|
|
|
 Re: أمثال سودانية جديدة لم تسمع بها من قبل !! (Re: عبدالماجد موسى)
|
هاكم طائفة من امثالنا مع حار التحايا لعبد الماجد وبقية الصنايعية:
كان غلبك تفتح لك بوست انجرلك مثل
فياقة عبد الماجد موسى الخلتو ينجر فى الامثال بالخوسة
جوع الوزير البلاع السفه الداخلية وقبل على الدفاع
عرس الجبهجى المتدين من صحن عشاءه بين
تملق وزير الدفاع الكان مرض البشير يبلع بدلو حبوب الصداع
| |
 
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: بدرالدين شنا)
|
Quote: أنتظرني في "محنَّك" دا بجيك حسع
وبعدين يحنكني كيف إنت ما عارف "المحنَّك" ما بكاتل |
يا ود موسى.. اللاعب المسبغ شعرو أبيض دا ياهو عنتر الكايسنو ناس الهلال وجاك بي رجلينو.. أوعك تفوت الفرصة دي.. سمعت تحت تحت إنو في مفاوضات بينو وبين نادي المحنَّك البحريني
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: صديق الموج)
|
عبد الماجد وينك يا أخي مشيت خليت البوست بتاعك؟
أنا قبل يومين تداخلت في هذا البوست ووعدت بالمساهمة
في هذا الموضوع..ولأني راجل أروش وأحوص ، بعد ما عملت اقتباس
من بعض أمثالك ، نزلت تحت المساحة المقتبسة مباشرة زي
الأحوص الطلب فول في المطعم وأكل كباب جارو. وصممت الانتقام من
نفسي فعملت مثل عن الشتارة وواحد عن الحوصة..
وستجد مساهمتي المتواضعة فيما يلي:
القلبو ميّت بيرقص في عرس خطيبتو
نسيبتك كان جبت ليها لبن الطير
حاتسقيك الشاي أحمر..
النايم بايت القوا.. ما بسك الحرامي مع الجيران
العرّست بعد بورة بتستحمل ضرب زوجها
شناة الوش ما بحاسب عليها القانون لكن الناس ما بتقبلها..
أكل الدين ما بعمل عنقرة..
البخاف من مرتو ما بقول ليها ملاحك شطة..
الشتارة ما بتنفع معاها شطارة
تكة السروال ما بتنفع حزام للبنطلون
الما بتعرف تطبخ العدس ما ترجى منها كفتة
الأحوص كان إتأخر برة البيت فتشوهوا عند الجيران..
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
محمد السر وماجد لقيتو يدكم فيني لكن
ماجد خليهو بنقدر عليهو هنا ( اوعي تكون إتعقدت )
محمد السر
اول حاجه
كتره التصليح بتلجم الجنا الفصيح
وبعدين طله اظنها بالمربوطه (طلت ) دي فعل مضارع .. أعد المثل وقابلني 
الحاله قال بتحضر حصص محسن خالد
(مسخ شديد)
وسلام كبير جدا جدا جدا لحضور صديق الموج وبدر الدين شنا
والتحيه لصاحب البوست وصاحب الامثال طبعا
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: محمد السر)
|
الأخ عبد الماجـد موسـى
وكل الصنايعيـة
سـلام
الشماسـة برضـو عندهم امثالهم المستحدثة والتى تم نجرها من امثال او ابيات شعـر مشابهة لها...مثلا:
قال الشاعـر  شوف الجنى وشوف فعاله وفى الديوان كيف لافى شاله)
فقال الشماسةتفتيحة وشـايل مفاتيحها)
قال الشاعـربراي سويتهافي نفسي قلبي الحب ما داري)
فقال الشماسة(الدقسـة فيها اللحســة)
قال الشاعـريا مسافر ادلى وسيب السفر يلا)
فقال الشماسة(شـتات يافردة)
ولي عودة
الخير
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: فرح)
|
المتداخلون الأعزاء :
** محمد السر :
والله ما قصرت جبت لينا بدر الدين , بالمناسبه أعمل حسابك من المطاعم الصينيه دى وخاصة الشوربات .
** محمد السيد :
ماتطول الغيبه وتحرمنا من الأزهار الجميله دى .
** هاشم نوريت :
المثل بتاع الحمار انتا نسيتو ولا شنو , شكرا على المرور .
** الأخ العزيز / مأمون زين :
تشكر جزيلا على الطلة الجميله وألف شكر على كلماتك الرائعة وأرجو ألا يفارقك صديقى هذا ويظل يمدك بالأمثال وحكمتها على طول .
** صديق الموج :
ياخوى مالك ان شاالله المانع خير , ماممكن تحرمنا من طلتك تلاته أسابيع بلياليها, على كل حمدالله على السلامه وأشكرك جزيلا على الأمثال الرائعة , تحياتى .
** بدرالدين شنا :
تشكر على المرور ونحنا منتظرينك .
** محمد السر :
طبعا اللاعب ده مابنفرط فيهو , لو صبغ شعرو ولا قلع ضرسو , بس ساعدنا بالعزايم .
** توما :
ولا يهمك نحنا معاك , سعدناكتير بى وجودك وبعد كده ماتتقطعى , وألف تحية ليك .
** فرح :
التحية ليك وبالله ما تقطع الحاجات الحلوه دى .
** سعدالدين عبدالرحمن :
ان شاالله بى سلامتك يا خوى والله مشتاقين , طولت كتير .
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
Quote: يا ود موسى أنا كدا حسدتك عديل..
الأستاذة سلمى دي ليها سنتين في سودانيز أون لاين.. خلال السنتين دي كتبت 24 مرة بس.. بمعدل مرة واحدة كل شهر.. وإنت المرة رقم 25!!! |
محمد السر العزيز اللطيف تحياتى
سلمى لا تبيع هيبة الصمت برخيص الكلام مثلنا..لكن طلبتك بالمصطفى من ال24 مرة الكتبت
فيهم سلمى فى موضوع كاتباه الزولة الرائعة دى بعنوان البلاعة...يا سلام يامحمد.....
والله تمشى على بلاعة سلمى تقرب تشرب ليك منها كوز...الزولة دى موصفة البلاعة فاستحالت
على قلمها كبركة المتوكل او كانها حوض سباحة فى منتجع ملوكى بالله يامحمد دى دعوة
منى امش فتش البوست ده فى الارشيف...ونتلاقى بعد تقراه.
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
بدر يا اخوى انت ماك زولا ساهل اخوك غاطس لما لقي ليك البلاعة ان شاء الله بلاعتك
وبلاعة حبانك..بالله شوف سلمى دى رائعة كيف..بس الله يديها ضهر للكى بورد كان
شفتو عجب،،،،
أها يا جماعة الخير
اشتاق لموية البلاّعة
و اضيف رائحتها..
أتذكر بجلاء كيف ان حوشنا الكبير في بيتنا(أم بدّة) كان يبتلع كل ماء دلقناه فيه..تصيح امي او ابي (رحمة الله عليه) لمن كان متأهباً فينا للحمام:
البلاعة ملانة..اغرفا، بعدين إستحما..لأنها بتكسر و بتطمبج ا##########!!
لكن من عناه الكلام كان إما انه يستنكف ذلك او يفعل على مضضضضضض خاصة لو كان متعجلاً الخروج، او احياناً لا يعير ما قيل له إنتباه......فتفيض البلاعة تطفح مياهها، تجري في الجدول الصغير الذي يمرُّ تحت شجرة غرستها ذات إخضرار يد شقيقتي هدى (رحمها الله)..كانت اكثرنا حميمية بالزرع لدرجة انها تركت كل دراسة رشحت لها و درست الزراعة..مسكونة كانت باللون الأخضر تدخل و كثيراً في مناوشات مع والدي..خصومتهما كانت دائما على السماد...ماذا يكون..فهو الآخر كان اخضر الإنتماء...
حينما إنتقلنا إلى بيت أم بدة، لم تكن مزروعة فيه سوى مهوقنية.....حدثني احمد الشيخ أنها على حين غرة من إغترابنا، قد قطعت!!!!!لا اعرف لماذا؟؟ و قد كان ظلها رغم انه يمتد لبعيد لكنا في الأيام الأولى من سكنانا نعرف بها موقع البيت، تجاورها شجرتان، ليمونة و شجرة قريب فروت في الحوش الأمامي قبالة ( باب النسوان)..كنا ننام تحت تلك الأشجار نسدها بطينة و عجينة عن نصائح هدى في الفرق بين نفس الناس و نفس الشجر..
عدنا ذات عصرِّية من مشوار الحياة اليومي، فلم نجد لهما أثراً!!! لا الليمونة و لا القريبة..بكيت..على نحو خاص لفقدهما..و ذلك بحكم موقع سريري الكان أكثر قرباً من نفسهما..لو انك تفتح الباب اليفضي بك إلى زقاق واسع الضيق، ما كنت ترى سواها..تلك الأشجار...غابة حميمة مقترحة للفرح..ينشرح قلبك..تحس ان ثمة أمل..فرح خفي..خاصة حين تكون تلك الأشجار مرشوشة بماء مطر خريفيٍ..أو.. بالخرطوش!! ما تركوهما تثمران..تماما كفعل نظام إنقلابي ينمو بالإجتثاث...
و لأن الماء كان شحيحاً في حنفياتنا...صرنا نرشرش موية البلاعة في الموقع الخلا منهما( شجرتانا)..
تندلق الان موية البلاعة مارّة في الجدول الصغير بإتجاه الجنينة التي إفتعلاها من حنينهما والحب أبي و هدي، في الفناء الخلفي، سوّراها بالتمر هندي و الاركويت . بعيداً عن السور الأخضر إلا قليلاٍ، قريبا من باب الرجال..تتاود العنبة الرامية في بيتنا.. وعطشى.. حتى أنها كانت حامضة الثمر..هدى طالما حذرتنا من خطورة موية البلاعة على الزرع___ما تسقو الشجر يب موية البلاعة.. عشان فيها بكتريا بتقتل الشجر____لكن مين البسمع؟؟
كل يوم... منذ الديك الباكر.. يعزف النشيد الصباحي لكركرة الكوز المعدني وهو يشرخ الصمت ..كوش..كوش..كوش..أرتال الخبوب الأسود لا تنيء تخرج اثقالها..بعد تلك الرقصة الطقوسية..تدخل الحمام على يقين من أن البلاعة فاضية و الجردل فاضي و وفي راسك المعادلة( سين ماء حمامك يساوي حد إمتلاء صاد الجردل)..و تخرج بعد ذاك الفاصل الغنائي الذي نعمت به لما إندلقت منك و عليك الأغنيات في الحمام فتنسى البلاعة و الجردل و العالم من حولك و صوت من أمك أو ابيك يدعو للسكات( يا بت الغنافي الحمام ما سمح..الحمام فيه الشيطان)...
وحتى إن كنت على عجل..تنتظرك فاغرة فاهها البلاعة..فهناك من (حيتبرد بعدك يا بت) يا بت اتبردتي؟؟؟
البنات كن ينتهزن إمتلاء البلاعة فرصة!! يتسارعن لغرفها.. ليس حباً في ذلك و لكن..ثمة من تحلمن بمروره وفق توقيت القلب و كشح الجردل على قارعة من شارع يتلصص..غالبا ما تكون الواحدة بفستانها المنتقى بعناية من يريد ان يُرى في إتفاق الصدف !!!اتساءل!! هل ما تزال الحسناوات تدلقن موية البلاعة؟؟أم صارت المياه تجري على إيقاع آخر....
و لنا فصوص لم تزل
نتلاقا
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: صديق الموج)
|
يا موجو!!!
والله دي بلاعة ما هينة الخلتك تنداح قدر دا!!
عارف.. ود موسى دا ما بتاع كودايك.. الزول شكلو مبروك ساكت.. والجاوره بِسعد.. أنا أمس قريت مداخلة لي الفاتح وديدي عن شعر عاطف خيري من أمتع المداخلات القريتا هنا، والليلة لقيت مداخلتك دي.. والله يا موجو الشاعرية الفيها أجمل من دوايين شعر..
| Quote: البنات كن ينتهزن إمتلاء البلاعة فرصة!! يتسارعن لغرفها.. ليس حباً في ذلك و لكن..ثمة من تحلمن بمروره وفق توقيت القلب و كشح الجردل على قارعة من شارع يتلصص..غالبا ما تكون الواحدة بفستانها المنتقى بعناية من يريد ان يُرى في إتفاق الصدف !!!اتساءل!! هل ما تزال الحسناوات تدلقن موية البلاعة؟؟أم صارت المياه تجري على إيقاع آخر.... |
في زمتك دا كلام بِقولو زول ما شاعر؟؟
يا موجو أنا والبدري طاشين من البلاعة دي!!! شوف لينا اللنك حقها.
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: الخير محمد عوض)
|
** أختنا بت الشيخ
نورت البوست طبعا انتى التالته من النواعم البتمر وتترك البوست ملان عطور , وألف شكر ليك على الكلمات الخلت ود السر يحسد ويسف الرماد , بالله يا سلمى خليك معانا فى المشوار الطويل ده , واعملى حسابك نحنا ماشين كدارى وكترى من الأمثال دى .
** محمد السر
يا خوى والله ليك الحق اذا كان مرت سلمى وأخواتها بى جاى كل يوم حيجرن لينا الباقيات , وبينى وبينك لو فى كواديك كنت جريت ( تاج السر ) رأيك شنو ؟!
ويا ود السر شكرا كتير ليك , عطرت البوست واضفت ليهو نكهه جميله جدا .
** الأخ العزيز / على الحلاوى
تشكر يا حبيب على المرور وان شاء الله دايم .
** الأخ العزيز / الخير محمد عوض
ألف تحية ليك , والأمثال العندك دى بالله تب أمرقا لينا بى جاى .
والله زولك ده كتلنا بالضحك
الشـماسـي قالوا ليهو:
هوي ياجاهلة طيبك عبق
سنك براقها يسـوي بـق
ترنعي تشبهي مهرالسبق
فوق اردافها نهيدا انطبق
قال ليهم:
(شــدة وغسـيل عــدة)
** العزيز / صديق الموج
البفتح بوست يشوف نهايتو والبفتح موية فى حوض يرفع تقانتو( ده مثل اهل عوضى جدا.)
( صديق يا خوى انتا قاصدنى أنا ولا قاصد بله موسى )
نجرك نضيف والله صديق .
| |
|
|
|
|
|
|
|
|
 Re: أمثال سودانية جديدة لم تسمع بها من قبل !! (Re: الخير محمد عوض)
|
قديما قيل
: لكل امرئ من دهره ما تعــــــــوّدا وعادة سيف الدولة الطعن في العدى
وقيل : who the cap fit, let them wear it
........دي طبعا لي بوب مارلي وقد تعني (كل راس بي مقاس)
وقيل : عندنا نفس المثل السابق :مد رجليك علي قدر لحافك
وقيل : لكل مقام مقال
والآن : كل تلاتة تحت بلاطة
والآن :كل ستة في حتة
والآن :كل خانة في مكانة
والآن : صدر حديثا جدا: اربعة خمسة ستة يا مفضوحين في كل حتة
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: بدرالدين شنا)
|
Quote: ياموج لو سمحت أدفق لينا لنك البلاعة هنا
|
يا بدر .. أكان ما بتشم ما بتشوف! صديق جاب البلّاعة بى كوزها .. ياخى دى بلّاعة تعطّش .. وقد صارت مثلا يضرب به..
بلّاعـة سلمى و لا زير السبيل
توما و بت قضيم سأضيف لمدرستهما سلمى ببلاعتها
عزيزى عبد الماجد
أعذرنى أن دخلت لا لحم و لا كستور .. لأنى جئت على لستك لأستمتع بهذا الفكرة اللنج و المسطولة قد أعجبتنى كثيرا فهى ملئة بالأبداع .. لهذا جاءت بالمبدعين .. عمك صديق الموج و أخينا محمد السر
جئت لأقرأك .. لأخرج مليئا بالحكمة و كثير من الأبتسام .. لا تتوقع أن أدلى بكوز بلاعتى لأن بى ذاكرة تنكرد ذاتيا
آه .. لقد تذكرت بعض الأمثال ...
الطماطم المفجخة ما بتتعدل
أكان حيطتك قصيرة ما تقول لى الناس دنقروا ريسينكم
لهيب الشوق ما نجّض ليهو خروف
البوست ما بUP ببوا إلّا أصحابو
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: Ali Alhalawi)
|
السلام عليكم ورحمة الله وبركاته
تسمح بشوية تعديل
(الخمرة كان ضموها بتسطل , وكان فتحوها بتسكر )
*******
كان ما عندك للبوست عنوان ,اكتب عليهو من سجي مان
*******
المس كول ما بطمن زول
*******
عندى زيادة بس داير اعرف رايكم شنو?
***ود المسيكتاب ولي ضيوفو فاتح الباب***
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
الاخوان محمد السر وبدر شنا تحياتى
شايفكم واقعين فى بلاعة سلمى لغف اقصد قطف المهم يا بدر انا ما بعرف النك انت نسيت انت
علمتنى اكوت وخليتنى واقف فيه لى هسع..وبعدين بدر الدين خرف انا هنا حا انقل ليكم مد
مداخلته ..وبعدين انا بسوى بحث ارشيف المنبرالنصف الاول عام2004 وبكتب سلمى الشيخ
سلامة وعنوان الموضوع ..فصوص امدرمانية وحكم سلامية بجينى الموضوع امشو انتو
يا الشداد اعملو اللنك وهاكم مداخلة بدر:
Quote: الله يرحم أبوك وأختك ويرحمنا جميعاً ويرحم أمواتنا وأموات المسلمين
سلبى الشيخ سلابة
بيت أمبدة أنا ياما شفتو وغينت فيهو وأتونست مع أهلو وإستمتعت بيهم .. يا أخواني سلمى دي دايرا الزول يلاقيها عديل بدون وسيط عشان يستمتع وياخد النكتة حااااااااااارة منها دي زولة من نسيج نادر والمتلقي لازم يكون حاضر البديهة ولا بتفوتو حاجات كتييرة
سلمى أخبار عزة شنو؟؟؟
وأخبارك إنتي شنو؟؟؟
بلاعة وجرى دمعو بلانا
لك حبي وتقديري وشناتي |
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: بدرالدين شنا)
|
** سيف الدين حسن
أولا ألف مرحب بيك وبى أمثالك الحاره دى
ثانيا رأينا معروف لكن ود المسيكتاب دى يفتيك فيها الموج براهو , ياخوى واصل وأنجر ساى , وماتتلفت لى ورا تب .
** محمد السيد
تشكر على المجهودات الجباره .
** صديق الموج
الله يستركم ياخوانا من البلاعه النشفتو ريقا دى .
** بدر الدين
لسع ياخوى حكاية البلاعة دى ماانتهت , كدى أنجر لينا حاجه جديده وحلوه أو أدينا من المنجور .
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
عشرة أمثال أخرى :
** الخبيث هو اليقدر يوصل الشمارات للأطرش
** أسماء الله الحسنى ما فيها المخيف
** الفرح الشديد مسروق من الأحزان .. والحزن الشفيف مابكسر الأغصان
** ضل الضحى مابتحنس
** الحقيقة زى الشمس .. تضحك لو غطاها السحاب
** الثمره اذا استوت تقع للياكلا
** المستقبل المكسور يبكى ليهو الحاضر
** الحيطة القصيره بدفق فيها الملاح
** النصيحه قبل أول كاس .. توقف الفضيحه التكتم الأنفاس
** المجرم اذا حمد الله على جريمتو .. شكر الشيطان
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
| Quote: ** الثمره اذا استوت تقع للياكلا |
ماعندك واحد بالدارجي زي دا(كان سمعوا البنات بعملوا غنية في رقيص العريس والعروس)
حلوة وجديدة وملعوبة منك ولا من صاحبك ماعارف ..بقيت بتهضم حق فردتك الظاهر
......................................
***النجيضة تقع للياكلا***
ماتقول طاير لي عرس في راسي دا
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: Eng. Mohammed al sayed)
|
مشكور عزيزي عبد الماجد على قولك:
Quote: ** عادل البدوى
ألف ألف مرحب بيك وبمرورك اللطيف , ياخوى عدل زى ما عايز وزيد زى ما داير بس ماتنقطع . |
أكان كدي، أمسك عندك:
مشتقَّات المثل القائل: عرس أبو الدرداق للقمرا:
1. حكاية القمرا، لا عرَّست أبو الدرداق لا عرَّست غيرو
2. راح روحة عرس أبو الدرداء في العرس الجماعي
3. أبو الدرداق لما ما عرَّس القمرا قال هو ذاتو وينو الصاروخ البسيرو بيهو عليها
نَجِر جديد:
1. لفة عِمَّة الزول ما بتوديهو الكلاكلة.
2. حكاية الميت، راقد في عنقريبو أرياحو ضاربة وحُفَّار قبرو يناهدو
3. الشاي بي اللبن ياهو شاي بس بي لبن.
وبعدين ياخوي خليك قريب من بوستك عشان ما ينطبق عليك المثل البقول: البوست محروس وسيدو يكوس.
وأُضيف تعديلاً للمثل القائل "الباب البجيب الريح سِدُّو واستريح" ليصبح مثلاً منبرياً بمناسبة الحاصل في المنبر هذه الأيام:
البوست الفيهو الريح فُطُّو واستريح
تحياتي
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: Adil Al Badawi)
|
** محمد السيد
طبعا فى كتير من الدارجى زى ده , وبالمناسبه هى من صحبى طبعا وهو حقو مابتهضم لأنو عارف حقوقو كويس , لكن هو ماخد الحكايه واحد يعنى أنا أو هو شخصيه واحده , عشان كده لو ذكرت كلمة صاحبى أو ما ذكرتها مابتفرق معاو
شكرا كتير للاهتمام والمتابعه .
** عادل البدوى
ياخوى الحاجات الرائعه دى انتا داسيها مننا وين من زمان ؟
والحاجه التانيه البوست دا انتا سيدو
وكل المعانا بى جاى هو حقهم
يعنى كلنا كده مع بعض
تشكر يا حبيب .
| |
|
|
|
|
|
|
|
|
 Re: أمثال سودانية جديدة لم تسمع بها من قبل !! (Re: محمد السر)
|
قديما: القحة ولا صمة الخشم
حديثا: شغل لينا إن شاء الله فلم كرتون
قديما:البيتو من قزاز ما بجدع بالحجارة
حديثا:البوستو للتوقيع بكسر التلج
قديما:عفن وبنشم
حديثا:أكان ماردينا قرينا
قديما:لسانك حصانك اكان صنته صانك
حديثا:ركز ..ياخخخخ (مكرر)
قديما:حلم الجعان عيش ...
حديثا:لو خلص الفول أنا مش مسؤل
قديما:عندكم كلب ولا اجى بالدرب
حديثا:عندكم عروس؟.. أنا مغترب!
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
| Quote: قضيت الليلة مع شلة الكوتشينة فوجدتهم قد استعدلوا هذه الأمثال |
:
واحد صاحبنا قال داير يهب حجة هذا العام لوالده المتوفى وهو لم يحج الفرض والجماعة
قالوا له لا يجوز الا بعد ان يحج هو والرجل مصر ان يهبها واحد مرضان كنكان قال ليه
انت عامل زى الزول النزولو ناقص وداير يغطى..محمد السر الرجاء ادخال القصة الورشة
لنجر مثل يوافق ذلك ،،،
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: صديق الموج)
|
عندنا صاحبنا من ناس أبو حراز.. قال جِدو لما يلعب كوتشينة ونزولو يابا يتم ويتحقِن بالأغطية يقوم طوالي نازل ويقعد يغطي، أها لما الجماعة يقولوا ليه يا حاج فلان دقيقة النعِد نزولك دا!! قال طوالي يسل سكينو من ضراعو ويقول ليهم الراجل فيكم يعدو..
هسة يا موجو زولك دا كان مع الإحرام اشترى ليه سكين ما في زول حا يفتي ليه.
العندو سكين ما بِفتو ليه في الدين
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: محمد السر)
|
الأعزاء
محمد السر
محمد السيد
الخير عثمان
صديق الموج
تشكروا وتب ما قصرتوا
** منتصر
الف مرحب بيك معانا وما تطول الغيبه بعد البدايه الرائعه دى .
** ناذر الخليفه
منتظرين !
** ابراهيم عدلان
وين يا اللخو طولت شديد , على كل تشكر على الزياره والمساهمه التانيه .
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
عشرة أمثال أخرى :-
** القراد لو عندو دم .. ماكان يمص الدم
** أكل الحرام بجهزك للنار .. والكلام الشين محسوب عليك أصفار
** بيوت المنتديات ماعندها جيران
** تفاصيل الشكل عند المتفرجين
** الشروهو بعد المغرب .. شروق الشمس قاسى عليوهو
** ثعابين المنتديات سمومها مابتكتل
** كتاحة المنابر ماعندها قيم ولا أخلاق
** غرف المنتديات .. مفتاحا معلق فى الباب
** رقة الكمان وحنانو .. ماعرست ليهو البيانو
** المنتديات مفطومه بى شطه ومسقيه دم بى نار
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: محمد السر)
|
سلام اهلي الصنايعية
ومن ورشة الشوق وتصليح الوفاء
اهدي ليكم رفرف زكريات
وعادم معزة
وتنك غرام وصامولة احترام
واستارتر محنة ومكنتين صفاء
وشمبر عشم
ولديتر اخلاص وكتاوت مودة
ومشتاقين يا فرد
وشوقنا بورى معلق
تييييييييييييت
المنتكه....في زول نازل.............
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: Ali Alhalawi)
|
عزيزى عبد الماجد
كنت أود الأعتذار عن المواصلة فى إيراد أمثال جديدة .. لأنى شعرت أن لدى مقدرة للنجر تؤهلنى لصناعة آلاف الأمثال .. و لأن هذا البوست يعتبر توثيقا لأمثال جهلها التوثيق و تعتبر عكس لواقع سودانى غفله التاريخ .. قررت أن أتوقف و بمحض أرادتى عن النجر .. حتى لا أورد أمثالا ضعيفة أو مشكوك فى صّحتها .. قلت آرائى هذى لأختى التاية فى إحدى الحفلات الدكاكينية التى كتلناها سويا .. أثنتنى التاية عن قرارى للتوقف بالمشاركة فى هذا البوست التوثيقى .. و عرضت علىّ أن أستمر فى المشاركة على أن أتوقف عن إيراد أمثالى المنجورة و تملينى هى أمثالا حقيقية من الواقع .. لم أتردد عن العمل بنصيحة أختى التاية .. فالتاية التى لم تكمل من الدراسها صفّها الرابع .. لكنها تملك ذخيرة من العلم تضاهينى أنا الذى أفخر بإكمالى للمرحلة الثانوية .. التاية أعتبرها جاسوسة على العلم .. رغم أنها لا تبرح مساحة يحدّها من الشمال باب التكل .. و من الغرب صاج الكسرة .. و من الشرق .. لا داع أن نضّيق على التاية الخناق أكثر من هذا و نحصارها من الشمال و الجنوب .. التاية كانت تستقى معرفتها من خلال رقراق التكل .. التكل كان لا يفصله الكثير عن الديوان .. و لأن الديوان كان لا يشكو من قلّة زواره .. زوار يختلفون فى سلّميتهم الدراسية .. منهم من لم يرتقى أكثر من درجة .. منهم من لم يتعرف على بداية درجاته .. منهم من إرتقى قليلا منها و أصيب بداء القناعة فقرر التوقف مخيّرا لا مسيّرا .. و آخرون قلائل وجدوا أنفسهم .. حين قرّة من أولاد البندر .. يقفون على أدنى قليلا من نهايته .. لهذا تعددت مصادر التاية المعرفية .. إبتداء من الناس الكيرى .. إلى الناس الفوق .. لم يساورنى يوما التشكك فى مقدرة التاية على التذكّر أو التفكّر .. لا أقول هذا مجاملة لأنها أختى .. لكن هذا اليقين أدركته حين مات جدّى حمد .. جدّى حمد إمتلك مكانة كبيرة فى قريتنا و ما جاورها من قرى لما له من طيب علاقة بالجميع .. كان يصل من وصلة و يصل من قطعه .. لهذا حين و فاته رأيت وجوها لم آلفها من قبل .. أنا الذى لم أغفل مأتما أو عرسا أو حتّى طهورا ألّا و كتلته .. لم أتعرّف على معظم الوجوه التى غطّاها الدمع حزنا على جدّى حمد .. التاية ببديهية كانت تفرّق من بكت بإخلاص و من كانت مجاملة .. من كانت تخفى إبتسامة بدخالها .. و من كانت تبكى بحرقة .. آلاف النساء كنّ قد شيّعن جدّى .. الآن مضت أكثر من عشر سنوات على وفاته لكن التاية تتذكر أفعال كلّ النساء كأنها كانت البارحة .. بل كانت تحاكيهن فى حركات مسرحية تميتنا من الضحك و تذهب عنّا حزنا .. حزن لا بسبب جدّى الذى كان يفرحنا بحلاوة حربة و الرغيف .. لكنه حزنا على ما فات من حلو الأيام .. لهذا حين عرضت على التاية أن تملينى هى أمثالا حقيقية من الواقع لم أتردد فى قبول عرضها .. فالتاية موسوعة مسجونة بين حائطين .. حيطة التكل .. و حيطة الحذر .. بمكر يسكننى قررت أن أهضم حقوق نشرها .. و لكنّى فى لحظة صحو داقسة قررت أن أنسب أقوالها لها و لا أجحفها .. و أن أقتل هذى الرجولة الزائفة داخلى .. أظنّى قد اطلت عليكم رغم أننى قررت الأختصار .. أعرف أن بى نفسا مترفّعة تأبى ألّا تقتنع إلّا بتفاصيل التفاصيل .. لا وضع النّقاط على الحروف فقط و لكن تنقيط الحروف أيضا .. بصراحة أعلن هزيمتى .. ربما للمرّة الأولى .. أن أورد أقوالا ليست هلى لى .. بدون أن أنسبها لنفسى أو أدّعى بأننى طرف فيها .. كنت أود أن تشارك التاية بنفسها .. لكّن التكنلوجيا قررت أن تقطع سبل الاتصال بينها و بكم .. لا الموبايل يفلح فى ذلك .. لأنه دوما لم يفلح فى تغيير رسالة ظلّ يرّددها لسنوات .. أن التاية أختى لا يمكن الوصول إليها او هى خارج نطاق التغطية .. أمّا الأنترنت فهو رفاهية لم تسمع عنها حتّى فى أحلامها التى لم تتعدّى البيرقر و الآيسكريم .. لا أطيل عليكم .. قالت التاية
• * ما تبقى آيسكريم تتلحس .. و لا سلفركرين تتمسح
• * العكّازو مكسور .. ما ينبش القبور
• * مدّ أيدك قدر جيبك
• * عقارب الساعة ما بتعضّى
و لأثب أن رادار التاية يلتقط أيضا أمثالا إلكترونية سودانية صرفة من زوّارنا القلائل الذين لفحهم هواء التكنلوجيا .. سأوردها هنا رغم ترددى فى أن أخطئ بأخطاء إملائية أو إيميلية
قالت التاية أختى:
• * المس كول عمرو ما كتل ليهو زول
• * البنكر المس كول ما زول
• * الأرسال لو قطع .. ما بنفعو الريموت
• * الضايق ضربة الكهرباء يخاف من جرّ السلك
• * البنسى الباص ورد ما يبقى هكر
• * فين منبر أبو بكر .. روح على طول
و لننتطر خطاب التاية محمّلا بأمثال لنجية .. أعرف أنه لن يتأخر لان غدا موعد لورى ود الحسين
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: Ali Alhalawi)
|
| Quote: • * الأرسال لو قطع .. ما بنفعو الريموت |
ولا صباع أمير
بعد أن أنهي عمله في الجزارة أتي لزيارة أخته سعاد وأثناء جلوسة معها قطعت الكهرباء
أكثر من مرة قال ليها : ياسعاد إنتي الكهرباء دي ملصقة بي بزاغ*؟
.................................................................
[ بزاع ]
أبوعبيدة عن يونس قال : تقول العرب : رجل بزاغ ،
إذا كان بزيغا .
| |
|
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: محمد السر)
|
عشرة أمثال أخرى :-
** الجراد لو هجم .. استغفروا الخالق
** أسوأ جرايم الكون .. كتل الفرح فى الناس
** البوست البنقط دم أسنانو معروفه
** البسرق التاريخ .. يندس وين يا ناس ؟!
** مركوب النمر لو غلا .. برضو مركوب
** القادر يعرس مرا تانيه .. يعرس لى أخوه
** زلة اللسان مابتتغسل
** الرقشه لو فيها خير مابتكون عرجا
** البلد العريان مابيكسى حكامو
** السايق اللوم .. يتقلب فى شارع الزلط
| |
|
|
|
|
|
|
| |
Mamoun Zain
صديق الموج
معتصم الطاهر
ناصر الحاج
عبدالماجد موسى
بدرالدين شنا
Nasruddin Al Basheer
توما
فرح
الخير محمد عوض
saadeldin abdelrahman
سلمى الشيخ سلامة
ناذر محمد الخليفة
Gaafar Ismail
Mohd Ibrahim
فيس بوك
تويتر
انستقرام
يوتيوب
بنتيريست