أسد سوداني اغترب شالو من السودان ودوهو حديقة الحيوانات في السعودية !! الأسد السوداني متكيف كيف شديد قال : السعودية دي بلد تمام القفص نضيف والحديقة جميلة ياخي انا كنتا عايش في السودان في كوشة عديل كده والحمد لله هسه مرقتا منها !! أول يوم جات مواعيد الوجبة في حديقة الحيوانات السعودية، الأسد السوداني قاعد وخالف رجل على رجل راجي اللحوم لكن الحارس الهندي جاهو بي صينية كبيرة ملانة موز!! الأسد السوداني اتخلع وقال في سرو: الحارس الهندي الاروش دا اكيد جاب الموز دا بالغلط أو الصواني تكون اتبدلت !! الأيام البعدا الحارس الهندي شبكا ليك الأسد السوداني صواني موز موز وقصة الموز بقت مدوره كل يوم!! في اليوم الرابع الأسد السوداني زهج زهج شديد وخمش ليك الحارس الهندي من رقبتو وقال ليهو : عاين لي هنا دا كويس أنا شنو؟! الحارس ردا : انتا أسد!! الأسد السوداني قال ليهو: ياخي كرهتنا الحياة ذاتا شنو شابكني كل يوم موز موز انتا مجنون واللا شنو؟!! الحارس الهندي قال ليهو : معليش بس كفيلك جايبك بفيزة قرد ... يا تنقل كفالتك أو تاكل موز وتسكت بس!!! فيصل الدابي/المحامي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيصل الدابي المحامي
فيس بوك
تويتر
انستقرام
يوتيوب
بنتيريست