Post: #2
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:06 AM
Parent: #1
إستهتار بخلق الله
عدم مسؤولية
شكيتكم على الله
|
Post: #3
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:11 AM
Parent: #2
مشيت بعد العيد عشان اعمل البدعة....تأشيرة الخروج..
لقيت امة لا اله الا الله
بي جاي بي جاي انتهيت من البرينت اوت بتاع الاستحقاقات
مشيت لي السيدة مسؤولة الزكاة..قالت لي ندفعك النص ...قلت ليها لا انا داير ادفع اكتر ..
بس عندي سؤال: البدفع ده مبريء للذمة يعني بمشي للمستحقين؟
فانتفضت كأنها لدغت وقالت لي تسألني انا ؟
قلت ليها انا بسألك كجهة مسئولة مش سؤال شخصي...
قالت لي القروش على ذمة البستلموها..
خلصنا منها ورجعنا الصف...
نواصل
|
Post: #5
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:14 AM
Parent: #3
رجعنا وقفنا في الصف..
الموظفة سيدة ..
سلحفائية مقيتة..
بعض الاحيان تشوف ناس داخلين بي جوه...معظمهم نسوان...
لا احد يعترض....
الكل مستسلم...
بس داير يتخارج...
الساعة 3 ...وقفت
في شنو؟؟؟ إن شاء الله خير؟؟
اشر بيديها الاتنين ...الصلاة...
صلاة شنو يا بت الحلال الساعة 3؟؟
..
نواصل....
|
Post: #7
Title: Re: شكيتكم على الله يا ناس جهاز المغتربين
Author: محمد إبراهيم علي
Date: 08-06-2015, 11:16 AM
Parent: #3
| Quote: بس عندي سؤال: البدفع ده مبريء للذمة يعني بمشي للمستحقين؟ |
ههههههههههههههههههههه
ختيت الموظفة في كورنر ضيق :)
|
Post: #9
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:19 AM
Parent: #7
اضيق من الزاوية الختوني فيها؟؟
هههههه
مشكور على المرور اخوي محمد
|
Post: #4
Title: Re: شكيتكم على الله يا ناس جهاز المغتربين
Author: بدرالدين بابكر مصطفى
Date: 08-06-2015, 11:13 AM
Parent: #2
هههههههه
بالله إنت برضك دخلت الفيلم دا ؟؟؟
أنا جيت أول البارح
طبعاً الما شاف ما بصدق ولا بتخيل الكلام الحتقولو دا
حمدله على السلامة المرقت رقبتك منهم
|
Post: #6
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:15 AM
Parent: #4
سلام بدر الدين اخوي وحمدا لله على السلامة
هههههههههههه
|
Post: #8
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:18 AM
Parent: #6
استأذنت من الواقفين عشان امشي اشرب اموية
والله الذي لا إله إلا هو قدر ما فتشت ما لقيت..
مشيت الكافتيريا لقيتا قفلوها..
البرادات واقفات ..
الحفاظات فاضيات..
جيت راجع صفي بي عطشي..
الجماعة قالوا لي إن شاء الله شربت...
قلت ليهم مافي موية..
واحد قال لي إلا الماسورة..
مشيت شربت من الماسورة ...
وحمدت الله الكريم انو في موية في الماسورة..
نواصل...
|
Post: #10
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:22 AM
Parent: #8
رجعنا الصف ..
ورجعت الموظفة بعد زمن...
بدت الشغل كأنها مجبرة عليه..
قلنا نصبر ونخلص بس......
الساعة قربت لي اربعة.
والناس اتوترت زي جمهور الفريق المغلوب في اخر الدقائق..
هههههههههههههه
بعد شوية...
طاااااااااااخ
شنو؟؟؟
الشبكة طشت..
وااااااااااااااااااااااااااااااااااااع
|
Post: #11
Title: Re: شكيتكم على الله يا ناس جهاز المغتربين
Author: اسامه العريفي
Date: 08-06-2015, 11:29 AM
Parent: #10
تستاهل انت الوداك شنو
|
Post: #13
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:32 AM
Parent: #11
سلاااااااااااااام ود العريفي
نان نخلي بلدنا واهلنا ؟؟؟
هههههههههه
|
Post: #12
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:31 AM
Parent: #10
تخيلوا...
حر ..
وعدم اكل وشراب ووقوف على الرجلين ...
وتجي الشبكة تتم الناقصة..
اللهم طولك يا روح....
زول داير يدفع قروش يدددددفع مش يقبض ويتبهدل ...
حسبنا الله ونعم الوكيل..
بعد فترة الشبكة جات..
قوووووووووووووووون..
قربنا ننطط..
علا خفنا الحكم ينهي المباراة ....
بس ياهو حالنا...
وعادت ريمة للعمل بصرتها القديمة ...
بالله التقول كانت ما دايرة الشبكة ترجع...
وبدأ الجماعة البي جوه يدخلوا برضو...
فضل لي تلاتة انفار واصل الشباك...
قلت للقدامي انا خشمي ماكلني وما بسكت ..
بس استلم ايصالي وبتكلم..
هههه
خفت من ذات الصرة...
شوية جاها إتصال على الموبايل وبدت تتكلم ..
ووقفت الشغل وهي تحرك في قروش صاحبي القدامي ..
يمكن 5 دقائق حتى انتهت...
اها ...
اخيراً وصلت صاحبة الجلالة ذات الصرة...
دفعت ..
بعد استلمت ايصالي ..
قلت ليها عايز اقول ليك كلمة واحدة..
بس ختي نفسك مكان الناس الواقفين ديل..
فثارت ثائرتها وبدت تكورك انا يا اخو شغالة وما وقفت الشغل..
قلت ليها ما شغالة ولا حاجة
قعدت ترد وانا طلعت
الجماعة قالوا لي والله عرفت ليها!!!!
ده القدروا عليهو ...
ههههههههه
|
Post: #14
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:37 AM
Parent: #12
اها مشينا على الجوازات عشان نعمل البدعة ...التأشيرة..
ربك رب الخير لقيت صف قصير ..
قلت الحمد لله ربنا عوضني خير..
وقفت ..
لقيت الجماعة متمحنين..
يا اخوانا الصف ده شغال؟؟
قالوا لي كان شغال
لكن الضابط (ملازم) قبل شوية قفل وقال (علي الطلاق ما اشتغل تاني)!!!
اووووووووب
انا اخو الفقراء
جابتلها طلاق كمان؟؟
عاينت شمالي لقيت في صفين
مشيت وقفت في واحد..
للامانة كان ماشي رغم الزحمة..
وصلت الضابط..
طق طق
دق لي البدعة
وسلمني الجواز
اخيييييييييييييرا..
وصلت البيت لا بسمع ولا بشوف
الله يجازيكم يا ناس الجوازات
تعبي ما عافي ليكم كلو كلو
|
Post: #16
Title: Re: شكيتكم على الله يا ناس جهاز المغتربين
Author: خالد المبارك
Date: 08-06-2015, 11:47 AM
Parent: #14
ما عارفك من وين انت لكن
لو مشيت مدني الجميلة
في عشرة دقائق ما اكتر بتجي مارق
كسره
ناس معارضة السجم ديل بدل يطالبو بتوزيع الخدمات نحو الولايات و اشياء مثل هذه ودي من المطالب المشروعة
ما عارف قاعدين يعملو في شنو
الدنيا كلها الخرطوم الخرطوم
و يقولو ليك حكومة فيدرالية !!!
|
Post: #17
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:59 AM
Parent: #16
سلام يا خالد اخوي
انا من الخرطوم
واعتقد ان الحكومة يمكنها تحصيل الجبايات بصورة افضل بان تفتح تلاتة مكاتب واحد في امدرمان وواحد في بحري بالاضافة للمكتب الحالي
ونحن مجبورين على الدفع
برضو في واحد صاحبي من مدني قال لي نفس كلامك ده..
لكن ما وريتنا رأيك في الكورة دي؟؟
تسلم
|
Post: #15
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 11:41 AM
Parent: #1
بالله من العطش نسينا نعيد عليكم...
كل سنة وانتو طيبين وربنا يحقق الامنيات
|
Post: #18
Title: Re: شكيتكم على الله يا ناس جهاز المغتربين
Author: بدرالدين بابكر مصطفى
Date: 08-06-2015, 12:07 PM
Parent: #15
يا ياسر والله أنا في تلاتة أيام طلعت بطاقة الخدمة الإلزامية فقط
من الساعة 8 ص لي الساعة 4
داير لي تأشيرة وجواز
قنعت من الجواز ظاهر باطن وبقيت ساكي التأشيرة
قالوا لي لازم تدفع
التلاتة يوم دي أنا من صف لي صف، وأول ما تقرب تصل .. الشبكة طشت
الضابط مرق
بعد ما تصل الشباك البتزح فيهو من الصباح الضابط يقولك يا زول إنت جيت من وين ؟؟ وين توقيع العميد ؟؟
شيل ملفك دا وأمش وقعو من الضابط داك
الناس كأنها في يوم الحشر، أسر اتعذبت عذاب الفيلة، وأطفال يبكوا وواحدين يطرشوا
وواحدين يسبوا وواحدين يحبوا ..
في النهاية أخدتها من الآخر ومشيت أديت جوازي لي مكتب يعملوا لي التأشيرة
وهربت
ياخ لو موضوعهم قروش خليهم يسووا حساب في البنك والناس تسدد فيهو
لو موضوعهم شبكة القروش البندفعا ليهم دي بتجيب ليهم أفضل نظام وأفضل أجهزة
أما لو موضوعهم تلتلة الناس .. دا شي تاني
غايتو كان عندكم فلاحة يا مغتربين سووها لينا في جهاز المغتربين دا ..
|
Post: #19
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 12:26 PM
Parent: #18
تعرف يا بدر اخوي
انا رأيي انو الموضوع ده ما بتحل إلا الناس يوم تقوم تكسر مباني الجهاز..
بعد كده الحكومة ممكن تنتبه
يا اخي ما ممكن الذل والمهانة تصل للدرجة دي...
|
Post: #20
Title: Re: شكيتكم على الله يا ناس جهاز المغتربين
Author: Dr. Ahmed Amin
Date: 08-06-2015, 12:38 PM
Parent: #19
سلام وتحية ياسر
الامين العام شغال شنو بالضبط لو ما قادر يصدر قرارات بسيطة تيسر العمل
ويقوم بمراقبتها والتاكد من فعاليتها
شنو البمنع بدل الصفوف دي يتم اعتماد ماكينة ارقام الانتظار وزيادة الكاونترات
وكل مراجع ينتظر رقمه وهو جالس بكل احترام
شنو البمنع ايقاف دخول بعض الاشخاص بالواسطة علي حساب المنتظرين؟
الموضوع ما محتاج لتنظير .. فقط قرارات ادارية واضحة وقوية
خدمة مدنية صفر
|
Post: #21
Title: Re: شكيتكم على الله يا ناس جهاز المغتربين
Author: willeim andrea
Date: 08-06-2015, 12:40 PM
Parent: #20
Quote: سلام وتحية ياسر
الامين العام شغال شنو بالضبط لو ما قادر يصدر قرارات بسيطة تيسر العمل
ويقوم بمراقبتها والتاكد من فعاليتها
شنو البمنع بدل الصفوف دي يتم اعتماد ماكينة ارقام الانتظار وزيادة الكاونترات
وكل مراجع ينتظر رقمه وهو جالس بكل احترام
شنو البمنع ايقاف دخول بعض الاشخاص بالواسطة علي حساب المنتظرين؟
الموضوع ما محتاج لتنظير .. فقط قرارات ادارية واضحة وقوية
خدمة مدنية صفر |
|
Post: #23
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 12:47 PM
Parent: #21
شكراً على المرور وليم اندرية
|
Post: #22
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-06-2015, 12:43 PM
Parent: #20
وعليكم السلام يا دكتور
صدقت ولكن من يسمع؟؟
قبل كده ارسلت للدكتور كرار التهامي عندما كان رئيسا والا مديرا للجهاز واشتكيت ما يحدث من الموظفين/ات
قال لي ديل منتدبين من جهات عملهم وما تابعين لينا عشان كده ما عندنا عليهم سلطة..
تصدق؟؟
مع ودي
|
Post: #24
Title: Re: شكيتكم على الله يا ناس جهاز المغتربين
Author: محمد مجيدو
Date: 08-06-2015, 02:14 PM
Parent: #1
الاخ ياسر .. وضيوفك الكرام ..
السلام عليكم .. وكل عام وانتم بخير ,,
يااخ كان اديت اي بت سمحه من بنات مكاتب الخدمات مبلغ 100 جنيه وتاشيرتك تجيك بعد ساعه وانتا قاعد في الكفتريا ..
المهم ...
تعرف الحكومه دي بتتلذذ بعذاب مواطنيها ...
يعني لو تم الغاء هذه التاشيره اللعينه كما هو في كل دول العالم .. لاستراح الناس..
وشايف كمان عملوا ليهم صاله خاصه للعوائل او الاسر شمال اسكان النصر بحجة التخفيف من الازدحام..
ولو حسبت تكلفة المباني والرواتب والمصاريف ...
كان اوفر لهم الغاء هذه التاشيره لفئة العوائل حتى .. وانتهت معاناتهم ...
بس الناس دي تتفن في عكننة مزاج الشعب ..
والشعب رااضي ...
تحياتي ,,
|
Post: #25
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-08-2015, 09:48 AM
Parent: #24
وعليكم السلام ورحمة الله وبركاته اخوي محمد
وكل سنة وانت طيب وباحسن حال إن شاء الله
تلذذ وبس؟؟
يا اخي دي معروفة ايام زحمة بسبب الاجازات والعيد مفروض يكون في تواجد دائم للمسئولين في الصالات عشان يشوفوا الحاصل على خلق الله ديل..
غايتو نقول حسبنا الله ونعم الوكيل فيهم
وما عافين ليهم البعملوا فينا
مع ودي
|
Post: #26
Title: Re: شكيتكم على الله يا ناس جهاز المغتربين
Author: أحمد محمد عمر
Date: 08-08-2015, 09:59 AM
Parent: #25
Quote: ما عارفك من وين انت لكن
لو مشيت مدني الجميلة
في عشرة دقائق ما اكتر بتجي مارق
|
كان زمان
هسة ناس مدني عملوا ليهم صيوان في الشارع من الزحمة
|
Post: #27
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-09-2015, 07:20 AM
Parent: #26
يعني مدني زااااااااااتا اتقفلت علينا؟؟
اها ...هسي كنا خسرنا حق المواصلات
ههههههههههههه
مشكور احمد اخوي على المرور
|
Post: #28
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-09-2015, 07:25 AM
Parent: #1
فضل الله بابكر حماد · يعمل لدى الخرطوم
الشعب راضى شن دخل القاضى يابتاع القنقليس هههههههههههههههه
مشكوووووووووور اخوي فضل الله
بعد كده حا نشرب جردقة وحرجل
مع ودي
|
Post: #29
Title: Re: شكيتكم على الله يا ناس جهاز المغتربين
Author: بدرالدين بابكر مصطفى
Date: 08-09-2015, 10:23 AM
Parent: #28
أنا يتخيل لي الحاجات دي مقصودة
ممكن ببساطة جهاز المغتربين يعمل حساب في البنك، وهو عندو حساب قطع شك
يخلي الناس يسددوا للبنك ويجيبوا ما يثبت
لكن لا .. لازم تجي تقيف في صف وتزح من الصباح
بالمناسبة موسم المغتربين دا موسم ثراء فاحش لي ناس الجهاز
يعني الإجراءات المعقدة دي بستفيدوا منها (كثير من) الضباط والموظفين في جهاز المغتربين
لأنو بتجيهم مبالغ مهولة تحت تحت والمدير عارف والرئيس عارف والغفير عارف
وكلهم حقهم بجيهم في مكانهم
الحلول كتيرة وساااااهلة، لكن الحلول البتريح الناس بتقفل منهم ماسورة القروش دي
في رأيك .. يريحوك إنت ويفلسوا ؟ ولا يعذبوك ويتلتلوك وتجيهم شوية قريشات تمشي ليهم أحوالهم شهرين تلاتة لي قدام ؟؟؟؟
|
Post: #30
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-09-2015, 10:33 AM
Parent: #29
مليون لايك يا بدر الدين اخوي...
ده الحاصل بالضبط..
يديك العافية
|
Post: #31
Title: Re: شكيتكم على الله يا ناس جهاز المغتربين
Author: ولياب
Date: 08-09-2015, 12:10 PM
Parent: #30
تحياتي يا ياسر
قول الحمد لله ، وقد تهون عليك مصيبتك وتعبك ، حينما تعلم ما جري للآخرلاخرين .
بإختصار :-
إجازتي كانت واحد وثلاثون يوما ، دخلت البلاد في الأسبوع الأخير من يونيو ، واليوم التالي قدمت للحصول على جوازات العيال ، وقبل أن أغادر في الأسبوع الأخير من يوليو وبيوم واحد أستلمت آخر جواز ،
خلال فترة الاجازة ضاع مني أكثر من أسبوعين في المتابعة الحثيثة والحضور المبكر والمغادرة في آخر لحظة من مقر الجهاز . وما حدث من تعطيل وإضاعة وقت تفاصليها طويلة ... بس قلت الحمد لله .
|
Post: #32
Title: Re: شكيتكم على الله يا ناس جهاز المغتربين
Author: مهيرة
Date: 08-09-2015, 01:32 PM
Parent: #31
صاحب البوست وضيوفه الاعزاء
مع الشكية لله على المغتربين القيام بخطوات عملية لرفع دعوة دستورية لالغاء تأشيرة الخروج التى تتعارض مع الحق الدستورى للمواطن فى حرية الحركة والتنقل
وللمزيد من التفاصيل الرداء زيارة هذا اللنك الذى قام فيه القانونيون ببحث وكيفية رفع الدعوى
وحتى ينعم المغترب السودانى بحرية السفر والتنقل المكفولة له فى الدستور
تحياتى
** مساهماتكم : لرفع دعـوى دستوريــة ضد قانون ضرائب المغتربين**** مساهماتكم : لرفع دعـوى دستوريــة ضد قانون ضرائب المغتربين**
|
Post: #33
Title: Re: شكيتكم على الله يا ناس جهاز المغتربين
Author: مرتضى احمد عبد القادر
Date: 08-09-2015, 03:37 PM
Parent: #32
Quote: الجماعة قالوا لي إن شاء الله شربت...
قلت ليهم مافي موية..
واحد قال لي إلا الماسورة..
مشيت شربت من الماسورة ...
وحمدت الله الكريم انو في موية في الماسورة.. |
ودوك الماسورة 
|
Post: #36
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-10-2015, 06:44 AM
Parent: #33
هههههههههههه
بقيت ماسورة
هههههههه
يجازي محنك يا مرتضى
شكراً على المرور
|
Post: #35
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-10-2015, 06:43 AM
Parent: #32
مشكوووووورة اختي مهيرة
ونحن مع اي جهد لإلغاء هذه التأشيرة البغيضة
مع ودي
|
Post: #34
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-10-2015, 06:41 AM
Parent: #31
الحمد لله يا ولياب اخوي
يعني إجازتك راحت شمار في جواز
ههههههههه
نقول حسبنا الله ونعم الوكيل فيهم
مع ودي
|
Post: #37
Title: Re: شكيتكم على الله يا ناس جهاز المغتربين
Author: حامد بدري
Date: 08-10-2015, 08:23 AM
Parent: #34
Quote: يااخ كان اديت اي بت سمحه من بنات مكاتب الخدمات مبلغ 100 جنيه وتاشيرتك تجيك بعد ساعه وانتا قاعد في الكفتريا ..
|
كان عملتا كدي جوازك بروووح مجيييدو اتا شفتا الجوازات بتاعت مكاتب الخدمات بكبوها كيف يازول جوازك في يدك احسن
ياسر مرينا نسلم ونبارك ليك فوز الزعيم الاحمر 
|
Post: #38
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-10-2015, 08:42 AM
Parent: #37
فعلاً يا حامد اخوي الواحد بخاف جوازه يروح وما يلم في البنية السمحة زااااااااتا
الله يبارك فيك
ونبارك ليك فوز الازرق بالكاس إن شاء الله
هههههههههههه
|
Post: #39
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-11-2015, 08:59 AM
Parent: #1
ناصر الجعلي · شندى الثانويه بنين
موضوع الشبكة البتطش دي شكلها مقصود بيها ارجاع اورنيك 15 واللهط
ما بعيد يا ناصر اخوي
شكراً على المرور
|
Post: #40
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 08-11-2015, 09:09 AM
Parent: #1
(النائب الاول يداهم جهاز المغتربين ويوجه بفتح فروع ببحري وامدرمان)
يكونش السيد بكري عضو في منبر بكري؟؟؟
ههههههههههههههه
|
Post: #41
Title: Re: شكيتكم على الله يا ناس جهاز المغتربين
Author: ياسر منصور عثمان
Date: 09-05-2015, 09:53 AM
Parent: #1
قال جهاز تنظيم شؤون السودانيين العاملين بالخارج، الخميس، إنه يعكف على توسيع مواعين الخدمات الإلكترونية للمغتربين، بفتح فرعين جديدين في كل من الخرطوم بحري وأم درمان، وذلك لفك الاختناقات في تقديم الخدمات.
ويشهد جهاز المغتربين تكدساً لافتاً من قبل طالبي الهجرة من السودانيين، حيث أقر الجهاز في وقت سابق بمنح 12 ألف تأشيرة خروج خلال ثلاثة أيام.
وتأتي خطوة افتتاح الفرعين الجديدين، عقب شكاوى تقدم بها المتعاملون مع جهاز المغتربين للنائب الأول للرئيس بكري حسن صالح، الذي زار مقر الجهاز الشهر الماضي وأمر بفتح أفرع جديدة لتفادي التكدس وفك الاختناقات في تقديم الخدمات.
وقال مدير إدارة التقنية بجهاز المغتربين، عبدالطيف إبراهيم، إن افتتاح هذه الفروع سيسهم في تسهيل الإجراءات المتعلقة بالمغتربين من تأشيرة واستخراج جوازات ومساهمة وطنية وزكاة وخدمة إلزامية، لفك الاختناقات في الرئاسة والفروع الأخرى، مؤكداً أن الفروع مزوّدة بأجهزة وتقنيات حديثة.
ونقلت وكالة أنباء السودان الرسمية عن إبراهيم قوله، إن عدد الإيصالات التي تم استخراجها من جهاز المغتربين حتى الأربعاء، بلغ 190 ألف إيصال إلكتروني عبر نظام سداد للمالية، إضافة إلى 55 ألف إيصال لاستخراج الجواز الإلكتروني عبر بنك فيصل الإسلامي.
شبكة الشروق
|
|