|
|
 حياة .. زول أشــــــــــتر .. منقول
|
الأشـــــتر .. و خــــــبر البكـــــــــــــاء
ايامه ديك عندنا (عماً) لينا في الإستبالية .. ميرود بالحيل .. وملك الموت أقرب ليهو من (مخدتو الخاتي راسو عليها) وفي الحلة .. الحيشان قشوهن تب.. والحلل الكبار والطباقه والتقل مرقوهن من التكل .. والبصل حشو تب .. حتى الرغيف حجزو من الطابونة .. الناس بقت جاهزة لي ساعة الصفر (والسكلي) بقى في (حلقوم النسوان) ومالي (الحجاب الحاجر) .. وأنا وكتي داك في المتوسطة .. ومتجهز مارق علي المدرسة وعلي مرقتي من الباب يجي (بكسي) عباس جارنا (المنحوس) شايل الخبر الشين .. الدنيا إنقلبت تب .. بكاء وسكلي .. وردحي .. وأحي وووب .. والماركة المسجلة بتاع النسوان ديك .. أها بدينا في المراسيل .. الأشتر أجري جيب الكفن من الجيلي الترزي .. أنا أقوم أجري .. الجيلي الترزي كمان قعد يضبط وبربط ويعبر ويشبر(تقول بخيط في زفاف) لفحت الكفن منو ورجعت .. الأشتر أجروا جهزوا القبر ... أقوم أنا أجري .. ألقط وليدات الحلة (تقول ح نترس البحر) ..
ده كلو وكوم ولامن (أبوي) قال لي تمشي تكلم بت عمك في (الثورة) بخبر وفاة (أبوها) كوم تاني... أنا جنى وجن خبر البكاء .. مابعرف بتاتاً أوصلو كويس .. قلتو : أبوي .. (زينب) دي بهجمه ليكم .. بلحقه أبوها .. برقده ليكم ناشفة .. أخير ليكم شوفوا زول غيري .. جربتوني قبل كدي في عوض ود أحمد ومشيت كلمت (بنتو) في الجامعة .. جبتها ليكم (صادمة) في (بكسي) .. قال أبوي : الكلام ده كان زمان أسي إنت كبرت وعقلت .. دحين أتوكل .. بس براحة كده كلم (خالد) راجله وهو بعد داك بتصرف ..
أنا كرهتي في الدنيا دي المراسيل لكن وكت يبقى مرسال بقروش بكون ليهو طعم تاني .. قبضت قريشات قدر حق المشوار مرتين تلاتة.. ويا المواصلات جاك زبون ود عز ... الزمن داك زمن الباظات الحمر ديك .. التلقى مكتوب في ضهرن (الغرز نشابو شايله قليبي وين ماشابو) .. البص مليان لاعن بره غايتو لقيت لي حديدة (إتعنكشت فيها) وإتلصقت في الباظ بقيت زي (رمز الإنتخابات) .. ووصلت (الخرتوم) وأقرب محل مرطبات .. (فرحت مصاريني) (بحشوه) وكباية (شربات صاقطة) .. شكرت الله و(إترحمت علي الميت).. وبعدها ركبت باظات الثورة .. كمان مشغل شريط (البعيو) ولامن جات غنية (من قومة الجهل ما بخفوك بي اخ) عليك أمان الله إن ما عمي ميت كان قمت (أخدت لي عرضه في نص الباظ) .. نزلت في المحطة ولحسن حظي ألقى ليك مرطبات في وشي .. وتاني أصطفى ليك روحي بي كباية شربات تانية (القروش مو راقدة) .. وأتدرج لاعن البيت .. دخلت والنهار حار وأنا جسمي مسخن بالله زي (كمشة الطعمية) .. القى ليك عمتي مشغولة في المطبخ .. وأولاده في الصيلون ضاربين الطراوة بمزاج .. سلمت عليهم ورقدت لي في (سرير صاقط) زي (نقاط الزير) .. أها أنا قلت في خاتري لازم أكون حريف في الموضوع ده وأتعامل معاهو بي إحتراف (خاسة راجله ماجاء من شغلو).. يعني (أدردقهم ليك لامن يتقبلو خبر البكاء من خلال الونسة) .. لانو لو أنا رميت الخبر ده .. قطع شك .. برجع تاني للجيلي الترزي .. وألملم وأولاد الحلة .. قلت أخير مادام الوليه دي بتسوي في الغدا .. وأنا جيعان نتغدا أول (و الميت فقد نفسو) وبعداك نشوف الحاصل .. أها جابت الغدا وهي قلبها شاغله علي جيتي الفي نصت نهار دي .. و هي خلت أبوها الصباح في الإستبالية ( بين الله وحسابو) ورجعت تسوي ليهم الغدا وترجع .. أتغدينا وشربنا الشاي وهي جهزت عواميد الغدا للإستبالية .. قامت قالت لي .. الأشتر عليك الله ناس الحوش كلهم طيبين؟؟ .. أها طبعاً الولد (حريف) و(افلاطون) زمانو في الإقناع .. قلت ليها : والله كلهم كويسين خليتهم .. النسوان مشغولات بالحيل .. واحدات يقشن في الحوش .. ووحدات يطبخن وواحدات يغسلن في العدة .. الله كترن الليلة في الحوش.. والرجال جزء يجيبو في الخدار من حلة كوكو .. ومنهم يجيبو في الرغيف من الطابونة ... غايتو من دون الأيام الليلة مشغولين خلاس ... قالت لي .. وأبوي يا الأشتر الجاء منو قال قيّل كويس؟؟ ... قلت ليها : والله الكانوا معاهو كلهم جوا راجعين في الحوش هسي .. الوليه نططت عيونه وختت يدها في قلبه وقالت لي : أجي يا الأشتر ده كلام شنو؟ .. أبوي مالو الحصل ليهو شنو؟؟ .. قلت ليها بعد النضمي ده كلو ما عرفتي مالو ... أبوك مــات .
أها وبرضو جري علي المحطة جبت (بكسي) وجبتها لي بيت البكاء (مجندلة) صادمة ..
|
|
 
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشــــــتر ــ وخطوبـة صـــــــــلاح !!!
عليك أمان الله يا صلاح ود عمي قلبك ده زي دفار الحاج يوسف لامي (الهيب والضيب).. إنت أجنا علا ما تشوف ليك طريف توب ولا طريحتن لافه إلا تجري وراها زي (السخل المباري أمو) .. أزول أخير ليك تتقل وتركز وأبقالك على واحدة لا قدام .. ياكافي البلاء أي بنية تجي الحلة دي جديدة يا صلاح إنت عامليها (قيس) زمانك تقعد تسبل في عيونانك الكلو فردة من بلد ديل (تقول شاريهن من سوق الأحد) .. جات بت مدير المدرسة ما خليت (جنا جداد) ما وديتو ليهم .. حمارك فتر من مشاوير القش البتجيبو لي غنمايتم الوحيدة ديك .. لامن نقلوهم من الحلة حتى (حمارك) أخدلو جمه وإرتاح .. طارت دي بقينا في بت الداية الجابوها لي الشفخانة لليت الحلة . فلقت راسي أنا بي سيرته وبي ريدته فيك يا شبه (هاني شاكر) .. وقطّعت نعلاتي بي مشوارهم البعيد داك تشيل وتودي في اللبن وتنقل في اللقيمات .. وأنا المواجعني تقول لي أمك سوي لقيمات لي الجنيات عشان ببنوا في حيطة الجامع ( عليك أمان الله اللقيمات السوته أمك .. قروشه تبني ليها جامع براها ) والبشوفك شايل الشنطة لليت الولادة لي أمها يقول إنت ( ألاخسائي) عدييل وهي (السستر) .. أها لامن لفحوها من قدامك وقعدت تغني في ..
في الدايات حليل مجلسنا ... الهوى والغبار حارسنا
خلصنا من ده كلو ونحمد الله أخدنا جمه وقلنا صلاح عقل تجي الليلة تطلع لي بفلم هندي جديد ... أسي إنت موظف المجلس الجديد عرفتو سمح يادوب جيرانو ما عرفو.. إنت ماشي ناطي (تححب) في بنيتو .. وياها الشوفه الواحدة الفي المشرع ديك.. طوالي قام لفحك الهواء البارد داك وقعدت تحلم بكرعيك (المشققات ) ديل ملانات حنة .. وشعرك الزي ( سلك العدة) ده مليان ضريرة .. بقيت خلاس على العرس هسي قبل ما تعرف أي حاجة .
صلاح كان منتكي على جمبه ومنشغل يرسم في الواطة وكلامي الكتر ده كلو سوالو بين الأضان والتانية (سبلوقة) ما جاب فيهو خبر .. قام عدل قعدتو .. وثبت سفة الصعوط كويس في خشمو .. وصلح الطاقية سمح وهي بالله (زي المنديل المشرور في شجرة ليمون) .. وقام كده وإنعرض فوقي :
إنت الأشتر بتعرف الريدة والمحبة من وين؟؟ ... إنت ياكافي البلاء من تشوقلك بينة كرعيك يقعدن يطاشقن مع ضلهن .. إنت بتعرف للسماحة شنو ؟ ... إنت تشكّر لي في (حمدية) بت عمر (سيد القش) تقول سمحة وهي كرعينا زي مكلوجات (كاريكا).. إنت ما لافي الحلة كراع كلب ياتو بت البتعاين ليك عامل وشك (المحنوف) ده .. تعرف للحسادة .. وتجي تمد لسانك فوقي وتقول لي أركز وأتقل ... والله يا الأشتر أنا البنية من عيني وقعت فوقه (أزرق عيوني راح) وبقيت في نار الله .. البنية ماشاء الله عليها سماحة ونشاط .. أجنا والله البنية من نشاطه مشوار المشرع ده تقطعو في دقائق بالله (زي الدحش) .. وعليك أمان الله (نعلاته) تراب ما بشيلن (تقول لابسة كدارة) . تبارك الله تأكل الرملة دي زي (عجلة الفرن) . وكان جيت لي الوشي والله ( كلاش وضربة فلاش) .. والعوينات شايلات نص الوشي .. أزول سماحة لا ليها أول ولا أخر .. ومن نظرته لي عرفت النبية رقدت (هردبيس ) فيني .
ونحن في نص كلامنا .. تجي البنية زاته بي زاته مارة بجنبنا .. والحقيقة يا ناس الله .. الله خلق وطلق .. بنية (مبغبغة) زي خروف الضحية ..(تقول مربية في مزرعة) .. تشوفه من بعيد زي (كبتل أس) .. تتقدل في الواطة (زي البتحسب في بلنتي) وحلاة القدلة فوق أهله .. حليوه وقائمة بجهله .. وأعاين لي صلاح تقول رشوهو بي (بف باف ) .. يقعد ينف ودموعو تسيل وعيونو ترف .. وريقو يجف .. وحالتو تحنن الكافر .
وهي أظنها خابره الحاصل ووجع صلاح المقيل في المفاصل .. وفي مشيتها تقوم تشغل في (الدفع الرباعي) .. وتخلي ليك صلاح بين (الميتة والحياة) ... وحلف وجزم إنو من قومتنا دي عديل لي بيتهم .. نمش ناس خطوبة وعرس ساي ..
قلتلو .. أجنا كعب الجن والطرطشة .. إنت لا خابر إسمها .. لا إسم أبوها .. لا أصلها لا فصلها .. تمش تطق باب الناس والسيرة تبقى في الدرب .. قال لي .. أزول بتدور تمش معاي ولا أشوف غيرك .. حالي أنا الخاتيك لي جنس الوقفات دي بتدور تخذلني .. الإسامي والأصل والفصل ده كلو بنعرف قدام.. أنا قلتلك أبقالى (ماذون) .. أها أنا طوالي جنس الكلام ده بجيب لي (وجع الحنيس) و (ألم الخاتر) .. قلتلو أزول (تنقد الرهيفة) (أنا أخو المشلخة بالمتر) .. قوم أرح .. البنية ما بتنفات ..
أها كربنا الدحيشات تمام . وقمنا كدي بترس تقيل بنمرة تلاتة. وإتوكلنا مشينا لاعن الباب الليلن .. طقينا الباب .. بعد شوية جاء واحد فتح الباب عليك أمان الله أنا قايلو (ركيزة الباب) بالله واحداً قدر (المزيرة) .. 3× 2 ومعروش زنكي .. بالله أخونا راحة يدو بس بالله قدر (بطن الشافع) الزول طايبنه تب ودخلنه جوه البيت وأكرمنه بالشربات.. أها أنا الشليق قلت أدخل في الموضوع توش :ـ
قلتلو .. والله نحن في الحقيقة من جنيات الحلة هنا وجينا نتشرف ونتعرف .. ولقيناك زولاً كريم وهميم .. دحين (ولدنا) (شوفو القهاره ساي ولدنا) .صلاح ده بدور يناسبك ويختب بتكم .. أها الزول عاين لينا كده مستغرب وقال : لكن أنا ماعندي بنات تب .. لا سغار ولا كبار .. أنا لا هسي ما جبت جنيات .. بعد شوية جات زولتنا الما بتغبانا جايبه الشاي المو خمج .. ختت الشاي ودخلت .. أها صلاح قرب ينط لي الراجل في حلقو .. قالوا .. كيف تقول ما عندي .. أنا بدور دي زاته الجابت الشاي دي ... بدور في سنة الله ورسوله ..
الراجل وشو إتغير .. والعيون كبرن وحمرن شديد .. السنون قعدن يضربن في بعض .. وقال : أيواا إنتو يعني جايين لي مرتي .. جايين طالبين (مرتي ) للعرس .. وفي سنة الله ورسوله .. وقام علي حيلو ..
أها يسعلني الله قومتو ما تماها .. نحن لا عرفنا داير يقول شنو؟ ولا يسوي شنو ؟ أنا وصلاح ود عمي (الجلابية نصها في الخشم ) .. و (الدحيشات) في خطراتنا ما عارفات الحاصل شنو ؟ ودقيقتين بس نحن في المشرع ويا الخرتوم جاك بلاء .. أها صلاح في الدرب قال لي : يا ربي الراجل ده وقف علي حيلو بدور يسوي شنو؟؟؟؟ .... قلتلو : يمكن كان بدور ينادي المره يطلقه ليك ...
وبعدها ما رجعنا البلد إلا لامن نقلو الزول 3× 2 ده من المجلس ..
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر وإستبالية خرتوم الجن
(وجع الضرس) يجي للعدو الما صليح. يساهربك بالليل وينتح الصباح ويسويلك وجع الراس الضهر يقلقبك العصر .. أجنا أسي أكان وديتني الخرتوم قلعتو وأرتحت منو ما أخير من الأنا فيهو ده ... لكن أمي الحكيم إجازتو باقيلها خمسة يوم ويجي الشفخانة وبقلعو ليك ..
وأمي تقول : أجنا الله يطرطشك أكتر من الإنت فيهو ده .. خمسة يوم إن شاء في سجن كوبر .. كيفن إنتظر وأنا بالحالة دي . ولمن شفتها مصرة قلتله خلاس بكرة من بدري نمش خرتوم الجن دي أجهزي حضري حالك .
ومن صباحاً دغش ألقالك المرة حضرت بقجته وجات صحتني وأتاريها الليل كلو عدتو (مشاط) وتمسح وتدعك ( التقول موديها الدلالة أبيعه) .. قلت ليها : أمرة مالك (بقيتي جديدة) كدي فرحانة بي مشيت الخرطوم؟ عارفك ماشة عشان تجي تتفنجري على نسوان الودع .. أها المرة الطيبة قعدت تضحك . وتقول لي من الله خلقك ممسوخ ومشاتر .. أها مشينا الخرتوم وعلول ما وصلنا بدت الأسئلة .. ركبنا البص السياحي قالت لي : الأشتر ده مو البنطون
قلت ليها : بنطون يمش في الزلط .. ليه (دكتور تروته) ؟
لفينا صينية القندول قال لي : أجنا ده مو المنتزه البقولوا؟
وفي الشارع .. أجنا البنات ديل مالن منطلقات في الشوارع بلبسن كده ما بخافن من الهواء .. والوليدات ديل مالن محزقين وشعيراتن زي الديوك كدي وسجمي الرجال الكبار كمان يلبسوا البنطلون جنس صيبة .. ووب علي شوف المرة ديك سايقة العربية (قهرته بالقاهر والنبي الطاهر) الشديدة اللضيضة .. والشكية لي الله لا بقرة لا غنماية لاحمار الناس ديل بزرعو وين نان .. غايتو ده أخر الزمن زاتو
دخلنا المستشفى ودفعنا (التظكرة في الباب)
قالت لي : الأشتر كدي انتعالج أول بعدين نخش السيلما .
علول ما دخلنا نلقا ليك الممرضة الأربعة في أربعة (محل ما تمد إيدك تحمد سيدك) ولابسة الأبيض والطاقية الصغيرونة في الرويس الكبير ووتقدل في الممر
أمي قالت : (واحلات الركشة ونضافته) أريتها ركشة وليداتي بعد الحال
قلت له : أيمة دعوتك إن شاء تلحقني وتفزعني .. لكن دي مو ركشة .
دخلنا علي الحكيم ليل السنون وبدأ يسأل في الولية : مالك يا حاجة ؟
قالت لو : الداهي المقنب في جهة نتاق العوضة لمن أرقد .. متاورني بالحيل .. ومشتحف رويحتي .. وينتح في لهاتي .. وينبح نبيح الكلب العضة الأشتر ولدي والليل كلو عيني ما إتلاقن ولا باختن النوم ولا غمدته ومتولمه منو شديد خلاس لا لقمة قادرة أكله ولا قهوة قادرة أبلعه ومخليني متقريفة للقهوة .. سويتلو الجردقة ونشفتلو القميل وكبيتلو الصعوط .. وده كلو ما نفع يا ود أمي .. دحين خسمتك بالنبي شوف لي ليهو طريقة ( وأنا ما بعرف الشكية).
الدكتور : فتح خشمو وطبعاً نص الكلام ما فهمو .. وعمل فاهم قاليها أفتحي خشمك .. ودي كان أول مرة أشوف خشمه من جوه .. أتاري لاحق برج التجارة . متهاير تب وكل واحد مافي محلو (حكمة الله بتبادلن المراكز) .. الحكيم قال ليها : إلا تقلعيهم كلهم ونسوي طقم تاني ..وأدانا موعد للقليع .
أها في طريق الرجعة : أمي قالت لي : أجنا الحكيم ده مو نجيض وأظنو ماعارف شي كيفن أقلع سنوني العقدن معاي العمر كلو وأسوي لي سنون زول تاني يمكن ميت .. يمكن مستسمات .. يمكن سنون كافر (ومعلمن على الخمرة) .. أها أقعد أسكر وأشرب الخمرة وأعصي ربي بعد العمر ده وكمان يمكن ما يعرفن ينضمن جنس نضمينا ده .. ويمكن ما بنفع معاهن أكلنا وقهوتنا المرة دي .. وهو أكان نجيض ما يديني دواء ساي ويخليهن .
قلت ليها : كلام القلتيهو ده كلو أنا معاك فيهو وفعلاً سنون الزول التاني ده يمكن ما تنفع معاك لكن يا أمي أنا خشمك الشوفتو بي عيني ده ما دايرلو حكيم
قال لي : أها المطرطش يعني بدورلو شنو ؟
قلت لها : داير ليهو مقاول عديييييل
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر .. والرفاق .. ودفاعنا الشعبي
النتيجة باقيله يومين وعليك أمان الله نوم مافي تب وسرحان كدي وشحفتة روح شديدة خلاس وعدم أكل.. وحالتن متل دي ما مرت علي الأشتر علا أيامي الأولي (في الريدة والمحبة ): وكنت منتظر نتيجة الإمتحانات بدوره تظهر وما بدوره .. بدوره تظهر عشان إنفك من الوهم الأنا جواهو ده (القرب يبقى وحم) .. وما بدوره عشان ح تمرقني من البلد لقراية الجامعة ويلخبت حالي مع ناس الخرتوم وألبس البناطلين والفلاين أم يدينن قصار ديلك. وتمر اليومين وتظهر النتيجة وكانت كويسة خلاس .. (أخوكم تفتيحة وشايل مفاتيحه) ختري عدييل في التألييم .. وبقت بلدنا تجض بالمباركة والكرامات والضبايح عليك أمان الله التقول (أحمد زويل عدييل) .. وناس بيتنا جنس قرضمة بقت .. أمي بقت مع جاراته ما بتشرب القهوة إلا بالشوكة والسكين (حكمة الله) .. وأختي ما (بتعوس الكسرة) مع البنات إلا بعد (المكياج) .. (قادر الله داك) ... علا ماخرب القصة دي كلها ألا قالوا ما بتعتبوا باب الجامعة إلا بعد تمشوا (الدفاع الشعبي) .. أها عاد ده الخايف منو يا الأشتر !! جاك ملك الموت يالجعلي .. وأنا كرهتي في الدنيا العساكر والظباط . قربت أحرن وأخلي القراية والناس قعدت تقنع فوقي .. ده مستقبلك وكلها كم يوم وترجع .. وجاحات متل دي .. أها أناس إتوكلت وطبقت بقجتي ومشيت علي المعسكر ليل القطينة .. لوري ناس الفضل وصلني الخرتوم ما قصر .. ومن هناك ركبت مشيت (للقطينة) .. لمن وصلت دخلت باب المعسكر وماشي على المكتب عشان أسجل وشايل بقجتي في يدي أكان أسمع لك وليدن كدي من وليدات الخرتوم ناير وممسح يا دوبو جاي شافني بالبقجة في ضهري قعد يكورك لي :
قال : ياهوي إنت قاعد تبيع في شنو ؟ عندك أمشاط ؟
قلت لو : عندي كرعين أجنا ما تنطم .. أنا جاي أدرب زيك كدي .. طالب في الجامعة . بضراعي مو بقروشي
قال لي : طيب ليه شايل هدومك كدي في حاجة إسمها (سمسونايت) و( هاند باك) .
قلتلو : أجنا والله مو زي مخلايتي .. نصيبتك القلتها دي .. وبعدين مريحاني أنا قلتلك شيلة لي .
قال لي : وليه إنت لابس كده .. والترزي ده كان داير يسوي ليك فنيلة طلعت طويلة .. ولا جلابية وطلعت قصيرة؟
قلتلو : أجنا الله يبدع بك .. ده عراقي هباب .. الهبوب التنفخك .. عليك النبي مو أخير من اللصيق الإنت فيهو ده ؟
غايتو إستحملتو عشان ما فضيتلو ودخلنا سوا على المكتب والعسكري وسجلنا أسماينا ومرينا (الأرنيك) حق الحضور ومشينا على الخيمة .. أنا وزولي الفنجري زاتو .. وحلقنا صلعة .. رأس صاحبنا على اليمين (جديد لنج) التقول طالع من بطن أمو هسي .. وراس العبدلله (زي زلط مدني) حفر حفر لما التعلمجي إتشهد وإستغفر وقال لي
إنتو أناس البلد بتزرعو في الواطة ولا في روسينكم .
قلتلو : قول ماشاء الله تبارك الله .. أهــا (أسحرو) .
وكان ومعانا في الخيمة زي تسعة تانين .. وأخوانا في الله كل واحد جاي من فجة شي رطانة وشي عربي وشيتن لا رطانة لا عربي .. يفورو وينجلقو في الخيمة دي زي (اللقيمات في الصاج) .. ومن صباح الرحمن بدينا التدريب طلعنا بره في الحوش والتدريب بيني وبينكم صعب خلاس .. بدورلو زولاً متعود على الشمس والأشتر من الناحية دي (كلب رماضة) عدييل وفي الظهر تدريب والعصر وبالليل يعني كل اليوم . والتعلمجية أخر فن في الإستفزاز والدرش النضيف .. مرة أرنب نط ومرة (ست العرقي) ومرة جزاءات تدور تمرق روح الزول عديل .. ومشكلتي كانت في الدفاع الشعبي إني كنت مستعجل جداً حتى في التدريبات .. يقولوا صفا أكون عملت صفا وإنتباه .. لحدي ما التعلمجي لاحظ القصة دي وقام قال :
إنت ياكهنة يا تعبان يا ميت.. مستعجل مالك .. يعني قايل ح تتخرج قبل الناس المعاك ديل ولا شنو ؟
تعال هنا وأجري لف الطابور وكورك قول ( أنا النعجة الدفقت العجين) بأعلي صوت .. أجري
. رجعنا بعد العشاء للخيمة وأشوف لك صاحبي راقد متكوم ويقند وحالتو بالبلاء قلتلو أها يا بتاع (السمسونايت) عامل كيف ؟ قال : والله ( يا ...... الدفقت العجين) تعبان لكن لازم الواحد يصبر ويواصل ده مستقبل ما هزار.. وقعدنا نضحك على بعض ووالله أنا في الساعة دي أكبرت الزول جداً وقلتلو والله كلامك في محلو (أتاريك نجيض).. وقعدت معاهو أتونس وإتعارفنا كويس ولقيت إنو معاي في نفس الجامعة .. بس في كلية تانية .. ودقيناها صحبة وقعد يحكي لي عن واقعهم وحياتهم وأنا شايفه زي مسلسل (هوانم قاردن سيتي) وأنا حكيت ليهو عن البلد وهو شايفو زي مسلسل (الدهباية) .. كان تناقض عجيب وإلفة وصداقة قوية .. ومنها عرفت إنو نحن مهما إختلفت العادة والواقع فدمنا دائماً يحن .. وعواطفنا دائماً لبعض . وبقينا في الخيمة كلنا زي الأهل كل واحد الحقو حق أخو والعندو ما ليهو براهو .. الطلع المربة والطحنية والطلع الجبنة المضفرة والطلع القمردين من شنطتو .. وأخوكم ما قصر شاركم ليك بالدكوة .. وسفوفة القنقليس .. والشطة الحمرة .. من البقجة ..
غايتو أمي أحرجتني مع الوليدات أدتني زوادة التقول ماشي (سوق الناقة) ما الدفاع الشعبي !!
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشـتر ... وسـنة أولى حنكشــة
(عماد) صاحبي جنا مليعين ومتشوطن بالحيل . مو تربية بندر ... من دخلنا الجامعة في (خرتوم الجن) دي وأنا متشعبط فيهو زي (جنا القرد) محل ما يقبل يلقاني في ضلو يعني باقيلو (فردة باك).. وفي الحقيقة ماعندي صاحباً لي غيرو .. ومافي زولاً يعدل لي راسي في الجامعة إلا هو .. باقي هو من زمن المعسكر ليل الديش وهو رفيقاً لي .. والنصيحة لي الله أنا في الشهر الأول كت كل يوم ناطي في (فصل) غير فصلنا .. مرة أحضر لي حصة غليدة كدي لامن أطلع ألقاها دي حقة سنة رابعة .. حتى الحصص الليلات الدكاترة حضرتهن .. يكتبوني حضور عند سنة تالتة ويسجلوني غياب عند سنة أولى .. غايتو راسي إتملا تب علم .. لكن علم شنو الراس بقى زي (حيطة المدرسة) كلو كتابة من بلد .. عليكم الله شفتولكم زول يكتب بحث التخرج في الشهر الأول ..
صاحبي (عماد) مو هاين عليهو يخلني حايم في الجامعة زي (الركشة في شوارع أم بده) ودائماً الله يعرسلو معاي إن شاء الله .. هو الباقي لي تايه ودليل ... وفي يوماً كدي ونحن في نجيلة (صاقطة) قاعدين أنا وصاحبي عماد قال لي : الأشتر أخوي خلاس إنت هسي بقيت من وليدات الجامعة يعني مفروض تعيش (جو الجامعة) تغير الإسلوب البلدي ده وتواكب الناس الحايمة .. عليك الله يا الأشتر شايفلك زول في الجامعة دي لابس (شبشب أبيض) غيرك .. ولا زول كافي القميش لي (عضمة الترقوة) زيك .. إنت طالب ولا (كمساري) .. بعدين يا الأشتر إنت من زمن الكتب البشيلوها في (شنطة أديداس) وكمان شايلة في ضهرك ... ياخي في (روما أفعل لما يفعل الرومان) .. يعني باري الناس ديل شوفهم بسوا شنو ؟ البسوهو سوي .. عشان ما تبقى إنت العلامة الفارغة .. انا عارفك علي (سجيتك) بس كمان ما تبقى مضحكة لخلق الله .. ووليدات الخرتوم ديل متفشخرين علي الفاضي وإن فتشت لي أصلهم تلقاهم نصهم من ( أم صفقاً عراض) وحاجات زي دي .. دحين ما تديهم فيك فرصة وملكه فيك ..
أنا في الحقيقة كلامو وقع لي تب خاسةً حتة (سجاجتك) .. وما أبقالهم مضحكة .. أهان قلتلو : لكن أزول (الطبع غلاب) وجنس (المرصعة والبشتنة) البسوا فيها دي أنا مو زوله طب.. وعليك أمان الله أنا لامن ألبس لي (بنطون) ببقى زي (الخايض لي في موية مطره) لكن خلاس أنا من أيدك دي لي أيدك دي .. هديماتي أشتريهن لي بمعرفتك .. والنضم والكلام الزي (حلاوة قطن) داك أنا بلقطو من هنا وهنا طب .. وأديك ياها كلمة بعد شهر من الآن . إن ما لقيتني أطقطق في (اللبانة تب) .. وشايل الكباية الكبيرة البتلمع ديك في يدي .. ما تدني يدك .. أها قعد يضحك وقال لي أزول مو للدرجة دي خلي (للرجالة مجال ) مو (تفك اللعب للطيش ) ..
ونحن مارقين من الجامعة لقننا بنوت كدي يشحتفن الروح .. مشلهتات كدي لا تامات نساوين ولا قدر الشفع الصغار حاجة كدي (زي البغل) لا تامي حصان ولا هو حمار ... مغسني بالحيل أول ما شافننا واحدة قالت لي (عماد) : عمودي ده منو المعاك ده (من الأمس)؟؟ .. التانية ضحكت ليها ضحكة كدي زي (نغمة الموبايل) وقالت : لا ده يكون (صعيدي في الجامعة الأمريكية) .. وأنا عارف روحي زي (أليس في بلاد العجايب ) . . قلتلن لوكو الصبر و(تشاهدن غداً ) . أها أول شيتن ساقني لحلاق إسمو (نيو لايف) وحلقنا ديك يا الحلاقة شعيرات في النص وبالجنبات مافي شئ ( يعني عكس راس فيصلوب تماماً ) .. بعدها ما عرفت روحي .. وغشينا السوق إشترينا شوية هديمات افرنجي كدي وجزمة برباطاطه ورجعنا صادين البيت .. الجنا زي ما بقولوا علمني (الرقيص ولبس القميص) كتر خيرو يعني بقيت (أفرنجي تب) .
ومن دغشاً بدري قمت إتشنطه في الهديمات الجداد . وإتشعبطه في الفنيلة بالتعب حتى إتوزنت . ولبست الجزمة أم رباطاط .. وشلت كباية الطين البتلمع القدر (الجك) ديك ومشيت علي الجامعة .. في الحقيقة لقيت التقييم من الباب .. أول مرة من دخلت الجامعة البواب ما يسألني من بطاقتي ويستجوبني .. داخل وين و ماشي لي شنو ؟؟... وطوالي دخلت الفصل .. أول بنية لاقتني عاينت لي وقال .. لو سمحت ما ألقى عنك (دكشنري) .. أنا الكلمة مو غريبة على تشبه (السندوتش كده) .. قمت طلعت ليها (حشوة فول مدنكلة من الشنطة) .. غايتو نططت عويناته ومشت .. في خاتري قلت ممكن (شطتو كتيرة) .. بعدها واحدتن كدي قالت لي : لو سمحت ممكن (كالكوليتر) شوية .. أنا طبعاً النصيبة الزي (الكربريتر) دي يطرشنى ما سمعته بيها ... لكن لزوم المعرفة أديته (قلم الناشف) قلته يمكن يصادف المعنى !!
أهان بعد الحصة لاقيت (عماد) صاحبي ومعاه بنيات وأحلاتن (مقلوظات كدي زي إسكريم الشعلة) وأنا حايم و (الجك في يدي) القدر (البرمة) وشكلي بقه يشبة (شيالين نور الجيلاني) .. الزول أول شافني جاء علي وبراحة قال لي (خش الدور) وأتحنكش شوية .. أنداح يا حبيبو ..
سلمت علي البنيات وعماد ما قصر قاليهم ده أعز أصحابي كان في الخليج وجاء يدرس هنا .. وقلت كدي اننداح وأضري عيشي و أخش الدور وسط (حلاوة لكوم) القدامي ديل : قلت ليهم :
عليك أمان الله أولت البارح من دغش الرحمن ضربت لي الحلاق الخاس بتاعي عشان يجي (يزين) لي رويسي ده .. علا لقيتو طالع مامورية ضاربلو (عمرو دياب من سوريا) شخسياً عشان يمشيلو يحلقلو .. وبعدو بغشى (باشعال مسكلاني ) يمشطلها شعيراته .. أهان بعد داك أنا كرهتي في الدنيا (التفة) والشعر (المنكوش) قمت مشيت حلقت في ..(أها في الوكت داك إسم (نيو لايف) طار من راسي) .. قلت ليهم حلقت في (سودانيز أون لاين) ...
و (عماد) صاحبي وسط ضحكات البنيات الشديدات اللضيضات والقهقهات البجيبن الطاش .. (دخلتو في ضيق الله) ماقدر يعدل أو يبدل في الموقف الداخل فيهو ده و بقي منطط عويناتو في الدور الأنا دخلتو فيهو ده .. وفي كذبة الخليج الأنا جاي منو قال .. وهن ما عارفات (خليج غرب شندي) ده عمرو ما بتغير و (الطبع يغلب التطبع) ..
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر .. وندى القلعة .. ويوم في الجامعة
كان فراق حار وأنا باقي لي يوم وأشيل خرتوم الجن لي قراية الجامعة .. وكالعادة أمي من الصباح بدت (تدفس) لي في (البقجة) حقت هديماتي .. لكن المره دي أنا حلفت يمين (المخلاية) دي ما تبراني شبر وكفى الفضائح السوته فيني في المعسكر .. وقلت ليها : أنا شايل الجامعة وفي الخرتوم يعني لازماني (شنطة الحديد) الصفيحتين الملصقات مع بعض والطبلة الخدره (لزوم أتحنكش شوية) على جنيات الخرتوم وما يضحكوا فوقي وأنا شايل بقجتي زي (الببدلوا العدة) .. وبالتحانيس أمي رضت وبدت تستف وتحشكن في الشنيطة .. الجنبة الأولى كالعادة ( شطة ودكوه وشرموط وسفوفة القنقليس وشوية ابري أبيض) والجنبة التانية ( الجلاليب والسراويل وجنيات السراويل وحجاب غليد كدي وبخور تيمان) ماعرفتهم لي شنو ؟ قالت لي بنيات الخرتوم عينن حارة !! وفي الصباح طلعت وودعت الجماعة والناس بدت الوصاية (ماني مغترب للخرتوم) .. أحمد ودعوض الجيد وصاني لي (رادي ناشولان بي حجرين) .. وعمي العاقب عاوزلو (قيطان ليل جلاليب) .. حاجة بخيتة عايزة (سجار برنجي للظهر) عشان لمن يجيها ما تنحرج معاهو .. أها صلاح ودي عمي وصيتو براها عاوزلو (صورة لندى القلعة) (باقي مشحتف ومشلهت فوقه) وأداني خمسين ألف لنفس الغرض .. أها سواق الكارو ما سلمت من وصيتو قال لي وإنت صادي للبلد جيب لي (صعوط) من الوطنية (صنع خصيصاً للبلد) .. غايتو طلعت ومليت لي ورقة حقت وصاية ودعوات وبركات.. أها وصلت الخرتوم وجاك بلا ياود عمي لقيتو وطايبتو سمح وأديتو أخبار البلد ورقدت نجيض للنوم .
من دغشن بدري شلت السوق وإشتريت لي هديمات كدي أفرنجيات ملصقات كدي ويلمعن لزوم القراية عشان أشبه وليدات الخرتوم السمحين ديلاك ورجعت ..
أها أول يوم جامعة جاء ومن نباه الصبح قمت علي حيلي وهاك يا حمام وتنضف وتدعك لمن (لوني هده) .. وسبحان الله أتاريني (أصفر) وزمني ده كلو قايل لوني (أخدر) .. لكن ما نفسي إنقطع من الدعك بالفورة والليفة لحدي ما (قفلت جراية الحمام) ياكافي البلاء .. ومشيت للجامعة ..
أول شي الناس داخله ومارقه إتنين إتنين من باباً كبير كدي أشكال وألوان بنيات وجنيات ملونين و بيض (جداد لنج) وكلهم ترخيص الخرتوم .. علول ما جيت أدخل ناداني الغفير الفي الباب وليدن كدي مو كبير قال لي : تعال هنا .. ماشي وين طوالي كدي توش .. شنهي زريبة . قلتلو : أزول قول بسم الله .. خلق الله دي كلها تدخل وتمرق ما سعلتهم .. بقت فوقي أنا جاي أدخل أقرا مع الوليدات ديل ودي أوراقي .. هو شاف الأوراق .. وبدا يتمتم في سرو (سبحان الله) .. ودخلني وومشيت سعلت من (الفصل) حقنا ومشيت لقيت (الحصة) بدت دقيت الباب الأستاذ ليل الحصة عاين لي كده وقال لي :
وينو الشاي يا بجم ؟ .. قلتلو : شاي شنو أزول ؟
قال : أنا ما ندهت لي بتاع البوفي يجيب شاي جايني مدلدل يديك عشان شنو ؟
أها أنا إستحملتها ساي وقلتلو : أنا بقرا معاكم هنا مو بتاع الشاي .
قام إعتذر لي وقال لي (العتب علي النظر) معليش ودخلني الفصل
أها دخلت لقيتلك ناس كتار خلاس (عينة من الناس البره ونفس النضافة وبالألوان) .. وبقوا كلهم يعاينوا لي وفي المنظر الجديد عليهم ده ... طبعاً أخوكم الأشتر قاشر للطيش بنطلون أخدر عريض كدي وفنيلة حمرة ضيقة شوية .. قدام مكتوب فوقه (بوما) وبي وراء (نمرة عشرة كبيرة) وشبشب أبيض من (سعد قشرة) .. والشعر منفوش ومليان (كركار) وخاتي الخلال في نص الشعر (نظام جنصصة) وكده .. وخاتي الحجاب في ضراعي بره الفنيلة .. يعني (أميتاب عدييل) .. أها الجماعة فاتحين خشمهم شي ضحك وشي همهمه .. و قعدت والأستاذ بدأ الحصة وقال : اليوم ح نبتدي أول محاضراتنا بس قبل كدي عاوزين واحد يكلمنا عن إنطباعو عن أول يوم في الجامعة .. وأنا من نص الفصل أقوملكم علي حيلي وأطلع في (الكنبة) وأرفع يدي فووق :
أستاذ .. أستاذ . تاذ .. تاذ .. تاذ ... أستاذ .. أستاذ تاذ تاذ.
طبعاً الجماعة كلهم صنوا وفتحو خشمومم النضيفة ديك مستغربين في الراهوان ده .. والأستاذ في حالة زهول .. ونمرة (10) من وراء تلمع والكركار من الحر بدأ يسيل في جبهتي .. منظر عجيب .. قال الأستاذ :
يازول ده شنو .. إنت قايل دي الروضة .. ولا الكتاب .. يازول أقعد مافي مشكلة بتاخد فرصتك للمشاركة بس مش كدي أرفع يدك وأنا بقومك .. أها قوم ورينا يا (أرسطو) إنطباعك :
قلت :
أجنيات سلام .. أنا إنطباعي عن أول يوم .. بدور أعرس البت الجنبي دي .. وأحلاته .. شوفوا عليكم الله نضافته وظرافته وخفة دمها.. وشوفوها لابسه زي لبس حقات المسلسلات .. عليك أمان الله في الأول قايله (ندى القعلة) وقلت بدور أكلمه تجيب لي الصورة لي صلاح ود عمي والقروش حلالي أنا .. وشوفوا شعره قاصاهو سغار سغار وأحلات الدنيا فوقه وبخيت وسعيد البتبقي في نصيبو .
أها النصيبة الجنبي قامت علي حيله وقالت :
إنت يأخ كيف تقول علي أنا بنت .. أنا ولد إنت ما بتفرز الولد من البنت .
أها أنا من اليوم داك غبت من الجامعة زي أسبوع وجاني (وجع نفسيات) وما رجعت الجامعة تاني إلا بالتحانيس !!
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشـــــــــتر ... شــــــاهد طـــــــلاق !!!
الدنيا صيف والواطة حر والخُلق ضايق وياكافي البلاء الموية تدخل الريق تسمع (تش) .. والعرق صابي (زي الزير القناوي) .. وأنا في نص الخلايق متشعبط في لوري الطوب جاي من حلة كوكو .. يد في التندة ويد ماسكبها (البتيخة) العزلتها عزل (على السكين) .. نزلت من اللوري مكتح (زي الجاي من دافنه) .. شافني شافع الطيب ود علي قال لي : إنت الأشتر بتشتغل في الخرتوم (بتبيع فول حاجات) ؟ مالك مكتح ومغبر كدي .. إبتسمت وخفت أضحك من شدة الخشم مو ناشف خايفو ما ينقفل تاني .. وأنا ماشي على بيتي وأتحكحك في الحيط لي شوية الضل (زي الغنماية الجربانة) .. ووكت وصلت لاعن حيطة أحمد ود صالح الممرض أسمع جنس نضمي وكواريك .. أسمعلك أحمد يكورك في المرة و(كتلني الشمار) ووقفت أسمعو يصيح :
إنت قايله روحك مره مع النسوان (تشبهي شايب الكشتينة كدي) .. أول مرة أشوف لي مره (مشلخة بالطول والعرض) (التقول شلخك ترزي) .. عليك أمان الله خلقتك دي ما شفتها إلا في (غفير الإستبالية) .. يا النحس .. إنت ماتحمدي الله أنو لقيتي زول يقابلك كل يوم .. يقابلك قطر نيالا إن شاء الله .. إنت بدوري تقصري عمري بي شكيتك ونجهيك ده .. أنا أسوي شنو أسرق ولا أنهب عشان أكفي برميلك الشايله ده .. في بيوت بتاكل ليها 30 عيشة في اليوم ؟؟ .. والله إنت الأكل البتأكلي ده أكان أنا إتبرعت بيهو لي (زاد المجاهد) كان أكون من (العشرة المبشرين بالجنة) .. وإنت تشكي .. إنت فصيلتك شنو إنت (مرفعين) ؟؟ .. وفي الأخر تجي تقولي لي دايرة (سلسل ليل دهب) .. هو رقبتك دي بنفع معاها سلسل دي دايرة (درابزين) داير مايدور .. على الطلاق بدل نمشي لي (صايغ) حقو نمش لي (حداد) .. وكمان تشرطي على وتقولي إن ماجبتو (أطلقك) ..
بعد شوية أسمع ليك عرفة مرتو تلعلع في الأول لمن جاني الصوت كنت قايلو (الجنريتر حق الجامع) لكن شوية شوية عرفتها عرفة مرتو .. أها وإنفتحت في الراجل :
عاجبني إنت يا الأغبش المكنكش .. إنت يا تو مره البتقبل بيك غيري أنا الجبروني عليك قايل روحك (هاني شاكر) .. ولا من مالك وحلالك الكتير البشوف أنا وأنا يقول (صلاح إدريس) .. مي ياها الماهية المكملة كلها (صابون بدرة وظهرة) و(أورنيش) اليوم كله تحكحك وتتمسح ماعرفتك شغال ممرض ولا بدل (رامي عياش) .. وكان لي الأكل ماياهو يوم عدس ويوم فاصوليه والله جنس أكل زي ده ما سمعت بيهو إلا في (معسكر الدفاع الشعبي الفي القطينة) تجي تتكلم في الأكل .. وكان لي الدهب مو ياهو دهب أمك اللبسوني ليهو يوم العرس وشالتو وتاني بعيني ماشفتو .. دحين يا تجيب لي دهب زي النسوان يا تطلقني .
وأنا وقف جنب الحيطة يجي الراجل جاء مارق من البيت وعلول ماشفتو عملت فيها ماشي .. قام شافي وقال لي : الله جابك يا الأشتر أنا داير أطلق المره النحس دي ودايرك تجي تشهد على طلاقي ... وجراني ليك من طرفي ودخلني البيت ..
طبعاً أنا سمعت النقاش كلو وما داير ضيع وقتي بدور ألحق الغدا عن ناس عمي اللية ضابح لي (طهور ولدو) ..
وقبل ما يقولوا أي كلمة قعدت أقول ليهم .. إن ابغض الحلال عند الله الطلاق .. وأن الطلاق ده غير الفضايح والبهدلة مابودي لي خير وإنتو الناس بتحسدكم على حالتكم الكويسة وعيشتكم الهنية والبيوت كلها كده .. المهم بي طيبتهم إقتنعوا وصافيتهم على بعض وهو وعدها آخر الشهر يشتري ليها (خاتم) .. بشهودي أنا .
بس المصيبة إنو رجع حلف طلاق إنو أنا أتغدى معاهم .. وأنا مقبقب (بتيختي) خانقه ليك زي (هوجن) .. قلت أجبر بي خاطرهم وقعدت ورجيت (أبله نظيرة) مشت المطبح .. بعد شوية جابو الغدا ديك يا الفاصوليا .. عشرة حبات في جردل مويه يعني لو داير تمسك واحدة إلا بي (سنارة) تشرك ليها .. وإبتدت المعركة وإنتهت في خمس دقائق ورجعت الصينية (كما يوم ولدتها أمها) نضيفة تسر الناظرين .. أها المره سجم الرماد قامت طبت (بتيختي العزيزة) بدون أي إحم ومشت بيها المطبح وجابتها شرايح حمراء تفتح النفس .. أها أنا قمت أغسل يدي وأرجع (أكل من حلالي وعرق جبيني) لمن غسلت وجيت .. لقيت ليك قشر (بتيختي) مكوم (زي السفنجات قدام الجامع) .. لا أثر للون الأحمر في الصينية ..
قمت محروق والمغسه بدور تشقني . (البتيخة) مشتريها بباقي ماهية الشهر .. ومحاجج فيها بتاع البتيخ نص ساعة (سليت فيها روحو)... وجنب الباب وأنا مارق الراجل قال لي كتر خير خليتنا ننعل الشيطان ونرجع لي عقلنا ..
قلت ليهو .. أسي الشيطان ذنبو شنو ناعلنو مالو ؟؟ أكل (بتيختي) ؟؟ أمشي أنعل الشيطان الجوه ديك . الأفه الما بتتلافه . في زول يعرس ليهو (طاحونة) ؟؟ .. وإن داير تطلقه بت الكلب طلقه .. تراني ما مرقت من البيت لي أسه . وجاهز تحت الخدمة .
غايتو مشيت وبقيت أردد في الغنية البتقول
جنب الحيطة دي أنا تاني ما بجي ..... الطلاق كتير أنا تاني مابجي
| |
|
|
|
|
|
|
|
|
 Re: حياة .. زول أشــــــــــتر .. منقول (Re: humida)
|
الاخ العزيز حميــده
...تحية طيبه وعاطر الود
اعترف بأن هذه هي المره الأولى التي أقرأ فيها كتابات ..
الاشتر...واعترف بأني سأقرأ هذا البوست عدة مرات..اختيار
موفق ..قلم ساحر..ساخر..يجيد الوصف ..لدرجة جعلتني ..اضع
همومي جانبًا واضحك باعلى صوتي..في كتاباته مداخل كثيره..
ونقد انيق ..وما أنا بناقد ..ولكن اعجبني ما يكتب..وكتبت
...هل بالامكان تعريفنا بالكاتب؟
مع خالص شكري وتقديري واحترامي.
...اخوك..SHATAT
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: shatat)
|
الأخ حـمـيـده
تحية طيبة
تسلم يا سيدي على الكـلام الجميل دا فعلا حياة حلوة و في كلمات أحلى قصص ساخرة و مضحكة جـدا
لكن خليتني زي المجنون قاعد في البيت وحـيـد و الضـحـك كتلني و بي صوت عالي
غايتو الواحـد حاسي بي نفسوا فرغ كمية من الزهج ما عادية من خلال حياة الأشتر دا
تسلم يا حبيب و الله إديك العافية
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: ود حماد)
|
ABUHUSSEINالعزيز
ياخي انا من امبارح بضحك ..
ناس البيت قالوا لي لقيت عروس ولا شنو .. 
الحبيب نورة ..
شفت الزول دا تحفة كيف ..
انت مالك ما بتجي ..
ابقا تعال ..
لكن أمسك خشمك ..
الناس دي عندها روح معنوية ..
ذي ما انت عارف ..
الغالي ود حماد
جاري البحث والله ..
وراجع الرد للاخ شتات ..
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر .. والكنيسة .. والترانيم !!
عمي الطيب بالحيل (ميرود) ووليداتو هديلاك حارسنو في (إستبالية الخرتوم) من كم يوم وحالتو متأخرة خلاس .. أها جاء خبر وإنطلق في البلد قالوا عمنا الطيب يوادع في الناس لي ود اللحد وخلاس قاعد يتمم في ساعاتو الأخيرة .. (والأقدار بيد الله) .. أها الناس إتفقوا يأجروا (اللندروبل) لليل حاج الصافي ويشيلو (الإستبالية) .. ونسوان البلد يعجبنك من يسمعن بمشية للخرتوم .. يجن (العواميد ) تتطاقش .. وجرادل التوتية ليلات الكسرة ما يدنك الدرب .. تقول (زاد المجاهد) . وكل واحدة تملا (مفحضة تب فكة قروش عشان يشترن من قدام الإستبالية (المقاشيش والمفاريك و الصبغة وصحانة الكصرون ) . ويجن مقنعات يقيقفن جنب (اللدنروبل) قبل الرجال وساكتات كدي يحنن .. في خاترك تقول حانت فوق حال (عمي الطيب) ..علا ده كلو لمشي الخرتوم . مشينا ووصلنا الإستبالية في نهاراً رهابو يزرع حواشة .. حر يلفح .. أدينا (النسوان التعليمات) يمسكن في بعض عشان ما يروحن من بعض .. ويقعدن بره العنبر مع بعض و دخلنا وطايبنا (عمنا الطيب) لقيناهو شديد ينقولو في (قريد) قام بي إتنين وياكل في التالتة يحمد سيدو في أمانتي الله .. وصحتو عال العال .. أها أبوي قالو .. كيف أزول والله شفقتنا عليك بالحيل وفي الدرب قلنا نصلك ويمكن مانصلك حسب كلام الناس في الحلة.. لكن الحمد لله لي الشايفنو ده .. أخير تقوم تمش معانا .. قال : أمش أفوت (البنيات الدكتورات والممرضات السميحات) ديل وأقابل وشوشكن القبيحة المكتحة دي .. أناس عليك أمان الله أقوم بعافيتي إلا أقدم أشتغل معاهم هنا في إستباليتم دي إن شاء الله (أغسلهن الحقن) .. (وأملالن الدربات) . أنا تب ماني فايتن .. الجماعة ضحكوا وقلنالو : أكان كدي مرضك إتعرف تب. .
قعدنا قعدنا ودخل علينا وقت الصلاة وطلعنا قلنا نصلي في أقرب جامع .. ونمش لي بره ونلقالنا جامعاً كبير ونضيف بالحيل وناسو كتار بالحيل .. دخلنا .. في الحقيقة أنا أول مرة في حياتي من إتعلمت الصلاة مادخلت جامعاً متل دا الناس كلها واقفا علي حيله .. أها إستلمني ليك العاقب جارنا ..
أجنا الغناء والمسيقا شنو جوه الجامع .. الناس دي مطرطشة ولا شنو ؟ والناس ديل مالم شكلم كدي .. نصهم بيض شديد ونصهم سود شديد .. ياكافي البلاء مافي واحداً فيهم (لونو نص نص) إلا إحنا الدخلنا هسي .. ولبسم أجنا مالو كلو واحد ولابسين زي بعض ولون واحد أجنا (ديل ديش ولا شنو؟) .. إنت أجنا مو قرايتك في الخرتوم .. جوامع الخرتوم كلها كدي ولا أنا غلتان ؟.. أجنا كدي عاين عاين سمح كدي ديك مو (مرة) في وسط الرجال وترقص وتغني . الشايله الكشكوش ديك .. أها قلتلو
العاقب أخوي أخير تسكت (الناس ديل قاعدين يمدحوا أظنهم) .. (مديح الخرتوم مو بالمسيقا) .. والناس (الزرق ديل) بكونوا (الفريق ليل الكورة حقنا إحنا) والناس البيض ديل بيكونوا (الفريق القومي المصري) قالوا عندهم لعبة كورة في اليومين ديل .. ويكون قاعدين في فندق قريب من هنا وجايين يلفوا الصلاة.. علا الحريم ديل .. والله ماعارف خبرن شنو .. والغازيهن في نص الرجال شنو.. (طبعاً منطقت وفلسفت ليك الزول لمن إقتنع) .. وأنا من جوه مسطح من المنظر الجديد ده .. العاقب تاني نضم
هي لكن المديح يقرو من الورق مافي مداح حافظين . والحريم ديل على الطلاق بقن ينحشرن في أي شئ . وبعدين الناس ديل نحن لينا نص ساعة صلاتم إتأخرت تب وليلنا مرق بندور نشيل البلد .. الناس ديل دخلونا في (الحرام) .. الصلاة مافي وقتها .. دي بتدورلها خرتوم كمان.
بعد شوية جاتنا واحد بيضاء وسمحة سماحتن شديدة (اللبس أبياأأض ولونه هي زاته بمبي كاروهات بالأبيض والعيون كبار زي عيون خروف العيد مكهربه بيها خلق الله وزينا ده عاد جنونو يزيد.. الشعر أصفر وخاته فوقو علعله ببيضاء سغيرونه كدي .. وجايبه معاها كبايات (شربات) لينا .. قالت : شكراً ليكم ونحن بنحب التعايش السلمي لنؤكد حرية الأديان .. فكلنا أبناء الله . وعبادة الله تدعوا للتسامح والإخاء والمحبة .. .. أها العاقب مقهي فوقه وإن ما أنا مثبتو من طرف جلابيتو (كان جاب لينا كفوة) وطبعاً وما فرز من كلامه أي شي .. بس قالها .. كلامك صاح بالحيل والدين فيهو .. النكاح .. والتكاثر .. والمودة .. وعلي الطلاق تقولي (موافقة) هسي نمش لي .. زولكم أبعصاية القدام .. (إمام الجامع داك) .. ونعقد هسي .. رايك شنو؟ أها البت ختت العصير وجرت .. العاقب قال :
ستين يمين أكان أفوت الجامع ده .. البت من جريتها عرفتها موافقة ..
أنا وأبوي بقينا نقعنع فيهو وقلت ليهو (البت دي جايه مع الفريق المصري) وأهله في مصر أكان بتقدر تسافر أمش .. وأكان سافرت يمكن مايدوك ياهه .. حتين سكت وبقي يطنطن ويلعن فوقي ..
أبوي أخدو الشك في المكان النحنا فوقو وقال لي :
أجنا .. الكلام ده أعوج والناس ديل مو ناسنا وده أظنو مو جامع .. مو كدي .. قلت لو :
كيف الكلام ده .. ده يا أبوي أكيد جامع أسمعه مني أنا.. أنا بعرف جوامع الخرتوم كويس .. لكن يكونوا الجماعة ديل صبقونا وصلوا قبل مانجي ويكون في فرق في الوكت .. أها ارحكم نصلي في المستشفى جماعة .. وربنا يتقبل .
ونحن طالعين إتلفت أقرا ده جامع الشيخ منو .. أكان ألقى ليك (الكنيسة الإنجيلية ) .. سكته ساكت ..
علا أبوي حكاية (الصليب) الكبير المعلق فوق داك لسه ماركبت راسو لي يوما ده ..
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر .. والسيرة مرقت عصر يا عديلة !!
العمدة راجلاً عقلو راجح وعلمو غزير وبحب التعليم والقراية بالحيل . وفي شان كدي رسل ولدو(عمر) يقرأ في بلاد الغرب قرايتن تنفعو لي قدام . والجنا ماخيب أمل أبوه تب من الناحية دي ورجع وشهادة (الهندسة) طابيها في يدو . والعمدة ما قصر ضبح الضبايح وعمل الكرامات للوليد. والجنا مشا إشتغل في (الخرتوم) في شركة كبيرة خلاس .. ومابين قراية بره وقعدة الخرتوم الجنا قعد بي وشو بهناك وإستقر هناك وعملو بيتاً سمح .. وفي ديك الأيام قرر (العرس) من واحدة بتشتغل معاهو في الشركة بت عز وأكابر وعايلة معروفة كدي ( ولادة راهبات .. وحبي بلاط .. وقراية أقباط) الناس (الملس) النضاف ديلك .. وقطع شك لازم تلقي حرف قبل الإسم بتاعم ( د/ ولا م/ ) .. يعني ناس (الفيلا مفرشة .. والبولو مقرشة) .. وجاء البلد و (بالدس) كدي عزم ليهو كم نفر من الناس القاعد يمشوا الخرتوم كتير ومتعودين على ملاقاة الناس (الهاي) .. طبعاً ما عاوز يخرب (الرصة) في العرس ويلم .. (الدوم مع حلاوة قطن) .. الله ما خلق وفرق .. أها قام الخبر إتسرب شوية وإنطلق في البلد وقالوا ود العمدة عرسو بالخميس .. وناس البلد في المجاملة يعجبوك و (ما يحتاج عزومة).. والله يجاملوك مجاملة لمن تقول (الروووب) ومرات الروب زاته ما بتحلك .. وقالوا كدي لا خلو (أندروبل) لا خلو (لوري) لا خلو (بكسي).. أها الأعمى شال المكسر .
وقبل يومين من العرس إتحركوا و(دلاليكم) فوق شايلين الخرتوم .. وود العمدة بقى أمام الأمر الواقع لازم يضايف السيره ولا (سيرتو تبقى عوجة) ويصغر رقبة أبوه مع البلد .. أها قبل الحكاية على مضض ونزل الجماعة في بيت واحد صاحبو في (الكدرو) .. (مع أنو العرس في أركويت) .. وهو متأكد أهل العروس أكان شافو (السيره) دي قبل العقد (إحتمال كبير ينطو .. والبنية تطير منو) ... عشان كدي أحسن يخليهم أمام الأمر الواقع .. لكن (بعد العقد) ...
وجاء يوم العرس وكان في (نادي الضباط) وإتحركت الجموع من الكدرو .. (والزغاريد والدلوكة) شاقة الخرتوم كلها زي (الجايبين كاس أفريقيا) .. لحدي ما وصلوا .. والحفلة كانت مدورة ... أها جماعتنا على وصلتم كل واحد من اللوري وعكازو فوق على الباب ويعرض من بره .. الجلابية والعمة الواقعة على جمبة والسكين في الضراع .. والعرضة فوق .. والنسوان نازلات رقيص (بالرقبة) من (الأندروبل) لحدي الدايرة .. المشاط يلمع زي (الزلط الجديد) والودع في نص الراس والتياب البرتقالية .. والخدرا .. والحمراء .. (الله يخلي سوق ستة) .
أها ناس العرس كلهم شافوا المنظر و(رقدوا ركن) وفي خاترهم قالوا ديل قطع شك (طالبان) ..ولا (حزب الله وأكبر) .. دخلتم خلعة من المنظر ده .. وما إطمنوا إلا لمن واحد حريف منهم كدي قال:
والله ياالعريس مفاجأة حلوة (جبت فرقة الفنون الشعبية) والله .. (نيو إستايل) وكسر للروتين .
وطبعاً هم .. الله يخليهم .. ما فيهم زول لابس جلابية حتى أبو العروس لابس (بدلة) وأم العروس لابسة (إسكيرتي وبلوزة) ولا أقولكم (بنطلون جينز وفنيلة تي شيرت) .. والباقين ناس ( لابسين هدوم .. وفيهم لاهم لابسين ولاهم ما لابسين .. وبقيتم .. ما أظنهم لابسين) .. الغريبة .. اللون ما زي لونا ( ديل بالألوان ونحنا شمسنا ماقصرت فينا) .. الشبة مو شبهنا ( هوانم قاردن سيتي ونحنا حليلك يا بلد).. الكلام مو كلامنا ( ست اللهيج السكري .. ونحنا مع حروف الجر والعطف عندنا حروف الحلقوم واللوز) .. الرقيص مو رقيصنا ( ياحمامة يارقاصة .. ونحن الكنداكة سيدي الأراكة ).. والغنا زاتو مو غنانا ( سو يا سو حبيبي حبسو .. ونحنا ناس من قومة الجهل ما بخوفوك بي اأخ) .. لكن قول الحق مرجلة هم (طاعمين بالحيل) تعاين في وشي الواحدة فيهم تشوف وشك فوقه والواحدة تعجبك (تفنجط بي وراها ساي التقول سخلة) .. بس كترة الألوان تزغلل العيون ..
إتعشينا والعشاء كان حكاية .. أنا ود الخرتوم . ماعرفت من الأكل إلا (الرغيف) ومنديل الورق . ورجال البلد إطرطشوا تب .. معاينة في (خلق الله) .. وقالوا نسوانهم إن ما بنات عمهم و (قداحة) عليك أمان الله ما يبيتن معاهم .. وتعليقات في الشايفنو ده .. أها نطه (الطيب ود حمد ) وقال للعمدة :
أسي أجناب العمدة نحن مع الناس نقول (معرسين) نسوان .. عليك أمان الله ديل مفروض يكونوا أخوانا في الله .. مش نسوان .. شوف يا حضرة العمدة السماحة والجمال والنضافة عند الناس ديل .
قام (العمدة) بكل هدوء وحكمة قال ليهو :
ديل يا (الطيب) يا ود أخوي .. زي كباية الشاي العليها (عشرة معالق سكر) .. يكون طعمها حلو شديد لكن ما بتنشرب .
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر .. ومقابر أحمد شرفي ..
كانت عاجباني جداً قولة مشهورة وهي (إن ما متنا شقينا المقابر) وكنت أحس بفتونة وقوة وثقة بالنفس لمن تجي مناسبة وأقولها .. (يعني بحس بأني تفتيحه وشايل مفاتيحه) وابوعرام زمانو .. لحدي ما جاء اليوم العرفت فيهو إن المقولة دي ما بتنقال ساي وضروري التجربة فيها.. وده كان في يوماً أسود من حظي المسنوح ده فيهو عرفت إن الله حق وإنو لمن أقول قولة زي دي أكون قدره مو ملي خشم ساي بالنضمي والرجالة مو تسالي في الخشم ... والأسود من حظي كمان مباراتي لي ود عمي العميكة أب شورتن زي البصيرة أم حمد .
وتعاسة اليوم بدت من أوله لمن جاء ود عمي زي كف القدر يصحيني من النوم عشان نمش سوق أم درمان بدور يشتريلو ساعة ليلت يد .. أها قلت يا فتاح بعد نقنقة ودخلت لي في جلابية ومشينا سوق أم درمان . أها السوق يفور وينجلق الشايلو موية يبيع والشايل مناديل والشايل مساويك والشايل عراريق والشايل (مفحضات) كل الناس تبيع مرة يبيعو في تجارتهم ومرة يبيعو في زممهم .. والسوق ماش .. أها وصلنا محل الساعات وديك ياحجة ومباصرة باقي قريشاتنا شوية ..لامن وصلنا لي واحداً بايعنا بيعاً متهاود شوية .. والمصيبة بقت في باقي القريشات العندنا ما برجعننا الإتنين يعني يرجعن واحداً فينا .. أها ود عمي قال لي الدبارة شنو يا الأشتر .. وفي جنبنا كدي محلاً ليل (إسكرين) المتل (الخنجر) داك من فوق تلج ومن تحت (فورمايكة) .. وبالحيل أنا بريد الداهي ده ونفسي كدي إتشحتفتلو تب .. أها قلت لود عمي : أجنا أكت القريشات ماهن تامات للرجعة أننجم ساكت بالإسكرين الصاقط ده ونكرب جريدتنا ونشل بيتنا كداري ساي مو بعيد (طبعاً منطقتو في شان خاتر الإسكرين) .. الجنا إقتنع وجاب الإسكرين .. وقعدت أمطق في الداهي تسمع الصوت زي (الدلوكة) لامن لهاتي رقدن عود عدييل .. وبقينا في هم الرجعة من سوق أم درمان للثورة بالنص .. المهم إتجوعلنا ومشينا ولمن بقينا في مقابر شرفي لقينا اللفة طويلة لي شارع النص وقلت لي ود عمي رايك شنو نشق المقابر ونختصر السكة (أنا بدور أخته درب العربات ساي) .. وده الحصل ودخلنا بي وسط المقابر وفي النص لقينا نفرين واقفين يحفرو في قبر لي (جنا) صغير مكفن ومختوت على جنبه .. واحداً منهم قال لينا : أجرو صل تعالوا أحفروا شوية .. أها بي تعبنا داك .. قعدنا نحفر معاهم وفي أثناء الحفر نشوف إتنين بواليس جايين علينا وبقوا لاعندنا تب وقالوا : ياجماعة أحسن الله العزاء .. بس إجراء بسيط طلعتو أمر الدفن .. أها واحد من الأخوان قال : والله ما طلعنا أمر دفن الطفل المولود إتولد ميت والتقرير في المستشفى وجبنا على طول للمقابر.. العسكري قال : أوقفوا الدفن لحدي ما تجيبوا التقرير من المستشفى .. وبقوا في حجة مع بعض وفي الأخير إتفقوا يمشوا سواء يجيبوا أمر الدفن من الإستبالية ويجو .. قام الراجل قال لينا ياشباب أخدموني وأحرسوا الجنازة دي لحدي ما نجيب التقرير كلها زي نص ساعة .. نحنا نحينا في حالو الزول مكلوم وميتو شافع لازم نقيف معاهو شوية وفعلاً أنا وود عمي قبلنا وقلنالو بس لا تتأخر علينا الدنيا مغارب ...
النص ساعة مرت بسرعة شديدة والليل بدأ ينزل تب وضلام المقابر يطير رحمن القلب وبعد ما كانت الونسة جاره بيني وبين ود عمي وفي وسطه ضحكات .. بقى يا الله تسمع همهمة كل خمسة دقائق أكان كلمة أكان كلمتين .. والدنيا لبست ضلام الليل عباية .. بقينا في الشك والظن أنو الناس ديل مو راجيعلنا تاني .. والجنا الميت ده مو شيتن بالعديل كدي . والقصد عنهم يورطونه بيهو.. ودام نحن حارسنو لا هسي وناسو هربو كدي معناتو إن بقه في إتهام ياهو الراكبنا طب .. أها الدبارة شنو ؟ يقطع شكنا ده صوت الريح لامن يضرب في شواهد القبر .. عليك أمان الله تشوف قلبك بقى نوبة (أولاد البرعي) .. وباقي مخك يكون سرح مع غنم إبليس .. أقعد أقابض في طريف ود عمي مقابضة .. مو شان أطمنو .. شان لا يجري ويخلني براي في جنس اليوم الأغبر ده .. وتدور الدايرة ويقعد هو يقابض فيني مقابضة .. العمر مو واحد مو بعزقة .
قال لي : أسي الأشتر أكان من الأول مشينا ولفينا بي غادي مو كان أحسن من الورطة والخوف ده .
قلت له : كمان مو كان أحسن أكان خليتني نايم في نومتي ديك ومشيت إشتريت ساعتك وباقي قروشك رجعتك مو كان أخير من نضميك ده .. بقينا لا قادرين نفوت الجنازة ولا قادرين نحرسه في نص المقابر ..
وبقيت أتذكرفي الكلام البقولوا في ناس القبور البقيفوا طابور والزول السكه كيس النايلون .. وكديسة المقابر المكحلة اللابسة فنيلة نمرة عشرة.. والهيكل العظمي الخالف كراعو وخاتي سيجارة البرنجي .. والغنماية الممكيجة ولابسة الرحط وترقص بالرقبة في نص القبور وتهيآت لا ليها أول ولا آخر .
ونحن في نص المحنة دي وسرحانين في كواسة الدبارة .. وفجاءة وبدون مقدمات يجي نور شديد جداً وقريب مننا يولع فجأة في وشنا ونسمع صوتاً يقول : ياهم ديل .. لحظتها ديك .. القلب بقى في الكرعين والعقل الله يفتكروا بالخير .. وفي أقل من ثانية إنفصلت إشارات المخ عن الكرعين .. بقى المخ يقول شي .. والكرعين تقرر شئ تاني .. والصوت مبلوع .. والعرق يملأ (بستلة) و (الرجفي) يحتلو نخلة تمر بي عدله .. وعينكم ما تشوف إلا النور الجلابية لاعند الزراير في الخشم والنعلات فردة في (الشنقيطي) وفردة في (الوادي) وجري بي نمرة أربعة .. والجماعة والنور ورانا ونحن لانرى لا نسمع لحدى شارع النص وشارع البيت .. وباب البيت وتوش جوه البيت وجوه الأوضة .. وتحت العناقريب .. وصياح يجيب أهل أم ضواً بان والعيلفون .. والغريبة النور والجماعة برضو ورانا ..
وبعد ساعة من الإغماء صحيت على صوت (عمي) يهدي روعنا ويخفف خوفنا .. ويقولينا .. الجماعة جابوا التقرير ورجعوا وعشان الضلام جابوا الكشافة ديك .. وهم بشكروكم كتير وبعتذروا ليكم عشان التاخير عشان الدكتور كان طلع ورجع تاني . وإنتو الفيكم إتعرفت بالحيل .. وتاني إن سألكم زول من جنسكم قولوا : زمان كنا جعلية .
لكن أحمدوا الله إنكم ( شقيتوا المقابر بس .. ما متوا)
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر .. وقصة الريدة القديمة
الدنيا ليل والناس نيام وقريتنا صاحيبه الحنين تهدهد في جنياته وتساهر على راحتم .. ساعة تشهق تشيل تعبهم وقسوة الدنيا العليهم .. وساعة تزفر بهواً بارد يداعب نومتم ويبرد وجعتم .. وفي القمرة ديك بشوف صورة وشيها قطعة قمر في ليلو تم وإكتمل .. والنجوم الحوالينه داك القمر .. ماهن بعاد ياهن في الحلة رفاقته , إن جيت أوصفه .. أخاف التعب .. أخاف النقص .. وأخاف أظلمه وإن ختوها في محل القمر .. تكتر عذاب الناس ويبقي شغلهم الشاغل عليها وعينهم مرفوعة تتجمل بشوفته .. شيتن كده .. لا شعر .. لا وتر .. يقدر يكابر يحدده .. كل القدرو يقولو (الله خلق وطلق) ... وفي حلتنا الحنينة تبدأ الطقوس من الفجر ناس تلاهث للورد وناس تكابد للزرع وقبل كدا . تبدأ البنيات الصباح لجقمة الشاي المدنكل بالدعاء .. وفي الزحمة ديك بدأ همي أنا .. أشوف قطعة الشمس الختاها الله فوق أرضو .. وحتة القمر البلاقي صباح (والحسن يظهر حسنه الضد) .. حنتوشة ريدي .. وساقية دمي .. (نعمة بت الباقر) الكاتلاني في نص التقانت والشايلة رويحتي في طرف طرحته .. وشوقي مباريها مع ضلها بقو الروح والنفس .
وكل صباح أنتظر عند الغنم ما نعمة جاية لي حلب الغنم .. وتبدأ ست الحسن تملا اللبن .. ومن تطلع خلاس وأنا منتظر تقول الكلمة البتدور روحي بعدها تطلع : الأشتر كيف أصبحت ... تقولها وبعدها تجري بخجل وماعون اللبن نصو يندفق ويبقي ( نص ريدة ونص لبن) وكدي إتخيلوا شاي الصباح ( ريدة بلبن) . فضلت كاتم ريدتي ديك لامن يجي الوقت المناسب الفيهو بالحيل أنستر .. علا الدواخل ربك يعلمه مليانة ريدة مكملة .. وصديقي في الحزن والمرح .. ماغير صلاح ود عمي داك قيدو بالسر وإنكتم ولمن نقعد في رمال الحلة الدافية في الليل المعتم يبقى الكلام عن نعمة ديك .. ومين غير نعمة للضو ينسلك .. يقول صلاح في ليلة ديك :
أخاف الأشتر القسمة والأقدار تظلمك وياخده غير وتنسجم
وأنا أقول لو : عليك أمان الله أقلب الحلة (واطيها فوق عاليها) وأخليها ليكم (تورا بورا) .. شايفني هين وبتحقر .. أجنا الأشتر يتنو كلمة فوق كلمتو .
وأنا أقعد (ابرطم في سري) .. وأقول (الجنا ده من يومو منحوس ) .. في زول يلدو أخر الشهر .. غير دا السجم .
وتمر الشهور .. وقتي جاء .. وكلمتها .. وبي بسمة ولف مخلوطة بي ريدتن قديمة .. ضحكت وجرت .. بس السمعتو بين جريته ( شاي المغيرب بسوي بي أيدي أنا) قالته وجرت .. وكان الوعد .
وأنا لهفتي سبقت مشاعري الحنينة على أبوي .. وبعد السلام وطلب العفو وكلام كتير عن الزرع .. جاء دور الجد بقا .. قلتلو يأبوي ما مشتهي جنا الجنا .. قال لي كيف .. قلتلو دايرك تخطب للأشتر الليلة خلاص نويت لبت الأصول .. عند ناس الباقر كتلت . قال لي : خير .. وتم المراد .. والبلد بقى في حالن عجيب نص الفرح عند ناس نعمة يحضر في السمح .. وباقي الفرح إتوسدو الأشتر النطق بكلمة شرف . ومن يوما داك والريدة متمومة بوقار ونفس السلام ما زاد شي إلا القلب شايل وئام الدنيا والوعد الخلاص قرب يصل .. ما نعمة ديك بت الأصول ما ناضمت في الحلة زول .. ما ختت العيب ورجت عتاب الناس عليها .. الله وهبه الخلقة والخلق السليم .
وفي أيامه ديك حلتنا في حالن عصيب (ياكافي البلاء) من الوباء .. ملاريا إنفكت في الخلق ما خلت .. الجاهل الرضع .. ولا الكبير ألا وزارتو .. وعلا الزيارة الما بتنقدر غشت ست البلد (النعمة) وسكنت مع حبي الموسد في الحنايا وفي الحشا وأبت تفارقه .. وتعبت نعمة مر التعب وحكيمنا قال :
لازم لإستبالية الخرتوم تمش ..
وفعلاً وكان الأمر .. وبقيت حارسه وأتمنى من الخالق الكريم أشيل من عيوناته التعب ..
وفي ليلاً ضليم .. وقف الزمن .. في ساعة ألم .. يترجي في الكون الفسيح .. ياخد من احضانو الزهر .. وألم العمر في ساعتو ديك بان وظهر .. نعمة سلمت الروح لخالقه ..
وبين النوح والبكاء.. والزكريات المؤلمة .. بينكم الأشتر بقى ..
(جسد) والروح مشت ( مع صاحبه)
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر ... وأدروب .... وبيت الإيجار
أيامي ديك أخر نعمة ونعيم ماعمي جاء من الخليج بعد غربة زي (سجمطاشر) سنة كده يمرقن من عمر العدو المو صليح .. رجع ومخمخم الهديمات الماهن خمج شي قمصان بالكاروهات وشي قمصان بلا لياقات وشي قمصان بالجبنة .. وكان لي نصيب مابطال من الحولية دي أنا ما باقيلو في حلقومو بالنقة وجيب لي داك وداك .. الراجل إنستر معاي تب .. علا ورطني ورطة أخير أكان جاب لي ( سبحة) وسكت عليها .. وصاني أأجر ليهو بيتو الفي كوبر .. وأنا قايل الحكاية بطلع لي منها بي سمرسرة .. ماعارف روحي بطلع فيها الطيش وبدل سمسرة طلعت بشمشرة .. المهم دقيت ورقة كبيرة في الباب ليل البيت وكتبت (لليجار) وختيت تلفون كبير حق الدكان الجنبنا .. أها بعد يومين وأول زبون جاني أدروباً لاعن الدكان (ماحيرني فوقو إلا سروالو الطويل هو جاني لاقاني في كوبر وباقي سروالي جاري لي جبرة .. في الأول أنا قايلو جارلو ناموسية) قال داير يأجر البيت وبدينا نتفاكر في التفاصيل ..
أها أدروب قال : بلويت يـــا بيت نأجر .. قروش كاش ندفع
قلتليهو : أجنا ( يـــا) الطويلة دي لزومه شنو .. هو إيجار ولا كراتيه .. وبعدين تكتك الطويلة دي عليك الله ما بتعترلك في الدرب .. والله يا أدروب إنت عامل أزمة حبال في البلد . أها أسي إنت شفت البيت .. نحن عاوزين إيجار تلاتة شهور مقدم .. من هسي نكون على بينة ما تقعد تنطط باقي نطاطين إنتو .
الأدروب قال : تلاتة شهور ندفع .. تقول سته شهور برضو ندفع . أدروب ما يلاوز ..
قلتلو : والله أ أدروب أكان كدي ود عز عدييل .. وعمة ترباس لابسه سروال هيع... ومن الليلة أكان داير تسكن هدي المفاتيح .. وإتفقنا وأداني قريشاتي وشال مفاتيحو وأنا شلت أهلي ومشيت ... وإتفقنا بعد التلاتة شهور يضرب لي تلفون في الدكان لي قروش الفترة التانية ...
مرت الأيام والشهور والتلاتة شهور مرن وفوقن عشرين يوم زيادة وأدروب عمل (أضان الحامل طرشة وخاتي فيها قطن كمان) ا ها قررت أمشي ألقط قريشاتي منو .. مشيت ومعاي صاحبن لي من وليدات الخرتوم النجاض ديلك ودقينا باب البيت ... وعينك ماتشوف إلا النور جاتي واحدة جنوبية (أطول من يوم السبت) ممسحة بي زي رطلين إلا ربع زيت سمسم أمروابة .. فتحت لينا الباب .. قلت في خاتري .. يمكن أدروب ده بدأ يطبق السلام قبال الحيكومة وعمل وحدة وطنية وناسب أخوانا الدينكا .. أها سعلتها من مقطوع الطاري أدروب .. قالت لي .. أدروب ده منو ؟ ما بعرفو .. بس يمكن يكون ساكن هناك .. وعلى وصفها أشرت لي على أخر عوضة في البيت .. دخلنا أنا وصاحبي (مطير عويناتو .. واحلاتو بي نضاراتو) .. والبيت شفع كتار كده يلعبو في الكورة .. وفي ضل الأوضة مرتن تمشط ليها في نسوان وواحدة ترمي في الودع .. وواحدة خاته سعف تضفر ليها في (علجة) .. وان ما الكضب أقول في عروس يرقصو فيها في العوضة .. من الكواريك والنبيح .. ونحن ماشين أكان نلقي (هارون) بتاع الدكان حايم في نص البيت لابسلو عريريقاً قصير كدي وماخد راحتو تب (التقول مالك البيت بعقد) .. جاني وسالمنا سلامو الكتير داك .. تمد يدك وقبال ما ترجعه كويس هو تاني يمد يدو يسلم من جديد .. عمله كده زي حداشر مرة لمن جات الحلقة الأخيرة صاحبي (الخرتومي) وصل الواطة طب .. المهم الراجل ماقصر حلف يكرمنا في بيتو داخل البيت الكبير وسعلتو : إنت يا هارون الجابك هنا شنو .. ومالك متجدع كده بعراقيك كانو (بيت أبوك) !! .. قعد يضحك وقال لي .. بيتكم ده في الحلة دي مسمنو (دفار الحاج يوسف) والناس الراقين بقولوا عليهو (حافلة السوق الشعبي) وكلو من أدروب الجن داك .. أجر منك البيت .. وأجرو أوضة أوضة لخلق الله الساكنة دي كلها .. والأربعة أوض الفي البيت ساكنينهم 33 نفر كلهم يفورو زي (دار الريادة) .. وكمان أدروب عامل ليهو (طبليه جوه البيت) لي الصعوط والسجار تلقى عندو .. أنا قلتلو كدي هو وينو لمني فيهو (ود الحنوت) ومشينا على عوضتو .. نلقى ليك راقد على ضهرو وخالف كراعو في التانية وخاتي عدة الجبنة قدامو و (مرتو تفلي في رأسو) وشايل الربابة يدوبي .. متكيف تب .. مو وزير الإسكان في البيت .
قلتلو : تدوبي يا أدروب مو سيد البيت .. البحميك شنو تغني .. قابض قروشك وممطوحني أنا .. عليك أما الله الليلة يا أنا يا إنت في البيت ده .. تغشني يا المسنوح وتأجر البيت (بالقطاعي) ده كان إتفاقنا جيتني زي محروقة الحشا تحنن .. أتاريك ناويها ..
أها الزول إنخلع ونطه لمن شافني نطتو ديك بدور يقد العرش .. لمن نزل في الواطة مع شعرو المنكوش داك (بالله تقول هلكوبتر بي مراوحه) .. قال : أأوز بالله من الشيطان الرجيم .. البلويت تاني .. كدي أول حاجة أقعدو أشربو الجبنة .. بعدين حكايات نشوف ..
قلتلو : جبنتك طايرة عليك أول حاجة تمرق لي من البيت ده وتمرق (المجلس الوطني) العاملو لي ده بعدين نتفاهم وده قبال كل شي .. لامي لي السودان كلو هنا وقاعد .
قال أدروب : بلويت يا .. أدروب تسكن .. هارون تسكن .. مجوك تسكن .. محمد صالح تسكن ..الأشتر قروش تشيل .. خلاس مافي مشكلة . .. هسي قروش نديك ولا عاوز مشاكل ولخباطات ؟.
قلتلو : أدروب ياخي أنا لمن أجرت ليك البيت ليك إنت وأولادك موش تجي تأجرو من وراي ده كلام غلط منك وعشان تربح إنت تخرب علينا البيت .. دي ما برضاها الله ولا الرسول ولا نحنا زاتو...
قام صاحبي (الخرتومي) طلق كدي خشمو وقال : أسي ياعم أدروب (أمجاد) دي بتشيل ليها 20 راكب ما سبعة تنفار بس والبيت ده زي أمجاد ما بشيل أكتر من ستة أشخاص . .
قمت أنا نطيتك في حلق صاحبي وقلتلو : أنطم إنت خلينا من أمثالك المايعة دي .. الزول ده يقوم ياكلنا سفروق .. أخشن شوية ولا خلني عليهو . وزولك السكتة الياها .
أها أدروب إنعرض فينا بعد (المثل المايع) بتاع صاحبي وقال : شوفو أنا حكومة نعرف .. قاضي نعرف .. بوليس نعرف .. قضية زي ده نقعدو 10 سنة في المحكمة .. ماتتعبو روحكم .. وبعدين إنتو ما أول بيت أدورب يأجر وما أول محكمة وبوليس أدورب يدخل ... وكلو واقف قدام القاضي .. أسي أديك الفايدة ..
أدروب تسكن .. هارون تسكن .. مجوك تسكن .. محمد صالح تسكن ..الأشتر قروش تشيل .. خلاس مافي مشكلة
أها ومن ديك ... أدروب جاري .. والأشتر جاري بوراهو ...
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر واللهجة السعودية
عنقريبي دائماً بختو تحت النيمة عشان بعلق (الرادي) في عود النيمة عشان الجنيات ما يلعبو فيه .. الصباح أسمع صوت (الوسلية ود عبدالله) يصيح لي :
قوم الأشتر .. بختك الدنيا فتحت لك أبوابه تب وضحكتك لك !!
قلتله : أجنا خشمك فوقو اللبن .. أنضم بسراع . ألكع
قالي : واحداً إحيمر كده ولابسلو طرحة فوق راسو ومسبتة بحبل وجلابية بيضاء شديد مو زي بياض جلاليبنه قالوا (سعودي) جاء لاعن أرضك وقال دي سيده منو بدور يشتريها منك . وعرف أنو إنته عارضه للبيع .. وقال بجي يوم الجمعة العصر يقابلك ... يعني بعد أربعة يوم .
الجنا خلاني وفات .. وأخوكم رأسو إتملا تب بالتفكير وبالتسعير والمساومة (مو خليجي:cool .. علا المشكلة بقت في الكلام أناضمو كيفن جنس نضمينا ده يمكن ما يفهمو ويمكن أقولو شين وسعراً يكون ناقص صفر ولا مبلغ ولا شي وأنا داير أبيعه ليهو بالغالي .. أها الدبارة شنو ؟؟ قلت ما في دبارة إلا أقعد وأتعلم في ناس البيت ديل النضمي السعودي لليلم...
وقعدت أقول : يا بزورة يا أم الخير أشلونك داير أنوم شوية ..
ومرة اقول : أيش تبي يا جنا شوية ملاح من المشلعيب داك.
ومرة : الحمار حقي طويل العمر عاوز كفارات وإستبنة ..
المهم شيتن كدي لا عربي ولا عجمي ولا رطانة لجيق لجيق .. تاني قلت أحسن أكلمو باللغة العربية الفصيحة لليلت الجامع البقولوها في خطبة صلاة الجمعة وبقيت على كدي وقرضته على كدي تب ...
وجاء يوم الجمعة ومن الصباح جبت لي (فورة) جديدة إنكرشت بيها سمح .. وإستحميت الحمام التاني في السنة .. وشحدت الكلونيا من إمام الجامع وإتريحت وقعدت في الديوان .. بعد شوية الزول جاء وبدأ النضمي وألقيت عليه خطبة عصماء حفظتها تب والليل كلو أردد فوقه وجايب كتاب (المطالعة والأناشيد) حق سنة تالتة : وقلت
السلام عليكم ورحمة الله وبركاته يا أخ العرب .. بلغني أنك أتيت من بلاد الجزيرة العربية ممتطياً صهوة سودانير طالباً شراء هذه القطعة من الأرض من العبد الفقير إلى الله بغرض الإستثمار فيها .. وزراعتها من الفوم والعدس والبصل وكل ما تنبت الأرض .. وأنني سوف أجمع القوم لنتفاكر في هذا الأمر (فأمرهم شورى بينهم) ونحن في هذه البادية نتشاور عند قدوم أي من المشترين .. فأمهلني فرصة وسأرسل لك رسول من عندنا بصحفية من هؤلاء القوم يبدون فيها رأيهم .
والسلام عليكم ورحمة الله وبركاته .
الزول إنبهض تب وفي فكرو قال (دا رامي جمل ولا شنو؟) وقال بالحرف الواحد : أزول إنت مطرطش ده كلام شنو ده .. تاعب نفسك قدر كدي مالك .. أنا سوداني زيك وبفهمك أكان رطنته .. بس أنا سافرت السعودية من 35 سنة وأخدت التابعية وجيت أشتري من أرض بلدي وأزرعها فما في داعي لللغة العربي الكتيرة دي . أتكلم وأخد راحتك فاهمك والله .. .
أنا في الحقيقة ماهماني أنو فاهمني ولا لا .. بس الهماني أنو طلع مو سعودي طلع زولاً متكتح زينا ومشا إتكندش وجاء ..
قلت له : يعني مو سعودي أصلي .. وأيش لونك والبزورة والحاجات دي مو تبعك
قالي : لا
قلت له : أكان كدي الأرض دي دايرة تقرأ ... ولي ود عمها بعدين
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الأشتر .. وخدوا الحكمة من أفواه الفنانين !!
قال المثل (خدوا الحكمة من أفواه الفنانين) وعندنا فنان حكيم خلاس هو الغناي (ترباس) لامن قال (مصير الزول حياتو ياما فيها يشوف.. وفي دنيانا بنلاقي الفرح والخوف ) .. عليك أمان الله الزول الشايل كفنو فوق راسو ده مو هين طب ... والحكمة وين .. أنو فعلاً مرات كدي في نص الفرح يقوم يجيك الخوف بهجمة مرتدة يخرب عاليها واطيها .... أها الفرح وين في قصتي دي في يوماً سمح زي (وشي ده) .. قال لي المدير في الشغل إنت ح تمش مامورية لاعن سوريا وأزيدكم من الشعر بيت في سماحة اليوم سفري بالطيارة كمان .. أها والحزن والخوف والهجمة المرتدة في شنو .. يوم إطرطشت في مخي وكلمت صلاح ودعمي بي سفري لي البلد النضيفة ديك والسفر ليها بالطيارة .. وأنا يا الله لمن أركب العربية الفي الواطة دي بكون ماسك في الحديدة لامن أصل تكون يدي حمرت وأتر الحديدة ظاهر في يدي يوماً كامل .. أها صلاح ود عمي على قدر القرأ في المدرسة في المتوسطة الختم بيها شهاداتو. كلو كباهو في يومه داك قعد يقول ..... إنت عارف يا أشتر أخوي الدنيا والحياة مو معروفات .. وربنا أكان دايرنه نطير كان سوى لينا جنحات نطير بيهم .. كل شي الله خلقو بي حكمتو .. الله خلقنا لي الواطة دي . أنا الطيارات تب ماني مقتنع بيها شيتن تشيل ليها خمسمية نفر في بطنه وتطير بيهن .. دي يصدقوها كيفن ؟ بعدين أستاذ الماحي زمان في حصص العلوم قال في شيتن إسمو (الانجزاب الأرضي) يعني الواطة النحنا فيها دي قدر ما تطير منها تقعد تجر فيك بقوته كلها لا تحت وتجيبك (وردلب) لاعندها أكان سالم ولا مكسر وأنا مصدقو طب . أسي النعامة الله مو خلق لها جنحات وما بطير ليه؟ لانها تقيلة والله جاعلها رزقها في الواطة دي . إنت ما شفت (الأندروبل) اليل ناس عمر ود حاج اللمين وكت يشيلو سبعة تنفار بس (الإنجزاب الأرضي) يسوي فيهو شنو ؟ يدور يبلعو تب ولساتكو يغتسن في الرملة لا نصهن يبقن زي (شنب علي مهدي) والمكنة تقعد تقند وتسوي (فكني يالإنجزاب) .. تقول لي خمسمية نفر في نصيبة وتطير فوق في السماء ... نحن هنا في واطاتنه دي أكان اللوري قطع جاز تخلي في محلو وتشيل جركانتك وتمش الطرمبة وتجي في أمانتي الله تواصل مشوارك .. أسي يا الأشتر أكان إنتو بقيتو في سماء الله ده والطيارة قامت قطعت (جاز) ونفرض ضرب مثل يعني (المساعد) ليل الطيارة شال جركانتو وطلع يجيب (الجاز) الطيارة دي بتنتظرو فوق لامن يجي ؟؟ عليك أمان الله تفرتقوا زي تيراب الخدرة .. بعدين يا الأشتر أخوي سماء الله ده واسع بالحيل ولا فيهو شوارع زلط ولا فيهو زول بوريك الدرب يعني يمكن تروحك في بلداً تاني ما تعرف ترجع منو .. الطيارات مو غشيمات خلاس ما بفرزن بلود الله الواسعة ديك .. وأتوكد من كلامي ده بقول الغنية ( الطيارة جات بي فوق جات تضرب الخرتوم ضربت حمار كلتوم ست اللبن) .. أها عليك الله الطيارة ما شافت (خرتوم الجن) كلها تضرب حمار كلتوم المسيكينة تبيعبو اللبن وتعيش وليداته الصغار .. ياخي ديل في سماء الله الواسعة دي يطاقشن .. تقول لي الطيارة كمان !! .. غايتو أنا ما بدور أطمم بطنك لكن كدي أوزنه في راسك المقودس ده ...
طبعاً في الوكت داك صلاح إنتهي من التكنلوجيا والتطور العلمي ده كلو في سطرين وطلعو كلو حبر على ورق في كلمة صغيرونة مغتضبة.. وقدر يطمم بطني لامن مرق السفره من نفسي .. وذكرني بحكاية (الإنجزاب الأرضي) الكنت ناسيهو من تالتة متوسطة .. وسرحت في الحوادث الليلت الطيارات .. والطيارة أكان قطعت جاز وتكون مافي طرمبة قريبة .. نقعد نطوطح في الجو !! .. ومن جهة تانية لمن أخت في بالي ( منيح .. وشو بدك .. وتؤبر ألبي ) والمسلسلات السورية ديك وبنيات الجوارح والكواسر نفسي تنفتح تب وروحي تتشحتف لمن أقعد أقابض في نفسي مقابضة .. وعرفت أن الله حق ودخول الجنة لازم بالصراط المستقيم ...
أها قبلت علي صلاح المسنوح وقلت له .. إنت أصلك زول شؤم زي يوم السبت كدي يا غراب البين .. إنت غير أخبار البكيات والنصايب قاعد تجيب شنو ؟ ما بتتفول بالخير أصلك .. إنت أكان قريت أولى ثانوي بس كان عرفت حاجة إسمها قوة الدفع وردة الفعل والناس وصلت لحدت وين .. إنت قايل خلق الله دي قفلت المدارس على تالتة متوسطة .. ولا خلاس إنته حددت القوانين يا (نيوتن) .. الناس طلعو القمر إنت تجي تقول لي (النعامة) و (الأندروبل) . (نعامة إن شاء الله تشيلك مترين من الواطة فوق وتخبت بيك الدلجة وفي رقدتك زاته يجي الأندروبل نفسو جاري بي نمرة أربعة يمسحبك الواطه وما تلقى علاج إلا في آخر الدنيا ... أها نشوفك بتمشي كيف ؟؟ ) . وقعدت بعد إنفشيت سمح فيهو أعدد لو في التطور الحاصل .. وقلتلو : بعدين إنت ما غلتان .. ترا على قدر فهمك .. إلا غلتان أنا وقليل فهم البشاورك في شيتن إنت لا بتعرفو ولا جربتو ... وبعدين الناس دي كلها طايره في الجو يومي .. بس تبقى على طيارتي .. تقطع جاز .. ولساتكه تبرطش وتطش من وجهته لي بلود تانيه وتحصلها مصايب الزمن ده كلو يا المسنوح ... أسي عليك الله يا صلاح أنا علي سفر تقوم تدخل فيني الخلع والزلع دي كلها وتطير رحمن قلبي من الطيران ... والله إنت أكان كنت قعدت مع الناس الإخترعو الطيارة دي كان طيرتها ليهم من رأسهم وقلبوها (مركب) ..
قام قال لي : أزول أنا كلامك ده قبلان بيهو بلا زعل لكن أسمع مني نصيحة أخيرة تقول قالها صلاح ود عمي...
في شنطة سفرك شيلك معاك (جركانة جاز) ... للضمان يعني !!!
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: قلقو)
|
قلقو ..
اسمك دا بذكرني الدفاع الشعبي ما عارف ليه ..
الاشتر دا زول روعة كدا بكتب في منتديات النيلين ..
اها جاري البحث عن اصله وفصله
وبجيب ليكم معلومات كاملة عنه ..
ودايرين ليهو تذكية .. عشان نسجله هنا
تسلم يا حبوب ..
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: قلقو)
|
يا حميدة ســـلام
يا خي أنا قايل حياة الأشتر إنتهت مع نهاية البوست أمس أتاريهو الأشتر لسه عمروا طويل
طيب كلمنا قول لينا للموضوع بقية علشان نخلي كمية ضحك لي حق اليوم دا غايتو الأشـتـر دا عايز إجننا عديل
يا شـبـاب حميدة قال ليكم عايز تزكية للراجل اللذيذ الطيب الأشتر
و بالمناسبة هو فعلا راجل جنتل و راجل الطيبة بادية في كل حرف بقولوا
و التعريف بيه و النبذه مع حميدة
و إنضمام الأشتر حا إكون فعلا إضافة كبيرة جـدا للبورد
تسلم يا حميدة و تسلموا كل المشاركين و المتاوقين و تسلم يا ......... الأشـتـر
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
حميدة
قلت الأشتر في منتدى النيلين
حاول إتصل بي منتدى النيلين وأعرف عنّو أكتر
مش عشان يجي وينضم لي المنبر , عشان حقّو الأدبي .
المنتديات السودانية بقت كتيرة في الشبكة وده المطلوب , بس لو قلنا نجيب منها ناس في روعة الأشتر معناتو حنعيد نفس مشكلة الهلال والمريخ مع الفرق التانية , ما يظهر لاعب في رابطة وإلا مشوا وجابوه وسجّلوه ,
خلّوهوا في النيلين , ومنتداهم قامة سامقة يشار ليها في النيت , أدعموا المنتدى وبقية المنتديات مادام إتفقنا إنها وسيلة تفريخ لي مبدعينا في زمن قل فيهو الإبداع
وليك شكري وتقديري
أبنوسي
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: tabaldy)
|
الاخ tabaldy
نعم كما ذكرت ..
وكان هناك اتصال بيننا ..
يشكرني علي انزال البوست ..
ويبدي رغبته في الانضمام الي البورد
وفي انتظار رد الاخ بكري
وعن مكوثه في النيلين او تسجيله في الهلال
فهذا شأن يعنيه بالدرجة الاولي ..
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
| Quote: فهذا شأن يعنيه بالدرجة الاولي .. |
ومالك يا حميدة أخوي نفسك قايم يا زول ؟
لو سجل هنا ما حينقص مني شي ولو سجّل حتى في مجرّة درب التبّانة ..
لك الشكر علي التوضيح
مع خالص إحترامي وتقديري لكل ما تكتب
أبنوسي
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
الاخ العزيز حـــــــميده
ينعم صبــاحك خير ..ويسعد مســـاك النور
لك التحيه وللأحبه في ملتقاك
شـكرًا علي الرد الانيق ..والرابط...وشـايفك لميت
في ..الرايع الاشــتر..بلغو السلام وعاطر التحايا..وجيب
لينا منو قصة ..حياتو ..من قولة تيت ..وان شاء الـلـه ليكم
الأجر..َاُجر..البسمه والضحكه..في زمن..الوجع الخرافي*..
وأنا ما بمشي ..قاعد ليكم هنا.
مع خالص الود وصادق الاخاء وعميق الاحترام.
.........اخوك..SHATAT
الوجع الخرافي احدث دواوين المبدع ..هاشمنا ..اهديك منو..ومضه
ثغرك
علي ورد الحزن
مطبوع وضاحك
ومنتشــي
يانكهه الزمن الرحل
يا بهجــة الزمن الوصل
يافرحــة
الزمن البجي
......................شكرًا على هذه المساحه ..السماحه
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: ABUHUSSEIN)
|
استاذنا بشري الفاضل ..
اسعدني مرورك هنا ..
بعد يأسنا من عودة كل ماهو جميل ..
أدركت يقيناً انك تتابعنا من خلف حجاب ..
صديقي بشة .. SOBAJO
عليك الله الاشتر دا لو كان معانا من زمان
ما كان تمينا الطقم ..
دا الكان ناقص والله ..
| |
|
|
|
|
|
|
|
|
|
Re: حياة .. زول أشــــــــــتر .. منقول (Re: humida)
|
المديــــح صفـــقة ورقـــيص !!
معزوم شراب مويات عن ود عماً لي في خرتوم الجن دي في رمضاناً حار بالحيل .. باقي هو جاء لخرتوم الجن دي من بدري وإشترالو حافلة حقت ركاب . وجنا ماشاء الله شويطنن يحوم الواطة كلها ما يطش من أهله . وبعد شربنا المويات وإنجمينا شوية
قالي : عندي مشواراً سمح خلاس وبتنبسط فوقهو دايرك تمش معاي
قلت له وين .. إن شاء الله ..
قالي : حلقة مديح من النوع أبو كديس .. جماعة مأجرين الحافلة
قلت له : بالحيل أرح .. (باقي مشتهي لي فتة والرز مدفق بفوقه واللحم مردوم كيمان كيمان)
طلعنا أنا والجنا المطموس ووقفنا عن حوشاً كبير كدي ومنضف ومزروع (سعدة) صغار كدي قالوا إسمها النجيلة) . وقلنا كدي ودخلنا ألاقى لك الحوش متروس لي خشمو بالبنوت الحلوات يفورن وينجلقن زي الزلابية في الصاج ووحات الله جنس حلاتن تب ما شفتها ونضافة مكملة (أظهن بيستحمن كل يوم) على الطلاق (جداد لنج) .. المهم أخوكم مقهي وفاتح خشمو باب قراش ومكنكش ذي الرسمة أعاين .. وقلت كدي وسالت ود عمي سعال :ـ
قلتلو : أجنا دي السيلما حقت الأفلام البنسمعبها .
قال لي : لا
قلتلو : أجنا يا هو ده الدش البقولوا عليه قال لي : برضو لا
نان أنا الشايفو قدامي ده شنو ؟ .. أعاين لي اللبس عجباً عجاب لابسين وما لابسين .. (الظاهر البلد ناقصة قماش وفي أزمة) .
جاء دور المديح وجوا جنيات كدي كلهم لابسين ذي بعض بيض ونضاف ونديانين ومرطبين (ذي البندورة في التلاجة) (أريتم جنيات البنات لي حدهن) أنا في خاطري قلت ديل أولاد الشيخ يكونوا وجايين يكرموا الضيفان ويجيبو الفتة .. مودي العاصمة مجيهة ومجهبزة . ومعاهم واحداً كدي شايلو نصيبة حقت المسيقا دي (ذي عناقريب السوق الشعبي كدي) .. بعد شوية الجنيات زاتهم بدوا يغنوا لا أقولكم بدوا يمدحو شيتن كدي بين بين .. وبعد دا عينك ما تشوف إلا النور البنيات (الجديدات لنج) قامن ينعركن ويرقصن شي بالرقبة وشي بالكتوف وشي بالوسط وشي (خلو في سركم مالكم ومالو) ... والوليدات (الحلوين النضاف) نزلوا من (المصطبة) وقعدوا يرقصوا مع البنوت .. وده كلوا في (ذكر المصطفى (ص)) وفي رمضان .. والله أنا روحي إتشحتفت بالحيل ونفسي إنخم والإنبهاطة كبرت تب والروح وصلت الحلقوم علا مسبت بالشال عشان ما تطلع .. علا الله غالب سكته .
ولمن إنتهت الحكاية وجينا نطلع وأخوكم لابس جلابية (لبنية) جابا لي (الصاوي ود الفكي) من الحج ومعاها مركوب قديم أصابعي الكبار كلهن بره والطاقية (الخدرة) في نص الراس في واحدة وحات الله عاينتله لي أسه عيني بترمش بلا عدد قالت لي : هاي والله (إستايل) ووحات خوتكم رجعت البلد (رمضان) صمتو تاني من الأول مع عوضية بت خالتي لأنها كانت (نفسه) في أيامه ديك .
ولمن رجعنا أنا وود عمي البيت سألتو
أجن أمقطوع الطاري : نحن كنا ووين في السماء ولا في الأرض دي ؟
قالي : كنا في (جامعة الأحفاد) وكان عندهم ليلة رمضانية بفرقة (آل البيت) .
| |
|
|
|
|
|
|
|
|
 Re: حياة .. زول أشــــــــــتر .. منقول (Re: humida)
|
السلام عليكم
دا شنو يا حميدة اغيب من البلد القي حقوقي طارت هاههاهها
الزول دا اكتشفتو انا اول ....لووووول
ونزلت ليهو في بوست امراة ملحاحة قصة الاشتر و قصة الريدة القديمة بس وحاتك زول اشتغل بيهو مافي
و البركة فيك ....اصلي انا بعيدة في زحل و من كان بزحل لا يحفل به ....
الاشتر العزيز الان اصبجت من اصحاب الملايين ...بس ملايين عيون تقرأ لك...
هيي اكان ماشي العمرة فاتحتي في الذمة القصة هنا ملخبطة و عاوزة فواتح...شد حيلك حبة..
حميدة ...الزول دا اسمو ايهاب ..وعنوانوا....
[email protected]
اها يا الاشتر تدفع كم في حقوق الشهرة ...انا وحميدة بتفق ...
و
في امان الله
| |
|
|
|
|
|
|
| |
humida
ABUHUSSEIN
حبيب نورة
ود حماد
قلقو
HOPEFUL
Bushra Elfadil
Sobajo
توما
بدرالدين شنا
salwa elsaeed
Muhib
فيس بوك
تويتر
انستقرام
يوتيوب
بنتيريست