|
|
 *من الاقوال السودانية**(المأمون على بنوت فريقه)**
|
الاخوة والاخوات الكرام
هذا المثل مثل سودانى معروف من صميم البيئة السودانية الحبيبة،وهو عادة ما يطلق على الرجل/ الشاب الشهم الاصيل ابو مروة الذى لا يخاف فى الحق لومة لائم والذى فوق هذا وذاك يخاف الله عز وجل. وكذلك يطلقه على نفسه من يرى فيها الصفات الحميدة السابقة حين يتحدث عن نفسه معددا مناقبها نثرا او شعرا او دوباي بأى لهجة من لهجات بلادى الحبيبة معلنا ومفاخرا:
**(انا المامون على بنوت فريقه)**
فالمأمون على بنوت فريقه يا اخوانى واخواتى هو ايضا:-
مأمون على رجال ونساء وأطفال شعبه
مأمون على حاضر ومستقبل وطنه
مأمون على تاريخ شعبه
مأمون على موارد وثروات شعبه
مأمون على الاخلاق الكريمة
مأمون على العادات الحميدة
المأمون على بنوت فريقه يا اخوانى واخواتى هو:
كل شاب/رجل/امرأة سودانى/سودانية
شريف/شريفة
وطنى/وطنية
خلوق/خلوقة(انما الامم الاخلاق ما بقيت فان هم ذهبت اخلاقهم ذهبوا)
يفدى/تفدى ارضه/ها وعرضه/ها واهله/ها بدمه/ها
المأمون على بنوت فريقه هو/هى:
محمد احمد/ اساغا/ مكوار/ دينق/ادروب/والملايين من رجال بلادى الاصيلين
فاطمة/جوزفين/التاية/تاجوج/ام كنن/والملايين من نساء بلادى الاصيلات
اتمنى ان نكون كلنا مأمونين على بلادنا
والتحية للاخوان المأمونين على البورد : -
بكرى ابوبكر/خالد الحاج/ عادل عبد العاطى
والتحية لكل الاخوة والاخوات الاعزاء
والحمد والشكر لله رب العالمين
والعزة للسودان
والمجد للوطن
|
|
 
|
|
|
|
|
|
|
 Re: *من الاقوال السودانية**(المأمون على بنوت فريقه)** (Re: شتات)
|
الاخ الفاضل شتات
ياسلام.ياريت واحد من الشباب او الشابات المهتمين بالتراث السودانى الجميل خاصة المسادير يكمل لينا القصيدة او المسدار دة
أنا الدابي إن رصد الزول يعيقــوا
أنا المامون علي بنات فريقــــو
اسئلتك فعلا تحتاج لاجابات وبحث
غايتو اعتقد انه فراغ القلوب من الحب وامتلاؤها بالاحقاد والضغائن هو جزء من الاجابات
عجبنى جدا توقيعك: التيجان ليست هي التي تجعلنا ملوكا.. بل قلوبنا المليئة بالحب.
تحياتى
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: مهيرة)
|
الأخت دومة .. أعتقد أن الهمبتة ليست عادة اجتماعية بقدر ما هي قيمة مجتمع لها طقوسها وظروفها وشروطها أيضا .. فالهمباتي لا بد أن تتوفر فيه صفات معينة أقلها القوة والشجاعة والإقدام وأن يكون مبرزاً في عدد من الفنون بالاضافة إلى حب المغامرة .. وأن يقوم بما يقوم به عن قصد وربما بمواجهة صاحب الحق .. هذه قيمة لا أعتقد أنها مقبولة في الوقت الحاضر ولا أعتقد أن المجتمع سيقبلها ناهيك عن وجود طلاب لها .. أما المامون على بنوت فريقه فهو موجود ومطلوب وشروط وجوده موجودة وله قيم لا تبلى بتقادم الأيام .. مع تحياتي .
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: Ahlalawad)
|
العزيز اهل العوض ربما لم اوفق في تبيان ما رميت اليه استرعي انتباهي القول الذي استشهدت به مهيره المامون علي بنوت فريقو و هو من ثقافه معينه اعرفها عن قرب ومعايشه ولم يكن للدين بمفهوم مهيره اثر كبير فيها .
الهمباته نحن اصلنا معروفين غيرحق الرجال ما عندنا تعيين ما بنتدبي ليه بنشيلو حمره عين
| |
|
|
|
|
|
|
|
|
 Re: *من الاقوال السودانية**(المأمون على بنوت فريقه)** (Re: مهيرة)
|
سلام للمتداخلين
وليك خاص يا مهيرة
احب ان اشير ان ما اورده الأخ سيف كلي هو مقطع
من شعر ابراهيم ود الفراش شاعر بربر وهو جزء من قصيدة طويلة
يفتخر بها بنفسه وصفاته وبالمناسبة ود الفراش كان عامل بريد
في زمن الأنجليز ولول طابع بريد سوداني يحمل صورته وهو يمتطي
جمله ،، شيشك يا جمل لا تكسر الدراب
وسيدك ما بخاف ان كاوشنو حراب
* وهناك الكثير من الحكمة والأمثال في شعره
سوف اوافيكم بجزء مقتطف من ديوانه
انا جبل الكحل وكتين يميل
انا الرمد البخلي العين تسيل
انا الجن المخالطاه ام غزيل
وسوف اعود لاحقا
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: مهيرة)
|
سلام للجميع
الهــــــــمبتة
اسمحوا لي أن اعقب على موضوع الهمبتة هذا
أول من بدأ الهمبتة في السودان هم قبيلة العبابدة ولم تكن رغبة في امتلاك حق الغير بل كانت لها مسبباتها .
كان من المعروف أن تقوم قبيلة العبابدة بحماية القوافل التجارية بين مصر والسودان مقابل عشر القافلة إلا ان الإنجليز وضعوا تعرفة لذلك وحددوا ريال مجيدي فقط ورفض عمدة العبابدة ذلك ودخل في عراك مع الإنجليز وتم قتله وثأرا لأخيه قرر بركة أن تكون كل القافلة لأبناء اخيه المقتول ، وبهذا بدأت الهمبتة وكانت على القوافل التجارية فقط إلى أن تم قتل بركة على يد الإنجليز في الموقع المعروف الآن بخور بركة
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: Ahlalawad)
|
الاخ الكريم على عثمان
نورت البوست بالله هم الانجليز بعد ما همبتوا السودان 50 سنة ولا اكتر،هم برضو كانوا السبب فى تعليم بعض السودانيين الهمبتة.اوع همبتة بعض الوزراء واهل السلطة ديك برضو تكون تعليم انجليز.
الاخوان الافاضل
سيف كلى واهل العوض
ياجنيات دخلتوا لينا فى الغريق
اظن فى بعض المسادير اولاد المغتربين ما بفهموها ليك.احسن تشرح بعض المفردات زى:
حنباق
الطقطاق
مساويك الحجر
الكاينات
الاخت دومة:اها يا اختى الجنيات قالوا المامون على بنوت فريقه ما شرط يكون همباتى ويمكن برضو يكون زول بخاف الله.غايتو انا اتيمنت واحدا مابخاف الله ما بدى بتى.وبعدين القال ليك منو الهمباتة زاتهم ما بخافوا الله؟ والله فيهم ناس تابوا وبقوا بس داب السوق والجامع.حتى واحد منهم سكن فى رفاعة واظنو سجل ذكرياتو للاذاعة علا اسمو راح لى يابت امى
يلا نموا آجنيات
أيووووووووووى
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: مهيرة)
|
يا مهيره وكتين قبلتي بالتوبه واهلي الهمباته خلاص معلاش ما في عوجه وتصدقي الهمباته ناس كرم وشداعه واما انا بتي غايتو الراجل الكريم الفي يده ما حقه بديها ليه تب الزول البعزمك علي العيش الحب جني وجن الزول البخيل ابدا ما يقرب علي وشي ان بقيتا يزوروا فوقوا . احمد حنيين
والله زولك دا كعبا يقلب البيعه كيفن بعد الشكر داك كله مرقها ضبعه والله حديثو اعوج تب
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: مهيرة)
|
الليــــييييله هــــــــوي
قال الشاعر ود الفراش ،، يهجو معشوقته الدون بعد الخصام
كجنت بيتك وكجنت ضلو
كجنت وشك المتل ام بعلو
،،،،،،،،،،،،،،،،،،،،الو
اهو الفراش طفش بي جملوا كلو
****
بعد ما كنتي زينه ورزينه
بفاخر بيك بنات عرب الكنينة
كترت المساخة بقيتي شينة
تشبهي العشرة الوسط الجنينة
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: مهيرة)
|
نواصل النم مع مسدار ود الفراش
انا البحر الكبير الدابو حمر
انا قدح الزناد مدفع معمـــر
وبشد واركب علي جملي المضمــر
انا ابراهيم اخو اللأبسا المجمـر
####
انا البحر الكبير حاوي الجزاير
انا الجدري الوقع في الحلة داير
بشد واركب علي سمح البشايــر
انا ابراهيم اخو اللابسا الجباير
###
انا البحر الكبير فوقو التراســا
انا الجدري الوقع في الحلة داســا
وبشد واركب علي سمح السياســه
انا ابراهيم اخو ام شلخا مواســـا
وسوف نعود للنم ثانية ،،
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: bayan)
|
اهلا حباب بيان اختى
اتفضلى قنبى فى البمبر دة النفور القهوة دى
هم يا ختى الهمباتة ديل قالوا كا نوا بحوموا من الاتبراوى ولا عند بحر احمر يكوسو الابل يقلعوها من اصحابها كدى حمارة عين،لكن ما بدخلوا المدن عشان بخافوا من الحكومة.علا زى ما قلتى الهمباتى دة اتلوم فى الولية لكن ما انا قبيل قلت لدومة اختى الما بخاف الله بدورلا يخاف له من كلمة شينة؟علا والله فى واحدين الله هداهم وبقوا داب السوق والحلال والجامع.
اشربى فنجانك النتنى ليك يا بنان اختى
تحياتى
| |
|
|
|
|
|
|
|
|
|
Re: *من الاقوال السودانية**(المأمون على بنوت فريقه)** (Re: مهيرة)
|
ود الفراش
بشد واركب على جملى البشارى
فريوة الريف مع المحزم تجارى
. . .
. . .
* *
الدون الدون حبابها
أم شعرا زى وتر الربابة
حماد أخوى كان ضاق رضابها
تجرد المال تخلى البيت خرابة
* *
أياها دونى
راحة بدنى ونوارة عيونى
منكر و نكير ساعة يجونى
بيلقوا الدون معاى ما بسألونى
* *
بعد ما كنت ظايطة
متل سيدى الخليفة ان جيتى فايتة
كترت المساخة بقيتى شايطة
بتشبهى العشرة البى الكلجة فايتة
* *
بعد ما كنت سمحة وكنت زينة
وكت بفاخر بيك بنات كسلا وجهينة
كترت المساخة بقيتى شينة
بتشبهى العشرة فى وسط الجنينة
* *
أما المحلق وهو من قبيلة الحلنقة فى شرق السودان ، من قبائل البجة
وكان قد تزوج بابنة عمه تاجوج ثم حدث بينهم ما حدث والقصة مشهورة
وكتب عنها كتاب ، ارخ لها محمد صالح ضرار كما قد مسرحها الأستاذ خالد أبوالروس رحمة الله عليه
وفى القصة أنه ومن كثرة أشعاره فيها فقد بخسها له صديق له هو النور . فأراد المحلق أن يثبت له
مدى استحقاقها لكل هذا الحب والتغنى بالأشعار ، وأن كل ما وصفها به هو فيها . ثم أخفاه خلف
خبائها ودخل ثم طلب منها أن تتجرد سوى من لبسة المتفضل . فقبلت على أن يقسم لها أنه يلبى طلبها بعد هذا
وكانت قد أحست بأن هناك شىء خلف هذا الطلب . فنفذت رغبته ثم طلبته الطلاق بعدها . وبعد طلاقها تزوجها
النور هذا وهو تكرارلما حدث لأمرىء القيس من علقمة بن عبدة الفحل .
ومن أشعار المحلق بالدوبيت نورد ويلاحظ أنه فى بعضها إستعمل كلمات باللغة البجاوية ( البداويت )
بالرغم من أن الحلنقة يتكلمون العربية أو العامية السودانية بالأصح .
أنا الدابى التعيس سويتها بايدى
وفى كلمة مزاح سليت غميدى
ز . .
. . .
* *
أمك دباسة وفوق الفروع
وانت متل المقد اليموع
شعرا بلا دايوك هدل الفروع
سنا بلا مسواك برقا يضوع
* *
الناس بتلد الناس ساكت حسادة
وأمك بتلد الصيد السمح القلادة
شعرا بلا دايوك هدل الوسادة
وسنا بلا مسواك برق المكادة
* *
الناس بتلد الناس ساكت حمير
وأمك بتلد الصيد السمح الضمير
شعرا بلا دايوك هدل السرير
وسنا بلا مسواك برقا يشيل
* *
وأيضا الى الآن نحن المأمون على بنوت فريقنا
فعندى قصيدة مطولة أنزلتها قبل فترة فى المنبر من بدايتها
عرفت قبلك وشفت بعدك
لا نسيتك لا المقام لى قلبى طاب
كل البحور شلت مياها على السحاب
لا بلَّ شوقى ولا عزاى كان فى الغياب
* *
وصانى فيك حسن الخلق
ــــــــــــــــــــــــــــــــــــــــ
وشيم الرجال
ـــــــــــــــــــــــ
وصونى أحميكن صبايا
ـــــــــــــــــــــــــــــــــــــ
واحمى ربات الحجال
ـــــــــــــــــــــــــــــــــــــ
وعشان هواك مارست فن الإقتتال
ورميت أغانى الحب قفا
ـــــــــــــــــــــــــــــــــــــ
وشديت حبال
ـــــــــــــــــــــــــ
شعر الحرابة
ــــــــــــــــــــ
وقفت فى صهب الشمس
صادقت فى الغابات وحوشها
وفى البرارى
رضعت من وعل الجبل
وسبحت والتمساح سوا
ما نمت ليلى ولا نهارى
من نيل لغابة
ومن جبل أنزل سهل
ومن حزون أطلع صياصى على عجل
واغسل نعومة المدن الطرية من البدن
وارجع سنين زمن الضوارى
سكنت عن عرب الضهارى
وعشت أطراف المدن
وحلفت ما ألمس حليلة
ولا يمس شعرى الدهن
هاجرت منك ومن لقاك ومنى ليك
حتى تمام عقلى اتزن
وجسمى اتوزن
واصبحت جاهز للنزال
وتمضى هكذا
فكلنا يا أختنا الفضلى دكتورة مهيرة مأمونون على بنوت فريقنا
وإلا فلم تنجبنا أمهاتنا . وإن لم ننافح عنهن فلا بقينا ولا بقى شىء من الرجولة فينا
صديق ضرار
| |
|
|
|
|
|
|
| |
مهيرة
ابو جهينة
شتات
doma
Ahlalawad
saifkeli
HOPEFUL
ahmed haneen
bayan
فيس بوك
تويتر
انستقرام
يوتيوب
بنتيريست