|
|
 نظرة نقدية (لبعض) سلوكيات الرجل السوداني
|
مساء الخير
الحقيقة انا ما عندي موضوع معين اقوله لا لا الحقيقة أملك كلام كثيييير اود أن افش به غبينتي من الرجل السوداني كما حدث وفعلت من قبل حيال المرأة السودانية
ليس رداً لاحد (والحقيقة اني قاصداك يا المنطط عينيك)...لكن من يعتقد أنني إنما احارب المرأة السودانية أو ضدها فلا ابداً..لاني اولاَ سودانية وان كانت عيناي خضر (قولوا ما شاء الله) ثم أن كتابتي عنها لانها الطرف الذي يهمني...ولأن من الطبيعي أن اميل لنا وارغب بشدة في تطويرها...وكيف نطورنا إن لم نتقدنا بموضوعية؟؟؟
مش عليكم الله ذكرتكم قناة الجزيرة
خلااااااص يعني البت عاملين معاها لقاء
الحقيقة هذا رداً لاستفسارات البعض...البعض ... وهو الحقيقة نفر واحد لكني بعمل لروحي اهميات
وكنت اود قبل مقدمة ابن خلدون التي كتبت...ان ادخل في الموضوع تووووشك بس طبيخ السجم ده ابا ما يكمل
فقلت اطل البورد وحشني أولاً...وبعدين اكمل لخ واجيكم
فقط اردت ان اطرح فكرة أن تعبر حواء عن رأيها ولو مرة واحدة تجاه الرجل السوداني وسلوكياته الأحياناً أخير منها ملاياتنا
برانا يعني بتاعين دهب وعدة؟؟؟
سلمتم
|
|
 
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
اكيدة انا اني كتبت رد هنا الضهرية...قفلت الجهاز وعدت فإذ بي اجدني مافي...اقصد كلامي مافي
ما هذه الشربكة الإلكترونية يا ربي؟؟؟
لا بأس...تعلمنا ان نحفظ نصوصنا لليوم الاسود
ليس كبحث دكتوراتي الذي ضاع هدر عن ختان المرأة
اخي خدر
مشكور للمشاركة
ولسة التقيل ورا...واتفشفش يا عزيزي الله لا يعل روحك يوم
دمت
ايهاب
والله اني لخجلة فعلاً من بوستي الذي ما كتبت فيه موضوعي...بالله ده كلام .....العتب على البصل..
اظنك تدري
دمت
الأخت بيان
هلمي بأكثر..انتظر مشاركات اكثر فشفشة
كل الحب
مساء الخير للجميع
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
يا بت قضيم ياختي يا حلوة وزدتي بالعيون الخضر جملآ
مالك علينا
الرجال ديل حلوين وطيبين وبنحبهم
على رأي ليليان بتاعة قناة الاي آر تي , باللي هي لسة قاعدة تتعاور؟
الايومين الفاتو ديل الزول لقا كمية شكل في البورد وتبادل اتهتمات لمن زهج فعليكم الله روقوا المنجة وخذوا استراححة قبل ان يشحذ كل منكم سكاكينه ويتجه ليتعارك مع الآخر
الآخر دا مالوا؟ ما احلى حاجة في الدنيا والاختلاف ما بين الرجل والمرأة في التفكير انما خلق رحمة بكل منهم
والله لو الراجل فهم المرة والمرة فهمت الراجل فأي متعة بعد ذالك في الحياة ؟ ولمن نتجه بتفكيرنا لمحاولة فهمه ما فضل الا القرود والله الكدايس يمكن
الزول زهج من الصراع الأزلي دا وخلاصته في رأيي ان الرجال ليسوا كما تظنهم النساء والنساء كذلك سيظلوا مستعصيات عن الفهم الى ما شاء الله فعلام التعب
مثلآ يا جضومة كان الراجل بيضحك في وشك كل يوم وبيجي يساعدك غفي المطبخ وبيغسل للبيبي لمن يوسخ ولمن تقعدوا تتحاوروا بيقول ليكي ماشي كلامك وكل ساعو في اليوم تلقيهه منتظر اشارتك باالله عليكي ما حتكرهي حياتك؟
والله انا عاجبني زي ما هم ايه رأيك؟ لووول
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
مساء الخير
واللا هي الساعة كم؟؟
تحية للجميع...لاني عرفت ان بعض مساءات خيري تكون صباحات للبعض الآخر
ما علينا
الحبيبة زولة123
شكراً للرد ولعقلك الكبير
لكني وددت التحدث عن بعض سلوكيات الرجل وليس علاقته بالمرأة ... أو ظلمه لها أو تلك الشعارات...فكل الحق معاك في أن هذا الموضوع قدونا بيه قد..ولو انه ليس من المفروض تجاهله لكن بعقل وليس باحساس تظلم
بعدين الله لا يجيب مشاكل...خلينا نحاول نرطب جو البورد شوية
والله ما يجيب ظلومة
سلمتي يا صديقة
اخي الصاوي
تحية طيبة...لك وبرضو لعقلك الكبير
انا اقف احتراما ًللوالدة...اعطاهم جميعا ًالصحة والعافية يا رب
على فكرة تقول الدراسات الحديثة أن جسم المرأة اقوى من جسم الرجل بمراحل كبيرة جداً...كفاية ياخي الحمل...يعني مقارنة بسيطة بين الرجل العامل يجي من الشغل تعبان وعينو طالعة...كل المطلوب ان يتناوم...عكس المرأة العاملة التي تقوم في المنزل باعمال اكثر من الأعمال المكتبية التي تتعب الرجل وتهد حيله...يستحيل أن يتحمل الرجل ذلك لمدى الحياة كما تفعل المرأة
في رأي ان اكبر تقييم للمرأة ان البني آدم يوم القيامة يكنى بها..هي لو علمت بذلك ما طالبت باكثر من ذلك ابدا
تسلم وفي انتظار المواصلة يا عزيزي
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: قرشـــو)
|
انا مع كلامك دا يا قرشو
فعلا الراجل في الغربية تعبان و عندو كمية من المسؤليات كفاية انو بفتح اكتر من بيت (بيته و بيت اهلو في السودان)...كمان المراة العاملة في الغربة بتتعب و تشغى جدا..بس بقول انو غربية عن غربية تفرق...ما عارفة اخ قرشو يمكن السعودية تختلف عن الامارات في انو المراة هنا ممكن تعتمد على نفسها و تجلب بعض متطلبات المنزل لوحدها....
اكيد للراجل السوداني سلوكيات عديدة
يتبع.....
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
الأخ قرشو
كل الشكر
ممكن اوافقك في بعض ما قلت واخالفك في البعض الآخر
ونعم السوداني في الغربة حالته تحزن لكني اظن انه ملام على الكثير من السلبية التي يجيدها بتفوق
اجد الفرصة بس للتعليق الكافي واوفي الكلام حقه لو اراد الله
حبيت بس اشكرك
تسلم وانتظر أن تعود
الإنسانة انسانة
ملاحظة في محلها...ربما المغترب في السعودية غير بلاد العالم التانية
ولو على جيب الخضار والعيال والله هينة...المصيبة التصرفات التانية البتوجع
سلمتي للحضور وبرضو انتظر المواصلة
اعود
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
اكثر ما يضايق ظنه انه (آلان ديلون) وان السودانية (كتوشة) .. لا ادري اثقة هذه زائدة في النفس ام انها مجرد مداراة لصد هجوم قد يأتي طاغياً من قبل نون النسوة...يصب كل اهتماماته التجميلية (والنظافة من الجمال ) على المرأة...إذ يجب ان تكون اولاً (بيضة)...وهذا عنده من اساسيات الكون...فإذا ما حاولت حواء السودانية أن تتلطخ يومياً بخلطة كريمات تكفل لها طريق مسفلت هاي ووي نحو الآخرة...نجده يلوي حنكه استياءاً وقرفاً وترفعاً مدعياً ان هذا شئ (ما كويس) و تفاهة...ومستوى تفكير ضحل...ويدعى أنه لا يحب شيئاً كحبه للطبيعة ... وهو في الغالب كاذب.... ف(الصباح الزاهي لونك) مؤكد ليس بأسمر...شخصياً لم ارى صباحاً لونه (ازرق) كما يصف السودانيين السمار البني عادة...
وربما أن هذا سلوك شخصي أو ادعاء شخصي لكنه بصورة أو بأخرى منتشر على المستوى العام.
عند الخطوبة يكون السوداني جداً رقيق...مسالم...ودود...يرتدي احلى الثياب...ينتقي الفاظه بعناية تفوح منه دائماً رائحة جميلة عطرة...دائماً جنتل...هااااادئ...يحب الحماة...وحماة الحماة....صورة تنافي تماماً صورته التي تتعشكب بعد الزواج...عراقي غالباً اكل فيه الدهر وغالباً عندما فعل (الدهر اعني)...كان ياكل لقيمات...أو ما سبب آثار المخطوطات الفرعونية الزيتية هذه والتي قد نستطيع تقبلها في المرأة نسبة (للكركار) الله لا اداه عافية (الكركار اعني) و قد لا نستطيع تخيل سبب منطقي يدعم وجودها في ذاك العراقي الرهيف؟؟؟!!!
سفنجة للبرطشة..بصمة لا بد منها...انتراحة لا معنى لها تشير بوضوح إلى كسل مستوطن...يقولون أن السوداني كائن كسول...اعدلها بأن (الزول) السوداني (الرجل يعني) كسول فعلاً...السودانية غير شكل يا قول اللبنانيين..
.ولو كانت الزوجة من النوع الذي لم يرضى الله عنها ولا الوالدين...لكانت رائحة الصعود تملأ خياشيم كل من يقرب من (عنقريب) العصريات الخاص بالزوج من بعد حوالي كيلومتر لو ما اخاف الكذب يعني
أما إذا ما اشتم رائحة تقلياية (من تقلية) واحدة في ملابس الزوجة المغضوب عليها...ازبد وصرخ وانفعل وقلب الدنيا وفضحها امام الأمة ونفسه...ووصف كل السودانيات بأنهن لا يجدن التجمل لازواجهن وإن فعلن فإنما يفعلن لاجل (الخروجة) يا قول السعوديين...رغم انها في الغالب اكتسبت عنصر البشتنة هذا بسبب كرشه هو وكسله ووجهه الذي قد يقطع الخميرة من البيت يا قول المصريين...على فكرة ما الحدث الجلل الذي قد يحدث لو انقطعت الخميرة من بيت احدهم يوماً؟؟؟ربما ان قائل المثل المصري كان له علاقة قوية بالشربوت...والله اعلم...
يعيث بالمنزل فسادا ًهو اصدقائه...فبعد العمل .. ولو انه قرر الجلوس في المنزل...فغالباً سيملاً البيت اكواماً من اصدقائه العزابة...يلعبون الكوتشينة...يشرشحون بنات الناس في ملامحهن ولبسهن وعطرهن وجكسهن ... من قال أن (القطيعة) صفة نسائية بحتة ؟؟؟؟ ومن قال أن (قعدات) القهوة عدم شغلة ولعب الكوتشينة ابحاث علمية شاقة في نظرية النسبية الرياضية؟؟؟
إذا ما تحدثوا عن السياسة فكلهم فاهمين...وكلهم يتحدثون في نفس اللحظة...وكلهم عليهم الطلاق بالتلاتة أنهم بواسل شجعان (بحماقة )يستطيعون قلب الحكم من طرف العنقريب الممدين فيهو اربعة وعشرين ساعة.
يبقى السؤال...من أدعى أن السودانية (براها) جنها قطيعة وكسولة ولا تهتم بنفسها وزوجها في بيتها ولا تفعل إلا عند الخروج إذن؟؟؟ قد تكون فعلاً... لكن قديماً قال رجل...لا تنه عن خلق وتأت بمثله... لا اظنه قال لا تنه يا ولية عن خلق وتأتي بمثله.
اعود
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
عزيزتي جدا بت قضيم
او جدا عزيززتي كما يحلو لك تقديم ال (جدا)وكدا
والله صدقتي في كل ما قلتيه وانا ببصم معاك بالعشره
تعرفي في حكايه كمان ما قلتيها و هي فعلا شي ما عارف اسميهو شنو
و هي حكايه انو لما يمشو في الشارع سوا تلقي الراجل جادع ليك
المرا وراهو بي عشره كيلو ومعاها الشفع
ما اعتقد انو السبب انها بطيئه شديد في مشيها
يا ربي السبب شنو
والله شي مؤسف و طبعا ايام الخطوبه و شهر العسل وكدا تلقيهو الحجل بالرجل دا لو ما عمل فيها جنتل و السيدات اولا و هاك يا فتح ابواب و جر كراسي
عليكم الله شوفو الجنسيات التانيه كيف انشاء كان عمرهم 70 سنه تلقيهم
لسه بمشو جنب بعض و يمسكو ايدين بعض و كدا
والله حاجه حلوه
ولا انتي رايك شنو
لك كل الودو التحايا الصباحيه منها والمسائيه اختاري ما شئتي
ايهاب
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: ايهاب)
|
الأخت بت قضيم
سلام
بالاضافة الى ما ذكرته فالرجل يفتقد الذوق في مخاطبة زوجته أمام الآخرين، فلا يتورع عن نهرها أوحتى الصراخ في وجهها ان لزم الأمر ولا يكترث أمام من كانت تلك النهرة والتي هي في الغالب لموضوع غير ذي أهمية
كما انه يتعامل معها كما لو كان قد تزوجها في الأصل لتخدم ضيوفه فهو يريد أن يظهر حاتميته أمام كل الخلق خاصة عزابة الغربة فمن الكرم الجم ألا يتردد في أن يشاركهم ما تبقى من مليليمات له بعد تجريدالحكومة والاهل والاصدقاء والبلديات من مرتبه وادخاراته الوهمية. وفي المقابل لا يجب أن تقول هي بغم بخصوص أي شيء يتعلق بهذه الخدمة ..والمتوقع منها ألا ترهقه بالحديث عن شراء تياب جديدة أو ملايات أو خلافه فلا مال له ليوفر لها ذلك التعويض عن كل ما تفعله من أجله في الغربة
والمشكلة انه حتى في وجود الضيوف لا يحسن التصرف ولا يظهر بعض الامتنان حتى فهو يكورك لها بطريقة فجة أو يأمرها بان تفعل هذا وذاك لاداء خدمة الضيوف على أكمل وجه كما لو كانت الشغالة التي يدفع لها دم قلبه أو أنهاكانت (نائمة طول النهار ولا تفعل شيئا). بينما يبقى هو متفرغا لـ ..لماذا بالتحديد لا أدري
والمصيبة أنه يتوقع منها أن تؤدي حتى واجباته تجاه جميـــــع أهله كما لو كانت هي التي خلفتها امه ونهرها أبوه ولامها على التأخر بره البيت الى نص الليل وليس هو
أما قصة الرجل يستعرض كل مقدراته المارثونية عندما يسير مع زوجته فهي تكاد تكون سمة ملتصقة بكل السودانيين بدون فرز متعلق بمستوياتهم التعليمية والسخافية والاجتماعية والمادية والامادية وهي تصب في النهاية في نفس الخانة..خانة افتقاد الصقل ومراعاة الذوق في التعامل مع المملوكة
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: rummana)
|
لا حول اللللللللللللله
براحه يارمانه يا جماعه ما لي الدرجه دي
قلنا في سلبيات كتيره في الاتنين
لكن في ايجابيات برضو و برضو التعميم ما بينفع يا ريت الكلام يكون بي نسب
كدي نشوف راي الشباب في الكلام دا شنو
و بعدين يا ريت برضو الزميلات المتزوجات بالزات عايزين نسمع صوتم و نشوف
انا من جهتي اعترف بوجود الحاجات دي كما سبق ان علقت واتمنىالناس تغير حاجات كتيره
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: ايهاب)
|
يا ايهاب أنا متزوجة لكن حاشا أن أكون أحكي عن تجربة شخصية
وبهذه المناسبة أحب أن أبريء ساحة الرجل الذوق الحساس الرقيق الاديب الفنان والدي رحمه الله من مثل ما ذكرت من تصرفات
وكذلك زوجي الذي لا أود وصفه حتى لا تضربنا عين لم تسمي
أنا اتحدث عن تصرفات صغيرة غير ذات أهمية في نظر الرجل السوداني ويفعلها دون تفكير..لكن الحقيقة أنها تترك أثرا غير ظريف على الاطلاق في نفس الملاحظ لها
القصد هو تسليط الضوء على السلبيات حتى يتم تفاديها ...أما الايجابيات فلندعو بت قضيم لتفرد لها بوستا جديدا ء
وكذلك نسيت أن أقول أن الرجل المتعلم ينظر للمرأة السودانية عامة وعلى وجه الخصوص لو كانت زوجته على انها امرأة فارغة سطحية قليلة الفهم والعلم والثقافة ولا يشفع لها أنها كانت في يوم ما زميلة له في ذات الجامعة وربما جلست لجواره في نفس قاعة الامتحانات..فالسطحية لا بد أن تكون أهم سماتها
واؤكد لك اني لا أقصد ، ولا ينبغي لي أن أقصد، كل الرجال السودانيين
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
ايهاب خليت المرأة السودانية وقمت على الرجال؟
لاكن ما حنديك فرصة , احنا بننتقد بصورة حضارية وبسلام
يعني قي الآخر عارفين الوضع ما حيتغير وسيظل الرجل السوداني يتصرف كما يتصرف دائمآ
لكن قلنا كويسين وراضين دايرين شنو تاني
ياخي في أجمل من انك تمشي امام زوجتك ب 2 كيلو؟ دا ما قمة الحماية, افرض في حفرة في الشارع ما حيقع فيها هو الاول فدية لكي حتى لا تسقطي أنتي
بعدين ليه يتغزل فيكي و يمطرك بكلمات الحب بعد الزواج انحنا أذكياك وبنفهما وهي طايرة, مادام جه البيت وما لف وقال العشاوين!! تدوري انتي بعد دا شنو في حب اكثر من كدة؟ يا سلااااام
بعدين يتلبس لشنو ويتعطر لشنو و يسرح تفتو قصدي شعرو لشنو؟ مش ياها انتي مرتو قاعدة معاه لأبد الآبدين وما حتمشي تكوسي راجل غيرة ورضيتي بالواقع الجميل؟ دايرة شنو أكتر من كدا بلا جمال بلا هندام الراجل بعقلو مش بريحته
لاكن بس مرات بيبالغوا
ما بس المتزوجين حتى الكايس العرس والله مرات بنشوف حاججات كوميدية ويرص ليكي عندو شنو شهادات وممتلكات وفي الآخر يقولو المراة السودانية مادية.. لاكن ما من العليها هي شافت جمال وهندام عشان تختار و زاتو بعض الرجال بكون عارف انو ما عندو غير القروش يجذب بيه المرأة ويتحسر الآخر ما بتحبه وما بتدلعوا كما تفعل نساء اللبنانيين والمصريين. لاكن ديل ما نفسهم بتكون مفتوحة جد
اها كدة الظاهر تقلنا العيار
نعيد ونكرر الرجال السودانيين حلوين وطيبين وبنحبهم عشان ما يزعل زول
بس مرات بيغيظو
وسلامتكم
زولة 123
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
اولا ازيكم ياجماعة
والله يابت قضيم اليلة جننتو الرجال جن لكن والله دى اقل حاجة لانو فى نوعية من الرجال بعتبروا انو المره دى او زى مابقولو الولية مجرد حاجة اى حاجة لازم تنصاع لى جميع الاوامر يعنى الواحد منهم ممكن يدخل حتى فى لبسك ده البسيهو وده لا ده طويل وده قصير لما نمشى ناس فلان اعملى كده وكده لا اما موضوع العيال فدى الحاجة الوحيدة البتجننو يامرة سكتى الشافع ده الواحد مايعرف يرتاح مع انو مابكون بعمل فى اى حاجة لكن فى رجال تانى ماشاء الله عينى باردة عليهم ممكن يعملوا ايك اى حاجة ويساعدوك فى اى حاجة وديل اقل من القليل طبعا
ولا رايكم شنو
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
و الله الانا عارفه.... الراجل بكمل المرة ، و المرة بتكمل الراجل ... و ده كلام اجدادنا و حبوباتنا ... المرة بدون راجل ، ما بتسوى .. و العكس صحيح... يعني مافي داعي للمنططين عيونم ديل.... ولا الواحد يشوف ليهو خواجية بدل سودانية؟لوووووووول
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
انا اقر باني كل ما زكر صحيح عن الرجل السوداني ولكن بشئ من النسبية وليس التعميم علي الكل ولكن لنعود لاصل الداء
في راي ان اصل العلة طبع متوارث بين الاجيال وهذا السلوك غير الكريم في حق الرجل السوداني يورث في الغالب وان كان هناك شئ من الاكتساب لهذه العادات ولكن لنفتح بابا اخر لنري منه العلة وهو دور المراة في تولي هذه العادات بالرعاية حتي تزداد كل يوم
فالمراة السودانية ومنز قديم كانت تمتاذ بالدونية وتحقير الزات
اي بالمعني العلمي للتلزز بالتعذيب
ومن من جداتنا لم تبدع في ايجاد المبررات للرجل لتفنن في ازلالهن
ولكي لا ندفن رؤسنا في التراب حتي اليوم اري كثير من السودانيات
يمتزن بهذه الصفة وهن كثير
والمراة السودانية تجيد جدا لعب دور او تمثيل دور المغلوبة علي امرها والمقهورة وحتي بين المتعلمات وهي تستمتع بهذا
حتي حقوقهن المكتسبة التي شرعها لها الشرع او القانون نجدها تفرط فيها لخاطر الرجل وطواعية وايجاد السبل لتمكين الرجل من التحكم في كل الامور حتي اننا لا نجد لها رايا في امور تكاد تكون مصيرية بالنسبة لها وحتي عند المشاورة نجدها تقول اعمل البريحك وهو اعطاء الرجل فرصة التحكم الكامل
لما النحيب الان
وهذا في نظري مما اعطي الرجل الفرصة
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
كلنا ربما يحلم بإمرأة بإمكانات متجاوزة ..
و المرأة التي نرى.. لا تملك حق أن تحب و لا تعرف كيف تحب و غير مسموح لها بهذا الحب ؟؟؟؟؟؟؟؟؟؟
المرأة التي نرى.. ترى في وضعها لاإجتماعي كل العدل
المرأة التي نري.. تلوم الرجل من واقع العشم فقط
المرأة التي نرى.. تكبل الرجل بالخنوع و الإستكانة و تجبره لأن يعيش دور المواطن من الدرجة الاولى نسبيا
لا أتحامل حين أقول أن المجتمع لا يزال يسير على ساق و نصف الساق
حق كل الطامحين الحلم و لهم العزاء حتى إشعار آخر
و حتى لا تكون الردود في اطار الإنفلات العاطفي lool أرجو أن يكون التقيم من واقع العام لا الذاتي أو الشخصي
و لنا عودة للرجل
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
خطأ شائع هو لا حول الله...والصحيح أنها لا حول إلا بالله
صباحاتكم
سلمت أخي جداً العزيز ايهاب...كيف انتبهت لهذا الحوص الكلامي بالله؟؟؟
ثم كيف اخبار البابا؟؟؟
طبعاً كان من المفترض ان اقول...كيف اخبار (الوالد).. أو غالباً سترد عليا...أن الحاج أو الوالد بخير...فكلمة (بابا) دلعاً لا مغفور له في سياسة الشاب السوداني..ابن الحارة أعني وهم الأغلبية.
أحد اخوتي ظن في المرحلة المتوسطة...أن حمل ساندوتش نظيف للفطور من المنزل للمدرسة...هو قمة اللارجالة
وفي الثانوية...كان يرفض ومن معه من اولاد الحي...ارتداء اي (بلوفر) واقي من برد الشتاء القارص...فمن يفعل هذا في عرفهم...(ود امه) كما كانوا يطلقون علي أولاد الناس المرتدون لملابس الشتاء وقتها
لم اذكر اخي كتجربة شخصية ولكنه صورة لتفكير قطاع كبير جداً من الشباب السوداني
وقس عليه...
طفولة خشنة تميل أكثر للرجولة القاسية من الطفولة البريئة..(هل حدث أن لاحظت كيف يلعب الطفل السوداني الاولاد منهم اعني مقارنة مع بقية شعوب الله؟؟) ...مراهقة اخشن عملياً ورومانسية سرية، الأفصاح عنها خيانة للرجولة...ينادي أو يصرخ في زوجته امام العالمين ب ( يا ولية يا مرة أو الجماعة او الاولاد في احسن الأحوال) ثم وبينه وبينها يحدثها بعذوبة ب..(يا ام الأولاد يا ام محمد او اياً كان...تقديراً لها وعزة) ..
والنتيجة (شخصية متناقضة) تظن أن التعبير العلني عن ابسط العواطف المخلوق بها الإنسان فطرة لهو قمة الضعف الرجولي، وفي نفس الوقت تمارسها بروح عاطفية قمة في الرومانسية. تناقض مثير للدهشة...رغم قناع القسوة هذا الذي يجيد ارتداءه...هو عطوف رحيم... وقت ضمانه أن لا اعين ترصده ولا أذن تستمع له...يبدأ في خلع القناع والعودة تدريجياً لمستوى البشرية من الضحك والابتسام والتراخي.
الرجل السوداني يا رمانة يظن أن فرض سياسة (الصوت العالي) و (صرة الوش اللا سببية) هو نوع من القوة الهائلة التي يثبت بها رجولته واحقيته في القيادة...المشي امامها في عرفه يدل على عدم الأنصياع لها كزوج ..أي كأنما يقول للعالمين من حوله .. انظروني انا مستقل قوي الشكيمة والعزيمة...ممشي مرتي على عجين ما تلخبطوش...والله ما عارفة المصريين قطعوا المثل ده من وين.....
الرجال قوامون على النساء...يعني لديهم أن يأكل قبلها...يخرج قبلها...يمشي قبلها...يشرب الشاي قبلها...وكل ما يمكن أن تفعله هي أن تنتظر اتخامه بالعناية الآلهية ثم تستطع بعدها أن تنظر لما هي وما تريد هي..
عليها أن تحترم اهله...وتخدمهم...الكثيييييييييييييييير منهم يظن كونه تنازل لها عن الحرية (رغم أنها ايضاً فعلت) وتزوج بها يعني هذا أن تعمل (بلا رحمة احياناً ولا شفقة انسانية) على خدمة ضيوفة وعزابته ورعيته ورعية رعيته دون أن يفقد وجهها الابتسامة...وإن حدث أن اعترضت فهي بلا شك مرة نقناقة وزوج لا كريم الأصل...
يلومها على شراء الملايات...و يمولها.
يتضاحك ويسخر على قلة عقلها وركضها في اقتناء الذهب...ولا يجمع هو مليم واحد لاجل مصائب الدهر او بناء المستقبل.
يتهمها بالمنظرة والفشخرة الفارغة....ويتجارى وراء شيكات العمرة والمرمطة في بلاد الله والكشخة في الإجازات وادعاء المدنرة والخلجنة إن صح التعبير.
الأمثلة مستحيلة الحصر.
في النهاية هي سعيدة بذلك...وجميل أن تكون سعيدة فهو نوع من تقوى الله وسبباً لدخولها الجنة أن تحاول إرضاء رجلها زوجها كان أو ابيها أو اخيها.....لكنه يزيد عن الحد المطلوب...ومرة أخرى أكرر ان ما يزيد عن حده ينقلب إلى ضده.
اعود
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
مساء الخير بالصباح
حقيقي الواحد لما يعمل فيها مهم ويرجع يرد بعد كمن يوم من الموضوع ببقى باااااااااااايخ وموضوعه ما عندو موضوع
لكننا نصر على أن نوجع الوش وجعاً شديداً
التحية للجميع
يا زولة ا23 ...ما عارفة لماذا ال3 تأتي عندي قبل ال2...تذكرت عصابة القناع فجاة لا ادري لماذا
بالغتي يا زولة...ضحكتيني والله...خصوصاً موضوع الحفرة بالذات...من اجمل الأشياء في الدنيا أن يهون الواحد على نفسه بتقبل جميع الأشياء بروح مرحة...هذا شئ نادر الحدوث عند المرأة لأنها نكدية بطبعها...أظن يعني وانا بتفلسف من صباح الرحمن كده وعاملة فيها فرويد
سلمتي للمشاركة وادام الله عليك روحك الحلوة هذه
كل الحب
اختي رؤى
اسمك جميل...ثم هل لك علاقة بفنانا المبدع السقيد؟؟
سلمتي للرد....وعندك حق في ما ذكرتي...وإن كان سلوكاً شخصياً الذي نتحدث عنه إلا انه منتشر..اعني اصبح كسمة وما عداه مجرد ظواهر نادرة الحدوث
سلمتي واعود للتعليق على ما قلتي في ما بعد
كل الحب
الاخ تالي
بس لا تحرمنا من طلتك...وعسى الله ان يهد الخواجياية فيك فتنقلب عيناك لازرق وشعرك لاشقر مع اصفرار البشرة
لا عليك انا بهزر معاك فانا محبطة هذا الصباح...لا تنط لي بعكاز بالله
كلامك سليم مية في المية...ونحن لسنا منططين عيونا...هذه خلقة الله ولله في خلقه شؤون...وعموماً الموضوع هنا ليس للمقارنة بين رجل وامرأة وإن كان من الصعب الفصل بين الموضوعين...وليس الموضوع من مع من وظلم المرأة والكلام الكبير ده...قصدت فقط مجرد القاء الضوء على بعض سلبيات الرجل السوداني فقط للنقاش
والله لا يجيب الشينة
سلمت للرد
دمت
اخي اساسي
سلاماتك...عندي سؤال خارج نطاق الموضوع...بالله لا تطنش كما يفعل الغالبية هنا
ما معنى توقيعك...محل رهيفة التنقد...اظنني قرأته بصورة غير صحيحة...وبعدين انكسفت اسأل لانه ممكن تكون جملة شهيرة وسؤالي عنها يدل على جهلي الثقافي الذي نحاول بشتى الطرق إخفائه ودسدسته بي هنا وهناك...لو رددت تكون مشكوراً وإن لم تفعل برضو مشكوراً
كلامك كبير...وتعليقي عليه اقوله لاحقاً...فقط اردت الآن ان اقول سلمت للمشاركة
دمت
اخي عمر
إن شاء الله يسلمك يا رب...صورتك التي تضع تجبرني على الرد عليك وفي مخيلتي صورة لعم او خال أو شخص جدير بطأطاة الرأس امامه احتراماً...كلامك ايضاً يفعل...في معظم ما قرأت لك يعني
اليس من الغريب ان الصور تجبرنا لا شعورياً على التصرف والحديث بناءاً على احساسنا بها فقط لا غير والاحاسيس قد تكون أو في الأغلب لا تظبط تماماً دائماً
؟؟؟
هل تبدو جملتي هندية؟؟؟
حسناً لا بأس...لكني فكرت وانا ارد عليك أنني لا بد ان اضع صورة واحدة حليوة في توقيعي عسى الله يفتحها علينا بدل ال(كج) الراكبنا ده
ولا يهمك من كلامي...اعاني من حالة تاتأة لا معنى لها
شكراً للرد...وبرضو اعود للتعليق لاحقاً في سياق الكلام
لاحظ أن ذلك يعني انني لن اسكت هذه الليلة إلى ان يقضى الله امرأ كان مفعولا
شئ واحد اعلق عليه في كلامك...انه من الصحيح أن يأتي كلامنا بناء على العام وليس الخاص..لكنه من الصعب بل المستحيل احياناً الفصل بينهما...فاعذرنا إن فعلنا وخلطنا التجربة بالتحليل فهذا جداً وارد
دمت
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
مثلا
مثلا يعني
مثلا يعني اني قابلتك يوم
معلق معاي المقطع بتاع الاغنية دا قلت اتخلص منه عندك هنا
طيب نجي تاني
مثلا
لو عندي حبل
وهناك اثنان يشدانه من اطرافه
اكثر مكان ضعيف في الحبل سيكون مكان القطع
خلي دا
لو عندي شوال
وبملا فيهو بلح مثلا
اكتر مكان دايب ومهتري في جسم الشوال حيكون بوابة الخروج للبلح
بس كان فضيتي لينا من انا شوية
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
مساء الخير للجميع
شكراً اساسي اخوي...اعتقد اني فهت .. يعني المكان الرهيف تجي تنقد فيه؟؟
جغمزتها صح؟؟؟
عموما ًاظنني فهمت المشكلة في لهجتنا أن قراءتها صعبة بدون تشكيل...قال يعني العربي عندي وكده
سلمت
اخي الصاوي
والله بريدك ده بالغ...واعتقد اني بالغت اكتر منو...ببساطة ممكن ارسل ليك العنوان بالمسنجر صح؟؟؟
قالوا الفهم قسمة معليش
يا سيدي الكلام على وجه العموم وليس المقصود به احدهم شخصياً...انا مثلاً ابي كله ذوق يا قول اللبنانيين عكس اخواني الما عارفة اتربوا في ياتوا خور...اقصد من الدشانة يعني وليس من قلة التربية...لا تفهمونا غلط يا قول الأم بي سي
اعود لتفنيط الكلام في وقت ارحب كان الله ادى العافية
سلمتم
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
جميل هذا الصغير الغاضب المولع نار الذي وضعته بجانب العنوان هناك
تخيلي أنني لا اعرف للآن كيف استخدم هذه الناسات اعني الأشكال الصغيرة واستعملها هكذا؟؟؟
ما علينا
صباحاتكم جميعاً
استاذة اشراقة
كل التحايا وعظيم التقدير
انا اهابك يا هذه قلت ليك قبل كده؟؟؟
لا تسأليني لماذا هكذا افعل وخلاص
شخصياً اعيد واكرر انني لست ضد الرجل السوداني اللي هو ابونا واخونا وزوجنا...اعني ابننا شان ما ندخل في مشاكل تعددية وكده
فقط وددت الإشارة للسلبيات لنزيد فيما بعد الإيجابيات
ولسه الكلام كتير والله الموضوع ده بمسكه لبانة
انتظر مشاركتك التي مؤكد غالباً ستكون فعالة
على فكرة...هل {مساخر} هذه جمع {مسخرة}؟؟؟
النبي كان تقولي آي...بحبط بالجد
الله يعافيك ولك كل الحب (يا قوية) وانتظر
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
قال التراث....الواعي ما بوصوه من أمس الضحى (توري) اب زنود جابوه...الخ الخ الخ
عليه
دخلت لمديري...وأكدت له جل الطاعة ...وكثير الوفاء...وحسن انتمائي للمؤسسة... وقلت له في صوت خطابي جهور... يا تور!!!!
أما لماذا غضب واستاء وقرررررب يديني كف لولا انني انثى... فلا ادري... لأنه حسب ما جاء في الحديث السوداني...ان (التور) حاجة كويسة ... يؤكد ذلك قصيدة أخرى يجئ فيها (الما بقودوا زمام جاموس الخلا الفي الرجال ( ) صدره فيه كلام) وعذراً إن لم استوعب كل كلمات البيت... فالنطق عند الفنان غير سليم تماماً...
حضرت حفل الأسبوع الماضي...فاثارني ولفت نظري كثيراً الفنان (الجعلي) وهو يشدو بحماسة قد تثير غيرة جنود الوطن في ساحات الفداء...ويصف بدقة مثيرة كيف أن الرجل ال(كويس) (جاموس خلا)..مما يعني انه زول (كويس) ..وليس أن (جاموس الخلا) هو الزول ال (كويس) ..ذكرنا الفرق منعاً للالتباس.... جعلني ذلك استعيد التفكير الأحيائي القديم الذي كنا ندرس...عن الجواميس والبقر والجمال والنوق...لم استطع تذكر (جاموس الخلا) ووميزاته رغم أني بيني وبين نفسي فكرت أنه غالباً بما انه (جاموس ) وبتاع (خلا) فلا بد إذن من أنه من ذلك النوع من الحيوانات المستنفرة الخلوية التي لا تستأنس...لكني بعد قليل تضاحكت على نفسي...لأني لم اشاهد في حياتي أي جاموس (اليف) ..بتاع (الخلا) كان واللا بتاع كافوري...جميعهم بقرون طاحنة... أعني ناطحة..
كثير من الحيوانات الحقيقة قد تداركتني وتجمعت في مخيلتي في جو الحفل البهيج الذي كنت أعيش...فها هو النسيم ينساب بعذوبة جميلة...الفتيات يتهادين وكلهن كما غزال المسالمة تماماً...وجواميس الخلا تتمنظر هنا وهناك....فجعلت افكر...الم يجد الشاعر / الشاعرة...سوى جاموس الخلا لوصف حبيب القلب الكاسر؟؟؟
ما لفت نظري ...أن تراثنا القديم منه والذي سيصبح يوماً قديماً...زاخراً بكل أنواع الحيوانات التي يوصم بها الرجل السوداني (مدحاً) وليس (ذماً)...مما يثير الدهشة...ويجعل السؤال يقفز مباشرة دون الحاجة لكثير تفكير...لماذا يظن الرجل (السوداني تحديداً) أن القوة هي بعض من حماقة (الجواميس) على بعض من مطافي الدولة كما جاء في النار ولعت بقلبي بطفيها...وشوية من تماسيح الكبلو ... ولا ننسى القيام والقعدة على كيفهم في روايات أخرى...وهلم جرا
لا ادري...أهو نوع من الشجاعة الجبانة...ام أن الرجل السوداني يعتقد فعلاً أن القوة لا علاقة لها بالعقل...لذلك دائماً ما يتحامق ويستعمل أداة اليد في أخذ الحقوق والدفاع عنها..
قيل أن هذا النوع من الشعر ليس وصفاً إنما هو حالة من الفخر يعبر عنه ببعض المبالغة في الوصف... لكني اندهش أن يكون يفخر أحدهم بأنه جاموس أو تمساح حتى...يعني ليست من الحيوانات الجميلة أو التي تحمل من الصفات احسنها...
العرب كثيراً ما اشعروا وشبهوا الشجاعة الرجولة ببعض الحيوانات المشهود لها بالقوة الجسدية نعم ... لكن مع الحكمة في التصرف...كالاسد والنسر وحتى الكلب في الوفاء...لكنها من الحيوانات التي يشهد لها في الأساطير القديمة بالقوة الحكيمة إن صح التعبير...وهي ليست بمقدار التحامق الذي يجيده معظم الرجال السودانيين...
الشعر عموماً حالة تمثيل للواقع...والواقع فعلاً يشهد باختلاط الأمر على الرجل السوداني بين القوة والحمق... لذلك نجده كثيراً ما يحاول التعبير عن نفسه باليد لا باللسان ولا بالعقل...والمصيبة أنه يعتقد أن هذا قمة الرجولة والشهامة!!!
والغريب أن هناك تناقض كبير جداً...فمعظمهم إن لم يكن كلهم يجيدون التحامق حتى أصبحت سمة أساسية في سلوكهم وجزء لا يتجزأ من شخصية الرجل السوداني ورغم ذلك حقوقهم ضايعة؟؟؟
ففي جميع الدول العربية ولا ادري بالنسبة للأجنبية...يشتهر الرجل السوداني بإجادته الدخول في ال(خناقات) ... ومع ذلك...يشهد له بالتهاون في أخذ حقوقه لأنه بالطبع...العضلات ما بتجيب حق زول... ومؤكد في داخل السودان الأمر أكثر وضوحاً وتجلياً..
نعم .. انتهى عهد (البطان) في قطاعات واسعة من قطاعات المجتمع السوداني...لكنه للغرابة ما زال يمارس بطرق أكثر تحضراً وتخفياً وتناقضاً... والدليل عضلات السوداني التي يظن أنها سوبرمانية لا تقهر وفي إمكانها أخذ كل حقوقه رغم أنها كثيراً ما تكون سبباً في ضياع هذه الحقوق...
عموماً...الحكمة تقول...خير الأمور أوسطها...يعني لا نسيب حقنا لكن برضو لا نتحامق ليضيع للأبد...والله اعلم!!!
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
شكراااااااان يا شرير (ما أنت طيب أهو) ،، آخر مرة بحثت عن هذا البوست لقيته طافش
وكنت مغبونة وفي حوجة شديدة لفش الغل
ثم بعد أن قرأت الردود من جديد،،، اكتشفت أن الموضوع قرأ بصورة مش بطالة،،، لكنه يفتقر للمشاركات النسائية،، المفروض البوست يخص وجهة النظر النسائية، فانظر بالله لعدد المشاركات القليل جدا مقارنة مع عضوات البورد الكرام
جعلني ذلك اتساءل
هل المرأة السودانية لا تلاحظ عيوب الرجل السوداني كما افعل انا بطبعي (الشناف) الكريه؟؟؟
أم أن الموضوع لا يخصهن ؟؟؟
ثم فكرت في كل الجلسات النسائية التي حضرت على الصعيد الشخصي
وجدتنا نتحدث في كل الأشياء،،إلا نقد شخصية الرجل السوداني
غريبة
إما هو نوع من الهروب،، أو هو تسليم بأمر واقع،،، أو عدم اهتمام
على العموم شكراً على رفع البوست،، كانت لدي رغبة قوية وقتها في كتابة الكثير،،، لم اكن قد انتهيت بعد
لمت اتمنى أن تتاح فرصة لاحقة بصورة افضل في مناقشة الموضوع الحساس من قبل النساء تحديداً
سلمت
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
سلام بت قضيم
هناك تناقض فى الرجل هذا لا شك فيه فانا واحد منهم الرجل السودانى او معظمهم متناقض
فى اشيائه هل هى من التربيه ام من المجتمع ام من المراءة نفسها.............؟
ربما ايضا من انتمائه العروبافروي او الافريقاعروبى ايضا هذا صراع داخلى
لذلك قرارتنا كثيرا ما تكون مهزوزه اوبتاخد وقت
ايضا الاخت زوله واحد اتنين تلاته (وبعدها بتقوم جاريه ولاشنو) قالت انو الرجل السودانى
بمشى قدام عشان لو فى حفرة يقع فيها هو الاول
القصد هو عشان يوريها الطريق وبس
قرنفل
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
حسنا يا دكين
لم اكن ارغب في أن اقلب الموضوع لمقارنة بين الرجل السوداني والمرأة السودانية،،، فلا مجال للمقارنة حيث لا ارضية واحدة يستند عليها النوعين بغض النظر عن أرضية الاقتصاد المايلة بالإثنين لدرك الأرض
دعني اعترف،،أن السودانية إن لم تتزوج فهي لا تصاب فقط بخرف مبكر مع زهايمر،،، بل قد تروح فيها روحها وتفقد عقلها وذاكرتها وافضلياتها وتبدأ تخابط يمين شمال اللهم عريس والسلام
ذكرتني إحدى قريباتي التي عاشت من السنين ما عاشت ولم تتزوج فسألها احد سخفاء السودان المليئة بهم الأرض والسماء
يا بت انت ما عرسوك لي هسة ليه
فردت عليه ببديهة لا عادية
كان دايرة رجال عورة متل عوارتك دي كان عرست زمااان
لنسأل انفسنا من من نساء العالمين لا يصيبها الخرف المبكر لو لم تتزوج وعاشت بلقب (عانس) يطلقه عليها كل من هب ودب وكأنها فقدت أهليتها للحياة؟؟؟
اعني ان نساء العالم باختلافهن يعانين من هذا الشئ وإن لم يفصحن،،، وإن اختلط الأمر بين مجرد عريس أو تأمين حياة وامتداد أجيال،،،والرجال ايضاً خصوصا في سن متأخرة من العمر
هذه غريزة طبيعية غريزة البقاء ،، لكنها تزيد عندنا شوية لجهل وتخلف باق لدينا ما زال،، يزيده انغلاقنا حول انفسنا ومجتمعنا الذكوري الذي لم يزل يعتقد أن المرة من بنبرا لي ورا
(حقيقي ما فهمت المثل ده مقصود بيه شنو)
أو يعتقد أن المرة كان فاس ما بتقطع الراس
يعني هو قطع الراس ده مفخرة كبيرة كده؟؟؟
دعنا ننظر للأمر من جهة أخرى،،، الرجل السوداني (العانس) أو ال(عاجز)وعنوسة الرجل السوداني ليست عزوفاً عن الزواج (يعني ما بمزاجه ) لكنه عزوفا عن الحياة كلها (غصباً عنه)
يتضاحك السوداني على المرأة وجريها وراء الزواج بكل السبل المشروعة وأحيانا غير المشروعة،،، ويتناسى (بمزاجه) أن السبب الرئيسي وراء ذلك عزوفه هو عن الزواج،،وعزوفه ليس بمزاجه (هو لاقي؟؟) لكن عزوفه بسبب
عجزه
وجبنه
وتكتيفه
وسطحيته
وأحلامه الوهمية التي تقف كلها على ابواب تأشيرات العمرة ومهرجانات التسوق
ليعيش على بواقي أهل الخليج،،أو أقصى الأماني كان كترها امريكا،، نبات طفيلي يحاول التسلق منذ صباحات الله الباكرة وحتى مغيب الشمس،،، دهراً ،،ليجدد إقامه،،،ويرتدي بدلة ،،، ويحمل الجوال،،، ويدبر حق الإجازة،،،فيقلب لسانه مرة عربي ومرة هندي ومرة إنجليزي،،،ويمضي به عمره وهو في الفشخرة الكذابة،، لينتهي به المطاف آخر الأمر في الأربعينات،،، بصور قريباته وبنات جيرانه في محاولة بائسة للحاق بالحياة (واريتوا لو لحقها صح) ليختار في النهاية النعجة التي سيكمل بها ديكور المنزل ،،، ليكمل بها صورة حياة لم يعش فيها ولا دقيقة واحدة كفاحا حقيقيا (هو الجري من الكشات كفاح؟؟؟)
ولا دقيقة سعيا لحياة حقيقة ليحظى بشرف (مواطن) طبيعي في بلاده هو،،بمنزله لا ايجار،، بسيارته لا سيارة لا حق له فيها لو لم يضمنه الكفيل،، مشروعه،، وابناؤه،،، وجيل المستقبل الذي سيحمي هؤلاء المتجاريات وراء الحياة
وماذا فيها إن سعت الفتاة للزواج
؟؟؟
اليست هذه سنة الله التي كان الرجل السوداني بأوهام المكيف وشنط الاغتراب يقضي عليها ويميتها ويتوفاها بنفسه؟؟؟
الاقتصاد الاقتصاد الاقتصاد
ما الفرق بين سوق ليبيا وباب شريف على سبيل المثال؟؟؟
كروش تبيع عراريق لتحمل لقب مغترب
؟؟؟
وطبلية في حر الله ومستقبل واضح المعالم تحميه ارضية صلبة لا تنتهي بموود الكفيل وامزجته المتقلبة
؟؟؟
ما سوق ليبيا كله سودانين اغنياء؟؟؟ اتولدوا كانوا ابهاتهم سلاطين؟؟؟ واللا هم اتراك مغتربين في السودان؟؟؟
ام هم من صنعوا لهم مكان في أرض اعتبرها (اهل الشمال تحديدا بكسلهم وتراخيهم) يوما صحراء؟؟؟
عزيزي دكين
المرأة السودانية وإن خرفت لتتزوج يبقى على الأقل هدفها نبيل وهو اولاد وجيل صالح يمكن يمكن ينفع يوما من الأيام
المرة كان فاس ما بتقطع الراس
الراجل هسة فاس،،،قطع شنو؟؟؟ التذاكر؟؟؟
اعود
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
انت عارف
انا فعلاً اتحسست من الموضوع لأنه ضرب وتر حساس فيني
خصوصاً وانا كل يوم الصباح بمسك لي ضب شان ابلعه بزغة ديك صباحية،،، وانتظره لما يبيض،، واقوم اشيل بيضه ادفنه في المقابر،،، شان الفكي قال لي كده بجيني عريس
ما عارفة كيف قدرت تجرح شعوري كده مع انه ده كلو كان سر زمان
وده كلوووووو باعتبار شنو صدق؟؟؟
باعتبار اني كنت قايلة روحي غنماية،،، اتخيل
لكن وقت اكتشفت الحال الآن ولقيت روحي (نعجة)ساي وكتر خيركم النبهتونا،، يبقى اشوف لي فكي تاني لتغيير الخلطة لكائنات أكثر رقياً من ضب وديك تليق بمقام نعجة
وما تعتب عليا،،، العتب على (نعاجتي) المتأصلة،، ما قالوا في المثل (النعجة) ما بتشوف عوجة رقبتها ،،، وكذا القرد اتخيل؟؟
!!!!
وبعد
حيث أنك وجدت مخرجاً جميلاً لسوق ليبيا (مع اني بنعاجتي ما فهمتو كلو) فسر لي وحياتك وانتوا من تطفحوا الكوتة لأجل النعاج الضعاف
لما إذن في كلو ركن ست شاي
وجنب كل ست شاي ست فول
وجنب كل ست فول ست دندرمة
وجنب كل ست دندرمة بياعة كسرة
وجنب ست الكسرة ست قونقليز
وجنب ست القونقليز ست ..... حاجات تانية
أو قل لي لما وانتم تتعرقون وتقفون في صف التأشيرات الطويل مراعاة لقلوبنا القاسية الما احترمت جميل،،،لما يا عزيزي ثلاثة ارباع الدواوين الحكومية (نعاج) وثلاث ارباع العاملات في المصانع (لو لم يكن جميعهم) (نعاج)
ثم ما تفسير سيادتكم للظاهرة الرائعة في اغتراب النساء الملوا مشارق الأرض ومغاربها دونما تفضل السادة الرجال بقطع التذاكر كما تقول الأغنية التراثية الجميلة (خلاص قطع التذاكر انا مالي ما عارفة شنو كده)
ثم خريجي الثانويات والجامعات المرمين بالألاف يساسقوا في حق المواصلات من النعجات العاملات
وستات الطعمية واللقيمات تاجرات الداخل
وبياعات العدة بالركشة
ومحترفي الرزيلة
ورزيلة الرزيلة
ما الداعي لكل هذا التعب والشلهتة واللف والدوران طالما انكم ما شاء الله سادين عين الشمس
كل كلامك السابق ينفيه كلامي التالي إلا إذا !!!!!! خلي بالك معاي!!! إلا إذا
كانوا غنمات يعشقن الحل والترحال والتمسح في حيطات الناس وأكل أكياس النايلون المجدعات ذي ما انا كنت فاكرة نفسي زمان غنماية قبل ما القاني نعجة
ده طبعاً كان ممكن يكون تفسير منطقي لولا إصرار سيادتكم وتأكيدكم اننا للغرابة ما غنم،،، نحن وسبحان الله طلعنا نعاج
معليش يا دكين
شوت واحدة تانية دي طلعت آوت
خصوصاً انه امي ما بت جيران ابوي
والغريبة ولا قريبته
والأغرب كمان ما دفع ولا حتى تذاكر بنطون توتي
ات قايلني (منعمة) في الخليج
يا ود انا (منعجة) بت زريبة اصلية
النبي قول ما شاء الله ما تسحر نعاجتي دي
وبالله اتكلم لينا عن سوق ليبيا اكتر الموضوع هاميني (شكلهم دفنوا صرتي هناك في زريبة الله اعلم)،،، جنك ده امسكه عليك شوية،، بكري بقوم يطردنا الاتنين سوا بعد ده
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
عزرا بت قضيم وصفتك قد يمة نوعا ما ..
تخيري من الضبوب المقيم غير المسافر ..والودود الولوف..وقبل ان تتنناوليه
انظري مليئا في عينيه فان كان به حول فهو لك والا فارجعية شق الحيطة الجبتيه منو عسي ربنا يكتب لك ضبا يقدس الحياة الزوجية غير احول ولا معتدي .
وستات الشاي الشايفاهم ديل ما عندهم زولا بتضهب زينا بي جاي..وان كان في يبقي زول هامل وقلبو ني ..
ووحاتك لو ما المعرقين سعاة الليل والنهار ديل هنا كا ن زمان الخرتوم كلها ستات شاي وبائعات وجبات وبائعات هوى...
هسي ناس الحلة هناك تفتكري مستورين بي قروش منو ..سوق ليبيا ولا الموظفات المشتتات في دواوين الحكومة ديل؟ ديل يا رقيقة الحال وجعة ضهرنا .
الحريم ديل لو عندهم راجل بسعي وبضحي ما كان سووا الشايفاهو والسمعتي بيهو..
ولو بتحلمي بي عريس من سوق ليبيا بدبرو ليكي تب..
اخوكي انا يا بت قضيم ..هيع ...
سوق ليبيا يتحكم فيه اكبر شيوخ وامراء قبيلة الزغاوة ..والعمق الزغاوي في السوق يؤثر سلبا علي تمدد باقي القبائل الاخري فيه يعني الغير زغاوي بنضرب هناك براحة لو ما مكرب نفسو . ولو كرب سنة السنة الجاية ما بقدر والمسالة مسالة زمن فيصفي السوق لجهات معينة من غرب السودان .. طبعا ذلك ليس مأخذا علي الزغاوة وقبائل الغرب بل تفكير اقتصادي واستراتيجي ..والزغاوة عموما قبيلة غنية وقادرة ومتمكنة واغلبهم عنهم جنسيات تشادية ..اتنين من شباب الزغاوة درسو معاي في الجامعة وحدثوني عن ان القبيلة تبعث كمية من الطلبة الى دول غرب اروبا وتحديدا فرنسا باعتبار ان تشاد من الدول الفرانكفونية بترسلم للدراسات العليا علي حساب ميزانيات مجهولة المصدر..وان كان محدثي انذاك لا يجهل ذلك المصدر ..اخبرني ان سوق ليبيا احد هذه المصادر المالية التي يرتكزون عليها في التدفق المادي ..المهم انو السيطرة علي اقتصاد مناطق بعينها يسير ويخطط لها باتقان لصالح ما يسمي بدولة الزغاوة الكبري ..لا علم لي بصحة ذلك الحديث ولكن الامر الراجح ان هؤلاء جادون فيما يفعلون والبلد بقت ضبابية الواحد ما بقدر يعرف فيهاالحقيقة من الوهم والناس ديل قادرون واذكر انو احد شيوخ الزغاوة واغناهم قد تبرع بعد هائل من( الزت وايات) لي الحكومة دي ..
ادريس دبي زغاوي وخشا انجمينا دي بس بي تيوتات( بك اب) ..كمية من اللاندكرزرات اليابانية ..بس مسلحة بي دوشكا اعلى كبينة القيادة ويقودها اشاوس .
وهسع الدواس الفي الغرب دا من هولاء الاغنياء ميسورين الحال والاشاوس والاسلحةالتي بيديهم الحكومة كانت تدري انها معلقةفي رواكيب الزغاوة ..وبعضها ياتي من تشاد مهربا او بطريقة علنية لا ادري .
ويقال انه كا ن من الميسور ان ترى دبابة خصوصي في تلك الاصقاع قبل اعوام قبيل قدوم الشهيد المشير الزبير رحمه الله الى تلك المنطقة للصلح الذي جرى ايامئذ .
بختك يا بت قضيم
حيكون عندك مليشا مسلحة وحرس قضيمي ملكي .
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
زهجني يا قرنفل
لا عارفاه بكاوي فيني واللا هاميه الموضوع فعلاً
وعموما لا ارى أن احدنا اخطأ،،، المعلومات التي اوردها عن سوق ليبيا مفيدة جدا جدا،،،مشكور
لكن ما يقوله عن رأيه في أن ا لرجال يدعكوا لفشخرة النساء
هذه لا اقتنع بها
اظنه يتحدث عن تجربة شخصية عكسي انا اتحدث عن العوام من الناس
الأغلبية يعني
دمت يا قرنفل وتسلم للرد
ويا دكين بختك انت
وقت يحصل ببركات سيد الضب،،، برسل ليك مدفعية صغيرة وواحد كلاشنكوف عربون محبة
بجيكم بالرد
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
لا يا دكين انت سوداني حتى النخاع
وتجربتك مع الأسف الشديد ليست شخصية كما يبدو
هي تجربة جيل كامل يعاني الصراع بين حيطة الجالوص وتلك الأسمنتية المليسة
وأم تشاهد
واخت تعشق التلفزيون ،، وتقارن بين فضائية ودش
وعطور وزينة والوان مبهرة
ووارد الخليج ووارد سعد قشرة
لن استطع بالطبع أن الومك لكني بنفس القدر لن استطع ان الوم لا اختك ولا والدتك ولا شيماءك ولا اخيك ولا حتى سيد الدكان التمتام
هذا ما عنيته
،،، تلك الصورة الواقعية جدا المكررة لم نستيقظ يوما لنجدها هااااا،،، واقعة ككابوس
انه نتاج (اغتراب)بدأ منذ زمن بعيد ليس بسبب الاقتصاد وقتها
بل بسبب ما اسميته انت (الفشخرة) اللئيمة،، وما اسميه انا التسلخ منا
عارف يا دكين
يذكرني شعبي بالمثل المصري (وسوري انت بتكره المصاروة) يذكرني بالمثل القائل
عاملين ذي اللي رقصوا في السلم
لا اللي فوق شافوهم
لا اللي تحت سمعوا بيهم
رقصنا على سلم الاغتراب
لا طلنا سودانيين،،، لا طلنا حاجة تانية،، مسخ الله وكيلك بين لسان وشكل سوداني،،، وتفكير عبيط،،، حتى أنه لا يتعدى احلام البطون أحلام الغلابة
منذ اول صراعتنا (نحن عرب واللا ما عرب) إلى آخر النتيجة،،، تمسح في أي ثقافة غيرنا،،، عسانا نكونها وليتنا فلحنا
عدم ثقة في النفس
تردد
جهل عقيم،،، مقيم
سطحية
لست ادري ما السبب
لن اتفلسف اكثر لمعرفة اصل الداء الذي تتحدث عنه لأني ببساطة وإن شخصته فانا اصغر من أن اجد له دواء
ما تحدثت عنه انا يا دكين الخطر الأكبر في الطريق،، أو هو وقع وانتهى
ليس اغتراب اخي ولا ابي،،، أنا اتحدث عن اغتراب المرأة
الذي بدأته من (شعبة) تتقلع وسقف كامل يشلع لسجادة تتفشخر بها امام العالمين،،، وانتهى اغترابها (بطبق) بدأت فرشه في الدار،،، ثم انتقلت لسوق،،، ثم فكرت في دولة،،،
ففعلت
والطبق هذا يبتدئ من طبق كسرة وصولا لطبق اي شهادة جامعية تكفل لها الجلوس متربعة في مكتب باسم مغتربة (كمثلنا)
انا ابيع كسرة بصورة اكثر تحضرا
حتى أني لا اجيد صنعها
ولا استفد منها لنفسي لا آكلها لا استسيغها
وسأنقلع منها قلعاً واسلخها سلخا لاعرضها في بلادي
الونها واعطرها لتحمل رائحة الخليج نعم،، لكن بنفس الثوب السوداني
بصبح الطبق مسخا مشوها ما بيني وبين الشئ الذي لم استطع أن اكونه
ستفرش الوالدة السجادة ولن تدرك كيف تنظفها ستجهد لتفعل وستبقى شاءت أم ابت جاهلة بها غريبة عنها
ووقت الحنين لقهوة الماضي وعبقه،، سترفع السجادة خوفا عليها من جهة،، وجهلا بها من جهة أخرى،،،وحنينا لاصل من جهة أخرى،،، نزاع نفسي بعيد عنك
يا دكين الرجل السوداني كسول
وقلبه باااااااارد
ولو وضع قدمه في مكان يسع اقدامه الكبيرة،،، استكسل أن يشد رأسه ليكون في مكانه المناسب مع القدم
يذكرني بالرسوم الكارتونية المضحكة والمزعجة في آن
راسه في مكان ،، جسده ممد بأقدامه في مكان آخر،،، المهم أن توجد به نباتات خضراء،،، ليستطيع أن يعيش كطفيل متسلق،،، لا يطول،،، لا يموت،، يعتمد بقائه على الحديقة الغناء التي يمدد فيها ارجله،،،فإن ذهبت ذهب،، وان دامت دام،، وإن سلبت تخلى عنها وشعر بالضياع
الرجل السوداني لا يغترب ،،، انه ينسلخ
جارا معه والدته واخته وزوجته وحبيته وكل من تحمل صيغة المؤنث في عرفه
ظاناً انه بالسجادة سيرضى الوالدة،،، وبكريم الديانا سيغير من جلد اخته،،،
اتظن انها فشخرة نسوان؟؟؟
اتظن أن التراب ما بملى عينها؟؟؟
نعم ما حيملى عينها عارف ليه؟؟؟
لأنه ليس على مقاسها ولا من جيناتها،، ستظل تكيل التراب في عينها بحثا عن نوعها وجلدها ولن تجد،، ولن تقدمه لها انت
أنتم اضعف من أن تفعلون
انتم قوامون علينا في الجهل
انت اب يا دكين واخ وعم وخال ورجل وحتى ود جيران
أجهل من أن ترعى سودانية وتفهم،،، أنها لا تبحث عن ديانا ولا عن شنطة هدوم،،، هي تبحث عن اصل وبقاء وامل وامان
وانت اضعف من ان توفره،، لانك ببساطة،،، جاهل،، راسك في مكان،،، جسدك ممطوط،،، وقدمك يتخفى عساه يعيش ،، في مكان آخر لا علاقة له برأسك
تتضاحكون على المرأة بأن عقلها خفيف
حسنا ولما لا تكون وهناك من يساعد على كحت هذا العقل وتقشير جلدته ليصبح نظيفا اي نعم،، لكنه فارغ واجوف
قد لا الومك لكني لن استطع أن لا الوم ابي
ولا اب ابي،، ولا اب اب ابي،،، جيل كبيييييييير
لو أنه شكم اخته وامي
لو انه عاد يوما من اغتراب دام اكثر من خمسون وستون عاما
لو انه خيرني بين حائط من جالوص وشقة جميلة من ورق
لربما اخترت الجالوص ،،، على أن ،،،،يعلمني،،، يشرح لي أن الجالوص باق،،، وبيت الورق يشلعه أي ريح
الرجل السبب يا دكين
كلنا نتاج،، انت قبل انا،،، انت مظلوم اكتر،،، لن الوم الاقتصاد
لما افعل وعندما غادر ابي من الديار،،، كان الحليب يسقى حتى للبهائم
وكانت الشوارع تغسل بالماء
ترك الماء حتى اننا اصبحنا لا نجده ليس لغسل الشوارع فحسب،،، بل لا نجد حتى بعضه للشراب
ستسب مديرك ولا تنسى أن تسبني معه
وإن ضحك على نكتتك الجبانة،،،اضحك له بمثل ما فعل،،، تشفيا على غباءه فهو لا يدرك أن ضحكه هذا ليس على نكتة،،، بل رثاء على أمة بحالها
اعود برضو يا دكين
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
سلام مربع
لن تصدقوا ان قلت لكم منذ جابوا هذا البوست من اخر الدنيا
ومن بداتم الكتابة فيه
انا متابعاكم
الكلمه بالكلمة
لا ادخل البورد الا لاري
مكااواة ود كين الرائعة
ولهاث بت قضيم الذي يرد الروح
وخفت ان تدخلت ان اخرب كل حاجة
هي هترشتي ما ان دخلت في شيء الا شانتها
وفرتكتها دوشكه دوشكة
كنت اخاف ان فتحت بوزي بشيء
فان الصحبة الحلوة سوف تصبح
سب دين لاخر جد لشيري ذاتو
عليه اثر الصمت والمراقبة
وهذا الكلام لم اكن ارغب في كتابته
هنا لاني ترددت كثيرا قبل
الانجعاص والتتفن والهترشه
كانو البوست حق ابو امي
ود دكين فيك شيء من هذا الارث الذي يميز كل سوداني اصيل
بت قضيم .. لم اقل من قبلها اني اعشق حديثك.
وهانذي افعل
سلمت كليكما
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
والله الظاهر انا وشيري اختي دي متابعين نفس الموضوع وما عايزين نفسد بهجة الحوار بمداخلاتنا، لكن شايف الكلام، الكله صاح من الطرفين، عايز شويييييييييييية تعليق
ايوة كله صاح! الرجال يا بت قضيم جننهن النسوان، فهجوا في البلدان ودفعنا نحن وهن الثمن الغالي، ولسع برضو ما رضيانات
والنسوان يا دكين، والواضح ما فاضح، كانن ارجل من كثير من رجالنا، وما زلن صامدات، ليس فقط بجوار كفتيرة الشاي لكن حتى في ادراكهن للمهم وتمييزه من الاهم، وزمان بدن من رضاهن بي لبن بقرة في قعر شدرة، وحتى كلام ناس بت قضيم الان
خلينا نقول ان هناك نسب كبيرة هي السبب، وليس الكل، يعني التعميم من الجانبين بظلم ناس ابرياء وكمان ابطال
خلينا نقول، 60 في المائة من النساء، خاصة بنات الزمن دا، هن الداقسات وهن العايزات الديانا باي ثمن، رغم اننا انشأنا حزبا شعاره: في اللون الاسمر ذوبت شبابي، والله نحن ما عايزين لون غير لون زينب الطبيعي دا، بينما 40 في المائة، خاصة من جيل الامهات، ما زلن صابرات وشايلات وساترات الحال والدور البقومن بيهو اكبر من الرجال
وخلينا نقول ان 60 في المائة من الرجال، خاصة من جيل الآباء، كانوا من الكسالى العطالة الذين استمرأوا العيش السهل، سواء من الميري او المرأة، بينما 40 في المائة، خاصة من جيل دكين والشباب، هم من البقوا تفتيحة، تحملوا المسئولية مبكرا وشالوا الشيلة، ولم ترحمهم زينب العايزة الديانا، ليس فقط كأولوية على الجالوص العايز البياض، بل هو في حالتنا نحن ناس كردفان و دار زغاوة، مجرد راكوبة من القصب، لكن تقول شنو، تطلع وفشخرة ما معقولة، وزينب هسي بقت عايزة الموبايل، والله يخرب بيت الثريا الخلت العالم في الخلا تعرف الموبايل
آآآآآآآآآآآآآه من الحاصل، ودا بعرفوا دكين براه، لكن العتب ما على بت قضيم ولا على ست الكسرة وست الشاي رضي الله عنهما وارضاهما وجزاهما في الدارين، بل على زينب
ولكما التحية والود
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
الغريبة ان الفكي اكد أن الضب لن يضرني إن لم يفيد
ماذا دهاه ياترى الضب (الشين) ده،، داير يوقعني في شر اعمالي
تخيلتني في يوم( ما طلعت فيه الشمس) وانا اساسق بيك من حلة لي فكي لي شيخ لمستشفى امراض عصبية
عسى الله يصلح حال الراس الطوبة ده
وقد كان خيالاً اسوداً
لولاه ،،، لكان من الممكن النظر في عرضكم الرائع تعويضاً لفقدنا العظيم ونقصنا العنوسي ،،، لولا ذاك الخيال ال (عواليق) إذ لم تركب في راسي البتة (البتة دي كيف معاك) هذه الفكرة المرعبة،، خصوصا وانها مدعومة بارض في الكدرو حيطة جالوص زاتها ما فيها،، وشوية وليدات يتجاروا برأس أجوف وعلى العليه مقودس كمان،،،
(كان القودسة قلنا حقتي الطوبة دي جات من وين؟؟؟)
حقيقي حقيقي،، انت ما براك يا ده،، الن تعترف وتقول لي المعاك منو احسن ليك؟؟؟ ووعدا اوكل ليك محامي؟؟
(نديمك) شنو يا ده
؟؟؟
مجرد فضول لا تقلق فلا علاقة لنا بالكشات ،، الإلزامية كانت أو الإسلامية منها
وبعد
كأني اكيدة أن الثلاث مشاركات الأخيرة التي كتبتها في غير وعيك،،، محوتها بقدرة قادر ،، وبقية من دعاء (انيسا) ،، وخاصة وانت تبدو قريب ليها شديد حتى تشهد في كارثة محيقة بي بت ناس كمثلي كده،،،
يا دكين العزيز
الم اقل لك انك جاهل؟؟؟
ما (تحمبك) انا لا اقصدك شخصياً (شن غردي بيك)
انت رمز لجيلي الجميل (ده لو ما انصدم احدنا في عمر الآخر)
مرة أخرى اعيد من جديد
المشكلة ليست حيطة الجالوص الفي ارض الكدرو ،، (يا ذكي)
حائط الورق يهده الريح ،،، وكذا للغرابة (يا فاهم) الجالوص يموصو المطر
ونحن شعب ممطر،،، عفواً،،، اعني بلادنا ممطرة
من الأسلم ان تبادر بإحدى خيارين لا ثالث لهما
إما أن تسفلت الجالوص وانت مش فاهم بت الناس دي قصدها شنو لكن مشيها شان المطر
أو
أن تبادر بصيانة حيطة الجالوص القايمة ليك في راسك أولاً ثم تفكر في بناء تلك الأخرى في ارض الكدرو حقتك
عساك
يا عزيزي
بعد داك
تفهم
أن حيطة الجالوص ،، كانت مجرد رمز،،، لإحساس الأمان،،، والأمل،،، وأن الكدرو وحائط المبكى بتاعك ،،، لا علاقة لهما بكل طرحنا المثمر السابق
يا غبيان
استاذ الصاوي
ارجع لك بتعليقي لاحقا
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
خلاص خلاص خلاص
ما تزعل
اطالب فقط بعود أو كمان
شتم في اسوأ الأحوال
واقعد ليك تحت حيطة جالوصك في الكدرو
وأشدو وأقول
ابني عشي
يا قماري
قشة قشة
ترار رررررا رتررررترااااا
وسلن انسى بطبيعة الحال،،، غرويدة عيون مع تكسير حواجب
كيف معاك؟؟؟
********************
يا دكين الفاهم،،، الما شبه النعجة
رموزي التي اتحدث عنها ليس نقاشاً في الموضوع نفسه
انقولها ليك بالواضح عسى مستوى فهمك يحصلها
قصدت برموزي هذه ان نتنحى عن الطريق السخيف الذي قلبت إليه الحوار بقدرة قادر ودخلتني واياك في نصه
عارف (يا ذكي) حيطة جالوصك ما تنفع ليه؟؟؟
لانها ما مدعومة باحساس امان
العيب ما من الحيطة،،، العيب في سيد الحيطة زاتها
ما قلت ليك غبيان
وإذ اطالب فيما اطالب مع العود،،،فانا اطلب من عمي ضحوي ود عبد الرحمن،،، الله يديه العافية مشكوراً
بأن يرش مع حيطة الجالوص،، راسك الكلو تراب ده
عسى الله يفتح عليك بشوية فهم،،، شوييييييية بس
لانه في نوع من الفهم الكتير بجيب لبعض الأمخاخ المصدية جلطة
والحقيقة ما لمحت لي ضب في المانيا
لكن عيني لديناصور منقرض في الكدرو
شفت كيف؟؟؟
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
ضحوي
ما برش في
حيطة الجالوص برش في حوش الجالوص
في زول في الدنيا برش حيطة يا حيطة انتي؟؟
شهادة عربية؟؟
بركه الاتحلينا
ما عارف كنا حنصل لي وين
دي طريقة غريبة في الحب
ما قلتا ليك بقدر اغور من قدامك
انا لست اسفا على شي
فقط اعلمي ان كل شي ايل لان يتماص مع الايام
فقط عجلت بالامطار
| |
|
|
|
|
|
|
|
|
 Re: نظرة نقدية (لبعض) سلوكيات الرجل السوداني (Re: بت قضيم)
|
أرجو أن لا تفسدوا علينا إستمتاعنا
بما تجود به مخيلاتكم العجيبه
بت قضيم
بوست إبداع وكلام رهيب
بقول رائى قريب مع إنى ما شايفه المساؤى
تصدقى أنا عموماً ما بشوف الحاجات الكعبه
الاَّ يورونى ليها هسى بس بنظر ليه من خلال كلامك دا
وبجى
دكين
بلاى كمل مشاريعك الجميله مع بت قضيم
ما تعمل لى فيها إتحسسته
بعدين تعال هنا هو لو ما شبه الرجال
أنت رضعته الرجاله من وين
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: وجن)
|
سلام بت قضيم
(هناك بعض من هذه السلوكيات الان ظهرت وتتمثل فى (دكين
فهذا نموذج حى على ذلك
اراد الهروب من سوق ليبيا فتحول الى ضب
قيل انو الضب يوكل فى بعض الدول الخليجيه
ايضا لاقط جيد للحشرات
ومن الممكن ان تستفيدى انتى منه فى خذعبلاتك....؟؟
ايضا اراد ان يتزوج فبنى حيطة جالوص ( حلم كل او معظم المغتربي
لكى الله بت قضيم فهذه نمازج حيه لممارسات فى الواقع اليوم
قرنفل
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
وتزعلي يوم وازعل
وننفعل مرات..
مرات تقبلي مني
واتوسد ضراعي سكات..
وفينا حنينة
تتشابك مودة
تشابك الغابات..
ونحنا اذا اختلفنا سوا
بنطيع الصاح
واذا بتنا القوا بنرتاح
اذا تمن الملح والعيش
رضا الشمات
**********
تورطت في فراشة
بت الذين
كنت قبلك هادئا مرحا قليل مسغبة
غفر الله لك
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
صباح السعادة
وجن الحبيبة
لا تقلقي،،، لن نفسد ما تجود به مخيلاتنا العجيبة،،، ما سمعت المثل بيقول،،، المشتهى الحنيطير،، في البطن بتتخانق؟؟؟
ما بالك بالأخوان؟؟؟
وعن موضوع العيوب،،، فمن الجائز أن كل إناء بما فيه ينضب،،، فروحك الحلوة الجميلة صعب عليها إدراك هذا الكم من العيوب (والشنة) والكلام ده بديني صح؟؟؟
لا بأس
انتظر رأيك لنعود لخط البوست السليم
دمتي يا حبيبة
قرنفل
لا تعليق على كلماتك
شان ما يصيبنا الهوا،،، باقي فيني عقاب زهجة
سلمت يا داعمي
دكين
آآآآآآآآمين
تمبس
انا فيشة اهو
تسلم للأغنية،،، لكني لم استطع سماعها ،، ممكن ترسل لي موقعها في البريد؟؟؟
سلمت يا صديقي
دكين
اتخيلت
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
أحترت بين أن ألوم نفسي أو ألوم الزمان أو هذا البورد - أحتار أنا أح تار انا
ذلك لأني لم أدخل هذا البوست متلكن (مطلقا للمابعرفو العربي
استفدنا من الامثال الظريفة الواردة
خاصة المثل البقول
في ونسة وضحك لامن قسمنا الليل
وكت النعام اتدنكسنبو الخيل
لا جادك ولا بخلت علي بالحيل
وزي ما قالو في المثل
الخيل تقلب ، زي الشرا في القندول
وتحية لبت قضيم والفريق العامل
ممكن أهدي؟
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: Ahlalawad)
|
سلام مربع
بي احساس امرأة عراقيه مكلومة فقدت من حجرها ابنتها التي
لم تكمل بعد رضعتها الثانية بصاروخ توم كروز
خطفها وانا اهدهدها لكي تنام
.. من منكم يعترض هذه الاحساس بدفاعاته الحسيه ،
من منكم يكفكف هذه الغارات التي تتساقط على
حياتي حمما ، يحول نهاري الى ليل تتهاوي فيه الانجم
من منكم يعزيني في غتامة هذه الاحاسيس المزفته
حاولت ان ادخل هنا ،
اقرأ . اضاحككم
تضاحكوني
اهترش
تهترشون معي . .علني اتناسي هذه الصور التي
تتحاوم مثل طائرات الاباتشي
امام ناظري ..
تعتقل سكينتي وهترشتي وتنقلها في طائرات بلاك هوك العملاقة
مال هترشتي تخلت عني .
..مالها تدك تحصناتي مثل بي 52 وتفتح على نهاري
حمم من الجحيم
.. حتى الجزر الذي كان يصادقني ، تخلي عني
كل ماهممت بتقطيعه يتراءي لي توم كروز
انتم ايها الاصدقاء ،
انتم اخوتي
افتوني ، افيدوني ..
كيف اخرج من هذا المود
عشرة ايام وانا انام على ضجيج المعارك
وهدير الطائرات المروحية
وصياح الاطفال المخلوط بالم الفجيعة
حاولت ان اتناسي .. بان استحضر صور كانت تضحكني
لكني وجدت الاوغاد استلوها مني
فمرقت مثل اوجاع نساء العراق
واطفال العراق
ورجال العراق
ماذا تبقى لنا كبشر
كاخوة في الانسانيه
كاخوة في الاسلام
ماذا تبقى لنا في هذا الجسد البالي
من قيم تشير عن امكانية تواجد
بعض ما ينبئ عن وجود خلية
من انسان
مجرد انسان
وليس تواجد كامل لانسجة ممهمورة
بدماء الانسانيه..
فقدنا الانسان بدواخلنا
الذي يميزنا عن حيوانات الغاب
بعد ان بدأنا نتخلى حقنا في تلك الانسجة الانسانيه
مع كل صاروخ يسقط على بغداد
او الموصل
او البصرة
ماذا تبقى لنا في جسد الانسانيه
هل العزاء ، او مجرد ابداء مشاعر الاسي والاسف
تكفي
او حتى البكاء؟
او حتى اغماض اعيننا كلما نقل الينا التلفاز
منظر لطفلة ينخر عظامها صاروخ
او طفل يفرغ صاروخ باستيل دماغه
..
بكاؤكما يشفي وان كان لا يجدى
فجودا فقد اودي
عزاؤكما عندي
اريد ان اخرج عن هذاالمود المميت
اخرجوني من
هذه المشاعر الملكومة التي قلبت حياتي راسا على عقب
حقيقي انا اسفه جدا جدا
لم اكن انوي او اشاء الكتابة او حتى الاشارة الى مايحدث لي من قريب ولا من بعيد ،
كنت داخلة بغرض ازالة هذه الاحزان
ان اهترش معكم
لكني لم اجد هترتشي ،ابتلعتها موجة القصف العنيفة والمكثفة
على بغداد
والله على ما اقول شهيد
وحاولت ان امسحها ، حتى هذه لم استطع ان افعلها
فرجاء صديقتي بت قضيم
وكل الاحباب الموجودين هنا
ان لا ياخذوا خاطرهم مني
اسفه لهذه الالوان النكديه التي دلقتها على بوستكم الحلو العامر بكم
بلغوا الاوغاد عني غضبتي ، ولتبحثوا عن امي
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
لا بأس يا شيري
لا بأس يا صديقتي
توقفي عن المتابعة قليلاً فالله لن يعاقبك على إراحة ضميرك بعض الوقت من رؤية الثكالى واليتامى والدم
لنفسك عليك حق
اولاً وأخيراً يا شيري،،حتى الدعاء يجب لنفسك اولاً ثم يلي حتى امك
لن تلامي على ذلك صدقيني
الصور التي نشاهد يومياً تعرض منذ سنين يا شيري وليست منذ عشرة ايام فقط،،، كان من المفترض أن تملأك احساساً بالإعتيادية،، ليس من السوء الاعتياد على مناظر الموتى،،، طالما اننا لا نملك سوى أن نعتاد على ذلك
قالت لي صديقتي اللبنانية عندما شاهدتمهم يتشدقون بالدعاء لأطفال العراق
ولو اني لا اتفق معها في جميع ما قالت لكنها كانت صادقة بوجع حقيقي قالت: لشو مفكرين هادول،،، الحرب حرب ،،، ووقت ما بتسمع هدير الطيارة،،، وصوت الصاروخ عم يخزق ودنك،،، ما بتتذكر اي صلاة
شو مفكرين هادول؟؟؟ صوت الدعاء اقوى من صوت الرصاص؟؟؟
وبكت بكاءاً مريرا
واحسست معها بضئالة حسي
توضئت وصليت ركعتين يا شيري
لم ادع فيها لأطفال العراق،،، وعمري،،، لاني ببساطة كنت بيني وبين الله نفسي،،،ولم افكر إلا فيها
اسفة إذ قلت ما قلت لكنها نوعا ًما الحقيقة
قبل أن تغفو عيناي تذكرت شيئاً مهماً
هل ترى اكون ارحم على ضحايا الحروب من خالقها؟؟؟
قطعاً لن
وتسامحت معي،،، وتوقفت عن الشعور بالذنب،، لان نفسي ببساطة لا تستحق ذلك فلا ذنب ارتكبه سوى عجزي،،، وهو رحمة في كل الأحوال من الله
ثم أن الموت موجود بكل صوره
ليست فلسفة تبرير يا شيري،،، لكنها حقيقة،،، ترى من منا لا يموت؟؟؟
هذا صراع الأرض فاكسبي نفسك بالتسامح،،،وربك بحسك،،، وإلا اصبتها في صحتها ودوامها،،، وربما عاقبك الله
دمت يا انسانة
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
صديقتي بت قضيم
سلام مربع
شكرا الف مرة لرتل الاسعاف
الذي بعثتيه صوب
جرحاي وقتلاي
شكرا الف مره لهذا الرتق
الذي ضمد اوجاعي
شكرا لمشاعرك الصادقة
التي ان لم المسها فعلا
فانا اكيده من انني تشربتها
وروتني
سلمت الف مليون مره
لحديث الروح
الذي طمأنني
| |
|
|
|
|
|
|
|
|
|
Re: نظرة نقدية (لبعض) سلوكيات الرجل السوداني (Re: بت قضيم)
|
الاخت بت قضيم ، أولاً أحييك وربنا يعافي خيالك الخصب..لكن ايه رأيك أهديك شئ من الواقع يتناسب مع الموضوع... وعلى فكرة قلمك المميز كان واحد من المحفزات التي سارعت بانضمامي اليكم مؤخراً (أنت وبقية العقد المضئ).
QUOTE
الزوج الكســول يخســر زوجتــه
أمضت سنتينا وودز ثلاث سنوات تعتني بزوجها الذي أصيب بحادث أدى الى كســور في رجله وخلال هذه السنوات الثلاث كانت توفر لزوجها كل متطلباته وترعاه كما ترعى الأم أطفالها وفوجئت بعد هذه المدة ان زوجها قد شفى من الحادث بعد الاصابة بفترة وجيزة وأنه كان طوال هذه السنوات الثلاث التالية يمثل عليها فهجرت منزل الزوجية وطلبت الطلاق. وتقول سنثيا أن زوجها ديفيد وودز كسول ولا يحب العمل ويحب ان يقضي وقته امام التلفزيون ولكن ضغوط الحياة فرضت عليه العمل في قطاع الانشاءات لكي يوفر لعائلته ما يقيها الحاجة وفي اليوم الثاني من مباشرته العمل سقط عن السقالة واصيب بكسر في رجله جرت معالجته وعادت الرجل الى حالتها الطبيعية بعد أسابيع ، ولكنه تمكن من اقناع الاطباء انه يعاني من الام شديدة في ظهره تجعله غير قادر على العمل وطوال الثلاث سنوات الماضية كان ديفيد يعيش على رواتب وتعويضات اصابة العمل ، وهي مجزية في مثل حالته ، تدفعها الشركة التى عمل بها لمدة يوم واحد فقط ، بينما كانت زوجته الصابرة تقدم له وجبات الافطار والغداء والعشاء وهو في فراشه أو وهو يجلس على الاريكة امام شاشة التلفزيون ورغم انه كان يستعمل الكرسي ذو العجلات الا أن الزوجة كانت تسنده بكتفها في كل مرة يرغب فيها بدخول الحمام أو الانتقال من مكان الى اخر ... وذات يوم زارته حماته والدة سنثيا للإطمئنان على صحته وفجأة شب حريق في المطبخ وفوجئت الزوجة والحماة بديفيد يقف على قدميه ويصيح حريق ، حريق ثم يندفع راكضاً باتجاه الباب وفي طريقه ، اعترضته الزوجة فأبعدها عن الطريق بقوة ثم اندفع الى الخارج يستنجد بالجيران وتمكن رجال الاطفاء من اخماد الحريق خلال فترة وجيزة ، وقال المسئولون في قسم مكافحة الحريق أو الاضرار التي اصابت المنزل خفيفة ولا تكاد تذكر ، اما التي شبت في قلب الزوجة سنثيا فإنها تزداد أواراً يوماً بعد يوم ، فقد جمعت حاجياتها فور اخماد الحريق وانتقلت الى منزل والدتها وطلبت الطلاق. وهي تقول "لقد سلبني هذا الرجل أجمل ثلاث سنوات من حياتي امضيتها في العناية به كالطفل الرضيع وألبي كل طلباته لأكتشف في النهاية انه مجرد مخادع وأنه لا يعاني من أي مرض "وتضيف" إنني لن أسامحه على الاطلاق فقد هرب من المنزل وتركني مع والدتي فيه ولم يكن يأبه حتى لو أكلتنا النيران". ومع ذلك فإن مشكلة ديفيد تظل بسيطة أمام مشكلته مع الشركة ، فقد رفعت الشركة شكوى ضده تتهمه فيها بالتزوير وتطالبه بإعادة كل المبالغ التي صرفت له خلال السنوات الثلاث الماضية وهو يواجه حالياً دخول السجن…(المصــدر جريدة الخليج.)
UNQUOTE
اللهم لا تمحنا لا تبلينا..
| |
|
|
|
|
|
|
| |
بت قضيم
khider
ايهاب
bayan
zola123
قرشـــو
rummana
اساسي
Ishraga Mustafa
BAKASH
shiry
وجن
tmbis
فيس بوك
تويتر
انستقرام
يوتيوب
بنتيريست