الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد...

Quote: وثيقة إتهام مرفوعة من أم الحسن بت سعيد ضد بص شمبات ............................... الإسم :.... حماد ودسعيد وطنه الصغير :.. إسمه أمبكول ميلاده ... ما معروف متين لكن كتار ناس أمبكول بيقولوا كان زمن البحر غطى الجروف سنة المدير حاكم صنب ... زار أمبكول والعمدة كان ضابح خروف بالله فى عيد ميلاد أعظم من كدا ؟؟؟؟ أيوة أضحكوا .. الدنيا إيه غير المسرات والضحك وهدية من أحلى البنات قارورة من أرقى العطور وهدية من نفسك براك قارورة من أغلى الخمور تصُب عليها الليل عشان بيك ما يطول ما ياها أخته أم الحسن المن أربع سنين لابسالا توب واحد وحيد ...تمشيبه للبكى والفرح تمشيبه للجار والبعيد والله يوم ما إشتكت زى البنات قالت قِدِم دايرة الجديد بعد الشقا ورحلة عذاب للعاصمة .... حمادنا دابوا لقى المصير إمّن بقى صديق شيرشل ومارلين والجماعة الفى السعير وإمّن صِبح مع الحور الحِسان.. ومغازلات ... ومداعبات وفرِش حرير حماد طلع .. حماد نزل .. حماد عذاباً ضاقوا بيهدَ الجبال مافيش شغل ..آسفين كتير أمشى وتعال .. وأمشى وتعال ويقولوا بكرة كمان ...وبعده تعال ..كأنهم بيمتحنوا فى صبر الرجال لمن خلاص ضاقت عليه الدنيا ... وفضلن فى الجيب 15 قرش وحجاب عشان عين العدا الدنيا غنت وزغردت قبلوهوا فى البوليس نفر فى اللحظة دى كان حماد قدر .... كان طار أمبكول عشان يمشى يدى الخبر حماد سرح والله يا أم الحسن بعد الشقا الشفتيه ياما تسعدى والله لا تسقى البهم ..لا تحشى قش وللدٍلكة والدخان تقومى وتقعدى َسبَح الخيال قدامه شاف أم الحسن مدلكة ومتبخرة وسط البنات فى أحلى توب زى العروسة معطرة فى اللحظة دى لاقاه بص شمبات ....حماد طار على الارض إنطرح والدم بحر سال فى التراب ... والدم كتب والله يا أم الحسن بعد الشقا الشفتيه ياما تسعدى والله لا تسقى البهم ..لا تحشى قش وللدلكة والدخان تقومى وتقعدى والراديو بعد الكافينول ..يعلن عن الجثّة ويقول زول بشنب ...وخدوده أفقى مُفصّدة ... فى الجيب 15 قرش وحجاب عشان عيــن العِدا