|
|
|
 Re: مربع كاي (Re: الرشيد بابكر)
|
صبحكم الله بالخير
الصباحات الندية تشرح القلب و تبهج الروح و تغسل الحزن من بين الحنايا حتى و ان كان متراكما منذ القدم...صباح شتوي ناعم ملمس ضبابه البارد يداعب خلاياي فتشهق بانتشاء...و شمس تصعد بكسل من خدرها...تمشي الهوينى لتعلن بأشعتها الذهبية الجميلة أن هيا الى الفلاح...و ما بين الشروق و الضباب و البرودة اللذيذة تستنشق أوكسجين التفاؤل ليملأ القلب قبل أن يمر عبر الرئتين...هي لوحة لا تملك الا أن تقف قبالتها متأملا مندهشا بل و مفتونا...تتمنى أن تتشاركها و من تحب...لتزداد اللوحة جمالا و فتنة...
اللهم اني أصبحت منك في نعمة و عافية و ستر فأتمم نعمتك على و عافيتك و سترك في الدنيا و الآخرة...
| |
 
|
|
|
|
|
|
|
|
Re: مربع كاي (Re: Elsuhaili Magzoub)
|
سهيلي يا صديق...لم أتمكن من سماع الأغنية من هذا الكمبيوتر الذي أجلس خلفة الآن...لأن الشركة وضعت به الكثير من الضوابط...سأعود بعد قليل الى مكتبي و أسمع...
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلام ناس مربع كاي ... الصباح الباهي لونك يا سهيلي .. تخلي الصباحات .... بطعم مختلف ... الأغنية مهداة لحنان مجمر وإبنتها وضاحة ...
| |
|
|
|
|
|
|
|
|
|
Re: مربع كاي (Re: زهير الزناتي)
|
Quote: ÓáÇã äÇÓ ãÑÈÚ ßÇí ... ÇáÕÈÇÍ ÇáÈÇåí áæäß íÇ Óåíáí .. ÊÎáí ÇáÕÈÇÍÇÊ .... ÈØÚã ãÎÊáÝ ... ÇáÃÛäíÉ ãåÏÇÉ áÍäÇä ãÌãÑ æÅÈäÊåÇ æÖÇÍÉ ... تعرف يا روش رغم إنى ما بميل كتير للبريمير ليغ لأن الكرة الإنجليزية بعنفها وعنفوانها لاتستهوينى ، يبدو أننا ورثنا عنهم هذا العك الكروى وأضفنا له بعضاً من فوضانا ، ورغم ذلك يعجبنى فريق ليفربول دون سواه من الفرق الإنجليزية ، أحسه قلعة وحصن منيع وراسخ فى التأريخ والوجدان وفيه عبق الإمبراطورية التى لا تغيب عنها الشمس يوم كانت قوة عظمى وذات نفوذ دولى قبل أن يحيلها تونى بلير لمقاطعة تأتمر بأمر سيد البيت الأبيض.
دبرسة السبت لها ما يبررها ياروش ، أسأل الله جلّت قدرته أن يهيء لك من أسباب الرزق ما يجعلك دوماً فى كنف أسرتك الكريمة |
يازول ما تغلط فى الدورى الأنجليزى
وبعدين انت شن عرفك فى الكورة
حايم بس تشاكل فى المحامين
قلت لى بتحب الصراحة
اها
هاك الصراحة دى
| |
|
|
|
|
|
|
|
|
|
Re: مربع كاي (Re: منصور عبد الرازق)
|
شكرا يا سهيلي على الأغنية....
الصباح الباهي لونك
وضاحة يافجر المشارق
غابة الأبنوس عيونك
يابنية من خبز الفنادق
شيدتي في جواي صوامع للفرح
وفتحت في دنياي مسارح للمرح
وبقيتي لى سكة وعيون
لاقدرت أطولك شان اجيك
لاقدرت من غيرك أكون
وأنا بيك مالينى الكلام
حركت بيك عصب السكون
جلبت ليك الغيم رحط
طرزت ليك النيل زفاف
حرقت ليك الشوق بخور
وفرشت ليك الريد لحاف
لا السكة بيك بتنتهي
ولامعاك مليت طواف
ياريتني لو اقدر أكونك
وضاحة يافجر المشارق
الصباح الباهي لونك
يابنية من خبز الفنادك
غابة الأبنوس عيونك
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلام يا كاااى
واحشنا ....
المربع ده مالو فاضى كده ؟ وين الناس ؟
يا ربى كلهم صايمين ولا شنو ؟؟
طيب يا رش نمشى ونجيك بعد الفطور او قول بعد العشاء
لأنو حجر المعســـّل بعد الفطور بيجر وراهو تعسيلة ظريفة جدا فى الجو السمح ده ..
| |
|
|
|
|
|
|
|
|
|
Re: مربع كاي (Re: محمد عيد)
|
Quote: طيب يا رش نمشى ونجيك بعد الفطور او قول بعد العشاء
لأنو حجر المعســـّل بعد الفطور بيجر وراهو تعسيلة ظريفة جدا فى الجو السمح ده .. |
عليك الله شوف الزول ده...تفطر و تشرب القهوة و تشيش وتعسل و تصلي العشاء و بعدين تجي وانت غايب ليك أكتر من يومين...انت قايلني أنا ناظر المحطة دي...و لو التعسيلة دي جرت يا أخوي أنا أعمل شنو...اقعد انتظرك كده للصباح...انت بس ان شاء الله تجي راجع (النبي عارفك كداب .. نساي
وحتنسى أول ما حتنزل في أسوان) زي ما قال الأبنودي...
أديك فكرة...اتصل بالعجوز الغايب داك...قدورة...قول ليهو قوم أمشي أتونس مع الراجل ده لحدي ما أجيكم راجع..
يخسي عليك...كبير كده ولسه بتشرب شيشة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
بكوري...بالله أمشي أتفرج الآن على مباراة آرسنال و استون فيلا...و الله تغير رأيك في الدوري الانجليزي طوالي...المباراة الآن في شوطها الثاني و تبقى فيها 17 دقيقة تقريبا..عليك الله شوفه عشان تعرف انك بهت الناس ديل ساكت...
| |
|
|
|
|
|
|
|
|
|
Re: مربع كاي (Re: الرشيد بابكر)
|
محمد عيد...أسمع كلامك أسدأك...
و لا أقول...وعدتني بالحلق خرمت أنا وداني...
وين انت بتشيش و لا بتصلي و لا نايم و لا طرفك من طبعه نعسان...
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلامات يا ناس
مربع كاى ...سلام
متابع...مستمتع بس ما مية مية
عاجبنى انسجامك وبكرى حامد وهو سحارة حكاوى
ونكتة تمشى على رجلين...كجينا بعض انا وهو زمانآ
طويلا...عشنا حياة اشبه بحياة الزقازيق...تسكعآ
وفلسآ ومتعة...وضحك لامحدود...
حكى لى مرة عن الزول البحب اقتناء الاكياس...
بعد شراء اى حاجة موضوعة فى كيس كان يحتفظ بالكيس
ويطلب من الآخرين الاكياس..اظنو مرة زهج منو ..قال ليهو
انت حكايتك شنو اى كيس لاميهو ...انت سلك شائك؟
| |
|
|
|
|
|
|
|
|
|
Re: مربع كاي (Re: محمد صديق)
|
يا كوتش مساء الخير...
بي طريقتك...بكري ده زول طاعم...و لكن تزداد الطعامة لما تطل علينا بطلعتك البهية...
حسه زهير يجي يقول لي حكايتك شنو انت كابي المحلبية للكوتش...
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: قلت لى بتحب الصراحة
اها
هاك الصراحة دى |
عزيزى منص :
أحبك بتضحك
وأحبك عبوس
أحبك صريح ومريح ، زى جمال توتيل وبركة سيد الضريح
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
| Quote: بكوري...بالله أمشي أتفرج الآن على مباراة آرسنال و استون فيلا...و الله تغير رأيك في الدوري الانجليزي طوالي...المباراة الآن في شوطها الثاني و تبقى فيها 17 دقيقة تقريبا..عليك الله شوفه عشان تعرف انك بهت الناس ديل ساكت... |
شكلى ح أغنى ليك : الريدة جات متأخرة لأنى شفت مداخلتك قبل شوية ، وعلى فكرة أرسنال يأتى فى المرتبة الثانية بعد ليفربول فى قائمتى لأفضل الفرق الإنقلنزية (هكذا ينطقها أهل البحرين على نحو يصيبك بالغثيان) ، شكلك ياروش البرشا مسّخ عليك الدورى الإسبانى وكافة البطولات على غرار :
يافلير دمّور
المسّخ الأرياح
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
Quote: .كجينا بعض انا وهو زمانآ
طويلا...عشنا حياة اشبه بحياة الزقازيق...تسكعآ
وفلسآ ومتعة...وضحك لامحدود... |
وعزّة وجلال الله وقبل إطلاعى على مداخلتك صحوت صبيحة اليوم على صدى وذكرى تلكم الأيّام الخوالى ، أيّام أكاديمية الشرطة ، كنت ياروش أحضر لأكاديمية الشرطة حيث يسكن جورج ، كنا نأتى سوياً فيقوم العسكرى الذى يحرس بوابة الأكاديمية بتحيتى دون جورج ، غاظه هذا الأمر فقال لى بطريقته الهادئة : إمكن قايلنك ضابط مستفيد بى كرشك دى ههههههههه.
تعودنا حين نركب المواصلات العامّة أن نترصد الشخص صاحب العُلعلّة الكبيرة والذى يستلم الحافلة على حسابه حكواً وسرداً ، وأصطلحنا أنا وجورج على تسمية هكذا شخص بالشخصية المحوريّة ، والتى تمارس كافة أنواع الكذب والتهويل لشخوص أبطال قصصها ، فى إحدى المرّات أقسمتُ على لعب هذا الدور ، مرّت الحافلة المتجهة لأمدرمان بمحاذاة فندق الهيلتون الذى يقبع بجواره مبنى تحت الإنشاء وقد اكتست جدران هذا المبنى باللون الوردى ، أحد شخوص الشخصيات المحورية إستنكر أن يتم إختيار هذا اللون لمبنى إدارة الإستثمار ، بالله الساعة الختفتا منو المكرفون وقلت ليهو : أنا الإسبوع الفات كنتَ مع المهندس الإستشارى وعرفت منّو إنو اللون ده بس لون مبدئى وح إغيروهو لى لون داكن مع اقتراب تشطيب المبنى ، لا أراكم الله كيف أن هذا الطفبوع شخصت عيناه وفقر فاه وتبدلت نظراته لى بمزيد من التوقير ، أما أنا فقد أشبعت تلك الفرية لدى عقود من الصمت حيال أكاذيب وافتراءات هذه الفئات (من هذا الذى خدعنا بأن نقل عند المغنم ونكثر عند المغرم ) ، أما جورج فقد غالبه الضحك وكتمه خشية أن يفشل مخططى غير الآثم مع ما اعتراه من كذب صراح.
سآتيكم مجدداً ببعض من ذكرياتى مع جورج من حياتنا شيه الزقازيقية
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
نغفر لك استهزاءك بالدورى الأنغلنزى
(على الأقل الواحد يثير غثيانك طالما انت نبذت لينا دورينا )
ما تستغرب فى دورينا دى اخوك ماخذ جنسية الدورى الأنجليزى من زمان
ومقدرتى على الغفران هذه نابعة من سيناريو المكنة التى قومتها وانت فى الحافلة القادمة من امدرمان قبالة الهيلتون
بالغت عديل , ضحكتنى حتى اغرورقت عيناى بالدموع
تخيلت المنظر , ورسمت صورة تخيلية لشخصيتكم المحورية ذلك المساء
او قل ذلك النهار
فذلك المكان يمره الناس عادة نهارا
ولكنك ذكرتنى سيناريو نكتة مصرية متكررة فى بصات النقل العام
رايتها انا مرة وكنت من شهودها مرات
تتكرر دائما ان بنفس السيناريو او بعد تحريف بسيط
ولكنها تضحكنى دائما مهما تكررت
الأختلاف المحورى دائما ان شخصية اتوبيسات النقل العام المصرية المحورية هو الكمسارى نفسه
او السائق , وممكن المفتش اللبيجى يسأل من التذاكر داك بعد ما الناس يكونوا حلاص نازلين
فى المحطة يدخل الركاب للأتوبيس من بابه الخلفى
يمرون سريعا على الكمسارى وهو جالس فى كرسيه الصغير نصف جلسة
او ممكن تقول واقف تلاتة ارباع وقفة
يعنى لا هو جالس متوهط
ولا واقف لام الف
كل راكب غالبا بيكون محضر بريزته ولا الشلن بتاعه او كمان ربع الجنيه ايامنا طبعا
الكمسارى الحريف لا يفوته راكب رغم كثرتهم , ولا بيتلخبط ليهو فى باقى زول , بالعدم ممكن يسجل ليك الباقى بتاعك فى كعب التذكرة بآلية سريعة غير مرتبكة
يجيهو ليك واحد يدخل ايدو فى جيبو اليمين , ثم فى جيبو الشمال , ثم فى اليمين مرة تانية
فيما يشبه الزول الداير يدى الكمسارى والركاب ايحاء بانه فقد محفظته ولا نساها فى البيت
الكمسارى طبعا عارف الحركات دى , واظنها قاعد تمر عليهو كثير
بيكون همه انو الركاب تدخل لى جوة , ما مشكلة زول واحد لو ما دفع حق التذكرة
لكنه برضو بياخذ حقو ناشف , باللسان طبعا
ادخل يا حويا , عدى , مش مشكلة
اصلى باين انى نسيت المحفظة بتاعتى فى البنطلون التانى
يقول الراكب مستدركا , وقد بدت عليه علامات الأحراج
من عدم وجود حق التذكرة مرة , ومن تعطيله لأنسياب الركاب فى الأتوبيس مرة تانية
عدى يا اخوى , معلهشى , عدى يا باشا
يدخل الراكب الناسى لمحفظته وقد تخيل انه تدارك الموقف وتجاوز احراجه
يمضى قدما الى داخل الأتوبيس حتى وانه قد يجد مكانا وكرسيا فارغا يجلس فيه ويتوهط متوهما ان الحرج قد زال الى غير ما رجعة
طبعا الكمسارى , بيكون صاريها ليهو وشايفو بى قعر غينه كده
لكنه عايز يمشى الناس وما يعطلهم
اول ما يفضى شوية والأتوبيس يتحرك وكل واحد يلزم مكانه
يشيل ليك حق التذكرة من الراجل المسكين تالت ومتلت
آل ايه , الراجل نسى محفظته فى جيب البنطلون التانى ؟؟!!!
الأسود ولا البنى يا حبيبى ؟؟؟
لا يمكن التريكواز , ولا الأسموكن اللى لسه جايبوا من شارع الشواربى
لا , سدأناكا يا خويا
ده انت ما عندكش محفظة
ما معاكش حق التذكرة , ما معاكش نكلة بريزة
ما تحتكمش على ربع جنيه على بعضهم
حا تحتكم على بنطلون تانى ؟؟!!!
(عدل بواسطة منصور عبد الرازق on 12-28-2009, 11:26 AM)
| |
|
|
|
|
|
|
|
|
|
Re: مربع كاي (Re: منصور عبد الرازق)
|
كلامكم اليوم عن الشخصية المجورية في المواصلات و بيوت البكيات والمجالس الخاصة و العامة..خلى الدماغ يستدعي الكثير من الملفات المحزنة في الذاكرة...و هي شخصية تكثر في المجتمع المصري عن السوداني..ربما السودانيين يتصفون بالخجل و عدم القهارة...بينما المصريين قاهريين...و قاهرين دي ما من القاهرة..يعني عينهم قوية و ما بيخجلوا...و كان عندي اعتقاد ان أي مصري ممكن يكون رئيس....لأني صادفت كتير من الشخصيات المحورية دي في البيجو مثلا مستلم ليك بصوتة الغليظ الذي يشبة صوت الزعيم...يتكلم عن الاقتصاد بجهل...يحدثهم عن الحال في أوروبا و أمريكا و يقارن بينه و بين الحال في مصر و هو لا يملك غير صوته الغليظ...و جميع من بالبيجو ينصتوا و كأنهم منومون مغناطيسيا..وذلك لأنهم أخفت صوتا وأجهل...الصفائح الفارغة أكثر ضجيجا...
البيصل عندنا لمرحلة القهارة دي في السودان...ده بيكون ما بيتقابل...في مصر معطم الناس قاهرين و أعتادوا أن يتعايشوا مع بعضهم البعض...و بيكونوا عارفين الشخصية المحورية واحد كضاااااب ورغم ذلك يتفاعلوا معه..و أول ما ينزلوا من البيجو يقولوا ليك ابن الوسخة ده فاكر نفسه طه حسين و لا ايه..لأنهم لا يعرفون اسم وزير المالية...و عندما يتكلم في الأدب و ذلك نادرا ما يحدث..يقولون هو فاكر نفسه الخطيب بتاع الشعر و لا ايه...
السوداني القاهر غير...ده ما بيتقابل...السوداني بيكون بيتكلم و هو عارف ان معظم الركاب في الحافلة يعرفون أحسن منه و لكنه لا يهتم لذلك و يواصل في هضربته...لحدي ما يلقى ليهو زول روحو محرقاهو..و يقول ليهو ياخي ما تفكنا كده و لا كده...يا سكت و يا كمان زاد في قهارته و هضربته...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: كدي يا ياسر أشرح لي انت و جلال...وكت الله جابكم لحدي عند جيرانا في المنبر..ما بتجونا مالكم؟؟؟ خايف رشا تقول ليك البوديك تمشي لي جكس زراعة ديل شنو؟؟؟تعال لينا في مربع كاي و كان خايف جيب معاك رشا زاتا... |
والله يا الرشيد لومك دا ما جابو لي، عترت فيه براي ...
بس عارف جمال هذا المكان يحتاج الى استعدادات مكثفة للدخول فيه
عشان كدا ياحبيب خلينا نسترجع صدى الذكرى ونجيك
وكان مالقينا لينا مربع نجدعوا هنا المستطيلات في ما تخاف ...
كل الود
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا ناس مربع كاي عايز أحكي ليكم قصة عن واحد من ناس زراعة ... حماده بتاع الكورة ... لاقيته مرة في وسط الخرطوم ... سلمت عليهو ما عرفني ... قلت ليهو ياخي انا إسمي زهير الزناتي ودرست في تجارة الزقازيق ومن كسلا وكنت في الجبهة الديمقراطية وساكن مع صلاح علي صالح لم تبدي عليه اي علامة من علامات التذكر ولم يحاول حتي أن يجاملني بأنه قد تذكر شيئاً . قلت يا ولد ما مشكلة بندأ تعارف جديد وتبقي معرفة من أول وجديد . بعد فترة تاني لاقيته في مواصلات الثورة بالشنقيطي وكنت أسكن الثورة الحارة 13 ... قعد جنبي في الحافلة زولي ذاته ... اها سلمت عليهو بحرارة ... سلم علي سلام زول يشوف ليهو زول أول مرة ... قلت ليهو ياخي أنا زهير الزناتي برضو لا حياة لمن تنادي ... قمت قلت ليهو المعلومات السابقة كلها ... برضك زولك في حاله .. قلت ليهو ياخي أنا معرس منكم من ناس عطبرة إبتهاج بت آداب .. برضو الزول ما جاب أي إستجابة ... قلت يا ولد ما مشكلة نبدي تاني عرفه جديدة ,... وإتونسا لغاية ما وصل حمادة لمحطة الرومي ونزل ... بعد فترة لاقيته للمرة الثالثة .. وهاك يا سلام بحرارة .. زولكم برضو في حاله .. ياخي ما عرفتني ولا شنو .. قال لي لا والله ... يا أخي انا زهير الزناتي ماعارف بتاع شنو داك .. برضو زولكم يسألتي الله ما إتذكرني أتوكلت علي الله وأخدت بعضي وشتت ... عليكم الله شفتوا الحالة دي ... بعد فترة لاقيته في السوق .. جا ماري جنبي وعاينت ليهو قوي قلت يمكن الزول ده يعرفني المره دي ويسلم علي ... وللاسف لم يخذلني جا ماري فوقي زي ما تقول ماري جنب سلك كهرباء .. وذهب لحاله .. اها يا جماعة الحالة دي يسموها شنو ... الإجابة متروكة لناس زراعة ...
تخريمة يا ناس :
في بدايات العام الجديد .. هنالك عريس زقازيقي ومن ناس زراعة يتأهب للزواج ... خليكم قراب حتي نفصح عن الإسم ... لكن يتخيل لي زولكم ده نسي يعرس في الفترة الفاتت ... يادوبك إتذكر موضوع العرس وكده ...
| |
|
|
|
|
|
|
|
|
|
Re: مربع كاي (Re: الرشيد بابكر)
|
تحدي الخوف...برنامج في التلفزيون ذكرني أيام الطفولة في مدينة بابنوسة الجميلة...كنا نتجمع مجموعة من أبناء موظفي مصنع الألبان في الشارع تحت أعمدة الانارة..كنا نلعب لعبات كثيرة خاصة بجيلنا..مثل شليل و كنا نلعب لعبة تسمى في كردفان (هرك)...و هي أن تعدو برجل واحدة بعد أن تعقل الأخرى ممسكا بها بيدك من الخلف...
أما الفقرة الرئيسية فكانت أن تحمل فرارا و تمشي وسط شجيرات (الغبيش) حتى تصل الى شجرة اللالوب التي تبعد حوالي الكيلومتر من مكان التجمع ثم تضرب الشجرة بالفرار ليسمعة الجميع حيث يجلسون فيهللون لذلك...كنا نبدأ بمن هم أكبر سنا ثم الأصغر فالأصغر حتى آخر واحد من المجموعة...
كنا نلعب تلك اللعبة عادة في الليالي المقمرة...بدأت اللعبة بالأكبر فذهب و بعد فترة سمعنا طرقة على شجرة اللالوب ثم عاد بعد فترة...ثم ذهب الذي يليه والذي يليه حتى جاء دوري فحملت الفرار واستجمعت كل شجاعتي و تقدمت...مشيت وسط شجيرات الغبيش متشجعا بالجمع الذي ورائي...بدأ صوت اصدقائي يخفت رويدا رويدا حتى خفت تماما...مشيت و أنا أرتعد خوفا و الفرار يرتجف في يدي...أتلفت يمينا و يسارا و أنا أتقدم نحو الشجرة...بدت لي أبعد مما هي علية بالنهار...حاولت الاستئناس بصوت الجنادب وادعيت الهدوء...نعق ضفدع بجوار قدمي فكدت أن أسقط من الخوف و كاد الفرار أن يسقط من يدي من شدة ارتعادي و تعرق جسدي كثيرا...ألم يجد هذا الضفدع الا لحظة مروري لينادي على معشوقته التي تتوارى خلف شجيرة ما غنجا و خجلا...
استجمعت شجاعتي مرة أخرى و تقدمت نحو اللالوبة....اللالوبة ليلك جن...قلبي يدق بشدة...أقول زي الطاحونة بيكون الوصف ناقص...ترتج كل دواخلي من شدة ما قلبي بيدق...ظهرت اللالوبة من على البعد...الله يقطعك الليلة زحفتي لي وراء مالك...سرعت الخطوة...نسيت أن أقول ليكم ان من أهم شروط المسابقة ان الواحد يمشي براحه..يعني جري ما معانا...مشيت أتلفت شمال و يمين...اللالوبة كمارد جبار وسط شجيرات الغبيش...تجاوزت حتة انو يطلع لي دبيب و لا عقرب الى هم أكبر...تكون اللالوبة مسكونة...أجي اضربه يطلع لي شيطان زي الضرب عمي عثمان داك في الكوة...تكون الشياطين دي مستهدفة عائلتنا..اتنين من عائلة واحدة...أنا و عمي...خطواتي أصبحت بطيئة ثم بطيئة جدا حتى وصلت اللالوبة...ضربتها بكل قوتي...طار منها مجموعة من الطيور مرة واحدة...استدرت و نسيت كل شروط المسابقة و أطلقت لساقي الريح..حتى انني لم أسمع صياح أصدقائي لأتأكد انهم سمعوا طرقتي على اللالوبة...رجعة تاني ما برجع لكن غلاط بغالطهم لحدي الصباح..عندما اقتربت من عمود النور أبطئت و مشيت بهدوء...حاولت أن استجمع أنفاسي و أتنفس بهدوء حتى لا يلاحظوا انني كنت أجري...و ما شاهدوني حتى هللوا و صاحوا...فاطمأن قلبي و كفاني الله شر الغلاط...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: والله يا الرشيد لومك دا ما جابو لي، عترت فيه براي ... |
بركة يا يابا اللقيتو براك ما جابوهو ليك...لوم التابا يا جلال...حبوبتي حاجة أمونة بتقول لوم التابا محمود في السرور...و محمود ده أخوها و جدي رحمة الله عليهم جميعا...
انت يا جلال ما بتجي الا يلوموك...
عموما يا سيدنا اعتبر مكنتك قسمت زي ما بيقولو الشماشة...و مشت علينا..أمشي أدخل ليك معسكر لي البوست ده خسوسي و تعال لينا...
نورت حوشنا...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: يا ناس مربع كاي عايز أحكي ليكم قصة عن واحد من ناس زراعة ... حماده بتاع الكورة ... لاقيته مرة في وسط الخرطوم ... سلمت عليهو ما عرفني |
أبو الزوز ديل تلاتة مرات غير التلاتة مرات الحكيتهم لينا قبل كده ولا ياهن زاتن...
أبو الزوز ولا يهمك حقك علينا...الزول ده صاحبي و سكن معانا أنا و منصور و رفعت...لكن أنا القدامك ده مش سكنت معاهو لو لاقيتو الا أذكرو أقول ليهو أنا الرشيد السكنت معاك مع منصور و رفعت...حيقول لي منصور منو...بس حيتذكر رفعت لأنو رفعت قريبو...
طبعا دي مبالغة مني يا أبو الزوز ما تكون صدقتني...بس حمادة ده من أطيب الناس و زول قلبو أبيض و برئ للحد البعيد...
امكن يكون خلى الكورة فحصل ليهو تقلص في العضلات عشان كدة ما اتذكرك...
مرة يا أبو الزوز في واحد صاحبي جدا...افترقنا لفترة طويلة جدا..ثم التقينا بالامارات...عثرت على رقم تلفونة أولا فقلت أتصل عليهو من شدة شوقي ليهو....آلو ازيك يا أبوعبيدة..أهلا ببرود شديد..كيفك و أخبارك و أولادك..انت منو يا أخوي بكل بياخة...قلت ليهو ما عرفتني قال لي ما عرفتك..قلت ليهو معقولة ما تعرفني يا أبو عبيدة...قال لي يا أخوي انت أمكلثوم...و من ديك النوع ده من الظرافة خليتو...
العريس هو حمادة زاتو يا أبو الزوز..كان من المفترض أن يتزوج في عيد الفطر فأجله لعيد الأضحى ثم لما بعد العيد...و أعتقد أنه نسي الموعد فأصبح الآن...
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: لكنه برضو بياخذ حقو ناشف , باللسان طبعا[/QUOTE
يا سلام يا منص ذكرتنا الكماسرة وتعليقاتهم الطريفة ولديهم مقدرة إقتضاء حقهم لسنة قادمة بالتقريع والإستهزاء من الشخص الذى يسوقه حظه العاثر ليكون تحت رحمة ألسنتهم .
| |
|
|
|
|
|
|
|
|
|
Re: مربع كاي (Re: الرشيد بابكر)
|
قاعد زهجان فاتح الكمبيوتر على الشمال و التلفزيون على قناة النيل الأزرق بعد ان انتهت مباراة في الدوري الانجليزي بين تشيلسي و فولهام...كان ممكن أخرج من الموضوع بمناسبة فولهام ده و أجيب ليكم سيرة محمد الفايد و أخرم من هناك أتفشخر شوية بي هارودز و تجيكم زينب التجاني بكرة تقول ليكم شوفونية الرشيد...لكن ده ما موضوعي...
المره الفاتت لما جابو نانسي عجاج في النيل الأزرق في سهرة كاملة لم أستطيع حضور السهرة لأسباب أمنية...اليوم داك كنت في ابوظبي...و التلفزيون الموجود في غرفتنا للأسف ما فيهو النيل الأزرق...بس موجودة في التلفزيون الموجود في غرفة العيال...و الأولاد ناموا..أها ضحيت بالسهرة من أجل العيال...عليكم ما ضحاي...حسة تضحية زي في زول فيكم بيعملها...فضاعت علي السهرة...لكن كمان عشان أكون صادق معاكم...كنت متشحتف...أدخل و أمرق...نجاة قالت لي مالك انت في شنو...قلت ليها نانسي عجاج في النيل الأزرق....قالت لي اللـــــــه و بعدين...و بعدين شنو الأولاد ديل نامو...بيني و بينكم كأني كنت منتظر لي حل من نجاة...لكن من شدة تعبها ما كانت انتريسنتد...شفتو انتريستد دي رهيبة كيف...المهم لم تأتي نجاة يأي حل و ضاعت السهرة و أنا متحسر...
الليلة قاعد فاتح النيل الأزرق من غير أهتمام...فجعة كده جابو ليك نانسي عجاج و بتغني في شنو...بتغني يا زمن وقف شوية بتاعت أبراهيم عوض...يا سلام يا سلام...و الله قربت أشيل برنيطتها اللابساها دي و أقوم أنقز زي نقزة طارق جبريل مع محمد كرم الله.....
يا زمن...أرحم حبايب لسة في عمر الزهور
مبالغة عديل كده...أنا غايتو كنت ما مؤمن انو في زول ممكن يغني أغاني أبراهيم عوض و لا عثمان حسين الا هم بس...لكن نانسي دي...اتخيل لي لو مدحت أولاد البرعي ديل الا يفرشو في السوق العربي...و الله حقو ورثة أبراهيم عوض يتنازلو ليها من الأغاني دي احياءا للغناء السمح ده...
و لا انتو رأيكم شنو...قصدي الغناء بتاعها ما البرنيطة...أفهموني كويس بعدين تعالو جاوبوني....جايني جارين كده...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: ..ربما السودانيين يتصفون بالخجل و عدم القهارة...بينما المصريين قاهريين...و قاهرين دي ما من القاهرة..يعني عينهم قوية و ما بيخجلوا... |
المرحوم زرّاع رجع لمنزلهم بالحلّة الجديدة بمدنى قرب أذان الفجر قادماً من إحدى الحفلات حين كان الليل طفلاً يحبو ، شاهد زرّاع بعض شباب وشابات الحى متجمعين قرب حائط للإحتماء به من زخّات المطر ، إنزعج زرّاع لوقفتهم فأخبروه أنهم يعملون بمصنع نسيج النيل الأزرق بمنطقة الصناعات بمارنجان وأنهم فى انتظار الترحيل ، أبدى زرّاع إشفاقه لحالهم ، فبادره أحدهم بالقول: أكل عيش يا زرّاع ... نعمل شنو؟ ، فأجابه زرّاع الذى اشتهر بسرعة البديهة والرد بقوله : إكل عيش تقوموا ليهو الساعة تلاتة الفجر ! !! ، ولو بتاكلوا باسطة كانت عملتوا شنو يعنى ؟
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
| Quote: إكل عيش تقوموا ليهو الساعة تلاتة الفجر ! !! ، ولو بتاكلوا باسطة كانت عملتوا شنو يعنى ؟ |
بكري يخرب مطنك...ضحكتني والله...من قبيل قاعد براي قربت أطقع...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: من قبيل قاعد براي قربت أطقع... |
أنا فهمتَ حالتك دى مردَّها للوحدة ، بس خبثاء المدينة ما تستبعد إسمّوك ( مجنون نانسى ) ، تصبح على خير يا خوى شايفك إتعدلت فاكر نفسك لقيت ليك زول سقد زيَّك
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
و الله يا بكوري البوست ده نعسني الليلة...ووقت انت ماشي تنوم..أها النقوم نقفل الكمبيوتر ده و أمشي أنوم...
يا زمن وقف شوية...معليش... قصدي تصبح على خير...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: كدي يا ياسر أشرح لي انت و جلال...وكت الله جابكم لحدي عند جيرانا في المنبر..ما بتجونا مالكم؟؟؟ خايف رشا تقول ليك البوديك تمشي لي جكس زراعة ديل شنو؟؟؟تعال لينا في مربع كاي و كان خايف جيب معاك رشا زاتا... |
حبيبنا رشيد القوم ...
اولا انا متابع هذا البوست من السطر الاول
وطوالي علقت عليهو في اليوميات
وزي ماعارف يارشا .... انا مابخاف من رشا ...
عشان كده انا كل يوم معاكم ...
بس يااخوي مشاركاتي زي ماعارف
اقتصرت على اليوميات ...
لو عاوزني اجيبها بي هنا عندكم ونخلي الحوش خلا .... ماعندي مانع
وسبق كمان علقت انو "مربع كاي" حيخلي الحوش الكبير مفرغ ... خلا يعني
بمناسبة مواقفك التي اعتدت على سردها لنا بتلقائة ... ممتعة جدا
وبتحرك فينا اشياء كتيرة ...
الكل موافق انا الطفولة السودانية متشابهه عند الكل ...
عشان كده انا اجزم 100% من البقرو حكاويك ... بتمسهم في حنانهم "تعبير مقتبس من عصام دهب"
واصل ياجميل سردك ... لو كنت براك ولو معاك ناس داخل المربع
اصلو انت من زمان صنفناك .... مجنون رائع ...
| |
|
|
|
|
|
|
|
|
|
Re: مربع كاي (Re: ياسر نجيلة)
|
رشيد القوم
تحية ندية لك والاسره الكريمة
عيني عليك باردة
انا لو جمال الوالي او صلاح ادريس
كان سجلتك بعقد علي بياض
وزي ماقالو الجماعة مربع كاي
بقي مقصد المتاملين
وزادنا معرفة اكثر بناس زراعة
وغيرهم من الساعيين للترويح
وتنسم رياحين الزمن النبيل
| |
|
|
|
|
|
|
|
|
|
Re: مربع كاي (Re: زهير الزناتي)
|
ماهو السر الرائع فى هذه الأغنية الفاتنة
غير برنيطة نانسى يا حلوين ؟؟؟
هل يتوقف الزمن اصلا
طلبت منه ذلك ام لم تطلب ؟؟!!
الزمن ما بقيف , والدنيا دوارة وما دوامة
واذا سألت عن لحظاتها الجميلة على قلتها
فان طلبك من الزمن ان يتوقف عن الدوران لبرهة
هو طلب من ضروب المستحيلات
ولكنها المستحيلات الممكنة
وبعدين معاكم
اها
السمحة كلمات الأغنية ؟؟
ولا الرائع اللحن ..؟؟
ولا المختلفة برنيطة نانسى
سؤال عدمى لا نهائى
لو انتظرت اجابتو , فانت تمثل المثال الأروع
للزول
الواطاتو صبحت
عنى انا احدثكم
واطاتى صبحانة ليها مدة
لذا انا لا امانع
ان تشيلوا باقى عمرى
معاهم شبابى
اما عينى
فاتركوها لى , بترجاكم خلوها لى
عشان احسكم
بس بعاين
بعيونى
ولن اقطف زهزر خدودك , ابدا , ابدا
| |
|
|
|
|
|
|
|
|
 Re: مربع كاي (Re: منصور عبد الرازق)
|
Quote: هل يتوقف الزمن اصلا
طلبت منه ذلك ام لم تطلب ؟؟!!
الزمن ما بقيف , والدنيا دوارة وما دوامة
|
ده من قبيل اللزوميات التى تزعجنى كثيراً سواء فى الغناء أو فى مجمل الحكو ، خذ مثلاً سؤال (إنتَ جيت - إنت صحيت) ، وكذلك ( ياقمر دورين ..... أنا شفتك وين ..... طبعاً بى الليل) ، طبعاً بى الليل ولا لصار قمردين ... أبو القطامة ذاتا يامنص ، الله إستر من كمال الشادى ما إجى إشاكلنا ، هبشنا ليهو كابلى ذاتو
| |
|
|
|
|
|
|
|
|
|
Re: مربع كاي (Re: منصور عبد الرازق)
|
| Quote: اصلو انت من زمان صنفناك .... مجنون رائع ... |
في زول بيقولو ليهو مجنون بينبسط..انا و الله عجبتني مجنون حقتك دي يا ياسر...أشكرك حتى تستغيث..
لكن ما بنعفيك من الجية حتى و ان كانت مرة في الأسبوع...
فنحن نستقطب الرائعين من أمثالك يا نجيلة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: رشيد القوم
تحية ندية لك والاسره الكريمة
عيني عليك باردة
انا لو جمال الوالي او صلاح ادريس
كان سجلتك بعقد علي بياض
|
عمر المهدي...أنا الرشيد بابكر ده بسجلك بشيك على بياض...بس السماسرة يمتنعون...
شرفتنا بمقدمك يا عمر...و نتمنى دوام تواجدك معنا حتى تضفي الى البوست ده الجمال
و الألق...و البوست غير الاسم ما فيهو أي شئ يخص ناس زراعة البوست ده للجميع و لأن مربع
كاي مكان لنا فيه ذكريات جميلة اخترتة اسما لهذا المكان...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: هبشنا ليهو كابلى ذاتو |
بكوري...شكلك كده وقعت في المحظور...دي فتنة عشان تاني تمشي تنوم تخليني قاعد براي...
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: بس بعاين
بعيونى
ولن اقطف زهزر خدودك , ابدا , ابدا |
منص...و كأني أسمع حوافر فرسك تقول...
قطفها..قطفها..قطفها
| |
|
|
|
|
|
|
|
|
|
Re: مربع كاي (Re: الرشيد بابكر)
|
أبو الزوز لقد بخرت البوست بعود الصندل...و عطرتة بماء الورد و ابرتين من العبير وخيط ماء..
ما قصرت يا أبو الزوز..ان شاء الله ما يقصرن ايامك...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا رشدي منذ فترة طويلة ورنة تلفوني شقي ومجنون لم أغيرها علي غير العادة ، كما أن نانسي قد أصبحت الفنانة الرسمية لمنزلنا هذه الايام ... ياخي البت دي صوت وصورة وعندها طريقة في الغنا جميلة ... هادية تخليك ريلاكس .. زي غناها كده ... رايك شنو تاني نجيب ليك ليها أغنية ... بس في الصفحة الجديدة ....
| |
|
|
|
|
|
|
|
|
|
Re: مربع كاي (Re: زهير الزناتي)
|
| Quote: رايك شنو تاني نجيب ليك ليها أغنية ... بس في الصفحة الجديدة .... |
جيب الفيديوهات دي و نزله ساكت...هادية وريلاكس و طريقة غناء جميلة دي ما بقدر أقول فيها حاجة...نجاة حوفي دي مره مره كده بتقوم تتفقد البوست ده...أنا أصلي بقيت خواف خلاص...ما شايف حكاياتي كلها خوق...
| |
|
|
|
|
|
|
|
|
|
Re: مربع كاي (Re: الرشيد بابكر)
|
مساكم الله بالخير
أول حاجة أقول لي سهيلي يديك العافية...و الله كلما أفتح الصفحة دي و أسمع الصباح الباهي لونك...كان بالصباح و لا بالمساء فان هذه الأغنية ترفع معنوياتي للحد البعيد....
الليلة عايز أكلمكم عن عبدالله...و عبدالله ده الهندي الشغال معانا فراش في المكتب و نحن نسميهو هنا Office boy ...هو شخص يأسرك بلطافتة و نظافتة و ابتسامته..فتحبة غصبا عنك..ما رأيتة عابسا أبدا ولا بيشتكي أبدا رغم ان المكتب زي خلية النحل و الطلبات كتيرة...لكن عبدالله طوالي ضاحك...عبد الله بعد شهر من قدومي للمكتب أصبح لا يحوجني الى أن أطلب منه حاجة...يأتي بالقهوة أو الشاي في الوقت المناسب..دون طلب..
أصبح عبدالله يزورني في مكان سكني و هو قريب من المكتب أيضا ليسألني ان كنت في حاجة الى أي شئ..ثم أصبح يأخذ ملابسي الى اللوندري ويشتري لي احتياجاتي المنزلية زي العصير و الصابون و غيرها...أصبح عبد الله مقرب جدا لي...يأتي الي سكني يوميا يحكي لي عن مشاكله فأساهم في حلها ما أمكن ذلك...
اتصل بي يوما مدير المشاريع بشركتنا و طلب مني أن أنتقل الى أبوظبي للاشراف على مشروع للشركة هناك..بيني وبينكم فرحت جدا...اخيرا سأكون بالقرب من عائلتي...عندما زارني عبدالله مساء ذلك اليوم أخبرته بذلك كما أخبر صديقا فبكي عبدالله بكاءا شديدا...أحزنني ذلك جدا...المهم أن موضوع الانتقال لم يتم لسبب ما..فاجأني عبدالله مرة بقوله...أنا أسوي دعاء عشان مهندس ما يروح...أنا أسوي دعاء مهندس يجلس داخل غياثي...قلت ليهو يا عبدالله أنا بحبك جدا لكن عوقتني و الله...
سألني مرة...مهندس انت في بيت داخل سودان...
لا و الله يا عبدالله مافي بيت داخل سودان..
أرض في...أيوه أرض في..
خلاص مهندس تاني ما يروح اجازة لندن و لا أي مكان...ممكن يروح سودان من شان يشوف ماما بابا...لازم يسوي بيت..
ان شاء الله يا عبدالله..
لا مهندس انت يخبر ان شاء الله لكن لازم يمسك فلوس...بعدين أرض مال انت هذا يسوي بيت شوية شوية...الله كريم...
الله يعطي عافية الله يطول عمرك...انت في زين يا مهندس...
و من اليوم داك ابتديت أقدكم بي موضوع التوفير و الحاجات دي...
و لي مع عبدالله مواقف كتيره..سيرة و انفتحت و الله قال بي قولكم...لكني أكتفي بهذا القدر اليوم...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: بكوري...شكلك كده وقعت في المحظور...دي فتنة عشان تاني تمشي تنوم تخليني قاعد براي... |
والله يا روش تقول صابتنى لعنة ، قضيت الليل بطوله أتقلب ذات اليمين وذات الشمال ، مفردة الأرق لم تعرف طريقها لفراشى إلا مساء الأمس ، ربما لأننا كنا نسهر خلال إجازة إمتدت لخمسة أيام ، فبعد الجمعة والسبت صادفت ذكرى عاشوراء يومى السبت والأحد فتم تعويضنا بيوم الإثنين عن يوم السبت ، قرأت فى الصحف أن دولة الإمارات أصدرت قراراً بعدم التعويض عن أيام العطلات الرسمية إذا صادفت عطلة نهاية الإسبوع ، كم حزنت لهذا الخبر وعدت تذكرت يركات زولك عبدالله الهندى الله إجازى محنو ، صحيح من الحب ما قتل ، فما بالك بحب الهنود الذى أدهشنى فى أحد الأفلام حين تنازع الأخوين فى هوى فتاة فاحتكموا للقرعة ، فوقعت القطعة المعدنية للعملة بشكل مستقيم (سيّافى) ، إنت يا رشيد سوّى ترتيب عبد الله هذا لازم مافى حُب واجد (نترك هزّة الرأس لفطنة القارئ).
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
| Quote: والله يا روش تقول صابتنى لعنة ، قضيت الليل بطوله أتقلب ذات اليمين وذات الشمال ، مفردة الأرق لم تعرف طريقها لفراشى إلا مساء الأمس |
بكوري...ما أسعدك...ان مفردة الأرق هذه تؤلف معلقة في فراشي...هل لذلك علاقة يوقت مولدي...فأنا حتى الآن محتار بين يومي 13و 14 أيهما يوم مولدي...يقال انني ولدت بينهما فلازمني الأرق و الحيرة طوال حياتي...لقد ولدت سيافي يا بكوري...
شين ودشن
حر سيافى شين
شين ودشن
كلمة مافى شين
وهظاروا خشن
بسموم وسوافى
تسال شن الحبة الفيهو
الحب في زاتو مبرر كافي
ماشين ودشن
حار سيافى شين
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: إنت يا رشيد سوّى ترتيب عبد الله هذا لازم مافى حُب واجد (نترك هزّة الرأس لفطنة القارئ). |
بكوري عبدالله أن ما يقدر..عبدالله هذا واجد حب أنا...
اتصل قبل شوية ليعتذر عن انه لم يستطع زياراتي هذا المساء لأنه كان نايم...
مهندس أنا سو سوري ما يجي اليوم أنا في نوم...واااااجد نوم...انت في نوم مهندس..
أنا ينوم يا عبدالله..انت شو يفكر أنا بكري...
بكري؟؟؟ منو بكري هذا...
لا انت ما يعرف بكري...بكري هذا واحد صديق داخل بحرين...بكري هذا الساعة تسعة ينوم...
و الله مهندس انت كلش مكان في صديق...يريد شئ مهندس...
لا شكرا يا عبدالله...
أوكي...الله يعطي عافية الله يطول عمرك..
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: يا ناس مربع كاي عايز أحكي ليكم قصة عن واحد من ناس زراعة ... حماده بتاع الكورة ... لاقيته مرة في وسط الخرطوم ... سلمت عليهو ما عرفني ... قلت ليهو ياخي انا إسمي زهير الزناتي ودرست في تجارة الزقازيق ومن كسلا وكنت في الجبهة الديمقراطية وساكن مع صلاح علي صالح لم تبدي عليه اي علامة من علامات التذكر ولم يحاول حتي أن يجاملني بأنه قد تذكر شيئاً . قلت يا ولد ما مشكلة بندأ تعارف جديد وتبقي معرفة من أول وجديد . بعد فترة تاني لاقيته في مواصلات الثورة بالشنقيطي وكنت أسكن الثورة الحارة 13 ... قعد جنبي في الحافلة زولي ذاته ... اها سلمت عليهو بحرارة ... سلم علي سلام زول يشوف ليهو زول أول مرة ... قلت ليهو ياخي أنا زهير الزناتي برضو لا حياة لمن تنادي ... قمت قلت ليهو المعلومات السابقة كلها ... برضك زولك في حاله .. قلت ليهو ياخي أنا معرس منكم من ناس عطبرة إبتهاج بت آداب .. برضو الزول ما جاب أي إستجابة ... قلت يا ولد ما مشكلة نبدي تاني عرفه جديدة ,... وإتونسا لغاية ما وصل حمادة لمحطة الرومي ونزل ... بعد فترة لاقيته للمرة الثالثة .. وهاك يا سلام بحرارة .. زولكم برضو في حاله .. ياخي ما عرفتني ولا شنو .. قال لي لا والله ... يا أخي انا زهير الزناتي ماعارف بتاع شنو داك .. برضو زولكم يسألتي الله ما إتذكرني أتوكلت علي الله وأخدت بعضي وشتت ... عليكم الله شفتوا الحالة دي ... بعد فترة لاقيته في السوق .. جا ماري جنبي وعاينت ليهو قوي قلت يمكن الزول ده يعرفني المره دي ويسلم علي ... وللاسف لم يخذلني جا ماري فوقي زي ما تقول ماري جنب سلك كهرباء .. وذهب لحاله .. اها يا جماعة الحالة دي يسموها شنو ... الإجابة متروكة لناس زراعة ... |
الصفحة دي عجبتني هذه القصة بتاعة زهير
معقول يا شباب الناس وصلت من عدم التركيز لهذه الدرجة
مرحلة اللا تركيز أو ضياع التركيز بالكامل ،،،،،،،،،،،
الرئيس الأمريكي ريغان بعد ما أصابه الزهامير كان يمشي مع
زوجته وبعض الماره يلوحون له ،،،
ذات مره سأل زوجته لماذا الناس دائماً تلوح له ولم يعلم ما هو السبب
وأخذ يفرك في ذلك كثيراً ،،، ولكنه لم يتذكر بأنه كان رئيس الولايات المتحدة الأمريكية
أها يا زهير ما تكون كنت رئيس دولة وصاحبك ده ما قادر يتذكرك ، الزول ده كركم محمد عيد
ما بينع معاهو أحسن نرسل ليهو كيس صاعوط مع جمال ود فارح.
| |
|
|
|
|
|
|
|
|
|
Re: مربع كاي (Re: حنان مجمر)
|
حنان مجمر...دي حسة برلمة منك و لا مطاعنه...
انتي أبو الزوز و بكوري و عمر المهدي و ياسر نجيلة ديل مالم عيبيهم لي....
ما تاخدي الموضوع جد كمان و تقومي تمشي ما تجي...نحن عجايز فتانين ساكت...
نورتي البوست يا حنان...
| |
|
|
|
|
|
|
|
|
 Re: مربع كاي (Re: الرشيد بابكر)
|
رشا يا جميل ...
ما قلتو نوبة ؟؟
والله ياخ ما عارف .. فى حاجة ما مظبوطة الايام دى معاى ...
بارجع البيت من المغرب .. أقول آخذ تعسيلة لغاية العشاء .. اصحى الساعة 10
أقوم أتجارى أخلص لناس البيت التزامتهم وشوية مراجعة مع العيال ..
وأحيانا متابعة بعض اللمحات من المباريات او برامج الهيافة فى التى فى
ولمن اجى للبوست القى الساعة 2 عندنا وتكون انت ضربت الرز باللبن
أغشى مربع كاى .. القى عم فكرى شايل براد الشاى وقاعد براهو ...
اقول ليهو وين الناس ؟؟ يقول لى .. هو فى ناس أصلوا ؟؟ انا ما شفتش
غير رشيد وبكرى كانو آعدين هناك وشوية كل واحد راح فى حالو ...
طيب ياعم فكرى صب لى كباية شاى وتعال جنبى ...
يقول لى ... يابنى حرام عليك روح نام .. بعدين براد الشاى ده انا غليتو
مليون مرة ورشيد وبكرى ما شربوش غير كم شفطة منه .. دلوقت بقى حبر يعنى ما ينفعكش ..
اقول ليهو يا عم فكرى الحبر الباقى من رشا وبكورى ده أكيد احلى من عصير الرمان ...
يقول لى ... الله يسهل عليك يا بنى ... قووووم فوووت بلا رمان بلا تووووت ..!!
| |
|
|
|
|
|
|
|
|
|
Re: مربع كاي (Re: محمد عيد)
|
Quote: مهندس انت يخبر ان شاء الله لكن لازم يمسك فلوس...بعدين أرض مال انت هذا يسوي بيت شوية شوية...الله كريم...
الله يعطي عافية الله يطول عمرك...انت في زين يا مهندس... |
مهندس انت يخبر لازم برضو يكون رجال حلو .. يلبس جاكت جلد وشيل عطر كتير فلوس
سيم سيم لبنانى ... عشان انت فى مهندس مــرّة ممتاز ..
خذو الحكمة من أفواه الـ office boys !
رشا يا حلو .. المسلسلات المكسيكية مقدور عليها ...
لكن الفيلم الهندى ... صعب .. صعب ..
| Quote: يا رشدي منذ فترة طويلة ورنة تلفوني شقي ومجنون لم أغيرها علي غير العادة ، كما أن نانسي قد أصبحت الفنانة الرسمية لمنزلنا هذه الايام ... ياخي البت دي صوت وصورة وعندها طريقة في الغنا جميلة ... هادية تخليك ريلاكس .. زي غناها كده ... رايك شنو تاني نجيب ليك ليها أغنية ... بس في الصفحة الجديدة .... |
زهير .. يا شقى ومجنون ...
ما دام بت العجاج دى بتخليك ريلاكس .. ما مشكلة جيبها ..
بس رجاء جيب لينا واحدة من أغنياتها الخاصة ...
أصلوا اخوك مزنوق ليهو فى ريلاكسيشن الايام دى ..!!
وبعدين انشاء الله تجيبها تغنى ليكم فى استقبال منصور فى مطار الخرطوم ...!!
| |
|
|
|
|
|
|
|
|
|
Re: مربع كاي (Re: محمد عيد)
|
اولا نبدأ بالود حمادة يوسف ده يا زهير و الريس ميسرة
عارفين من زمااان حمادة بيقوم دفرة
فى اى شىء بيقوم دفرة
لكن بعد ما يدور , ابعد من طريقه ساكت
ما شفتو فى الكورة
اول كورة بيستلمها قريب نهاية الشوط الأول
لكن توف فى الشبكة طوالى
الميدان كلو يجرى وراهو مافى فايدة
مشكلة حمادة
يدور كيف ؟؟
بعد ما يدور
الا تشوفوا ليهو زول يقرا ليهو عشان يقيف
يعنى حمادة يا زهير , لغاية هسى بيكون بيجمع فى الفيتشرز بتاعتك
مشكلتك انت لا كنت بتاع كورة , ولا زول غنا
انت كنت زول بتاع اركان نقاش سااااااكت
هسى خلى الكوتش ده يلاقيهو زى ملاقاتك دى
من النظرة الأولى
حا يتذكر انو لاقاهو جنب راية الكورنر ولا فى خط التمنتاشر
ياربى اجازتى الجاية دى حا تكفلى الاقيهو فيها
قلت لى يادوب اتذكر العرس
ما قلت ليكم الزول ده مشكلته يدور كيف !!!!
| |
|
|
|
|
|
|
|
|
|
Re: مربع كاي (Re: منصور عبد الرازق)
|
أول حاجة أبدأ ليكم بي حمادة...
امبارح اتكلمت مع حمادة و أخيرا الراجل حيعرس...ابتديت أصدق كلام منصور انو حمادة بقوم دفرة...
عرس حمادة في كنانة و لا عسلاية ما بعرف...المهم حتة فيها سكر بشد الياء (دي لمتلقين الحجج) في يوم 8/1 ...
و لكنه عامل ليهو حفلة في النادي الزراعي بالرياض الخرطوم يوم 6/1 ...
و الدعوة موجهة للجميع حتى زهير الزناتي...
يا منص...قلت لي حمادة منصور يوم 6 ده قاااااعد في السودان...لو بعزك صحي بجيك...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: بارجع البيت من المغرب .. أقول آخذ تعسيلة لغاية العشاء .. اصحى الساعة 10 |
حسة يا حمادة دي ما بتسبه...بجيك الساعة ثلاثة امكن أتاخر للساعة أربعة و كان ما جيتك لحدي الساعة خمسة انتظرني لحدي الساعة و بعدين أمشي...
Quote: اقول ليهو يا عم فكرى الحبر الباقى من رشا وبكورى ده أكيد احلى من عصير الرمان ...
يقول لى ... الله يسهل عليك يا بنى ... قووووم فوووت بلا رمان بلا تووووت ..!!
|
أنا لو مكان عم فكري كان قلت ليك...مكنتك دي ما أسمتش (قسمت) معايا يا ابني..
Quote: رشا يا حلو .. المسلسلات المكسيكية مقدور عليها ...
لكن الفيلم الهندى ... صعب .. صعب ..
|
حمادة...أسمح لي أقول ليك ده تحيز واضح و صريح و مفضوح كمان لي ناس السعودية و بالتحديد ناس الرياض و بالتحديد شديد منصور عبدالرازق....
ماله الأفلام الهندية...عيبها لي...
| |
|
|
|
|
|
|
|
|
|
Re: مربع كاي (Re: الرشيد بابكر)
|
ازيكم000
مرات نكون شغالين كم سكشن ومحاضرة ورا بعض
ومربع كاي دا نجي مارين فيهو برضو بقداسة كدا000
ومرات انا كنت بدك عديل عشان الاقي ناس مربع كاي000
اها الليلة دي استهواني الدك 00 والجيفارات ليهم الله
| |
|
|
|
|
|
|
|
|
|
Re: مربع كاي (Re: عفاف علي ميرغني)
|
فافى العزيزة ..
ليك وحشة والله ... والركز غايتو ما طارينو ..!
يا اختى دكى بى راحتك .. القراية ام دق ..
دور يناير لاحقنا لاحقنا ...
تعالوا يا ناس الرياض .. راس السنة كيف عندكم ؟؟
ولا برضو زينا عندكم خسوف للقمر ؟؟!
| |
|
|
|
|
|
|
|
|
|
Re: مربع كاي (Re: محمد عيد)
|
عيد 00 كيفك
ياريت لو استقبلنا السنة بروح زقازيقية 00 لانها نقية وصااافية 000
لكن الشتاء شايل لونه الرمادي ولافي 00 حامي الناس يفكروا في الجمال 00
وعلى كدا تعالو نحتفل بيهو في مربع كاي 00
| |
|
|
|
|
|
|
|
|
|
Re: مربع كاي (Re: محمد عيد)
|
| Quote: اها الليلة دي استهواني الدك 00 والجيفارات ليهم الله |
فافي...و الله اليوم قلت أمشي أكتب لي مداخلة كاربة في بوستك...و فعلا بعد ما شعرت ان الأرجل خفت في المكاتب فتحت الكمبيوتر بمزاج و قعدت و كتبت ليك من بيت الكلاوي كلام لما قريتو لما اتكيقت (على طريقة كمال الشادي)...الكلمة تجر الكلمة..سطر...سطرين...سبعة سطور...يا ربي الظاهر دي عليها تجليات آخر اليوم...
و فجأة...
دخل مكتبي ثلاثة من فصحاء مكتبي...قلت ما مشكلة حيطلعوا بعد شوية...قعدوا و طلبوا قهوة...و أنا أتحكك...ديل حيمشوا بتين...واحد منهم لما شافني مركز مع الكمبيوتر شوية..قال لي الأيام دي شايفك بتركز كتير في الكمبيوتر...قلت ليهو أسمع بصراحة لما المخ يعصلج من الشغل بهرب للموقع الانت شايفو ده...لا يا باشمهندس ما تفهمنيش غلط أنا مش عارف حضرتك بتعمل ايه بس شايفك مركز في الكمبيوتر...عوجت ليك ليهو لساني عشان يفهمني و يتخارج...بؤلك ايه...لما دماغي تسخن بريحها في المكان دون..برضو ما فهم و عصلج معاي...
بعد شوية العصر اذن...برضو الجماعة قاعدين...خلاص أنا عرفت اني ما حأقدر أكمل الكتابة و كمان ما بقدر انزلها ناقصة...قمت قفلت البوست و غيرت رأي و قلت ليهم يا جماعة حتصلوا العصر و لا ايه...اي يا باشمهندس حضرتك نتطردنا و لا ايه...
يا دوبكم فهمتوا.....بجم...
(عدل بواسطة الرشيد بابكر on 12-30-2009, 01:53 PM)
| |
|
|
|
|
|
|
|
|
|
Re: مربع كاي (Re: الرشيد بابكر)
|
محمد عيد راس السنة بتاعنا في بطانية كلب رغم اننا من ناس أبوظبي...
اتصل عمنا محمد حوفي بنجاة و سألها كيف حتقضوا راس السنة...نجاة قالت ليهو نحن مقضيين راس السنة في بطانية كلب...ده كلام فارغ ساكت و حرام...و نجاة كترت الموية و التوم و الشمار..
عم محمد قال ليها و الله بعد ده يا بتي نجي نزور فيكم انتي و زوجك...
حسه عليك الله في داعي يجيب سيرة الكاشف ده...
| |
|
|
|
|
|
|
|
|
|
Re: مربع كاي (Re: الرشيد بابكر)
|
مساكم الله بالخير
بعد ما محمد عيد جاب لي سيرة راس السنة و قمت قلت ليكم بي حسرة انو راس السنة المرة دي في بطانية club ...قمت فكرت في الموضوع و قعدت أتذكر احتفالات راس السنة...لقيت نفسي و بصراحة كده أكون حضرت لي احتفالات لا تتجاوز أصابع اليد الواحده...و قصدي هنا احتفالات الأندية و الحاجات دي..و كلها كانت بعد اصرار من شخص ما...يعني أنا براي كده قعدت و تكتكت لي راس سنة...ما حصل...لكن استجبت لحضور كم احتفال بعد الحاح من أصدقاء...
من الاحتفالات دي كانت احتفالات السودانيين غير المسحين برأس السنة...و هي مجرد احتفالية ليست لها أي علاقة بالدين...و أذكر حفلة حضرتها في فندق قصر الصداقة و أحياها الفنان عبدالعزيز المبارك عندما كان يتسيد الساحة بلا منازع في ذلك الوقت...و كان حضورا فيها كل فريق السابق بقيادة طارق أحمد آدم و وليد طاشين وغيرهم...
و لكني حضرت احتفالا بالنادي القبطي بدعوة من صديقي القائم بأعمال دولة الامارات في ذلك الوقت الأستاذ خالد الخاجة...فوجدت ان احتفالات المسيحين السودانيين غير...و عرفت الفرق بين المسيحي و المتمسح...احتفالات الأقباط برأس السنة جميلة و منظمة و متحضرة و نظيفة و أكلهم جميل و راقي و كل الحاجات دي...المناسبة حقتهم و بيستعدوا ليها بي مزاج...القائم بالأعمال انبسط انبساطة شديدة رغم انه من أهل دبي و رغم ان الشرطة أفسدت الاحتفال و أنهته في تمام الساعة 12...لكنه كان احتفال بيشبة راس السنة..
حسة قعدت أقول لي نفسي براي..انت متحسر علي الكم احتفال الحضرتهم ديل...يخرب مطنك...ما ياها بطانية كلب من زمان محمداك...من يومك بتقضي راس السنة في البيت و ما بتريد الحفلات و اللمات...و جنك جلسات استماع و شعر و الحاجات دي...حسة جاي تتحسر عليه...
أجمل احتفال بي رأس السنة الاحتفال البتعملو لينا نجاة حوفي..احتفال بسيط فيهو أجمل لمه في الدنيا و أحسن صحبة...فيهو محبة و دعوة صادقة و بسمة نابعة من القلب و ضحكة تشرح القلب من نجاة و أمنية و مهند...فيهو أمنيات طيبات و كلام يلامس الروح...ده أجمل احتفال بي راس السنة عرفتو و عشته و مر بي...
عليكم الله في راس سنة أجمل من كدة...
| |
|
|
|
|
|
|
|
|
|
Re: مربع كاي (Re: الرشيد بابكر)
|
اتصلت هذا المساء بنجاة و العيال لأتحدث اليهم كعادتي كل مساء...أمسكت أمنية بالهاتف و قالت لي يا بابا بكرة نحن عاملين مفاجأةsurprise ....حنجيب ليك كيكة...انت عايز كيكة شنو..انا غايتو بجيب لي كيكة باربي...باربي الحرامية...كيف يعني باربي حرامية يا أمنية...عمو صوف (صفوت حسن عمر) قال لي باربي حرامية...ينتظر لي صفوت ده...داير يخرب لي ثقافة الأولاد ديل...ما عارف نحن صارفين عليهم قدر شنو يجي في يوم واحد يخرب شغل سنين...
أنا و ماما بنجيب كيكة باربي عشان نحن بنات و انت و مهند نجيب ليكم كيكة سبايدرمان...أنا سبايدرمان يا أمنية...أيوة عشان انتو أولاد...أنا أولاد...الله يطمنك...
عليكم الله في راس سنة أجمل من كده...مع اني ما عارف المفاجأة شنو...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا جماعة والله بندور الونسة بس الليل أقبل ، ويقينى ان محيى الدين فارس لم بعنينى بأشعاره التى تحث على عدم النوم ، أها ودعتكم لى أمين الوداعة على قول أمى متعها الله بالصحة والعافية.
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
| Quote: بروح زقازيقية 00 لانها نقية وصااافية 000 |
يعني يا الرشيد...
لا لون له و لا طعم
مش الموية صافية و نقية
عفاف سلامات و الجيفارات
إنشاءالله راكزين كويس؟؟؟؟
| |
|
|
|
|
|
|
|
|
|
Re: مربع كاي (Re: محمد آدم النور)
|
جلا يا حبيب أمبارح لما قلت لي بكرة تب بجيكم...قلت الزول ده نخلي ليهو باقي الصفحة
جيت لقيت مداخلتك دي...و أنا ما مابيها...
لكن شكيت...قلت يا ربي باقي مداخلة جلا دي اتهكرت ولا شنو..
ريفريش...ياها زاتا...
انت عارف يا جلا زمان الماهية كانت يا دوب بتكفي و مرات ما بتكفي...
المهم في ماهية كدة بتجيك فيها مناسبات كتيرة مرة واحدة..
عرس ولد عمك...و طهور ود أختك..و بكا عند جيرانكم
و بت خالتك ولدت...
و انت عايز تخت لي الناس ديل كلهم...
تعمل شنو...
تجيب الماهية و تقسمها زي المرارة..
هنا حتة و هنا حتة.....و هنا حتة..
المناسبة شنو بتاعت الكلام ده..
أقول ليك يا جلا..
أول ما أجي داخل المنبر...ألقى واحد دخل على كل البوستات..
كلمة هنا و كلمتين هناك و يمشي..
يجي واحد بعده...كلمة هنا و كلمتين هناك و يمشي...
يجي الماهية الجاية...,خمسين هنا و مية هناك و يمشي..
لحدي ما يجي مواعيد الماهية الجاية..
| |
|
|
|
|
|
|
|
|
|
Re: مربع كاي (Re: الرشيد بابكر)
|
قبل ما أجي الامارات كان في واحد بيشتغل سواق مع ناس نجاة في سفارة الامارات...
السواق ده مرة طلع رحلة صيد مع واحد أثرياء الفجيرة ولا راس الخيمة لا أذكر..
أعجب الثري بالسواق و أصر يسوقو معاهو الامارات..
الراجل فرح فرح شديد و جهز أوراقة بسرعة شديدة...و جاء و دعنا و سافر الامارات...
و الله فرحنا ليهو فرح شديد و قلنا والله بختو...ربنا حلاهو من الهم و الشقاء ده..
بعدين أسبوعين أشوف ليك زولي الما بيغباني سايق العربية...يا زول انت رجعت بتين..
أخدت ليك اجازة عشرة يومية و لا شنو..
قال لي يا زول أنا جيت نهائي...قلت ليهو و الله دي حقو يدخلوها في كتاب جينيس..
مالك الحاصل شنو...فحكى لي عن المعاملة السيئة للرجل الذي كان في قمة الذوق و الأدب
عندما كان في السودان...هو ما اتعامل معاي أنا شخصيا كده...لكن شايفو ليك مع الناس
التانين..قلت أحسن الملم عفشي و أرجع...
قال لي تتصور الزول ده بيصلي بينا جماعة..يقوم تلفونه يضرب...يقوم و هو بيصلي يرفس
الزول الوراهو عشان يرد على التلفون...يقوم الزول الوراهو يقطع صلاته يرد على التلفون..
لما جيت الامارات بعد داك خفت ألقى لي زول زي الحكى لي عنو زولنا داك...و كلما ما أشوف لي اماراتي
أتذكر ليك الرفسة بتاعت التلفون دي...
بعد فترة عرفنا الدريبات و بقينا بنتعامل مع كل الناس...مرة حكيت لي واحد صديقي القصة دي
فقام سألني قال لي حسة لو ده انت و شفت المنظر بتاع الرفس ده بتعمل شنو...
قلت ليهو ما بصلي الا في الصف التالت...
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلامات يا ناس
سلام يا رشيد...وكل عام وانت والاسرة بخير
لكم جميعآ الشوق
اها جينا سلمنا ختتنا فى العرس ده
اقبلوها مننا
| |
|
|
|
|
|
|
|
|
|
Re: مربع كاي (Re: محمد صديق)
|
Quote: اها جينا سلمنا ختتنا فى العرس ده
اقبلوها مننا |
يا كوتش مساء الخيرات... والخير لعلة تباشير العام الجديد..
يا كوتش مش في نسوان بتاعين شمارات كده..
أها زي ختتك دي...طوالي يمدوا ريسنهم..
النبي خت ليك كم...
لا مافي داعي ما بقول ليكم...
الرسول كان تقول لينا..
قلت ليكم ما بقول ليكم انتو دخلكم شنو..
أموت ليك كان تقول لي...شنو الدخلنا شنو دخلنا والله...
خت لي خمسين جنية بس ما تلكمو زول...
ششششششششششششش...قادر الله... خمسين جنية...
انت وقت ختيت ليهو الألوفات كانت أمك عشة و لا أبوك الباشا..
ما كنت زيو كده...
قادر الله...
كل عام و أنت و خالدة و أصدقائي بكري و عمر بألف خير يا كوتش...دمتم بخير و عافية...
| |
|
|
|
|
|
|
|
|
|
Re: مربع كاي (Re: محمد صديق)
|
| Quote: يقول لى ... الله يسهل عليك يا بنى ... قووووم فوووت بلا رمان بلا تووووت ..!! |
ذكرتنى يا محمد عيد واحد صاحبنا فى الزقازيق ركب مع بتاع تاكسى وأغلب الظن أن الدنيا كانت : ليل .... غربة ....... ومطر ، والمطر هذا ينشط حركة التاكسى بالزقازيق رغماً عن المسلك غير الحميد لسُوّاق التاكسى بوضع بعض الكراتين أو القش للحفاظ على أرضية فرش التاكسى ، صاحبنا هذا بادر صاحب التاكسى بعبارة : مساء القشطة ، يبدو أن سائق التاكسى كان منكدر المزاج فبادره بالقول : إشطة ... عسل ... كلّو سايح.
للمصريين علاقة غريبة بظاهرة السوحان ، ذهب أحد الزملاء بالزقازيق للسنترال ، وطلب إجراء محادثة للخرطوم ، وكانت محادثة الخرطوم - من مصر أو أى مكان داخل أو خارج السودان - تنضاف للعنقاء والخلَّ الوفى وظواهر ما وراء الطبيعة ، يبدو أن عامل السنترال كان فى حال استرخاء ذهنى ونفسى ، فبادر صديقنا بالقول : إيه يا خويا .... الخرطوم؟ ...... الخرطوم فى الفيل ...... الخرطوم بتسيَّح
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
Quote: فقام سألني قال لي حسة لو ده انت و شفت المنظر بتاع الرفس ده بتعمل شنو...
قلت ليهو ما بصلي الا في الصف التالت... |
غايتو يا رشيد زولكم البرافس ده مافى بلد ممكن تشيلنا الإتنين ، على رأى أخونا مجدى أبو الجيش وهو قريب زميلنا وليد مبارك وكان يعمل ساعياً بمكتب الإرصاد الجوّى ، مرّة مدير المكتب إنفعل وصرخ فى وجه مجدى ، كانت المفاجأة رد فعل مجدى أبو الجيش ببساطته المعهودة حين قال للمدير : يا أنا يا إنتَ فى المكتب ده ، ضحك المدير حتى كاد يسقط مغشياً عليه وطيَّب خاطره بالقول : معليش يا مجدى ، سامحنى المرّة دى ، تانى ما بكرر الغلطة دى.
لو قدر لى أن أصلى مع أب رفّاس هذا لطلبت منه أن يقرأ علينا فى الصلاة سورة الكافرون مع التركيز على (لكم دينكم ولى دين)
| |
|
|
|
|
|
|
|
|
|
Re: مربع كاي (Re: عبد القادر بابكر)
|
ازيكم وكل سنة وانتو طيبين وكمان اهنىء بعيد الاستقلال المجيد
والله مشتاقين شديد وقلت اطل من مربع كاى وبرضو عارفاكم مشتاقين لى ولى ونستى
والله يا رشا امس نانسى عجاج فى الرفيرا بس ربنا ما سهل
وجا العام الجديد واختك فى سابع نومة
كل الجدعان مشتاقين والله ظروف قاهرة حبستنى منكم
حنتواصل
مافى طريقة اقرا الفات بس حاعمل جدولة
حابداء من حيث انتهيتو
| |
|
|
|
|
|
|
|
|
|
Re: مربع كاي (Re: زينب التجاني)
|
والله لكن ياناس كاي راسكم ثقييييل !!!!
السنة دي داخلة عليكم بنوم شديد ..
زوبة ..
مرحب بيك شديد والله
ونورت الحوش بعد غيبة طويلة
سنة حلوة عليك وعلي عيالك وابوهم
وانشاء الله موفقين وسعيدين دائما ..
البركة في نومتك دي وانشاء الله نوم العوافي
أنا صحيت نص الليل قلت ألقى الجماعة معيدين
وحياتك لقيت البيوت كلها خلا ...
ختيت الفيها النصيب ورجعت نمت ..!!
| |
|
|
|
|
|
|
|
|
|
Re: مربع كاي (Re: الرشيد بابكر)
|
أبو الرشد الحبيب ..
سنة حلوة عليك وعلي العيال وأمهم
وانشاء الله دائما تامين وسالمين
وأمنياتي القلبية لكم بدوام المحبة والسعادة
قصرت معاك ؟؟؟
حارس ليك البيت من النجمة ..
وصورتك الما ظهرت معاك ظهرتها ليك ...
تعال ومعاك كلامك الطاعم ..
| |
|
|
|
|
|
|
|
|
|
Re: مربع كاي (Re: الرشيد بابكر)
|
Quote: والله يا رشا امس نانسى عجاج فى الرفيرا بس ربنا ما سهل
|
زوبا و الله أمبارح مراسلنا أبكرونا نقل لينا حفل نانسي على الهواء مباشرة من الريفيرا...سمعنا أغنية يا زمن و أغاني أخرى...
و نحن هنا في أبوظبي نتوجه بعظيم الشكر لمراسلنا أبكرونا الذي جعلنا نعيش مع الحدث و كأننا داخل الريفيرا...
قدورة...ما تنسى يا حبيب فرق التوقيت....أنا قاعد فاتح البوست لحدي الساعة 1 صباحا من العام الجديد أي الساعة 12 بتوقيت السعودية ثم مشيت اتفرج في سهرة وردي في النيل الأزرق حتى الساعة الثانية و النصف صباحا...لكن قبل سهرة وردي غير بكري ما كان في أي زول...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يارش ..
انتو ياناس ابوظبي البقعدكم في البيت شنو في راس السنة ؟؟ ما قالوا البهجة عندكم والاحتفالات لحدي وش الفجر .. مش زينا هنا !!! وحياتك كل العملتو سقت العيال المنتزه لعبو ليهم كم ساعة كدة ورجعنا البيت .. قلت أقعد في التلفزيون شوية لكن ما عارف والله الواحد بقى عندو ملل من الغناء .. رميت الريموت ومشيت علي الكمبيوتر ....
راس السنة الفات كنت في الخرطوم كان يوم جميل بالرغم من اننا ما دخلنا حفلة لكن وفي غفلة من العيال وناس البيت خطفت أم ديمة في نزهة في شوارع الخرطوم واستمتعنا بمظاهر الاحتفالات المتعددة وفي النهاية ختمناها بوجبة سمك حااااارة في سوق الموردة كانت آخر عهدي بطعم السمك الجميل حتى الآن ..
| |
|
|
|
|
|
|
|
|
|
Re: مربع كاي (Re: الرشيد بابكر)
|
شكرا يا قدورة يا محترف...
طبعا صاحبك باكستاني الياباني ده عايز يختبرنا بي مهيد محمد المتوكل...و على فكرة دي ما أول مرة يسألنا و من مهيد زاتو....و بعد داك قال نحن عايزين كركم....عليك الله العايز كركم منو...أنا على فكرة ما حبيت أبهدلو ليك في البوست...قلت أنتظر لحدي ما تجي السنة الجديدة عشان تكون أول بهدلة ليهو في العام الجديد...
أمشي كده ولا كده يا باكستاني الياباني...
| |
|
|
|
|
|
|
|
|
|
Re: مربع كاي (Re: عبد القادر بابكر)
|
Quote: يارش ..
انتو ياناس ابوظبي البقعدكم في البيت شنو في راس السنة ؟؟ ما قالوا البهجة عندكم والاحتفالات لحدي وش الفجر .. مش زينا هنا !!! |
قدورة...
احتفالنا كان بيتوتي كالعادة...مع العيال و أمهم و ده بالنسبة لي أجمل احتفال...
الاحتفاليات براس السنة تعد على أصابع اليد الواحد...
| |
|
|
|
|
|
|
|
|
|
Re: مربع كاي (Re: الرشيد بابكر)
|
يا عسل كلكم ...
كل سنة وانتو طيبين
والله قضينا راس السنة فى البيت
لكن كانت فى غاية الجمال ..
تشرفنا بمشاركتنا المناسبة من الريس ميسرة واسرته وشاركنا النضيف عبر الهاتف
وكانت من احلى الليالى
*******
هذا زمانك يا مهازل فامرحى ...
العجايز الاصلو تاريخ ميلادهم بالتسنين يعنى 1/1
قدورة والرشيد ...
يعنى الليلة عيد ميلادهم ..
المهم .. الاتنين ديل قاعدين يتريقوا على فى موضوع مهيد !!
اولا غالطونى فى اى جتة الا فى مهيد ...
لآنو انا باعرفوا من ايام الوسطى يا بتاعين المدرسة الاولية بالجلاليب ..!
ثم تانيا هو جارنا فى بحرى والمعرفة موثقة من زمن ...
واتحدى ثم اتحدى من يتحدى ...
اسمه الكامل : مهيد محمد متوكل مصطفى
مع تحياتى ابو الكركم مخلوط بى عسل النحل ( ودى بعدين باشرحها ليكم ..!! )
| |
|
|
|
|
|
|
|
|
|
Re: مربع كاي (Re: محمد عيد)
|
رشيد ... بالله علق النتيجة دى فى كشك السجاير الجنب المربع
عشان ناس بيطرة لمن يجوا مارين يعرفوا التاريخ الصاح ويغيروا جدول الحصص
| |
|
|
|
|
|
|
|
|
|
Re: مربع كاي (Re: محمد عيد)
|
يا حمادة يا سلام على اللوحة الجميلة...حألصقه في تلاجة الآيسكريم مش كشك السجاير...مالي و مال العزابة ديل...
نجي لي مهيد...أنا ما مغالطك في الاسم...أنا بقول ليك قبل كده سألتني منو و جيت تاني تسألني منو...خلي ليك شوية كركم بالعسل...
| |
|
|
|
|
|
|
|
|
|
Re: مربع كاي (Re: زهير الزناتي)
|
| Quote: يا سلام يا عيال مربع كاي .... علي حنتكم الحلوة .... لمن تكون محلبيتها حبة ... بتشيل وتسود سريع ... |
يا سلام...أبكرونا شخصيا...و الله أمبارح نقلتنا نقلة جميلة الى موقع الحدث و جعلتنا نشعر بالسعادة الشديدة...
دي شوية محلبية و كان ما شالت أطبقه
| |
|
|
|
|
|
|
|
|
|
Re: مربع كاي (Re: الرشيد بابكر)
|
ناس مربع كاى .......... سلام
كل سنة والجميع بألف خير .
محمد عيد ...... شكراً على النتيجة ، أنا غايتو ما بحتاج كركم ، أدينى بدلو شوية دروس فى إرفاق الملفات .
خرجنا أنا والأسرة ليلة أمس ، تجولنا فى شوارع المدينة غير المجاورة للمراقص والفنادق ، عدنا بوجبة عشاء وأدركنا العام الجديد شبعانين ومبسوطين.
| |
|
|
|
|
|
|
|
|
|
Re: مربع كاي (Re: أبوبكر حامد الأمين)
|
مساكم الله بالخير
أتذكر اليوم بنت عمي تماضر...أو أختي تماضر...هكذا كنا ننادي أبناء و بنات أعمامي و ينادوننا...
تماضر درست بكلية العلوم بجامعة القاهرة...كانت تتقدمني بسنتين لذلك عندما حضرت الى مصر لأول مرة كنت بصحبتها و كنت تحت رعايتها الشديدة و حتى عندما جئت الى الزقازيق للتسجيل أول مرة أرسلت معي وفد رفيع المستوى بقيادة الأخت فوزية الرضي أخت الزميلة سناء الرضي و الأخ ابوعبيدة عبدالله بشير...و حتى عندما استقريت بالزقازيق فرضت علي زيارتها أسبوعيا حتى تطمئن علي...و كنت عندما أزورها ببيت الشابات المسيحيات بالانتيكخانة في وسط البلد...تدلعني غاية الدلع...و كثيرا ما شربت الشاي مع ما لذ و طاب من الكيك و غيره في جروبي بميدان طلعت حرب...تماضر زيادة على ظرفها و رقتها لها شخصية طاغية و قوية...و لها قدرة جبارة على الاقناع ...
لم تنسى تماضر أبدا مسئوليتها تجاهي و حتى و أنا في السنة الرابعة...يكاد معظم أصدقائي يعرفون أختي تماضر...و أول من تعرفت عليهم نجاة حوفي من أفراد عائلتي بعد أختي غادة...
تخرجت تماضر من كلية العلوم و عملت في مختبر باحدى المستشفيات بالخرطوم بحي العمارات قريبا من منزلهم...و أحبت تماضر هذا العمل بشدة و أصبحت متفوقة فيه...
بعد تخرجي كنت كثيرا ما أمر عليها لأقضي معها وقتا طويلا بالمستشفى...كانت تماضر تفرح فرحا شديدا بزيارتي لها...أولا بسبب أننا تزاملنا سويا و توجد ونسة مشتركة بيني و بينها و ثانيا لأنني صيد كبير بالنسبة لها...أول ما أدخل عليها و أجلس و تطلب لي الشاي أو القهوة..تبتدرني بسؤال أشتهرت به بعد ذلك في العائلة...مالك وشك أصفر كدة و مخطوف...شاعر بي حاجة.. لا أبدا و الله ما عندي حاجة ولا شاعر بي أي حاجة....و عادة ما أكون صادقا في ذلك...و كنت وقتها قادر على لعب مباراتي كرة قدم في يوم واحد (زمن الزمن زين و الشعر مغطي الاضنين)...و لكنها كانت تصر على أني غير طبيعي...و تأتي بالأربطة و الحقن و تأخذ كمية من الدم تكفي لاسعاف كتيبة كاملة و تبدأ في التحاليل...
في الوقت الذي تقوم فيه تماضر بعمل التحاليل أكون أنا في غاية القلق...فتبدأ بالملاريا...أها الحمد لله ما عندك ملاريا...و أنا أقول الحمد لله..التهابات ما عندك...الحمد لله...كدي أشوف ليك السكر...و هنا يزداد قلقي...رغم أن السكري غير معروف في تاريخ أسرتي المرضي...تبدأ في الخلط و تضيف محاليل لونها أزرق...ثم تقول و كمان ما عندك سكري..الحمد لله...أسمعي يا أختي لغاية هنا كفاية...جزاك الله خير...أخليك انتي تحللي براحتك...أنا ماشي ودعتك الله...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: و كنت وقتها قادر على لعب مباراتي كرة قدم في يوم واحد (زمن الزمن زين و الشعر مغطي الاضنين)...و لكنها كانت تصر على أني غير طبيعي...و تأتي بالأربطة و الحقن و تأخذ كمية من الدم تكفي لاسعاف كتيبة كاملة و تبدأ في التحاليل.. |
والله يارش بت عمك أو أختك تماضر ما قصرت معاك ..
انا ما عارفك مدلع من زمااان ...
لكن كدي لو راجل أمشي ليها هسة بي كرشك الكبيرة دي
عشان أقل حاجة تطلع منك بي قاوت هههههههه ....
انشاء الله تبرى يايابا ....
| |
|
|
|
|
|
|
|
|
|
Re: مربع كاي (Re: عبد القادر بابكر)
|
Quote: لكن كدي لو راجل أمشي ليها هسة بي كرشك الكبيرة دي
عشان أقل حاجة تطلع منك بي قاوت هههههههه ....
انشاء الله تبرى يايابا ....
|
لا و انت السادق يا أخويا...الكوليسترول...
الكلمة دي اتعرفنا عليها حديثا...زمان أظنها كانت مافي...
كل ما أمشي للدكتور أشتكي من حاجة...يقول لي أفحص الكوليسترول...
و يديني ليك برنامج للريجيم...
و الله يا قدورة أنا لو بآكل البيكتبو لي الدكتور ده...كان بقيت هولك هوقان...
بتعرف هولك هوقان و لا ثقافتك انجليزي...
برنامج الدكتور فيهو خمس وجبات في اليوم...و أنا حسه بآكل وجبة واحدة...
المهم...رغم ان الوالد ربنا يديهو الصحة و العافية بيعاني من القاوت...
لكن أنا بقيت متعقد من حاجة اسمها الكوليسترول...
| |
|
|
|
|
|
|
|
|
|
Re: مربع كاي (Re: الرشيد بابكر)
|
هضربة
هاجرت الى الامارات في العام 1997 في شهر سبتمبر...حضرت الى الامارات دون سابق ترتيب..دون أي وعود بالعمل من أي أحد..و دون أن يكون هناك أحد في انتظاري لا في المطار و لا في أي مكان...
استغليت صداقتي بالقائم بالأعمال الاماراتي و أكرمني بتأشيرة زيارة لي و لنجاة...فتركنا شقتنا كما هي حتى الملايات تركناها مفروشة في السراير و حملنا شنطنا و ركبنا الطيارة الى أبوظبي...
ماذا حدث بعد ذلك..هذا ما سأتي اليه لاحقا...ولكني الآن بصدد ماذا حدث قبل ذلك لأجازف و أحضر الى الامارات و معي نجاة دون أي ترتيبات...
من أين أبدأ...هل أبدأ من حيث انتهيت و أرجع الى الوراء أم أبدأ منذ تخرجي من الزقازيق و الى حين قررت السفر الى الامارات...
سأحاول المرور سريعا على كل تلك الفترة منذ تخرجي و الى أن قررت السفر...
بعد أن تخرجت من الزقازيق و حضرت الى السودان كان كل همي منصب في السفر الى أمريكا لمواصلة الدراسة و العمل في نفس الوقت حتى أتمكن من تحقيق كل أحلامي...و رغم ان كل الظروف كانت مساعدة الا انني اصطدمت بحاجز عدم موافقة الوالدين على سفري...فلقد كانت تخشى أمي أن أذهب بلا عودة و أتزوج بأجنبية كما فعل خالي محمد...فلم أستفيد من القبول بجامعة لويزيانا الذي أرسلة لي صديقي مصطفى عبدالله محجوب..و بقيت أجدد هذا القبول لسنوات آملا أن يأتي يوم يوافق فيه والدي...و لكن لم يحدث هذا الا بعد أن انتهى القبول...
دي كانت واحدة من الاحباطات...
بقيت بين وزارة الزراعة و البيت و حاولت أن انتسب لعمل الماجستير بجامعة الجزيرة و لم يتم قبولي وقتها و ذلك لتقدم عدد كبير من خريجي الجامعة للماجستير فأعطيت الأولوية لهم...و كان الاحباط الثاني...
عملت بشركة ساندوز...و هي شركة تعمل برش المبيدات بمشروع الجزيرة...فرحت جدا عندما عرفت أن رئيسي المباشر كان الأخ و الصديق السنير سامي الياس خريج زراعة الزقازيق...و عملت لموسم كامل لرش مبيدات الحشائش عدت بعدها و أنا أحمل في جيبي مبلغ 450 جنية و تايفويد أقعدتني بالبيت شهرين...و بعد أن استعدت عافيتي طلتني الشركة للقيام بتجربة مبيد جديد لشركة يابانية و لكني رفضت الذهاب...أحسست وقتها أن مثل هكذا لن يوصلني الى ما أصبو اليه...فلم أذهب رغم غضب أبي الشديد...و لكن عدم ذهابي جعل أبي يشعر بالذنب و سمح لي بالذهاب الى أمريكا بعد أن ضاع القبول..
لم يكن في بالي أبدا العمل بأي دولة عربية و خصوصا خليجية...و أذكر أن أخي و صديقي منصور كان طلب مني مقابلة أحد السعوديين بالهيلتون الخرطوم و كان قد جاء لتوظيف مهندسين زراعين سودانين..بعد أن قدم لي عرضه ضحكت و عدت الى البيت..و عندما سألوني ماذا فعلت أجبتهم بأنه لم يغريني و لم يستطع تغيير رأي...
ثم تلت ذلك مراحل...سأعود اليها
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلامات يا ناس
رشيد الحبيب....سلام وشوق
احساس غريب بأنّى بعيد عنك وكذلك محمد عيد..من اين تسرّب هذا الاحساس؟
سأنتظم بحمد الله فى الكتابة للفترة القادمة ...فبراير كان مجرد توقع للاسوأ...وهو
توقعٌ خائب كما ترى...
فى زول كان فى زراعة اسمو عبد الناصر عوض عبد الله ..ناس الدامر
بتعرفوا يا ناس زراعة؟؟
لك الود
وقبلها محتار : بكرى حامد ومحمد عيد ما بيجونى ليه ...عاملين فيها يعنى
استمعوا لكل الحاجات؟؟؟؟
| |
|
|
|
|
|
|
|
|
|
Re: مربع كاي (Re: الرشيد بابكر)
|
بعد عودتي من الجزيرة كنت أقضي معظم وقتي بوزارة الزراعة بحثا عن شئ يشغلني...الطموحات الكبيرة كلها ذهبت أدراج الرياح...الوعود التي قطعتها على نفسي و خطتي التي وضعتها باحكام كلها نسيتها أو أنسانيها الاحباط الشديد..و لكني تحملت كل ذلك بصبر كان أبي يصفة بأنه كصبر أيوب...و كان يعدني بالخير كله..لا لأنه يعرف الغيب ولكنه كان يقول لي لا بد أن تكون نتيجة صبرك هذا خير كثير...
طرحت في الوزارة فكرة الزراعة الفيضية في مناطق حلفا و غيرها..و المقصود بالزراعة الفيضية هي زراعة الأراضي التي ينجلي عنها النيل في منطقة بحيرة السد العالي فتزرع في الموسم الشتوي...قررنا خوض التجربة و أعتقد أن محمد عيد كان أحد رواد تلك الفكرة..أخضعنا للتدريب في ادراة البساتين لفترة شهرين على ما أذكر و بعد ان انتهينا من التدريب تم الغاء المشروع..
كنا نخرج من احباط لندخل في احباط آخر...و كان الصبر رفيقي...
عملت بعد ذلك بمفوضية الاغاثة و اعادة التعمير...و كانت تلك من أحسن الفترات...كان العمل ممتعا...حيث كنا نتجول في ما كان يعرف بالاقليم الأوسط...كنا نكون فريقا يعرف بفريق الانذار المبكر...كذلك كان الراتب مجزيا...وقعنا عقدا مع المفوضية لمدة ثلاثة أشهر قابلة للتجديد..قبلنا بالعقد المجحف من فرط احباطنا...وفرت لنا كل الوسائل المساعدة من سيارات و أماكن للسكن في المدن التي نزورها...
تغيرت أحوالي كثيرا و ابتدأت أشعر بأن الحياة قد ابتسمت لي أخيرا و تجولت بين مدني..سنار...أبوقوتة...القطينة...كوستي...تندلتي..رفاعة..تمبول..و غيرها من المدن..فكانت بحق فترة ثرة جدا...عند انتهاء فترتنا جدد لنا و لكننا بقينا في الخرطوم بلا عمل..استحرمت ذلك..فخرجت يوما من بوابة المفوضية دون رجعة..
فعدت مرة أخرى الى الوزارة الحنينة...تخرجت نجاة حوفي في تلك السنة و زاد الضغط علي جدا...فما زلت كما أنا يوم تخرجي...
ظهرت في ذلك جميعيات الخريجين الزراعيين و قامت عدة جميعيات تم استيعاب الذين سبقوني في التسجيل وذلك من حسن حظي...ثم ظهرت جمعية أبو زمام الزراعية بشمال الجزيرة و ظهر اسمي أخيرا من بين أسماء الأعضاء...ففرحت لذلك كثيرا..و ساهمت بكل أملك من علاقات في أن ترى النور و كنت قد حكيت لكم من قبل كيف كنت أقضي كل اليوم في انتظار مقابلة مدير البنك الزراعي...و وفقني الله و جعلت المدير يزور موقع الجمعية و يلتزم بدعم البنية التحتية للمشروع...و كان ذلك وصل عصب الحياة...الماء...الى مشارف الموقع و أصبح العمل ممكن...
أخذني منصور بحافلته الصغيرة و كان معنا نجاة حوفي و حنان القطينة و صفاء الى موقع الجمعية ثم تركوني و رجعوا..بدأت واحدة من أهم التحولات في حياتي...
وهذه سوف اتي اليها في الحلقة التالية...
| |
|
|
|
|
|
|
|
|
|
Re: مربع كاي (Re: الرشيد بابكر)
|
| Quote: احساس غريب بأنّى بعيد عنك وكذلك محمد عيد..من اين تسرّب هذا الاحساس؟ |
يا كوتش يا حبيب ليك أشواق كتيرة...
و الله يا كوتش...تبي الصراحة...دي بالخليجي...يعني عايز الصراحة...خليني ألكمك بصراحة طالما نحن
قاعدين بتونس في الحوش ده برانا...
من بعد مئوية البوست أحسست بغربة شديدة..خاصة و ان البوست كان يشغلني جدا وعوض علي وجودي بعيدا عن عائلتي...ربما لم يختبر أي واحد فيكم هذا الشعور...
بعد المئوية وجدت نفسي وحيدا في البوست...أقضي الليل أترجى الناس ليحضروا فلا يحضر أحد..
ثم يأتي واحد بعد يومين فيسأل أين الناس و لماذا أصبحوا لا يحضرون و هكذا...بينما كنت أسأل ههذا السؤال يوميا وفي رأس كل ساعة...أحيانا بعمل ريفريش كل نص ساعة حتى أحظى بصحبة في الليل الطويل...
هذا الوضع دبرس بي حقيقة...و أصبحت أحيانا أعمل مداخلات توصف من كثير من الاخوة بانها مداخلات السبت و زهج الأحد و احباط الاثنين ...الخ...و هم على حق...و لكن هذه المسميات لم تكن هنالك قبل المئوية...
ثم أنشأت مربع كاي...و اجتذب البوست عدد من الاخوة الذين جملوا ليلي و نهاري و شغلوني قليلا...
ثم كان حضور بكري الحدث الأجمل بعد المئوية فلقد تداخل معي في كل الليالي رغم مشغولياته...
فأصبح المربع كهفي الذي أنزوي فيه و أخرج فيه ما بداخلي و أكتب لقلة من الناس يقرأون ما أكتب...و أفرح كثيرا عندما يحدثني ياسر نجيلة ويقول لي انني أقرأ بانتظام ما تكتب رغم أنه لا يتداخل معي...هذا يسعدني جدا...
أنا يا كوتش لا أعرف الكتابة الا بعد مساجلات من و مع الناس و بدون ذلك أشعر بالزهج و القرف و تبدأ كتاباتي تأخذ الطابع بتاع الزهج...فتعلمت فن الكتابة الى نفسي في هذا البوست و بقيت أكتب و اقرأ لنفسي طول الليل..
ربما يكون هذا الذي جعلك تشعر بأنك بعيد عني يا كوتش...لآ أرغب في الانكفاء هنا وحدي...و لكن ان كان هذا هو الحل فلا بأس في ذلك...
| |
|
|
|
|
|
|
|
|
|
Re: مربع كاي (Re: الرشيد بابكر)
|
سلامات يا ناس
Quote:
ربما يكون هذا الذي جعلك تشعر بأنك بعيد عني يا كوتش...لآ أرغب في الانكفاء هنا وحدي...و لكن ان كان هذا هو الحل فلا بأس في ذلك... |
رشيد يا حبيب ...لك الشوق كله
لم نبتعد عنكم فنحن نقرأكم صباح مساء
ما عدنا نتداخل بأنتظام لمشغوليات عديدة وما تمكنّا من قول ما قاله نجيلة ولكنّا نفعل فعله واستعنا على ذلك بالكتمان وهو صعب علينا وانت أدرى
أتحدث بلسانى وذلك الذى يخص حاج السر...لم يقل لى ذلك ولكننى احسه....
انت لست وحدك ...فمعك وحولك كثيرون....
ربما وحدتك المكانية هى التى تبعث اليك بتلك الاشارات.....
ربما احساسى تصاعد لانقطاع اتصالاتك...وغياب نجاة حوفى عن البوست
فى شعرجميل لعرفة نزلتو فى [ ولمن فاتهم الاستماع ] ما كنت اعلم انها تتعاطى
الشعر....خش عليك الله اقرأ الابيات دى...
بكرى برضو ما ساهل ...على الاقل فى الشعر الشعبى ...حكمة الله مباريهو زمن
وما عارف انو بقول الدوبيت....هل هو الحياء؟؟
لك ما تتخيل من الشوق ولنجاة والعيال
| |
|
|
|
|
|
|
|
|
|
Re: مربع كاي (Re: محمد صديق)
|
| Quote: ربما وحدتك المكانية هى التى تبعث اليك بتلك الاشارات..... |
يا كوتش...نعم انها غربتي المكانية...انها تبعث لي باشارات كثيرة أتجاوزها كلها ويبقى منها
القليل و الذي يكفي لاحداث كثير من الزهج حتى نهاية الأسبوع...
ما أن أرى أسمك على أي بوست الا و اهرع الى ذلك المكان متصيدك و ان لم أحظى بذلك أجد آثارك
فأسعد بها..و كذلك آخرون..
أنا أقرأ كل البوستات و بانتظام...كلها دون تمييز...هل عرفت لأي درجة اني ابحث عن الرفقة
و ذلك ليس بسبب غربتي المكانية و حسب..بل لأنني بطبعي أبحث عن الرفقة...
أعي مشغولياتكم و أستوعب غيابكم القهري و لا ألومكم في ذلك...و أنا ما قصدتك أنت بالتحديد
فأنت عندما تغيب بسبب مشغولياتك أو أغيب أنا لسفري يبقى البوست في حالة حراك دائم...الم يكن
كذلك دائما؟؟؟ عندما سافرت الى تركيا وجدت نفسي غير قادرا على اللحاق بركب البوست رغم انني كنت
أتداخل معكم من تركيا..هي أسئلة تحتاج لاجابات يا كوتش..
دمت دائما بعافية...
| |
|
|
|
|
|
|
|
|
|
Re: مربع كاي (Re: الرشيد بابكر)
|
الحبايب رشدي والكوتش ...
مساكم زيييي العسل وأحلى والله ..
والله العظيم حننتي يارش .. دموعي رقرقوا والله من بوحك الجميل مع نفسك أو يخيل لك أنه مع نفسك ولكنه في الحقيقة بوح محضور .. كنت مشغول من قبيل وكمان أم ديمة كانت محتلة الكمبيوتر بالرغم من انو عندهم كمبيوتر تاني لكن كمبيوتري ده عاجبهم .. المهم لما حنوا علي وفكوا الكمبيوتر أول ما خطر ببالي زيارتك في مربعك الجميل ده بالرغم من انو الوقت راح ولسه ما اتعشيت .. المهم دخلت ولقيتك منداح مع نفسك وعشان ما تحس بالوحدة المزعومة أرسلت لك إشارات بوجودي معك قلبا وقالبا وقرأت كل ما بحت به عاليه فهو بوح نحتاج جميعنا لممارسته وليس هضربة .. عدت معك بالذكريات لتلك الأيام الحلوة بوزارة الزراعة وبعدها لمفوضية الإغاثة فلو تذكر أنا تم توزيعي للولاية الشمالية مع أخوة أعزاء لا زلت أحمل عنهم أحلى الذكريات ولكنني فقط نسيت أسمائهم وأنا على ثقة أن الأيام ستجمعني بهم إن عاجلا أو آجلا .. كانت أيام حلوة أحتفظ منها بالعديد من الصور التذكارية ربما سنحت الفرصة لعرضها قريبا ...........
أبشر أخي فأنت لست وحدك ولن تكون وحدك طالما جمعنا هذا العشق الزقازيقي الجميل ...
جاييك يا رشا .. أتعشى بس .......
| |
|
|
|
|
|
|
|
|
|
Re: مربع كاي (Re: عبد القادر بابكر)
|
| Quote: أبشر أخي فأنت لست وحدك ولن تكون وحدك طالما جمعنا هذا العشق الزقازيقي الجميل ... |
شكرا يا قدورة على رفقة آخر الليل...
كان هنالك برنامج في اذاعة ما زمان أسمه حاجة كده آخر الليل...عشان أتذكر عايز لي كركم بالعسل من محمد عيد...و طبعا زي ما عارف أخوك سقد...صاحبني هذا البرنامج لزمن طويل...
حزنت جدا عندما توقف هذا البرنامج...
أنا مقنكر ليك الصفحة دي..تعال أقلبه و انت شبعان...
| |
|
|
|
|
|
|
|
| |
الرشيد بابكر
Elsuhaili Magzoub
زهير الزناتي
منصور عبد الرازق
محمد عيد
محمد صديق
أبوبكر حامد الأمين
جلال عثمان
ياسر نجيلة
عمر المهدى
ميسرة سيد أحمد
حنان مجمر
عفاف علي ميرغني
محمد آدم النور
عبد القادر بابكر
زينب التجاني
فيس بوك
تويتر
انستقرام
يوتيوب
بنتيريست