سلام عليكم جميعا يمكن يكون البعض لاحظ لانو انا جديدة بينكم رغم انى قارئة ومتابعة لهذا المنبر منذ زمن بعيد وأحيانا كنت أشارك من خلال الفيس بوك ،بعد بقيت عضوة ومشكور المهندس بكرى قلت مافى داعى ادخل بالتقليد المتبع وأقول رحبوا بى والخ قلت ادخل بهدوء ولا قولو اتسلل وأحاول اجد لى مكان بينكم وبقيت اقرا واتابع بى حذر وتداخلت فى بعض المواضيع وتشجعت وفتحت كم بوست لكن لاحظت انو التجاوب معاى والمشاركة لى ضعيفة وحتى مداخلاتى بتكون محل شك زى بوست احد الأخوة الذى تحدث فيه عن اغنية قلبى المن نشوهو ، رغم صحة تفسيرى لم يأخذ به سيد البوست ولا السادة المتداخلين ولجأ احدهم الى استاذنا الكابلى الذى اثبت انو تفسيرى صحيح الكلام ده كلو قلت لانى لاحظتا لانو الناس متكتله وعاملا لوبيز يعنى ما بتعرف زول مهما كان موضوعك مافى زول بيشتغل بيك ولا بى البوست الفتحتو لاحظت ايضا غياب المنطق فى بعض الأحيان والتطبيل فى غير محلو الحقيقة قلت اسمع رأيكم ويكون مدخل تانى لى معاكم
07-06-2017, 11:21 AM
معاوية المدير
معاوية المدير
تاريخ التسجيل: 03-24-2009
مجموع المشاركات: 14411
أميرة حسين حبابك ألف . كيف يكون الزول غريب وسط أهلو !، سيبك من مسألة التكتل دي وعدم إهتمام البعض بالمداخلآت فنحن لا نعلم ظروف البعض . عيشي في الحوش دا كأنِك في بيتكم وِ أتونسي بكل أريحية .
مرحبتين حبابك يا أميرة وسط أهلك ...
07-06-2017, 11:45 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
الاخت اميره - سلام عليكم الترحيب من عضو اجد لى عضو جديد ... انا من منتسب للمنبر فى 2017 وبحاول ببوستات ومداخلات .. وزى مافال ليك الاخ معاويه اعتبرى نفسك بين اهلك وفى بيتك والناس انواع ...... فى البرد عليك وبموضوعيه .......وفى البنسى يرد .......وفى البرد على على العنوان مش على المضمون ...وفى ناس الونسه الظراف المهم المنبر مجتمع ثرى باهله وسودان اسفيرى....والواحد بيستفيد من البيتفق معاهو ومن البيختلف معاهو ....وحتى من مجرد المتابعه دون حوار مرحب بيك
07-06-2017, 12:08 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
تحياتي أميرة .. إنتي أصلا حساسة شوية .. وعشان جديدة هنا اتحسستي أكتر .. يا اختي خشي طوالي وعادي جدا .. إنتي بين اهلك وناسك .. وازيلي كل الحواجز من امامك .. وخلي البساط أحمدي .. بعد فترة حتلقي نفسك من أهل الدار .. وبترحبي بالقادمين الجدد ..
بعدين عحبني جدا استخدامك لاغنية أبو الزوز في التعبير .. وعفصتيني في الحتة الفي الشمال وانتي لا تدري .. ههههههه .. منورة اميرة ..
بقيت ظالم عديل كده يا أميرة .. كتير علينا والله ..
07-06-2017, 01:39 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
سلام يا اللميرة بت الحسين شككتينى فى روحى .. فى بوست هوى البنات اذكر انك شاركت بفعالية خاصة و بدايتو كانت اغنية قلبى المنشوهو و اذكر تماماّ جانى احساس انك كابلية حتى النخاع ح ارجع للبوست ده و اشوفو .. لو لقيت نفسى متلّوم معاك بجيك راجع بالاعتذار عموما ما تتحسّسى من موضوع المشاركات ده .. براها بتجى .. و طوعاً وليس كرها
07-06-2017, 03:04 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
سلام حاتم الشبكة معاكسانى كل ما أكتب تقطع ، يعنى ما لاحظت انو انا زوله ماشه جنب الحيطة لسه ما بقدر اعترض وما اتفق الما بوافقنى ما بقرب منو شكرًا على تشجيعك الجميل
07-06-2017, 02:28 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
(آه لو كنت معى نختال عبره بشراع تسبح الأنجم اثره حيث يروى الموج فى أرخم نبره حلم ليل من ليالى كليوباترا آه آه ...... يرددها كابلى مرات فما تدرى أتعجب بالأداء والاهات ، ولا تتحسر بأنك لم تكن معه تختال عبره لك التجلة استاذ الكابلى وانت تمتعنا وتعلمنا بفن راقي رصين )
وهذا نموذج لمشاركات أميره فألف مرحبا بها ..
07-06-2017, 05:51 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
برضو جديد موديل السنة اول بوست لي وبعد اول مداخلة متخيل الناس تجي و تعلًق و كدا و بقيت انزل في مداخلاتي و هي عبار عن صوَر و كلما البوست ينزل شوية اديها مداخلة لمن كمَلت الكوتة بتاعتي اظن في اقل من ساعة و شايف البوست ينزل حبة حبة لآخر الصفحة و انا في حسرة وحاتك مافي زول جا و زي ما قالوا الاخوان اعتبري نفسك في بيتك والناس اخوانك و اخدي الامور ببساطة
07-06-2017, 02:40 PM
ناصر حسين محمد
ناصر حسين محمد
تاريخ التسجيل: 01-09-2013
مجموع المشاركات: 5233
ما عندك موضوع يا أميرة ! انت من زمن دا رد علي ودا دخل لي وداك طنشني و الكلام الكتير وناس يا شفيف و يا وريف و لك الود وبتاع!! دا كان زماااان أيّأم البورد لسّة بدوّر بالجاز و النت بالدايل أب دا زمن اللايك و الريآكت والـ ثمب أب وكان بالغت وش ضاحك وخلاص
07-06-2017, 04:56 PM
ياسر السر
ياسر السر
تاريخ التسجيل: 08-06-2010
مجموع المشاركات: 3204
مرحبتين حبابك واليوم السعيد الليلة جابك .... اولا عصرتي علينا شديد باغنية المرحوم العندليب زيدان ابراهيم لكن برضو ليك الحق علينا .. وفعلا اختي اميرة هناك بعض التكتلات وهي نابعه من معرفة بعض لبعض منز مدة طويلة رغما عن انها قد تكون معرفة اسافير فقط وليس معرفة شخصية ولكن يغلب عليها الالفة والمودة وعن نفسي اعتزر لك عن عدم الترحيب بك مسبقا ولكن كا قال من سبقوني انتي شاركي وستجدي نفسك بمرور الزمن اصبحتي عضوة قديمة ولك ايضا اصحاب ومناوئين ازا وجدو فلا تجعلي هزا الشي يؤثر عليك وعلى نفسياتك فهي مرحلة ستزول بكثرة مشاركاتك وكثرة تعودك على البوست وعلى ما يدور هنا في المنبر العام بصورة عامة فارجو ان تسامحي الجميع وتجعلى شخصك احد افراد البيت بدون حواجز وقيود واكيد ستعيشين كفرد منا وفينا واكيد لك العتبى حتى ترضي ... وقد اعجبني مشاركتك في بوست اغنية الدكتور الكابلي فقد اجدتي المداخلة ولكن نسبة لانشغالي في تلك الايام فلم ادخل واشارك في البوست ولكن لي عودة له ولك .. والف مرحب بك مرة اخرى وارجو ان تتقبلي اعتزاري نيابة عن نفسي وعن اخوتي واخواتي هنا ....
تحياتي : ياسر العيلفون ........
07-06-2017, 05:32 PM
حيدر حسن ميرغني
حيدر حسن ميرغني
تاريخ التسجيل: 04-19-2005
مجموع المشاركات: 24986
الف مرحب يا اميرة وكلامك في محله كلنا هنا دخلنا بفردة رِجِل وتحسسنا طريقنا وسط السناير ولسه بنتعلم منهم رغم قِدم العضوية المنبر يسع الجميع كان النفوس عامرة بالمحبة واحترام الرأي والرأي الآخر ان شاء الله يطيب ليك المقام ونسعد بوجودك
07-06-2017, 05:55 PM
الفاتح ميرغني
الفاتح ميرغني
تاريخ التسجيل: 03-01-2007
مجموع المشاركات: 7488
أكتبوا فان كتاباتكم هي ارواح أنفاسكم الزكية. جدعنة مني عاوز انسب الكلام ده لي جبران! عنوان البوست مثير للشجن وينم عن احساس جميل وذوّاق! الف مرحب بيك في البورد.
محبتي
07-06-2017, 06:35 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
شكرًا ياسر العيلفون انا ما قصدت الترحيب بى بالطريقة الروتينية البتحصل لما يجى عضو جديد ويكتب انا جديد. رحبوا انا دخلت بهدوء وكتبت فى البوست ، لكن التفاعل عموما ماكان مشجع ، وانا ما شايلة فى نفسى لكن مجرد خواطر دارت بخلدى شكرًا على كل كلامك الراقى
07-06-2017, 06:18 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
محمد البشرى عندى موضوع واهو قلتو وجيتو رديتو على الوريف والشفيف من غير مناسبة مافى ليها داعى اما الوشوش أعوذ بالله منها انا داير اكتب عشان الناس ترد على بالكتابة وده ما لمجرد النضمى الفارغ الممكن نرد عليهو بى وش وجفاف
07-06-2017, 06:00 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
سلامات الأخت الفاضلة أميرا حسين مرحب بيكي في البورد وفي دارك ووسط اهلك اكتب حتي لو ما رد عليكي اي عضو عضوة من من المنبر اكتبي يا اختي الفاضلة انتي تكتبي للناس عامة اكتبي حتي لو ما رد عليكي أحد
07-06-2017, 06:49 PM
عبدالعظيم عثمان
عبدالعظيم عثمان
تاريخ التسجيل: 06-29-2006
مجموع المشاركات: 8399
خشي ساي وشوتي ضفاري وما تخافي الحبة دي ما بتجيك ... كلامك صح المنبر دا فيه شليليات وفيه أولاد مصارين بيض (ديل ما تعملي ليهم موضوع) وفيه من كل جنس ونوع .. يعني حيلاقيك العاوز نفخ (أوعك تنفخيه) أدي علي رأسه إذا كلامه ما عجبك ... وحتلاقي العاوز يتونس وفيه الماعندة موضوع ... وفيه المجنتر "جنترة أسافير" وفيه العكليتة ..
07-06-2017, 07:23 PM
عرفات حسين
عرفات حسين
تاريخ التسجيل: 02-22-2013
مجموع المشاركات: 2783
اميرة حسين اولا مرحبا وهلا هلا.. وزي ما قالت ليك نعمات انا كنت مفتكرة انك عضوة من زمان وما عضوة جديدة لان الاعضاء الجدد دائما بيدخلوا في اول بوست يطلبون الترحيب...يعني تكتبي بوست بعنوان" عضوة جديدة فهل من مرحب"... وانا ذاتي عضوة جديدة ولكني كنت بكتب من منازلهم في بوستات اميرة السيد التي غادرت المنبر لاسبابها المعروفة ...وبوستات بسمات بت عطبرة... ونتمنى لك اقامة طيبة وسط اهلك وزملائك في المنبر العام...ونرجو ان تكوني صبورة وتستحملي بعض من تعلقات ربما لا تعجبك من البعض الذين سيحاولون منعك من التعبير عن نفسك ..كما فعل بي عضو من اول بوست شاركت فيه باسمي....مع انه لم يقرا لي اي شئ من قبل.... لكني استمريت وخشنت جلدي شوية لان المنبر العام في هذا الموقع الاسفيري الرائع به الكثيرين من المبدعين والرائعين ،، وسخافات القلة قليلة جدا جدا... مع وافر الاحترام
07-06-2017, 10:56 PM
محمد عوض احمد
محمد عوض احمد
تاريخ التسجيل: 01-17-2013
مجموع المشاركات: 197
اتفق معاك يا اخت اميرة والحاجة دى محبطة جداً انتقائية فى الردود, وتكتلات, اعتقد انو الناس بتعاين لأسم الكاتب منو, قبل البدء فى مطالعة الموضوع غايتو الزول الا يجرب حظو فى الكاريكتير لأنو بيكون فى وش المنبر
07-07-2017, 00:35 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
اهلًا محمد عوض ويسرنى انى القاك هنا بعد ان سعدت بقراء كتاباتك عن الشاعر محمد المهدى مجذوب وكانت مداخلاتى ليك عبر الفيس بوك ، ده اللاحظتو منذ دخولى لذلك فتحت هذا البوست لكيلا استسلم للاحباط . معا من اجل التفاؤل والبعد عن كل ماهو محبط
07-09-2017, 10:39 AM
محمد عوض احمد
محمد عوض احمد
تاريخ التسجيل: 01-17-2013
مجموع المشاركات: 197
اهلًا امتثال سعيدة بيك وكم تمنيت ان اجد أميرة وبسمات كنت معجبة ببوست مقتل جون كنيدى ومتابعاهو. ........قصدت انى ادخل بهدوء ومن خلال ما اكتب اقدم نفسى لكن ! المهم انا حاعمل بنصحك وأكون اكتر من صبورة و واضح جدا وجود الرائعين والمبدعين
07-07-2017, 00:13 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
على محمد على انا محبه للموسيقى والغنا سماعى سوناتا يا اما ألنوتة الموسيقية للمقطوعة او القالب الذى تصاغ فيه المقطوعة لكن ما بعرف فيها كاونتربوينت ولا اجتهاد منى يمكن يكون فيها اذا كان معناهو الطباق والله أعلم سوناتا المتأكدة منها هى ماركة عربية
07-07-2017, 01:05 AM
على محمد على بشير
على محمد على بشير
تاريخ التسجيل: 08-07-2005
مجموع المشاركات: 8648
Quote: على محمد على انا محبه للموسيقى والغنا سماعى سوناتا يا اما ألنوتة الموسيقية للمقطوعة او القالب الذى تصاغ فيه المقطوعة لكن ما بعرف فيها كاونتربوينت ولا اجتهاد منى يمكن يكون فيها اذا كان معناهو الطباق والله أعلم سوناتا المتأكدة منها هى ماركة عربية
معقوله لكن يا اميره بت الحسين
فى صراع موسيقى دائر ليهو حوالى السبعه شهور فى انو هل السوناتا فيها كاونتر بوينت ولا ما فيها
موسيقارنا الجميل الموصلى قال تنضح اخونا حاتم ابراهيم قال ما فيها التكتح
الأخت أميرة أهلباً و سهلاً اعتقد بوستك ده ذكي جدا. ذكي لأنه بيحمل معاني الخوف و الحذر. و في نفس الوقت النقد و الرأي. و طبعا كمية الناس الدخلوا ليك بيكون اداك تطمين شوية. و بعد داك حسب مزاجك و اختيارات و تفضيلاتك حتختاري الشلة البتناسبك. لأنه زي ما قلتي في شلليات. و طبعا حكاية الشلليات ده شيء طبيعي و مهم. مهم للاستقواء و الحماية و السند. لأنه الإنسان بيحتاج للتكتل .ليه؟ عشان محتاج للمؤازرة و اللايكات و الدعم (في الحرب و السلم). و كمان محتاج لإشباع حاجته للإعجاب من الآخرين. لغاية هنا كفاية بري. يلا... ادخلي المنبر بسلام آمنين و ألف مرحب و مرحب
07-07-2017, 10:12 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
محمد عبد الله الحسين قامت عليك غيرة ناس المنابر مالك على ؟ انا مستمتعة بكل المداخلات الجميلة وبالجد طمنتنى كتير ومن ناحية الدخول انا دخلت بدرى مشكور وليك منى تحية ملحوظة :كلمتين ما بحبهم برى وشمار
07-07-2017, 10:04 AM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
على محمد على بشير البوست شوفتو لكن شهرا ما ليك فى نفقة ما تعد أيامو دخلت لما لقيت روحى ما فاهمة شى وقفت اقرا شوبان من أعلام الموسيقى فى العالم وبتمنى اعرف المزيد عنو من باب الثقافة وكده
الأخت الفاضلة أميرة لك الود والتحايا الطيبات أولاً وقبل كل شئ أقول حبابك وحباب الجابك ويجيب عقابك .... ثانياً والله لاحظت وجودك في المنبر وتداخلنا معاً على ما أعتقد في أكثر من موضوع .... ثالثاً سنلتقي كثيراً بإذن الله حسب إهتمامتك التي قدرتها .... رابعاً في بوست الكابلي راس السوط وصلني .... أكتبي وانشري كتاباتك في المنبر دون أن يكون هدفك التعليق من قبل الآخرين .... مرة أخرى لك ودي وولك تحياتي ....
07-07-2017, 06:36 PM
Amira Hussien
Amira Hussien
تاريخ التسجيل: 11-26-2016
مجموع المشاركات: 1716
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة