|
Re: كنت كادر عنف بالاتجاه الاسلامى جامعة الخرطوم..(عمار محمد ادم) (Re: Elbagir Osman)
|
ها نحن نترك عمار ليكمل شهادته .. لكن ......................
هل سيذكر كل الحقيقة .. هل سبتحدث عن التعذيب .. القتل .. التشريد .. الفساد ؟ هل سيذكر دوره فيما سبق وما قام به لارساء المشروع الحضارى وما فعله من تجاوزات تحت مبرر التمكين لدولة الرسالة ؟ كتابة التجارب والمذكرات ليست ترفا ولا من باب التباهى وهى تفترض الصدق والشجاعة والقدرة على قول الحقيقة بل الاهم من ذلك القدرة على تحمل كل تبعات الحقيقة كما تفترض شفافية عالية وصدق مع النفس وقدرة على الاعتراق بالخطأ وتحمل أوزاره من يكتب تجربته نقدا انما يجب أن تكون لديه رغبة فى التطهر وتخفيف عبء ما ناء بحمله صدره عبر السنين
والسؤال .. هل امتلك عمار كل تلك الأدوات أعلاه لنصدق خلوص نيته فى الافادة وشهادة التاريخ ؟ هل له القدرة على مجابهة السلطة اذا ماحاولت اسكاته بما ظهر من تململ بعض منسوبيها من قوله الحقيقة ؟
لا أعتقد أن عمار ذلك الشخص المتجرد للحق وهو الذى لا يزال بعض مغازل للسلطة وينتابه كثيرا حنين للماضى الذى لا زال أسيره للآن
| |
|
|
|
|
|
|
Re: كنت كادر عنف بالاتجاه الاسلامى جامعة الخرطوم..(عمار محمد ادم) (Re: amar adam)
|
Quote: الم فيهو قى الكبرى كيف يا اخ اشرف دى انا ما فاهمها فهمنى ليها |
.
هذا الكلام في اشارة الي محاولتك الفاشلة لاغتيال الاستاذ حسين خوجلي في منتصف التسعينيات من القرن الماضي
يا عمار عندما عاودت الوان الصدور وكانت في اوج عنفوانها وكانت تطبع يوميا مائة الف نسخة
( كمنت ليه) انت في كوبري النيل الازرق وهو في طريقه الي مكتبه بالفيحاء قادما من منزله ببحري
وعندما دخل الكوبري ومعه سائقه يوسف بالبوكس موديل 96 ظهرت انت وايديك مليانة حجارة وزن الواحد
2 كيلو وربنا ستر طبعا اتكسر القزاز وسلم الاستاذ وبكريتا عملنا ما نشيت في الوان كان عنوانه
محاولة اغتيال فاشلة لرئيس التحرير وطبعا باقي القصة انت تعرفوا زي جوع بطنك بعد ان عفا عنك
صاحب الوان
| |
|
|
|
|
|
|
Re: كنت كادر عنف بالاتجاه الاسلامى جامعة الخرطوم..(عمار محمد ادم) (Re: Abdlaziz Eisa)
|
طيب نفتح موضوع حسبت خوجلى تقريبا دا كان سنة1995 الوكت داك حسين خوجلى كان يهز ويرز والسلطة كلها فى يد الجبهة قبل ان تكون الجبهة كلها فى يد السلطة بى صراحة انا كنت الخاتى عليهو فى مكتب محجوب عروة قلت ليهو يا حسين انا سلمتك مقال وداير قروشو قال لى نحنا لسه ما نشرناه قلت ليهو فلان بيدينى قروشى حتى لو مانشر قال لى فلان بيخاف منك نظرت اليه كله وقلت ليهو يعنى انت ما بتخاف منى قام اتحرك من كرسيهو وقعد منى بعيد فى كرسى تانى وقال لى بكلم ليك ناس الامن هنالك اتخذت قرارى بينى وبين نفسى واضمرت امرا بعد داك انتظرت ايام كان فى ندوة ما اذكر فيها غازى سليمان الشريف زين العابدين الهندى المحبوب عبد السلام حاجة زى كدة وكانت فى قاعة الشارقة طلبت فرصة ادونى قمت قلت شايف حسين خوجلى الايامات دى كلو عمودو عن الدبابين شايفو معجب بيهم جدا هو حسين ده مايبقى دباب بالمناسبة حسين ده لو اتفجر حيعمل خسائر فادحة فى العدو وهنا ضجت القاعة بالضحك المحبوب كان بيتحاشانى ما رد على لكن كلمونى جماعة انو شال الكلام بى صمتو وداهو لى حسين هم كانوا شلة بى نسميهم اولاد امرمان واغلبهم من جامغة الفرع بكرة حسين فى عمود لالوان كلمة كتب عنوان الرجل الحلقوم وصفنى وما جاب اسمى ربع صحفى ونص طالب وسدس سياسى وحاقد كامل وكاذب استثنائى المهم طلعنى كسور وبواقى وقال انى بقول الشهداء فطايس يعنى كان بيحرض على ناس الامن والوكت داك انا لسه ما شميت الهواء طالع من بيوت الاشباح اتصلت بيهو مارد اتصلت بى مدير التحرير احمد عبد الوهاب قلت ليهو الزول ده اتصلت بيهو ما رد احمد قال لى هو حيمشى من الله وين كررت محاولات الاتصال من مكتب صحيفة المستقلة بتاعت الحامدى رد على قلت ليهو غاضبا دا شنو الكاتبو الليلة فى الوان قال لى ماتفهم غلط انت ما المقصود قلت ليهو ياحسين انا المقصود قال لى لو فاهم كدة اشتكى قلت ليهو انت عارف انا ما بشتكى قال لى ورينى رجالتك وقفل الخط...
| |
|
|
|
|
|
|
Re: كنت كادر عنف بالاتجاه الاسلامى جامعة الخرطوم..(عمار محمد ادم) (Re: amar adam)
|
طبعا يا جماعة
صورة البروفايل الخاتيها عمار دي كانت في بيت الرئيس ليلة لقاء الاعلاميين بالخارج
والراجل اصلوا ما فارق الناس تب يرعي صينية صينية زي ما بقولوا اهلنا
وعمار ده ما خلي بوفيه مفتوح مارعاه كل همو بطنو وبس
وصورة البروفايل دي التقطت له بعد ان رعي العشا كلو يعني شبعة حدها الزيق
وختف عصاة د/ كرار التهامي وبقي يردح بيها جوة الدارة والفنان حسين شندي طبعا
وبرضو يدعي الوطنية وانو من محبي الوطن وحديثه هنا كله كذب في كذب
عمار طبعا احمد عبد الوهاب صاحبك ده ابن عمي لزم ويتعاطف معك من اجل تاريخك لكنك نكار جميل!!
| |
|
|
|
|
|
|
Re: كنت كادر عنف بالاتجاه الاسلامى جامعة الخرطوم..(عمار محمد ادم) (Re: amar adam)
|
فكرت فى الامر هل اذهب اليه الان فى عمارة الفيحاء حيث مكتبه فى الطابق الثانى وما عسانى ان افعل هناك فان الفيحاء بها وجود امنى كثيف وقد يؤدى الى فشل العملية واعتقالى مرة اخرى يا ترى هل آتيه حينما يرخى الليل سدوله فى شقته الارضية ببحرى وهل يليق ان اعتدى عليه بين اهله وامام نظر ابنائه لا ينبغى ذلك فانا اب اعلم مدى تاثير على الابناء خاصة على اطفال بريئين لا ذنب لهم صحيح اننى قد كنت فتوة ولكن باخلاق..وكان ذلك الصباح المشهود عند مدخل الكبرى من جهة بحرى لقد كانت مهمة ذلك الحجر الضخم الذى اجلس عليه ان يهشم الزجاج ويوقف عربة البوكس التى تخفى بها ذاك الصباح والعهد به ان يركب الكريسيدا الما خمج وانا اجلس على الحجر فجاءة رايت حسين خوجلى فى عربة بوكس امامى والى جواره السائق يوسف وهجمت على البوكس وانال اشبه بالوحش الكاسر لقد كنت انوى ان افرغ كل غبن بيوت الاشباح فيه وكتب حسين خوجلى (لولا مهارة السائق)فعلا لقد نجا السائق با عجوبة كما جاء فى الخبر اليوم التالى فى الوان (رئيس التحرير ينجو من محا ولة اغتيال) واصبحت مطاردا من اجهزة الامن خاصة وان بالبلاد توتر شديد فقد احتلت الحركة الشعبية الكرمك فى تلك الايام وقد اجتهد حسين خوجلى كثيرا لالقاء القبض على وتمت محاصرة مكتب غازى سليمان الذى زرته لحيظات..
| |
|
|
|
|
|
|
Re: كنت كادر عنف بالاتجاه الاسلامى جامعة الخرطوم..(عمار محمد ادم) (Re: Elbagir Osman)
|
Quote: الله عشان ادبك ده اقول ليك الحقيقة الموضوع ابسط مما تتصورين مرتين علقت ليها على النطلون والتىشيرت المرة الاولى ما ردت على وكان تستمع الى وشكلها مهذبة المرة التانية تجاهلت كلامى ومشت انا الطاهر معجب وعامل فيها واعظ وانا ما عارف قصة المانية دى المرة التالته داخا بوتيك النشاط تانى اتكلمت معاها لاول مرة ترد على بالانجليزى قالت لى ما يخصك قمت هجت معاها بالكلام بلا صر قطعت فينى كف الغريبة ضحكت قمت دفرتها مسكتنى واحدة من الاخوات والقصة انتهت على |
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
استهلال عمار ادم للبوست لنربط القراء الجدد , وهي شهادة تاريخية مهمة ليعلم الشعب السوداني شهدائه من شهداه :
Quote: عندما استدعانا الشيخ عبيد ختم بدوى بعد صلاة الفجر فى غرفة مجاورة لمسجد الجامعة فيما كان يعرف (بالمجمع) كنا عد من الاخوان اذكر منهم طارق محجوب وابراهيم خبرة ومحمد سعيد عبد الفتاح امرنا ان نحسم الشيوعيين اذا ما رفعوا لافتاتهم اليوم فى المسيرة التى تسيرها اللهيئة العليا لمناصرة القضية الفلسطينية وكان يترأسها السيد ميرغنى النصرى رئيس اتحاد المحامين السودانيين وكان من المفترض ان تخرج جميع تنظيمات الجامعه تحت راية الاتحاد الا ان الجبهة الديمقراطية اصرت ان تخرج بلافتاتها وهذا ما دعى الامين العام للتنظيم عبيد ختم ان يدعونا لحسمهم بالعنف..لم اصدق انها قد حانت الفرصة لافرغ شحنات العنف فى داخلى ..وفى من ؟و فى من فى الشيوعيين..الله اكبر عليهم ..وبدات فى التمارين اللازمة للمعركة القادمة نهار اليوم. |
....................................................................................حجر.
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: عبد اللطيف السيدح)
|
لنا مقدرة عجيبة على افراغ الأشياء من مضمونها,فقبل ان يقول الأخ عمار( بغم) بدأنا فى التداخل(مع احترامى لكل المتداخلين)ولم نعط الراجل فرصة ليحكى لنا عن تلك الفترة السوداء من تاريخ السودان,وحتى الأخ عمار ذاته يبدو انه مستمتع بكده بدليل تعليقاته مع هذا وذاك وترك الموضوع الأصلى وعلقه كما تركنا نحن معلقين فى الهواء. ياأخ عمار اما ان تواصل بدون انقطاع او اقفل البوست لتريح وتستريح . مع تحياتى
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: Abuelgassim Gor)
|
نتم قصة حسين خوجلى انا قاعد تحت فى مكتب المستقلة فى البدروم بتاع برج البركة جا نى واحد شهم معاكم فى المنبرده ارجو مداخلته جانى وقال لى ناس الامن محاصرين مكتب غازى بيفتشوا فيك كان معاى واحد فدر الليلة وباكر مافى داعى لى اسمو قلت ليهو نتخارج الزول جبن جنس جبن حسمو انهار وقعد لى فى كرسى تصدر منه اصوات رعب وكلام ارتباك عرفت زولى ما عليهو تكلة بى سرعة اتصرفت طبعا ابواب البرج بى تكون مراقبة قمت باريت ليك عربية طالعة بى قراش البرج واتخارجت بالقراش عديت شارع القصر دخلت بنك ما عارفو شنو جازفت لى قروش من واحد بعرفو بى سرعة ركبت حافلة فى الطريق ماشه بحرى اتارى فى واحد متابعنى انا واقف زاكب فى باب الحافلة نط معاى واحد فجاءة شكلو منزعج وفى يدو مفتاح عربية عرفتو من الجماعة بديت اعصر فيهو على الباب واحمَر ليهو فى وشو وقبل العربية ماتصل نفق برى نزلت ونطيت فى عربية تانية وزولك ما حاول يعمل حاجة المهم قدرت اتخارجت اختفيت يوم يومين شمال امدرمان وتانى جيت نمرة 3 كان قريب عيد الضحية فى صلاة العيد فى مسجد شرونى شايف ليك واحد كبير من الجماعة بعد الناس ما كبرو طوالى وقفت جنبو عند السلام اتلاقينا وجها لوجه طبر عيونو سلمت غليهو وهو يتلفت اتخارجت جاتنى معلومات انو حسين خوجلى استدعوا ناس اللجنة الامنية فى مجلس الوزراء كان فيها سبدرات والطيب سيخةوجدوا البلاغ تعدى جابو المتحرى مساعد شرطة قالوا لى حسين بلاغك تعدى وتكتب مين شيت رئيس التحرير ينجو من محاولة اغتيال وفى الساعة تسعة وجنب الكبرى ولى رئيس تحرير جريدة معروفة وكان كتب الاجهزة الامنية تبحث عن الجانى قالوا ليهو يغنى هرب معناها البلد فوضى وما فيها امان والبلد حالة طوارى فى موضوع الكرمك المهم نهزروا وطلبوا منو نفى الخبر قام كتب فى عمودو عن صبى ضرب شيخ العرب كف والجماعة حاولوا ينتقموا منو لكن شيخ العرب قال ليهم خلو وقال بقية القصة معروفة رديت على لاحقا المهم قال فى النهاية بهذا يسدل الستار على موضوع محاولة اغتيال رئيس التحرير شوية شوية بديت اظهر.
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: AnwarKing)
|
المحطات والمسافات والقطر .. والمبادى البين ضلوعى... النقابات والنضالات والسفر.. دا البحدد ليا نوعى.. دا البحقق لياذاتى ودا البيروى ليل ظماى ..ودا البيشبع ليا جوعى .. قالوا ثورى قلت ايوا كمان شيوعى.. يانضالات ردى روحى وبى حقيقة امرى بوحى.. ابقى بلسم لى جروحى .. ولى الشفيع المات معلق دام حزنى وطال نوحى .. يبقى ملهم فى الجنوب ويبقى معلم فى الشمال.. وفاطنة فاقت كم رجال.. فاطنة يا ام النضال.. السترة والعيشة الحلال.. والمشاوير الطوال.. واروى ياقطر الشرق.. زول يناضل وينشنق.. الشفيع جوزيف قرنق..يحيا فينا وما انشنق.. انت مامشنوق وحيد.. انت يا اروع شهيد.. انت يا جبل الحديد.. والله ماهزتك ريح.. انت يا انبل مسيح.. ابقى ارقد واستريح.. وابقى فى الشوق والحنين .. لى الرجال قاسم امين.. يوسف حسين.. انتو يااشجع رجال تملوها عزا الف عين.. صوتها صفارة القطر..صنٌُ اضنى صن.. انا دمعى جارى وقلبى حن.. للمبادى وللوطن.. وابقى غارق فى الحزن.. فى متاهات الزمن.. قاصدوا كهفك ياحراء.. ليها قاصد عطبرة.. اقوى كلمة معبرة.. ولى ابوى المعذرة.. الجسد فى المقبرة.. والروح تحلق فى الذرى.. والمناضل مابيموت.. يحيا فى كل القلوب ويبقى فى كل البيوت.. وسط الورش مليان زيوت.. ونحنا النضال فينا انغرس.. صوت النضال فينا انحبس.. حب النضال داسنو دس.. داير النضال راجلا كلس......
عمار محمد ادم
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: ود الباوقة)
|
Quote: الأخ عمار... هل لديك أي معلومة عن تفاصيل محاولة إغتيال حسني مبارك الفاشلة؟
وأكون شاكراً...
أنور |
من المؤكد ان للاستاذ عمار معلومات غير تلك التي عندي العامة عمار كان من كودار العنف والاغتيال السياسي ابن شرعي للعنف السياسي بس عمار ما داير يموت بطوبة في دماغوا و عشان كده اجزم في دي ما حيقول بغم عمار يتكلم لينا عن عنفهم في الجامعة فقط و دي بتحفظ و بلع بعض الاقوال كما فعل مع صدر البوست وبعض مداخلاته لكن برضو له الشكر
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
Quote: على الاقل الاخطاء ليست من اجل الندم والاعتذار والتوبة كما يقول البعض ولكن للاعتبار وللتاريخ , |
[Bهي فــي دائرة ( عــدم الرضــــا بالحقــارة ) اذا أحكي لنــا عــن الوجه الاخر لعمار ادم جانب الرقـــة والحنيـــة المستمـــدة مــن بيئــة الشمـال بلـــد الاحبـــة القرير الخضــرة والطيبــــة 0 وبمناسبــة القرير كلمنا عـــن علاقتـــك بشهيـــد القلــم محمد طــه محمد أحمد 0
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: mahmed alhassan)
|
الكشة ------ الديك بيرسل فى صياحو محمَد يكابس من صباحو كايس القريشات لى ملاحو
محمدمسيكين ياحليلو شقيان نهار مهموم فى ليلو
السوق بعيد كيف الوصول عربات تمر مابقفلو زول كيفن يقيف ود الأصول لى زول ضعيف كيفن يقيف ولدا نضيف لى زول خشن لابس قديم كيفن يقيف ولدا نعيم محمًد مسيكين ياحليلو بى بص قديم محمد وصل فرش الخدار كوَم بصل العقل راح رًوَح سريع كيف ألبنات ام البنات كيف الرضيع محمد يبيع فجاءة انتبه..الكشة جات جدعوه فى كومر كبير ساقوه لى سجنا حقير محمد رقد محزون حسير محمد بكى موت الضمير بلدا يجوع فيها الفقير عدمان فرش حتى الحصير ناسا تنوم فوق الحرير عرباتها لنج موديل جديد مافيش حسد ياربى زيد لكن كمان شوفو التحت ماتشوفو فوق شوفوا التعب ضوقوه ضوق الناس يمين اكلت صبر الناس يمين شربت صبر وبعض الخلوق راحو القبر ما نادية ست الشاى ..اذاى تعتر تموت ويطول بكاى (
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
وجينا سكنا بحى عمال وعشنا معاهم احسن حال كا البينا العشرة الطيبة ما بيناتنا مصالح ومال وضم الحى الوان واشكال شرقى وغربى جنوب وشمال همنا واحد تجمع بينا السكة حديد وفى سنه تالتة رحلنا كمان لى حى جديد بيوت من طين فيها المويه مكانها بعيد اشيل فى كتفى الناحل جوز اقصر حبلا باقى مديد وفى سنه رابعه بقيت انصارى اناقش مرة فى التوحيد واقول فى الدين برأى جديد قضية المرأة والتقليد عامل فاهم ورايى سديد عامل فيها ابو عرام هذا حلال هذا حرام جنى فصاحة وجنى كلام حتى وصلت الثانوى العام ديمة مشاكل وديمة صدام
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
وفى حلتنا مع ادروب اكلت العجوة شربت الروب حلبت البقرة ركبت حمار وشلت الصارم سيف بتار وكيف الناس بتجيب التار ترد الظالم والحقار ولى ادروب فى نفسى وقار لى ادروب فى نفسى مكانة مكانة رفيعة معظم شانها وزى ما خطفوا اطفال فى فشلا كنت طفل مخطوف من كسلا ما فى داعى الليلة ابوح هذا حديث يحتاج لى مهلة وجيت الجامعة وشفت تجارب مرة سجبنا ومرة محارب طفت الدنيا وشفت عجايب خبرت الناس بى كل مشارب وجانا كلب عيونو حمر سنونو صفر..رمونى جماعة جوة البير كان الوضع جد خطير كان الخلق فى التدبير وكان الخالق فى التقدير وجيت الجامعة احاول تانى جيت فى زمانا ماهو زمانى لقيتك جالسه تحت الشجره زى ما تقولى خايفه وحذره زى ما تقولى غزاله ونافره شى من دنيا وشى من اخره وقلتى الحكمة المابنساها عمار محمد ادم
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
Quote: على الاقل الاخطاء ليست من اجل الندم والاعتذار والتوبة كما يقول البعض ولكن للاعتبار وللتاريخ |
عمار ليس لديه الكثير غير ضربتو و لبدت ليهو.. فهو لا يملك اكثر من جسد عريض استقله الكيزان فترة من الزمان و عاش على سطح تنظيم الاتجاه الإسلامي.. لم يكن غير اداة , يؤمر فينفذ , لا يشارك في تخطيط او اتخاذ قرار.. عندما استلمت الجبهة السلطة اصبحت بيدها قوة الجيش و الامن فقد عمار صلاحيبه فاصبح يتخبط يمنةً و يسرى لا يملك قير سيخته التي يكتب بها الآن..
لا للإحتفاء بمذكراتٍ تمجد العنف
لا للإحتفاء بمن أُُستغل في افساد العمل السياسي الطلابي
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
Quote: كذاب الصورة فى منزل الصادق المهدى نتلاقى |
وأنا أشهد على ذلك وكانت الصورة في رمضان الماضي في دعوة افطار الإعلاميين والصحفيين التي أقامها السيد الصادق على شرفهم وكان عمار يعرض بعصاته في أغنية (عاشميق)التي صدح بها الحبيب الأمين، وللذين لا يعلمون (المقصود بعاشميق عبد الله ود جاد الله كسار قلم مكميك وهو جد السيد الصادق من أمه رحمه بت عبد الله). أتمنى أن يصححني عمار إن أخطأت. .. ..
عمار دون شك كادر عنف بالجامعة ولكن أعجني جداً عندما صعد إلى لاندروفر البرنامج النرويجي وكان بالقرب من مكاتب شعبة الجغرافيا وقال الحقيقة كاملة أن انتخابات الإتحاد مزورة (اتحاد فتح الرحمن محمد خير).
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: إسماعيل وراق)
|
مع عظيم إحترامي لشخصك ..
لكنك بتديني إحساس بتاع إنك زول ( حار بيهو الدليل) ..
و رغم أننا تاجرنا بموضوع إنسلاخك من الإتجاه الإسلامي ، إلا أننا لم نعرف سر هذا الإنسلاخ منك شخصياً ..
أكثر من حاجتي لمعرفة ذكرياتك مع العنف ، أجدني أحوج لأن تحدثنا عن مبررات إنسلاخك ؟؟ و عن أسباب ومرات إعتقالك .. وعن إنتمائك السياسي حالياً ؟؟
شكراً ..
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: عبدالكريم الامين احمد)
|
الأستاذ عمار تحياتي تابعنا الحكي والرواية وقلنا أنها محاولة توثيق تغطئ مرحلة هامة و أحداث ومسارات عدة وحينما شعرنا أن تداخل بعضنا قد يشوش عليك تدخلت وغيري لحسم التشويش ولكن الحاصل أنك وبدلا عن أن تسير الي الامام راسما حروفا جديدة تغطئ بقيةالمحطات التاريخية -عدت للخلف ماسحا بالاستيكة أهم ما سطرته مما يثيرالتعجب ويفتح علامات إستفهام عدة: لماذا فتح عمار هذه النافذة? ولماذا عاد أ وأغلقها ?
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: كمال عباس)
|
Quote: تابعنا الحكي والرواية وقلنا أنها محاولة توثيق تغطئ مرحلة هامة و أحداث ومسارات عدة وحينما شعرنا أن تداخل بعضنا قد يشوش عليك تدخلت وغيري لحسم التشويش ولكن الحاصل أنك وبدلا عن أن تسير الي الامام راسما حروفا جديدة تغطئ بقيةالمحطات التاريخية -عدت للخلف ماسحا بالاستيكة أهم ما سطرته مما يثيرالتعجب ويفتح علامات إستفهام عدة: لماذا فتح عمار هذه النافذة? ولماذا عاد أ وأغلقها ? |
أخى كمال عباس عندما انتقدت موقف عمار ابتداءا بأنه ليس الشخص المؤهل سياسيا وأخلاقيا لسرد سيرة وحكى لم يكن انتقادى من باب التشويش كما تفضلت واخرين بفهمه .. لكنه موقف بنى على معرفتى بالرجل منذ أيام الجامعة ومتابعتى لمراحل تقلباته السياسية .. ولم يخيب الرجل ظنى كثيرا اذ سرعان ما اظهر لكم وجهه الحقيقى وعدم جديته .. فاستجاب لتلميحات الاسلاميين ما ظهر منها هنا زما بطن هناك وميع القضية بشعر وخواء .. وهو ما يدل على حديثى الاول .. عمار واعى وذكى وغالبا ما كان بوسته هذا لغرض أو مجرد تكتيك ما أن استنفذ به غرضه تركه ليغرق فى اللجة الاسفيرية غير باك على الامانة التاريخية والتوثيق وغيرها من المعانى السامية التى تباريتم بتقليدها أوسمة فى صدره .. وباسمها القمتونا حجر الصمت والرمى بالمشوشين برز الثعلب يوما فى ثياب الواعظينا
مخطىء من ظن يوما أن للثعلب دينا
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: isam elzein)
|
للتاريخ فقد افسد هذا لبوست ثلاثا 1ـالذين يعتقدون انهم اذكى منى ويحاولون ويحاولون جرجرتى باعتبارى ناقم عل ى الكيزان وعايزين يستغلونى وهذا استفزاز شديد وما يعملوا فيها شفوت وهم يوزعون الادوار فى الاشفت منهم وانا شايقى تربية هدندوة يعنى مفتح. 2ـ الكيزان التجم خايفنى افتوا للاخر ووكت الفت لسه ما جاء كلنا زى الغنماية المربوطة الطولو ليها الحبل وقايلة نفسها انطلقت فى اى لظة ممكن يجروها مرة صلاح قوش قال لى صاحبكصلاح عووضة ده قليل الديمقراطية جات!! 3ـ المتداخلين اللقو البوست مهجج ماعندهم موضوع قعدو يخستكوا زعلونى مسحت كلامى باعتبارهم ما يستاهلوا يحكو ليهم. مع السلامة .....عمار محمد ادم
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
Quote: للتاريخ فقد افسد هذا لبوست ثلاثا 1ـالذين يعتقدون انهم اذكى منى ويحاولون ويحاولون جرجرتى باعتبارى ناقم عل ى الكيزان وعايزين يستغلونى وهذا استفزاز شديد وما يعملوا فيها شفوت وهم يوزعون الادوار فى الاشفت منهم وانا شايقى تربية هدندوة يعنى مفتح. |
اما ان يكون السيد عمار قد قال كل ما فى جعبته و خاف ان يكشف القراء شح بضاعته سيما و هو كان بعيدا عن مكان صنع القرار و مظان الاسرار الكبرى او انه كان يهدف الى ابتزاز جهة ما و قد حقق مراده او يئس منه لو كنت جادا لرتبت افكارك من الاول و ذكرت كل ما تريد ذكره (كما يفعل الاحمدى و الباز و الطيب زين العابدين) و على العموم هذا هو ديدنك فى كل مشاركاتك و بوستانك: تفتح موضوعا هاما ثم فجاءة تتركه و هو ساحن (و اخرها بوستاتك عن الجمهوريين)
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: عوض محمد احمد)
|
منذ قيام هذا المنبر و الناس يتداخلون مع اصحاب البوستات (من قولة تيت) متى ماعرفوا طرفا من الموضوع. و عادة يكون هذا مثار رضى لصاحب البوست و ان ما يكتبه وجد تفاعلا ممن يخاطبهم لكن هذه اول مرة زول (يحرد) بوستو لان الاخرين تدافعو للتفاعل معه!!غايتو دى قصة (ما تكتحنا) بين الفار و الكديس فى نص البحر مصداقية صاحب البوست على المحك و لا اظن ان الناس سوف ياخذون مشاراكاته هنا ماخذ الجد بعد الان
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: عوض محمد احمد)
|
أبو القاسم قور
يا ود عمي خلي شقل المديدة حرقتتي دة و أترك الراجل التائب
ده يحدث نفسه و يراجعها فنحن نقراءه بإشفاق .
و أنشغل بنفسك يا قور العملوه الكيزات في عمار بعملوه فيك
لأنك شبيه به فأعمالك الأدبية التي تفخر بها تمثل عندهم رجس من
عمل الشيطان و صلاحك الذي تبديه عندهم يعتبرونه زدقة مزخرفة
و إني لك من الناصحين .
شنو يا أخي ساكي الناس زي ( أم ضباحة ) جاكم بكسركم
بيأكلكم الرجالة دناقر ما كبر عناقر كان عمار بقي جرس بلقي
الحرحراية و كان بقي سيف بلقي الجفيرة و كان بحر
بلقي الوزينه و كان بقى غول بلقى ولد أم بعلو و إذا بقى
تائب بيلقي الصلاح و الهداية وهو أحوج لهما .
مع الشكر حامد شارف
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: amar adam)
|
ما يزال عندي أمل يا عمار أن تقول ولو البسيط عن محاولة إغتيال حسني مبارك الفاشلة، خصوصاً وأنها ليست سراً...فقد تحدّث عنها المحبوب عبد السلام في رسالته المفتوحة لنافع وتحدث عنها الترابي في لقاء قناة الجزيرة... وندفع نحن ثمنها في أراضينا في حلايب...
وأعتقد أن أي وطني لديه معلومة يجب أن يبذلها للجميع، حتى نتخلص من كمّاشات مصر في السودان!
تحياتي
______
Quote: مرة صلاح قوش قال لى صاحبك صلاح عووضة ده قايل الديمقراطية جات!! |
دحين لو الديموقراطية جات يا صلاح قوش، بتقبّل وين؟
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: AnwarKing)
|
عمار
تحياتي
رغم أنه يبدو أنك قفلت البوست
لكن أجد لزاما على توضيح اهتمامي به
أولا
اهتممت بك شخصيا منذ فترة
لما توقعته منك وصدق من أنك من الكيزان الذن تنازع نوازع الحق والصدق
فيهم نوازع التعصب للجماعة أخطأت أم أصابت
ثانيا
آهتممت بحالتك كنموذج يتبعه كثر
عندما تتقلص بالونة الإنقاذ - كما تقلصت قبلها بالونة الإتحاد الإشتراكي -
وسيقف موقفك الآلاف أن لم يكن مئات الآلاف حين تنجلي غشاوة الإنقاذ
عن عيونهم ويدركون فداحة ما ارتكبوا في حق شعبهم
فيطلب الخيرون منهم المغفرة
ثالثا
هدفنا من الصراع ضد الكيزان غايته
تخليهم عن نزعاتهم الإجرامية واستعادة إنسانيتهم
وليس الإنتقام منهم
- طبعا حق العفو عنهم لا يملكه إلا الضحايا شخصيا أو ذويهم -
ويجب على من أجرم في حق المجتمع أو أفراده أن يدفع الثمن كاملا
قبل أن يتوقع أي رد فعل من المجتمع تجاهه
رابعا
هنالك أحداث عشتها
كنت أتوقعت منك مزيدا من التوضيح حولها
مثل:
نشاط الإتجاه الإسلامي في الجامعة أيام نميري
إغتيال محمود محمد طه
إنقلاب نميري على الكيزان
الإنتفاضة
الحكومة الإنتقالية
حكومات الصادق ومشاركة الكيزان فيها والتظاهرات ضدها
إنقلاب يونيو
إختلافك مع التنظيم
تجربتك في بيوت الأشباح
أما وأنك قد أنهيت البوست
فهذا من حقك
وأخيرا
سوف أعود لنقاش ما ذكرت سابقا
مع تقديري
الباقر موسى
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: Kostawi)
|
الصحافة
http://www.alsahafa.info/index.php?type=3&id=2147491274
ونسة مع عمار محمد آدم
أنا مزروع في الجبهة من سنة خامسة ابتدائي عرسته لكن مااااتزوجت لسع ع ع ع سمّاني عامل التلغراف عمار محمد آدم.. يعرفه البعض عضو بالاتجاه الاسلامي ثم الجبهة الاسلامية يهتف ويخطب في التجمعات السياسية وغيرها.. ثم ترك كل هذا ومضى الى حزب آخر (صباحاً يتركه مساءاً) جلست اليه انا خليفة حسن بله وحذفت بعض اسئلتي له لاجاباته التي قد تؤدي الى فصلي من الجريدة طبعاً.. وتركت الاخريات وربنا يجيب العواقب سليمة له ولي وللصحافة.
* انت منو؟
انا عمار محمد آدم، ولد من اولاد كسلا اتولدت في القرير
* سنة كم؟
9/7/1961م القرير محافظة مروي
* انت من القرير الوداك كسلا شنو؟
لا ابوي اصلا عامل - محولجي - في السكة الحديد وكان في سنة 1961م في الابيض قام حجز لي امي في القطر وسافرت علشان تلدني في القرير.
* وسماك عمار على منو؟
ما سماني ابوي .. سماني عامل التلغراف .
* كيف؟
ابوي بعد ما عرف انو امي جابت ولد رسل تلغراف قال سموهو عماد قام بتاع التلغراف داس بدل النقطة شرطة.. النقطة في التلغراف دال والشرطة راء . قامت وصلت البرقية سموهو عمار وبعد داك بقي ابوي امام الامر الواقع وصرت عمار...
* تفتكر كان ممكن تكون عماد؟
افتكر انا عندي مؤهلات ابقى عماد ود ظريف ولطيف وممكن تعتبروني وسيم .. لكن عمار خلتني الزول الدشن ده.
* كنت اول الابناء ؟
لا كنت الثالث بعد بنتين.
* ذكريات طفولتك؟
اول حاجة عندنا خالتنا حواء قالت ليهم عثمان حسين بحييكم وبهنيكم بالمولود لانو صادف انو مع ولادتي كان عثمان حسين بغني.. لكن الحاجة الحكوها لي ومؤكدة انو انا من بطن امي ما في زول استلمني.
* كيف يعني؟
يعني من بطن امي الداية ما لحقت تمسكني وقعت في الطشت طوالى وكان فيه موية حارة.
* دي الوقعة اللي يوم الليلة ؟
بالضبط كده... الوقعة الىاها .. دي مؤشر
* انت شايقي؟
لانو ابوي كمساري فكل سنة بنقعد شهرين في القرير ، الاجازة لكن موطني كسلا حي العرب.
* ..............؟؟
انا فتحت في كسلا في قطاطي السكة حديد وريحة السكة حديد عشان كدة انا مرتبط جدا بالسكة الحديد ولي هسة انا بمشي المحطة اشم ريحة القضبان والورشة.
* السكة حديد وعمالها ارتبطوا بالىسار؟
ابوي كان يساري ونقابي وهو القاد القطر المشهور بتاع اكتوبر من كسلا وجابو هنا وساهم بي كدة في ثورة اكتوبر المشؤومة انا بعتبرها ثورة مشؤومة.
* ابوك يساري وانت مشيت يمين.؟
ابوي في النهاية بقي متدين لكن بنفس طريقة الىسار.. بقي انصار سنة لكن مازي هسة.. لا.. انصار سنة بتاع نضال وتحرر ما زي بتاعة الليلة دي شركات واموال واستثمار ومنظمات..
* ..........؟
ناس ابوي زمان بشبههم هسة ابوزيد محمد حمزة مقاومة وثورية.
* متين دخلت الىمين؟
الناس لغاية الليلة بعتبروا فيني ريحة اليسار .
* انت كان داير الجد ناس كتار بعتبروك .. (مجهجه ) ساكت !!
الجهجهة دي عاملة انا براي..
* قاصد يعني؟
قاصد طبعا..
* وجواك محدد موقفك؟
طبعا لكن الزمن عابس.. والزمن عبث ساكت.
* طيب انت جواك شنو؟
سوداني ود بلد... سوداني ممعن وموغل في السودانية ..انا اصلا من الشمال متربي مع الهدندوة وبحب السكة حديد وجامعة الخرطوم.
* اول مرة تجئ الخرطوم للجامعة؟
قبلها ما بعرف حاجة اسمها الخرطوم عندي بنطلون واحد ! كنت وانا صغير بسقوني اللبن من الضرع طوالى .. وكت جيت الخرطوم جيت بدون شنطة استقبلوني ناس الاتجاه الاسلامي ..
* انت جيت قاصد الاتجاه الاسلامي؟
انا كنت كوز من سنة خامسة ابتدائي.
يا زول استقبلوني وودوني استديو بابا صوروني بي كرفتة .. كنت نحيف واضنيني كبار حتى في واحد حلفاوي قال والله انت يا عمار لو قعدت في بطن امك 3 شهور تاني كان طلعت حمار...
* ودخلت معمعة السياسة؟
طبعا رشحوني للانتخابات من اول سنة جيت لكن التسجيل عطّل دخولي الاتحاد 1981م،
* ندمت ؟
بالعكس .. كنت سأكون لي هسة لاصق في القيادة .. كل الناس الدخلو الاتحادات دي تلقاهم ما بقبلوا يكونوا موظفين او مواطنين عاديين ... الحمد لله ما دخلت الاتحاد كنت ما حأقبل بعد داك الا اكون زعيم... ودي مشكلة السياسة السودانية.
* .......؟
قعدت في الفترة ديك مع ناس عبيد ختم شيخ صبير في الجامع وعلىهما رحمة الله.
* ..........؟
انا ما كنت متدين كتير لكن كنت ساكن في الجامع وعندي كافتريا .. كنت مرتاح وعرست وعمري كان 22 سنة وانا طالب.
* قريبتك؟
لا لا ... عرستها من هنا .. بري والجريف عرفتها في التنظيم وعقد لي الترابي سنة 84 وبنتي الكبيرة دخلت الجامعة السنة دي .
* استقبلوها الاتجاه الاسلامي؟
ما اظن يستقبلها اي زول... حيستقبلها منو يعني؟ الوطني ولا الشعبي ولا ياتو جناح في انصار السنة ؟
* في واحد حكى لي انك هجيت نفسك في جامعة الخرطوم؟
ايوه جيت الجامعة متأخر وقامت واحدة شافتني وقالت : سجمي ده بقرأ معانا ..
قمت قلت ليهن:
سجمكن بالحيل سجمكن
وسجمان انا الساكن بلدكن
وسجمان انا الحزين المركن
زي وحشا طلع بالليل خلعكن
وزي اسدا نهر بالليل فزعكن
غالبني الكلام ما مخي شركن
لكن تمام بالحيل سجمكن ..
* حتى الآن لم تهج نفسك؟
بعد داك قلت اهجو نفسي:
ما شفت الزمن يا اب فقرة جابك راجع
زي قدرا كعب يا اب فقرة جيتهم واقع
زعزعت البنات قلقلت نوم الشافع
مالك بالجامعات يا اب فقرة شوفلك جامع
ما شفت الجامعات يا اب فقرة صارت روكه
داك ياكل في اللبان ويغني بالدلوكه
وديك تشحد في زميلها يقسملها البازوكه
زمن اولاد الدشوش ما بياكلو بالمفروكه
وزمن اولاد المدن ما جربوا السلوكه
زمن المتقرضمات ما قربن للدوكه
ما تقول الزمن يا اب فقرة جاني علىكا
ده الحال الكعب سويتو بي ايديكا
خليها الديار ليه تسعى للمابيكا
لايوقا عديل حاكيت ملاح الويكه..
قال اب فقرة قال يا اخوان كلامكم صاح
خليتها الديار ما اظن وراها نجاح
سوق الناقة وين هناك بس ارتاح
وزي كل الرجال اجلب جمال وسلاح.
* متى بدأت رحلتك نحو كيانات وتنظيمات اخرى غير الاتجاه الاسلامي؟
- أنا رفدوني من الاتجاه الاسلامي.
* ليه؟
- السبب مشكلة مع طالبة في الجامعة قامت هي في نقاشنا مع بعض ضربتني كف.
* وكان السبب يستحق هذا الكف؟
- انا كنت بتكلم معاها عن الزي اللابساه فما احتملت كلامي.
* واتصرفت كيف انت؟
- انا دفعتها بس.. وده ما افتكر انو السبب الحقيقي لرفدي لكن لانو بعد اعلان نميري للشريعة قلت ليهم بعد ده انحنا متلمين ليه مش عشان نعمل شريعة اسلامية خلاص نميري عملها لا يجوز بيعة الاثنين بايعنا نميري بالتالي سقطت البيعة الثانية ويظهر خافوا من انتشار التيار ده فاستغلوا مشكلة الطالبة وفصلوني الحمد لله من التنظيم بعد مجلس محاسبة ونشروا الخبر في جريدة «آخر لحظة» في جامعة الخرطوم..
* اظن انو كف غالي جداً؟
- شوف الكف ده نوع من العلاقة.. مش الشاعر قال: قد جاءني سبُك لي فسبي
ألم يجري اسمي على فيك فحسبي
* لكنك عدت بعد الانتفاضة للجبهة؟
- نميري اعتقلني معاهم قبل الانتفاضة وبعد طلعنا عملوها جبهة واسعة تلم اي زول فلقيت نفسي معاهم تاني.. وكنت بمثل التيار الايراني وكنا متحمسين للثورة الايرانية..
* متين كسلت من العمل في الاتجاه الاسلامي والجبهة؟
- أنا اعتقد اني اصلاً ما كنت اتجاه اسلامي حتى من خامسة ابتدائية.. الاتجاه الاسلامي كان بالنسبة لي مجتمع.. وأعتقد اني كنت مزروع في الاتجاه الاسلامي من خامسة ابتدائى.
* الزارعك منو؟
- القدر.. عشان اكشف كتير من المستور.. كنت متفرج.
* وخليتهم؟
- انا قلق جداً حتى في الجبهة كنت بشتغل في مكتب لمدة كم يوم كده وابدي قلقي لارحل لمكتب آخر.
* دي الجهجهة الاتكلمنا عنها قبيل؟
- عندي اخوي ما بستقر في شغل.. قالت امي كلما اجي من كسلا القى خالد غير شغلو وعمار غير حزبو..
* لكنك استقريت مع زوجة واحدة؟
- الآن اكملنا 20 عاماً في علاقة ما اتخللتها اي مشاكل انا عايز اتزوج زوجة ثانية اعلنها لكن بفهم.
* فهمك شنو؟
- الاولاد يكبرو ويوعوا ويفتحوا، التانية دي زواج.
* والاولى كانت شنو؟
- الاولى عرس.
* وفي فرق بين العرس والزواج؟
- عندي قصيدة قلت فيها:
لو تعرفي انو الزواج ماهو العرس
اصلو الزواج لما النفس تهوى النفس
ولما النفس تهوى النفس
يبقى الزواج تمّ وخلص
اصلو الزواج ماهو المهر
اصلو الزواج نفحة قدر
ولما الشجر يهوى الشجر
من غير مهر ينتج ثمر
لو قلت نكتب للكتاب اصلو الزواج في الغيب كُتِب
يعني بتأكد في القدر حاشا القدر يصبح كضب
فاعتقد انو الزواج فهمو عميق.
* يعني الزواج عند عمار هو درجة اكبر من العرس؟
- استعير مقولة الاستاذ محمود محمد طه: زوجتك هى انبثاق نفسك عنك خارجك..
التعبير بتاع الضلع مجازي، الله قال من انفسكم ما قال من اضلعكم، الله شالها من نفسك وانت بتفتش عن جزء من نفسك لتكتمل.. والمرأة زي ما قال ابن عربي: المرأة معراج روحي..
* طيب في علاقتك مع اولادك برضو بتعيش بنفس طريقتك خارج البيت؟
- انا زوج واب ممتاز.. انا الحياة بره ما معترف بيها لكن بيتي معترف بيهو عشان كده جادي جداً في بيتي.
* يعني انت مختلف جوه البيت عن خارجه؟
- انا في اليوم عندي ثلاث شخصيات بعيش بيها في شخصين بالصباح للسوق ووسط الناس وفي الجرايد ودي فيها عدم اعتراف بالحاصل واحساس بالعبث الفيهو وتمرد عليه وسخرية بالغة عليه.
في شخصية تانية بعيشها بعد الساعة الواحدة ظهراً لغاية بعد العصر دي في جامعة الخرطوم عندي علاقة وطيدة جداً واعتقد انو عندها هدف مستقبلي.. الشخصية الثالثة بعيشها مع اولادي في البيت من المغرب لغاية صباح بكره ودي فيها مسؤولية كبيرة.
* عندك كم ولد وبت؟
- انا ولدي الكبير اتوفى اسمو سياف كان عمرو سنتين اتوفى في يوم داير نعمل ليه عيد ميلادو الثاني:
كان سياف جميلاً كالقمر
كان سياف ضحوكاً قد تفتح كالزهر
مات سياف بريئاً لم يمس احداً بشر
انها الاقدار تجري ليس يخطئنا قدر
بعدو (لينا) هى الآن طالبة بجامعة الخرطوم علوم، محمد غرة عيني ربنا يحفظو في الثانوي العالي ، ومودة تمتحن هذا العام للعالي، وابراهيم الشقي الفقُر عمرو 8 سنوات ونصف.
* علاقتك بيهم كيف؟
- عندي معاهم قصص ونكات.. يوم انا بتكلم مع صاحبي مغترب في التلفون بقول ليه والله كويسين وماعندنا اي مشكلة ختفوا السماعة وقالوا ليه بغشك والله ما عايشين كويس ولا حاجة.
* بتحاول تأثر على اتجاهاتهم؟
- شوف التربية بالتلقين ما بتنفع.
* طيب لو (لينا) جات قالت ليك انا بقيت شيوعية او حزب امة او غيرهما؟
- بي طريقتها لكن لو دايرة نصيحتي حا قول ليها ما تنتمي لي اي حزب خليك سودانية بت بلد انا نفسي اولادي كلهم يبقوا سودانيين اولاد بلد.
* هسه هم شايقية ولا اولاد خرطوم؟
- امهم محسية طبعاً وأنا حاولت ازرع فيهم حكاية شايقي دي لكن ما شايفها نجحت بالحيل هم مايلين على اهل امهم فبقيت ماسك في سوداني وغبش ما بتاعين دلع.
* انت دائماً بتردد انو الشايقية هى القبيلة الوحيدة الما عندها بديل في السودان؟
- ايوه كدي اتخيل السودان ده بدون شايقي.. ما ممكن.. الجعلية ممكن تلقي بدلهم الرباطاب.. والدينكا بدلهم النوير.. الدناقلة بدلهم المحس أو الحلفاوين، الشكرية بدلهم البطاحين، الرزيقات بدلهم المسيرية إلا الشوايقة.
* وده للحاجات الكويسة في الشايقية ولا العكس ذلك؟
- بصراحة أنا اعتقد انو الشايقية هم شعب الله المختار وهم ما محتاجين لزول يعترف بيهم وفي ناس بقولوا اصل الشايقية بجة وهناك شبه كبير بينهم. انا حأعمل مركز حضارة وثقافة البجه.
* بتسمع منو من الفنانين؟
- بحب غناء محمد وردي لكن ما بحبو هو.
* ليه؟
- مفتري ومغرور.
* صحي بتاكل في كل الموائد وتنقل اخبار وتطلق اشاعات؟
- ايوه ده كله عدم اعتراف بيهم كلهم وسخرية منهم وعبث بيهم.
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: Kostawi)
|
Al-Sa7afa http://www.alsahafa.info/index.php?type=3&id=2147494007
كسلا.... محمد عثمان محجوب (راجل البركس)[/B]
عمار محمد ادم
كحنين النوق الى الفصيل..كحنين الجزع اذ فارقه المصطفى.. احن اليك ايها الراحل عنا.. وانت الذي ربيتنا فأحسنت تربيتنا وعلمتنا ونحن حينئذٍ لم نزل صغارا.. كيف ننساك ايها الراحل المقيم.. والمفارق العظيم كان والدك يصطحبك الى السيد الحسن وانت حينئذ مشبع بالفكر الاسلامي الثوري من مدرسة الاخوان المسلمين بروح الامام الشهيد حسن البنا وفكر شهيد الفكر والمبدأ الشهير سيد قطب .. كان السيد الحسن يحبك وكنت تحبه تجمع بينكم اواصر الروح ووشائج القلوب التي تحابت بالله وفي الله. كسلا تحن اليك كحنيني وتذكر صوتك الصادق القوي وانت تتحدث في حماس عن الدولة الاسلامية والمجتمع المسلم والعدل والمساواة والصدق والرحمة ومبادئ ومعاني تداعبنا في صحونا ومنامنا.. وقد افنيت اخصب سنوات عمرك وانت تعمل وتنتظر وتنشدنا: قد اختارنا الله في دعوته وانا سنمضي على سنته فمنّا الذين قضوا نحبهم ومنا الحفيظ على ذمته. آهـ من الذكرى حين تقطر دما من دماء عشرات الشباب يقدمون ارواحهم في سبيل مبدأ وفكرة يقطعون دراستهم الجامعية ليلتحقوا بمعسكرات التدريب في ليبيا ليقاتلوا النظام المايوي البغيض وهم يحلمون بدولة العدل والحرية والمساواة و وسقطوا مضرجين بدمائهم تحت سياط التعذيب في سجون النظام المايوي الذي ارتهن البلاد للغرب وسلم زمام امره للرأسمالية البغيضة.. مازالت اصداء صوت محمد عثمان محجوب تتردد وهو ينشد حين خاطب الشهيد جبل ا لعوينات: الجبل الساكن قد اوّب برضاء الله لنا صوّب للرمي الناجز يتأهب واللحظة تأتي بملاك كان اسدا هزبر وليثا هصوراً يصول ويجول في عرصات جامعة الخرطوم قلعة النضال الصامده يجادل ا لاخوان الجمهوريين في غيرة على الاسلام والشريعة الاسلامية الغراء.. وكان لا يمل ولا يفتر وكان يتحرك في كل الاتجاهات. خطيبا مفوّها. او محاورا مقتدرا.. او كادرا تنظيميا نشطاً.. يصرخ في وجه حسن الترابي (انت قايل الحركة الاسلامية دي بتاعت ابوك) ولكن الترابي لم يكن يكرهه اويغتاظ منه لانه يعرف مداه وحده فهو لا يعرف التآمر والخبث ولكنه يفرغ مافي نفسه من شحنات ثم يستريح وهو ابن كسلا حين تعلم الوضوح وتشرب القوة وهو ابن (نوري) جزيرة (ايشيما) حين يتصل اصله بفرعه فجزع كسلا وفروع الميرغنية من اصل نوري وهو ا لفتى كريم الاصل عزيز المنبت حين تربى في ارقى احياء مدينة كسلا وترعرع في اعلى مقاماتها ووالده الخليفة الاصيل الصارم الملتزم بالطريقة الختمية وكان يلقب صغيره محمد عثمان ومنذ نعومة اظفاره (بالدغري) ذلك لان (الناجح من عشو يزوزي) ولا انسى قسمات الحزن البليغ في وجه شقيقه الاصغر حيث انتقلت والدته الى الرفيق الاعلى ومحمد عثمان يكتم الحزن في داخله لكنه يبدو .. ولا اذكر اين كان محجوب؟ وما زلت اسأل اين محجوب ولا اريد ان اقصم ظهره. بل اين المقداد ذلك الطفل الذي كان يحبه والده حبا جما ويجادله وكأنه رجل كبير وكم بت معهم وهم يسكنون نصف بيت مؤجر في حي الصحافة ومحمد عثمان حينئذ نائب في الجمعية التأسيسية عن دوائر الخريجين ولا أنسى ذلك المؤذن الذي يوقظنا لصلاة الفجر مرعوبين وهو ينبه قائلا (الصلاة الصلاة الموت جاء) محمد عثمان محجوب مدرسة في البساطة والقوة معا ابتلاه الله بالمرض العضال يسري في دمه فصبر وظل يجهد نفسه ويعمل حتى اشتد به المرض فانتقل الى جوار بيت الله الحرام والف كتابا من الاذكار والادعية المأثورة لم يجد حتى الآن طريقه الى النشر.. واصبح صباح ذلك اليوم الحزين حين جاءنا الخبر الفجيعة فقد فجعنا في رجل اخشى ان انظر في وجهه الذي يعبر عن مافي صدره من معانٍ رسالية تنوء بحملها نفوسنا الواهية الضعيفة فتتجلى في حاضرنا فنصعق وكان العزاء في منزل السعيد والحزن كان سيد الموقف والحسرة ايضا. اشتجرت معه في السيارة ونحن في جولة في منطقة مروي ففتحت الباب ونزلت على الرمل وطلبت منه ان ينزل لينازلني وانا غضبان فقال لي في استغراب وتضاربني انا يا عمار؟ وطلب مني الصعود للسيارة ففعلت وانتهى الامر وكان معناعبدالهادي الخليفة وكليهما مضى الى الله وبقيت انا احمل هذا الكم الهائل من الاسرار والذكريات وصديقي صلاح عبدالله محمد صالح يقول لي (اصبر على الاسرار الفي صدرك) وكيف لي ان اصبر هذا اوان البوح فهل ادركت شهزاد الصباح فسكتت عن الكلام المباح ام انهم باحوا فاستبيحت دماؤهم وكذا دماء البائحين تباح) ومابين الجنيد والحلاج البوح والكتمان فهل يكتب صلاح عبدالصبور مرة اخرى (مأساة الحلاج) ومتى؟؟
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: Kostawi)
|
..........فيصل القاسم: جميل جدا عمار محمد آدم من الخرطوم هزيت البلد من اليمن للشام تفضل يا سيدي..
عمار محمد آدم - الخرطوم: يا أخي إن هذا البيت للشعر لا يمكن هذا الأخ ليعطينا توقيتا محددا له كيف علم أنه قال قبل ثلاثمائة عام؟ قبل ثلاثمائة عام لم يكن هنالك السودان وإنما بعد الثورة المهدية التي لم يمض عليها مئة عام كيف يدعي هذا المدعي أن هذه الأغنية كانت قبل ثلاثمائة عام؟ هذا محض افتراء وادعاء السودان ليس عربيا فقد جرنا جمال عبد الناصر والأخوة المصريين إلى هذا الانتماء الزائف الذي وجد معارضة شديدة من بعض الدول العربية مثل لبنان كأن بعضهم نسميها جامعة الدول العربية والسودان يا أخي نحن أعرق من العرب ونحن لدينا من الإرث الحضاري قبل أن يصبح هؤلاء الأعراب لهم شأن فقد أصبح لكم شأن في الإسلام ولكنكم ارتدتم عن هذا الدين وإن تتولوا يستبدل قوما غيركم ثم لا يكونوا أمثالكم لقد انتهت دولة العرب التاريخية لقد كرمكم الله بالإسلام ولكنكم لم تكونوا في مستوى هذا التكريم نحن نرى قنواتكم الفضائية ونسمع إلى زعمائكم إنما نستنكر أن نكون من أمثالكم أو ننتمي إليكم إننا نوبيون وأننا زنج وأننا بربر إننا ننتمي إلى وطن عريق وحتى أن الكثير من الأديان كان محطها في هذه الأرض ارجعوا إلى كثير من مصادر ويجب أن تكون مرجعيتنا هو علم الآثار وعلم الاجتماع فالباحث الأستاذ مختار عبد السلام الذي أصدر بحثا عن السودان وطن الأنبياء يمكن أن يطلعكم على كثير من هذه الأدلة، أما الحديث الذي يحاول أن يقول به هذا الأخ من مدرسة واحدة كليهما من مدرسة الأخوان المسلمين التي تعبر عنها الجزيرة هذا الذي يشارك وهذا الذي إلى يمينك كليهما من مدرسة حسن عبد الله الترابي ومن مدرسة الإنقاذ ومن مدرسة الإخوان المسلمين والجزيرة كذلك من هذه المدرسة إنكم تمثلون تيار خطر على السودان وعلى وحدة السودان فنحن سودانيون لسنا عربا اسمع هذا وبلغ هذا كله إلى العرب لقد تسببتم في كل مشاكلنا وجررتم علينا كل مشاكلنا ومازلتم تمارسون هذا الدور القذر................
http://www.aljazeera.net/NR/exeres/9836DF23-EC05-440A-A59B-3FCC5C5AF99E.htm
| |
|
|
|
|
|
|
Re: كنت كادر عنف بالاتجاه الاسلامى جاكعة الخرطوم..(عمار محمد ادم) (Re: محمد الجزولي)
|
العزيز محمد الجزولي
تحية لك في أي قارة كنت
كنت أود أن أبدأ مع عمار بأهم ما قاله - في نظري -
من أنه عند أول تهجم لهم على الطلاب الديمقراطيين
أنه وجدها فرصة لتنفيس كراهيته ضد الشيوعيين
بأن أناقش معه طبيعة تلك الكراهية
وأسبابها
لكن أراه قد سحب كل ما كتب هنا
- أول مرة أشوف لي زول يلحس بوسته -
وطبعا لا أجبار في النقاش
وشكرا على أنه أثبت للجميع أن الكيزان يبادرون بالعنف ضد الطلاب المسالمين
بصورة مخططة وممنهجة
وأن أمثال ختم
كانوا يستغلون مسجد الجامعة أو المباني المجاورة له
لتحريض طلاب الكيزان للتعدي على الآخرين
وأرجو أن يكون عمار قد خجل من تعديه على الطالبة
وأنه ربما عالج ما يراه خطأ بخطيئة أكبر منه
عموما أتمنى أن يكون قد تدرج في مراقي التطور الإنساني بما يمنعه عن العنف والتعدي على الآخرين
الباقر موسى
| |
|
|
|
|
|
|
|