|
|
 زيارتي إلى إيطاليا و أشياء أخرى
|
09:21 AM April, 25 2016 سودانيز اون لاين
محمد عبد الله الحسين-الدوحة
مكتبتى
رابط مختصر
زيارتي الحلم لإيطاليا: الفاتيكان، الكولسيوم، تياب الراتي صور،فيديوهات:
أولاً: الشكر الواجب للأخت و الصديقة المشرقة و زهرة المنبر منى بت عمسيب. و هي التي فجّرت فكرة الكتابة عن هذه الرحلة.......... ..................................رغم استبعادي لتلك الفكرة منذ البداية. حتى لا أزحم الناس بموضوع خاص.و لكنها استطاعت من خلال إصرارها و إهتمامها إقناعي و كذلك ... بما تملكه من كاريزما..... و مدخل حلو............... و لباقة آسرة لا يسعك إلا أن تستجيب لها..... .............................إن شاء الله يوم شكرها ما يجي.
و في الاخير قررت أن أتوكل على الله و أكتب................................ و لكن على أن يكون ذلك في ثوب و أسلوب و محتوى يفيد الجميع..
من خلال لتركيز على ما هو عام و بما يفيد الجميع.
و سيكون ذلك بلغة شبه عامية .. سلسة بدل من الفصحى المتقعرة التي قد تبعد الناس و القراء و تفسد الطبخة...دي حقيقة و الله .
لكني سأكتب إن شاء الله عن الزيارة في الراكوبة باللغة العربية الفصحى.
(عدل بواسطة محمد عبد الله الحسين on 04-26-2016, 09:27 AM)
(عدل بواسطة محمد عبد الله الحسين on 04-26-2016, 09:30 AM)
(عدل بواسطة محمد عبد الله الحسين on 05-10-2016, 11:06 AM)
(عدل بواسطة محمد عبد الله الحسين on 05-10-2016, 12:03 PM)
(عدل بواسطة محمد عبد الله الحسين on 05-10-2016, 12:09 PM)
(عدل بواسطة محمد عبد الله الحسين on 05-11-2016, 11:17 AM)
(عدل بواسطة محمد عبد الله الحسين on 05-12-2016, 05:52 AM)
(عدل بواسطة محمد عبد الله الحسين on 05-15-2016, 07:20 AM)
(عدل بواسطة محمد عبد الله الحسين on 02-26-2017, 05:11 AM)
|
|
 
|
|
|
|
|
|
|
|
Re: زيارتي الحلم لإيطاليا:روما، يوليوس قيصر ا (Re: محمد عبد الله الحسين)
|
تنبيه مهم:
البوست حيكون فيه تفاصيل كتيرة..
................بس للمعلومية حيكون غير متواصل كما يرغب البعض أو يحب........................................ لأنه المتابعة المتواصلة متعبة و عايزة تفرغ............لذا وجب التنويه.
كمان نداء للأخ ملهم كردفان .....................عايز أنزل مجموعة من الصور و الفيديوهات ..............و محتاج دعم فني عاجل و كبير.
لأنه بعيد عنك استيعابي و لله الحمد في الفنيات ضعيف.
| |
|
|
|
|
|
|
|
|
|
Re: زيارتي الحلم لإيطاليا:روما، يوليوس قيصر ا (Re: محمد عبد الله الحسين)
|
و اثناء ما كنت بجهز نفسي للمقابلة في السفارة الإيطالية للحصول على التاشيرة كنت في نفس الوقت بجهز أوراق المؤتمر....... شيء مكاتبات ........و شيء رسائل بالبريد الإليكتروني و طبعا الخواجات يعجبوك في الحتى دي ...ترسل الرسالة بي هنا يردوا عليك في مدة أقصاها ساعة في الليل و لا الظهر.... طناش ما في ...عافي منهم الجدية كاتلاهم تب.
طبعا كلامي ده الناس العايشين في اوروبا بيشوفوا عادي لكن بالنسبة للقرويين و المحليين الزينّا ديل بنستغرب فيه.
في اليوم الموعود مشيت مبكرا للسفارة قبل الموعد بنصف ساعة .
دخلت قاعة الانتظار لقيت حوالي عشرة أشخاص فرادى و أزواج..... كلهم عرب أو شبه اوربيين(ارمن و ما شابه).
المقابلة مع مقدمي طلبات التأشيرة تقوم بها تتم بصوت مسموع .
و من يستلم الطلبات موظفة طاعنة في السن و عصبية تبدي زهجها و ضيقها لأقل عدم فهم لحديثها، و القاعة ضيقة في حجم غرفة واسعة بحيث انت جالس ان تسمع كل ما يدور بين مقدم الطلب و موظفة التاشيرات و تسمع تفاصيل الاستجواب الذي يتم عند استلام طلب التأشيرة.
بعد نصف ساعة جاء الدور علي. ذهبت للنافذة الزجاجية و قدمت أوراقي . نظرت فيها ببطء و آلية ثم نظرت غلي و قالت: سوداني صاح( من ملامحي)؟ مما يدل على معرفة و خبرة ما.
نواصل
| |
|
|
|
|
|
|
|
|
|
Re: زيارتي الحلم لإيطاليا:روما، يوليوس قيصر ا (Re: Ahmed Yassin)
|
الأخ أحمد ياسين
(متابعين يا حبيب)
شكرا على المتابعة
( بس اذا كل صورك بالحجم النزلتو المنبر دا ما حيكفيك
تسلم يا محمد
كدة كيف ... امسح صورتك الكبيرة دي)
و كمان شكرا على المتابعة.
أنا ما عارف المشكلة وين؟ كيف بصغر الصورة؟ لأنه عملت نفس الخطوات العملتها في تنزيل صورتي الشخصية و ذلك في موقع مركز الخليج . لكن تنزيل الصورة الكبيرة دي أخد وقت مني وقت طويل جدا لامن زهجت و بعد شوية نزلت مضلمة و بعدين نزلت وارمة.
كيف أتحكم في الحجم و كيق أنزل الفيديوهات؟
بالمناسبة الصورة دي في كافتريا و انت طالع من مطار روما. و كنت طالع تعبااان من سفر الرحلة من الخرطوم و المواصلة للسفر إلى روما و كنت عايز ارتاح شوية و أشرب لي حاجة. ختيت شنطي الاثنين التُقااال جنبي و قعدت أتفرج يمين شمال.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
الأخ ود الحسين,
حقيقة أول مرة أقرء لك بوست في هذا المنبر وبما أنك لم تبدء في سرد القصة وجدت نفسي مجبرا على قراءة الكلام سطر سطر, كلمة كلمة, وحرف حرف. حقيقة وجدت بأن طريقة كتابتك سهلة وممتعة, وموعودون ببوست شيق جدا. وبالمناسبة شوقتني أزور أيطاليا, بمني أني زرت أكتر من دولة أوربية وحتى أسبانيا لكن لم أوفق في زيارة إيطاليا, بس هسي خليتني بالجد أفكر في زيارتها,,,,
واصل يا حبيبنا ووفقك الله
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: aosman)
|
أخ ود الحسين,
حقيقة أول مرة أقرء لك بوست في هذا المنبر وبما أنك لم تبدء في سرد القصة وجدت نفسي مجبرا على قراءة الكلام سطر سطر, كلمة كلمة, وحرف حرف. حقيقة وجدت بأن طريقة كتابتك سهلة وممتعة, وموعودون ببوست شيق جدا. وبالمناسبة شوقتني أزور أيطاليا, بمني أني زرت أكتر من دولة أوربية وحتى أسبانيا لكن لم أوفق في زيارة إيطاليا, بس هسي خليتني بالجد أفكر في زيارتها,,,,
واصل يا حبيبنا ووفقك الله
شكرا يا أخ AOSMAN على الإشادة.
و إن شاء الله يكون القادم حسب توقعاتكم.
(وبالمناسبة شوقتني أزور أيطاليا, بمني أني زرت أكتر من دولة أوربية وحتى أسبانيا لكن لم أوفق في زيارة إيطاليا, بس هسي خليتني بالجد أفكر في زيارتها,,,,)
فعلا إيطاليا أدهشتني بكثير من الأشياء التي لم أكن أتوقعها.
أخيراً سؤال لو سمحت: هل الاسم؟ هو محي الدين عثمان؟
مع خالص مودتي
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد جبره)
|
الأخ محمد جبرة سلام يا ظريف
(يا ود الحسين كان دا نزيلك للصور اقوليك عفيناك منها لوجه الله انت بس احكي و نحن بنتمو خيال ....
منتظرين )
يا خي بدل تشجعوني تحبطوني؟ هههههههههه
ما مشكلة بنحاول ليك تاني اكان ظبطت خلاص و اكان ما ظبت تمّها خيال و أحلام.
المهم إنك متابع و منتظر.
شكرا كتير و الله
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
اها نجي المقابلة....هي مقابلة زي الإمتحان. آيّ و الله. لانه التجهيز و المستندات عايزة جري كتير و استخراج شهادات و اختام و من موظف لي موظف.
قبل المقابلة لاحظت كل المقدمين مقلقين..... و يتكلموا بي همس. و لما يمشوا للشباك للمقابلة بيكونو مؤدبين و حريصين على ان يبدوا مهذبين :
اول سؤال بعد استلام الجواز و النظر فيه ملياً:
- ليه ماشي إيطاليا ؟
لحضور مؤتمر؟
- وين الدعوة؟
- وين شهادة إثبات العمل؟ (من جهة العمل)
- وين شهادة الراتب؟
- وين كشف حساب البنك؟
- وين تأمين السفر؟
- وين الحجز الفندقي؟
- لا لا هذا الحجز غير مقبول..(لأني حصلت عليه من وكالة سفر فهم يقومون بهذا الغجراء لكل المسافرين).
- ليه ما مقبول ؟
- لازم يكون الحجز مؤكد من الفندق نفسه.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
تحياتي يا ود الحسين ومتابعين الجولات الشيقة الممتعة في إيطاليا..
طبعا أنحنا حبنا لايطاليا بدأ من سنة أولى وسطى لما جانا استاذ الجغرافيا وكنا بندرس في الوقت داك في كتاب إسمه إفريقيا وحوض البحر الأبيض المتوسط.. ودرسنا إقليم تسكني.. وما بنسى أول مثل بالإنجليزي سمعناه برضو من أستاذ الجغرافيا
See Naples and die
إن شاء الله تكون مشيت شفت لينا نابلي دي..
بعدين يا ود الحسين في حاجة جميلة جدا بتتميز بيها إيطاليا...
اللغة الحلوة و كلماتها الكلها حروف متحركة.. ما عندهم كلمة ساكنة.. ما لاحظت حلاوة كلامهم
تحياتي
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: الأمين عبد الرحمن عيسى)
|
استاذ الأمين
مرحب
شكرا على دعمك لينا بالذكريات
( طبعا أنحنا حبنا لايطاليا بدأ من سنة أولى وسطى لما جانا استاذ الجغرافيا وكنا بندرس في الوقت داك في كتاب إسمه إفريقيا وحوض البحر الأبيض المتوسط.. ودرسنا إقليم تسكني.. وما بنسى أول مثل بالإنجليزي سمعناه برضو من أستاذ الجغرافيا See Naples and die) )
للأسف يا الأمين ما مشيت نابلولي أو نابلس لأنه الوقت قصير و المدن كتيرة و كلها تستحق و اي مدينة عايزة أقل حاجة تلاتة يوم.
اما بخصوص اللغة هي فعلا حلوة و فيها موسيقى... و ملاحظتك في محلها.... كل كلمة أو اسم بيدلعوه.
يعني مثلا ميلان بينطقوها ميلانو) الفاتيكان بينطقوها الفاتيكانو) و كلمة Rome روم حسب النطق الإنجليزي لكن هم بينطقوها( روما) عديل كده زي بالعربي. برضه كلمة محطة السكة حديد terminal بينطقوها تيرميني.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: Ahmed Yassin)
|
طيب يا أحمد يا ياسين .صبر يبل الآبري مافي؟
أوكي نواصل:
- وين الحجز الفندقي؟
- لا لا هذا الحجز غير مقبول..(لأني حصلت عليه من وكالة سفر فهم يقومون بهذا الإجراء لكل المسافرين).
- ليه ما مقبول ؟
- لازم يكون الحجز مؤكد من الفندق نفسه.
في تلك اللحظة تبدد كل أملي في الحصول على التأشيرة.و قلت بيني و بين نفسي ( يعني التعب ده كوووله حيروح ساكت؟)
لكنها قالت لي فجأة:
- المهم نحن حنستلم الجواز و أوراقك لكن تأكد لو ما جبت حجز مؤكد من الفندق ما حنعطيك التأشيرة.
بدت لي الكلامات زي طوق النجاة. لاني فهمت ضمنا إنه احتمال كبييير إنه حيدوني التأشيرة. و بالنسبة لي اللي أول مرة يقدم لسفارة أوروبية و ما نسمعه من رفض لمنح التأشيرة للكثيرين اعتبرت وعدها المبطن ده عبارة عن إنجاز.
في النهاية ادتني ورقة استلام.
- بعد كم يوم؟
14 يوم
لا حول و لا قوة يعني انتظر اسبوعين حتى أبدأ في التجهيز للسفر؟
بعد يومين رجعت السفرة تاني عشان اديهم الحجز الفندقي المؤكد. و في اليوم الموعود استلمت الجواز عليه تأشيرة الشينجين. لكن.... حدثت مشكلة ما متوقعة.
و نواصل
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
سلامات أخ محمد عبد الله الحسين .. بوست مشوِّق ينفع مسلسل سودانى وأقترح بطولة الطيب شعراوى .. :) ..
وكمان الثروهات بتاعة المتداخلين حتديهو دفعات .. وأحسب أن أحمد يسين متحفِّز بالجدعات ، وأولها بدأ بأم برمبيطة .. وحنشوف كمان منى عمسيب مدخرة لينا شنو ..
أنا قلت أحسن أخش الفيلم من بدرى .. لأنو لو فاتتنى صفحة ما بتنفع معاى قراية المسبوق ..
| |
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: Munir)
|
الأخ منير
(بوست مشوِّق ينفع مسلسل سودانى وأقترح بطولة الطيب شعراوى .. :) ..
وكمان الثروهات بتاعة المتداخلين حتديهو دفعات )
شكرا يا أخ منير و نتمنى التوفيق في أن يصل البوست إلى أهدافه..
( وأحسب أن أحمد يسين متحفِّز بالجدعات ، وأولها بدأ بأم برمبيطة ..)
الأخ أحمد يسن داير أنزل المحتوى كووووله الليلة.....و نقول ليه بالله روّق المنقة.
أكرر شكري لمداخلتنك أخي منير و شكرا على ذوقك. ..
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
يلّا يا حلوين أدخلوا عشان نواصل....
استلمت الجواز عليه تأشيرة الشينجين. لكن....
مشكلة!
أنا كنت متوقع يدوني تأشيرة لمدة شهر زي ما سمعت.عشان ابرطع فيها زي ما عايز، وكِت أصله ربنا سهّلا و طلعت طيب ما أطلع مرة واحدة..و لاّ كيف؟ شفتو طبع البني آدم؟ كنت متوقع يدوني شهر و في الشهر ده ازور صاحبنا عز الدين في هولندة. و كمان ازور دكتور زاهر في وسط المانيا و ناس اسامة في جنوب المانيا. لكن للأسف المدة بتاعة التاشيرة كلها 10 أيام بس.
10 أيام بتعمل شنو؟
طيب كيف الشوى و المؤتمر حيأخذ 3 أيام؟
و روما براااها عايزة يومين. ده أكان كفّت.
و عايز امشي البندقية. ايوة فينيسيا مكان الجندول و على محمود طه و شكسيبير و تاجر البندقية. نحن من زمااان نقرأ و نسمع أصلوا ما نشوف؟
و كمان عايز ازور روما دي حتة حتة... ما اخلي فيها حاجة. ...
المهم حصلت لي حيرة شديدة ....و لخبطة.... و صدمة خفيفة.
بعدين فكرت بعد ما استشرت يمين شمال.......
و كمان ناس المنبر ما قصروا ادوني نصائح كتيييرة.
و لكن ظل السؤال حائرً طارحاً نفسه بقوة:
هل اكتفي بإيطاليا بس؟
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
و في الاخير قررت أن اختصر برنامج الزيارات الطموح ده.
قمت اعتذرت لي صاحبي عز الدين الفي هولندة
و الحمد لله قِبِل الاعتذار و قدّر الظروف.
مع إنه انا ليهو سنتين عايزني أجي
و كل مرة يقول لي ارسل ليك دعوة . اقول لسه .. لسه.... . زي اللعبة دييك.
المهم في الأخير قررت إنه أكتفي بإيطاليا
زائد زيارة قريبة زوجتي في جنوب ألمانيا فقط.
على كده الرؤيا اصبحت اضحة.
مش أحسن؟
على الأقل بالنسبة لي أنا أنتو ما مشكلة
إنتو تسمعوا بس هههههه.
احترامي لكم حبايبي الحلوين
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد أحمد الريح)
|
الأخ محمد أحمد الريح
شكرا للتنبيهات أو الإرشادات
( أتمنى أن لا تنقل مداخلات الآخرين وتقرنها مع كلامك وإن كان لها لزوم فالرجاء نقلها تحت أيقونة الإقتباس حتى تظهر مفصولة من كلامك(
- الرد: أنا دائماً بنقل مداخلات الآخرين ضمن القوس كما فعلت الآن أعلاه.
أما بخصوص الأخطاء الإملائية التي أشرتها إليها فهي حقيقة و بحاول اتلافاها بالطبع.
و لكن مرات العجلة تلعب دورها
و مؤخرا عندي مشكلة في النت لأنه الفايرفوكس ضارب ليه أربعة أيام و شغال على الاكسبلوررة فالمهم في شوية مشكلة فنية.
و لك العتبى حتى ترضى و نتخطى الاخطاء و الهفوات و النواقص حتى تستمتعوا بالمحتوىو الذي كنت أتمنى أن نسمع منك تعليق سالب أو إيجابي.
لك مودتي
و على استعداد دائم لتقبل النقد بكل أريحية
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: عماد الدين الطيب عمر)
|
الأخ عماد الدين
إقتباس( متابعين ...و صابرين ...ما زي احمد ياسين ...
هههههههههههههههههههههههه تحياتي ...)
الرد:
- شكرا للمتابعة
- احمد ياسين مختفي ما عارف ليه؟
- يا جماعة الرحلة عشرة يوم و الإعداد ليها أكتر من شهر..زيعني دايريني أكبّها ليكم في يوم واااااحد؟
- معليش اصبروا معانا شوية
- لكم مودتي و حبي
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
الاستعداد للسفر إلى إيطاليا
اها بناءً على ذلك اخدت إجازة من الشغل
لمدة كم و عشرين يوم
الإجازة فيها زيارة للسودان قبل السفر إلى إيطاليا...
........الوطن كاسر فيني ضُلعة
أهم شيء الوطن: الأهل
و الحبايب
و القرايب
و الأصحاب..
و كل حجر
و كل شجرة و كل دار في الوطن...
لي معاها ذكرى حبيبة.
المهم خلونا كدي في الموضوع و خلونا من حكاية النوستالجيا
بتاعة المغتربين دي لانها مرات بتكون مضروبة
الواحد ما سافر السودان خمسة و عشرة سنة
و يقول ليك و الله مشتاق للبلد
نواصل
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
قيل السفر لإيطاليا باسبوعين
سافرت السودان.
و قطعت التذاكر بالقطرية من السودان...
ذهاب من الخرطوم إلى روما
على أن تكون العودة عن طريق فرانكفورت(ألمانيا) إلى الدوحة
ليه العودة من المانيا فرانكفورت و ليس من روما؟
عشان أشوف إيطاليا و ألمانيا
.شفتو الشفتنة كيف؟
تتخيلوا لقيت لسعر التذكرة من السودان
أقل من نص سعر التذكرة من قطر.
و نواصل
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
Quote: شكرا على الإطلالة الحلوة ( من الشباك)
و الله يا علوية قصة الراتي دي قصة
نهايته نقولها في بدايته لم نعثر عليه كله كله
لكن حأتكلم عنه حينما يجيء وقته |
بى ردك دا يا ود الحسين طيرت الحمام من البوست ....انت فاكر الناس راجين مخرجات المؤتمر المشيت ليهو ؟
غايتو بعد دا كتر من البيتزا و آيسكريم نابولي
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد جبره)
|
و الله يا محمد جبرة ضحكتني جنس ضحك
إنت والله زول لذيذ خلاص
كلامك ما بيحتاج لي تعليق
إقتباس(بى ردك دا يا ود الحسين طيرت الحمام من البوست ....انت فاكر الناس راجين مخرجات المؤتمر المشيت ليهو ؟
غايتو بعد دا كتر من البيتزا و آيسكريم نابولي)
- شكرا يا محمد
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
.....
قبل السفر لأي مكان ممكن تكون مبسوط للآخر و ممكن تكون مقلق
ده حسب السفرة
طبعا أول مرة امشي أوروبا دي.. طبعا حأكون مبسوط و مقلق
....و ما قادر أتخيل حيلاقيني فيها شنو؟
و لا كيف أتصرف؟
و لا كيف القى فندق مناسب؟
و قبل ذلك كله ...
كيف احافظ على الميزانية في حدودها المعقولة ..........
..عشا نكون صريحيين مع بعض و نحن بقينا عُشرة و أصحاب لينا قريب الشهر
.....و بصراحة
مش(كيف احافظ على الميزانية) في حدودها المعقولة...
... بل في حدودها الدنيا ...ههههه..
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
بعدين في جانب تاني ظهر جديد ظهر لي في إجازتي السودان
اللي هو الجانب بتاع بيزنس صغير.
خاصة أنا زمان كان عندي فكرة في التجارة (البينية هههه)
مش الكلمة دي أحسن من تجارة الشنطة؟
لأنه كلمة تجارة الشنطة شكلها كده شماشية
...ولا شنو؟
و حكاية ما خف وزنه و غلا ثمنه ...
و لزوم تغطية النفقات و ..و
ده زمان قبل حضوري للدوحة.
المدخل للموضوع إنه:
لما الأهل و الاصحاب و الاقارب عرفوا إني ماشي إيطاليا
و بعض الجماعة الشغالين في الثياب السودانية
جوني طوالي و اعادوني من جديد لزمن مضى
و لمواهب تجارية سادت ثم بادت...و نسيتها
المهم ....
أغروني بعائدات ضخمة لو أنا فقط أشتريت ليهم تياب الراتي الإيطالية
و أقوم أرسلتها ليهم.
من بين هؤلاء إحدى قريباتي و هي صاحبة مشغل و تطريز ثياب مشهورة .
و طلبت مني اشتري و أرسل ليها مجموعة من الثياب.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
و طلبت مني اشتري و أرسل ليها مجموعة من الثياب.
قلت لي نفسي:
- و الله فكرة حلوة
- مع إنه الحاجات دي طولنا منها و نسيناها
لكن فكرة مش بطالة.
لكن...معقولة؟
- معقولة بعد العمر ده كله ..
و بعد ما بقيت راجل جنتلمان( والله اكان جنتلمان ما عارف)
معقولة اقوم ارجع تاني لحكاية التجارة و و المساومة و الجرجرة
و الشغلانيات دي؟
و بديت اشاور نفسي... و القرين بتاعي جاهز يرد علي:
- و طيب مالو ياخ فيها شنو؟
- ما تشتريهم و ترسلهم ليها ..
- قال بريستيج قال..
- هو البريستيج بتاعك زاتو الماشي يهبشوا ليك منو؟
- بطل الحركات بتاعة المثقفاتية دي
- .... و خلي البساط احمدي.
المهم من جاي لي جاي اقتنعت
و بديت اطلع مواهبي الكانت زمااان
مواهب بتاعة البيع و الشراء و المساومات و غتاتات التجار و كده.
و استعديت للمعركة المنتظراني
و كمان لشوية الأرباح اللي حالقاها.
- خلاص كدي الأول خلينا نصل إيطاليا دي و بعدين نشوف الباقي.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
هناك موضوع نسيت أشير ليه :
نسيت أقول ليكم كان معاي مرافق ما كلمتكم عنه إنه قريني. و نِعْم القرين
و انا آىسف نسيت أشكره في البداية.
كان القرين طول فترة الإعداد للرحلة و خلالها معاي
و كان بالجد كان بيساعدني في اتخاذ القرارارات
و يقنعني ( يعني في زي موضوع تجارة التياب)
و دايماً بشاوره و بسمع كلامه و نصائحه لانه دائماً اكتشف إنها منطقي
مع إنه كنت في الأول دائماً بعاكسه و اكاجره
لكنه كان بيستحملني....
و في الاخير بكتشف إنه دايما كان هو الصاح.
و الحاجة الكويسة سافر معاي
و كان معاي إلى أن انتهت الرحلة
و لا كلفني تذكرة و لا اي حاجة
و وصلني لي خشم البيت و سلمني للمرة
و بعد داك رجع كتر خيره ماقصّر.
من هنا باسمكم اوجه ليه الشكر
و أقول ليه إلى اللقاء في سفرة قادمة
و نواصل الرحلة:
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
نواصل الرحلة:
اها ...كمان عندي مشكلة تانية:
الله يكفينا شر المشاكل
- برضه كان عندي هاجس السفر في الرحلة الطويلة.
يعني الرحلات البتمد لحوالي 6 ساعات و اكتر.
معقولة اقعد في المقعد طول المدة دي؟ و الله حاجة تزهج
و انا أكتر مسافة سفر في رحلة لي بالطيارة كانت حاجة خفيفة كده.
....زي ساعتين أو تلاتة ساعات بين الخرطوم إلى جدة والاّ إلى القاهرة ...والاّ الدوحة.
بعدين أنا في رحلة ال3 ساعات بزهج و اقلق
كيف أعمل مع رحلة مدتها 6 و 7 ساعات؟.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
بإذن المولى الكريم
و الآن سننتقل إلى جزء آخر من الرحلة
المطار:
من الخارج تكدّس للمسافرين في المدخل( دون داعي)
و وجود شبه امني( بس بكرفتات) في البوابة
- جوازك!
ابحث داخل الشنطة الصغيرة الانيقة و استخرجه
- اتفضل
القرين: إنت ما كان تطلع الجواز من بدري
أنا: يعني انت ما شياف اللخمة دي ؟العفش بي جاي و الجوازات بي جاي؟و النقد الأجنبي( ده أهم من الجواز ذاته) بي جاي.
القرين اقتنع و سكت على مضض
المطار شبه خفيف.........
الرحلات المغادرة ليست كثيرة في هذه الساعة المتأخرة
المسافرون يجلسون على المقاعد القليلة الموجودة في مدخل المطار
المسافرون إما مسترخون في مقاعدهم و يقطعون الوقت بمحاولات للتناوم.
او متزاحمون في صفوف إجراءات التفتيش الذاتي
و موظفوا التفتيش الذاتي منهمكون في عملهم (الروتيني) ..
يؤدون عملهم في آلية خالية من بسمات التوديع
و خالية كذلك من التمنيات برحلة جميلة ..
و لكنهم في النهاية هم هكذا..... سودانييون على سجيتهم
الحمد لله انتهى الوزن و إجراءات فحص التذاكر لدى موظفة الخطوط القطرية
فحص بطيء على اسمي في الكمبيوتر
القرين: عاين ....ما في مسافرين.... وإجراءات التذاكر بطيئة كيف؟
انا: هههههه ... .. الموظفات كأنه عيّنوهم اليوم
بعد عدة دقائق مدت إلي مدت إلي التذاكر و اوراق الجوازات
و وجهها يهل بابتسامة توديعية تركت في القلب اثراً طيباً
- يا القرين....شفتها ظريفة كيف؟
- والله يكون خطوبتها و لا عرسها الاسبوع الجاي
سالت نفسي في براءة لا تخلو من خبث:
( لماذا نحن شحيحيين في الإبتسامات في الاماكن الرسمية و كانها ضعف أو عيب؟)
القرين: يلا يا محمد خلص اوراقك قبل تجي الزحمة
- إنت يا القرين من قبيييل انا خاتيك في الصامت.......خلاص هسه اشتغلت؟
- يا محمد نسيت إنه اسمك محظور لتشابه الأسماء
- آي والله نسيت ....احسن امشي قوام ..
.......الجماعة ديل ما مضمونين...
- يا محمد اسرع الجماعة ديييل إنت عارفم لوايييق
- لم أعلق على تعليق قريني الأخير ده.....انا مالي و مال المشاكل
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
إلى الجوازات:
الصف طويييل كالعادة ......و ثلاثة ضباط جوازات والاّ ضباط شرطة ما عارف
اكيد شرطة لأنه صرة الوش ظااااهرة و نظرات الحزم و التعالي ظاااااهرة في النظرات و العيون و هي توزع نظراتها في تعالي إلى الرعايا المنتظرين الموافقة(موافقتهم على السفر)
تذكرت في حزن شعار قديييييم غير مطبّق( الشرطة في خدمة الشعب)
خلف كل كاونتر يجلس واحد بجانب الضابط( إمكن صاحبه إمكن...؟)
اخيراً انتهى الصف و وجدت نفسي أقف امام سعادته
مسك الجواز في آلية و نظرات الجدية و الوجه العبوس تطبع الوجه
( شكلها ضرورية لزوم إكمال الصورة الرسمية المطلوبة،
أو إحتمال للتعبير عن الاهمية.....كله جايز.
لما رايته قد اطال البحث في الكمبيوتر امامه
و شعرت بتململ المسافرين من خلفي
عرفت السبب في التاخير
إسمي متشابه مع اسم واحد مطلوب ( في شنو؟ ما عارف)
لكن الحمد لله...الشخص ده مش انا
لكن البيقنع الجماعة ديل شنو؟
- معاك ورقة فك الحظر؟
- ايوا ( طبعا أنا جاهز و متعود لمثل هذه المواقف)
بالمناسبة إسمي متشابه في مطار مصر و سوريا و السودان.
بس الاسم الرابع هو البيفرق بيني، و بين الشخص المعني( و حسب اعتقادي الشخص المعني اللي هو ليس أنا.... ما في اي معلومات عنه كاملة.
عشان كده بنتبهدل نحن سيء الحظ)
لكن في السودان حتى الاسم الرابع ما بيعفيني...
..... يعني لازم اعمل كل مرة إجراءات لفك الحظر.
حيث اروح لضابط رفيع الرتبة و يقوم بعمل مراجعة سريعة للاسماء المعاه و يقارنها مع المعلومات الخاصة بي في الجواز.
و من ثم يتخذ قراره باني لست المعني.
لكن اعمل شنو ده اسمي العملها فيني......
..... و وقّعني الوقعة السودا دي في كل مرة مع الجماعة ديل.
القرين: إنت قايل يا محمد الناس ديل بفكوك بالسااهل كده؟
ضابط الشرطة: بس الحظر لموضوع تاني...
....سكتّ....قلت أخير أسكت .
و قلت في سري كيف يعني لموضوع تاني؟
و بعد خمسة دقائق رفع الختم ...ثم وضعه في الجواز في بطء و تردد ( كأنه مجبور)
سالت نفسي في خبث لا يخلو من براءة:
( لماذا نحن شحيحيين في الإبتسامات خاصة من الرسميين ....
......( بتاعين الكاكي و السريين؟
هل يعتبرونه ضعف أو عيب؟
القرين: المهم حمدااً لله على السلامة ربنا فكّاك من الجماعة
......يلا نشرب لينا شاي و لا قهوة ...
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
استاذنا المترم ود الحسين ..
لك التحية المعطرة ولضيوفكم الجميلين ..
Quote:
ثلاثة أيام و لا أجد صدى لما أكتب
ثلاثة أيام و انا أنتظر النقد لما أكتب
ثلاثة أيام و أنا أتوقع أن أقرأ تعليقات مع أو ضد ما أكتب ... |
ااسف جدآ لعدم المداخلات ونسبة لظروفي التي لاتخفي
عليك . ولومك علي من اليوم وصاعدآ بالتداخل والاسئلة
المن نار ههههه .
اكرر الأسف ولي عودة من غير رجعة .
متابعة .
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: مني عمسيب)
|
منى بت عمسيب.... اهلين
اقتباس(ااسف جدآ لعدم المداخلات ونسبة لظروفي التي لاتخفي
عليك . ولومك علي من اليوم وصاعدآ بالتداخل والاسئلة
المن نار ههههه .....اكرر الأسف ولي عودة من غير رجعة .)
- شكراً لدخولك الأنيق و لا داعي للأسف أبداً
أقدّر ظروفك
و تشرفي في اي وقت.
و لك كل المودة و الإحترام
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
مرت ساعة و نصف و انا في الانتظار الممل
منتظر وا أكسّر الدقائق متنّقلً بين الواتس اب، و وجوه المسافرين.
و فجأة طلب منا الموظف للذهاب للتفتيش.
انتقلنا لإجراءات التفتيش الذاتي البايخة.
الصف طويل ...
الموظف يأما في صوت لزج:
طلّع النضّارة ..طلّع القلم..و طلّع الجوال ...طلع الحزام..... لما روحنا طلعت...
نظرت يمنة و يسرة و أنا اهتف في داخلي متذكراً نشيد الثورة السودانية الاثير...
تذكرت فصرا أدندن:
( صفوف صفوف ....لما يعود الفجر الحالم
( يااا اكتوبر ) الليلة..
القرين: يا زول هوي حيلك حيلك .... إنت قايل نفسك وين؟
اناشيد هنا؟ و كمان ثورية؟
إنت ما عارف الحتة كلها دبايب ؟
فانتبهت أنا من حلمي:
آي و الله فعلا....إنا فعلاً في عش الدبابير ذاااتو.
و اخيراً.....
و أخيراً جداً..
صعدنا إلى الطائرة
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
ركبنا الطائرة القطرية الساعة 2 صباحا .
وصلنا السادسة صباحا........كونبكشن سريع في الدوحة.
... الساعة الآن 8 صباحاً... ساعات و إنطلاق الرحلة التاريخية لغزو أوروبا.
القرين: غزو عديييييل كده؟
انا: ايوة غزو (بس ما يسمعونا ناس الإرهاب)
- هو نعم غزو لانه من شخص كان بيعتقد إنه الزيارة دي المفروض كانت تتم قبل 20 سنة بحكم حاجات كتيييرة:
أولاً التطلعات المبكرة
و بحكم الآمال الشابة
و بحكم الأشواق
و بحكم الطموح
و بحكم الوعي المبكر
و بحكم التصورات و الأخيلة
و بحكم حاجات تانية كتيرة.....
لكن ما مشكلة.
و كما يقول المثل الإنجليزي.... مش هو مثل أنجليزي؟ ولا شنو؟ أعتقد ذلك.:
أن تأتي متأخر خير من أن لا تأتي. Better late than never
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
صباح الخير
معليش اسمحوا لي أن أستغل هذه المساحة مضطرا لتقديم معلومة للددكتور اسامة الخليفة من السعودية( حيث فقدت رقمه)
اسم الفندق سان ريمو Hotel San Remo, Rome
و هو يقع على بعد 300 متر فقط من مركز المدينة الذي به محطة القطار termini
P.Iva: 04035330234
العنوان:
Via d'Azeglio, 36, 00184 Roma, إيطاليا
الهاتف:+39 06 488 1741
اقترا
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
ود الحسين صباحك خير ... ولضيوفك الكرام ..
بالرغم من قصر زمن الرحلة ماهي اكتر الاشياء
اثارت انتباهك اي لفتت نظرك ؟
ولك الشكر ...
********************
صهيل خيلِك وَرَا الضَهَرَاتْ،
وفارْسِكْ حَىْ، قَدِحْة الضَّىْ،
مَجَرْتَقْ بالنِّضَالْ مُـــــــــو نَىْ،
ولا فَتَــــــــرْ إِتْفَـــــــزَرْ لا مَــاتْ ...
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: مني عمسيب)
|
صباح الخير أختنا بت عمسيب
بالنسبة لسؤالك:(بالرغم من قصر زمن الرحلة ماهي اكتر الاشياء
اثارت انتباهك اي لفتت نظرك ؟)
تكرمي أيتها الصديقة :
أقول باختصار أن:
الناس في إيطاليا ودودون للغاية و ظريفين رغم الصورة السالبة التي كنت أحملها لهم.
تفاجأات بأن روما عبارة عن مستودع ضخم للآثار و التاريخ.
كثرة الأجانب من الزوار و المقيمين في روما بالذات.
كثرة المدخنات من الشابات الإيطاليات حتى صغار السن من الصبيات.
إهتمام و احترامهم أصحاب المركبات بالمشاة فالأولوية للمشاة.
اما ما لاحظته في ألمانيا:
فالجدية بادية في العيون و الوجوه و النظرات( كيف لا و هم شعب مبدع و شعب مفكر و شعب فيلسوف)
المانيا منظمة و لديها قيود فيما يتعلق بنظم و لوائح التجارة و البيع و البضائع المعروضة و دخولها..عكس إيطاليا.
في الختام : الجمال الأنثوي أكثر ما يشدك في إيطاليا مقارنة بألمانيا( إنطباع خاص)
هذا انطباع شخصي قد يكون صحيحاً إلى حد بعيد
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
Quote: طلبت مني اشتري و أرسل ليها مجموعة من الثياب.
قلت لي نفسي:
- و الله فكرة حلوة
- مع إنه الحاجات دي طولنا منها و نسيناها
لكن فكرة مش بطالة.
لكن...معقولة؟
- معقولة بعد العمر ده كله ..
و بعد ما بقيت راجل جنتلمان( والله اكان جنتلمان ما عارف)
معقولة اقوم ارجع تاني لحكاية التجارة و و المساومة و الجرجرة
و الشغلانيات دي؟
و بديت اشاور نفسي... و القرين بتاعي جاهز يرد علي:
- و طيب مالو ياخ فيها شنو؟
- ما تشتريهم و ترسلهم ليها ..
- قال بريستيج قال..
- هو البريستيج بتاعك زاتو الماشي يهبشوا ليك منو؟
- بطل الحركات بتاعة المثقفاتية دي
- .... و خلي البساط احمدي.
المهم من جاي لي جاي اقتنعت
و بديت اطلع مواهبي الكانت زمااان
مواهب بتاعة البيع و الشراء و المساومات و غتاتات التجار و كده.
و استعديت للمعركة المنتظراني
و كمان لشوية الأرباح اللي حالقاها.
- خلاص كدي الأول خلينا نصل إيطاليا دي و بعدين نشوف الباقي. |
هههههههههههههه
ممتع يا عبد الله
بس شغل التشويق ده خففو شوية
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: متوكل حسن)
|
الأخ متوكل تحياتي
و شكرا على تشريفك لنا بدخولك الممتع
إقتباس: (هههههههههههههه ممتع يا عبد الله
بس شغل التشويق ده خففو شوية )
هو التشويق نافع يا متوكل ياخوي؟
الناس دي بتقرأ و تقرأ لكن ما بتعلق. ياخ أنا لي كم يوم ما في زول قال لي بقم.
لا بالسمح لا بالشين.اها إنت أول زبون يجيني خلال اسبوع. لامن اتحيرت.ياربي البكتب فيهو ده سمح و لا كعب؟أحسن أقيف و لا استمر؟
لكن في الآخر توكلت على الله و استمريت.
كتّر خيرك أخي متوكل
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
الوصول إلى الدوحة:
بعد ثلاثة ساعات من الإقلاع من مطار الخرطوم وصلنا الدوحة ......
هذه المرة الاولى التي انزل ترانزيت في الدوحة و الذي أقيم فيها
نزلنا من الطائرة و غلى إجراءات الفحص للأمتعة لركاب الترانزيت
برضه صفوف طوييييلة لكن معذورين لأنه هناك فوق الخمسين طائرة في اليوم أو أكثر..
سريعاً سريعاً أكملنا إجراءات الفحص و التفتيش الإليكتروني و.....
.....و على طول توجهت مباشرة لصالة الانتظار.
القرين: خلاص يا محمد يعني اوروبا .....اوروبا؟
- اها مالك كمان ؟ في شنو تاني؟
- كيف ما في؟
- مش إحتمال تكون تاشيرتك ضاربة يا ابو حميد؟
- ضاربة كيف؟ انا جايبة من سعد قشرة؟
- انا قدمت ليها و استلمتها من السفارة الإيطالية
- يعني عملت الإجراءات برااي.
- .............لا لا شوف ليك حاجة تانية
القرين: طيب جوازك؟
- مالو جوازي؟
القرين: متاكد إنه ساري المفعول؟
- ايوة ساري...... لكن و الله........ كلامك صاح .......احسن اتأكد
...( مع اني متاكد من إنه ساري لكن..برضه)
انظر متفحصاً الجواز:
- لا ..لا.. ساري ياخي.... إنت مالك كدي؟ تشكك الزول في روحه ذاتا؟
القرين - انا بس قصدي ما تتمقلب.... و لا يقوموا يرجعوك تاني...........
مش الواحد أحسن يكون متاكد؟ و في السليم؟
أنا- فعلا .....فعلا
و الآن..............اسمع الصوت الذي طال انتظاري لسماعه
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
في مطار الدوحة و في انتظار الرحلة الحلم (بالنسبة لي أنا فقط)
لاني مغتربيّ اوروبا و العالم الاول قد يكونوا مروا بهذه المشاعر عندما سافروا لاوروبا أو أمريكا لأول مرة قبل عشرة او عشرات السنين، و الآن نسوا تلك المشاعر بل قد يضحك البعض منهم في سره لتلك( السذاجة أو البراءة أو ما يشبه سلوك القروي في المدينة) لتعبير( رحلتي الحلم) و يقول حلم شنو؟ عاااادي.
لكن برضه أصر بالنسبة لي حلم .لكن بالحق يا اخوان نحن الذين لم نسافر من قبل للعالم الأول أو الثاني نحس بانه حلم بالنسبة لنا نحن الذين جينا من من الضهاري.... ضهاري العالم ( السودان)
القرين: محمد ! محمد! سامع؟ سامع؟
ارخي اذني لاتصنت.
و الآن......سادتي..........اسمع الصوت الذي طال انتظاري لسماعه
اسمع هذا الصوت المموسق يتهادى من خلال الميكرفون في نغمة محببة ....جادة و حازمة..الصوت الذي طال انتظاري لسماعه سنوات عددا:
( المسافرون المتجهون إلى روما عليهم الذهاب إلى البوابة لإكمال إجراءاتهم)
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
و الآن......سادتي..........اسمع الصوت الذي طال انتظاري لسماعه
اسمع هذا الصوت المموسق يتهادى من خلال الميكرفون في نغمة محببة ....جادة و حازمة..الصوت الذي طال انتظاري لسماعه سنوات عددا:
( المسافرون المتجهون إلى روما عليهم الذهاب إلى البوابة لإكمال إجراءاتهم)
القرين: يعني نحن؟ مش؟
- ايوة نحن
القرين - يعني خلاص يا ابوحميد؟ كلها دقائق و تعبر إلى القارة العجوز؟
في حديث خاص لروحي العزيزة الآن اتحدث إليها حديثاً خاصاً..أي بدقيق العبارة ابوح لها بوح خاص،
فلتأذنوا لي يا سادتي في هذا الحديث الخاص(الذي لا يخصكم مع الإعتذار):
- نعم الآن سوف اسافر للقارة العجوز التي ظللت . منذ نعومة اظافري انتظر السفر إليها ...
-.. الآن بعد كل هذه السنوات يتحقق الحلم.
.........كانت نفسي تحدثني في حديث داخلي مشوب بالفرحة و بالحزن و باليقظة و بالوعي و بالإحساس السعيد و بالانتصار.
إنتصار؟ دي شنو الكلمات الكبارة دي؟
انت كبّرت الحكاية يا ابوحميد
- ...لقد كنت تقرأ عن كل عاصمة في اوروبا تعرف كل ميناء. فيها ...بل و تعرف بالتفصيل غير الممل أسماء المدن المشهورة فيها و بماذا تشتهر.
- لقد كنت تعرف. كل ذلك و أكثر.
- نعم كنت أعرف كل ذلك و أكثر و لكني دون أن أشاهده.
-الآن اتتلك الفرصة تتهادى من حيث لا تحتسب
- اتتك هذه الفرصة بدعوة لحضور مؤتمر و لولاه لما جاءتك
- لقد طال ذلك الحلم و نسيته بل تناسيته لأنه صار بعيد المنال و عزّ على التحقّق.
و لكن الصوت الخارجي يرتفع من جديد، صوت المايكرفون:
( المسافرون المتجهون إلى روما عليهم الذهاب إلى البوابة لإكمال إجراءاتهم)
فالملم انتباهي و مشاعري و احاسيسي و بقايا حلمي القديم و أذهب في عجلةٍ ما عُرِفْتُ بها إلى ...
إلى .....إكمال إجراءات السفر و الصعود للطائر الميمون.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
و الآن و انا أخطو منتشياً نحن الخطوة القادمة ....
أخطو نحو المدخل الذي يقود لركوب الطائرة.
و لكن يقف في المدخل موظفان كأنهما كلبي صيد أو قنص. عيونهما مدربة تفتش عن أي خطأ في حرفٍ أو رقم .
و قفت في الصف الطوي..............و بجانبي القرين رفيقي الإجباري في السفر و غيره
القرين: يعني كلها ساعة و لا كده، و نعبر البحر الابيض المتوسط؟
- طبعا طبعاً .أكيييد
... البحر الأبيض المتوسط هو الحد الفاصل.
الحد الفاصل الذي يفصلنا نحن عالم الضهاري العالم الثالث و الرابع
.....يفصلنا عن العالم المتقدم .....
..العالم الراقي...
..العالم الرائع .......
.....العالم الذي يحترم الإنسان
و بعد دقائق..كنت قد نسيت فيها نفسي اجد نفسي فجأة واقفاً في أول الصف..أمام موظف الخطوط القطرية:
- أوراقك لو سمحت!
- أوكي
تفحص الاوراق بارتياب ثم بادرني ليتأكد:
- إلى أين مسافر؟
- إلى روما
ناولني الاوراق مبتسماً.(ما شاء الله متدربين تدريب صاح على وظائفهم
...... ابتسامة مفرحة و لكنها مصنوعة..
.....برضه مش أحسن من عدما؟
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
الجو شبه غائم.....
و الشمس لا زالت في بداية مطلعها في الافق...
..... صعدت إلى البص
.....الآن تأكد سفري
القرين: يا زول ما تستعجل... إنت لسه ما ركبت الطيارة ما تحلم ساهي.
- و الله القرين ده عامل لي ضغط عديييل ...ده شنو ياخ؟
اوصلنا الباص لمقدمة الطائرة.....و نزلنا من البص
وقفنا .. صف للصعود للطائرة ..
و جات لحظة الصعود للطائرة .
....و كل واحد ماسك جوازه و تذاكر السفر.
..... و الكل يوجه بصره لباب الصعود للطائرة
الآن وصلت إلى باب الطائرة و................ إبتسامة روتينية ذات طابع مهني تستقبلني بمسحتها الآسيوية لتوجهني إلى مقعدي.......و أنا أدرى به
دخلت و فجأة تلفح وجهي و تنعش خياشيمي رائحة المكيف البارد المنعش تلفح وجهي كانها تمسح عني حزني و ارهقي و توتري .
و أخيراً جلست في مقعد الطائرة .
اتطمنت شوية و ارتحت شوية و شلت نفسي ....
في انتعاش و ارتياح من الإجراءات الطوييييلة .
و بدأت أتجول ببصري يمنة و يسرة .....................................عشان اشوف المسافرين معاي منو في الرحلة الطويلة دي.
و كنت اأتمنى في داخلي إن شاء الله أكون محظوظ.... و اقعد جنب زولاً ظريييييييف يقصّر لي مسافة السكة.
تانياً كنت فاكر إنه الركاب معظمهم اوربيين او شوية عرب.
لكن ما لقيت لا اوربيين...و لا عرب . إلا نفرين تلاتة من العرب بين الركاب (حوالي 270 راكب).
لكن ت مفاجأة أخرى.......كان معظم الركاب من الجنس الأصفر.. من أصحاب العيون الضيقة المستطيلة...و الأحجام الترانسيستور( الراديو بتاع زماان) .
غريبة!
معظمهم شكلهم من جنوب شرقي آىسيا
. كلهم ما فيهم زول قيااافة كده يقولو عليه (ىآسف للتعبير)
كان معظمهم.. يابانيين و فيتناميين...و ما شابه هؤلاء القوم.
يا ربي ديل ماشين إيطالية ليه؟
سياحة؟
و الاّ شغل؟
و الاّ إقامة؟.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
الطائرة ضخمة جدا .....و المقاعد مريحة تناسب الرحلات الطويلة.
المقصورة السياحية مقسمة إلى ثلاثة أقسام.
المهم شيء واسع جدا. الله يوسعها علينا في الدارين.
و على مدى البصر تجد الركاب أمامك و خلفك في المقاعد الممتلئة عن آخرها..
المهم مرت الساعات الستة عاااادي بدون ما أشعر بأي ملل أو زهج رغم عدم وجود رفيق.
مرّت الساعات ما بين الخدمات المتواصلة من المضيفات و ما بين الحركة بين المقاعد من الركاب و المضيفين و المضيفات الرشيقات القوام رايحين جايين... رايحين جايين.
و مرة ....مرة أنظر للخارطة الرقمية أمامي. و مرة .... مرة أنظر للوجوه الصغيرة ذات اللون الاصفر شبيه البرتقال...أنظر حولي لابحث عن ود في الوجوه المسافرة أو عن شبح ابتسامة جائلة تنسيني هاجس الوحدة و الرحلة الطويلة مجهولة الأمد.
بعد أن عبرت المتوسط لتلك القارة التي غيرت تاريخ العالم؟
القارة التي استلقت في قارعة التاريخ. و لمئات السنين كانت تشكّل ديانة العالم و تاريخ و ثقافته و جغرافيته و سياسته ؟
و بدأت أكلم نفسي بصوت عالي:
الآن ستصل إلى تلك القارة التي انطلقت منها الحروب الصليبية
القارة التي انطلقت منها البعثات التبشيرية غلى انحاء العالم
القارة التي انطلقت منها الجيوش و الاساطيل لتغزو العالم
الآن ستصل إلى تلك القارة التي استعمرتْ العالم
و حكمت و استغلت الشعوب
و ذلت و انتهكت
و قتلت
و اغتصبت..
.و توسعت!
القرين: يا محمد يا اخي أنا مالي و مال ده كله؟
- طيب وقُت عارف ده كله جايها ليه؟
أنا: و الله كلامك إلى حدٍ ما صاح أنا جاي أحاسب اوروبا الآن؟
- و لا احاسب التاريخ؟
- ياخي حسابهم عند ربهم.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
أكرر هنا ما ظللته أردده و أنا أتهب لدخول روما دخول الفاتحين و كأنني أحاول أن أقلل من وقع تأثري بالزيارة التي جاءت متأخرة جداً. حيث طفِقْتَ أقول في سري:
الزيارة دي المفروض تكون تقبل 20 سنة .
-ليه ؟
- بحكم حاجات كتيييرة:
- زي؟
بحكم التطلعات المبكرة
و بحكم الآمال الشابة
و بحكم الأحلام اليوتوبية
و بحكم الأشواق الجامحة
و بحكم الطموح المشروع
و بحكم الوعي المبكر
و بحكم التصورات و الأخيلة
و بحكم حاجات تانية كتيرة.....
و اظل أردد و أكرر
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
الآن وصلت روما
ٍ نزلت من الطائرة في مطار روما .......
.... و سيراً على الأقدام مشينا من مكان الطائرة ثم مروراً من خلال الأنبوب الطويل إلى....
كنت أظن أننا سندخل مباشرة إلى صالة الجوازات و التفتيش و ما إلى ذلك.
و لكن فجأة.... لقيت ركاب كثيرون خلاف الركاب الذين جاءوا معي.
عرفت أن الزحام الشديد كان لوصول ركاب يبدو أنهم نزلوا من عدة طائرات اخرى و الذين جاءوا عبر الأنبوب إلى هنا.
ركاب من عدة طائرات كنا..
و وجدنا أنفسنا نقف محصورين بين حاجزين زجاجين...... احدهما أمامي و الآخر خلفي.
و لم أفهم شيئاً. لماذا هذا الحاجز؟
ثم وجدت الناس يتوزعون ليتزاحموا امام الأبواب الزجاجية في الحاجز الزجاجي الذي يقف امامي و الآخر الذي يقف خلفي.
ماذا ينتظر هؤلاء؟ و لماذا لا يفتح الباب الزجاجي؟
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
و بعد دقائق ..........يلمع ضوء فجأة مع صوت صفارة طوييلة ....
آه إنه قطار إذن.....المحه من خلال الحاجز الزجاجي؟
ما الذي اتى بالقطار هنا؟
آه ...إنه مِترو.....
مِترو؟ ...
مترو داخل المطار؟
حقيقة اتعقدتَ ......
.......ده يا ربي يركبوا يمشوا بيه وين؟
ما في باصات؟
آه... الآن عرفت السبب
.... اتاري المسافة بعيدة بين المطار و جوازات المطار.
ركبت المترو مع الراكبين الآخرين.
ثم بعد خمسة دقائق توقف .فنزلنا جميعا.
وجدنا أنفسنا في صالة طويلة هي صالة الجوازات.
و هكذا ذهبت إلى الجوازات.....اندهشت للصفوف....
...... صفوف طوييييلة .......................و في نهاية الصف يوجد ضابطي جوازات فقط في الكاونتر.
دي أول صدمة لي في العالم الغربي ....
.حكاية الصفوف في المطارات كنت قايلة عندنا بس.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
أسلوب السرد جميل ..
الخواطر الجانبية تزيّن الحكاية ..
مخاطبتك التفاعلية مع القراء برضو تكتيك جذاب ..
واصل ..
ملحوظة .. لعمل إقتباس أعمل كوبى للمقطع العايز تقتبسه، وفى نافذة الرد دوس على زر إقتباس ـ فتظهر ليك نافذة الإقتباس فيها محتوى المداخلة السابقة ــ دوس Reset لتمسح هذا المحتوى، ثم أعمل paste للكلام العملت ليهو كوبى قبيل .. وبعد داك أعمل الـ Ok ..
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
بعد حوالي ساعة و نيف من السير في الصف و الإرهاق ...
......................توقفت امام شباك الجوازات.
مددت جوازي لضابط الجوازات...مرت لحظات و هو ينظر في جوازي.
........ . تخيلت أني أقف كالمشتبه به. و انه سيتم فحص ملامحي بالتفصيل الممل.
و ستغوص الاعين المدربة في اعماق نفسي، بحثاً عن ذرة من فكرٍ إرهابي،
أو عن وجود بادرة شبهٍ واحدة مع أحد الإرهابيين المختفين، أو الملاحقين، أو حتى المحتملين.
و لكن كل ذلك لم يحدث .....
..ثلاثة دقائق فقط ...
....ثلاثة دقائق فقط ...قضاها الضابط في النظر في جوازي و في التأشيرة التي في جوازي... ثم......
.......اخيراً تم وضع الختم كقبلة ترحيب و حب على الطريقة الإيطاليةن تم وضعها في جوازي.
إنها إذن بمثابة إعترافٍ رسميٍ و دبلوماسيٍ من كيانٍ أوروبي ببراءاتي....
..... و هي كذلك اعترافاً بأني شخص صالح و مسالم....
....... و بالتالي يمكن قبولي كسائح كوني لا يُخشى منه.
أخيراً انتهت إجراءات الجوازات.. إنتهت المرحلة الرسمية و ستبدا المرحلة الشخصية.
و بدأت أبحث عن مكان عفشي. عفشي المكون من حقيبة كبيرة و حقيبة متوسطة.
بعد عشرة دقائق عثرت عليهما.......
.......فصرت أسحبتهما خلفي كأنني حصان عجوز يجر مركبة متهالكة.
فقد كنت في تلك اللحظات في أقصى درجات التعب و الإنهاك.
الساعة الآن حوالي السابعة و النصف مساء.
و لسعات البرد الغيطالية تتربص بي في خارج المطار....مش برضه أحسن من تربص بعوض الملاريا؟؟
الآن مضى ما يقرب العشرين ساعة منذ ان غادرت المنزل في السودان للمطار. و لا زلت حتى الآن في حالة سفر حتى هذه اللحظة.
وجدت كافتريا كبيييرة داخل المطار( في الصورة).....
.......سحبت كرسي و جلست في الطرف. لان الكافتريا مليانة بالرواد و كلهم تقريبا مسافرين. و يبدو إنهم عارفين يشتروا شنو .....إلا أنا.
قرّبت من الكاونتر الكبير الذي يقف فيه النوادل لتقديم الخدمة، حتى استطيع ان أقرأ قائمة المأكولات و المشروبات و اسعارها...أهم حاجة أسعارها...هههههه.
كنت في الحقيقة مشوش التفكير، و ما قادر أركز. .....
و بالتالي لم اطلع بشراء شيء محدد.
و كمان كان عندي هاجس بتاع لحم الخنزير او أي من مكوناته التي يمكن ان تكون موجودة في اي مكون غذائي.
عشان كده استبعدت شراء اي وجبات أو مأكولات. .......و قلت اكتفي بقهوة ساخنة.
و لكني برضه لم أفعل.
اخيراً........ قررت ان أخرج خارج المطار و أصل اقرب فندق.
و بعد أصل الفندق أفكر في الأكل و الشراب..... خاصة انا تعبااااان.
و اخيراً خرجت من المطار.
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
خرجت من المطار:
الآن انتهت مرحلة و ستبدأ مرحلة جديدة، لا أعرف عنها شيئاً إلا ما قرأت عنه أو سمعته.
خرجت من المطار............... و أنا أعاهد نفسي أن اجعل عيوني تتسع لترى و تشاهد أي شيء وكل شيء، حتى أدق التفاصيل لن أتركها تفلت مني(هو أنا السفرة دي لقيتها بالساااهل كده؟).
لن أضيع دقيقة واحدة دون أشبع ناظريّ و فكري و روحي .......من كل ملمح من روما و و من كل جانب من حياة الإيطاليين.
الأن ساترك ذاكرتي تحفظ و تسجل كل ما تراه و تسمعه و كل ما سالاقيه.
بعد ساعة ساخرج من المطار.
فقط لو وجدت طريقة اتخلص من هاتين الحقيبتين اللتان ستكبلان استمتاعي و ستيعيقان حركتي و تفاعلاتي مع سوف ساقبلني و اراه.
لكن...لا مخرج ....إلا أن اسحب خلفي حقيبتين الثقيلتين ( العتب على سوء التقدير و قلة الخبرة في االسفر لاوروبا).
الآن أخرج خارج المطار..لسعات البرد تكاد تعيدني للداخل.
اتوقف خارج المطار و اتلفت .انظر إلى اعلى............ إلى الأفق........... و إلى سماء روما الملبد بالغيوم الشتائية.
وقفة عتاب أقفها عند مدخلك الرحيب ...............
................لن ادخلك حتى أفرغ كل ما يحتشد في صدري و ضميري من لومٍ و عتاب:
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
................لن ادخلك حتى أفرغ كل ما يحتشد في صدري و ضميري من لومٍ و عتاب:
- لماذا تأخرتي عنّي يا روما كل هذا السنين؟
- بل لماذا تأخرت أنت كل هذه السنوات عن معانقة التاريخ؟
- ترى كل سأجد كل ما قرأته مطابقا لما رسخ في الذاكرة؟
- أم ترى سأصدم بواقع مختلف؟ و اختلاف الفكرة عن الواقع يحدث كثيراً في هذه الحياة.
في تلك اللحظات بدأت الذاكرة العتيقة تعمل في سرعة رقمية مستعرضةً كل ما حفظته من معلومات و صور معتّقة و متخيلة مختزنة في اضابيرها السحرية.
و تتداعى إلى ذاكرتي كل ما قرأناه عن إيطاليا :
ليوناردو دافينشي صاحب الموناليزا ، مايكل انجلو النحات العالمي، جالليليو الفلكي الذي احدث اكبر إنقلاب في تاريخ العلوم مع كوبرنيكوس.
ميكافيللي صاحب كتاب (الامير) المورد الذي يستلهم منه الطغاة يوليوس قيصر. و اغسطس و نيرون و كل القادة الذين صبغوا التاريخ بدماء و حكايات غزواتهم و انتصاراتهم تصرفاتهم...إلخ.
ترى هل يفاجأني بروتس في أحد اركان شوارع روما ليفسد علي بمكره و خيانته رحلتي البِكْر هذه؟
ام يفاجاني يوليوس قيصر بتاجه و سمته الملوكي العتيد؟
ام يقابلني في جادة الكولسيوم انطونيو و هو يحضن عشيقته كليوباترا التي اضاع بسببها عرش ملكه؟
ماذا سارى في إيطاليا؟
روما الفاتيكان و الكولسيوم؟
أم مدينة فينيسيا مدينة شيلوخ تاجر البندقية،
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
ماذا سارى في إيطاليا؟
روما الفاتيكان و الكولسيوم؟
أم مدينة فينيسيا مدينة شيلوخ تاجر البندقية،
أم مدينة فلورنسا ارض التماثيل و المعمار و الفن؟
أم ميلانو مدينة الأناقة و الموضة؟
أين أنت نهر التيبر الذي طالما سمعنا عنك و عرفناك كانه تجري شاقاً ولاية الخرطوم، او هائماً في سهول البطانة؟
آه يا نهر التيبر كم تلطخت بدمائك جنود الإبراطورية الرومانية؟
و كم شهدت ضفافك وقفات الاباطرة و هي تتطلع لتغيير التاريخ؟
الآن أقف في حيرة و أنا اضع أصابعي كالأطفال في مقدمة أسناني لاطالع اوراق التاريخ و هي تمتد أمامي.
ها هي إذن نقطة انطلاق الإمبراطورية الرومانية التي تمددت لتبتلع أكثر من ثلث العالم.
ها هي الإمبراطورية الرومانية التي كانت حينما تحشد جنودها و أساطيلها تأهباً لاقتحام كل سواحل المعمورة، و سهوبها و بحارها و سهولها و جبالها،
كان العالم يحبس انفاسه فرقاً و رهبا، خوفاً من جيوشها التي غزت و انتشرت و قاتلت و هزمت و هُزِمت و توسّعت تشرذمت و انكمشت.
و أنت ايها التاريخ تقف شاهداً على كل ذلك تحفظ و لا تبدد، تراقب و لا تنحاز.
إذن بعد قليل سوف اسير في شوارع روما العتيقة.
سوف استنشق كل ذرة هواء من عبير تاريخها العتيد...
سوف أترك عبق تاريخها يزكم انفي و خياشيمي بعدد غبار المعارك التي شهدتها.
أهذا مبنى الكولسيوم العملاق( الذي سميت سينما كولزيوم باسمه بتصميمها الذي يشبهه)
| |
|
|
|
|
|
|
|
|
|
Re: زيارتي الحلم لإيطاليا: روما، ميلانو، الفا (Re: محمد عبد الله الحسين)
|
طلعت برة المطار وقفت برة متحيّر.
طبعا قبل السفر بحثت عن أي معلومات يمكن أن تفيدني في الرحلة.
ما خليت منديات للمسافرين و لا مواقع تجارية
تقدّم معلومات للمسافرين و تساعد في حجز الفنادق و الطيران.
ماخليت اي واحدة منهم إلا دخلتها و معظمهم من مصر و السعودية.
المهم جمعت كترة معلومات ........لكن في الآخر زهجت و قلت أحفظ المعلومات البتتحفظ و الباقي أخليها لأنه بالجد زهجت ......زهجت ...لأنه حصلت تخمة معلومات.
خلاص حفظت كل المعلومات عن الفنادق و المطاعم و المواصلات و..... و قريت و عرفت معلومات عن وين الفنادق بتكون و من وين اركب القطارات و الباصات و... و...إلخ.
طلعت برة المطار وقفت برة متحيّر.
.... و القرين الكان في الصامت خلاص بدأ يلعلع لما طلعنا برة المطار.
القرينك اها حتمشي وين يا ابوحميد؟
- حامشي وين يعني ظ حامشي الفندق طبعاً.
- عارف محل الفندق؟
- ايوة............تتذكر لما قريت في الموقع في النت؟
قالوا الفنادق في منطقة الفاتيكان كتيرة.
- خلاص نمشي الفاتيكان.
قعدت برة في مسطبة مع المسافرين المنتظرين. و ما عارف اركب شنو. لكن بس قالوا لي ما تركب التكسي لانه غالي.
سالت واحد إيطالي:
- لو سمحت و ين الباص البيمشي الفاتيكان؟
- اها فاتيكانو؟ هنااااك في نهاية المبنى.
| |
|
|
|
|
|
|
|
|
|
Re: زيارتي إلى إيطاليا (Re: محمد عبد الله الحسين)
|
ابن العم ود الحسين
مستمتع بحكاويك بس من الطيارة للفاتيكان هسي ناس الدوم والنمر يقولو عليك شنو؟
في منطقة القروناب بفتوار لدينا في الساقية رقم (2) كنيسة اثرية ومعروفة الحواشة هناك باسم الكنيسة.
في احد الأيام وصل عمنا من" باردة" الحسن حاج عبد الله وسأل عن شقيقنا حسن الذي كان وقتها بالحواشة
فردوا عليهو انو " حسن مشى الكنيسة"
فصفق يديه قائلا" انتو حسن بقى مسيحي متين؟"
تحياتي لكم
واصل
| |
|
|
|
|
|
|
|
|
|
Re: زيارتي إلى إيطاليا (Re: MOHAMMED ELSHEIKH)
|
الأخ محمد الشيخ
شكرا على تعليقك و الطرفة و مقبول منك التعليق.
أنا بكتب و بحاول أشوف طريقة أنزل الصور.و بدخل كم موقع و بحاول و أحاول ...و لما ألقى طريقة ما بصدق ..بنزل الصورة طوالي جات كنيسة و لا جات كديسة.
المهم أنزل. عشان كده بالله ما تفضحونا خلوا الموضوع مغطى.
خلاص تاني ما بجيب ليكم الكنيسة إلا يوم الأحد.
و شكرا على المتابعة يا أو حميد
| |
|
|
|
|
|
|
|
|
|
Re: زيارتي إلى إيطاليا (Re: محمد عبد الله الحسين)
|
اواصل الحكي: بعد الخروج من المطار :
قعدت برة المطار في مسطبة مع المسافرين المنتظرين.
و ما عارف اركب شنو. لكن بس البتذكروا إنه قالوا لي ما تركب التكسي لانه غالي.
سالت واحد إيطالي كان واقف:
- لو سمحت و ين الباص البيمشي الفاتيكان؟
- اها فاتيكانو؟ هنااااك في نهاية المبنى.
لا حول و لا قوة إلا بالله تاني حامشي و اجر شنطي؟
المسافة بعيدة إمكن تجي 300 و لا 250 متر. و كمان الجو بارد و انا عطشان؟.
سحبت الشنط وراي (زي ما المصارع لما يجر مصارع ...حاجة كده بدون نفس)..
.... و مشينت حتى نهاية المبنى كما قال لي الراجل.
القرين: يا محمد احسن تشتري ليك موية قبل ما تركب الباص.
نظرت إليه شذراً
القرين: .....مالك تعاين لي؟ مش قلت عطشان؟
- كلامك صاح . ...لكن من الموية نلقاها وين .....و نحن طلعنا من الكافتريا؟
القرين: اهي ديك ماكينة اتوماتيكية للعصير و الموية و الشاي و القهوة و كل حاجة.
مشينا عليها. لكن شكلها كده معقد ...و ما قدرت أفهم فيها اي حاجة .
لقيت واحد جاء واحد ماشي ساهي جنبي طوالي سألتوا بالإنجليزي:
ضحك و قال ليك
-الاخ سوداني؟
-ايوا.....و إنت؟
- جزائري. بس قاعد في لندن و بعرف السودانيين.( تذكرت جميلة بوحيرد و بن بيلا و هواري بومدين و الشاذلي بن جديد ز..و وردة)
حاول الجزائري في الحصول على الموية من المكنة .زو حاول و لكن دون فائدة...
انتظرت شوية جنب المكنة( زي الزول القاعد جنب الشرك) .
بعد شوية جو مجموعة من اربعة خواجات غير إيطاليين..
......اقتحمتهم على طول: لو سمحتوا ممكن تنزلوا لي موية من الماكينةدي؟
لكن هم ايضا فشلوا.
في الاخير جاء واحد مصري حاول شوية كده و في الآخر نزل لي الموية من المكنة الاتوماتيكية.
شكرا شكرا
قعدت في المصطبة و حالتي يرثى لها.
| |
|
|
|
|
|
|
| |
محمد عبد الله الحسين
مني عمسيب
ملهم كردفان
Ahmed Yassin
aosman
محمد جبره
الأمين عبد الرحمن عيسى
Munir
متوكل حسن
MOHAMMED ELSHEIKH
فيس بوك
تويتر
انستقرام
يوتيوب
بنتيريست