أحسني كما السكران ديما،،، الذي صحى دقائق قليلة ليشتري المعلوم،، فأخبره التاجر الذي قلب دكانه محلاً لبيع الأسماك،،، بأنك وين يا زول،، ما عرفت أنه الحكومة قررت وقف ومنع البارات،، فرد السكران مستاءاً ،، بالله أزهري ده مجنون. أحسني كأهل الكهف استيقظت بعد سبات طويل لأجد البورد اتغير وكلاً حمل عكازه يدافع عن افكاره بأن (لبيك يا قناعاتي)،، ليس هذا فحسب بل (لبيك يا قناعاتي) بحمرة عين وارهاب فكري والفاظ جارحة وسيول من الاتهامات مرة بعدم الفهم ومرة بالخواء ومرة مرة بالتزعزع الفكري ومرة بالكفر ومرة بالإمبريالية (يعني شنو امبريالية دي بالمناسبة؟)
وفي غمرة دهشتي بهذا التدفق الفكري الغزير والدفاعات المستميتة عن القناعات،، اصدمت بأحد الردود فتخيلت صاحبه ماسك في خناق رقبتي ، حاملاً عكازاً ضخماً،،، مقلعاً عيونه الحمر،، ممرمطاً لقلبي الرهيف ،، ولسان حاله يقول (قولي،، قولي،، يقلقلك الحر إن شاء الله،، قولي اني عندي حق يحقن دمك يا مبشتنة) ومبشتنة دي من عندي الحقيقة هو في الحلم الخيالي الذي راودني لم يقلها عشان ما ندخل في حق الله. لا لا لا لا لا،، والله (حق الله) ده ما اتجاه ولا مذهب ولا فكر ولا ديانة،، دي حق الله ساي كده.
والله حقيقي (وحقيقي دي ماذي (الحقيقة) بتاعت مذيعين التلفزيون) حقيقي والله البورد الأيام دي مرضني ورفع ضغطي عديل كده...والخنقة الاتخنقتها دي جابت لي أبو الشهيق. يا أخوانا باركوها ياخي مرضتونا. المات الله يرحمه. الداير يصلي يصلى. الداير ما يصلى الله معاه. حتى الداير يلبس الجزمة الاول بعدين الشراب خلوه مش شرابه ومش جزمته؟! أها أنا في غمرة انشغالكم باثبات قناعاتكم وافضليتها،،، اطالب انا زاتي (مالي ما عندي تطلع ديني وانبثاقة فكرية)أطالبكم بدفع تعويض رسمي بدل مرض وشلل اهتزازي اصابني من جراء متابعتي لما يجئ في البوستات الأيام دي،، مع اني ما بفهم فيها كويس لكن مرضتني عديل.
كما أنني اشجب،، اقصد استغل هذه السانحة (الحقيقة) ، والسانحة دي هي جنكم الخلاكم تقروا الكلام ده حتى هذه النقطة،، استغل هذه السانحة ،،وأطالب كل من انسدت نفسه وبطنه طمت وأصابته عقدة نقص قناعاتي،، أن ينضم إلى هذا البوست البص ،برسم اشتراك قدره قرش واحد،، على أن لا يكون هذا القرش ينتمي لأي جهة،، يعني لا يكون أمريكي،، لا اوروبي لا افريقي، لا استرالي،، حتى لا نتهم بالعولمة،، ولا يكون إسلامي،، حتى لا نعطي الإنطباع بالإرهاب. خلوه قرش فاقد الملامح ممسوخ يمسخ شيطانكم ده إن شاء الله.
ولكي نكون واضحين من البداية،،البوست ده ماشي الكلاكلة صنقعت،، ما دنقرت طيب؟ وكل سنة وانتوا طيبين الناس ماشة تحج وانت ماشين وين ما عارفة. هدانا الله وإياكم.
01-19-2004, 08:50 AM
shiry shiry
تاريخ التسجيل: 07-05-2002
مجموع المشاركات: 3511
عارفه يا بت قضيم لي يومين ، اقوم من النوم نفسي في شربوت كارب كده .. دا من شنو يا ربي دا ؟؟
ينقصنا كثيرا مثل هذه الوقفه التي ، يستحقها البورد قبلنا نحن .. ولانني قايمه هسع من النوم ، ولم اشفط الجغمة الرابعة بعد من كبايتي التي تساوي جردل مويه عديل كده . فهذا لوحده يعني ان الشاي لم يستقر بعد في عروقي ، ليمسدها من كرفستها ، وبعدها تستطيع جغمات الشاي تمشي تنقش تنقش تنقش الى نافوخي ، فتنبه عصب الراس وبعدها يستطيع الراس المدوقس دا يدي اشاره صاااااح الى نخاعي الشوكي ليبدأ يفتش حوله ، هو في ايـــــه !! انا معاكي معاكي في هذا البص .. والعندو قرش يركب بص عرس اقصد بص بت قضيــم بس كل شيء ولا تفوتيني العيد ، بنركب معاك بس بي شرط انو نصل قبل العيد عشان نغسل الابواب والستائر ونقش الحوش ، ونغسل الحيط تعالوا هنا ياجماعة ليه الحقارة دي ، الشغلانه دي كلها متروكه للنسوان .. وانتو لع .. بس تتحنطروا بالشربوت وتاكلوا المراره عليكم الله هسع في حد عاقل ياكل مرارة نيه
01-19-2004, 11:04 AM
tmbis tmbis
تاريخ التسجيل: 10-19-2002
مجموع المشاركات: 24862
تتخيلي الواحد بقي عندو مرض حراق روح .. وزهج من غير سبب .. وزهايمر ..اي زول يشوفك يقول ليك انته مالك مكرفس وشك ده كده .. الواحد بقي ( يحمر ) لي اي زول من غير سبب .. اي واحد تلقاهو في الدنيا دي تفتكرو ح يعمل معاك مشكلة في البورد .. تحلف بالخلقك انك ما تفتح البورد ده الليلة .. علشان ما تعمل ليك مشكلة مع ضلك ... حيث أنني اكتشفت ومما لايدع مجالا للشك وحيث كذلك أن اي قرفه ومشكلة سببه البورد ده .. وفي الايام الاخيرة دي بالذات .. لانو ماشاء الله الناس بقت واعيه شديد جدا .. والوعي السوداني طبعا اوعي وعي في الدنيا دي .. وشمولي خالص علي مستوي كل الاديان والحضارات . والثقافات المتعددة حول العالم ..ونحنا شعب يصنع المعجزات .. ويكافح انثي الانوفليس .. ويحفر ترعتي كنانة والرهد .. ( بالمعالق ) ممكن برضو البورد ده يخليك تخلق مشكلة مع حبيبتك .. من غير سبب (وإذا سمحتي .. الحته دي ما تركزي عليها شديد) يعني ما تحكيها معاي ... وخليك في بصك وفي قروشك دي .. الحاجه التانية طمام البطن .. الزول يكون كويس فجأة بطنو تطم .. وانا جني وجن طمام البطن ده .. لانو بعد شوية بيجيب حاجات ما كويسه .. وانا جني وجن الحاجات الما كويسه... البتجي بعد طمام البطن .. وده برضو محتاج بدل سكن .. وبدل ترحيل .. لانو البوست بتاعك ده شيري ح توديهو الفاشر من هنا ..
لي فترة بفتش لي علي بوست يكون ماشي السوق الشعبي وعارفك فقريه جدا .. حقو الواحد يفتح ليك كشك بتاع تلج .. تقبلي مني مساهمة بسيطه100000000000000000000000000000000000000000000000000000000000000000000 قرشا
01-19-2004, 09:58 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
شيري الحبيبة شهيتني في الشاي ومن غيرك يا عزيزتي سيرافقني في هذا البص المجنون؟؟ ستنزلي من اللوري وتركبي باصا، عادي ليس فينا مجنوناً. عارفة يا شيري،، من مدة طويلة وانا افتح البورد لتنسد نفسي لا لشئ معين،، لكن رائحة الشواء تفوح منه،، سوري،، انا جعانة باين،، أعني رائحة الملل والشكل تفوح منه،، فأصاب بزهجة،، حيث أن من المفترض أن البورد منطقة محايدة تماما نستطيع الهرب إليها عند اشتداد الزنقة، زنقة المدير زنقة الفلس زنقة الخروف وهكذا ،،فلما تدخلي لتجدي أن الواحة المفترضة قد تحولت لساحات عراك وسباب،، فأين تذهبي،، أو كما قال صاحبنا الحرامي (نطير يعني واللا شنو؟؟) ومع ذلك اعترف أن هناك نسائم دافئة تهب علينا بين الحين والآخر تجعلنا نتحمل بعض شطحات البورداب،،كأنت طبعاً،، يخليك لينا يا نسمة. اسمعي.. ينفع معاك دور الكمساري؟!
01-19-2004, 10:02 AM
Tumadir Tumadir
تاريخ التسجيل: 05-23-2002
مجموع المشاركات: 14699
يا تماضر حرام عليك تحرضي شيري هو عميان يشوفها كيف يا شيري؟؟ بعدين الزول ده مستوفي لشروط الباص كلها،، شايل عكاز لا يستعملها إلا للنظر،، شحات،، عنده وجع ثقافة،، وماشي الكلاكلة، وين المشكلة أن ينضم يا كمساري باري لي تماضر دي بكرة بتوديك العراق،، صدقيني جد.
نزار حسين عندي ليك نكتة سمعتها الآن،، لازم ما افوتها قالوا الرباطابي قال لي مرته سوي لينا كوارع يا مرة،، المرة دايرة تستظرف قالت ليه،، اظبطها ليك،، قال ليها يعني حتلبسيها شرابات يعني لووووووول على المساخة
01-19-2004, 10:14 AM
shiry shiry
تاريخ التسجيل: 07-05-2002
مجموع المشاركات: 3511
مع اني البوست لم يكن حقي ، لكن اهو (شفتن) مني على قولة اخوي المفعوص .. وحيث ان ست البوست اقصد ست البص ، عرضت علي دور الكسماري فانني من هذا المنطلق اؤكد لكي يا نكهة الفواكه الاستوائية . .انك صرت في امان في بصــنا دا .. وعمليا كده ، بعدالصلاحيات التي جاتني من ست البص ... البص بقي بتــــاع بـــــنات وما عايزين رجال ، لاني توصلت الى ان الرجال دائما بتاعين مشاكل الواحد يجي من بره زهجان ، مزهجو مديروا ولا شنو ماعارفه يقوم يقول للمره الا تسوي لينا كمونيه ... وبعدين يقع المحظور .. حتى بيت ابوها ما يرضي يوديها ليهو موش مااااكل كمونيه .. منتظرين منو اكتر من كده شنو ؟
01-19-2004, 10:35 AM
Tumadir Tumadir
تاريخ التسجيل: 05-23-2002
مجموع المشاركات: 14699
يسميك الاستاذ الموصلي تماضر البت الحديقة وتسميك شيري تماضر نكهة الفواكه الإستوائية انا حاقلب الموازيين واسميك تماضر البت الثورة كلو منك لو كنتي نزلتي الحلة في المواعيد ما كان اللبن فار واتدفق تماضر البت الشكلة لا عليك انا ممكن ادسك و(الحقيقة) لو لم ارد ذلك لما استطعت فراراً من قرارات الكمساري الأحوص شيري،، و(الحقيقة) الكمساري هو سائق الباص الفعلي،، فهو الذي يلم الركاب،، وهو الذي يلم القروش،، وإن زاد أحدهم فيها لحقره وقرص السواق ب(قرصة يا شاب) فوقف السواق لا حيلة له،، لينزل الكمساري الراكب الزايد فيها،، إذن لما يوافق الكمساري على ركوب أحدهم،، لا يصبح للسواق كلمة يقولها. مع ذلك حتى لو كان لي كلمة،، فأنا طبعاً حادسك،، واهرب بك إلى افغانستان،، حيث يمكنك هناك إقامة الثورات كما تشائين،،وقالوا واحد زهجان من ثورة الإنقاذ زهج شديد خلاص،، طلع المواصلات بعد سلة روح وأول ما لقى مكان يقيف فيه صرخ وكورك (يلعن الثورة إن شاء الله) ،، فلما التفت شاهد أحد الذقون الكبيرة وهو يطالع فيه بإمعان فردد (خصوصاً الحارة التامنة) كنت قد قررت أن اكتب لك رسالة،، لكن بخل مسنجر بكري منع نقتي من الانسياب بعذوبة (حيث انا عذبة جدا اشبه بحيرة ناصر) . هذا البورد السوداني (سوداني حتى النخاع) ولو كان مرتادوه جلهم لا يقيمون في السودان،، مع ذلك تصبغنا جيناتنا السودانية فلا نتسطع منها فكاكاً. نشبه حبوبتي التي اظنها مثالاُ يمشي على ثلاثة (مع العكازة) للشعب السوداني،، لا يعرف للوسط أموراً،، إذا ثار وانقلب على أحدهم ما تركه إلا فطيساً،، حتى إذا ما هدأت الأمور انقلب شعباً وديعاً باكياً متباكياً يطالب بالرحمة والسماح لنفس من ثار عليهم يوما. حبوبة لو فرحت فرحت،، لو زعلت لا تترك مجالاً لشعاع شمس بالدخول،، ولو (حدت) على أحد أموات الله،، لأضربت حتى عن الاستحمام،، فإذا ما عادت للحياة،، عادت نابضة قوية تسبقها ريحة الحناء والصندلية على بعد بضعة أمتار. لا وسط لدينا في كل الأمور،، حتى أمور العاطفة والحب. إما نحب إما نكره،، إما نكون مع،، إما نكون ضد،، إما تقومي تشوفي شغلتك،، إما الليلة ما يسكتني السكت بله زاتو. أنا احبنا كما نحن يا تماضر واحبك لله فالله حتى لو كنتي قنبلة موقوته أقبلك في بصي المتواضع هو أساساً ما فيه غير اربع لساتك وكنبة.
عايني، حاكتب بوست إن شاء الله عن خلق الإنسان والقرآن،، فكرت فيك عندما قرأته ليس لسبب بس كده أحببت أن تقرأيه أنت بالذات. وأحسن ليك تقعدي ساي بعد ده بقوم اوديك محل ما مشى جدي.
01-19-2004, 11:22 AM
nazar hussien nazar hussien
تاريخ التسجيل: 09-04-2002
مجموع المشاركات: 10410
بالله البص دا بعد ما يملا كبو لي الناس ديل في الشفخانه حيث اننا نعمل جادين ليل نهار في مشاريع التوسعه مواكبه للحروب والعواصف والزلازل والانهيارات الفوقيه والخستكات الانبعاجيه والامبكائيه زي حقت ناس تمبس ديل الحا تودي الناس التووج (قصدي الشفخانه) حيث اللا عوده واللا مضمون مواكبه مع الثوره الخنفشاريه التي احتلت من قبل مجهولين و مازال الوضع يوصف بانه ماساوي حسب تصريحات كوفي عنان الاخيرة
بالله ما تتاخرو والا حا نطالب ببدل انتظار و شرشحه قال ابو حراز قال
01-19-2004, 01:00 PM
tmbis tmbis
تاريخ التسجيل: 10-19-2002
مجموع المشاركات: 24862
.. . بص بنااات ؟؟ بالله هو بص بنات ؟؟ لا يا زول دا بص الكلاكله صنقعت سلام يا المنقذه شفت بالله مصطلح الانقاذ (والسماح) والاعتراف والهزيمة والانتصار والفرحه وكمان التربيط لا قصدى الحجاب كيف انقلب هاهنا ؟؟ شفنتيهم بالله كيف بتاجروا فى الدين ،، اووووبس ، قصدى بتجاروا فى المصطلحات ،، تجارة صارت مربحه بشكل خرافي والاغرب تجارة الاسماء ؟؟ فما اجمل اسم ( ***) -معليش لو جبت اسمه الهواء بقسمو - يعنى الواحد اليومين دى لو رزق ببنت - فجاة - واسماها بحرفها لاصيبت فى لحظة بضغط وسكرى وانتكاريكا وان حاولت مامتها تغطيها من صقيع هذه الايام لاصيبت بشزوفرنيا وتيبس فى النخاع الراسي وجلطة دماغية وان عطست وقلنا الحمدلله او ترنحت وقالت عفوا لاصابتها لعنة الفراعنة واتلم عليها الانس والجن . والاسواء لو رزقت فى غفلة من الزمان بفتى يانع اسمر الملامح اسميته محمد احمد وشاءت الاقدار ان ينزلق من شماعة البص ليسقط ضاربا راسه بشجرة وويقع مغشياً عليه .. هنا ستدق طبول المناحات والاحزان والغضب ومنهم من يصفه شهيدا والبعض يصفه شليقاً ومجموعة تكرم سقوطه واصحابه يرفعون نعشه يهتفون شرمت الشجرة يا محمود !! شرمه كبيره يا محمود !! ادفع قيمته يا هوووى ؟؟ معليش انا جاى ادفع 50 قرش ممسوحه الملامح وناوى الف الكلاكلات كلها من الكلاكلة القبة وصنقعت والوحدة الف وادور مع البص دا من ابو حمامه الى السوق الشعبي امدرمان وحتى الثورة العن الثورات .. ومعاها حاراتها ال 72 .. هل نماء الى علمك ان هناك 72 حارة .. يعنى انحنا قدرنا ننجح ثورة واحدة عشان يكون عندنا ثورة ب ام اتنين وسبعين قرار ثورة اكتوبر ثورة مايو ثورة الانتفاضة وثورة الانقاذ وكل ثورة علمتنا اسلوب يختلف ، وجدنا بقايا اكتوبر الممهور ورددنا الثورة انطلقت شعارات يرددها الالوف طلايع مايو وثورة مايو الاشتراكية ودراج المحن وهتفنا عما قريب الهمبريب يفتح شبابيك الحديد وشعبك يا بلادى يا بلادى شعبك اقوى اعظم مما كان العدو يتصور ويا شعباً تسامى . ثم اجبرنا لنأكل مما نزرع ونلبس مما نصنع ولكن كيف ذلك ومشروع الجزيرة اتشمع والوليد بن طلال يحتكر الضأن الحمرى تحت اقلام اولاد الدقير والان ابناء دارفور يقتلون باسم الفئات المارقة واهل العوض كرماء قوم ذل وكردفان تنتحب على 1.25 من حصة الذهب الاسود وتكتل ترهاقا يستعد وابناء الشرق يغطون فى سبات وهناك ومصير مجهول فى دفاتر نيفاشا عن ابيي وقيسان. بالله دا كلو ما بجيب المرض ويرفع الضغط والرهاب ولا الارهاب دا مرض جديد عشان كدا مفروض نرفع فراشنا الهنا دا ونغير الموجتين ديل بتاعت الاحتفالات والاسماء دى فوالله هناك قضايا اكبر بكثير من هذا المغص الكلوى الضغط الفكرى وونسة بيوت البكاء والقعدات الا وهو الهم القومى والحس الوطنى دا نتيجة تحليل فتح الرحمن البشير وصلاح ادريس كمان وتعينات الادارات فى الفرق السودانية ..
يا ناس انا الركبنى الفيل داشنو لا قصدى البص دا شنو ؟؟ هو بنات الزمن دا بقن يولعن خضراء كمان ؟؟ كل شئ جايز ؟ ممكن رفريش برائحة الورد هنا ؟؟
يلا صفقة صقفة في رجال؟ نزلوا لينا الرجال ديل وتسوق لينا بت على شرط ماتكون راوية ولا حنينة عشان قاعدين يعملوا حوادث انا دايرة اربط توبي فى نصي واحتو ليكم في نص البص دا يمشي الكلاكلة ولا القمائر ماعندي شغلة كمية من الضيق والزهج حاتتكب ارفعوا (كرعينكم) فوق حمادة بت ماحيطير الزهجة دي ولاتغريد وين كدا مابعرف عشان كدا احجزوا لى الاربعة مقاعد القدام ديل اجيب ليك شيخ خيط كااارب يخبط الدلوكة دى لمن تعرف حاجة كدي النشكى ليكن فى الأول مديرنا سافر الحج والحمدلله الباقين كلهم بقو مدراء ويابت ملكة افعلى ويابت ملكة اتركي ... يابت ملكة دا بعملوا كيف ويابت ملكة انت شن عرفك كل الجامعات فاتحات لى وكل الكورسات قايمات على والظاهر الحالة دى مأثرة على ودا قريتو فى وش الكدايس المركبنها لى أصحابي مرات الملم ليكن دفاتري واطب شنطتي واجي هاربة البيت ... افتح ليك الباب برااحة وادنقر بتحت الشبابيك لمن طق افتح الأوضة وقبل اخت الشنطة القى يدى اتمدت وطبزت كمبيوتر الجن دا اها كلام اخير منو كلام الساعة اربعة بتاع استاذ اللغات داك الصفحة الاولى كلهاجتاص وجا2 س اصلو ماتلقى ليك ظا هادي تشهق منه حبة نفس وما ضامن تقوم تزفر الجواك لب (تتكبع) فى نص راسك انا لى زمن بالحالة دي افتح المنبر واقول يمكن القي الشغلانات اتصفن الصفحات التحت ولا قام عليهن دودو بلعن وحاتكن تقول اى واحد داقنها ب ( مسامير صلب (اجبد) لى قتا واتدمدم انوم وتقلق بى الدبرسة وتتفرج 360 درجة وتحكم دائرة الملل مش لى حق انا برضو اطالب ببدل مرض وبدفع ليك نص التذكرة بتاعت البص دا ااااى انا طالبة وتاني طالبة..... وطالبة........ وطالبة ......... وفى الأخير طالبة منكن تعفن لى عشان استلمت الموضوع لكن زمن الواحد داير (بلطش) الكى بورد دا ومالاقى طريقة
01-19-2004, 08:32 PM
tmbis tmbis
تاريخ التسجيل: 10-19-2002
مجموع المشاركات: 24862
لقينا بت قضيم وشيرى عاملين شاربوت كارب والجماعة متلمين , قلت اخد لي قعده خصوصا بوجود الطيب وتماضر وبمناسبة الاحوال الجايطة بالبورد هذه الايام وتغير الحال اذكر ان احد الاخوة الصومالين الاعزاء قد حكي لي ان اللافتات كانت تكتب في الصومال بالانجلزي وبعد ثورة التعريب ان احد الحلاقين غير لافتة محله وكتب عليها( محلات قطع الراس ). والله يستر علي الجميع من الحلاقة. ودمتم مع محبتى..
01-20-2004, 08:11 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
هذا من غضبي عليك يا تمبس في واحد يزعل أمه؟؟؟ بسم الله،، الظاهر قهوة الصباح ما فكت شربوت شيري وصدقني ما بحب الشربوت. أما بعد فاتح لي مالك يا شين؟؟ أمس انطقيت في رأسي،، وقررت أن انظف مستواي الفني،، واستمع لإحدى الأغنيات (المستحمية) ،، حيث أنني من فترة طويلة جدا توقفت عن سماع أي أغنية لا يكون ضمن نصها (بص، ورقشة، وأنا أنا أنا أنا لو ين(غ)ذوني) وللآن أحاول التفكر والتمعن في مخارج حروف السيد فرفرة،،المهم أنني أمس قررت أن استمع لإحدى الأغنيات الهادفات،، مع أني لا اعرف كيف لأغنية أن تكون هادفة إن لم تكن خطبة جامع،، ومع ذلك فرفرت في أغراض أختي ذات المستوى الراقي،، فوجدت شريطاً جميلاً لإحدى المهفهفات شعرهن،، ماجدة الرومي،، وانا اعترف أن مستواي مش ولا وبد،، وأكيدة أنك حتقول البت دي متخلفة فنياً،، لكن صدقني جد،، كواريك السنين،، هي تصرخ وأنا استزيد في التباكي،،حتى إذا ما قلب الشريط الموضوع في الاستريو الفضي شبيه مركبات الفضاء،، انسابت أغنية ناعمة جداً،، جداً،، سمعتها قبل ذلك مية مرة،، لكن ولا مرة تمعنت في كلماتها إذ أنني كنت لما استمع إليها استرجع فترة مراهقة بلهاء،، وبي ركابيني ديل،، اتخيلني سندريلا (مزعمطة شوية) ، وأنا أطير في رقصة ما عافة اسمها بشوفها في دعاية لوكس،، فأعيش الدور تماماً،، حتى تصقعني إحدى الجمل الطايرة،، (يا بت قومي دلي الكفتيرا يدلدل مصرانك) فأصحو من إغفاءة جميلة تماما كما تتطرشق الفقاعة،، واتفكر لماذا لا اقوم وادلي الكفتيرا بس،، لماذا تتدلل مصراني مرة ومرة تتهلهل ومرة تنفقع مرارتي ومرة ترجع الموية في زوري ومرة يهد حيلي وتقيف قيامتي آآآل يعني قيامتي ماش تقوم براها؟؟ وأنا في هذه الحالة من التذكر تعود إلى ذاكرتي قصص العراق وفلسطين وجارتنا التي حلفوا قالوا ليها ود بتول مشا الجنوب رجعوا منه صباع وحلفوا قالوا ليها (تاني حلفوا) ودوا الصباع الاوستبالية لقوه صباع مفصد شايقي عرفوه (طووووووووووووواااااااااالي ) صباع ود بتول. تعود لي حالة الشلضمة وتتمد شفتاي ولاااااااا سرج العجلة،، أكتئب زيادة اصلي نكدية،، وتتدمر عندي كل إمكانيات التعايش السلمي مع هكذا فن نضيف،، وتندثر الكلمات التي ليست كالكلمات وتذهب مع الريح،، فووووووووو (ده صوت الريح) تمبس أنا ما عندي موضوع،، وكوني لا احك موضوع الشكلة مع (الكايداهم الفي السماحة فايتاهم) فما أعودك،، كل ما سبق كان محاولات فاشلة أن اتجنب التطرق للموضوع فبالله عليك فتوا كما فتت عوضية بنزين من قبل البن فهرسته أكتر من بن بارنيز والله يسألني ريحة الهبهان زاتو شميته فيها. يلعن شيطانك داخل بيني ورد شيري مالك؟؟ بوظت تنظيم البوست. ما عندك قنبلة افكها في المدير ده؟؟!!
01-20-2004, 08:49 AM
nazar hussien nazar hussien
تاريخ التسجيل: 09-04-2002
مجموع المشاركات: 10410
Quote: نزار حسين عندي ليك نكتة سمعتها الآن،، لازم ما افوتها قالوا الرباطابي قال لي مرته سوي لينا كوارع يا مرة،، المرة دايرة تستظرف قالت ليه،، اظبطها ليك،، قال ليها يعني حتلبسيها شرابات يعني لووووووول على المساخة
يا دوب شفت النكتة يا بت قضيم
ولوووووووووووووووووووووووووووووول يا ود البتول
الفلاتة عندهم فريق كورة..كل مرة يغلبوه..اجتمع مجلس الادارة..يناقشوا اسباب الهزائم...واتفقوا انو لازم يحثوا اولادهم ويحمسوهم للعب ويحفزوهم...ويسجلو لاعبين جدد...واول سؤال للاعب الجديد بعد الاختبارات...يسالوه اذا عندو حماس للعبة واللا لا
اول لاعب اختبروه في الميدان كان رباطابي..لقوه كويس جدا..وسألوه بعد الاختبار الميداني...عندك حماس..
قالهم لا عندي طالبان
ويا تماضر شكرا وكذلك انا احترمك الي ان ظنيت عندي فيك حق...بقيان واللا دم واللا جزء من روح...غايتو ما عارف...الشغلانة دي هشام زاتو داخل فيها...مش في ناس بتتباقي من بعيد لبعيد؟؟؟ شوفي الصلبتة دي يا بت قضيم...
ما تخافي بنزل ليك من بصك دا ما تقومي تحوليه لي القسم الجنوبي وهناك تفتيش السنين...يبدوها من عكازي...ان كان اسلحة دمار شامل ام مضبب
01-20-2004, 08:33 AM
Kabar Kabar
تاريخ التسجيل: 11-26-2002
مجموع المشاركات: 18537
الصـفية بت قضـيم..يازولة ياصـديقة..حبابك طبعا لو قلت ليك يا انا ..القصة قطع شك بتجيب ليها عكة..وعيال حلتكم ديل ما بقدر عليهم.. اها..وبعدين معاك..القرش..ده ياتو؟..الأحمر ولا أب جمل؟..بس يعني عشان ما يتلخبط علينا الاختساس.. بعدين معاك انا جني جن البصات البتشبه بصات السيرة..عارفة ليه؟..لأنو دي البصات الوحيدة الماركبتهافي حياتي..ويوم سـيرتي جاتني واحدة عجوز زي حبوبتك..وقالت لي..ياولدي خسمتك بالنبي كن ما نزلت لي من محلك قبل ما السيرة تفوتني..ولغاية هسـه الحكومة شايلاها معاي تقيلة بسبب كونها سارت مع واحدة عجوز.. وبعدين معاك..انا عاجباني جدا نظرية اخونا الشاعر دكتور تاج السر جعفر..وكنا وقتها نتفاكر في انشاء منظمة اسـبلتا بجامعة الخرطوم..حيث قال..
Quote: ازمة الشعب السـوداني سـببها عدم التوازن العاطفي..
تتصوري السنة دي هي رقم 14..ولازالت هذه النظرية تتأكد لي يوم بعد يوم.. في الأيام الماضية سافرت مع طفلتي كان عندها عملية للمرة الثالثة ..وبالمناسبة عمرها اربعة سنوات..وفي كل مرة اقول ادخل البورد واسأل الناس الدعوات والكلمات الطيبات..طبعا براكي عارفة ايه معنى الغربة لمن تكون في لحظات كتلك..لكن كل ما ادخل البورد اقول معليش الناس دي شكلها مشغولة اوي اوي..والغبار قايم والزبد متطاير ..وكتير منهم متأبطون شـرا.. لكن جات سليمة..وقرر الطبيب ان الحال لا يستدعي عملية في الراهن..وكانت فرحة..قلت خلاص امشي سـودانيز اون لاين واكرم لي ببوست كارب..وتاني القى ليك العجاج قايم..وقلت لنفسي معليش يا ابوحميد تعيش وتاخد غيرها اصلـو الناس دي لسـه شكلها مشغولة اوي اوي اوي.. فجأة نط علي ســؤال لئيم..وهو الناس اساسا بتكتب في البورد ده ليه؟..وماذا يعني البورد اسـاسا؟..وقامت على حالة فلسفة مدنكلة.. يعني لو فقط الناس حست بالاحساس الحقيقي لمعنى الغربة والتشرد..وصقيع جليد الشمال التافه..كان على الأقل رحمونا من عواء الجنس والدين والسياسة.. نعم البورد وطن.. والبورد مظلة والبورد سبيل يروي العطاشى والبورد متكأ وحنية والبورد بص لكن المعافرة الشديدة مرات قد تؤدي الى تدمير فكرته الأساسية.. في مرات كتيرة بحس بالخوف..يعني لو دي طريقة تعاملنا مع الأشياء ح نفضل في دائرة محلك سـر.. واضـم صـوتي معاك..واقول انا ذاتي داير بدل فرح اسمعي اتم ليك الونسة بكرة في خلطة كاربة..اهسع لازم انزل شايف الكمسارية جاية علي ..وفي حالات زي دي زي ما انتي عارفة الشتات واجب..ولا خايف اقوم اطرب حبتين عند اللزوم واقوم اكشف مع بلقيس..وبكريتها تطلع الجرايد بقصة البوردابي الراقص..اصلا ..يعني عشمان لي بنائب عام في الزفة الجاية.. اللـه يخليني ليك..
كبر
01-20-2004, 10:41 AM
الجندرية الجندرية
تاريخ التسجيل: 10-02-2002
مجموع المشاركات: 9450
صـديقتي واسـتاذتي الجندرية..حبـابك كل سنة وانت بخير.. كتر خير المهم الخروف مدسوس.. لكن في عنبلوق ينفع؟ المهم مؤقتا.. عليك بحكاية البنت التي سكاها القمر ودمت كبر
01-20-2004, 08:48 PM
ملكة سبأ ملكة سبأ
تاريخ التسجيل: 06-18-2003
مجموع المشاركات: 3855
تمبس يا اخوي جيييب القرش وبطل حركات قال اتنشلت قال ماعندكم كلمونا من تحت صديقى كبر كان جيت كبيت الزهج اظن احسن ليك من حكاية النائب (العام) دى بت قضيم مدير ناس منو؟؟ شيري رايك شنو فى مرة جيرانهاالكان خيطها (سبعة مراكب كلهم نصارى ولابصومو ولا بصلو) وسجارتها الماخمج في عين اجعص جعيص؟ وعلاقتها بعلمنة العاصمة وتيار السلام القادم والجو السائد عموما فى البورد الايامات دي ولا اقول ليكم خلو بص سيرة احسن وتانى نعم لانفصال الرجال وامشو عيادة إيهاب احسن ليكم خلونا نشوف اشغالنا
01-21-2004, 06:49 AM
bayan bayan
تاريخ التسجيل: 06-13-2003
مجموع المشاركات: 15417
والله بوست منقة بس عللى البص بدورو يمشى الكدرو فيشان جيرانا لينا عندهم وفى.. و نحنس ولا نطلع المسدس ونختطف باقى باظ(كما تقولها جدتى) بتاع نسوان بيكون هين موية)
سيداتى آنساتى سادتى قد تم اختطاف هذا الباظ وسيوجه الى الكدرو وانا معاى مسدس و علية مليانة كتاحة بالله ما تخلونا نغلط فيكم ولا زول يموت يا الكمسارية قلعى دهبك وجيبى كيس القروش ودهب كل البنات والمطابق خاصة مطبقة الملكة لانها شغالة ..
01-21-2004, 07:58 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
يا جماعة اعتذرعن تأخر الرد امبارح جابوا لينا خير ما ياهو،، عمي الذي اغترب لقرابة الخمسين سنة (دي مبالغة لتفعيل الموضوع)، اشترى ارضاً من السبعينات واللا التمانينات لا اعلم،، عن طريق سفارتنا العزيزة في دولة الاغتراب التي كان مقيماً فيها،، أرض بالتقسيط من تلك الأراضي التي تعرضها الحكومة فرص للمغتربين،، المهم أن عمي اشترى الأرض،، مقسطة،، واستلم اوراقها،، وشهادة بحثه،، وعال العال،، بنى عليها (العومارة)،، وزرع فيها النيمات الطيبات،، ومر على الموضوع قرابة ثلاثون عاماً،، انقلبت فيها الحكومة،، وتاني قامت انقلبت،، ثم تاني قامت انقلبت (ما احنا ما روانا حاجة غير الحكومة تتقلب تقول مرة حامل) ثم يوماً اتوا ناس ورزارة ما عارفة ايه،، وناظروا للعومارة الجميلة،، ثم ناظروا لعمي الذي اصبح شبيهاً بعلامة الاستفهام من التعب والمرض والغربة والصقيع ومرته ونجاضها،، فاستخسروا فيه ذلك،، وقال احدهم،، ود الذين والله ما يستحقها،، ووقع الأوراق الرسمية التي تنص على ان عمي (الله يديه العافية) لا يستحق (بتاتاً) هذه الأرض لأنه لم يكمل اقساطها من ثلاثون عاماً،، وبالتالي سقط اسمه من ملكية الأرض، وكل ما بني عليها يؤوول بالتالي للحكومة،، ويا إما يدفع ثمن الأرض من جديد بسعر الأراضي الحالي ، وبعد ما الأرض اصبحت درجة أولى،، ويدفع بالعملة الصعبة،، أو تصادر الحكومة البيت. عمي الآن في المستشفى،، وحالته الصحية متوعكة،، وضغطه في السما وسكريه في الأرض وبفتشه في السودان في حاجة ترفع ليه سكريه واللا تعدله،، ولم يجدوا الأنسولين،، وقد نصحهم عارف ببواطن الأمور وخبير في سوق ليبيا،، أن الأنسولين بتباع في سوق سعد قشرة. لذلك تأخرت عن الرد لأني انا زاتي مرضت زيادة. والله العظيم ما شاربة حاجة ، وحسبي الله ونعم الوكيل.
01-21-2004, 08:18 AM
ايهاب ايهاب
تاريخ التسجيل: 05-06-2002
مجموع المشاركات: 2878
إيهاب يؤسفني القول أن حالتك اتأخرت شديد،، واستفحل مرض الخنفشارية فيك وكلو من بيان،، وبيان دي زاتها انا ناوية انسفها مع تماضر لأنها برضو مرات مرات بتجيب لينا الهوا. أما تمبس فاعدك أن ولا شفخانة في البلد راح تعالج مرضه العضال،، يا بوي كلو بتداوي إلا .......... نزار حسين ممكن يشففك النقط،،، أصلو هو شفيف. تمبس بمناسبة اديني الباقي،، ما تدفع حقو في الأول بعدين نديك الباقي؟ انا ماعارفة كمساري الباص ده لسه بحضر في شربوت العيد للآن؟ حقو اقيلوا للصالح العام اسمع،، ما تنزل لينا الأغنية التي تقول (أديني رضاك قدامي سفر،، لاي لاي لاي لاي لاي لاي لاي لاي لاي) وأنا بدوري سأهديك في (الليلة ديك) تماشياً مع روح العصر والنكسة لوووووووول.
01-21-2004, 08:25 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
تماضر صدقيني لو كنا جينا روس،، برضو كانت الزعمطة واردة،، الم تسمعي الكابلي وهو يشجي (والحال ياهو نفس الحال) يا حبيبتي هذه حقب وموروثات وأجيال سنين عددا من الودك والكركارات. بتهزري انت
01-21-2004, 08:59 AM
nazar hussien nazar hussien
تاريخ التسجيل: 09-04-2002
مجموع المشاركات: 10410
سلامة عمك يا بت قضيم وربنا يشفيهو بس خايف الجماعة ما يدخلوا عمارتو من ضمن اتفاق تقسيم الثروة. ولكل الركاب في هذا البص القيافة رحلة سعيدة، وبعدين زي ما سمعت في قناة الجزيرة واحدة بتسأل نفسها يوميا ماذا افعل في هذا المكان ؟
01-22-2004, 10:08 AM
HAMZA SULIMAN HAMZA SULIMAN
تاريخ التسجيل: 04-20-2002
مجموع المشاركات: 3278
انت يا بت عمك دا اتلحس ولا شنو ؟؟ بهزر والله العظيم الواحد بقى بخااااااااااف عديل كدا ..ربنا يمد فى عمره ويديهو الصحه والعافية .. اسمعينى انا رفعت البوست دا لانو فى اسبوع ثقافي فى البورد ونفتقر للعنصر النسائي كلهن لبدن .. التقول احرمن لكى يحجن او ناويات يخبزن مش دا شهر النفقة .. قصدي الخروف . زى ما قلت يفتقر الاسبوع الثقافي الذى تبناهه الاخ / ابمنه ودعم لفيف من الفطاحلة - زى كدا - يفتقر للعنصر النسائي كما اسلفت ورغم علمى ان الجينات الذكورية عندك تطغي بسبب ارهابك لجمع غفير من البورداب الا اننى افتقدك وكمان الشحرورة شيرى .. عليكم الله تعالوا ان شاء الله تفرشوا تسالي وفول .. وبوست فلته منك كدا بدعم وبنجح الاسبوع .. النبي فيك كن ما جيتى .. سمح .. وكلمى شيرى ..
بجى اشوف الحاصل شنو ؟؟ خلى بالك من الخميرة ما تزيدها شديد ..
فيووووووووووووووو
****** عارفة الكلام دا كتبته بعد 24 ساعة حسب تاريخ التعديل التحت اصلو جانى كابوس غريب ، جاتنى عجوز شمطاء قبيحة المنظر وتشبه الفاضل سعيد .. والكلام ليك يا المبحلق عينيك المهم العجوز دى هزئتنى وقالت لى انا جيناتى الذكورية طاغية وهاك يا خبيط وجاء واحد كدا بشبه نزار حسين والله ما عارف الدخل نزار فى الكابوس دا شنو المهم نزار دا قال تستاهل عشان كلامك .. رغم انه والحق يقال ما بيناتنا احتكاك مباشر .. مش كلام غريب يا نزار حسين .. اها فكرت امسح جزء من تعليقى لكن قلت خليك عندك شجاعة ادبية يا تبلدى يعنى شنو لو هرشوك ما زيك وزى ناس كتار .. اقعدوا عافية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بت قضيم
shiry
tmbis
Tumadir
nazar hussien
ايهاب
الجندرية
ملكة سبأ
مسامير صلب 
الطيب بشير
Ehab Eltayeb
Kabar
bayan
ASAAD IBRAHIM
HAMZA SULIMAN
Osman Hamad
فيس بوك
تويتر
انستقرام
يوتيوب
بنتيريست