في واحدة من المرات النادرة التي تتشرف فيها قناة النيل الأزرق بمتابعتي الشخصية، شاهدت واستمعت قبل قليل لبرنامج مساء جديد أستضيفت فيه المطربة مكارم بشير واللخو المتشعبط في الغناء شرف الفحيل أو أيا كانت كنيته وكنت قبل هذا البرنامج سمعت في كثير من الأحايين بمكارم بشير ولأن انطباعي عن الذين يتعاطون الغناء من الشباب غير جيد فلم أستثني مكارم بشير للوهلة الأولي، غير أنني ما لبثت دقيقة واحدة فقط حتى ذاب الانطباع السالب في ذهني وتبدلت الصورة تماما لتحل مكانها فنانة مثقفة واعية .. خفيفة الظل حاضرة البديهة.. صاحبة نكتة وطرفة .. مرتبة واثقة في حضورها المسرحي.. دبلوماسية في ردودها .. ذكية في اختيارها لمفردات تخاطبها .. مكارم بشير بعد أن أثرت البرنامج بالإستكشات والنكات والقفشات .. سحرت الحاضرين بصوت ملائكي عالي التطريب والفخامة والسحر .
ما شاء الله يا ليدي مكارم وبطريقتك دي أقول بكل قلق الأميرة نانسي عجاج في خطر .. خصوصا مع تواضعك وخفة دمك .
02-14-2016, 06:11 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39370
هههههههه تنظير ينظّر كالعادة و تهريف يهرّف بما يعرف وما لا يعرف بوست تحفة مع الملل الحاصل دا و حردة كاسترو للفرمالة أنصح كل من يعاني الارق بمتابعته اهو أخير من صمة الخشم
سلام واحترام للحبيب عاطف عمر منور يا فاضل .. الجهاز بتاعي ما بدعم تنزيل الفيديوهات .. استفيد من تهريف الفوق دا خليهو ينزل لينا أنا وانت الفيدو المقصود بدل ما قاعد يبرطم بكلام الطير في الباقير كدا .
02-14-2016, 07:03 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
لئيم و بتحب الغلاط زي عيونك .... بوستك دا ساعتين واحد دخل فيه مافي ... مداخلة واحدة من المعلم أبو حسين بدأت الوفود تأتي إلى هذه الخرابة .... و حولوها إلى حديقة غناء ,,,,
قوم لف
02-14-2016, 09:15 PM
Salah Habib Salah Habib
تاريخ التسجيل: 02-11-2013
مجموع المشاركات: 451
محمد فضل الله يا حبيب فعلا الليدي مكارم بشير كما إكتشفت متأخرا طروبة جدا وواثقة جدا وحريفة خالص في الإختيار .. دا طبعا إلى جانب مزايا أخري عديدة تجعلها على رأس القائمة بلا منازع . تحياتي يا الحبوب .
تهريف لا حول ولا قوة إلا بالله .. ربنا يهدينا ويهديك .
02-15-2016, 07:51 AM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 11327
طلحة ..الله يجازي محنك إنت البتريدو ده بختو( الليدي). و الما بتريدو ....الله قال بي قولو. بعدين سؤال بريء بخصوص عبارتك: ( فعلا الليدي مكارم بشير كما إكتشفت متأخرا طروبة جدا وواثقة جدا وحريفة خالص في الإختيار .. دا طبعا إلى جانب مزايا أخري )
ما شرحت لينا مزايا أخرى دي. و الا نفسّر برانا؟
02-15-2016, 08:05 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
سلام واحترام لمحمد عبدالله الحسن من المزايا الأخري الثقافة والثقة وخفة الدم والحنك السنين وحسن المظهر وما إلى ذلك من مقومات الفنان . بالمناسبة قبل شوية عثرت في بوست شحمان لليدي مكارم (وانا صدقت كلام الريدة...مكارم بشير يامبدعة ...فيديو.) للأخ عبدالمنعم سيد أحمد .. غلبني أنقل عنونو هنا ... مكارم تستحق والله .
02-15-2016, 08:32 AM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 11327
أتنا شفتها اول أمس بتغني أغنية لصالح الضي فعلا اقتنعت إنها ممتازة بس عايزة شوية إنضباط لأنه مرات بتصرّخ في مناطق صوتية و كأنها دواسة البنزين فلتت منها. و كمان جميلة و أنيقة دي ما قلتها. أما نانسي عجاج فهي فقط ذكية لأنها بتختار من الأغاني ما يناسب صوتها الضعيف التعبان.و كتير من الناس اتخمّوا بي صوتها. لكن ما عندها شيء.إمكن الطلة الجميلة ( مع إنه طلة بعيدة حبتين من الطلة السودانية). تعجبني إنصاف فتحي تقريبا تستطيع أداء معظم الاغاني. أما الباقي..زأسكت ساااكت.
02-15-2016, 11:04 AM
د.محمد بابكر د.محمد بابكر
تاريخ التسجيل: 07-16-2009
مجموع المشاركات: 6614
يا محمد عبدالله كلامك صاح في حكاية سرحانة مع صوتا دي وان كان ما كتير فبالإجمال تمتلك تينور أو مساحة صوت متميزة بما يجعلها عالية التطريب، فضلا عن إنضباط واضح في الأداء وغالبا ما تساعدها مساحة صوتها في أداء أغاني صعبة على الكثيرين .
02-15-2016, 08:01 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
هلا با عباس محمود وزي ما قلتا واضح أن الجبل غني بجينات الفن الغنائي لكن أعتقد أن الليدي مكارم ربما اعتلت القمة بلا منازع .. جرجير ما بعرف حاجة إسمها ما ليهو .. دا ليهو أية حاجة في أية حاجة .. وكان ما مصدقني أفتح بوست عن نواة الذرة واللا أي علوم ح تلقاهو أول من يعتلي المنبر .. دا مخلوق فضائي سوبر .
02-15-2016, 09:19 PM
عزيز عزيز
تاريخ التسجيل: 04-12-2002
مجموع المشاركات: 3290
Quote: يا محمد عبدالله كلامك صاح في حكاية سرحانة مع صوتا دي وان كان ما كتير فبالإجمال تمتلك تينور أو مساحة صوت متميزة بما يجعلها عالية التطريب، فضلا عن إنضباط واضح في الأداء وغالبا ما تساعدها مساحة صوتها في أداء أغاني صعبة على الكثيرين .
مساء الخير اخي طلحة
التينور هو أحد تصنيفات صوت الرجال..ولا توجد إمرأة يصنف صوتها في هذا المجال..
تقبل محبتي وتقديري عبدالعزيز خطاب
02-15-2016, 09:35 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
ول ابا طلحة حبابك يا صديقي ، غايتو في دي ، اكتبني معارض..!
السنة الفاتت يا طلحة ، عمري ما تابعت برنامج اغاني واغاني ، وقام عزيز خطاب القدامك ده فتح بوست تعليمي تنويري عن البرنامج ، والجماهير تشيل وتجوعر ان مكارم بشير حاجة مختلفة ، وعزيز خطاب يشيل ويقول يا اخوانا الزولة دي صحيح عندها امكانيات لكن لغاية الليلة ما لاقية روحها..!! بالطبع صدق عزيز خطاب ، وكذبت الجماهير...!!
خستكت مكارم بشير لمن حاولت تغني غنا سيد خليفة..!! خستكت لمن حاولت تغني غنى ابراهيم حسين..!! خستكت لمن حاولت تغني غنا ابراهيم عوض..!! خستكت اكتر لمن حاولت تغني غناء العاقب محمد حسن..!!
اغاني (ابراهيم حسين ، ابراهيم عوض ، والعاقب)..صحيح قد تبدو لأي هاوي بتاع مزيكا بانها سهلة للغاية (نظام تسليم وتسلم) ، لكن فيها سحر غريب للغاية ، وأي زول قريعتي راحت زينا كده ، ممكن يكتشف الفرق..!!
مثلا الحان العاقب واغانيه (مكارم اشتغلت ليهو اكثر من عمل في 2015)..ممكن أي زول/ة يطربق ليك بالفكرة العامة ، لكن لمن تتأمل العمل/المقلد بدقة .. بتلاحظ فروقات كتيرة.. لمن افتح اليوتوب والقى مكارم بتشتغل شغل للعاقب محمد حسن ، اول حاجة بفكر فيها أنو ارجع للعاقب في نفس الشغل ، وبلقى روحي أني مستعد اسمع العاقب لغاية نهاية العمل ، لكن ما مستعد اسمع تلاتة ثواني لمكارم وهي بتشتغل نفس الشغل..(مثلا غنية حبيبي نحن اتلاقينا مرة..)..!
الحاجة دي ممكن تلاحظها بوضوح بالمقارنة في اصوات اخرى.. مثلا.. انصاف فتحي لمن تشتغل شغل للعاقب أو ابراهيم حسين ، بدون ما اشعر بلقى روحي متابع شغلها للنهاية..!!
فاعمال العاقب مثلا ، صحيح ساهلة ، ولكنها من اصعب الأعمال في الأداء..وطيلة عمري لم اقتنع باداء مقلدين يؤدون اعمال العاقب الإ نفرين: الأول فنان من الأبيض اسمو عادل الجاك ، والصوت التاني انصاف فتحي..ليه؟
لأنو عادل او انصاف ، بيشتغلوا الشغل بضبانتو ظاهريا ، لكن بيقوموا بيعملوا مفارقة في روح الشغل (صحيح ما بتقدر تلحق روح العاقب ، لكنها بتخلق التميز)..!
مكارم لمن تشتغل شغل العاقب ، انا بسأل روحي: يا ربي الزولة دي شنو؟ ماشة على وين بالضبط؟ ودايرة تسوي شنو؟..
شرحوا: زي ما قال عزيز خطاب قبل سنة وشوية ، الزولة دي عندها امكانية لكن ما قادرة تلقى روحها لغاية الآن..!!
ودمت
كبر
02-16-2016, 10:50 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
ول أبا كبر العزيز قبل ما أتم كلامك عايز أقول ليك ما بكتبك معارض لكن بكمل قراية المداخلة الفوق وبحاول أصحح غلطي في تقييم مكارم .. معقولة ياخ انت وعزيز مرة واحدة وعايزني أكون أنا الصاح وإنتو الغلط .. العين لا تعلو على الحاجب يا زول .
02-16-2016, 12:33 PM
عزيز عزيز
تاريخ التسجيل: 04-12-2002
مجموع المشاركات: 3290
تجدوني جداً لكم مقدر ومحب وأتمنى أن أكون عند حسن الظن هنا تعلمت الكثير وتعرفت على إخوة وأصدقاء صاروا لي قبيلة أفاخر بكم..
مكارم لا تخطي موهبتها الفطرة التذوقية السليمة ولكن.. المشلكة ليست مكارم وحدها ، وإنما الكثير من المواهب التي تمتلك الصوت الجميل ودلفت لحقل الغناء..
لا توجد مؤسسات ولا أجهزة إعلامية بها مرشدين ومعلمين متخصصين حتى يقوموا بتقويم المعوج من هذه المواهب كل من أتته فرصة إستغلاها دون أن يستعد لها بشكل جيد.. للأسف زملائى من المتخصصين في مجال الموسيقى بالسودان يشتغلون بالحد الأدني الذي يوفر لهم سبل الحياة لهم وأسرهم وأكيد ليس لديهم رؤس الأموال لأنشاء معاهد تدريبية وإعداد برامج تأهيلة .. كما أن المواهب ليست لديها القدرة المالية للصرف قبل أن يجدوا طريق الحفلات والإجور العالية، وبعد ذلك يعلو كعب المغنى وتستبد به الشهرة، وأكيد لن ينزل الى منزلة التعلم بعد أن صار نجماً يتلألأ..
أعجبتنى حقاً مكارم في حديثها وتواضعها وأتمنى أن تكون هكذا حياتها وليس كلام للإعلام فقط.. ومع بساطة الأغنية التي غنتها كما ذكرت في مداخلة سابقة فهي أظهرت قدرة كبيرة على أنها في الطريق الصحيح وأتمنى أن تجد من يهتم بها فنياً ويكون مؤهلاً لذلك..
للأسف يا كبار يا حبيب البوست ذهب مع الهكر وكم كنت أعول عليه أن يكون لي مرجعية كلما تحسن هؤلاء الشباب والشابات حتى نفيهم حقهم خاصة وكانت نسبة المشاركات فيه عالية وفاقت المشاهدات الـ 26 الف مشاهدة ..
Quote: وطيلة عمري لم اقتنع باداء مقلدين يؤدون اعمال العاقب الإ نفرين: الأول فنان من الأبيض اسمو عادل الجاك ، والصوت التاني انصاف فتحي
كدا ممكن برضو تكتبني عندك معارض يا ول ابا كبر .. ليي ؟؟ لانو الفنان الإسمو خالد الصحافة الملقب بخالد محجوب أجاد غناء العاقب محمد حسن كما لم يجيده غيره سابقا ولا أظن يقدر يجيدة غيره لاحقا أبدا .. ولو ما مصدقني خلي واحد من الشباب يجيب ليك أغنية ( هذه الصخرة ) بصوت خالد محجوب .. صحيح دافية ومشحونة بالشجن عند العاقب محمد حسن .. لكن صدقني لما أسمعا عند خالد الصحافة طوالي بطير في عوالم بعيدة من الجمال والرومانسيات .. مع التأكيد على إنو أنا لم أسمع الغنية بصوت الجاك أو إنصاف فتحي عشان أقارن لكن يكفيني فقط انو الصحافة حلق بيها في فضاء الإبداع وما أظن واحد تاني يقدر يغير الإنطباع الأسسو في نافوخي . بالنسبة لمكارم بشير وزي ما قلتا ليك انت وعزيز من النادرين هنا القاعد أحترم وأعترف بذوقم الفني بعيدا عن الأكاديميات والتخصص بتاع عزيز عشان كدا ما قدامي غير احترام وجهة نظركم والتى تختلف (قليلا جدا ) عن وجهة نظري بيد انكم معترفين بامكاناتا كفنانة واعدة باذن الله . ليك التقدير كلو يا الحبيب .
02-17-2016, 08:53 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
Quote: المواهب ليست لديها القدرة المالية للصرف قبل أن يجدوا طريق الحفلات والإجور العالية، وبعد ذلك يعلو كعب المغنى وتستبد به الشهرة، وأكيد لن ينزل الى منزلة التعلم بعد أن صار نجماً يتلألأ..
هلا ياعزيز من زمان قاعد أقول المال والشهرة موت بطي للمواهب سواء في الغناء أو حتى في الكورة نادر جدا ما نلقي موهوب صغير السن استعان بى عقلو قبل عاطفتو في صقل وتنمية مواهبو بالمواظبة والمثابرة والتضحية ليقف على قاعدة صلبة تحكم ثباته في مواجهة متغيرات الزمن بما فيها ذوق المستمع السوداني ومزاجيتو المتقلبة التي لا تستقر على حال . معظم المواهب التي وجدت حظها من الأضواء وجرت في يديها الأموال انزوت أخيرا إلا من ظهور متقطع لأن هولاء اهتموا بالماديات والبزنس والركض وراء الموضة فأصبح هم كل واحد فيهم لفت النظر عبر التقليعات والمظاهر بامتلاك السيارة والبودي قارد الخ الخ من التفشخر والتمظهر معتقدا أنه بلغ القمة ولم يعد بحاجة للاجتهاد مع أنه لو كلف نفسه قليلا للإطلاع على تجارب عمالقة الفن السوداني أمثال أبوعركي ووردي وغيرهما لعرف أن البقاء على القمة يحتاج لجهود أكبر أضعاف جهود الصعود إليها لكن هولاء اعتمدوا على البريق الأول وحبسوا طموحاتهم في شوية شهرة وكثير من حفلات المناسبات الخاصة جاهلين أو متجاهلين أن الفن رسالة أسمى كثيرا من المكاسب المادية.. عشان كدا طبيعي جدا تضيع موهبة الواحد منهم مع مرور الوقت ويصبح مجرد مجتر للومضة الأولي التي ما تلبث أن تبهت تدريجيا حتى تخمد تماما و ينساه الناس . عشان كدا مكارم بشير لفتت نظري بحنكتا وتواضعا المظهري والكلامي، فضلا عن ثقافتا الواضحة التي تؤكد على إطلاعا الواسع، وامتلاكا لأدوات ستساعدها حتما في المحافظة على التوهج المرتقب، مثلها والأميرة نانسي عجاج لأنو برضو عندها نفس الأدوات مع تحفظي على بعض مظاهر التعالي والفوقية التي شابت طريقة تعاملها مع الجمهور في الآونة الأخيرة.
تحياتي وتقديري يا الحبيب .
02-17-2016, 02:37 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
صوت مكارم (الالطو) مع بحة طبيعية .. بلاشك هو صوت جميل وامتداد للاصوات النسائية (الالطو) من زمن مهلة العبادية وفاطمة الحاج ومنى الخير وعائشة الفلاتية الى هادية طلسم (الصوت الدارس) وقبل كدة قلت ان صوت هادية اكثر مايظهر معدنه في اغنية ( طير الجنة) و (رجعنالك) وبعدها سميرة دنيا ...مكارم (بتصرخ) وهي بتغني مع ان صوتها لا يحتاج لكل هذا الصراخ والانفعال وهي بتغني بتذكرني بى (جمال فرفور) ولا اعرف هل هناك شبه في الملامح؟ يمكن ان تقعد (الغنا) زي سميرة ابراهيم (دنيا) وهي بتغني كانها بتتونسلا انفعال (زايد) او شد للحبال الصوتية وتظهر معها (الاوداج) منفوخة في الرقبة مكارم في اغنية (دوام بطراهم) للراحل المقيم العندو (ثمانية) من اوزان الحنجرة العشرة الصوت الخالد ابوداؤد (بارتون + باص) القصيدة للراحل المقيم الشاعر عبدالمنعم عبدالحي في الحتة دي : حليل ناس هم ناسنا ذكرياتهم ديمة في راسنا شالوا نومنا وشالو نعاسناشالوا روحنا وشالوا انفاسنا غنت المقطع دا بصورة اقل جودة اذا وجدت اساتذة متخصصين في الصوت ممكن هي تستفيد من نصائحهم ويكون ليها شأن
مكارم بت قرية المسرة (محلية جبل اولياء) اول ما ظهرت في برنامج نجوم الغد كانت لابسة (برنيطة) زي برنيطة سلفاكير وكانت بتغني لعائشة الفلاتية (الحان الربيع) ولعوض جبريل (لي حبيب شاغل بالي) وغنت اغنية تراثية (الجينيات يابقارة) واغنييتين لسيد خليفة ( احلى غرام) و (غيرة) وبعض الاغنيات المسموعة حتى انها في مرة من المرات بعد ان ادت وصلتها الغنائية في البرنامج .. ارادت ان تعمل حركة (انحناءة ) للجمهور فكادت ان تسقط فوق المسرح لولا لطف الله الحقيقة هي لم تكن من ضمن الفائزين الــ (10) الاوائل وخرجت من البرنامج ... طبعا تصويت الجمهور كان ليهو دور كبير ويحسب لها ان عدم فوزها لم يثنى عزيمتها في المواصلة .. وثقتها في نفسها جعلها الان تاخذ شهرة لا باس بها
(عدل بواسطة Ahmed Yassin on 02-18-2016, 09:30 AM) (عدل بواسطة Ahmed Yassin on 02-18-2016, 09:40 AM)
02-18-2016, 09:54 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طلحة عبدالله
ABUHUSSEIN
محمد البشرى الخضر
عاطف عمر
حمد عبد الغفار عمر
جمال ود القوز
عزيز
محمد فضل الله المكى
محمد عبد الله الحسين
د.محمد بابكر
عباس محمود
Kabar
Ahmed Yassin
على محمد على بشير
فيس بوك
تويتر
انستقرام
يوتيوب
بنتيريست