يا بلد اسمعيني وهاك كل البيعه كامله اسمي هاشم .. امي آمنه ابويا ميت وكان خضرجي ومره صاحب قهوه في ركن الوزاره بيتنا طين مشرم ولما حال الطين يحنن نشقى شان يلقى الزباله خلي ألقاب الجرايد من ممثل ولا شاعر ولا كاتب ولا ناقد كلو زي يفط الدكاكين والمطاعم كلو زينه و ماهو شاهد تلقى مكتوب "ترزي احلام العرايس" وجوه فستان مرمي واحد أو "مطعم الجنه الفريده" وجوه قدرة فول وحله ومويه للعطشان في قله وزي كلام شاعر بقدر في بلدنا الحاله واحده المطار ياهو المحطه والكوميت يوم يبقى كارو والزمن بيروح أوانطه
يابــــــــــلد هاك ايديا ووحاتك انتي زادي وقصري والمال والكتابـــه منك إتعلمت أصبر وكيف أحس الم الغلابه واتحدى بيك تعب الطريق وشقا الزمان وكتين يضيق وإتملى بيك واحس بيك واغني ليك من الصغر حتى القبر واحلف عليك ترجف عروقي من المهابه
يــا بـــــــلد والله طول كل السفر جرحك معاي صاحي وحزين وبليون نجم.. بليون نجم في كل ليل اسمك يشع فيهن ويبين خاتيك في صدري النفس وتحت الجلد نص القلب جوه العروق حاضنك ثبات ما ظن يلين ارجف وكت تعكس عيون كل البنات زرقة سماك وانتز واطير لامن ريزم كل الغنا القاهو من طبلك وغناك والله لا بدلت جلدي قلعت شارتك في المراقص ولا شان رفضت وقلت لا لا رفعت راسي وقلت فارس ولسع بقــــــــول: ما بستريح لو ما يطل فجر الخلاص لو بالحروف ..لو بالهتاف لو بالسلام ..لو بالرصلص ما بستريح لو ما اموت ليك وعليك ولو ما اكون منك وليك معناي شنو؟ واصبح منو؟ معقول أسيبك يا بلد زي ما بتقول خدم الامير؟ معقول انا؟؟ ملعون ابو السفر السنه لو كان يقيف بينا ويحول اتحدى بيك كل المتاريس والكضب وحتى الافول وحبل الكضب زي ما بنقول دايما قصير لوحول يطول ويا الفي بلاط حاكم البلد عايشين خدم وسط حشم وشايلين ختم وتصنفوا او زيفوا او الفوا والحق بيجي قسما يمين والدنيا نار ويوم الحساب والدنيا نار ويوم الحساب غدر الخدم زيف الحشم ظلم الامير نحنا النقيف ونصنفوا بالفكر ما حقد الصغار نحنا الشقينا عشان بلدنا ونحنا يا دنيا الكبار يوم المجازر ما رجف رمش الشهيد وقدام عدد كل البنادق كانوا صادين بالنشيد
07-17-2004, 06:22 AM
osly2 osly2
تاريخ التسجيل: 10-17-2002
مجموع المشاركات: 3541
Quote: ملعون ابو السفر السنه لو كان يقيف بينا ويحول اتحدى بيك كل المتاريس والكضب وحتى الافول وحبل الكضب زي ما بنقول دايما قصير لوحول يطول
شكرا بيان لا اشك مطلقا ان دواخلك مترعة بالجمال .. هذه قناعة ذاتيه .. ولكن غالبا ما تحجب رغوة المشاكسات هذا الجمال الى متى نعايش وهج الهجير وظل النخله فى وقت واحد ؟ لك التحايا ولهاشم صديق اضعافها
07-17-2004, 06:27 AM
bayan bayan
تاريخ التسجيل: 06-13-2003
مجموع المشاركات: 15417
Quote: ملعون ابو السفر السنه لو كان يقيف بينا ويحول اتحدى بيك كل المتاريس والكضب وحتى الافول وحبل الكضب زي ما بنقول دايما قصير لوحول يطول
الاخ الكريم اوسلى
لدى اعتقاد كامل ان الشعر يستشرف المستقبل و يبشر به ومن الشعراء الانبياء استاذى هاشم هل تصدق ان هذه الابيات هى التى احبها اكثر واكثر ما يعجبنى فيها توظيفه لهذا المثل حبل الكضب قصير.. لان الزمن كفيل بكشف كل شئ وانا لا اشاكس من اجل المشاكسة وشكرا لك للطلة اللطيفة لاول مرة
07-17-2004, 06:46 AM
bayan bayan
تاريخ التسجيل: 06-13-2003
مجموع المشاركات: 15417
قرنتية 0000 لا دبابه برمائية لا جاسوسة مدسوسة لا غواصه روسيه 0 لاجندية فى " حركة " 0 لا مختلسه مال شركة 0 لاقصفت حدود " فشلا " 0 لاكسرت صريف كسلا 0 ولا معروفه " ختميه " 0
قرنتية 0000 لا صعلوكه لبست " شورت " لا بْتَعرف شنو " البظبورت " 0 لا محتاجه " جنسية " 0 هى قايله النيل سَقف بيتها وقايله ضفافو " محمية " جات منسابة عزّ الصيف قايله الناس بكرمو الضيف وقايله النيل أمان والقيف وقايله " الحاضْرة " (1)عصرية
قرنتيه 0000 جات بصغارا دايره الخير 0 لا شافت يفَط تحذير 0 لا نزحت تكوس توزير 0 لاجاطت حَرَكْة السير 0 لا دارت وسام تقدير 0 لا مستلفه عشرين وش ولا بْتَعرف تعيش بالغش 0 كان محتاجه بس للقش وجات أحلامها دوغريه 0
قرنتيه 0000 لا بلعت عديل السوق 0 لا نضمت بدون طايوق 0 لا كَنَزَت دهب أو ماس 0 لاظلمت بدون احساس 0 لاعصرت شباب الناس 0 لا كتمت على الانفاس 0 لا قطعت عشم بى فاس لا داستنا زنديه 0
قرنتيه 0000 لا دسّت سلع فى الخيش لاشربت مريسة العيش 0 لا ضبطوها فى التفتيش 0 لا سجنوها شالو " الفيش " 0 لا خانت قسم أو ديش 0 لا اجتمعت " بمستر جون " 0 لا أكلت مؤنة " العون " 0 لا سدّت علينا الكون 0 لاسبّت كتاب أو دين 0 لا سامتنا حُمرة عين 0 ولا باعتنا ضُهريه 0
قرنتية 0000 جات مشتاقه للخرطوم تزور احبابها خايفه اللوم 0 تصيح وتنادى بالحلقوم :- " جنينة النزهة " (2) وين يا زول ؟! - جنينة النزهة وين يا زول ؟! 000000 لقت حال الجنينة خَلاَ - حليل زمنها " وحليل أهلها " 0 لا قرنتيه لا أَصَله 0 لاصوت ككّو لا بَغلَه 0 لاحلوف لا أسداً مهاب بالخوف 0 لا نمراً يشد الشوف 0 لا ضُل فيل لا تيتل جريهو جميل 0 ولا غزلان ولا طاؤوس يباهى النيل 0 لا زفّة طيور ونعام 0 لا نمراً دفَر قدّام 0 كل الشُلة يا قرنتيه - غمضة عين – احالوهم لصالح عام تقول " الدنيا مهدية " 0
قرنتية 0000 جات زي ضيفه ماغاره 0 لا محتاجه لى " فيزا " ولا تصديق على زيارة 0 جات والشوق دموع حاره تجدد فى العيون الشوف بين " توتى " " وعلالى ابروف " قايله الدنيا لسه سلام ما خيّم زمان الخوف 0 لسه هناك ضفاف حُره ما " مطمورة " للمُرة 0 قايله الناس بعزّو الضيف 0 مابسوقوهو لى حُفره وجوار القيف 0 ما بياكلوهو فى " السُفرة " ومصيرو مخيف 0 قايله " الحاضْرة " ما غابه وقايله حقوقها محمية0
قرنتية 0000 لا قدَلَت فى شارْع القصر لا حامت فى وكت الحظر 0 لا خشّت على المامور 0 ولا نطّت سلك أو سور 0 لا دخلت على امدرمان ولا كسرت قفل دكان 0 لا دَفَرت على ( التلفاز ) لاعضّت كراع فنان 0 لا ذاعت بيان للناس لا احتلت كمان ( حيشان ) 0 ولا نصبت شبك للحش 0 جات بصغارا كايسه القش تلاقى القوت صبح محظور وخير " البقعه " جوه السور 0 سماحة الدنيا منسية 0
قرنتية 0000 لا بْتَعرف عجن أو لخ وجات أحلامها دوغريه 0 عجب 000 ساقوها جوه الفخ عجب 000 من طولها وقعت تخ عجب 000 سلخوها صبحية عجب 000 ونحنا " بنسلخ " الانسان كيف ما نغدر الحيوان عجب 000 والدنيا " عصرية " ؟!
قرنتية 0000 لا دبابه برمائية لا جاسوسه مدسوسه لاغواصة روسية لا جنديه فى " حركة " لا مختلسه مال شركة ولا حزبية بعثية 000000 قرنتية !!!
1) الحاضرة – العاصمة 2) جنينة النزهة – جنينة الحيوانات
07-17-2004, 06:51 AM
bayan bayan
تاريخ التسجيل: 06-13-2003
مجموع المشاركات: 15417
: كنت واقف فى الرصيف مصلوب تقول ساق الحراز مغروز على الزمن البضيع و فرحت بيك قايلك عيون اخر قطار جايينى من زمن الربيع و كتبت فى قمر الزفاف اتحدى بيك زمن الهموم و الاغتراب اتحدى بيك زمن المخاوف و الصقيع لكنى عميان فى الهوى و صحانى جرح الفرقة و الامل الصريع فى يوم صحيت لا حاسى بيك بابى المبشر بالطريق لا ماشى بيك تحت المطر همسك دفا و لمسك حريق مع السلامة لا مت من جمر الاماسى لا سبت ترنيم الحروف و سجدت لى ملح التباريح و المراثى لو غبت ما يتسقط شمش و الزمن قدامى مترمى و بمش لا بنتهى العالم و يقيف و لا يتبدا بى فقدك قيامة علمنى دمع الرحلة اقوى على الظروف و ارسم على الليل ابتسامة علمنى كل الضقتو تاريخ الكرامة كل التجارب للقلم اغلى الحروف بت الالم اعتى الرياح تضغى و تفوت و يرجع عماد الدنيا و تقوم البيوت حتى الحزن يزهر و يشيل و يفرد غصون الفرحة للناس اليتامى ارتاحى من شوقى و هواى ماتت مشاعر الالفة و انتحر الهوى و رجعت للزمن الجديد اقدامى ثابتات فى الارض و الجبهة بتبوس السما ارتاحى بيناتنا قام المستحيل و انتهى الامل الجميل انتهى الوهم الجميل
07-17-2004, 06:57 AM
bayan bayan
تاريخ التسجيل: 06-13-2003
مجموع المشاركات: 15417
صالح عام هديمك يا وليد مقدود وصابَحْنَا الفَقُر والجوع صبح جِلْد البطن مشدود 0 00000 شن بِنْسَو واخَيّك من شهر مرفود قالو " صالح عام " عشان قال العَوج فى العود 0 حَمُد يارب أخير من قول هديك البغلة فى " الابريق " كان ودوهو " بيت أشباح " وكان دقاهو زول " هلفوت "
هديمك يا وليد مقدود وصابَحْنَا الفَقُر والجوع صِبح باب التُكل مسدود 0 كِمل حتى الملح فى البيت وشِن هَمّ الملح فى البيت وكت ملح الدموع موجود ؟!
دحين يا وليد هو ديل مو قالوا ناس انجاز ؟!!! وشن سَوُلْنَا مما جونا غير حَرَقو الفَضَل بالجاز ؟ كُلْ شيتاً صِعِب فى السوق من الكبريته للطايوق 0 وكان جانا البَخَت تموين رطيل سُكر وصابونتين نجيب من وين ؟ واخوك مرفود وعدمان الشهر ملين ؟
أمس زازيت أكوس الدين مشيت " لسْميّة بت مامون "0 لقيت جابولها تلفزيون سمح بالحيل تشوف الصورة بى كم لون 0 وكت فى نشرة الاخبار ظهر " مَكّ " البلد يضحك جضومو كُبار ومزموم الكرش بزرار 0 ولا مهموم ولا مغموم ولا زعلان وشيهو يرارى بالألوان 000 وقَدْ فى حشايا تُباق نار طريت رَفْد الوليد والجوع وسال دمع الغبينة الحار 00000 أريتك يا ملك فَد يوم يخلى الجوع عينيك ما تنوم أريتك يا ملك فد يوم تحس بى غُصة المظلوم 0
دحين يا وليد هو ديل مالهم ومال الدين وكت قولهم كلام الله وفعالهم ما فِعال صالحين 0 كتير فيهم عديل حُقار وبالقرآن كمان تجار وكضابين 0 أكان بنزين عِدِم 00 أو جاز وتعبو الناس وضاقو خلاص صفوف واقفين يقولولك :- " ارادْة الله " وكان عِدْم الرخيص والغالى فى التموين يقولولك ده " غضب الله " وكان المويه صِبْحَت طين يقولولك :- ده من امريكا والعُمَلا حمونا " الشَب " ولاد الكلب عشان الشعب يِحْرِن تَب يِقَبّل من صراط الدين 0
دحين يا وليد هو ديل مالهم ومال الدين أكان كنزو الدهب والمال 0 بلايينهم تسوى جبال وعرباتهم تَخَطْف العين وبنيانُهم قصور فى قصور وحاة الله وكتاب الله أكان أدونا طوب فَد سور كان سوينا ألف أويضه لى مسكين 0
فترنا من الخُطَب ياوليد ومن طيش " العقيد " و"عميد " ومن قِل القِرِش فى الايد 0 ومن تعب الوقوف فى الصف 0 ومن غُبن الرَصِع بالكف ومن حُفَر الدروب واللّف ومن خَتّ الحلم فى الرف كُلْ يوماً نقيحنا يزيد 0
دحين يا وليد هو كم دَغَشاً عشان نلقاهو دافرنا وتعبنا شديد ؟ وكم حولاً صيامنا صَبَر عشان يشرق هلال العيد ؟! أح ح يا وليد لا حتى الخبيز انضاق ولا هِدْماً كسانا جديد 0
وشوف المغسه يا وليدى سَمّو شقانا " صالح عام " وكُلْ دمعاً نزل من عين وكُل جوعاً سكت بالدين وكُلْ زيناً محاهو الشين خَتُو وقيعتو فى الاسلام 0 حرامهم يا وليدى حلال وانحنا حلالنا كلو حرام يِقِلْبو الدين نَصُل سكين وناسين الحساب قِدّام 0
آخر زمن ياوليد نشوف كل البشاتن لون 0 يفوت " هولاكو " دوب نرتاح يِنُط فى الكرسى " نابليون " 0 00000 أريتك يا أمير حالى جعيص فى الكرسى فى الخرتوم وساويلك ألِف والى 0 نبايعك للظلم والجوع نبايعك وكلُ ضيم مشروع نبايعك وجيتنا جيش ودروع نبايعك والحُكُم مقلوع 0 نبايعك والقَسَم مخدوع 0 نبايعك فى سجن عالى 0
آخر زمن يا وليد حصيف العين يلاقى ويشوف 0 زمان ظُلم السَلَف بالسيف وحسه السيف " كلاشينكوف " غير زمن الهوان والجوع كمان طالع زمان الخوف 0
ديل ما بِرْتو لى انسان كم ولداً وقع نشفان وكم زهراً كِتِل واتْحَتّ فى " رمضان " لا شهراً حرام اتصان لا كفناً سَتَر صبيان لا شاهد قبُر معروف لا أمُاً بَرَد نارها سكت وارتاح نزيف الجوف 0 دحين يا وليد أكان حسع ده ديش " مُصعب " واكان بيرق " على الكرار " منو الكفار ؟!!! منو القاصدينو بالتكبير وبالتهليل وضرب النار ؟! 00000 أخاف نحنا واكان نحنا أخير نضحك كتير سبب الضحك مِحْنَه 0
شوف المغسه يا وليدى ديل ما حسه ناس حُقار ؟ ده زي دق الطبول للموت وزي وَقْد البلد بالنار 0 00000 الا نشوف أكان ساهرين معاك يا جوع واكان ضيقنا اتحفر فى ضلوع واكان صابرين على الفُجّار وحاة الله وكتاب الله وكت نَغْلى ونكوس التار لا سوراً بقيف فى وَش ولا لهب الغُبُن بتْرَش ولا صفاً يميل بالغَش كُلْ ظالماً يقع وينْدَشْ وسيل دمع البلد يِنْقَش 0 لا بحبس حَلِقْنَا الخوف ولا بْنَرجع أكان لعلع " كلاشينكوف " 0
هديمك يا وليد مقدود 0 وصابَحْنا الفَقُر والجوع صبح جِلد البطن مشدود شن بِنْسَو واخيّك من شهر مرفود قالو " صالح عام " عشان قال العوج فى العود 0 00000 نان ما يقول 0 أريت ان قال عديل يا زول :- " هديك البغلة فى الابريق " ما هامينا " صالح عام " وديش " مُصْعَب " ولا " الحجّاج " ولا بِكْتُل قَلِبْنَا الجوع وموت " مَنْقَدْنا " ولاّ " الصاج "
خَلّى الضيق يزيد يا وليد بُكره الضيق بخلىّ الناس بتبقى عُصَار على الحقّار وتبقى حريق 00000 قريب يا وليد صيامنا يِتِم ويهل ويِشْرِق هلال العيد نحس طعم الخبيز ينضاق ويتبدّل هِدِمنا جديد
07-17-2004, 07:10 AM
Ahmed Al Bashir Ahmed Al Bashir
تاريخ التسجيل: 03-09-2004
مجموع المشاركات: 505
استاذه بيان شكرا كتير على هذا الاتحاف من هاشم صديق شاعر كل الفصول و الامكنه يا ريت لو عندك قصيدته فى رثاء و الدته او شوية ابيات من الفين سلام و بالفعل انت مسكونه بالجمال طيب ليه بتتشاكلى؟!!!! معليش. اعتبريها دعابه و شكرا كتير
07-17-2004, 05:18 PM
bayan bayan
تاريخ التسجيل: 06-13-2003
مجموع المشاركات: 15417
شكرا على الكلام الجميل.. اما عن الشكل مكرهة اختك ما بطلة..
وهذا جزء من القصيدة المطلوبة
اتراح الحول الاول
من برد الليل متغطي بتوبك أتنفس وهجك والقلب اتدفا
أتذكر سفرك ونفس الكون الجانا مكفن ونام فى محفة اتذكر شهقة باب البيت وجناح الصاقعة الحوم ورف اتذكر يمة صراخ الليل والدمع السيل والبرش الفيك ارتاح واتلف من سفرك مر الحول الاول والزمن الاسود دور ولف لا جرحك نام ولا صوتك صام ولا وجعك خف يا محفورة فى قلب الخاطر يا مرسومة فى بطن الكفة الزمن اتساقط ورقو الاخضر اصبح اصفر العالم جف استنيتك متل العاشق موج وشوق فى صدرى جداول وقلبى تشقشق فوق اغصانو طيور الجنة تومين فى الشوق يايمة انحنا بالحول تستنى وبالحول استنا
ممافتى حفيف اقدامك حلم الشارع ووتر الباب لى نقرك حن آه يا يمة مما فتى الزمن اتغير الشعر احير العالم صن
يا مليانة بشاشة ولون يا حنية يا الاديتى خطانا عيون يالعلمتى القلم اتحدى يالساندانا فى وكت الشدة يا الاحساسك نور و ادى يا انفاس الزمن العد احبك موج الشوق فى سدرى جداول وقلبى تشقشق فوق اغصانو طيور الجنة احبك وما فى حبيبة احن يا مفقودة يل موجودة يا بت جنة
من برد الليل متغطى بتوبك وحيد زى نجمة مدارها غيوم جبينى مولع وعينى تدمع معبور بالحمى اناجى النوم العبرة تخلى همومى مساهرة الوحدة تفتح عين الذاكرة اناغمك يمة تجينى مسافرة القاك محلقة فوق عينى ايديك مفرودة ونازلة على بشويش كيفك فى جبينى اتختن العرق اتفصد الجسم اتعطن
تسيل يا موج دموع في خاطري من غبرة اسامر كاسر الامواج واتب من فكرة لي فكرة أيا موج البحر أشهد مساسق عمري في المغسة نفس تعب الغُُُبن قايم من انبارح ولي هسه واحس في ايدي باقي حريق ألاقي صوابعي في الجمره ولسع شاقي ظلم الريح ولسع داجي في اللجة وما وشوش فنار لشراع ولا اتنفس صباح بكره
ايا موج البحر بالذات أيا موج البحر تحديد جدعت شباكي شأن أقبض وميض كم دره في المحار صبرت صبرت حبست نفس الشوق عشان أحصد شقى المشوار ظهر في شبكي قرش الموت إتمرعف على الحوت إنفخر البرق أمطار اتجاسر على الريح واتحاصرت بالاخطار
وفي عرض البحر والموت عزفت من الهلع مسدار سبح في الجو رفيف الصوت وإنهدج صدى الفيثار رجع بال البحر ساكن وأتمكث هوى المحار
بقيت أورفي في وش الموت بكااااااااايا ضحك عناااااااايا هسيس أبارز بالنغم أشبااااااح وأكاتل بالشعر أبليس
فترت من السبق للتاااااااار ومن مرجحية الاشرار ومن حسكنة الاسرار ومن سبق الخيال للتاااار فترت من الطعن والظن ومن نحر الجميل بالمن ومن رجية غرام وأنيس أيا موج البحر أشهد نغس تعب غبن العمر قايم ولسع ماوصلت الميس
عشان قال الأمل حفرة رسمت هواي بالشفرة عشان آمن عدا الحفرا طلبت جواز سفر تمديييييد ختمو جروحي للتجديد لقيت تأشيرة للمرة ورماد حازمنو في صره أيا قابض هوى السكين وياغبيان وياصحيان ويافالح ويا مسكين أخير سفرك يخيب مره أكان تبقى الجروج حرة أخير تختار تكون محتار بدل تهبط حلم واطي أخير تغرق في شبق الموج بدل تلمس وهم شاطي أخير تنجم في نار الهم بدل تحلم حلم واهي أخير تصبح عديل خاتي أخير تصرخ في وش الجن بدل تتعد متواطي بدل تتعد متواطي
Quote: يا مليانة بشاشة ولون يا حنية يا الاديتى خطانا عيون يالعلمتى القلم اتحدى يالساندانا فى وكت الشدة يا الاحساسك نور و ادى يا انفاس الزمن العد احبك موج الشوق فى سدرى جداول وقلبى تشقشق فوق اغصانو طيور الجنة احبك وما فى حبيبة احن
شكرا بيان على هذا الجمال الذى اشبعت به دواخلنا احمد البشير كنت واثق ان وراء ما طلبته شحنات دفاقه من الروعه تحياتى لك ولكل اهل امبكول
07-18-2004, 05:24 AM
Ahmed Al Bashir Ahmed Al Bashir
تاريخ التسجيل: 03-09-2004
مجموع المشاركات: 505
اهالى امبكول المتواجدين بعطبره اكثر من المتواجدين بامبكول ست الاسم انه الهدام والزحف الصحراوى . وقد اضحت جنان تلك المناطق سعير يهرب من ناره السكان . ولكن الا ترى فى بحث اليكس هيلى عن جذوره ما يشحذ همتك لزيارة امبكول ؟ عن الهدام والزحف الصحراوى كتب احمد امين بوست من اجمل البوستات اتمنى ان تتطلع عليه بيان معذره فى استغلال مساحة العام فى الخاص وقبل ان تلومينا لومى معنا ايقاف المسنجر لك النحايا فى ثالث مداخله لطيفه كن لطيفا ترى ...........
07-18-2004, 06:50 AM
bayan bayan
تاريخ التسجيل: 06-13-2003
مجموع المشاركات: 15417
منو المن عطبرة ومنو المن امبكول يا اوسلى هل انت اسمك وصلى ام انك من اوسلى القرية الجنب الباسا ديك؟ غايتو كان كدى عاد أماااااااااااااانة مااتلومت فى بت عمك...
07-18-2004, 10:03 AM
osly2 osly2
تاريخ التسجيل: 10-17-2002
مجموع المشاركات: 3541
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
bayan
osly2
Ahmed Al Bashir
WaD OmI
فيس بوك
تويتر
انستقرام
يوتيوب
بنتيريست