من هو بشير لومي ؟؟!!!! الأيام الفاتت دي قام علي جن غنا القونات وأغاني الظار وناس الربع وكل الأغاني الهابطه دي . وصراحه إستمتعت جداً مع الناس ديل المهم إستوقفني بشير لومي ده شديد .. يعني مستحيل قونة تغني غنية بي دقة ظار بدون ماتسوي جبنة لي بشير لومي ده ، الموضوع أكل معاي جمبه زي مابقولو وأصريت أعرف من هو بشير لومي ، أصلو وفصلو وجنسو وأي حاجه عنو لأنو واضح إنو زول ماساهل وماشويه أبداً . وكتر خير قوقل بحبة بحث كدة لقيت معلومات ثرة جداً حبيت أشارككم بيها وأخص هنا السيدات تحديداً لأنو الفيميل هم أكتر فئة بتتأثر بالدجل والشعوذه والغيبيات والظار والأمور دي .
المعلومات أدناه عثرت عليها بأحد المنتديات القديمة بقلم بشير حمدي الزار الزار هو من الموروثات الاجتماعية الدخلية علي المجتمع السوداني ويقال انه وردنا من بلاد الحبشة قديما , وتفسير الباحثين في شأن الزار يقولون انه اعتقاد نفسي بوجود قوة خفية من الارواح تسكن الإنسان وتصيبه بحالات مرضية محددة , و غالبا ما تتمرد هذه الارواح علي الشخص المريض وتصبح روحه مطابقة لهذه الارواح وانه يتحدث بلسانها ويتصرف حسب ارادة هذه الارواح , من الصعب جدا تفسير هذه الظاهرة تفسيرا دقيقا حيث أنها تحتاج بحوث طويلة واجتهادات خاصة ولكن دعونا نحاول البحث في هذه الظاهرة التي أصبحت اعتقادا حقيقيا راسخا في عقول الناس رجالا ونساء وكذلك أصبح الزار مدعاة للتفاخر بين النساء وأصبح تلقيدا اجتماعيا لمعظم الاسر . حتي إننا نري المرأة المصابة بالزار أو شيخة الزار مختلفة عن بقية النساء حيث أنها تأتي بأفعال شاذة مثل التدخين العلني غير آبهة بالذين من حولها بحجة أنها امرأة مزيورة , دعونا نقترب أكثر من هذا العالم بمعرفة بعضاً منه حتي تتضح لنا الصورة انواع خيوط الزار عندنا في السودان خيط أهل الله أو الدراويش ( ناس الجبة الخدرا ) خيط احمد البشير الهدندوي ( طبعا لازم يلبس المريض لبس الهدندوة + السيف ) وبرطن هدندوي خيط نمر الكندو ( نمر الخلا ) طبعا ده يأكل اللحمة النية لذلك يمنع النسوة من اصطحاب الاطفال خوفا عليهم من النمر خيط الجياشي ( طبعا ده بلبس لبس عسكري كامل ) لأنو بحب الجيش خيط شاكر حلال المشاكل ( طبعا ده زول نوباوي ) ويعتقد أهل الزار بأنه يستطيع أن يساعد في حل أي مشكلة يتعرض لها الشخص في حياته العامة خيط سلطان الحبش ( مليليك ) بلبس بدلة كاملة وبتكلم حبشي بس خيط بشير لومي ( بتاع العرقي ) ده جنو عرقي خيط الخواجه ( بتاع الويسكي ) بتكلم انجليزي ولابس برنيطه خيط اللولية ( لولا الحبشية ) دي بتلبس قرمصيص احمر وجنها صندلية وبتتكلم حبشي بطلاقة لا يمكن معرفة أي نوع من هذه الارواح راكب روح المريض إلا بعد دق الدلوكة والطشت وغناء شيخة الزارومن خلفها الكورس لمجموعة من الخيوط حتي يأتي الخيط الذي يهتز فيه بدن المرأة أو الرجل المصاب وهنا من غير وعي تجد الشخص المصاب يدخل حلقة الرقص ويرقص حتي الاغماء ويأتي الشخص بحركات لا يمكنه أن يأتي بها وهو في كامل وعيه أو يتحدث بلغة هذه الروح التي تسكنه يعني مثلا لو عندو الخواجة يستطيع أن يتحدث الانجليزية كما هي مع العلم بأن هذا الشخص لا يعرف الانجليزية انه عالم غريب فعلا ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة