سلام عليكم جميعا يمكن يكون البعض لاحظ لانو انا جديدة بينكم رغم انى قارئة ومتابعة لهذا المنبر منذ زمن بعيد وأحيانا كنت أشارك من خلال الفيس بوك ،بعد بقيت عضوة ومشكور المهندس بكرى قلت مافى داعى ادخل بالتقليد المتبع وأقول رحبوا بى والخ قلت ادخل بهدوء ولا قولو اتسلل وأحاول اجد لى مكان بينكم وبقيت اقرا واتابع بى حذر وتداخلت فى بعض المواضيع وتشجعت وفتحت كم بوست لكن لاحظت انو التجاوب معاى والمشاركة لى ضعيفة وحتى مداخلاتى بتكون محل شك زى بوست احد الأخوة الذى تحدث فيه عن اغنية قلبى المن نشوهو ، رغم صحة تفسيرى لم يأخذ به سيد البوست ولا السادة المتداخلين ولجأ احدهم الى استاذنا الكابلى الذى اثبت انو تفسيرى صحيح الكلام ده كلو قلت لانى لاحظتا لانو الناس متكتله وعاملا لوبيز يعنى ما بتعرف زول مهما كان موضوعك مافى زول بيشتغل بيك ولا بى البوست الفتحتو لاحظت ايضا غياب المنطق فى بعض الأحيان والتطبيل فى غير محلو الحقيقة قلت اسمع رأيكم ويكون مدخل تانى لى معاكم
Post: #2 Title: Re: غريب انا غير أهل Author: معاوية المدير Date: 07-06-2017, 11:21 AM Parent: #1
أميرة حسين حبابك ألف . كيف يكون الزول غريب وسط أهلو !، سيبك من مسألة التكتل دي وعدم إهتمام البعض بالمداخلآت فنحن لا نعلم ظروف البعض . عيشي في الحوش دا كأنِك في بيتكم وِ أتونسي بكل أريحية .
مرحبتين حبابك يا أميرة وسط أهلك ...
Post: #3 Title: Re: غريب انا غير أهل Author: Amira Hussien Date: 07-06-2017, 11:45 AM Parent: #2
شكرًا معاوية المدير كلامك مريح وأتمنى أكون بين عز الأهل وطيب الخوة ان شاء الله اعمل بى نصيحتك
Post: #4 Title: Re: غريب انا غير أهل Author: Asim Ali Date: 07-06-2017, 11:59 AM Parent: #3
الاخت اميره - سلام عليكم الترحيب من عضو اجد لى عضو جديد ... انا من منتسب للمنبر فى 2017 وبحاول ببوستات ومداخلات .. وزى مافال ليك الاخ معاويه اعتبرى نفسك بين اهلك وفى بيتك والناس انواع ...... فى البرد عليك وبموضوعيه .......وفى البنسى يرد .......وفى البرد على على العنوان مش على المضمون ...وفى ناس الونسه الظراف المهم المنبر مجتمع ثرى باهله وسودان اسفيرى....والواحد بيستفيد من البيتفق معاهو ومن البيختلف معاهو ....وحتى من مجرد المتابعه دون حوار مرحب بيك
Post: #5 Title: Re: غريب انا غير أهل Author: Amira Hussien Date: 07-06-2017, 12:08 PM Parent: #4
Post: #6 Title: Re: غريب انا غير أهل Author: جمال ود القوز Date: 07-06-2017, 12:57 PM Parent: #5
تحياتي أميرة .. إنتي أصلا حساسة شوية .. وعشان جديدة هنا اتحسستي أكتر .. يا اختي خشي طوالي وعادي جدا .. إنتي بين اهلك وناسك .. وازيلي كل الحواجز من امامك .. وخلي البساط أحمدي .. بعد فترة حتلقي نفسك من أهل الدار .. وبترحبي بالقادمين الجدد ..
بعدين عحبني جدا استخدامك لاغنية أبو الزوز في التعبير .. وعفصتيني في الحتة الفي الشمال وانتي لا تدري .. ههههههه .. منورة اميرة ..
بقيت ظالم عديل كده يا أميرة .. كتير علينا والله ..
Post: #7 Title: Re: غريب انا غير أهل Author: Amira Hussien Date: 07-06-2017, 01:39 PM Parent: #6
اهلًا ود القوز وانت من الأسماء المعروفة بالنسبة لى شكرًا وسعدت لسعادتك
Post: #9 Title: Re: غريب انا غير أهل Author: جلالدونا Date: 07-06-2017, 02:12 PM Parent: #7
سلام يا اللميرة بت الحسين شككتينى فى روحى .. فى بوست هوى البنات اذكر انك شاركت بفعالية خاصة و بدايتو كانت اغنية قلبى المنشوهو و اذكر تماماّ جانى احساس انك كابلية حتى النخاع ح ارجع للبوست ده و اشوفو .. لو لقيت نفسى متلّوم معاك بجيك راجع بالاعتذار عموما ما تتحسّسى من موضوع المشاركات ده .. براها بتجى .. و طوعاً وليس كرها
Post: #15 Title: Re: غريب انا غير أهل Author: Amira Hussien Date: 07-06-2017, 03:04 PM Parent: #9
متذكراك جلادونا واقول ليك كمان بعرفك من زماااان وحاشاك اللوم وانا ما لأئمة لكنه مجرد عتاب
Post: #32 Title: Re: غريب انا غير أهل Author: عزالدين عباس الفحل Date: 07-06-2017, 06:32 PM Parent: #9
Post: #39 Title: Re: غريب انا غير أهل Author: Amira Hussien Date: 07-06-2017, 09:04 PM Parent: #32
ان شاء الله عز الدين الفحل بفضل تشجيعكم مشكور كتير
Post: #8 Title: Re: غريب انا غير أهل Author: نعمات عماد Date: 07-06-2017, 01:57 PM Parent: #1
اهلا باميرة ما شاء الله دخلتي بثقة افتكرتك
من 2002 . اسمحي لي ارحب ايضا بعاصم علي المتألق .
Post: #10 Title: Re: غريب انا غير أهل Author: Hatim Alhwary Date: 07-06-2017, 02:22 PM Parent: #8
Quote: ويكون مدخل تانى لى معاكم
مساء الخير
من ناحية في مداخل تانية اكيد في
كدي جربي تكتيك..."انا اعترض"..."والكلام دا ماصاح" ..." ولا اتفق معك جملة وتفصيلا" :)
كدي جربي ونشوف
مرحب حبابك
Post: #22 Title: Re: غريب انا غير أهل Author: Amira Hussien Date: 07-06-2017, 05:58 PM Parent: #10
سلام حاتم الشبكة معاكسانى كل ما أكتب تقطع ، يعنى ما لاحظت انو انا زوله ماشه جنب الحيطة لسه ما بقدر اعترض وما اتفق الما بوافقنى ما بقرب منو شكرًا على تشجيعك الجميل
Post: #11 Title: Re: غريب انا غير أهل Author: محمد المرتضى حامد Date: 07-06-2017, 02:28 PM Parent: #8
(آه لو كنت معى نختال عبره بشراع تسبح الأنجم اثره حيث يروى الموج فى أرخم نبره حلم ليل من ليالى كليوباترا آه آه ...... يرددها كابلى مرات فما تدرى أتعجب بالأداء والاهات ، ولا تتحسر بأنك لم تكن معه تختال عبره لك التجلة استاذ الكابلى وانت تمتعنا وتعلمنا بفن راقي رصين )
وهذا نموذج لمشاركات أميره فألف مرحبا بها ..
Post: #20 Title: Re: غريب انا غير أهل Author: Amira Hussien Date: 07-06-2017, 05:51 PM Parent: #11
اهلًا محمد المرتضى حامد سعيدة جدا بى مداخلتك وانا بقرا ليك من زمان ايضا افتقدت السنة دى بوست شهداء ٢٨ رمضان
Post: #12 Title: Re: غريب انا غير أهل Author: Nasser Amin Date: 07-06-2017, 02:37 PM Parent: #8
الاخت اميرة سلامات و حبابك
برضو جديد موديل السنة اول بوست لي وبعد اول مداخلة متخيل الناس تجي و تعلًق و كدا و بقيت انزل في مداخلاتي و هي عبار عن صوَر و كلما البوست ينزل شوية اديها مداخلة لمن كمَلت الكوتة بتاعتي اظن في اقل من ساعة و شايف البوست ينزل حبة حبة لآخر الصفحة و انا في حسرة وحاتك مافي زول جا و زي ما قالوا الاخوان اعتبري نفسك في بيتك والناس اخوانك و اخدي الامور ببساطة
Post: #13 Title: Re: غريب انا غير أهل Author: ناصر حسين محمد Date: 07-06-2017, 02:40 PM Parent: #12
سلام أميرة
بصراحة ناس هنا ديل بتاعين (شو) وراكبين موجة انهم الادرى طالما هم الاقدم
اتجاوزيهم وشوتي ضفاري
الهدف هو المحاولة للكتابة في اهتمامتنا بغض الانظر عن من رد ومن عقب المهم تكتبي بدون التوقف وانتظار كلمة ثناء او انتقاد
Post: #14 Title: Re: غريب انا غير أهل Author: عرفات حسين Date: 07-06-2017, 02:52 PM Parent: #13
؟
Post: #26 Title: Re: غريب انا غير أهل Author: Amira Hussien Date: 07-06-2017, 06:11 PM Parent: #14
عرفات حسين لك الف تحية ولو قلت ليك اغنية زانت جيد البوست شكرًا
Post: #25 Title: Re: غريب انا غير أهل Author: Amira Hussien Date: 07-06-2017, 06:08 PM Parent: #13
عليك السلام ناصر حسين ايوا المهم الكتابة
Post: #24 Title: Re: غريب انا غير أهل Author: Amira Hussien Date: 07-06-2017, 06:05 PM Parent: #12
ناصر امين اهلًا وسهلا الحقيقة انا قلت عشان احس بالراحة أقول الفى نفسى وما تبقى القصة عقدة وما اقدر اتجاوزا
Post: #16 Title: Re: غريب انا غير أهل Author: Amira Hussien Date: 07-06-2017, 03:32 PM Parent: #8
Post: #17 Title: Re: غريب انا غير أهل Author: محمد البشرى الخضر Date: 07-06-2017, 04:08 PM Parent: #16
ما عندك موضوع يا أميرة ! انت من زمن دا رد علي ودا دخل لي وداك طنشني و الكلام الكتير وناس يا شفيف و يا وريف و لك الود وبتاع!! دا كان زماااان أيّأم البورد لسّة بدوّر بالجاز و النت بالدايل أب دا زمن اللايك و الريآكت والـ ثمب أب وكان بالغت وش ضاحك وخلاص
Post: #18 Title: Re: غريب انا غير أهل Author: ياسر السر Date: 07-06-2017, 04:56 PM Parent: #17
مرحبتين حبابك واليوم السعيد الليلة جابك .... اولا عصرتي علينا شديد باغنية المرحوم العندليب زيدان ابراهيم لكن برضو ليك الحق علينا .. وفعلا اختي اميرة هناك بعض التكتلات وهي نابعه من معرفة بعض لبعض منز مدة طويلة رغما عن انها قد تكون معرفة اسافير فقط وليس معرفة شخصية ولكن يغلب عليها الالفة والمودة وعن نفسي اعتزر لك عن عدم الترحيب بك مسبقا ولكن كا قال من سبقوني انتي شاركي وستجدي نفسك بمرور الزمن اصبحتي عضوة قديمة ولك ايضا اصحاب ومناوئين ازا وجدو فلا تجعلي هزا الشي يؤثر عليك وعلى نفسياتك فهي مرحلة ستزول بكثرة مشاركاتك وكثرة تعودك على البوست وعلى ما يدور هنا في المنبر العام بصورة عامة فارجو ان تسامحي الجميع وتجعلى شخصك احد افراد البيت بدون حواجز وقيود واكيد ستعيشين كفرد منا وفينا واكيد لك العتبى حتى ترضي ... وقد اعجبني مشاركتك في بوست اغنية الدكتور الكابلي فقد اجدتي المداخلة ولكن نسبة لانشغالي في تلك الايام فلم ادخل واشارك في البوست ولكن لي عودة له ولك .. والف مرحب بك مرة اخرى وارجو ان تتقبلي اعتزاري نيابة عن نفسي وعن اخوتي واخواتي هنا ....
تحياتي : ياسر العيلفون ........
Post: #19 Title: Re: غريب انا غير أهل Author: حيدر حسن ميرغني Date: 07-06-2017, 05:32 PM Parent: #18
الف مرحب يا اميرة وكلامك في محله كلنا هنا دخلنا بفردة رِجِل وتحسسنا طريقنا وسط السناير ولسه بنتعلم منهم رغم قِدم العضوية المنبر يسع الجميع كان النفوس عامرة بالمحبة واحترام الرأي والرأي الآخر ان شاء الله يطيب ليك المقام ونسعد بوجودك
Post: #21 Title: Re: غريب انا غير أهل Author: الفاتح ميرغني Date: 07-06-2017, 05:55 PM Parent: #19
أكتبوا فان كتاباتكم هي ارواح أنفاسكم الزكية. جدعنة مني عاوز انسب الكلام ده لي جبران! عنوان البوست مثير للشجن وينم عن احساس جميل وذوّاق! الف مرحب بيك في البورد.
محبتي
Post: #33 Title: Re: غريب انا غير أهل Author: Amira Hussien Date: 07-06-2017, 06:35 PM Parent: #21
Post: #29 Title: Re: غريب انا غير أهل Author: Amira Hussien Date: 07-06-2017, 06:25 PM Parent: #18
شكرًا ياسر العيلفون انا ما قصدت الترحيب بى بالطريقة الروتينية البتحصل لما يجى عضو جديد ويكتب انا جديد. رحبوا انا دخلت بهدوء وكتبت فى البوست ، لكن التفاعل عموما ماكان مشجع ، وانا ما شايلة فى نفسى لكن مجرد خواطر دارت بخلدى شكرًا على كل كلامك الراقى
Post: #27 Title: Re: غريب انا غير أهل Author: Amira Hussien Date: 07-06-2017, 06:18 PM Parent: #17
محمد البشرى عندى موضوع واهو قلتو وجيتو رديتو على الوريف والشفيف من غير مناسبة مافى ليها داعى اما الوشوش أعوذ بالله منها انا داير اكتب عشان الناس ترد على بالكتابة وده ما لمجرد النضمى الفارغ الممكن نرد عليهو بى وش وجفاف
Post: #23 Title: Re: غريب انا غير أهل Author: Amira Hussien Date: 07-06-2017, 06:00 PM Parent: #8
نعمات رديت ليك مما قريت مداخلتك بتلقي ردى مشى مكان اخر لكن ما بعيد
Post: #28 Title: Re: غريب انا غير أهل Author: Deng Date: 07-06-2017, 06:18 PM Parent: #23
الأخت أميرة حسين.
مرحب بك في المنبر.
أتمنى لك أقامة طيبة.
Post: #30 Title: Re: غريب انا غير أهل Author: Amira Hussien Date: 07-06-2017, 06:27 PM Parent: #28
شكرًا دينج ايضا انت ممن أعرفهم من زمن
Post: #34 Title: Re: غريب انا غير أهل Author: محمد نور عودو Date: 07-06-2017, 06:47 PM Parent: #30
سلامات الأخت الفاضلة أميرا حسين مرحب بيكي في البورد وفي دارك ووسط اهلك اكتب حتي لو ما رد عليكي اي عضو عضوة من من المنبر اكتبي يا اختي الفاضلة انتي تكتبي للناس عامة اكتبي حتي لو ما رد عليكي أحد
Post: #35 Title: Re: غريب انا غير أهل Author: عبدالعظيم عثمان Date: 07-06-2017, 06:49 PM Parent: #30
سلامات أميرة
مرحب بيك
خشي ساي وشوتي ضفاري وما تخافي الحبة دي ما بتجيك ... كلامك صح المنبر دا فيه شليليات وفيه أولاد مصارين بيض (ديل ما تعملي ليهم موضوع) وفيه من كل جنس ونوع .. يعني حيلاقيك العاوز نفخ (أوعك تنفخيه) أدي علي رأسه إذا كلامه ما عجبك ... وحتلاقي العاوز يتونس وفيه الماعندة موضوع ... وفيه المجنتر "جنترة أسافير" وفيه العكليتة ..
Post: #36 Title: Re: غريب انا غير أهل Author: عرفات حسين Date: 07-06-2017, 07:23 PM Parent: #35
عندك خيار وفقوس
Post: #37 Title: Re: غريب انا غير أهل Author: علي دفع الله Date: 07-06-2017, 08:59 PM Parent: #36
Quote: غريب انا غير اهل
عنوان البوست ينفع اغنية للفنان الاسمو مصطفى مضوي 😂
الف مرحب بيك يا اميرة .. زي ما قالوا ليك اكتبي المقتنعة بيه حتما ستجدي من يقراء ما كتبتيه .. تحياتي
Post: #44 Title: Re: غريب انا غير أهل Author: Amira Hussien Date: 07-07-2017, 00:17 AM Parent: #37
شكرًا على دفع الله حتما سأكتب طالما أحطت بكل هذا الشعور الطيب
Post: #38 Title: Re: غريب انا غير أهل Author: Amira Hussien Date: 07-06-2017, 09:02 PM Parent: #36
Re: غريب انا غير أهل (Re: عرفات حسين)عرفات حسين لك الف تحية ولو قلت ليك اغنية زانت جيد البوست شكرًا
Post: #40 Title: Re: غريب انا غير أهل Author: امتثال عبدالله Date: 07-06-2017, 09:52 PM Parent: #38
اميرة حسين اولا مرحبا وهلا هلا.. وزي ما قالت ليك نعمات انا كنت مفتكرة انك عضوة من زمان وما عضوة جديدة لان الاعضاء الجدد دائما بيدخلوا في اول بوست يطلبون الترحيب...يعني تكتبي بوست بعنوان" عضوة جديدة فهل من مرحب"... وانا ذاتي عضوة جديدة ولكني كنت بكتب من منازلهم في بوستات اميرة السيد التي غادرت المنبر لاسبابها المعروفة ...وبوستات بسمات بت عطبرة... ونتمنى لك اقامة طيبة وسط اهلك وزملائك في المنبر العام...ونرجو ان تكوني صبورة وتستحملي بعض من تعلقات ربما لا تعجبك من البعض الذين سيحاولون منعك من التعبير عن نفسك ..كما فعل بي عضو من اول بوست شاركت فيه باسمي....مع انه لم يقرا لي اي شئ من قبل.... لكني استمريت وخشنت جلدي شوية لان المنبر العام في هذا الموقع الاسفيري الرائع به الكثيرين من المبدعين والرائعين ،، وسخافات القلة قليلة جدا جدا... مع وافر الاحترام
Post: #41 Title: Re: غريب انا غير أهل Author: محمد عوض احمد Date: 07-06-2017, 10:56 PM Parent: #40
اتفق معاك يا اخت اميرة والحاجة دى محبطة جداً انتقائية فى الردود, وتكتلات, اعتقد انو الناس بتعاين لأسم الكاتب منو, قبل البدء فى مطالعة الموضوع غايتو الزول الا يجرب حظو فى الكاريكتير لأنو بيكون فى وش المنبر
Post: #46 Title: Re: غريب انا غير أهل Author: Amira Hussien Date: 07-07-2017, 00:35 AM Parent: #41
اهلًا محمد عوض ويسرنى انى القاك هنا بعد ان سعدت بقراء كتاباتك عن الشاعر محمد المهدى مجذوب وكانت مداخلاتى ليك عبر الفيس بوك ، ده اللاحظتو منذ دخولى لذلك فتحت هذا البوست لكيلا استسلم للاحباط . معا من اجل التفاؤل والبعد عن كل ماهو محبط
Post: #59 Title: Re: غريب انا غير أهل Author: محمد عوض احمد Date: 07-09-2017, 10:39 AM Parent: #46
مرحب بيك من جديد يا اميرة, و ياريت نشوف منك الجديد, طوالى, وبالمناسبة الكلام عن المجذوب عليه رحمة الله لم ينتهى, بعد
Post: #42 Title: Re: غريب انا غير أهل Author: عبدالعزيز الفاضلابى Date: 07-06-2017, 11:04 PM Parent: #40
حباب اللميرة ,, اضافة للمنبر إن شاء الله. اقدلى وسط اخواتك واخوانك ومحل رهيفة تنقد.
Post: #48 Title: Re: غريب انا غير أهل Author: Amira Hussien Date: 07-07-2017, 00:37 AM Parent: #42
ان شاء الله عبد العزيز الفاضلابى أكون عند حسن ظنكم
Post: #45 Title: Re: غريب انا غير أهل Author: Amira Hussien Date: 07-07-2017, 00:28 AM Parent: #40
اهلًا امتثال سعيدة بيك وكم تمنيت ان اجد أميرة وبسمات كنت معجبة ببوست مقتل جون كنيدى ومتابعاهو. ........قصدت انى ادخل بهدوء ومن خلال ما اكتب اقدم نفسى لكن ! المهم انا حاعمل بنصحك وأكون اكتر من صبورة و واضح جدا وجود الرائعين والمبدعين
Post: #43 Title: Re: غريب انا غير أهل Author: Amira Hussien Date: 07-07-2017, 00:13 AM Parent: #36
ليه يا عرفات انا رديت ليك حين قرايتى لى مداخلتك
Post: #47 Title: Re: غريب انا غير أهل Author: على محمد على بشير Date: 07-07-2017, 00:35 AM Parent: #43
شوفى يا اميره بت الحسين
اولا مرحب بيك فى دارك بين اخوانك واخواتك تانيا انا ح اسألك سؤال تجاوبى عليهو وبجيك صادى اشوف الاجابه واقدم ليك بعديها نصائح تخليكى نجمه متوجه فى هذا البورد
السؤال السوناتا فيها كاونتربوينت ولا ما فيها ؟
Post: #49 Title: Re: غريب انا غير أهل Author: Amira Hussien Date: 07-07-2017, 00:53 AM Parent: #47
على محمد على انا محبه للموسيقى والغنا سماعى سوناتا يا اما ألنوتة الموسيقية للمقطوعة او القالب الذى تصاغ فيه المقطوعة لكن ما بعرف فيها كاونتربوينت ولا اجتهاد منى يمكن يكون فيها اذا كان معناهو الطباق والله أعلم سوناتا المتأكدة منها هى ماركة عربية
Post: #50 Title: Re: غريب انا غير أهل Author: على محمد على بشير Date: 07-07-2017, 01:05 AM Parent: #49
Quote: على محمد على انا محبه للموسيقى والغنا سماعى سوناتا يا اما ألنوتة الموسيقية للمقطوعة او القالب الذى تصاغ فيه المقطوعة لكن ما بعرف فيها كاونتربوينت ولا اجتهاد منى يمكن يكون فيها اذا كان معناهو الطباق والله أعلم سوناتا المتأكدة منها هى ماركة عربية
معقوله لكن يا اميره بت الحسين
فى صراع موسيقى دائر ليهو حوالى السبعه شهور فى انو هل السوناتا فيها كاونتر بوينت ولا ما فيها
موسيقارنا الجميل الموصلى قال تنضح اخونا حاتم ابراهيم قال ما فيها التكتح
Post: #51 Title: Re: غريب انا غير أهل Author: عبدالحفيظ ابوسن Date: 07-07-2017, 04:00 AM Parent: #50
مرحب اميرة اوعك تشوتي ضفاري الكتابة مسؤولية والتزام
Post: #52 Title: Re: غريب انا غير أهل Author: محمد عبد الله الحسين Date: 07-07-2017, 05:23 AM Parent: #51
الأخت أميرة أهلباً و سهلاً اعتقد بوستك ده ذكي جدا. ذكي لأنه بيحمل معاني الخوف و الحذر. و في نفس الوقت النقد و الرأي. و طبعا كمية الناس الدخلوا ليك بيكون اداك تطمين شوية. و بعد داك حسب مزاجك و اختيارات و تفضيلاتك حتختاري الشلة البتناسبك. لأنه زي ما قلتي في شلليات. و طبعا حكاية الشلليات ده شيء طبيعي و مهم. مهم للاستقواء و الحماية و السند. لأنه الإنسان بيحتاج للتكتل .ليه؟ عشان محتاج للمؤازرة و اللايكات و الدعم (في الحرب و السلم). و كمان محتاج لإشباع حاجته للإعجاب من الآخرين. لغاية هنا كفاية بري. يلا... ادخلي المنبر بسلام آمنين و ألف مرحب و مرحب
Post: #56 Title: Re: غريب انا غير أهل Author: Amira Hussien Date: 07-07-2017, 10:12 AM Parent: #52
محمد عبد الله الحسين قامت عليك غيرة ناس المنابر مالك على ؟ انا مستمتعة بكل المداخلات الجميلة وبالجد طمنتنى كتير ومن ناحية الدخول انا دخلت بدرى مشكور وليك منى تحية ملحوظة :كلمتين ما بحبهم برى وشمار
Post: #55 Title: Re: غريب انا غير أهل Author: Amira Hussien Date: 07-07-2017, 10:04 AM Parent: #51
نعم ود أبسن الكتابة مسؤولية والتزام شكرًا نصيحتك غالية و جئتك بامتثال صاحبى المتمم كيفى ابراهيم ثبات عقلى ودرقتى وسيفى مطمورة غلاى مونة خريفى وصيفى سترة حالى فى جارى ونساى وضيفى قصرت معاك ونحن ابناء ملوك فى الزمان
Post: #53 Title: Re: غريب انا غير أهل Author: Amira Hussien Date: 07-07-2017, 09:32 AM Parent: #50
على محمد على بشير البوست شوفتو لكن شهرا ما ليك فى نفقة ما تعد أيامو دخلت لما لقيت روحى ما فاهمة شى وقفت اقرا شوبان من أعلام الموسيقى فى العالم وبتمنى اعرف المزيد عنو من باب الثقافة وكده
Post: #54 Title: Re: غريب انا غير أهل Author: Amira Hussien Date: 07-07-2017, 09:56 AM Parent: #35
اهلًا عبد العظيم عثمان كلامك قيم جداً وبيؤيد رأى . ختيتو قدامى وانا ماشه
Post: #57 Title: Re: غريب انا غير أهل Author: بابكر قدور Date: 07-07-2017, 02:43 PM Parent: #54
الأخت الفاضلة أميرة لك الود والتحايا الطيبات أولاً وقبل كل شئ أقول حبابك وحباب الجابك ويجيب عقابك .... ثانياً والله لاحظت وجودك في المنبر وتداخلنا معاً على ما أعتقد في أكثر من موضوع .... ثالثاً سنلتقي كثيراً بإذن الله حسب إهتمامتك التي قدرتها .... رابعاً في بوست الكابلي راس السوط وصلني .... أكتبي وانشري كتاباتك في المنبر دون أن يكون هدفك التعليق من قبل الآخرين .... مرة أخرى لك ودي وولك تحياتي ....
Post: #58 Title: Re: غريب انا غير أهل Author: Amira Hussien Date: 07-07-2017, 06:36 PM Parent: #57
