|
|
 الهندي عز الدين !!
|
الهندي البانجوت (البانجوت يا صاحبنا بلغة اهل الهند وسحرة السند مفردة معناها يختلف عن مدلولها يستخدمها الصديق لتوطيد المحبة بين صديقه - رغم غلظتها - وعندنا ذلك في السودان يقول العارفون باللغة استخدامها يدخل في القوس (بتاع) (بينهما متشابهات ) .. وفي ذلك فليتنافس المتنافسون ..
أقول ..
أزعجني تعاملك مع كافة الاشياء من وقوفك على مستوي سطح البحر وهو ما دفعني لفرد هذه المساحة اليك وانت يا صاحب (تستاهل الضبائح) ..ولو انك وقفت على بلكونة سطوح عقلك لوقف قلمك من تلقاء نفسه عمودياً على خط الاستواء الساعة (اتطناشر شوكة )..وهو -بالمناسبة- امر تراتيبي لا يحتاج كثير عناء او جهد ذكاء ..
وهنا اشاراتي - بالمناسبة - لا علاقة لها بتهمتك لي باني ساهمت في رفع بوست مال الجامعة المنهوب إذ قلت انت ان الجميع زار البوست وعمت فضائح الشيوعي القرى والكمبو . او (الكمبوس) والسين هنا S الجمع .فتحليلك للحالة كيزاني (كلاسيكي) . و(كلاسيكي) هي دافعي للكتابة اليك . فأنت وبمكابرة بليغة تنفي اهمية اعتراض كل المشاركين على طرحك وتعمل بنظرية الكوز في الوضوح اذ يقول للأعور ان عينك السليمة (تيك تاك) وتيك تاك ياهندي بلغة اهل الهند تعني تمام التمام . لكن (ما علينا .) .. لا ارغب التدوير الحرفي حول البوست المعني لكن يجدر القول انه اشارة وطنية حادة ضد تيار النظام ، ولو أني سلطت بطارية داخلك سأجد شرخاً من اتونه .. لا عليك ففي ذلك - ايضاً- فليتنافس الشباب و (كدة) .
كما انا يا عزيزي لا اعني بـ(كلاسيكي) اتهامك لكل من نازلك بأمر فاضح ولو انها (جد جد) تدخل خلال ايدلوجية العمل القديم للتيار الاسلامي اذ تطيح بطرح كامل باشارة أن صاحب الطرح -مثلاً- يتعاطى الخمر وهذا للمعلومية صفات الكوز (الحمام)، والحمام يا عزيزي يستخدمها الندامي متعاطي الخمر للذي يحكم علي (المريسة) من مظهرها الخارجي . يقولون انه كالحمام يمشي في (الجمادة) و لا يعنيه العمق .. وفي ذلك قول حرام ..
كما اود ان اوضح لك انني حينما اتهمتك بلحس وتطبيب الاسياد، لم يكن ذلك من باب الرزيلة واطلاق الفواحش والألقاب ، هو امر واقع وانا اتفهمه من واقع اطروحة (علاقات الأنتاج) ، وبما ان لحس وتطييب لم ترد في واقع علاقات الانتاج فالمشكل فلسفياً لا يمسك بشكل مباشر انما يدين بلاد النيل من نمولي الي حلفا ، السودان لم تتشكل له آلية اقتصادية علمية ، فهو مزيج من رأسمالية واقطاع وممالك وجهويات ، واشتراكية شعبية وو .. الخ ، خلق شائه ، كبشر والده حمار عليه فإن علاقات الانتاج داخله تاتي شائهة كخلقته ، فتجد من يجيد مساج صاحب العمل ومن ييقظه من النوم ، وهكذا .. وهو امر به حرج .. و ..ما علينا (برضو).
لقد قراءت مقال لك وانا كما اسلفت في مكان ليس هنا . نعم انا قاري جيد لك ، قراءت لك مقال ونصف وليست ما يعيبني سوي صبري المديد وما انا بظلام للعبيد ، اعني .الصحفيون. قراءت الأول وكان يخص الكاتب محسن خالد . ومحسن لمن فاته قطار الذائقة علامة فارقة في تاريخ الادب العربي والأفريقي ( الأفريقي اكتبها شان خاطر بشاشا) . ولم يكن تعليقي الذي سجلته علي دفتر تركته علي رف ذاكرتي ، انه راي مخالف . وهو امر صحي .
قبل ان نعود الي نصف المقال دعني اقول لك ان شخصية الاسلامي قامت على نظرية الانسان الكامل . كامل بمعنى تصديره ككادر لايأتيه الخطاء من دبره او قبله ..وهي نظرية هشة فأالانسان له نوازع وشهوات واحتياجات ، يقول كاتب كولمبي مغمور (روبرت باتريسا) بذكاء انه حينما دخل السجن صادفه زعيم حزبه في نفس الزنزانة . يقول طيلة انتمائه للحزب لم يسمع من هذا الزعيم سوي
positive concepts اي اذا افترضنا المعادل الموضوعي لهذا الزعيم وهذا الحزب هو الجبهة الاسلامية ، فأن الكادر عليه ان يظهر مظهر خلوق ، يقول روبرت باتريسا انه حينما اشتد الحال في السجن وقلً الأكل فان الزعيم صار كالعامة يسرق خبز الآخرين ، ويخبي سجارتة لا يدخنها الا حين لا يجد من يسرقه سجائره ، سأل نفسه يا هندي سؤالاً فصيحاً هل يرتد عن التنظيم ام يعتبر ذلك امراً طبيعياً ، اي ان الزعيم بشراً وكان عام الحال ان من لا يسرق لا يأكل ،، (دي واحدة)..
(التانية) .. يقول النقاد عن رواية (البحث عن وليد مسعود) للكاتب الفلسطيني جبرا ابراهيم جبرا . ان الرجل حاول تصوير المناضل الفلسطيني في هئية الانسان الكامل لذا جاء ايقاعها مملاً لا منطقياً،مسعود في الرواية كان سوبر مان قوي. خلوق. صادق. جسور. واضح. مقاتل. وسيم. !!!(معقولة بس!!؟؟
وعدتك ان نتطرق لنصف المقال الآخر وكنت تقول فيه .. بالمناسبة لا احبز ايراد مقتطفات من كتابات العباد لا خوف احراجهم فحسب بل ربما ان يبدلوا افكارهم تبديلا (كلو وارد) ويومها نرضي عليكم ولا خوف عليكم- حينها- ولا يحزنون..
تقول - فيما معناه - ان كثير من العباد يردد انه حينما يقول السلام عليكم .. السلام عليكم لختام الصلاة يلتفت يميناً فيجد نافع علي نافع وحينما يلتفت يساراً يردد السلام عليكم يقابله ابوالجاز ..
(يا راجل) عند هذه النقطة من المقال نفد مخزوني من الصبر ولكنه للحق اعادني الي (دردق) والي ريان الصغيرة ، ريان طفلة حلوة تقضي نهارها تتمايل تضع كلتا يدها علي خصرها تردد (اقبل جاي اكب الشاي اقبل جاي اكب الجاز ) .. الجاز اضافة مني لكني تخيلتها تستبدل القهوة بالجاز .
وهو ما اعنيه بانك كوز كلاسيكي وان بصيرتك من التعليم ثانوي . ولا اساءة في ذلك يا هندي فأدواتك الفكرية ليست متماسكة ، واقول ان وجودك في صرح اعلامي ديمقراطي كسودانيس اون لا ين يحرج اولي الامر ، ويفتح صفحاتك وهو - مؤكد- سبب خيارك الغياب لشهر قادم ، هذا الطرح يا هندي أقامه حسن البنا وشيعه الترابي ما علاقة الفساد في البترول - مثلاً - بدوام ابوالجاز علي صلاة الجماعة ، وهل يعفي نافع (برضو مثلاً) صلاته من اغتيالات ادارها. هندي . انا هنا ليست بصدد الكلام حولهم انا اود لو تشاركني تشريح حالة تفكير انا اسميها primitive way of thinking او Primary way وهي دعوة لتطوير ادوات العدو ليكون الصراع متكافئاً (اقول العدو ولا اقول الخصم فاالاسلامي Enemy عدو تماشياً مع حديث شريف جداً اقول فيه العدو القوي خير واحب اليً.. أردده كثيراً لان حيال الضعيف يكون الرد غدر ..
هندي ,,
طيلة يومين (لا اعرف ان كانت يومين ام يومان فانا غير متابع جيد لبوست اصلاح الكتابة في المنبر)وانا مشربك بالاندهاش اثر تصفح ردودك في المنبر ، تغيرت الاشياء . تبدلت الدنيا وتعلومت وتنتت (تنتت تصريف للنت) ، تجاوز الناس طرح هذا يصلي جماعة و ذاك يسكر ، لم يعد الترابي يزف الشهداء نحو حور كاللؤلؤ . توقفت الغيمة التي تفصل جيش الكفار عن جيش المسلمين عن الهطول..لا يستنشق المحارب مسك من صديقه المستشهد ..
لكنك يا هندي مازلت (ماسك) فيها رغم انف النت والعولمة ..
لي عودة للاسهاب حول (كلاسيتك)..(فأنا بالمناسبة ليست عاطل الا عن الامل) ..
متوكل التوم
|
|
 
|
|
|
|
|
|
|
|
Re: الهندي عز الدين !! (Re: mutwakil toum)
|
الاخ
متوكل التوم
الهندي عز الدين لا يستطيع أن يرد على هذا الكلام لأنو ببساطة ما بفهم قدر دا , يعني عندما تحاول أن تكتب في شأن الهندي فعليك ان تتخير لحظات مناسبة , مثلا تكون سايق في الهاي وي وبتاكل في ساندوتش وبتتكلم في التلفون وفي نفس اللحظة بتكتب عن الهندي عز الدين , وعندها يمكن ان تنتج لغة مناسبة يسهل على اخونا الهندي استبعابها .
| |
|
|
|
|
|
|
|
|
|
Re: الهندي عز الدين !! (Re: معتز تروتسكى)
|
الاخوان معتز و د. متوكل: سلامات
الهندي عزالدين من الذين تربوا على تربية دينية انتقائية (جهادية)قائمة على قتل الاخر ودخول الجنة لكن عندما تحور اصحاب المدرسة وغيروا نهجهم الي زرع القبلية والجهويةعلى جسد الوطن مع قتل الاخر ليس لدخول الجنة هذه المرة بل لتدخل يدك الي جيبه ثم لتستغفر ليلا. فهو لم يستوعب هذا التحول لذا تراه يتخبط دائما.
الله يهديو
| |
|
|
|
|
|
|
|
|
|
Re: الهندي عز الدين !! (Re: hamid brgo)
|
اخونا الفاضل حامد برقو ، اولاً مرحب بيك ، وربنا يقسم ليك مناقرات مريحة في البورد ويكفيك شرً الخصم البليد .. قول آآآمين .
اطن ان التحول الذي تطرقت له ناتج من الاحساس بضيق الوقت ، وبالمناسبة عدم الاستيعاب للظرف الذي تحدثت عنه (اداني ) فكرة اضافية حول كلاسكية الهندي . فالرجل اشبه بـ(كوز) تمً سجنه خطاءً يوم 30 يونيو 89 وتم عليه الافراج الآن ، غير مستوعب لمستجدات بوضوح شمس الساعة (اتطناشر) ..
لك الود . ومتنياً -مجدداً- اقامة طيبة
| |
|
|
|
|
|
|
|
|
|
Re: الهندي عز الدين !! (Re: Marouf Sanad)
|
الاخ معروف . كيفنك ..
اذا كان وجود الهندي في البورد نموذجاًاو مندوباً للنظام زي ما قال انو في مهةاصلاحية ده مؤشر انو النظام (قاعد ساي) . ودي ما مفاجاءة لكن الصحافة ، دي جريمة يا اخي مفروض يعلقوا عليها يافطة مرسوم عليها طبلة ومكتوب عليها out of order
اتوسمت فيو خير عشان كدة كتبت ليهو في الهاي وي لكن مآكل والتلفون (آوت اوف سيجنال) ..
تسلم ..
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
الأخ متوكل
لك التحية
يقيني بأن الهندي عز الدين ما عندو انقليزي قدر ده.
وهو يفهم بلغة السباب المباشرة ويفهم من هذا النقد سبابًاً.
على أي حال الهندي تقاضى عن سرقة الكيزان وتحديداً أهل الإنقاذ.
ربما لأنه يرى أن الله يحلل لهم السرقة لأنهم يخدعونه كما يخدعون السودانيين بأنهم
سوف يقيمون له دولة الاسلام
وهو جاهل بأن ربنا سبحانه وتعالى في غنى عن دولة الظلم حتى لو كانت بإسم الاسلام.
وأنه خلق الانسان خليفة في الأرض ليعمرها ويقيم العدل.
الهندي كاي كوز دنيئ يستغلى( اي يشوفها غالية) الحياة والرفاهية للخلق
ويسترخصها لنفسه من وجهة نظر فاشية
وهو بذلك يسوق الوهم لنفسه وللأغبياء أو المنتفعين.
ليته يعلم بأن الانسان السوداني البسيط لا يهمه من يصلي ومن يصوم في القصر
ويستخدم سلطته ليصوم الشعب تكفيراً عن أوهامه وتسويقاً لسفالاته.
لكن يهمه أن يجد لقمته بشرف وأن يربي أبنائه بنزاهة وشرف ولقمة حلال.
يعني محمد أحمد عندو الجاز ونافع وضار وبشير ونذير واحد
هم من جوعوه وعياله.
هم مثل أعلى بالنسبة للهندي عز الدين
والطيور على أشكالها تقع
لكن عندنا نحنا ديل حرامية وعارفين أي درهم سرقوهو وأي أرملة أو شابة تزوجوها ودفعوا مهرها
من مال الغلابة
ودم رفاقهم
ولن نحترمهم وأن دافع عنهم أصحاب الأقلام الغبيانة.
| |
|
|
|
|
|
|
|
|
|
Re: الهندي عز الدين !! (Re: شادية عبد المنعم)
|
الاخ...متوكل لك مني سلام..
اراك استدعيت بعض من الكلمات الهندية في تحليلك لهذا الهندي
الذي يمثل تيارا طفح في الساحة السودانية ملي بالارزقية والتسلق
وحياكة الموامرات اوالاكاذيب ...ويمشي دوما علي اجساد ضحية بريئة..
بكل غلو وعدم ضمير........
واري ان الشعب الهندي من اعمق الشعوب واكثرها تعبيرا عن خصائص
الناس.....ففي اللغة الهندية هنالك كلمة(جم جه)....وهي وصف صادق لمثل هذا الهندي الذي
لن اقبل لنفسي ان اطلق عليه (صحفي)...
فا(الجمجة) دائما يبحث عن مصلحته ويحاول الوصول الي القمة دون ادني موهلات
او ضمير..ويحيك الموامرات والفتن ..ويخرمج الاشياء ليصطاد في الماء العكر...
ودائم الولاء للمدير..(مات المدير عاش المدير) هذا هو شعار الجمجة
.......
وايضا يصفهم الهنود ويقولون ان فلانا(مني مني)...اي انه
اليوم هنا وغدا هناك.....وهولا الشخصوص ينتشرون في كل العالم..
وينشطون في ظل المحسوبية والفساد وغياب الوعي والموسسية....وهم ليس في مجال الصحافة فقط بل في كل المجالات.................................
ويقال ايضا (جام جو),,,واظن الوصف يليق بصاحبنا هذا الذي
يبدو انه قد هرب الهروب الاخير.....ولكن فيعلم ان ان هروبه لن يثنيه الي الابد
من العقاب....فان هرب من سودانيز اون لاين....فهل سيظل يهرب من ضميره...والي متي........
| |
|
|
|
|
|
|
|
|
|
Re: الهندي عز الدين !! (Re: عبدالكريم الامين احمد)
|
الاخ الحبيب .. عبد الكريم الامين ..
استمتعت جداً بمداخلتك ، وسرحت في اللغة الهندية ولقيت كيف انها بسيطة وبليغة وندمت (او شبه ندمت انني وصفته فقط بالبانجوت ، فكلمة (بكواز)تليق بالحال وتعبر عن شخصية البورد لهذا الشهر ..فلها معنى غير مباشر للانتهازي المعني ..
شكراً عبد الكريم
| |
|
|
|
|
|
|
|
|
|
Re: الهندي عز الدين !! (Re: شادية عبد المنعم)
|
الاخت الكريمة شادية، شكراً لهذه المداخلة القيمة التي اختصرت بعملية عقلية الهندي ، اشباهه والتابع لهم ، كيفية تفكيره وسطحيته ، انانيته ،،
ولذلك مؤكد اسباب سايكلوجية وتراكمات اجتماعية ، اتمنى ان يسغف الوقت للتطرق اليها . واحدة واحدة
شكراً مجدداً اخت شادية
| |
|
|
|
|
|
|
|
|
|
Re: الهندي عز الدين !! (Re: خالد احمد عبد المنعم)
|
الاخ العزيز متوكل
تسعدني كتابتك وتحرك حس الذواقة في داخلي..
شكرا لك على الامتاع رغم سخافة القضية..
التى ارجو ان تكون في ميزان
حسناتك..
واتمنى ان يعتذر الهندي لك ويطلب العفو
اذ ان ما اتى به ضد مرجعيته الدينية.
التى وضعت وحددت قانون حدي لما فعله
وحددت طريقة الخروج من الذنب وهو بالاعتراف الصريح
بالجريمة وطلب العفو...
هذا ليحدث التطهر قبل الآخرة..
لان ما فعله من الموبقات التي توجب جهنم
والعياذ بالله
من قاذفي الاعراض ومؤلفى الاكاذيب.
وستكون انت دائما متوكل الكتاب
شديد الذي نفخر به..
فلا تحزن ولا تاسى كلها طرقعات لا غير
تضامني الكامل معك يا ابو ريم*
الخطا النحوي متعمد لانها تكون هكذا اجمل واكثر حنية..فمعذرة
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
دكتورة بيان (بهار البورد) ..
تشكري يا دكتورة ، بس جد المتعة بلقاها في كتاباتك ..
تعرفي في كتاباتك بقراها بصوت عالي في البيت (فمنهم من يستفيد ومنهم من يضحك ومنهم من لا يفهم ومنهم من ينتظر (دي ريم)..
اما بخصوص الهندي الراجل فتح البروفايل لقى الاسم والسكن طوالي عمل سيناريو بتاع فضيحة (ربنا ما يسامحوا) ، انا مرقت من الانقاذ قالت الله اكبر وكفكفت كم العراقي يعني جيراني بي الحيطة الا يرسموني ليهم ، آآ يجي الهندي يعمل لي فضائح ، (واللهي ياهو) ..
غايتو لي خير
تسلمي يا دكتورة وشكراً علي الطلًة ..
| |
|
|
|
|
|
|
|
|
 Re: الهندي عز الدين !! (Re: mutwakil toum)
|
هـو خـلاص شـكـله طـفش .....بس درس قاسـي يتعلم منه لـو عنـده قليل مـن حـيـاء!
عـارف يامتوكـل...ده زمـن تشـوف فيه المحـن!
أي صـحـافة هـذه تلك التي تستخـدم أمثاله?
مـني
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
الاخ متوكل
ده برضو حتة من الارشيف عن هذا الهندي المشهور
لذي يكتب بالملايين وليس بالمجان
امثال الهندي لا يصنعون الاحداث , ولا هم من الذين تجدهم عند
"الجد جد" , وكل سلاحهم التجريح والاساءة والنبش المغلف بغلاف
النقد الغير موضوعي الموجه تجاه اهل القضايا الحقيقية
, فتراهم من اكثر الناس "تشعلقا" باهل القضايا من بوابة
النبش , لامن جهة النقد من اجل الظهور والعيش في الحبور
علي حساب المهنة التي هي مهنة المتاعب لاصحابه الحقيقيين
الباحثين عن الحقيقة بينما لامثالهم مهنة "التمكين" من خلال
تمجيد بطانة السؤء من وزراء "العمارات " و"المضاربات"
والتنكيد علي اهل القضايا .
هذا الهندي كل مجده الصحفي "شهاداتي لله" يقوم علي فقه
التجريح والتقليل من قدر الآخرين وتنبني علي فكرة الوصايا
وادعاء الطهرانية وهو الذي يعتاش من ريع الصحافة
الانقاذية التبريرية التي تغطي علي جرائم النظام و
الفساد الذي ازكم حتي انوف الفاسدين انفسهم ---فاستقالوا
---ثم عادوا –ليفسدوا –ودونك عبدالرحيم حمدي اقرب بطانة
الرئيس الذي يحتفي هذا الصحفي بامانتهم! .
وللمزيد
الهندي عزالدين و (جنى الجداد) الهندي
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
الاخ المتوكل
لا يكلف الله نفسا الا وسعها - الزول ده ما عندو اكتر من كده-
هل الانقاذ كمدرسة تعلم و تعلق بها، افضل من الهندى بشئٍٍ ليأتينا به؟؟؟
انتو دايرنو يخلى الكتابة!!! ده بيكتب بالقروش "الملايين"
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
تعرف يا متوكل
قبل فترة كان فى شعار فى إعلان بتاع واحدة من العربات الفخيمة جدا، عجبنى عجب شديد، بقول
"سعى نحو الكمال لا يعرف الملل"
وفيهو دلالة قوية جدا على "حرفنة" الزول أو الناس العملوهو
يعنى من المسكة القوية والإصرار على "السعى" وممكن تغير الكلمة شوية كده عشان تبقى "السعاية" ومخك يمش بعيد لغاية "الصفا والمروة" وتتذكر نكتة طيب الذكر "عوض دكام" ساعة فتر داك وهو فى عز السعى، وممكن كمان المخ يمش ابعد، وإنت فى معنى السعاية، لى تربية الحمام والجداد وبقية الأنعام، المهم يا زول الحكاية كان هنا وهنا ما مارقه من المعنى السمح
اها نجى للكمال، وهو ما سوف لن يتحقق ابدا، وإلا تساوت الآلهة مع أهل المرتبات الأدنى من صنائع الخالق، يعنى الشعار أعلاه، إقرار بالحقيقة دى من جيهة ومن جيهة تانية تأكيد على التجويد
و"لا يعرف الملل" دى ممكن نختصرها فى كلمة ظريفة جدا وهى "العكلتة" بمعناها البوزيتيف طبعا
الكلام ده خارم بارم ساى أظنه
لكين أنا على يقين إنه بكون وقع ليك تب
طيب
كدى النقول ليك حاجة تانى
هسه انا بتخيلك، وغير بعيد عن هذا المقام طبعا
بتخيلك فى مناسبة عندكم فى البيت وإنت واقف مع اولاد الحلة والأهل "تركبو ليكم فى صيوان"
اها إنت واقف وعرقان وعراقيك وسخان وحالتك بالبلا، وقاعد توجه فى الجماعة، مستصحبا بعضا من نظريات وتطبيقات ال Structure حرصا على التجويد طبعا عشان الصيوان ما يميل بى جاى ولا جاى، وشوية من ال Logic عشان المحل ده يكون اوسع شويه والحتة دى اقرب لى شنو ما عارف الخ، والجماعة المهم عايزين يشدو الحبال ويحفرو الحفر فى الواطا والصيوان يقيف ويكون فى "ضُل" والسلام، وإنت روحك مارقه
بعد شويه يقوم يجيك شافع مرسل ليك ويقول ليك
قالو ليك تعال يا متوكل
طيب طيب جاى، فى شنو
قالو ليك الضيفان وصلو، تعال اقعد معاهم
بعد ده تم الباقى براك
والله يا متوكل غايتو قاعد تخلى الزول يقول ليهو حاجات، هو ذاتو ما فاهمها
المهم خليك فى قلب هذا السعى الجميل، والسعاية الأجمل
والصيوان الجماعة بتموهو، وإنت أمش اقعد مع الضيفان
أما بعد
فبهذا نعلن إنا لك محبون
مش "حُبين" بس زى "جلدنة" رابعة العدوية
لكين عشرمية حب، كل واحد وما ينضوى تحته من اشياء
| |
|
|
|
|
|
|
|
|
|
Re: الهندي عز الدين !! (Re: أبوذر بابكر)
|
أخونا في بلاد الغباش ..هندي ..
قبل ايفاء وعدي بالاسهاب حول (كلاسيك) طرحك ، اعرج نحو (حكوة) هندية ، وسأظل اتسلق (سلمك) الجواني بحكوة واهبط من سلمك (البراني) بحجوة .
تقول ام ريم للـ(ضيوف) سراً و قذفاً ، اني (برًاي) ..
حكي - ياهندي- (والكلام لاسطورة هندية تشرح كيفية خلق الحشرات الضارة كالناموس والحيوانات المفترسة والزواحف كالثعابين) ..فقد احتار الإنسان الأول - كما تعلم - ( والله أعلم انك تعلم ) في فلسفة خلقها . وذلك -أكيد- قبل نظرية التوازن البئيئ .
تقول الاسطورة ،،
(كان يا ما كان في قديم المكان، الدنيا - يا صاحب - (مويه) وشجرة، والهندي الأول ، وفاطمة (وحيدونة) سمحة ، كان الهندي الأول يا هندي يقضي نهاره متسلقاً الشجرة ، وبما انه لا ينام متسلقاً (شايف كيف ، لا ينام متسلقاً !! مش ياكل ويكتب ويسهب متسلقاً) (المهم) فأنه يفترش تحت الماء ، وبالتالي يموت !! . تقول الاسطورة ان موته اليومي كان يتشكل في شكل حيوانات ضارة ، منها من يبقى تحت الماء ومنها من يتسلق الشجرة (إياها) ، فكانت الزواحف ومنها من يسقط من الشجرة فكانت العقارب - مثلاً - ومنها مـن اجبرته (حلاوة) الحياة على الطيران ، كالناموس ، وهكذا ، الانسان الهندي الأول يا هندي ينتج اضراراً يومية بموته اليومي!!) .
فهمتني يا هندي ؟؟!! .
- لأ !!!!!
اوووووف
(طيب) . اشرح (ليك) ..
قلت في مكان ليست بعيد من هنا انني قارئ جيد لك ، حصيلتي منك مقال ونصف (اتحدى من سبقني علي هذا السبق) ، تقول يا هندي (ربنا يكفيك شرً القول) ، أنا كاتبكم الأعظم .!!
سألت انا . (منو؟؟!!) ..
قلت انت . انا !!!
سألت انا ثم من ؟؟
قلت انت .انا..
يا (زوول!!) .
يا هندي يا هندي . (الله يهديك) ، كاتب تنمو بذرة عظمته تحت الماء (آ) دون هواء ، يشد عصب (دلوكته) بدخان الإنقاذ يصفق لكتم الأنفاس (بالله عليك ده كاتب ود ناس؟؟!!) ..
يقول قارئ برتبة ناقد : رواية اولاد حارتنا لنجيب محفوظ خرجت على الناس بهذا الثراء الإبداعي الفاحش لأن كاتبها (رفس) عن خياله الرقيب الداخلي من أزهر ومنظومة عقائدية (فارغة) ،
تقول (ليً) كاتبكم الأعظم (لا بلاي) .
تحليقك بالكتابة يشبه كابوساً مرهون هبوطه بـ(هبشة) السرير ،فحبر البلاط (حنة) في ساق عاهره تتشكل مزاج رسمها على حسب (دافع) السهرة و(العياذب بالله) ،
عليه according للاسطورة فإن ما تكتبه (حمام) ميت ، و سيرة الحمام كما اسلفنا في مكان هنا تودي للتهلكة و( والعياذب - برضو- لله) ..
في وجود هذه المعطيات فأنه لو كان النيل مداداً لكلماتك ، ولو ( تفتح أمل الإنسان) اقول (لو) نفد النيل منها ،(سجم) النيل ، فأن الكتابة التي تفتح لك حساباً بملايين الجنيهات والحبر الذي يدخل حوالي كم (طاشر) الف بيت ، وانت تكتب تحت الماء دون هواء وبدخان الانقاذ و بهذا المستوى الوضيع من صياغة الحرف وإنجاز الفكرة .. فانني انا الموقع أدناه متوكل توم أقول لك بالحلق الكبير، أنه لو كان في هذه البلاد الطويلة العميلة تربة صالحة للكتابة ، أو (أو بت عمً لو لزم) أو أن البلاد زفرت ديمقراطيتها حينما استنشقتها ثالث مرًة (البلاد التي كلما ابتسمت ركً علي شفتيها الذباب) * فان مكانك الطبيعي يكون مطبخ الجريدة صفا الشاي وانتباه (النعناع)..وللشمال واليسار در. نحونا (مو) بعيد . لكنها الدنيا يا صديقي (فرندقس). (بت ام ..!!) ..
هندي .. أعد مناخاً مناسباً للكتابة وتربة صالحة . ماء وهواء ، حرية يا ابوالهنود ومنافسة حرًة ، ضيًق المنافسة هنا حدود المنتدى (بس) وستخرج بصحفيين (يملوا) عين الشمس ،
وأتحداك .
(سامعني) !!؟؟
اتحداك (عديل كدي) إن وجدت مساحة ما يشغل كرسياً في مبني جريدة (تــتــفن) فيهو ..
هندي هذا شبال و سأعود للرقص علي (كلاسيك) طرحك إن مدً الله في الامر ..
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
ابوذر ..
الأيامُ
منذ قهوتِها التى
خدش ضحاها
مكرُ الظلِ
وتواطؤُ الأشجارِ
منذ نشوتِها التى
استباحَ صباها
طيشُ العشبِ
ها هى الآن تغفو
حافيةَ القلبِ
تستجيرُ من رمضاءِ الليلِ
بأرقِ النهارِ
ها قلبُها الآن
ينتعلُ الحنين..
______
انا لو كتبت الكلام الفوق ده (تعرف) كنت اشتريت بدلة حرير و كدوس وكرتونة سيغار كبيرااا بتاعة الخيانة الفي الافلام ديك ،
(اسمعني) الرد عليك مغامرة و لو (قعدت) ليك ح اهدد مطبخ ام ريم بفقر في الشاي و الـ(هبهان) ..
ما تحرجني يا ابي ذر .. (انا ما بقدر عليك) !!
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
Quote: ابوذر ..
الأيامُ
منذ قهوتِها التى
خدش ضحاها
مكرُ الظلِ
وتواطؤُ الأشجارِ
منذ نشوتِها التى
استباحَ صباها
طيشُ العشبِ
ها هى الآن تغفو
حافيةَ القلبِ
تستجيرُ من رمضاءِ الليلِ
بأرقِ النهارِ
ها قلبُها الآن
ينتعلُ الحنين..
______
انا لو كتبت الكلام الفوق ده (تعرف) كنت اشتريت بدلة حرير و كدوس وكرتونة سيغار كبيرااا بتاعة الخيانة الفي الافلام ديك ، |
عارف يا متوكل أنا داير شنو
جرف صغير كده جنب البحر، بحر أزرق يعنى
أزرعه برسيم وطماطم وجرجير وشطة خضراء وزرقاء وبنفسجية
اقيل تحت سيسبانه نديانه وريانه واسمع الراديو
وفى المغربيات اجيب قهوتى واسمع فيروز وماجدة الرومى ويانى وال Pink Floyed
البدلة والهتش بتاعك ده غايتو إلا لمن يكون جايينا المحافظ فى ودراوه
تسعد يا حلو وتسلم ان شاء الخالق
| |
|
|
|
|
|
|
|
|
|
Re: الهندي عز الدين !! (Re: أبوذر بابكر)
|
تعرف يا ابي ذر ، دخولك الأولاني سوا فيني جنس سوي ، متل الزين الهيل عرس الزين لامن شيخنا الحنين حجزو لامن كان يضارب في -نسيت إسمو-. الزين كان زعلان بالحيل لأنو الراجل ضربو بي فاس في عرس اختو . الراجل المخنوق النسيت اسموا قال انا شفت الموت بي عيني وسمعت صوت الحنين لم قال آ الزين المبروك، كأنوا من العالم التاني ، أها يا ابي ذر شفت صوت شيخ الحنين جاب الزين من درجة الغليان لي الجمود دون المرور بحالة السيوله ، اها انا مكتول في حوش (الأيام منذ قهوتها التي خدش ضحاها مكر الظل) ، يا الحنين .وانا ملبك بي قرف الهندي جريتني للجمود ، عشان كدي استغليت رهاب زعلتي وكتبت للهندي سريع سريع المداخلة الأخيرة قبل أصل حال التسامح المسيحي داك ،
اما بخصوص البدلة الحرير والكدوس اسي يا ابي ذر فوقك النبي ناس الشام بتاعين البدلة ام حرير الشعراء ديلك بلحقوا يكتبو متل الكلام ده؟؟ (واللهي ياهو!!) . والله البسا وأدخن الكدوس واعلي صوتي وأمشي في الأرض مرحاً زاتو .
أبوذر ، بمناسبة ود راوة دي - مسؤول من الخير - انت مو اخو الصادق الصيدلاني أخو أميرة زوجة عبد الرحمن البيجو أم مصطفى ومعمر .
يا زول خليني اقلع نفسي منك ، انا ان جريت جري الوحوش لامن اي قهوة ينخدش ضحاها ما بصلك .
ليك شبال ..
أكرر ,,
تعظيم سلام ،
وحب زاتو
| |
|
|
|
|
|
|
|
|
|
Re: الهندي عز الدين !! (Re: mutwakil toum)
|
يا سمح
صباحك يوم يقاس بملايين السنين الضوئية الملونة
يا زول تقلع نفسك منى تمش وين
إنت ما سمعت قيس المجنون قال شنو فى الريده وما فيها
لقد ثبتت فى القلب منك محبة
كما ثبتت فى الراحتين الأصابع
طبعا هو هنا بتفاهم مع "ليلى"
إنت ما عليك إلا تخت "فتحه" بدل ال "كسره" فى "منكِ"
والله يا متوكل ما عايز أزحك بعيد من زولك الهندى العجيب ده
لكين دائما فى حضرة جمالك تطيب الحياة
الدكتور الصادق حمد الجاك أخو أميرة زوجة عبد الرحمن مصطفى الفى دردق ده
جيراننا فى ودراوة الحيطة بالحيطة، بعدين الصادق ده ورانا يمكن بى تلاتة دفعات
بمناسبة دردق يا متوكل، يا حليل صاحبى الشين "محمد حسين الأمين" الشهير ب "كسلا" عازف الكمان وأخوانو ناس حافظ ومعتصم، ياخى ذكرتنا دردق والأيام الندية وناس "عادل القوس" ومحمد الفاتح ابو عاقلة وسامى اخوهو والفاتح حسن الخ
المهم معليش أنا عولقت ليك البوست
وان شاء الله تسعد ويطيب معناك
| |
|
|
|
|
|
|
| |
Marouf Sanad
معتز تروتسكى
عبدالكريم الامين احمد
bayan
Muna Khugali
Omayma Alfargony
Faisal Al Zubeir
د. بشار صقر
Yassir Tayfour
أبوذر بابكر
فيس بوك
تويتر
انستقرام
يوتيوب
بنتيريست