دي اكيد جلسة ما منظور مثلا جلسة ما منظور مثيلا ,,, يا سلااااااام منك انا اه يا استاذ يحيى قباني كل هذا الالق والحبور والحضور البهي والجمال في حضرة هذا الرجل الجميل انت فقط فزت به ياخي انت محظوظ عديل ,,,, شهيتنا الجلوس مع هذا الانيق ومع شخصك المترع بالجمال .... فكم انت جميل يا سودان بمثل هؤلاء الناس الجميلين الرائعين .... غايتو نبكي بس ونمسح دموعنا بالدس لانو كندا دي ماف اي طريقة تجيبنا ليها هههههههههههههههههههه .... خالص تحياتي لك ولمولانا ود المرتضى ...
تحياتي : ياسر العيلفون .....
11-15-2017, 08:54 AM
Nader Abu Kadouk Nader Abu Kadouk
تاريخ التسجيل: 02-19-2007
مجموع المشاركات: 3706
كانت لحظة اللقيا تجلجل في فناء الروح كان الحب يرقص عاريا متجاهلا كل الخرافة والمعاني السافلة كالنيل حين يضج بالايقاع .. ينفذ وحده.. عبر الصحارى القاحلة ...
او أخالك يا يحى وقد هاتفته عند اللقاء بابيات الكتيابي حين عانق بمحطة الرمل صاحبه
يا ليتني استطيع أنظر نور وجهك في لحيظات العناق
11-15-2017, 09:13 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
عزيزنا الفاضل يحي قباني تحية واحتراما اتابع دايما بوستاتك الروعة، وبالامس دخلت هذا البوست واعجبني قولك في مولانا مرتضى بانه جاء وفيه ريحة الوطن الدعاش ومعطون بطين وترامب وهبوب الوطن، وقلت والله الصداقة والمحبة يا كدا يا بلاش، وقلت ايضا ان مثل هؤلاء دعواتهم مقبولة ، ولكن ليته كان مر علينا ونثر علينا شيئا لشفاءالنسمة بسمات التي تغاد اليوم في رحلة استتشفائية مع وافر التقدير والامتنان والاحترام
بختكم دي جلسة في "جنة بلال" إنت قايل خليل دة قال جنة بلال ساكت؟؟ قاعدلو فوق رأي العجب كان حضرتو زفة المولد واشتريتو بت مولد من الطيب سيد مكي --- يقول هيرودتس أن آلهة الأغريق تحج في العام لـ 13 يوم في جبل البركل
بكون وصلكم دعاشو
بختكم
11-15-2017, 01:23 PM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: دي اكيد جلسة ما منظور مثلا جلسة ما منظور مثيلا ,,, يا سلااااااام منك انا اه يا استاذ يحيى قباني كل هذا الالق والحبور والحضور البهي والجمال في حضرة هذا الرجل الجميل انت فقط فزت به ياخي انت محظوظ عديل ,,,, شهيتنا الجلوس مع هذا الانيق ومع شخصك المترع بالجمال .... فكم انت جميل يا سودان بمثل هؤلاء الناس الجميلين الرائعين .... غايتو نبكي بس ونمسح دموعنا بالدس لانو كندا دي ماف اي طريقة تجيبنا ليها هههههههههههههههههههه .... خالص تحياتي لك ولمولانا ود المرتضى ...
تحياتي : ياسر العيلفون .....
تحياتي ود العيلفون يا فنان ...
هذا الرجل الجميل يتنازع عليه البشر هنا ...
والله لو جلس معنا سنة كاملة ما كفتتنا هاهنا ...
سيغادر بحفظ الله و عشرات الناس لم تفز برؤيته و الجلوس معه لضيق الوقت و زحمة برنامجه ...
و كلهم سجلوا لي و له صوت لوم ... فوعدنا زيارة في الصيف القادم ان شاء الله ...
( اها عندك زي 8 شهور تدبر حالك تصلنا هنا هههه )
11-15-2017, 01:41 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: كانت لحظة اللقيا تجلجل في فناء الروح كان الحب يرقص عاريا متجاهلا كل الخرافة والمعاني السافلة كالنيل حين يضج بالايقاع .. ينفذ وحده.. عبر الصحارى القاحلة ...
او أخالك يا يحى وقد هاتفته عند اللقاء بابيات الكتيابي حين عانق بمحطة الرمل صاحبه
يا ليتني استطيع أنظر نور وجهك في لحيظات العناق
قابلته يا محمد بقبلات على جبهته ...
و ودعته بقبلات على رأسه و خديه رغم انف العرف السائد ها هنا ...
اللاوعي و الشعور بالعناق الطويل مع الوطن الذي امامك ... ينسيك المكان و الزمان ...
تقابلنا مرتين خلال الزيارة القصيرة جداً ...
تألمنا و بكينا على الكثير الكثير في اليوم الأول ... و حزنّا على تشتيتنا ...
و ذكرني المرتضى مقولة الدكتور خالد الكد رحمه الله حينما قال عن المغتربين : ( يبنون البيوت لا ليسكنوها ولكن ليشيعوا منها ) و كأننا يا مشرف ننعي حالنا ... ثم نقول للدنيا ... تف يا دنيي تف على هذا الزمن ...
ثم القينا امس و ضحكنا ضحك طفلين معنا ... و عدونا فسبقنا ظلنا ...
و خربانة ام بناياً قش فراقة الحبايب ...
11-15-2017, 04:09 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
قباني الزول الفنان سلامات و حظك ياخ انك قاعد تقابل الزول العديل مولانا ود المرتضي . ود المرتضي الإنسان و المثقف الشامل . ود المرتضي ود المدينة و تلب الضهاري . المسكين و الشفت المقر زول النهود الجميلة ومدريد و لشبونة وميامي . ممكن تختو وزير تربية وبر ضو ممكن كمساري في قطار في المكسيك . ما عندو شي صعب . طال عمرك يا ود حامد .
11-15-2017, 04:29 PM
عمر عثمان عمر عثمان
تاريخ التسجيل: 08-04-2008
مجموع المشاركات: 1583
Quote: عزيزنا الفاضل يحي قباني تحية واحتراما اتابع دايما بوستاتك الروعة، وبالامس دخلت هذا البوست واعجبني قولك في مولانا مرتضى بانه جاء وفيه ريحة الوطن الدعاش ومعطون بطين وترامب وهبوب الوطن، وقلت والله الصداقة والمحبة يا كدا يا بلاش، وقلت ايضا ان مثل هؤلاء دعواتهم مقبولة ، ولكن ليته كان مر علينا ونثر علينا شيئا لشفاءالنسمة بسمات التي تغاد اليوم في رحلة استتشفائية مع وافر التقدير والامتنان والاحترام
تحياتي امتثال ...
ابدا ما معطون ( بترامب ) الوطن هههه
الظاهر بتكتبي من تلفون و التلفون كتب ترامب ...
الف سلامة لبتنا بسمات ... و ما فهمت ليه المانيا ؟ و هي في بلد الطب هنا ؟ ...
سلامات يحي قباني وياهو ده الحاصل وبكتب من الجوال..واظن التلفونات في امريكا بتكتب اي كلمة ترامب..ووالدها اختار ألمانيا وقال العلاج الصحي في المانيا..وهو يبحث عنsecond opinion.. مع تحياتنا العطرة
11-16-2017, 03:19 AM
Kostawi Kostawi
تاريخ التسجيل: 02-04-2002
مجموع المشاركات: 39979
حبيبنا يحي قباني ياخ أنت زول جميل و إنسان عظيم تحتفل بأخي الجميل الذي رضعنا "معه و معهم" من لبن شطور ذلك التاريخ العظيم و هو يعرف ما أعني! بختك يا قباني و بخته Best regards to both of you
11-16-2017, 04:51 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24986
قباني الزول الحلو إتوقعني في السنة الجديدة جايي Quebec بلد Celine Dion عشان اطلق البومي الجديد ود المرتضى ما اداك رمية حقت حقيبة قالوا غناي خلاس تحية ليكم الاتنين
11-16-2017, 05:01 AM
Kostawi Kostawi
تاريخ التسجيل: 02-04-2002
مجموع المشاركات: 39979
و كيف انساها و اتناسى طريت ام در حليل ناسا..العبادي يا قباني كان على بعد ساعات منها .....كيف الحال لو كان بعدهم سنين عددا و آلاف الاميال ؟ ...عشق هذه المدينة سحري لا تستطيع وصفه ولا تبريره فقط تحسه جارفا طاغيا... مرات...فقط تقرأ اسمها فتنزل الدمعات.....قال البنا : يا فريد الحسن و بهجة أمدرمان لي من شوفتك يا حبيبي زمان .و قال: يا حياة روحي و يا بهجة امدرماني ...يا الله ...يا الله بتقدر على حمولة الذكريات للبياض دة يا قباني مدته 2:40 بس : مقطع من حقيبة الفن يوم الجمعة الصباح ....الشاي و الفطور مع الحبوبة في الراكوبة... العميري و بادي وعوض بابكر... ابوروف و مشوار التاكسي بين المحطة الاوسطى و ابو حبيب .... خليل افندي فرح ... بالي جسمي و من زمان قاضي هاهو حبك بين انقاضي هدي روعك اوع لا تقاضي ما بشارعك انا ما بكوس قاضي ................ وافر التحايا للمرتضى ، الرجل الراقي.
11-18-2017, 10:16 AM
نعمات عماد نعمات عماد
تاريخ التسجيل: 03-08-2014
مجموع المشاركات: 11404
القباني السوداني المركزي والكندي الطرفي - يا الشامي - يلتقي مع كافة الأقوام في كافة الصفحات فهو ، مع براغماتية تتطلبها الحياة الغربيه النيرانا ما بترحم، يسافر لمدن أخرى إذا (اشتهي) ونسه تترع المآقي وgame ويست أو صحن فول مجاز من الجان وموسى نفخو يعني من ذلك النوع الذي تحسدك على تركيبته أرقى القوائم العالميه . إيزو شنو وكلام فاضي شنو.. تفتح أبواب المريخ و الهلال فتعرف أن هناك تاريخا مفصلا لا ينتهي عن تيم عباس حتى تظنه عباس بن يحيى ، أما الفنون بأبوابها الشاملة الثلاث فهو حامل مفاتحها وأختامها مع سودنه ظاهره وترجمه أمدرمانيه على الشريط (خوري و عبيد بالشنقيطي) . يزعل المابعرفو ويمهد ليك تتخلص منو ويجيبك كالعالق بصنارة موده عارية الحنان.. هنا لابد من ملاحظة هامه لاتفوت على قارئ وهي آن (الصعلكة) و (الشفتنة) ضرب من الفن الحركي مثله مثل الصوتي والتشكيلي وكثيرا ما ننسبها لبعض الأمدرمانيين وهم - في أحايين كثيره - يقومون بدور الناطق الرسمي للسوداني المجهز بسوفتوير سودانوي وعارف بسوي في شنو حتى لو كان ساكنا و ساكتا.. أها، زي يحيى دا لامن تقعد معاهو ممكن تطلب إجازه من مقر عملك أو تغيرِّ مواعيد رحلتك موقنا أن الله ونفسك سيثيباك على القرار إضافة إلي ضمان رضا الله والوالدين عنك لممارسة هذا الضرب من مساج الروح الخمج ، و زي ما قال سند: سلوا قلبي ،
أما سبَّحتُ ، ثم حمدتُ ثم ضحكتُ ، ثم بكيتُ
ثم دعوتْ
باركْ ربّيَ المسعى فقد أعطيتْ
باركْ فيه حين يفيضُ
حين يغيضُ
واجعلْ خيرَه للناسِ
واجعلْ وجهَه كالبدر حين يتمُّ
واجمعْ حوله الأحبابَ والأصحابَ
والأتباعْ ..
11-18-2017, 04:11 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: بختكم دي جلسة في "جنة بلال" إنت قايل خليل دة قال جنة بلال ساكت؟؟ قاعدلو فوق رأي العجب كان حضرتو زفة المولد واشتريتو بت مولد من الطيب سيد مكي --- يقول هيرودتس أن آلهة الأغريق تحج في العام لـ 13 يوم في جبل البركل
بكون وصلكم دعاشو
بختكم
عبد الله عثمان يا زول يا بديع ...
عليك الله عاين جنس كلام مرتضى ده ...
الزول ده تقدر ما تريدو ؟
11-18-2017, 09:05 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: قباني الزول الفنان سلامات و حظك ياخ انك قاعد تقابل الزول العديل مولانا ود المرتضي . ود المرتضي الإنسان و المثقف الشامل . ود المرتضي ود المدينة و تلب الضهاري . المسكين و الشفت المقر زول النهود الجميلة ومدريد و لشبونة وميامي . ممكن تختو وزير تربية وبر ضو ممكن كمساري في قطار في المكسيك . ما عندو شي صعب . طال عمرك يا ود حامد
محمد المرتضى ياهو السودان يا عثمان ...
لكن لي انا امدرماني صررررر ...
لا فيو شق لا طق ... هههههه
11-19-2017, 12:07 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
والطعميه خشوم بيوت والمعروض منها في بلاد الله يتعدد من حيث الحجم والطعم والمقادير , وفي قناعتي أن أي شخص يدعي صناعة الطعميه غير الحاجه حوا جوار عبدالله خليل مفروض يوجهو ليهو اتهام بالإحتيال. حاجه حوا عندها عرض لقيمات الساعه ٧ ص ونحن ماشين الأهليه الجمب بيت ازهري، ,ودي تخصصات ناس نصر الدين عبدالحفيظ وداعة الله هجام (الملغم) هنا ب (كوستاوي), وأما عرض الساعه ٧ مساء فقد كان للطعميه..كان لامن الصاج يولع وترمي الطعميه يصل (إشعاعها) النووي المسيل للعاب في دائره أو radius يمتد حتى مكي ودعروسه وربما يلامس منطقة نفوذ باسطة الدانوب بشارع أبروف حيث سانتي الهندي يبيع كاكي الاستاكبورد لناس أحمد عبدالفتاح محجوب النصري الملغم هنا بطراوه. المهم، هذه الطعميه بالشمار اللخدر والسمسم إذا اشتريت منها قرطاسه بشلن وكنت قريب من دكان يماني عندو جبنة الدويم المقدده ورغيف حار ، الله أعلم بعد أول قرمه تعرف انك جيت من وين أو ماشي وين حتى لو كنت مصمم قوقل ايرث.
من الحاجات البتزعل أن معظم الأمهات لم يدربن بنات الزمن دا ، بنات الفيسبوك، بتاعات نو نو آي كانت بيليف، على صنع تلك الطعميه المثيره للشغب الجميل حين تتخالف مع جبنة الدويم والشطه الحميده.. وذات الأمر ينطبق على اللقيمات المقرمش الحواف الذي انتصر عشره صفر في كل الموائد على عجين المقلدين الدجالين الذين فشلوا في وزن الخميره والمقادير ومنتجات حاجه حوا ماركة حُسنك أمَر..
قال Dunkin Donuts قال
11-19-2017, 05:19 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
ومطاعم الإثيوبيين في تورنتو لها مكان خاص في القلب والمعده ، حبيب خلايق الله د. عمر هاشم ، أجزل العطاء وما استبقي شيئا ، مع قهوتها كمان.. دي الأنجيرا والتبسي القال عليها ودالرضي في معالق الجوف موسا مجلوخه.. كان لابد أن ألتقط لها تلك اللحظه التاريخيه في المنعطف الخطير من تاريخ الوطن ، ولولا حياء من الخواجات اللهلبم الدليخ كان أخدت معاها سيلفي..
11-20-2017, 02:25 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
يا سلاااام لقاء السحاب والعمالقة اولاد ام در اولاد قلباااا ولما تكون الونسه عن ام در الكلام بكون ذو شجون .... يا حظك يا قباني بلقاء مولانا المرتضى حامد ...
11-20-2017, 06:28 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
( رضعنا "معه و معهم" من لبن شطور ذلك التاريخ العظيم و هو يعرف ما أعني! بختك يا قباني و بخته Best regards to both of you)
يا نصرالدين أسأل الله أن يديم عليك محبة العباد والعافيه ، إنت والبتريدم.. التاريخ العظيم الذي أشرت إليه هي الأيام التي شكلت صوامع ذواكرنا وهي زادنا لما تبقى من لحظات فوق الأرض. كثيرون لهم ذات الشعور، قصة الحب الأولى ونظره بجانب العين وهي تقف بانتظار (بص الشركه).. الإذاعه المدرسيه تبث (لو وشوش صوت الريح في الباب يسبقنا الشوق قبل العينين) و (المنازل) التي كان لها في القلوب منازل .. وحاجات دقاقه حكيناها في بيتك العامر بواشنطن مع (قطيعه) خاصه بمطعم (معزه) .. كنا لا شايلين هم لا عارفين بكرا الجايينا.. الله يجازي الطائرات العابره للأطلنطي. ياخ يلعن المطارات ذاتا.. .
11-20-2017, 09:56 PM
محمد أبوجودة محمد أبوجودة
تاريخ التسجيل: 08-10-2004
مجموع المشاركات: 5265
(ود المرتضى ما اداك رمية حقت حقيبة قالوا غناي خلاس)
ولدنا القيافه الماسك الزمن في كولمبو وعموم مناطق السنهال .. عساك سعيد يا بركه عارف يا حيدر، زمان في أمدرمان في واحد تمتام مع إغماض متقطع للعيون.. أها الزول دا بمجرد ما يمسك العود ويغني تتلاشى التمتمه والعيون بس كشافات ويمبلي والكامب نو.... يغني بانسيابيه يغمطه عليها نورنا الجيلاني .. القصه دي جابا يا ودحسن أني لا أغني إلا في حضرة الحاذقين العارفين ضمن الكتائب المضاده للشتاره..والشتاره هنا مش زمن وبس بل إختيار أيضا.. حانتلاقى يوم ونغني كورال عليك يا حب تحياتي عشان تعرف المقصود من إنت ميل وانا ليك ميل عشان نميل سوا يا جميل .. حاتنسى السنهال والتاميل.. إنت قايل شنو..
11-23-2017, 07:23 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
نُقِل عن أيقونة أمدرمان عزيزنا الهادي نصر الدين الملقب ب (الضلالي) قوله أنه ( بطَّل سيرة السياسه) لأنها تسببت في احتجازه ليلة واحده بكوبر وقيل نفس الشيئ عن كمال سينا ، يعني قضيا ليلة خارج المياه الإقليميه لأمدر حسب ترسيم ابوصلاح وخرائط سيد عبدالعزيز ، يا سلام على المسالمه ياخ، أها ، الضلالي منذ ميلاده، وفقا لمعلوماتي، لم يبت خارج أمدرمان لأن سلوكا كهذا يعتبر من الكبائر في شرعه. ناس أمدر، يا محمد ، هم ضمير السودان لأنها مدينة عبقرية نوويه جمعت كافة القبائل من حلفا لنمولي ومن الطينه للكرمك وكافة السمحين من أقباط وشناقيط ومغاربه وأكراد و القائمة تطول ، فكل هؤلاء أصبحوا أهل ، صدقني أكتر من أهل، علموا وتعلموا ووسعوا مواعين المعرفه والتسامح والثقافه والريده الكشحت للناس عشقمية غنيه فاقت الأهرامات في ثباتها وانداحت واتشتت حتى الإسكيمو شمال قباني ومشت القطب الجنوبي فأطربت حتى البطاريق ومازالت تترى ارتدادتها كأجمل ما يكون تسونامي الطرب المكبرت. يكفي يا محمد أن كل كرة القدم والإذاعه والمسرح والشعراء الخمجانين والمطربين الحايجونا في الجنه إنفجروا في أمدرمان... صديقنا عبدالغفار سعيد له مقوله مشهوره: نحن أولاد أمدرمان بنركب الترام عكس وننزل عكس.. هسه يا محمد لو باقي العمر قضيناهو في كلام أبوصلاح براهو باقي ليك العمر بيكفي؟
إذا أدار لــحـظو عـلي جـبل دكّـالـو ولو بسم انزل دمـع السحاب أبكالو وقلبو لا يشـفق علي عاشقو مهما شكالو حبيبي طبع الطير ينزل علي أشكالو.. شوف الأرسنال دا بالله..
وبرضو يقولوا ليك الأوديسا والإلياذه..
11-23-2017, 08:15 AM
willeim andrea willeim andrea
تاريخ التسجيل: 05-01-2002
مجموع المشاركات: 3813
Quote: حوا جوار عبدالله خليل مفروض يوجهو ليهو اتهام بالإحتيال. حاجه حوا عندها عرض لقيمات الساعه ٧ ص ونحن ماشين الأهليه الجمب بيت ازهري، ,ودي تخصصات ناس نصر الدين عبدالحفيظ وداعة الله هجام (الملغم) هنا ب (كوستاوي),وأما عرض الساعه ٧ مساء فقد كان للطعميه..كان لامن الصاج يولع وترمي الطعميه يصل (إشعاعها) النووي المسيل للعاب في دائره أو radius يمتد حتى مكي ودعروسه وربمايلامس منطقة نفوذ باسطة الدانوب بشارع أبروف حيث سانتي الهندي يبيع كاكيالاستاكبورد لناس أحمد عبدالفتاح محجوب النصري الملغم هنا بطراوه.المهم، هذه الطعميه بالشمار اللخدر والسمسم إذا اشتريت منها قرطاسه بشلن وكنت قريب من دكان يماني عندو جبنة الدويم المقدده ورغيف حار ، الله أعلم بعدأول قرمه تعرف انك جيت من وين أو ماشي وين حتى لو كنت مصمم قوقل ايرث.
انا ابكي بسيا سلام عليكم يا احباب والله ذكريات جميلة جداوما زالت بلادنا حلوه بحلاوة انسان امدر المترع عسلالواحد بيعزي النفس انو غربته قريبة من امدر ولما يكتلني الشوق اهو انط البحر الأحمر جمعة وسبت وارجع كلي حنين لكل حواري امدر القديمة
أبوجوده يا محمد.. لك شكر من بحر الوافر كما يقول صديقنا المهذب بشري الفاضل (بدون ألقاب) ، فهو لايحب الألقاب وفي ظني أنها تتشرف به.. يا العزيز ، الكتابه ، وأنت من ناسا الماسكين رسنا، نغشاها عندما تطفح الدواخل أيا كان نوع (الطفح) ، وسنظل كذلك طالما بقي الوجيب. بس كمان تُمتعني أكثر قراءة الكتابة الإنقلابيه الصادقه التشق (القلوب قبل الجلود) فأكتفي بابتسامه على انفراد آعبر بها عن إعجابي وفقر قافيتي وقاموسي وهذياني.. تسلم
المشرَّف المشرِّف .. عوافي يا أمير.. أشكرك علي كلامك الطيب.. يا محمد ، ربما لأني أكتب عن زمن مضى بسبب عيشي في الماضي لذا يكون بعض ما أكتب يشبه ذلك الزمان وكل من جايلوني لهم ذات الحرف وأنت أدرى.. لكن عليك الله الزمن دا مش مرات بنحتاج نكون في ال insane mode عشان نستمتع بالبنسوي فيهو؟
11-22-2017, 04:36 PM
Osman Awoda Osman Awoda
تاريخ التسجيل: 06-19-2017
مجموع المشاركات: 495
محمد المرتضى حامد مولانا وسيدنا وسيد سيدنا محمد المرتضى رضي الله عنه وأرضاه قبل عدة سنوات زارني محمد في منزلي في احدی زیاراته للسودان عزمت علی تکرار اللقاء ولما کنت حریصا علی هذا الأمر سافرت الی البلد لاقضي بعض الامور العاجلة على ان اعود واتفرغ لمولانا وسيدنا عند عودتي حاولت الاتصال بمولانا،،،لاكتشف انه غادر ولا زالت عيناي مليئة بالدموع والحسرة محمد المرتضى حامد احبه حبا جما رجل كالنسمة،،،لذا احبه بلا حدود شكرا قبة
11-23-2017, 07:37 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Haytham Ghaly مستصحبا كلام جماَع أقول ليك لم يبق لنا غير ابتسامات بعد ضياع الأمس بكل ما فيه .. يا هيثم يا غالي ، الماضي أصبح المضاد الأوحد لبكتريا الغربه البذيئة ، وأنت أدرى أنها ليست غربة الجغرافيا وحسب، الغربه أصبحت رأسية وأفقيه .. دعواتك يا بركه أن يبقى لنا المولى تلك الصومعة نقتات منها في ما تبقى من شتاء العمر.. شكرا يا عزيز على كلامك الطيب.
11-28-2017, 07:48 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
شيخنا حبيب الناس عثمان .. الله وحده شهيد على ما تخفي الصدور لكن أذكر جيدا كافة تفاصيل لقاءاتنا في بيتكم العامر في أبوظبي وسط الأسره الجميله وفي احتفالنا بزواج حبيب الجميع دكين بالشارقه وفي بيتكم الأجمل بالخرطوم ، وفي كل اللقاءات كنت أنت مضيفي بحفاوة لاترقى إليها قامتي لكنه كرم أصلك وكما قيل: (إنَّ الهدايا على مقدار مهديها).. كنت ، وما زلت من المعجبين بتجربتك الإستثنائية في ترك الوظيفة والإغتراب والتفرغ لمزرعة في سودان الخير وكم أراحني حديثك وأنت تحكي في (إيفوريا) لاتخفى عن سعادتك بالعراقي والسروال والطين والجروف فقد لامست فيَ أمنية قديمة أسأل الله أن تتحقق قبل أن يسترد المولى أمانته.. الأرواح جنود مجنده يا مولاي فليس لك في القلب إلا الحب المحض.. ربنا يحفظك يا ود الشيخ..
11-29-2017, 06:05 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
(ولما يكتلني الشوق اهو انط البحر الأحمر جمعة وسبت وارجع كلي حنين لكل حواري امدر القديمة) حبابك بعد الغياب يا وليم.. المشكله يا حبيب لاتكمن في البعد الجغرافي بل النفسي.. أمدرمان التي تعرف لو سرت فيها اليوم لسرت بترجمان.. سألت صديقي إبن النهود عن حالها عقب زيارته الأخيرة لها لأني غبت عنها سنوات طوال وليتني ما سألت.. أهو هسه مجرد مرور إسم (وليم اندريه) يستصحب بانوراما تشمل انتصارات في الرياضه وعلو في الفنون وجيرة مائزه رحيمه ونظافة في النفس وجمالا في الخاطر ( وديار كانت قديما ديارا..) هسه لو قلت أندريه يقولوا ليك نانسي.. كيفك ياخ..
11-29-2017, 02:01 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
""امدرمان الذي تعرف لو سرت فيها اليوم لسرت بترجمان"" تعبير اوسكار ..اوسكار لحال السودان اليوم ،،،وخاصة لهؤلاء الذين يغيبون اعواما طوالا ويعودون ليجدوا حالا غير الذي عهدوهو ،، بل نرى انك اذا غبت عن السودان سنتين فقط لاحتجت لترجمان يفسر لك الظواهر الجديدة،،،، جلستكم رائعة واكثر ،،،،فعلا الدنيا تسوى شنو غير جلسات زي جلساتكم دي مع الاحباب،،، مع وافر تقديري
11-30-2017, 01:56 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
(السن بضاحكك نديدا الونسه خشم بيوت وكذلك الطعميه وغيرها الشكل واحد ولكن الطعم والمكان وكذلك الونسه ماكلها ونسه ..لكم التحيه) صدق المثل يا المحرب.. عندما تجمعك بإنسان عناصر الزمان والشوق المصفى والمكان تتحلل من كافة قيود الحاضر وتتدفق من جوه الجوه ، وهذه الحالة ليست قصرا على الأمدرمانيين وحدهم بالطبع ، هي حالة كافة البشر على وجه البسيطه وأظنها تشمل الكائنات الفضائيه فإذا تصادف والتقوا في المنطقة ٥١ أو روزويل سيتحدثوا عن حب الثانوي العام وعن (طعميتهم) ..
عليك يا خالد تحياتي
11-30-2017, 04:01 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
نا أم درمان سقاني النيل رحيق العزة من كاسو أنا اللي مجدوا كنت دليل و آية وحدة لي ناسو أنا الفي الشاطيء الغربي سقوط غردون مهر حربي وأنا النيل طلب قربي ومزج بين كافة الألوان
كبر يا حبيب ...
ليك و لود المرتضى و كل الحلوين ...
أصوات من الزمن الجميل ...
12-15-2017, 06:24 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
تعرف يا مولانا مرتضى و مولانا كبّر و كل الناس الحلوة ...
لي يوم الليلة ...
ما فهمت ود الرضي خلى شرق النيل ...
و خلى الخرطوم ... و بحري ...
و جا يكوس لي ذات النحر ...
ام رقبة قزازة عصير في ام در لي شنو ؟ _____________ مرة يا نُسيم السحر ... هب ليّا من شاطي البحر ... طوف الخبا مرة ...جيب ليا من ... من ( ام در ) ... عبير ذاك النحر ...
( ممكن كمان ذات النحر ... ) :) النحر في فهمي المتواضع هو اعلى الصدر ...
طوف و شوف يا مولانا ...
الزولة الفنانة شديد انصاف فتحي ...
ابدعت في تقديمها ... بعد مسئولية اداءها المتفرد من خلف الله حمد ...
لمن يهمه الأمر : ود الرضي جارى بها سيد عبد العزيز و نظر السمحة ام عجن ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
يحي قباني
الشامي الحبر عبدالوهاب
Deng
عزالدين عباس الفحل
MOHAMMED ELSHEIKH
ياسر السر
Nader Abu Kadouk
محمد حيدر المشرف
عبدالحفيظ ابوسن
عبدالله عثمان
محمد أبوالعزائم أبوالريش
Osman Musa
عمر عثمان
علي دفع الله
.JPG.bee95cb2b8ac948cf72e305b3c48a2de.JPG)
معاوية الزبير
Kostawi
حيدر حسن ميرغني
الطيب شيقوق
محمد المرتضى حامد
Muna Khugali
Khalid Basheer
نعمات عماد
محمد أبوجودة
willeim andrea
Osman Awoda
خالد المحرب
Kabar
فيس بوك
تويتر
انستقرام
يوتيوب
بنتيريست