من فرط ضيقها من الصراخ الشديد بالمكتب...و لكنها وقعت في شر أعمالها...فأخرج عدد من الجمهور جوازات بألوان مختلفة كلها لا تشبة لون جواز سفري...و صاح أحدهم بالموظفة..ليست لنا حقوق سوف ترين الآن ان كانت لنا حقوق أم لا...أخرج الشاب تلفونة المتحرك و أخذ بالاتصال بمن لا أدري و هو يلوح بجوازة غير السوداني...شاهد موطفو مكتب الخطوط التركية الجوازات الملونة..البريطاني ...الأمريكي...السويدي و الدنماركي...فخافوا و حاولوا تهدئة الجميع و أعتذروا عن التأخير...قام موظفو التركية بأخذنا و بسرعة شديدة الى أستراحة فخمة داخل المطار و قدموا لنا بوفية مفتوح و طلبوا منا الانتظار حتى يعلن عن موعد اقلاع الطائرة..
بعد سبعة ساعات تأخير تم الاعلان عن الطائرة فذهبنا و القينا بأجسادنا المرهقة في مقاعدنا و نمنا حتى مطار الخرطوم...
نزلنا في مطار الخرطوم و ركبنا البص الذي يقلنا الى صالة المطار...تقفت احدى العربات المزودة بسلم النزول و الصعود أمام البص الذي يقلنا فتوقف لمدة لا تقل عن ربع الساعة...قلت لأحد الذين يقفوا بجواري انتو بس فالحين تصرخوا في مطارات الناس ...لتأخير سببة سوء الأحوال الجوية في الخرطوم...أما في الخرطوم فيحدث تأخير لسوء الاستعدادات و لا يحرك أحدكم ساكنا...
عرفت الفرق الكبير بين الجواز السوداني و اي جواز تاني...
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: ان البرلومة هي نجاة حوفي...
فلقد كانت زجاجة الميراندا و لمياء ادريس و قلبي الطفل من أهم أدوات القدر التي صنعت أنصع صفحات تاريخ حياتي...
التاريخ 5/1...
المناسبة...الذكرى الخامسة عشر لزواجي ورفيقة دربي نجاة حوفي...[/
QUOTE]
| Quote: بعد أن قضينا اجازتنا في تركيا كنا في غاية الشوق للسودان و كان يوم سفرنا من استانبول الى الخرطوم... |
روش يا حبيب ، ياخوى الإقتباس الأول كان زجاجة الميرندا ، وبعد داك على طول قضيتم الإجازة فى تركيا ، أول شى هى إجازة ولا شهر عسل ، ثانياً تركيا دى نزلتوها بى مظلات ولا شنو؟ ماشايف أى تمهيد ، ثالثاً مهند ولدك علاقتو شنو بى مسلسل نور.
معليش يا رشيد على الإنقطاع بسبب الحالة المزاجية التى سببها رحيل أستاذنا معتصم سودانى المحامى بمدنى ، أرجو مراجعة بوست النعى بالمنبر العام.
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
بكوري لك مني خالص العزاء في وفاة الأستاذ معتصم سوداني...ليتقبلة الله قبولا حسنا و ينزله منازل الصديقين و الشهداء و الأبرار...و ليلهم أهله و ذوية الصبر و السلوان...
بكور رحلة تركيا هذه رحلة شهيرة في البوست...فلقد ذهبنا اليها قبل أن نختتم اجازتنا الأخيرة الى السودان في صيف 2009...لذلك لم أمهد أو أقدم لها...فلقد كنت متواصلا مع البوست من تركياو لي فيه صور كثيرة من تركيا...و قبلها كنا في لندن لذلك نصحني عبدالله بأن أكف عن السفر و أعمل لبناء البيت...
| |
|
|
|
|
|
|
|
|
|
Re: مربع كاي (Re: الرشيد بابكر)
|
مهند و أمنية لم يأبهوا بتأخر البص عن الحضور بينما بدا علي القلق...
بالمناسبة يا بكري كنت أتمنى أن يرزقني الله بولد و أسمية مهند...لقد كتبت له قبل أن يولد ...
مهند اني وضعتك في رحم الغيب أمنية...
فرزقنا الله بأمنية أولا...ثم مهند ... لم نفكر كثيرا في الاسم فأسميناه مهند...
| |
|
|
|
|
|
|
|
| |
عبد القادر بابكر
الرشيد بابكر
محمد صديق
محمد عيد
أبوبكر حامد الأمين
زهير الزناتي
طارق جبريل
ميسرة سيد أحمد
كمال الشادي
Hatim Gubara
محمد آدم النور
فيس بوك
تويتر
انستقرام
يوتيوب
بنتيريست