|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
مشيت بعد العيد عشان اعمل البدعة....تأشيرة الخروج..
لقيت امة لا اله الا الله
بي جاي بي جاي انتهيت من البرينت اوت بتاع الاستحقاقات
مشيت لي السيدة مسؤولة الزكاة..قالت لي ندفعك النص ...قلت ليها لا انا داير ادفع اكتر ..
بس عندي سؤال: البدفع ده مبريء للذمة يعني بمشي للمستحقين؟
فانتفضت كأنها لدغت وقالت لي تسألني انا ؟
قلت ليها انا بسألك كجهة مسئولة مش سؤال شخصي...
قالت لي القروش على ذمة البستلموها..
خلصنا منها ورجعنا الصف...
نواصل
| |
 
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
رجعنا وقفنا في الصف..
الموظفة سيدة ..
سلحفائية مقيتة..
بعض الاحيان تشوف ناس داخلين بي جوه...معظمهم نسوان...
لا احد يعترض....
الكل مستسلم...
بس داير يتخارج...
الساعة 3 ...وقفت
في شنو؟؟؟ إن شاء الله خير؟؟
اشر بيديها الاتنين ...الصلاة...
صلاة شنو يا بت الحلال الساعة 3؟؟
..
نواصل....
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
استأذنت من الواقفين عشان امشي اشرب اموية
والله الذي لا إله إلا هو قدر ما فتشت ما لقيت..
مشيت الكافتيريا لقيتا قفلوها..
البرادات واقفات ..
الحفاظات فاضيات..
جيت راجع صفي بي عطشي..
الجماعة قالوا لي إن شاء الله شربت...
قلت ليهم مافي موية..
واحد قال لي إلا الماسورة..
مشيت شربت من الماسورة ...
وحمدت الله الكريم انو في موية في الماسورة..
نواصل...
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
رجعنا الصف ..
ورجعت الموظفة بعد زمن...
بدت الشغل كأنها مجبرة عليه..
قلنا نصبر ونخلص بس......
الساعة قربت لي اربعة.
والناس اتوترت زي جمهور الفريق المغلوب في اخر الدقائق..
هههههههههههههه
بعد شوية...
طاااااااااااخ
شنو؟؟؟
الشبكة طشت..
وااااااااااااااااااااااااااااااااااااع
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
تخيلوا...
حر ..
وعدم اكل وشراب ووقوف على الرجلين ...
وتجي الشبكة تتم الناقصة..
اللهم طولك يا روح....
زول داير يدفع قروش يدددددفع مش يقبض ويتبهدل ...
حسبنا الله ونعم الوكيل..
بعد فترة الشبكة جات..
قوووووووووووووووون..
قربنا ننطط..
علا خفنا الحكم ينهي المباراة ....
بس ياهو حالنا...
وعادت ريمة للعمل بصرتها القديمة ...
بالله التقول كانت ما دايرة الشبكة ترجع...
وبدأ الجماعة البي جوه يدخلوا برضو...
فضل لي تلاتة انفار واصل الشباك...
قلت للقدامي انا خشمي ماكلني وما بسكت ..
بس استلم ايصالي وبتكلم..
هههه
خفت من ذات الصرة...
شوية جاها إتصال على الموبايل وبدت تتكلم ..
ووقفت الشغل وهي تحرك في قروش صاحبي القدامي ..
يمكن 5 دقائق حتى انتهت...
اها ...
اخيراً وصلت صاحبة الجلالة ذات الصرة...
دفعت ..
بعد استلمت ايصالي ..
قلت ليها عايز اقول ليك كلمة واحدة..
بس ختي نفسك مكان الناس الواقفين ديل..
فثارت ثائرتها وبدت تكورك انا يا اخو شغالة وما وقفت الشغل..
قلت ليها ما شغالة ولا حاجة
قعدت ترد وانا طلعت
الجماعة قالوا لي والله عرفت ليها!!!!
ده القدروا عليهو ...
ههههههههه
(عدل بواسطة ياسر منصور عثمان on 08-06-2015, 11:39 AM)
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
اها مشينا على الجوازات عشان نعمل البدعة ...التأشيرة..
ربك رب الخير لقيت صف قصير ..
قلت الحمد لله ربنا عوضني خير..
وقفت ..
لقيت الجماعة متمحنين..
يا اخوانا الصف ده شغال؟؟
قالوا لي كان شغال
لكن الضابط (ملازم) قبل شوية قفل وقال (علي الطلاق ما اشتغل تاني)!!!
اووووووووب
انا اخو الفقراء
جابتلها طلاق كمان؟؟
عاينت شمالي لقيت في صفين
مشيت وقفت في واحد..
للامانة كان ماشي رغم الزحمة..
وصلت الضابط..
طق طق
دق لي البدعة
وسلمني الجواز
اخيييييييييييييرا..
وصلت البيت لا بسمع ولا بشوف
الله يجازيكم يا ناس الجوازات
تعبي ما عافي ليكم كلو كلو
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
ما عارفك من وين انت لكن
لو مشيت مدني الجميلة
في عشرة دقائق ما اكتر بتجي مارق
كسره
ناس معارضة السجم ديل بدل يطالبو بتوزيع الخدمات نحو الولايات و اشياء مثل هذه ودي من المطالب المشروعة
ما عارف قاعدين يعملو في شنو
الدنيا كلها الخرطوم الخرطوم
و يقولو ليك حكومة فيدرالية !!!
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: خالد المبارك)
|
سلام يا خالد اخوي
انا من الخرطوم
واعتقد ان الحكومة يمكنها تحصيل الجبايات بصورة افضل بان تفتح تلاتة مكاتب واحد في امدرمان وواحد في بحري بالاضافة للمكتب الحالي
ونحن مجبورين على الدفع
برضو في واحد صاحبي من مدني قال لي نفس كلامك ده..
لكن ما وريتنا رأيك في الكورة دي؟؟
تسلم
(عدل بواسطة ياسر منصور عثمان on 08-06-2015, 12:00 PM)
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
يا ياسر والله أنا في تلاتة أيام طلعت بطاقة الخدمة الإلزامية فقط
من الساعة 8 ص لي الساعة 4
داير لي تأشيرة وجواز
قنعت من الجواز ظاهر باطن وبقيت ساكي التأشيرة
قالوا لي لازم تدفع
التلاتة يوم دي أنا من صف لي صف، وأول ما تقرب تصل .. الشبكة طشت
الضابط مرق
بعد ما تصل الشباك البتزح فيهو من الصباح الضابط يقولك يا زول إنت جيت من وين ؟؟ وين توقيع العميد ؟؟
شيل ملفك دا وأمش وقعو من الضابط داك
الناس كأنها في يوم الحشر، أسر اتعذبت عذاب الفيلة، وأطفال يبكوا وواحدين يطرشوا
وواحدين يسبوا وواحدين يحبوا ..
في النهاية أخدتها من الآخر ومشيت أديت جوازي لي مكتب يعملوا لي التأشيرة
وهربت
ياخ لو موضوعهم قروش خليهم يسووا حساب في البنك والناس تسدد فيهو
لو موضوعهم شبكة القروش البندفعا ليهم دي بتجيب ليهم أفضل نظام وأفضل أجهزة
أما لو موضوعهم تلتلة الناس .. دا شي تاني
غايتو كان عندكم فلاحة يا مغتربين سووها لينا في جهاز المغتربين دا ..
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
سلام وتحية ياسر
الامين العام شغال شنو بالضبط لو ما قادر يصدر قرارات بسيطة تيسر العمل
ويقوم بمراقبتها والتاكد من فعاليتها
شنو البمنع بدل الصفوف دي يتم اعتماد ماكينة ارقام الانتظار وزيادة الكاونترات
وكل مراجع ينتظر رقمه وهو جالس بكل احترام
شنو البمنع ايقاف دخول بعض الاشخاص بالواسطة علي حساب المنتظرين؟
الموضوع ما محتاج لتنظير .. فقط قرارات ادارية واضحة وقوية
خدمة مدنية صفر
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: Dr. Ahmed Amin)
|
Quote: سلام وتحية ياسر
الامين العام شغال شنو بالضبط لو ما قادر يصدر قرارات بسيطة تيسر العمل
ويقوم بمراقبتها والتاكد من فعاليتها
شنو البمنع بدل الصفوف دي يتم اعتماد ماكينة ارقام الانتظار وزيادة الكاونترات
وكل مراجع ينتظر رقمه وهو جالس بكل احترام
شنو البمنع ايقاف دخول بعض الاشخاص بالواسطة علي حساب المنتظرين؟
الموضوع ما محتاج لتنظير .. فقط قرارات ادارية واضحة وقوية
خدمة مدنية صفر |
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
الاخ ياسر .. وضيوفك الكرام ..
السلام عليكم .. وكل عام وانتم بخير ,,
يااخ كان اديت اي بت سمحه من بنات مكاتب الخدمات مبلغ 100 جنيه وتاشيرتك تجيك بعد ساعه وانتا قاعد في الكفتريا ..
المهم ...
تعرف الحكومه دي بتتلذذ بعذاب مواطنيها ...
يعني لو تم الغاء هذه التاشيره اللعينه كما هو في كل دول العالم .. لاستراح الناس..
وشايف كمان عملوا ليهم صاله خاصه للعوائل او الاسر شمال اسكان النصر بحجة التخفيف من الازدحام..
ولو حسبت تكلفة المباني والرواتب والمصاريف ...
كان اوفر لهم الغاء هذه التاشيره لفئة العوائل حتى .. وانتهت معاناتهم ...
بس الناس دي تتفن في عكننة مزاج الشعب ..
والشعب رااضي ...
تحياتي ,,
| |
|
|
|
|
|
|
|
|
 Re: شكيتكم على الله يا ناس جهاز المغتربين (Re: محمد مجيدو)
|
وعليكم السلام ورحمة الله وبركاته اخوي محمد
وكل سنة وانت طيب وباحسن حال إن شاء الله
تلذذ وبس؟؟
يا اخي دي معروفة ايام زحمة بسبب الاجازات والعيد مفروض يكون في تواجد دائم للمسئولين في الصالات عشان يشوفوا الحاصل على خلق الله ديل..
غايتو نقول حسبنا الله ونعم الوكيل فيهم
وما عافين ليهم البعملوا فينا
مع ودي
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
أنا يتخيل لي الحاجات دي مقصودة
ممكن ببساطة جهاز المغتربين يعمل حساب في البنك، وهو عندو حساب قطع شك
يخلي الناس يسددوا للبنك ويجيبوا ما يثبت
لكن لا .. لازم تجي تقيف في صف وتزح من الصباح
بالمناسبة موسم المغتربين دا موسم ثراء فاحش لي ناس الجهاز
يعني الإجراءات المعقدة دي بستفيدوا منها (كثير من) الضباط والموظفين في جهاز المغتربين
لأنو بتجيهم مبالغ مهولة تحت تحت والمدير عارف والرئيس عارف والغفير عارف
وكلهم حقهم بجيهم في مكانهم
الحلول كتيرة وساااااهلة، لكن الحلول البتريح الناس بتقفل منهم ماسورة القروش دي
في رأيك .. يريحوك إنت ويفلسوا ؟ ولا يعذبوك ويتلتلوك وتجيهم شوية قريشات تمشي ليهم أحوالهم شهرين تلاتة لي قدام ؟؟؟؟
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
تحياتي يا ياسر
قول الحمد لله ، وقد تهون عليك مصيبتك وتعبك ، حينما تعلم ما جري للآخرلاخرين .
بإختصار :-
إجازتي كانت واحد وثلاثون يوما ، دخلت البلاد في الأسبوع الأخير من يونيو ، واليوم التالي قدمت للحصول على جوازات العيال ، وقبل أن أغادر في الأسبوع الأخير من يوليو وبيوم واحد أستلمت آخر جواز ،
خلال فترة الاجازة ضاع مني أكثر من أسبوعين في المتابعة الحثيثة والحضور المبكر والمغادرة في آخر لحظة من مقر الجهاز . وما حدث من تعطيل وإضاعة وقت تفاصليها طويلة ... بس قلت الحمد لله .
| |
|
|
|
|
|
|
|
|
 Re: شكيتكم على الله يا ناس جهاز المغتربين (Re: ياسر منصور عثمان)
|
Quote: يااخ كان اديت اي بت سمحه من بنات مكاتب الخدمات مبلغ 100 جنيه وتاشيرتك تجيك بعد ساعه وانتا قاعد في الكفتريا ..
|
كان عملتا كدي جوازك بروووح مجيييدو اتا شفتا الجوازات بتاعت مكاتب الخدمات بكبوها كيف يازول جوازك في يدك احسن
ياسر مرينا نسلم ونبارك ليك فوز الزعيم الاحمر 
| |
|
|
|
|
|
|
|
|
|
Re: شكيتكم على الله يا ناس جهاز المغتربين (Re: ياسر منصور عثمان)
|
قال جهاز تنظيم شؤون السودانيين العاملين بالخارج، الخميس، إنه يعكف على توسيع مواعين الخدمات الإلكترونية للمغتربين، بفتح فرعين جديدين في كل من الخرطوم بحري وأم درمان، وذلك لفك الاختناقات في تقديم الخدمات.
ويشهد جهاز المغتربين تكدساً لافتاً من قبل طالبي الهجرة من السودانيين، حيث أقر الجهاز في وقت سابق بمنح 12 ألف تأشيرة خروج خلال ثلاثة أيام.
وتأتي خطوة افتتاح الفرعين الجديدين، عقب شكاوى تقدم بها المتعاملون مع جهاز المغتربين للنائب الأول للرئيس بكري حسن صالح، الذي زار مقر الجهاز الشهر الماضي وأمر بفتح أفرع جديدة لتفادي التكدس وفك الاختناقات في تقديم الخدمات.
وقال مدير إدارة التقنية بجهاز المغتربين، عبدالطيف إبراهيم، إن افتتاح هذه الفروع سيسهم في تسهيل الإجراءات المتعلقة بالمغتربين من تأشيرة واستخراج جوازات ومساهمة وطنية وزكاة وخدمة إلزامية، لفك الاختناقات في الرئاسة والفروع الأخرى، مؤكداً أن الفروع مزوّدة بأجهزة وتقنيات حديثة.
ونقلت وكالة أنباء السودان الرسمية عن إبراهيم قوله، إن عدد الإيصالات التي تم استخراجها من جهاز المغتربين حتى الأربعاء، بلغ 190 ألف إيصال إلكتروني عبر نظام سداد للمالية، إضافة إلى 55 ألف إيصال لاستخراج الجواز الإلكتروني عبر بنك فيصل الإسلامي.
شبكة الشروق
| |
|
|
|
|
|
|
| |
ياسر منصور عثمان
محمد إبراهيم علي
بدرالدين بابكر مصطفى
اسامه العريفي
خالد المبارك
willeim andrea
محمد مجيدو
ولياب
مهيرة
مرتضى احمد عبد القادر
حامد بدري
فيس بوك
تويتر
انستقرام
يوتيوب
بنتيريست