|
نويـــت.... ان.... احـــرد
|
ذكرت سابقا
ان مغتربين الخليج وخصوصا مغتربين السعودية...في فترةاغترابهم يمرو بي مراحل عديدة... تبدأ بالمرحلة القردية... يعني يكون الواحد زي القرد يقعد يحاكي في الناس القدامو... ثم المرحلة.. الكلبية.... ثم المرحلة الحمارية ودي مرحلة مهمة جدا لصقل المغترب حيث انه يصبح كالحمار... يشتغل لي كفيلو عشان يغني وقروشو تزيد اقصد قروش الكفيل.. ولاولادو ومرتو واهلو عشان يتبوبرو..وكلهم لما يشوفوهو يحمدو الله ويثنو عليه ويقولو سبحان الذي سخر لنا هذا وما كنا له مقرنين......اما المرحلة الاخيرة هي من اكثر المراحل حساسية ..وهي المرحلة القُرادية.... يصبح المغترب قرادة تقيل الدم يلصق في الاغتراب ولا يستطيع ان يعيش بدونو يرفتوهو من شغلانة يكوس لي غيرها يسفروهو يفتش لي فيزا عشان يجي راجع.....واي مغترب ما بيمر بالمراحل دي يكون فشنك واغترابو زي بعضو ما منو اي فايدة... انا شخصيا المرحلة القرادية دي متدرب عليها منذ نعومة اظفاري.... ودربت نفسي كيف اكون قرادة من اخطر الانواع...والصق في اي حاجة قدامي وما عندي قشة مرة....لما كنت صغير بلعب في التراب..... تعلمت ان احرد ولكن احرد بي تخطيط.... يعني احرد ما بين الغدا والعشا.... ولسويعات معدودات عشان العشا ما يفوتني وانا حردان....لو جابو لي جلابية جديدة وما عاجباني احرد منها في الليل... والصباح البسا...وهكذا..... لكي تكون قرادة....تحمل وتحمل وتحمل...وهذا هو شعار المرحلة القرادية.... خلي غيرك يحرد وهو يكون زعلان منك ومفروض انت التحرد....ولابد من تدريب الاضان.... على ان تكون اضان الحامل طرشا.. او دي فيها طينة ودي فيها عجينة....او الجمل ماشي والقراد مشعبط فيهو والكلب ينبح وبرضو القراد مشعبط فيهو.....في البورد مثلا.. لن يفلح من اراد تحريدي...لانني بكل فخر.. انا قرادة من الدرجة الاولى ونوع نادر....ولن تزيدني محاولات التحريد الا التصاقا... فضلنا اتنين بس على وجه الارض انا وعثمان ود اللمين ود خالتي....وربنا يطول عمرنا...ونتكاثر تحت حماية منظمات حماية البيئة... كنت لما اجكس واحدة زمان الصق فيها لصقة عدوك....واكرها اليوم البقت فيهو سمحة....واليوم الضحكت معاي..ولاّ ادتني ريق سمح...وقدر ما تتمسخ وقدر ما تزهج مني ازيد اصرارا وعنادا في جكيسهاوازيد التصاقا...ولو زعلت مني اوسط الدنيا كلها واكلم صاحباتا...عشان يحنسوها وترجع..... كنت قرادة الحب الما بتداوى...كنت اخفف دمي وشوفو كيف لما زول قرادة يخفف دمو... واحكي لها النكت.. نفس النكت كل يوم...والحكاية دي بقت تأثر في صحة من جكست...يعني في خلال شهر وزنها ينقص النص....وتتبشتن..... وكان المثل السائد.. الملاريا ام حمى دخان...ولا جكيّس سجيمان... نسوان الحلة الحاملات وبي يتوحمن كن يتحاشين... مواجهتي اكتر من دقيقة.. عشان ما يتوحمن علي.... لي سببين السبب الاول لاني شين.... السبب التاني عشان انا قرادة....وكانت الواحدة لما تجي تحلف... تقول ان شاء الفي بطني دا يطلع زي سجيمان كان النضم دا مو صح...اما الشباب الفي عمري كانو ما دايرني خالص... لكن انا وبي موهبتي القرادية كنت افرض نفسي عليهم.... ودائما مبتسم...والابتسامة دي حاجة مهمة جدا للشخص القُرادي...اولا تديك الثقة في نفسك...ثانيا تقنّع الشخص المُقرد عليهو... انه لامفر... انت لاصق فيهو يعني لاصق فيهو...... وانا اكتب الكلام دا وابتسم في وجه سيد البورد واعضاء البورد وزوار البورد....ومن شر قرادٍ اذا لصق وتاني وهل يحرد القراد يا ابابكر؟
|
|
|
|
|
|
|
العنوان |
الكاتب |
Date |
نويـــت.... ان.... احـــرد | سجيمان | 03-12-04, 01:02 PM |
Re: نويـــت.... ان.... احـــرد | soma | 03-12-04, 01:19 PM |
Re: نويـــت.... ان.... احـــرد | سجيمان | 03-12-04, 06:02 PM |
Re: نويـــت.... ان.... احـــرد | Hussein Mallasi | 03-12-04, 02:08 PM |
Re: نويـــت.... ان.... احـــرد | سجيمان | 03-12-04, 07:13 PM |
Re: نويـــت.... ان.... احـــرد | Hussein Mallasi | 03-12-04, 02:08 PM |
Re: نويـــت.... ان.... احـــرد | jini | 03-12-04, 02:21 PM |
Re: نويـــت.... ان.... احـــرد | bayan | 03-12-04, 04:18 PM |
Re: نويـــت.... ان.... احـــرد | mohammed alfadla | 03-12-04, 06:43 PM |
Re: نويـــت.... ان.... احـــرد | سجيمان | 03-13-04, 04:37 AM |
Re: نويـــت.... ان.... احـــرد | سجيمان | 03-12-04, 10:12 PM |
Re: نويـــت.... ان.... احـــرد | سجيمان | 03-12-04, 08:52 PM |
Re: نويـــت.... ان.... احـــرد | Raja | 03-12-04, 07:33 PM |
Re: نويـــت.... ان.... احـــرد | عشة بت فاطنة | 03-12-04, 09:12 PM |
Re: نويـــت.... ان.... احـــرد | Tumadir | 03-12-04, 09:45 PM |
Re: نويـــت.... ان.... احـــرد | سجيمان | 03-13-04, 07:03 PM |
Re: نويـــت.... ان.... احـــرد | سجيمان | 03-13-04, 02:04 PM |
Re: نويـــت.... ان.... احـــرد | سجيمان | 03-13-04, 01:40 PM |
Re: نويـــت.... ان.... احـــرد | بت قضيم | 03-13-04, 10:43 AM |
Re: نويـــت.... ان.... احـــرد | سجيمان | 03-13-04, 07:20 PM |
Re: نويـــت.... ان.... احـــرد | كبسيبة | 03-13-04, 11:03 AM |
Re: نويـــت.... ان.... احـــرد | سجيمان | 03-13-04, 07:33 PM |
Re: نويـــت.... ان.... احـــرد | الجندرية | 03-13-04, 11:49 AM |
Re: نويـــت.... ان.... احـــرد | سجيمان | 03-13-04, 07:49 PM |
Re: نويـــت.... ان.... احـــرد | Sobajo | 03-13-04, 12:42 PM |
Re: نويـــت.... ان.... احـــرد | سجيمان | 03-13-04, 08:06 PM |
Re: نويـــت.... ان.... احـــرد | Tabaldina | 03-13-04, 01:30 PM |
Re: نويـــت.... ان.... احـــرد | سجيمان | 03-13-04, 08:12 PM |
Re: نويـــت.... ان.... احـــرد | خالد الحاج | 03-13-04, 02:28 PM |
Re: نويـــت.... ان.... احـــرد | ensana | 03-13-04, 07:45 PM |
Re: نويـــت.... ان.... احـــرد | Abdel Aati | 03-13-04, 08:26 PM |
Re: نويـــت.... ان.... احـــرد | سجيمان | 03-13-04, 09:30 PM |
Re: نويـــت.... ان.... احـــرد | سجيمان | 03-13-04, 08:51 PM |
Re: نويـــت.... ان.... احـــرد | سجيمان | 03-13-04, 08:16 PM |
|
|
|