دعواتكم لزميلنا المفكر د.الباقر العفيف بالشفاء العاجل
|
|
 دعوة لفرتكة الأسبوع اللاثقافي الكيزاني ببريطانيا
|
بينما بلادنا تخوض في الدم ومئات الأبرياء من سكان عاصمتها تحت الأسر والذُّل وقهر الأمن، ومفتشين عن مشتبه بهم بأدلّة الأو نقتيف والأو بوستيف، يجد المنتحل لدور وزير ثقافة هامل، وفي زمن أكثر هملة، أمين حسن عمر، يجد الجرأة والبجاحة ليحاضر تحت عنوان (الثقافة السودانية...): هو فضّلتو فيها ثقافة؟ وكمان شنو و(البناء الوطني) يا سلالالام البناء الوطني! أو تركتم فيه طوبةً لم تدسوا تحتها عقرباً أو زاحفاً مسموماً! وقال إيه كمان و(تحديات العولمة). تحديات العولمة يا اللللله، خليكم منّها كدي شوفوا تحدّيات دارفور دي المن دمّنا وبلدنا وما ها عالم تاني!
دعوة لكل المثقفين الحقيقيين والشرفاء من أبناء بلدنا ببريطانيا لتنظيم تظاهرة صاخبة أمام هذا المسخ السخيف ومن يشايعه من بعاعيت ومسوخ، اعتراضاً وشجباً لما يحدث في الخرطوم الآن.
أوقّع على القيام بعمل مضاد لهذه المهزلة التي تتكلم عن (البناء الوطني) بينما إخوتنا من دارفور يسحلون وينكّل بهم مبتورين عن بلادهم ومدغمين في تشاد!
أنا هنا أوقّع:
محسن خالد
|
|
 
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
نص الدعوة بالعربي اسفل النص الا نجليزي LAST REMINDER
وتضم اسماء المشاركين والفنانين
Sudanese National Council in UK and Ireland
( Invitation )
The Sudanese Culture Week in Britain
We are pleased to announce that we are organising
this spectacular event at the end of May 2008.
We would be honoured if you attend and participate.
You are all welcome and kindly inform all friends.
Admission is Free for all the following events .
We are proud to reveal that around 40 singers,
musicians, dancers, intellectuals etc are being flown
from Khartoum to London specially for this Week.
1- Inauguration of the Week
Wednesday 28 May 2008 from 6:00 to 10:00pm
venue :
Brunie Gallery - SOAS - Russell Square - London
Seminar entitled
Sudanese Culture,Nation Building and Globalisation Challenges
Intellectuals representing various colours of the
Sudanese cultural spectrum are to take part.
Exhibitions reflecting Sudanese art and heritage.
Participants include
* (Minister of Culture) Amin Hassan Omer
*Tigani Haj Musa ( poet )
* Prof Sobhi Fanous ( analyst-critic )
* Mustafa Abul Azaim ( journalist - critic)
2- First Sudanese Concert and folkloric dances
with a galaxy of prominent Sudanese artists &
exhibitions reflecting Sudanese art and heritage.
Friday 30 May 2008 From 6:00 to 10:00 pm
venue : Friends House, 173 Euston Road
London NW1 2BJ
Concert with the participation of
* Ali Ibrahim Al Lahow ( top veteran singer)
* Siddig Ahmed ( top popular-Shaigi singer )
* Folkloric dance group ( 9 members )
Leader: Zainab Abdallah
* Accompanied by 8 musicians - various playing Sudanese instruments
3- Second Concert and folkloric dances
with the same galaxy of prominent Sudanese artists & exhibitions reflecting Sudanese art and heritage.
Saturday 31 May 2008 From 6:00 to 10:00 pm
venue : Friends House, 173 Euston Road
London NW1 2BJ
Sunday June 1st. BIRMINGAM & CARDIFF
For more info: Dr. Ahmed Eldawi 07766338733
email: [email protected]
بسم الله الرحمن الرحيم
المجلس القومي السوداني بالمملكة المتحدة وايرلندا
== الاسبوع الثقافى السوداني ببريطانيا ==
(( دعوة ))
يسرنا ان نفيدكم ان المجلس القومي السوداني بالمملكة
المتحدة وايرلندا سينظم الاسبوع الثقافى السوداني ببريطانيا
اواخر مايو 2008 على النحو التالي ونرجو حضوركم
ومشاركتكم انتم واسركم واصدقائكم كما نرجو تعميم
هذه الدعوة لجميع معارفكم وشكرا...
افتتاح الاسبوع يوم الاربعاء 28 مايو الساعة السادسة
مساء المكان - قاعة بروناي غالري - كلية الدراسات
الشرقية والافريقية جامعة لندن -Brunie Gallery
SOAS - Russel Square- London
ثم تبدأ الندوة الافتتاحية ويشارك فيها المفكرون والمثقفون
السودانيون وهى بعنوان :
الثقافة السودانية والبناء الوطنى وتحديات العولمة
ويشارك فيها كل من
وزير الثقافة امين حسن عمر
الشاعر الغنائي التجاني حاج موسى
البروفسور صبحى فانوس
الصحافي مصطفى ابو العزائم
وهناك معارض فنية متنوعة للتراث والفنون باشراف ربيعة سليمان البخارى
تنبية - قاعة بروناي لا تسمح باصطحاب الاطفال
- الجمعة 30 مايو 2008
الحفل الغنائي الموسيقي الراقص الاول
من الساعة 6 الى 10 مساء الجمعة
قاعة فرندس هاوس Friends House-
173 Euston Road London NW1 2BJ
يشارك في اقامة الحفلين يومي الجمعة والسبت كل من
الفنان المخضرم علي ابراهيم اللحو
الفنان الشعبي الكبير صديق احمد
ويصاحبهم ثمانية عازفين وموسيقيين
الى جانب فرقة الفنون الشعبية السودانية وتضم عشرة راقص وراقصة
بقيادة زينب عبدالله
وهناك معارض فنية متنوعة للتراث والفنون
الدعوة عامة والدخول بالمجان
الحفل الغنائي الموسيقي الراقص الثاني
السبت 31 مايو - نفس القاعة - فرندس هاوس
من الساعة 6 الى 10 مساء
وهناك معارض فنية متنوعة للتراث والفنون
الدعوة عامة والدخول بالمجان
الاحد اول يونيو
بيرمنجهام وكارديف
نرجو حضوركم كما نامل ان يحوز ذلك رضاكم والله الموفق
د. احمد الضوى - امين عام المجلس
هاتف 07766338733
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
أوقع:
خالد الطيب أحمد
ــــــــــــــــــــــــــــــــــــــ
يا أ. محسن :
كنت في زيارة لمكتبة (ألفريد نوبل) قبل فترة
وبينما أنا في جهة القصص والروايات فإذا
أنت هناك بين الرفوف (وكلب السجان)..كانت لحظة سعيدة جدا
فلك التحية وأنت تحجز مكانا لنا في هذه المكتبة العتيقة..
مع العلم أن روايتك و(موسم الهجرة إلي الشمال) هي الروايات
السودانية الوحيدة بالمكتبة.:هذا هو ما كتب عنها في الصفحة الأولي:
وعقبال ما ترفع رأسنا بجائزة نوبل نفسها..وما بعيدة..
تقبل تحياتي
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: خالد الطيب أحمد)
|
يا أنور كينغ
يا زول أريتك طيّب
نعمل ليه دعاية ساكت؟ وبالمزيكا واللافتات كمان
وبالهتاف، لامن ينسبط من دعايتنا والخواجات ذاتهم ينبسطوا
ومشتاقين كتير
يا خضر الطيب مشكور على المكالمة وعلى غيرتك
وزي ما وريتك يعميني في بوستك دا، الأيام دي بدخل النت هبشة هبشة
وكلّو تعاون زي ما نضمنا
خالد الطيب
وينك يا زول جميل
مشكور ياخي على المحبّة
وعلى تنبيهي
اللغة دي غلبتني ضمّة
أبق طيبّ ودائماً هميم
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
Quote: يا خضر الطيب مشكور على المكالمة وعلى غيرتك
وزي ما وريتك يعميني في بوستك دا، الأيام دي بدخل النت هبشة هبشة
وكلّو تعاون زي ما نضمنا |
تسلم يا اديب من العمى وكان انت عميت ذي ناس امين ديل يكونوا شنو؟
ومذيد من العمل لاجل تنقية الهواء الثقافي , وكنس الناس الجابم الهوا
نضمك سمح بالحيل يامحسن ربنا يديك العافيه
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: خضر الطيب)
|
| Quote: الاسبوع الثقافى السوداني ببريطانيا |
محسن كيف حالك....
هذه محاولة أخرى تضاف لسلسلة طويلة من المحاولات (الفاشلة) التي بدأت منذ مطلع التسعينات لتبييض كثير من الأوجه القبيحة وكسر الحاجز الفولاذي (بينهم) والجالية السودانية ببريطانيا. ولكن الملاحظ (انهم) هذه المرة خصصوا لها ميزانية هائلة: ايجار قاعة فريندزهاوس في قلب لندن + مجموعة مطربين (من السودان) + مجموعة فنون شعبية + مجموعة متحدثين + etc.... وكمان الدخول (مجانا)...ووين؟ في قاعة فرندزهاوس في قلب لندن!!
إطمئن، المسألة لا تعدو أن تكون محاولة فاشلة بالتأكيد تضاف الى سلسلة محاولات أخرى فاشلة، أيضا، ستنتهي بالتأكيد الى ما انتهت اليه محاولات كثيرة قبلها حاولت فيها سفارة الجبهة هنا التقرب بشتى الطرق، حتى تقديم العزاء (نفاقاًً) في مآتم السوادنيين في لندن.
لك الود،
ع ع
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: الجيلى أحمد)
|
الاخ محسن خالص تحياتى.... تجدنى اختلف فى ما ذهبت اليه .... فالعنوان فى حد ذاته ( دعوة لفرتكة الاسبوع اللاثقافى الكيزانى ببريطانيا) عنوان غير موفق فيجب ان نزهب لهم ونقارعهم بالحجج بل ويمننا ان نحمل اللافتات ولكن ان نلجأ لفرتكة هذا اليوم فقد يأخذ مننا اكثر من ان يضيف... يجب ان نمهد كل الطرق التى تؤدى لاشاعة ثقافة حرية الآخر واشاعة الديمقراطية وتعدد المنابر... وبالرقم من انهم انقضو على الديمقراطية ومزقوا البلد لكيانات عرقية وجهوية ولكن يجب أن يكون لهم صوتهم من خلال نافزة الديمقراطية التى يجب ان تستوعب الجميع.
حالص معزتى
سيف
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: Deng)
|
| Quote: وزير الثقافة امين حسن عمر |
سلامات يامحسن
الغريبة فى الشغلة دي ان يروج ممسوخ ومتعجرف للثقافة فى بلادنا
خبرناه سنوات الدراسة بمصر حين كان يأتي الينا ضمن وفد حكومي للترويج لبضاعتهم الفاسدة
لايقوى على الثبات امام الحقيقة ... يهاتر ويشاتر من يخالفونه فى الرأي
بئس الثقافة التي يروج لها امثال هذا الممسوخ
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: Bashasha)
|
لقد تمت محاولة مشابهة مشبوهه هنا في امريكا نييورك باسم يوم
السودان الاان الفرق ان احتفالكم في لندن اكثر جراة قلتا لي امين حسن عمر عديل...
شوف المشاركين من الانتهازية..
1/ د.صبحي فانوس /قبطي /كوز /اكاديمي رخيص
2/تجاني حاج موسي /احقر من يذكر
3/مصطفي ابوالعزائم/قلم ماجور من زمن نميري
ياناس لندن فتحوا عينكم وارصدوا كل تحركاتهم...
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: wesamm)
|
تحياتي أوفاها وأجلّها للإخوة والأخت صباح حسين
شكري وتحياتي للأخ السنوسي بدر
ويا عادل علي (أبقى جاهز)
وسلامي يا الجيلي أحمد
الأخ سيف الدين جبريل
تحياتي يا عزيز وشكراً على مشاركتك هذه
بالطبع الفرتكة التي أقصدها والتي أوضحتها أعلاه بالتظاهرة الصاخبة واللافتات والهتاف كمان، يعني الفرتكة بتاعة السودان ديك الفيها الكُرسي بطير من وراء وبركب في رأس المنصّة (عشان يكسّر رأس أمين حسن عمر) يا ريتها ممكنة، للأسف الشديد غير ممكنة، وكما قال الشاعر تماماً:
كان مو حُكم اللنجليز واليد ملوية
باخد تاري وأرجع ليك يا بنيّة
هنا سنعتمد على المُظاهرة التي يحميها البوليس (تتخيّل؟)، ما دا ياهو الحال الدايرنو لبلدنا! إذاً سأعمل وأتصل على أن أجمّع من الناس والراغبين في (الاحتجاج المدني) أعداداً تكفي لاستصدار تصريح بذلك، وأيضاً إن نجحت في كتابة لافتات وتظبيطها في الوقت المناسب فذلك المُبتغى والمؤمّل فيه، وإلا فلا مفر من الذهاب ومن إقامة ركن كارب بوسط ندوتهم، وهنا ستقع تحت رحمتهم التي ربما لا تمنحك فرصة للمشاركة. فهمتني؟ في ناس كُتااار و-كُباار- من السفارة بعرفوا شكلي كويس، أو بالأحرى بعرفوا أي زول ما زولهم. ويسمّوا كان يدهو فرصة نقاش، لاحدي الآن لا يبدو هناك راغبين في المشاركة، وأريتني أنا وصاحبي عادل علي نمرق بفش مغصة كاربة وما يبقى رأسمالنا سماع صديق أحمد، لو قابلتُ صدّيق سأتحدث معه كي يعتذر فيا ليتُه ينصت، علي إبراهيم دا زول حنبرة ساي، وهذه النقطة ألهمني لها تاريخ المُغني راي شارلس عندما تحدّث معه أحد الناشطين كي لا يغني على مسرح جورجيا ليسمعه البيض وحدهم بينما هم معزولون عن المشاركة بالخارج لأنهم سود، عمنا راي شارلس وافق واتضرر من هذه المسألة ضرراً بليغاً، ولكن بعد مرور السنوات عاد وغنى في جورجيا داخلاً إليها كالفاتحين، إلا جماعتي ديل خايف تصدُق فيهم مقولات صاحبي بشاشا حول الجلابة وما أدراك، الفنّان السوداني بدّعي البلاهة وهو ما أبله، فقط عشان يستفيد، المهم، بنشوف. كما أنني أنوي بالتحديد ملاقاة هذا التيجاني حاج موسى الذي لا يألو جهداً في دعم هذه العصابة، ولا يجد سانحة إلا وتملّص من الكيزان ومن انتمائه لهم، واحد في اللتنين: يا هو يسف بالدرب العديل ويبطّل نياصة، يا يبقى زيو وزي أخوانو التانين البكوسوا حق المواصلات ما يلقوهو ودربن في وش الناس ديل دُغري وعديل.
أبقى طيّب، وسامحني على الطربقة، لكن بصراحة يا سيف الرأفة الكثيرة، ومناغمة التحضّر في التعامل مع هؤلاء الحوش بقت تضايقني ضيق مبالغ فيه، يا أخوانا الديموقراطية دي لو مافي قوة بتحميها ما تحلموا بإنو العسكر ديل يخلوكم تستمتعوا بيها ذات يوم، ولو مافي قوة تجيبها راجعة منهم حالياً ما تحلموا بإنو العسكر ديل يجوا من دغش الرحمن يدقوا ليكم الباب ويقولوا ليكم: شكراً يا أولاد فلان، أنحن حمارتكم دي جبنا بيها الموية من الدونكي وقضينا غرضنا خلاص، دحين سوقوها وبارك الله فيكم وكتّر خيركم ومشكورين!
وألا كيف!؟
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
شكراً يا عزيزي دينق ولك التحيّات النواضر، المشكلة زول واحد داير يشارك مافي، تلفوني ما وقف، والمشغول مشغول، والعمل الحركة دي لامن فتر وما جابت حقّها برضو موجود، مع إنّي مؤمن جداً بعبارة الجيش (طابور القلق)، هسّع طابور القلق العملوا ليهم د. خليل دا والله يزعزعن لعشر سنين جاية
كن بألف خير ولك الود والمحبّة
يا حيدر ياخي الزول دا أنا والله كجنتني فيه ما عندها حد، زول لزج وجاهل، وعامل فيها بفهم، والبوست دا ما فتحتو إلا إثر عبارة (البناء الوطني) دي، مغصتها شقتني كر. شوف عليك الله قوة العين دي، البلد كلّها إعلامها مدوّر عنصرية على عينك يا تاجر، وأمنيها وبوليسها برضو، ويقولوا البناء الوطني والرتق وما أدراك، حكاية عجيبة، وبجاحة لا تنتهي.
يا بشاشا يا فردة وينك وأريتك طيّب
يا ليت والله الجنيات والبنيات كلّنا نتلم، غايتو أمس أنا وخضر دا اتكلمنا وجلدنا مارقنو وبنعزم غيرنا، دا أبسط الإيمان، الناس في الخرطوم اتغبّرت بالدم وأنحنا الواحد غالبو مجرّد يحشر أصابعو في خشمو ويفك صُفّارة طويلة ويعقبها بعبارة اسكت يا كوز كلب ولزج! شت أب يا أمين يا منتحل لدور وزير!!
وكن بخير يا عزيزي
وسام إزيك وماك طيّب
كويس إنّك عرَّفت لي فانوس دا، لأنو غلبني أعرفو ضُمّة
وكن بخير
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
| Quote: اعتراضاً وشجباً لما يحدث في الخرطوم الآن. |
ودا بيت القصيد.
عليك بناس:
- عبد اللطيف إسماعيل
- محمد عثمان عبد الحميد
- سيف الحلفاوي
- طارق مكاوي
- الرابطة النوبية (أستاذ عبد السلام فضل المحامي، د. محمد عثمان، إدريس نوري، ثروت)
يا محسن أقترح ترتيب لقاء مع المستشار خالد فتح الرحمن، إذا كان متواجداً بسفارة لندن، لبحث مثل هذه الفعاليات وتوقيتها. ( المُـلاحظ أنها فعالية ذات اتجاه ثـقافي واحد رغم حشر إسم أحد الأقباط فيها).
خالد مستمع جيد وكاتب مجيد ومنفتح. عن طريق خالد يمكن إحداث تغيير في سفارة المؤتمر الوطني بلندن وفرعها (المجلس القومي السوداني بالمملكة المتحدة وايرلندا).
وتحياتي يا محسن الله.
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: إسماعيل التاج)
|
أها ضحكت ليك على بياض، لأني ما عارف قصّة الكاميرا دي شنو، إن شاء الله غنيت وانبسطت!؟
يا ملاسي
هَيْ الطقّيع بالحجار ساكت إنت ما دايرو ليهم (محاسيبك) ديل!؟
ياخي في عاصمتكم الخرطوم الحرامي البسرق (عجلة) ساكت، بطقّعوهو بأربيجي!
والعُهدة على الشباب الذين رووا القصة، والحقوق محفوظة لهم.
فما بالك باليسرق بلد بحالها؟ يسبي نساءها ويكتل رجالها؟
والله دا لو طقّّعناهو بالشاتو بيهو هيروشيما ذاتو بطنا ما بتبرد.
أقعد إنت باري لي صلاح ود البادية كشيّال وراهو، يغني:
عشان أولادنا تتعلّم
إنت شيل ليهو: لمايو قلنا نعم
وتدور الدنيا ويجي ود البادية ذااتو يغني:
عشان أولادنا تتنظم
أنفزر إنت وشيل وراهو –تاااني- للدكتاتور والمصلحجية قلنا نعم
امشِ من هنا يا عجيب وأخجلك خجلة
--------------------------------------
العزيز والزميل خالد العبيد
تحياتي ولك خالص المودّات
وكن بألف خير
---------------------------
يا مولانا سماعين، ياخي غاية الأشواق وكيف أحوالك؟
ياهو دا فعلاً بيت القصيد، الخلّى ملاسي يزورنا بعد غيبة
ناسك الذكرتهم بالخير ديل أنا ما بعرف منهم ولا زول واحد، لو بقروا هسّع في الكلام دا نتلاقى هناك،
محل الطقّيع الحارق رز ملاسي "دا"
خالد فتح الرحمن أعرفه ككاتب جيداً، صاحب (وا معتصماه)
اتصل علي مرّة وأنا في الإمارات ولا يجوز لي ذكر ما تم بيننا من نقاش،
ولكن للأسف لم يقل لي بأنّه يشتغل بالسفارة،
الكلام دا –يخيّل لي- عرفتو بعد ما جيت هنا، لو ما خانتني الذاكرة، والله أعلم.
سطرك الأخير بتاع تغيير السفارة عبر خالد، والاجتماع به دا جادي فيهو إنت!؟
خالد يقنعهم بالديموقراطية يعني وألا يسوي ليهم شنو!؟
بالغت والله يا مولانا، خالد كان فيهو خير اليمرق هو من هذا الوكر ويبقى فنّان مشهلت زيي كدا،
وزينا كُتاااار، لا حد ولا عد، شفت كيف!؟
وكن بألف خير وورينا أخبارك
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
وين يا محسن خالد؟؟ يا خوي؟؟
مشتاقين
والله يا محسن أنا مع عادل علي
الكيزان ليست لهم بضاعة لا فاسدة لا جيدة بل لهم مصالح يدوسون الأخضر واليابس في سبيل الوصول أليها
وعندهم سلطة مساعدين للسير عرايا كما فرعون للحصول عليها
إذن إبتعاثهم لأمين حسن عمر ليخدع الرأي العم العالمي وسودانيي المهاجر للحصول على مساحة جديدة يستجمع فيها نظام الخرطوم أنفاسه ينثر الرماد في العيون ليعمي الأبصار عن مجازر أبيي ودارفور والموت الصامت لمواطني الشرق
هو حقيقة معنى هذا الأسبوع
لكن فرتقته كيف؟؟
يا محسن يجب أن يعرى هذا النظام ويفضح بجمع المعلومات ونشرها تنظيم المناظرات التسلح بالوثائق
يجب أن يذهب هذا القبح إلى حيث ينتمي فشعبنا وثقافاتنا منه براء.
طيب سؤال خارج النص الداير يشوفك يلغي أبو ظبي ويقطع لندن؟؟
ما عرفت إنك في لندن إلا أمس من ماهيتاب.
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
يا اخونا
يا زول فرتقوا قدر ما تقدروا
بس حقو تشرحو للناس قاصدين شنو بالفرتقة لانو البتجى في الراس طوالى صورة فرتيق الحفلات كراسي طايرة و عكاكيز و دموم و سكاليب (دى زاتا ما كعبة لكن محلها ما لندن)
اها اريتك تكون ركيت على راى ، لميت في ام "مهاد" و لا اسمها شنو مصيبتكم الشنداوية بتاعت الجياهة ديك
تميت احداثيات الانسان قبل يومين، راسي سخن جدا .. حاكتب ليك عنها ـ قبل القرايات اللاحقة .
سلم على اصحابنا ديلك
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
| Quote: الثقافة السودانية والبناء الوطنى وتحديات العولمة |
أديبنا الكبير سلامات وعلك طيب ..
صدق المثل هم يضحك وهم يبكي ..
هذه عادة النظام دائماً فمع كل نأئبة تحل بالسودان ليس لهم معه بال بل تجدهم ينصرفون عنها بفارغ أفرغ من فؤاد أم موسى فبينما الوطن يتشقق منذ وصولهم تجدهم يتلاهوون بأموال ومصائب الشعب ولا حتى إحتمال هم المسئولية يغشاهم ومملوئين بإحساس أبرد من صقيع سيبيريا ..
المهم صوتنا معكم ومع الحق اينما كان ...
خالص الود ...
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: مجاهد عبدالله)
|
Quote: دي ما بضحكولا على بياض يا الفالح .. دي ببكلولا* على بياض!!
ملاسي |
تقول والله!؟ ليشنو ببكولا على بياض، قضية دارفور أصلها هي!؟
كدي عليك الله أرمي ليك دمعة علي دارفور دي وبندفع ليك.
-----------------
ببكـ(ل)ـولا.. يا عجوز، وكلها المداخلة ربع سطر!؟ الله يخيبك.
بتتلبش لامن تدخل بوستاتي عارفك، فلاحتك في ناس حمبرا
----------
يا ثروت همَّت إزيك
ياخي هم أصلاً موقتنها على ساعة الخراب الفي الخرطوم هسّع دي.
دي ما شترة مواعيد منهم، بل دِقّتها ولعبتها كلّها.
--------------
شادية منعم، ويين الحي بيك
يا حليلك والله يا الزولة السمحة، أمّا مشتاقين
بدّلي طوالي تذكرتك علي لندن، وحبابك
ياختي النظام دا نعريهو كيفن يعني؟ حواة نحن وألا سحرة!؟
هو فضلت ليهو قطعة دُلقان نعرّي منها، ما نظام قاعد ميطي عديل...
بس غايتو.... (الله يكرم السامعين).
هسّع في زول نصيح بيحلم إنو يصل من خلال مناظرة مع اللزج أمين حسن دا لشيء!
يمين كان دعيتو (الله) ذاتو بدعوة زي دي عشان تتحقق، الملائكة بدل تقول آمين، تقول ليكم: بالغتو!
كاتبيني ما أمكنك ياختي مشتاقين خالص
----
الموج، حبابك يا فردة
ياخ والله هذا المخلوق لم يقابلني سوداني واحد لا يمقته.
مش السودانيين، والله الكيزان ذاتهم بكرهوهو كراهة الرفت من الوظيفة أم لَقَفي
حولالالا.. يا قول بشاشا
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
| Quote: ناسك الذكرتهم بالخير ديل أنا ما بعرف منهم ولا زول واحد، |
يا محسن الله
أهـو واحد منهم ظهر (الأخ ثـروت ). يمكنكما التواصل عبر الماسنجر. وكمان سيف بشير وعصام جبر الله بعرفو الشباب ديل. عاوزنها وقفة تكون كااااربة والتنسيق ضروري.
يا محسن عليك الله ملاسي دا ما تـزعلو.
أنا عارف إنك ما زعلان منو، لكن برضو ما تزعلو عشان ما يقوم بكرة يكتب عنك مقرعاً في عمودو الراتب الأكثر شهرةً بالجريدة اليومية المشهورة.
موضوع خالد ياريت نبحثو في ماسنجر ما دام في اتصال سابق بيناتكم.
وامنياتي
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
مولانا اسماعيل التاج
محسن ده قدر ما اتمدن ما تنسى انو داخل قميصو يوجد جعلى بعكاز مضبب..
ودحين قبال الدواس يقع قلت اسلم عليك..
ما يقوم فى قيامة المؤتمر الوطنى دى يجينا حجر طاير والا كلاشنكوف
خليتكم عافيه..والندوة هينه فرتيقيتا ..بس المصيبه الكبيرة
ديك البفرتقا لينا شنو؟؟
يحلنا الحلا بله،،،
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: صديق الموج)
|
عصمت جبر الله
يا صديقي الجميل والعزيز، غايتو ضحكتني، كدي أقرأ ردي على سيف جبريل، شرحت ليهو تمام الفرتيق القاصدو، وحتّى بإضافة السودان دي ذاتها. طبعاً دا من باب كونو الواحد حكيم وكدا، لكن والله –بيني بينك- زي أمين عمر دا بس المهلة تلقاهو في خلاء الهوّاد داك وكاشي ليك جُمال قدّامك، تتلّب من الحوية طابق سوطك، وتخلي بطنو وضهرو زي البرش قبل الصبغة، بتعرفو دا؟ يضحك نهارك
*
يمين ما لمّيت في أيتها حاجة، أهو راجي الله في الكريبة، بتسخر مني يعني! جنس غتاتة عليك إنت وأستاذتي آمال التوم، ربنا يسامحكما، بالمناسبة بسلّمو عليك الاتنين آمال ودكتور الزين الجمري. كان بدّرت بتلحقهم، وكان اتأخرت بتلقاهم في أبو ظبي.
أها الإحداثيات دي أنا راجيك لكلامها، ممكن ترفع من معنوياتنا شوية نتم الجزء التالت، وبرضو ترفع لينا الأسهم –في بورصة البنات- حاكم دي كتابة من مفكّر وصديق، أعتز به، ومناضل وابن (أمّنا) المناضلة البطلة.
أبقه طيّب يا صديقي في الغار ولامن ننضم
-------------
سيف يا بشير، أصحابي الحلوين ديل كيف!؟ داير ليك الزيارة بس الكراع بقت تقييلة
سلامي الشديد للأستاذة نجوى وبناتها العزيزات
أها... معانا وألا مع الخيانة!؟
----------------
مجاهد عبد الله
يا صديقي وود جامعتي وينك إنت؟
ياخي غاليات التحايا مساك وصباحك
عمر البشير ذاتو بقه مجرّد ما يظهر في التلفزيون الأطفال الصغار يقعدوا يكوركوا:
(الجنبة دي أهم شيء).
وأجمل تعليق ظهر في الفيديو البقول فيهو واحد من المواطنين، حين دخول قوات خليل: حبابكم والله، تستاهلوها، البلد دي حاكمها "قرد". والله أنا كدتُ أموت من الضحك.
ياخي الناس اتمحنت فيه، فعلاً الراجل عبلاج، يقعد يتهاوش تمااام وهاك يا خطب بلهاء، وبعد داك ينطط ويتهابل لدرجة والله تخجّل الما بخجل.
أبقى طيّب يا صديقي في الغار وليك وحشة
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
مناورة مكشوفة من المدير السابق لتلفزيون "ساحات الفداء" لدفن الجثث المتعفنة...
التفافات مفضوحة لكادر التكنوقراط المختبيء في دهاليز السفارة المعزولة
هذه العروض الهزلية يعدها بالتأكيد المسرحي السابق والمعروف الان بالمتحدث الرسمي باسم السفارة
وينفذ اخراجها "شاعر" الغفلة التنظيمي المتخفي تحت مسمى الملحق الثقافي...
يجب أن نكون هناك لفضحهم واسترداد ثقافتنا السودانية من أفواههم وأبواقهم
الني نصبوها للدفاع عن نظام الفاشية الاسلامي الوالغ في دماء السودانيين
حافظ خير
...
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: Elsanosi Badr)
|
الجالية السودانية ببريطانيا تدعو اعضائها لمقاطعة زيارة وفد المؤتمر الوطنى الى لندن
تهيب الجالية السودانية بالمملكة المتحدة وايرلندا بجميع السودانيين المقيمين ببريطانيا مقاطعة فعاليات مايسمى بالاسبوع الثقافى السودانى الذى ينظمه فرع حزب المؤتمر الوطنى بلندن تحت لافتة ما يسمى بالمجلس القومى السودانى بالمملكة المتحدة وايرلندا الوكيل الحصرى لـ "الجبهة القومية الاسلامية"ويكفى للتدليل على صحة ما نقول ان المتحدثين الذين حضروا من السودان لتقديم المحاضرات عن الثقافة والوطنية السودانية هم :أمين حسن عمر كادر الانقاذ المعروف ببغضه وعدائه للجميع،والدكتور صبحى فانوس ممثل المؤتمر الوطنى فى البرلمان وكادر التنظيم بجامعة الخرطوم،ومصطفى ابوالعزائم كادر الجبهة الاسلامية الاعلامى ورئيس تحرير صحيفة آخر لحظة المملوكة لعلى عثمان والحاج عطا المنان وبالرغم من انهم احضروا معهم مجموعة من الفنانين وفرقة الفنون الشعبية واعلنوا عن حفل غنائى راقص الا ان ذلك لن ولم ينطل على فطنتكم .إن الثقافة والوطنية السودانية لا يمكن ان يحاضرنا عنها هؤلاء الاشخاص وبين ظهرانينا فى هذه البلاد من ابناء الشعب السودانى من هم اقدر واكفأ واكثر تأهيلا عنهم،كما اننا لانرى مبرراً فى هذا التوقيت بالذات للاحتفالات الغنائية والموسيقية الراقصة وما زالت دماء ابناء دارفور بصفة خاصة ودماء ابناء السودان بصفة عامة لم تجف بعد فى شوارع ام درمان بعد الاحداث المؤسفة التى راح ضحيتها نفر كريم من ابناء الشعب السودانى نسأل الله لهم الرحمة.وعليه فان الجالية السودانية تهيب بالجميع مقاطعة زيارة وفد قيادات حزب المؤتمر الوطنى لبريطانيا.
وبالله التوفيق
مكتب الاعلام
مجلس الجالية السودانية – بريطانيا
الثلاثاء 27 مايو 2008م
للاستفسار هاتف : 07734312252
مزيدا من التضامن يا محسن حتى ننهى هذه المهزلة الكيزانية السخيفة
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: خرماج)
|
ماهى اخبار الأسبوع اللاثقافي يا محسن
طبعا أمين حسن عمر (شمولى كامل الدسم) (مفروض يلقب بقاتل الثقافة) عامل فيها امبراطور عديل
كده يزل من يشاء ويعز من يشاء فى مجال الثقافة والفنون.
فى زمنه السينمات مقفله، المسارح مهجورة، معارض الفنون لا مكان لها سوى القليل من المراكز للعرض، الشعراء جنوا، او هاجروا، المكتبات فقيرة (ومقص الرقيب شغال شمال ويمين)
عموما ماتبقى فهو فقط عجرفة فى الفارغ قبل كم اسبوع كده سامعه كمان بنظر "فى الاقتصاد الحر" يعنى مدرسة شيكاقو-ميلتون فريدمان وكده، اخينا ده ماعارف انو الحكاية ناسه "زهجانين منها".
افضل شئ تكشحوا فيهو جردل موية بارد يصحيهو من النرجسية بتاعته دى.
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: Sabri Elshareef)
|
عصر كبس الجبة
د. عبد الله علي ابراهيم
يطوف ببلادنا منذ عقود طائف عنف اتسم بممارسات «قلع الإيد» «والفتونة» من قبل الحاكمين والمعارضين بلا فرق. ومن أسطع علامات هذه الفتونة قول معارض على الإنترنت للحكومة: «أرجو أن تدرك الحكومة أن الرجالة السودانية ليست حكراً لها وكذلك الحماقة السودانية». وليس هناك أرجل (أو أحمق) من «كبس الجبة» حسب قول مؤرخي أم درمان. ولذلك سميت عصرنا الحالي بـ «عصر كبس الجبة». وقد اشتهر الرجل بفرتكة حفلات أعراس المدينة في الثلاثينيات. ولقى مصرعه برصاصة في آخر الأمر. ومن أطرف ما سمعته من متوالية كبس الجبة أخيراً ما حكاه لي الدكتور عبد الماجد علوب عن الأستاذ التيجاني الطيب والصيدلي الأم درماني منصور إسحاق. فكانت تكاثرت البلاغات على جريدة «الميدان» خلال فترة رئاسة التيجاني لتحريرها بعد انتفاضة 1986م، وكان منصور هو الذي يضمن التيجاني بعد التحقيق معه. وأخذت هذه الضمانات منصوراً إلى كل أقسام شرطة أم درمان. فما ينفك التيجاني من ورطة من نقطة بوليس حتى يستدعيه البوليس لنقطة أخرى. فقال منصور للتيجاني وقد أعيته المشاوير: «والله يا تيجاني بقيت زي كبس الجبة نقطة بوليس ما دايراك ما في».
وكانت كعة أم درمان كبس جبية القصد المعلن منها فرتكة أمن العاصمة الضاربة طناش عن أوجاع دارفور. ثم وقعت كعة كبس جبية تالية في بيرمنجهام. فكما أصبح معروفاً الآن تظاهرت في هذه المدينة البريطانية جماعة من السودانيين منسوبة إلى دارفور ضد الشاعر المرموق التيجاني حاج موسى. وكان الشاعر قد جاء في وفد ثقافي على رأسه السيد أمين حسن عمر وزير الدولة بوزارة الثقافة والإعلام للاشتراك في أسبوع ثقافي سوداني نظمه المجلس القومي السوداني ببريطانيا (28-31 مايو المنصرم). ثم تصادف أن منظمة سودانية ما ببيرمنجهام أعدت معرضاً عن السودان فاستعارت المبدعين من هذا الوفد وتغاضت عن الوزير. فما شرع التيجاني في تقديم قصيدته عن كعة أم درمان، مدينته الفاضلة، حتى هتفت الجماعة تستنصر لدارفور المظلومة الجريحة ثم خرجت عليه بالأكف تؤدبه. وقدر مسئول عن المناسبة عدد الجماعة المغيرة بخمسين. وكانوا قد أعدوا لزعزعة المناسبة عدتهم. فقد وجدهم المسئول موزعين أمام القاعة فدعاهم للدخول ففعلوا وتجمهروا في موقع واحد منها.
إنه لمن فساد الرأي والحيلة الاعتداء على شاعر أثناء أدائه لواجبه. ولكن وددت لو تحوط القائمون بأمر الشاعر والشاعر نفسه للأمر بأفضل مما فعلوا. فقد تلبد المحيط السوداني بانجلترا بمزاج معادي لأسبوع المجلس القومي الذي جرى وصفه بـ «مناسبة الكيزان» على الإنترنت. وتداول خصوم الكيزان في أمر فرتكة حافلها. واستغربت لأن الصوت الأجهر في هذه الفرتكة كان لكاتب روائي بازغ مجيد تجتذب كتاباته الأفئدة. فقد كتب على منبر السودانيزأونلاين يدعو إلى «فرتكة الأسبوع اللا ثقافي الكيزاني ببريطانيا». وصب جام غضبه على محاضرة الوزير الذي وصفه بـ «المنتحل» لدور وزير الثقافة. ودعا المثقفين الشرفاء للتظاهر ضد محفل دعمه الوزير ومن يشايعه «من بعاعيت ومسوخ» للتعبير عن التضامن مع إخوتنا في دارفور الذين يتعرضون للسحل والتنكيل. وقد تحمس لدعوته متحمسون هتفوا على الإنترنت: «أوقفوا العبث» داعين للاحتشاد بهمة للفرتكة بينما حاول البعض صرف النظر عن الدعوة للعنف بلباقة. ووصف أحدهم الشاعر التيجاني بأنه «أحقر من يذكر». ووصفه صاحب الدعوة بأنه «لا يألوا في دعم هذه العصابة» وهي الكيزان. وشرح الداعي للفرتكة بأن دعوته ليست كفرتكة الأعراس السودانية بل هي ستتبع الأصول الديمقراطية. وود مع ذلك لو أنها كانت على نهج الفرتكة الأولى أي فرتكة كبس الجبة. ولما وقعت كعة بيرمنجهام (لا لندن) هنأ أحدهم صاحب الدعوة ووصفه بابن الصالحين وقال إن دعوته أصابت. وجرى التبليغ عن الكعّة في منبر الإنترنت بـ «الآن الضرب شديد في فعاليات الكيزان». «وجماهير الجالية ببرمنجهام ينهون احتفالات الكيزان وأمين حسن عمر يفر بجلده».
لم يأت دعاة فرتكة حافل مناسبة «كيزان لندن» الثقافية بما لم يسبقهم إليه الكيزان أنفسهم. فقد كنت حضوراً في شتاء 1968 التي فرتك فيها الأخوان المسلمون حفل الجبهة الديمقراطية عند بدء رقصة العجكو. وقد ساقني الاحتجاج الطويل على فظاظة حس الأخوان واستعلائهم على الفن إلى دروب لم تخطر لي أبداً. ثم فرتك الأخوان مسرحية راح علّى اسمها بنادي أساتذة جامعة الخرطوم نحو 1988م، واستنكر أفاضل الناس تطفل الأخوان على مناسبات إبداعية تجرى في سياق أعرافها الأدائية وخلقها المهني. ولا رقيب عليها ولا حسيب إلا النقد من أهل الذوق والدراية. وظننا أن هذا المعنى استقر ليصبح عادة ثقافية ديمقراطية يتحصن بها الفن ويسود بغض النظر عن رغائب النظم الحاكمة أو المعارضة. ولكن كعة بيرمنجهام كشفت أن الأخوان قد «هدوا» في معارضيهم الذين اكتسبوا منهم عادة «كبس الجبة» في التطفل على الإبداع والتربص بمناسباته «وسنسرته» بالبونية واللبعي.
أحزنني جداً أن يوغر مبدع الصدور على شاعر كالتيجاني فيسحب منه حصانة الأداء الطمهل.يجعله صيداً حلالاً للغاضبين من جمهوره. بل أحزنني ضيق صدر من نتوسم فيهم عادة الثقافة بميثاقها (وهو أنها مما يثمر على مهل . . . ولطويلة كما قال قرامشي) يبشرون بالعنف الأخرق الذي يقدر عليه كل أحد. فيكفي في الدلالة على تقديم العنف على الدعوة خبر من أدعى النبوة في الصحف هذه الأيام. وهو ادعاء لم يستعن عليه بالصبر على زعمه. فقد طوق أنصاره المصلين بجامع ما وأرغموهم على الاستماع للمتنبي تحت ظلال السيوف. فحتى ادعاء النبوة (التي هي تبليغ) لا يحسنونه في عصر كبس الجبة هذا.
وأتناول في حديث الأربعاء وجهاً آخر من عصر كبس الجبة.
http://www.rayaam.info/Raay_view.aspx?pid=190&id=13198
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
السؤال الذي يطرح نفسه هنا هو:
هنا بهذا البورد يوجد عضوين بهذا المنظمة المشبوهة وهم أعضاء في "المجلس الاربعيني" لتلك المنظمة، لماذا لم يفتح الله لهم بكلمة في هذا البوست أو البوست الاخر لأخونا خضر الطيب؟ لماذا لم يقوموا بشرح أهداف المنظمة؟ على الاقل كان من الممكن أن يحصل تفادي لأعمال العنف التي نجمت عن تنظيم ذلك الاحتفال الكيزاني. وبالتحديد أنا هنا أتحدث عن د. مهدي وصدقي كبلو. أنتم تدعون معارضة النظام فلماذا تدخلو هذا البوست لشرح موقفكم وشرح أهداف هذا المنظمة؟
د. مهدي وصدقي كبلو أنتم الان مسئولين مسئولية مباشرة عن أحداث العنف التي حدثت بذلك الاحتفال الكيزاني. وأي شخص تعرض الى ضرب أو أصابة من حقه أن يتقدم ضدكم بشكوى ويطالب بتعويض مادي، بما قي ذلك الكيزان الذين تعرضوا الى الاعتداء. عنادكم وأصراركم على قيام هذا الاحتفال الانتهازي هو الذي وضعكم في هذا الحرج . شكرا لك مرة أخرى أخي محسن خالد وتحية الى كل الذين رفضوا المشاركة في هذا العبث.
دينق.
| |
|
|
|
|
|
|
|
|
|
Re: دعوة لفرتكة الأسبوع اللاثقافي الكيزاني ببريطانيا (Re: محسن خالد)
|
أرجو أن تكون بخير يا دكتور عبد الله علي إبراهيم، وأجمل الأمنيات لك بالصحّة والسلام
شكراً يا عزيزي على سُترتك وفنجرتك مع الكيزان والفاشية، ما قصَّرت معاهم تب، لكن هل تستطيع الفاشية أن تنستر معك أو مع أي أحد كان!؟ هل تعترف الفاشية بحقوق هذا الأحد سلمياً كي لا تضطره لأن يكون كبس جبة غصباً عنه وإن أبى!؟ لقد منحتني فرصة ذهبية بمقالتك هذي لبرهنة مواضيع كثيرة جاءتني مجتمعة في كلامك الحِنيّن هذا. كأنّ الله قد غيّض لإسراري ذلك ملاكاً يخدمه بك أنت شخصياً صاحب الكتابات الإشكالية والعائمة في آن، وبمن أسميته وزير الثقافة وهو في الحقيقة جوستابو الثقافة، وكذلك من وسمته بـ"الشاعر المرموق"، دون أن تسأل ولماذا هو مرموق؟ وفيم هو مرموق؟ ربما هو مرموق فعلاً في "وظيفته" كحانوتي بائس في مكان "سنسرة الفكرة والفن"، السنسرة هذه المفردة التي استللتُها من مقالتك، أنت استخدمتها ومع مين؟ مع التيجاني كبير السنسارين! دون أن تطرف لك ولو شعرة واحدة من جفن! كيف لا يكون التيجاني مرموقاً وهو على رأس جهاز الرقابة والسنسرة لكي يحاننه الكُتّاب إن شاؤوا وإن بغصبٍ من عشم استخراج التصديقات لأفكارهم وفنّهم. تصف هذا الحانوتي وسمسار الحنوط بالشاعر علناً وهو في الحقيقة مستلم الكتب في أوراق خضراء ومعيدها إلى أصحابها في أكفان. شكراً لك يا دكتور على هذه الفرصة التي أتحتها لي كما يقول الضيوف "الغرباء"، ويا للغرابة! يكونون في تلفزيون جمهورية السودان وتراهم يشكرون "غرباء" مثلهم أيضاً. يا رجل.. ها أنت لك من مواهب من يتيحون الفرص في تلفزيون "لا إله إلا الله" الكثير، ولا عدمناك. وشكراً أيضاً لإتاحتك لي الفرصة مع الرفيق قرامشي الذي تحدّث عن المثقفين وتلاوينهم، الحقّين منهم والسحالي، طويلاً وواضحاً، بحيث لا يخطئ رجل مثلك قراءته. ولكن يبدو أنك كنتَ في عجلة من هذا الرجل، لا أقصد استخدامك لهذا الرجل على وجه التحديد في مقالتك هذي، ولكني أقصد عجلةً بتُّ أرقبها فيك بالسنين الطوال وفي مقالات كثيرة ووفيرة لا عدَّ ولا حصر لها. أها يا دكتور الحساب بيني وبينك هنا توأم، بنيّة وولد. وسأعمد في إقامة الحُجّة عليك بناءً على مقالة النص القرآني (اقرأ كتابك، كفى بنفسك اليوم عليك حسيباً). وإليك خطتي مع تعريف صغير عن موقفي من الكتابة في الصحافة السودانية، وخطتي أو –امتحاني- إن شئت، هو كما يأتي أدناه وأرجو أن ينستر معك الكيزان ويردّوا إليك الجميل ولو أبدلوك في هذا التحانن المُدَّ بنصيفه.
التعريف الصغير: أنَّني حتى تاريخ اليوم لم أكتب في هذه الصحافة القائمة الآن بالخرطوم ولو سطراً واحداً. وهذا اختراعٌ منّي لحساسية تجاه "الأوضاع" أيضاً، كما هو تضامنٌ مع حياة الأفكار التي تُهدر يومياً كما تعرف ونعرف جميعاً. فلا رغبة لي في أن يتحكّم بدماغي حانوتي مثل التيجاني مرموقك دا. ولا أقبل أن يعيّنَ أيُّ وزيرٍ كان على ظهر الأرض غفيراً لورقتي كما يُعيّن –أمين حسن عمر وزيرك دا- الغفراء. ورقتي لا غفير لها سوى النُّعَاس، وقلمي لا جفير له سوى الحق.
ولأجل هذه الفرصة التي أتحتها لي أقبل أن أرد عليك في (الرأي العام) إن كان الصديق العزيز ضياء الدين يقرأ حديثنا هذا ولا يمانع في ذلك، وأرجو أن يمدّني بإيميله. والهدف من الرد عليك على الصحافة ذو أزقّة، أُجْمِلُها في أن أبرهن لك أنَّ أمين حسن عمر هو بالفعل "منتحل" لوزير ثقافة وما هو بوزير. أنت بسخرية أقواس صامتة تتعجّب من نعتي له بالمنتحل، فبالله عليك ماذا تريدني أن أُسميه؟ "المنتخَب" "المختار"!؟ وهذا على سبيل المثال لا السخرية إن كان يصدّقني أحدكما أو كلاكما، أعني "أنت" و"التاريخ". ألا يدعو ثلاثتكم إلى الكلمة في وجه الكلمة، حبابكم ألف، سنتغاضى عن جوستابية المنتحل لدور وزير، والحانوتي حيث يجب أن يقوم أصيص الكتابة، وسأتغاضى عن خمجك المعرفي المتأخّر الذي هو بلا حدود، وسألطّف من حديثي حدّ الهدهدة كي لا أحرج وزيرك هذا أمام الشعوب السودانية التي "انتخبته" لهذا الدور، ولكي لا أثقب قنينة الحانوتي فتفوح رائحة الكتب الميتة من قفطانه الفاخر، ولكي لا أبدل نباهتك السابقة أنت شخصياً بأعاجيب لك عاصرناها وما زلنا نعاصرها! قصّرت معاكم؟ أها الكلمة و-اللطيفة- في وجه الكلمة والخَلِق تتفرّج! لنعرف ما كتبته أنا هنا من دعوة وما حدث في بيرمنجهام من سرقة الضحايا حتى شخيرهم تحت المُدى!
هل يوافق من أسميته وزير الثقافة على نشر تثاقفي معك؟ وأخوه الشاعر المرموق؟ وأنت شخصياً الذي نعرفك جميعاً دون غمط لما قمت به من جهود في دعم ثقافتنا وإحيائها؟ وهل يوافق الصديق ضياء الدين دون أن يخشى الهبايب والأعاصير!؟
إن كان هؤلاء الناس أهل كلمة وتثاقف فمرحباً به، وإن كانوا أبارتيدَ يضرب من خلف السياج فأطفال انتفاضة دارفور يفلعون بالذي هو نبق ودوم ولالوب، فهل يستوي وفلع الأنتينوف، الراجمة أربعة وعشرين ماسورة؟ وهل رمي حانوتي الكُتب من منصّة فارهة ببيرمنجهام، كان يقول من على سطحها إنّي أرى مرتزقة تسير، واصفاً إخوته في الوطن، وقبل أن يصل هو التراب تصبّه إثرها ممرضة متعهدةً له بالبنسلين والضمادات! هل يستوي ذلك بالرمي من الطابق الخامس والرابع الذي يصبّك إثره أمنجي ويتعهّدك بسيخة أو ساطور؟ {ما لكم كيف تحكمون}!؟ {ولكم في القصاص حياةٌ يا أولي الألباب، لعلكم تتقون}. أستدل بالنص الديني لأنّ لعبته لم تعد تنطلي على أحد و-خلالالاص زهجنا، القصاص ما مذكور في الكتاب!؟
فإمّا أن يأخذوا ذلك الكتاب طُرَّاً ويلتزموا به دون أن يأخذوا منه "بعضاً" أو "أجزاء" ويرموا بالبعض الآخر حين لا يخدم، كما يتوعَّد النص ذاته: {الذين جعلوا القرآن عضين}، وإمّا أن يأخذوا خطابنا العلماني طُرَّاً. أمّا أن يأخذوا من خطابنا العلماني ما يطيل عُمُر هذا النظام فحسب، فلا وستين ألف لا.
الذي يُريد الاحتجاج المدني القانوني، عليه أن يقيم الدولة المدنية القانونية، والذي "يركّها" كما يُقال عن زراعة الحيضان عندنا فعليه أن يحصدها مركوكة. أنا مفكّر ولن أستخدم يدي ذات يوم إلا دفاعاً عن النفس، ولكن إن كان للجبهة الإسلامية صعاليكها فلتعلم بأنّا أيضاً كمعارضة منّا الصعاليك ومنّا دون ذلك. والذي حدث ببيرمنغهام فعله أبناء السودان دون فرز إثني أو جهوي، ويتحمّلون مسؤوليته دون فرز إثني أو جهوي أيضاً، فخطاب الإثنية والجهويّة هذا ليدّخره النظام لخرطومه فهو بها أليق.
أنتظر كلماتكم التي سأرد عليها بكلمات أيضاً، إن كانت الدعوة هي إلى استخدام الكلمة! وأيضاً لكي نكون بحجم وشَبَه بيرمنجهام من جميع النواحي ومن جوهرها لا غلافها. فبيرمنجهام ليست بمكان سياحي ولا جغرافي، وإنما هي أُسس وتقاليد لها مئات السنين. لم يبنها مهندس مدني ولا معماري من النوع الذي يستأجرونه من الصين ويتقاضى حقّه بترولاً، وإنما بنتها حركة التاريخ المُغَرْبِلة والحضارة الإنسانية العقلانية، ومن بنوها دفعوا أرواحهم مقابل أن يحيا الإنسان حُرَّا كريماً.
الذي يترك جُثث أبناء الوطن مجندلة خلفه في رهاب أم درمان وممزّعة على طرقاتها وفي بيوت أشباحها وملوّحة من طوابق البنايات العالية وهي في طريقها للارتطام النهائي، لن نتركه يعمل لينا فيها "خواجة" هنا، لأنّه فقط اشترى من أموال البترول تذكرة درجة أولى ونزل بها هوتيلاً فريق أوّل "نجمة وصقر وسيفين". الداير بيرمنجهام محل السجّانة والديم المعشّشات في المخ يكرب صلبو، ويطهّر روحو..
ما ياها البلاغة السياسية!؟ هسّع يا دكتور في ذمتك مقالتك دي كلّها فيها سطر واحد لمفكّر؟ ومعاك كمان قرامشي عدييييل كدي!!
----------------------------------------------
عدم ذكرك لاسمي في المقال يا دكتور، أحسنتُ به وبك الظن وقرأت منه أنّك لا تُريد أن تغريهم بي محرّضاً، أو لكي لا تقع في تناقض التحريض أنت أيضاً، كما "ابتذلتني" بالتحريض وليس "اتهمتني"، وهذا أُبيّنه لك لاحقاً في ذات الصحيفة إن استوينا على اتفاق. لأنّ الذين على النت يعرفون حديثي ومعظمهم يعيشون ظروفي ويفهمون ما تم وما يجب أن يتم هنا وفق قوانين هنا، ولكن الأذى في ما روجته عنّي للقارئ السوداني على الأرض السودانية، بعيداً عن الانترنت، وإن أخفيت اسمي. فهل تظن بأنّ المؤذين الذي يعنيهم الأمر –فعلاً- لا يعرفون مقالتي!؟ أيضاً أستغرب، فهم يعرفون واتصلوا شاتمين ومهدّدين ولم أعد أقيم لوعيدهم المهرجل اعتباراً، ومنذ زمن بعيد. أنتظر مقالتك الثانية كما وعدتَ وأنتظر إجابة ضياء الدين، وأرجو أن تكتب اسمي فيها واضحاً وبالتشكيل إن أحببت، ولا تأخذك بي رأفة.. شكراً يا دكتور، فليست روحي أعز ممن يقتلون ويضطهدون الآن بالعاصمة التي جاءت لتحدّثنا متقنعة في وجه أمين حسن عمر عن (البناء الوطني) فتأمّل البعاعيت والمسوخ! كررتُها لك مرة ثانية حكاية البعاعيت هذه لأنّي وقفت لدى سخرك الصامت منها، وكأنّك لا تعرف أن أي شخص طاير ليه وهم عروبة في رأسه ينعت بـ"البعاتي" كسودنة لأحزاب (البعث) العربي وما أدراك ما عفلق، في بلاد اسمها السووودااان. والمسخ هو كل من يحاول مسخ هذا السودان وفق أهوائه ونزواته وتشوّهاته، ولا نامت عين البعاعيت، وعلى رأسهم المنتحل لدور وزير أمين حسن عمر.
| |
|
|
|
|
|
|
| |
محسن خالد
AnwarKing
خضر الطيب
Elsanosi Badr
Sabah Hussein
Adil Ali
الجيلى أحمد
Saifeldin Gibreel
Deng
حيدر حسن ميرغني
Bashasha
wesamm
Hussein Mallasi
خالد العبيد
إسماعيل التاج
ثروت همت
صديق الموج
saif basheer
farda
فارس موسى
أحمد أمين
Kabar
عبدالله عثمان
فيس بوك
تويتر
انستقرام
يوتيوب
بنتيريست