|
العيد بالشمالية -كريمة _الكرفاب -فوق جبل أبنعوف
|
سأقضي عيد الأضحي هذا العام بعد حوالي ربع قرن في قريتي الكرفاب التي تقع بالشمالية ريفي كريمة بالضفة الشرقية للنيل مقابل كورتي وبين قريتي الأراك والبرصة.عندما كنا صغار ويجئ العيد كنا نلبس ملابسنا الجديدة صباحا ونبدأ في جمع العيدية من الكبار قرش وقرشين وشلن ونحن نمر بالبيوت للمعايده ومتوجهين لمكان صلاةالعيدجوار جبل ابعوف الذي كتب عنه د. مختار عجوبة كتابه ابنعوف صالح الجبل.في ذلك المكان كنا نتبادل التهاني بالعيد كبارا وصغارا ثم يرجع الكبار بعد الصلاة لبيوتهم واما الصغار والشباب بنات وأولاد فيصعدون اعلي جبل ابنعوف ويتجمعون هنالك .كنا نشتري الزلابية وحلاوة مص ومعلقةالطحنية بي تعريفة .
كان الشباب والشابات يتبادلون الحب والغزل بالمناديل الموردة ويتبركون عند صالح الجبل ويطلبون منه ان يحقق امنياتهم في الزواج بمن يحبون.
بعد الساعة 11 ص يتوجه الجميع للأراك للمة العيد الكبيرة هنالك عند الفقراء ناس شيخنا ود ابراهيم حيث يحضر الناس من كل المناطق والقري شرق وغرب ويستمر تجمع العيد حتي المغرب حيث نرجع لي بيوتنا .
كمان ساحضر عرس ود عمتي قصورة في ايام العيدبقريتنا الكرفاب . ان شاء الله اعقد مقارنة بين العيد ايام زمان قبل ربع قرن والأن بعد عودتي
|
|
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: أحمد الشايقي)
|
كل عام وأنت بخير يا عبدالقادر وبالله كان عديت البحر ولو عوم أغشى مساوي وزور الموضع ومن هناك الكنيسة قريبة مر على ساقية العوضاب ومنها أطلع لي فوق مر على الجامع الملاصق للبيت وجيب لي أخبار أهلي.
سعادة المستشار إزي سعادتك سورج ديل حقين التمباك والعماري الممتاز!ّّ!!
كل سنة وإنت والعائلة بخير وإنشاء الله كلنا نعيد العيد الجاي في البلد ونحوم سوا يوم في الكرفاب ويوم في القرير ويم في الأراك، بس يا ربي آسيا ألت الأراك وود الزومة لسه قاعدة....!!
الشايقي
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
ان شاء الله اعقد مقارنة بين العيد ايام زمان قبل ربع قرن والأن بعد عودتي
اخي عبد القادر ..كل عام وانتم بالف خير .. ربنا يوصلك بالسلامة وتلقا اهلك وجميع مواطني الكرفاب بالف خير ..
25 سنة غياب عن السودان ... دا عندنا هو حكم ( مؤبد ) لكن بصراحة ستذهب وتأتي كا الطرش في الزفة متغيرات كثيرة وعديدة نحو الاحسن ربما ستتفاجأ بها ..
بالله وصية يا عبد القادر يا اخوي .. تذهب سد مروي وتديني ( انطباعاتك بكل امانة ) انه الاعجاز في زمن ....
سلم لي على اهلنا طرفكم ....
ود الباوقة
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
تخيّل يا عبد القادر : على عثمان محمد طه برضو قرر السنة دي يعيّد في الكرفاب ، وطبعا الناس حا يقدموهو يصلي بيهم إمام ، وسيذبح كبشين أملحين أحدهما عنه وعن عائلته والآخر عن أهل الكرفاب ، وأنت جزء منهم ، فيكبّر أهل الكرفاب ويهللون بالله أكبر الجديدة والقديمة ولكل امرئ ما نوى ،،، وإذا أصريت إنت عبد القادر ود على ود عبد الرحيم على ذبح كبش خاص بك وبأسرتك فستكون من الرافضين لهدية نائب الرئيس ، وبالطبع يعتبر رفض الهدية أمرا غير طيب عى المستوى الاجتماعي والشرعي ، ويعتبر كارثة سياسية وأمنية في حالة أن الهدية المرفوضة تكون أصلا مقدمة من نائب رئيس الإنقاذ ... وبعدين الناس في الكرفاب يكونوا مقسومين بي فرحتهم بين علي عثمان وعبد القادر ، واحدين يقعدوا معاك في ديوانكم ، والتانين يقعدوا مع علي في ديوانهم ، وكل مجموعة تنظر إلى الأخرى شذرا ، وجبل ابنعوف يظل على الحياد والأطفال فوقه يلعبون ويلهون ويمدون ألسنتهم ...
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
الأخ محمد يسن شكرا ليك علي المرور
احمد الشايقي
يااخي انت قريبي اذا كان ناس ود الازوباشي قريبنك زعلي الأزباشي كان ناظر المدرسة الأبتدائية وامي كانت تقولنا قولولو نحن اقرباك عشان مايجلدكم في المدرسة.
ياود الباوقة باقيلك مابنلقي الشربوت مع الشية
ابو عثمان
انت من المقل والله القرير..زتحياتي
ياود قاسم
الدنيا عيد والشيات بتشغلنا من باقي الضرس
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
[Quote: QUOTE] وانت راكب الحافله وعديتو بى غادى وجيتو ماشين ..تفوت حزيمه ..وقت تجى عن كافوته ..تملى عيونك[/QUOTE |
اي عليك الله يا عبدالقادر كافوته دي بالذات املي عينك فيها وطبعا حتلقي الشفخانه الزمان شالها السيل بتاع سنة88 وبرضو بيوت المدرسين والمدرسة الابتدائية والنقطه والبوسته كلهن شالن السيل ولحدي هسع ما جانا تعويض من الحيكومه وبرضو دكان الدحمادي الفوق درب الجمل( الدحمادي مات ودكانه شاله السيل وجزارة عمك ادم ودخلف الله ( عمك ادم مات وجزارته شالها السيل )
اخ يا زمن اخ
لا تنسي كافوته
والوصيه امانه
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
طبعا يا عبد القادر
أنا صديق قديم لجعفر أخوكم,
وكنت بقابله مع سيداحمـد , هـو صديق لدود لسيداحمد من زمان,
جعفر كان قريب لحرارتنا , رغم فارق العمـر فقد كان بحماستنا (عندما كنا شباباً),
وكان قويا في قول النصـح,
ربما كان هذا هو السبب في أننا لم نناقش مسألة القرابة , هذه لانه ما كنا لاقين ليها زمن مع حرارة القضايا التي كنا نناقشها,
لو تكتب لي هاتفه الجوال في المسنجر تكون ما قصـرت
وعلى الاقل نعيد عليكم,
حقيقة اذا كانت حصيلة عملي في العمل العام التعرف بأمثال الاخ جعفر (شرواكم) , لكفاني ذلك.
لك تحياتي,
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: أحمد الشايقي)
|
خصـمتـك بالنبي عبـد القـادر أخـوي..
تمشي للمعـديـة في مـروي..في راكوبة في اللسـان علي جـانب المعـديـة.. قـاعـدة فيها زولـة شـايقيـة في حـوالي الستين مـن عمـرها..قـاعـدة في عنقريب صـغير يشـبه البنبر..تبيـع شـاي وقـهـوه ومـعاهم ابتسـامـة حنينـة مجـانية..
قـول ليها..في بت شايقية جـاتك هنـا مـن الزومـة قبـال سـنتين اسـما مـني... اتونست معاك..شـربت مـن يـدك الجميلة الطـيبة جـبنة..وبعـدين انتي عـزمتيها تقطـع مـن الـشـمـار المـذروع بـوراكـي ده..'ده كـله عشـان هي تتـذكـرني'
قـول ليها داك كـان أطـعم مـلاح شـمار أكـلته في حـياتي..واني مـاقـدرت أرجـع أوادعـا..لكـن يعلم الله مـاغابت أبـدا عـن بالي..وانو لـو ربنـا أدانـا العمـر برجـع ليها عشـان أقـالـدا..اتونس معاهـا واشـرب قـهـوتا..
وصـيتي دي وقعتلك سـمح? ان شـالله عـرس خـيك ده يكـون سـمح زي زولتنـا دي..تمشـي وتجـي بالسـلامـة
مـني عـوض خـوجـلي
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
الأخ عبد القادر علي عبد الرحيم هلا فيك عساك طيب وكل عام وأنت طيب الله الله أنت طولت خالص يا حبيب من البلد أنا تقريباً لي سنتين ... عيد الضحية ده برضو ماشي الشمالية ... نحن قريبين شوية نحن من كريمة ... إن شاء الله نتصادف ونترافق الواحد يكون معاهو بوردابي خوة سودانيز دي سمحة بالحيل .... بس ورينا أنت جاي متين ... حتى بنجي نستقبلك في المطار .... تلفوني 0912965267 عشان تورينا جاي متين
مع محبتي
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
جاى يعيد معاكم هناك البروفيسور أحمد العوض محمد احمد سكينجه قادم من الشرق الامريكى الى مسقط رأسه المقل خصيصا , فهنيئا لكل من نال شرف وبركة العيد وسط دفء الاهل والوطن خاصة العيد الكبير , اكثروا من الشواءات والشربوت الماخمج والسلام على ناس الفريق واحد واحد وناس الحله من جم واكتلوا الحفلات والمناسبات .
غايتو ايامكم ساكبوبيس
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
عليك الله آ قدورة مابْ تلقالك شيتاً يوديك القرير بي غادي؟ ناس العِروس ديَل كانوا عَدْ يسووا رحلاتُم في القرير زمان ..ايامنا الشُفّع .... مكسب ....فٌرجة ولحمة وغٌنا..أصِلنا جننا وجن الغُنا ... غايتو اكّان ما قدرت امش وين ما يعجْبَك ، الزومة ، مقاشي ، حزيمة ...لا عند الحجير واقيف فوق القيفة وكورك بي طول حسك آ الغرّابة ..آ اهل القرير .... عوافي ..... غايتو... نقول شنو.. احييييييييييي أنا وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
الأخ العزيز
عبدالقادر
يا اخينا انت لا أسع تتحاوم بى هنى مالك ....الحكايى شنو
معليش يا اخى انا المره الفاتت ..جيت دافر كده ساكت لاسلام لا تحيه ..كلامك عمانى ضمه ..وكيلك
الله وقت شفت الشماليه وكريمه والكرفاب و العجب جبل ابنعوف فى العنوان..سافرت خليتك وراى
تب ..وقت رفعت راسى ..استغفرتك يامالك روحى.
دحين يا اخى مره تانيه رحله موفقه ان شاء الله .. تشوف الاهل وتلقاهم طيبين وسالمين وتستمتع
بوقتك , وتعيد الماضى على اروع مايكون.. تنقز فى المديح وتحضر الأعراس وتسمع الطنابير
وتجينا راجع بخير
وفى أمانة الله رافقتك السلامه
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عمر ادريس محمد)
|
Quote: بت القبايل مني
سلامات
اهلا اخت الشهيد
لقد احتفلنا بذكري الشهداء في رمضان الماضي
بمنزل اخوان الشهيد معاوية يسن بالرياض
تحياتك لي ست الشاي فوق المشرع وصلت اذا لقيته ماقفلت محلهابسبب اتاوات ناس الجبهة
الأستاذ/ مصطفي عثمان ابراهيم من ناس الزومة وزوج سيدة عبدالحليم العوني يبلغك تحياته اذا تذكرتيه |
واحـالالي بي أهـلي
سـلم علي أولاد خـالي ديـل ورسـل لي نمـرة تلفـونهم في المسنجـر عشـان اتصـلبهم.. أقـولك كـلام? إن كـان مشيت وما لقيت الحـاجـة هنـاك...تعـال راجـع وغشـني وقـوللي لقيتها وسـلمت عليها وعـرفتـك وبتسـلم عليك اهـا النوادعـك ونتمنالك أيـام سـعيـدة زي مـاقـالوا خيـاني مـع الطـنبور وغنـانـا الحـنين ..
خـيتك مـني
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
قدورة .. هنيالك ياعم .. وربنا يوصلك بالسلامة .. ويطمنك عليهم .. وتضرب ( السواكني ) من بلد المنشأ.. وتدلى على المشرع تشرب من موية النيل.. .. انا عارف كان قلت ليك جيب لينا معاك ( البركاوي ) بتقول لينا ( سنون ) ما عندكم ليهو .. علشان كدا البركاوي خليناهو . ( اخمش ) لينا معاك من طين البحر .. ليل المشرع وعبيهو لينا في كيس
وربنا يوصلك بالسلامة وتحياتي للاهل ..
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
هووووووووي ياناس كافوتة عمرادريس وابو عثمان مالكم عملتو البوست لكافوتة فعلاص هي بلد الحسان والمتعلمين واهل الحكم والنوادر ومادام الاخ عبد القادر بيعرف على دقشو عوجة مافي تب بس ياريت يتعرف على العم على الآخر اقصد على الجوكر وكمان على ودمحمد كافوتة بها اربعه اعراس هذا العيد بقيادة ود الفكي وود نورة جلالة وود الفتح وهاتفني كمال حسن الشاعر المجنون وقال ان البيوت اتملت بالشربوت وكذلك نازحي جنوب السودان مركبين بي تحت
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
الاخ/ عبد القادر والله بختك واحلالي بيك بالله وانت جاي بعربات بعيد سلم لي علي الزومة ونخيلها ايقظت فينا حاجات كثيرة حيث هناك الفرحة من جوف الجوف وتنبعث التهاني الصادقة من الحبوبات والحبان العيد مبارك ان شاء الله ترجوه دائر القابلة علي مني الله يخليليك وليداتك الله يعرسليكي يابنيتي 0( نماذج تهاني الحبوبات) ياراحل كفاك رحيل تعال راجع كان شفت البلد بوراك تبكي متل طفل ضائع تعال كان شفت الرمال حزناني لارنت طنابير فوقها ولاجاها القمر طالع تعال 0 تمشي وتجي بالسلامة معى تحياتي لللاخ/ماجد أبو زيدزواجه أيام العيد بالكرفاب 0
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
طـلبـاتي كـترن..
سـلملي علي أهـلي كـلهم..البتلقاه في نـادي الزومـة ..و البتلقاه في معـديتـنـا في الشـمالية..وعلي أهلك وخـاصـة عمتـك قصـورة... والعـوناب كـلهم في بيت العرس..وعلي وليـد عمتي..أخـوي هاشـم خـلف الله تلقـا محكـر في نـادي الزومـة واشـربلك مـوية سـمـحـة مـن تلاجـة الخليفـة عـوض خـوجـلي في نـادي الزومـة وحـلفتك... ماتنسـي تـدعـيلو بالرحمـة..
دايرلك اجـازة لوصـياتي الكـتيري دي مـو يا?
ودعتـك الله.. يـديك العافيـة وتجـينـا فـرحـان وراضـي بركة سـيـدي الحسـن,
خيتك مـني
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
عبدالقادر علي عبدالرحيم النبي فوقك لمن تمر بي البركل في قرية صغيرة كدي تابعة للبركل اسمها شبا تملالي منها عيونك زين وان بقيت شفت زول من ناس شبا خصوصا سيد احمد القروني جمب نادي شبا تقولهم عندكم ولد في المغرب الغربة كتلتو... وفي العرس كان بي صديق احمد وغنالكم اجمل الحلوين اتخيلني شلتلي عكازا سمح وبديت ارقص انا ذاتي وادي في الناس الشبال... وفي الكرفاب اترحملي على دكتور كمال الدين الياس سليمان كان بيقرأ في بيطرة معاي في مصر رحمة الله علي.. وان بقيت مريت على الكرو اتذكر عمي الطيب وكلماته: ود قرنين في عولو يا خلايق الله خلو عندي صيدا في الكرو خيف العين لا تحصلوا
اصله رحمة الله عليه كان مكسرلو في وحيدتا هناك
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: wadalzain)
|
ولامن تجي البركل تمر بي شبا اقيف فيها وحييها
ودكان ود الجاز, ودكان ود تميم سلملي عليهم
وراكوبة اليمني سيد الباصات الله يرحموا
والسبيل بتاعوا
والدوداب فوق في الحجر أمل عينك منهن ديل بيوت ناس حبوبة
بحر الساموري لا تحت
كووورك بي طول حسك ولادك يمة في بلد السجم ورماد
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
الجميع هنا كل عام وانتم بخير
ويا عبد القادر عوداً حميدا والنوصيك أصلو أهلنا بقلوا الوصاة بي المهلة , إن عديت بي مورة أبقي شيل الفاتحة عند الشيخ ودبليل وفي أم درق عن خلوة الشيخ العبيد أخدلك وقفة وما تنسي دايرة ود عجيمي وفي الكرفاب سلملي علي الخالة ست الريد التي كانت كلما تزورنا في البركل يكون معاها قزازة سمن بلدي, وإن كمان عديت بي مروي سلم عليها بلد بلد وفي الاراك أخدلك وقفة قصاد قبة الفكي ود إبراهيم وقبل ده وإنت في البنطون أملأ عينك من جبل البركل وإترحم علي ود الكرسني ...
وإن في العيد جيت البركل حبابك ألف ونحنا إن الله رفع القدم وجينا الكرفاب بنسأل منك
أها فتناك عافي ... لا تنسي تسلملي علي أحمد عطا المنان وولاد طمبل إن بقي فيهم زول جا عيّد في البلد
| |
|
|
|
|
|
|
Re: العيد بالشمالية -كريمة _الكرفاب -فوق جبل أبنعوف (Re: عبدالقادر علي عبدالرحيم)
|
السلام عليكم إت آزول.... لا هسع مندهده بى هِني تكابس في البوردات.. غايتو أكان ما عندك عربيةً... مقرَّشة... ومغتغتة... راجاك ف الخرتوم...حمالتك علي كان ما عيدت في السوق الشعبي أليل امدرمان... ما تقولّي ضربت لي فلان والا علان عشان يحجزلك.. ماك طالبني حليفة ..اليومين ديل.. الكمسنجية مقعد أمهم الوالداهم عِلِ يبيعوه أمِش آ زول...الشوكي ما تعتر لك ...... .........
وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
|