03:28 AM Mar, 03 2015 Sudanese Online هشام هباني- My Library at SudaneseOnline
سلام يمــّة يا حاجة الهديّة* ــــــــــــــــــــــــــــــــــــ تعظيم سلام واجمل كلام ليك يمّة يا حاجة الهدية رمضان كريم والله اكرم ومقبولة صومتك يا رضيّة ومني ليك أبرك تحية اديك صحة واديك عافية و حجة لمكة العليّة
وهناك تطوفي بالكعبة الشريفة ادعو لينا يا شريفة ويا عفيفة الله افكنا من ولدك عمرهذا التليفة دلدول الخوازيق العرور أب لقوفة وكمان افكنا من ملة الجبهة الجليفة ملة الدين المزوّر والخرافات السخيفة وافكنا من كل التوالي و الدلاقين الحليفة وافكنا من حالة القرف المخيفة وحالة الناس الشلش ما عندها نتفة رغيفة
و قولي لي ولدك هذا الدلاهة لمتين نحن في هذي المتاهة البلد طلعت دينها وحارق حشاها يا جحيمها ويا لظاها
قولي ليهو يا هبيل يا مشاتر خاف الله في ناسا تعافر زاحفة للرزق يا دوب تدافر ومضروبة في جو المخافر غرقانة في دم المجازر مذلولة في وجع المهاحر ومهانة في جوف المقابر ومذلولة بصلف العساكر ومغدورة بشرع الخناجر في بلدا فيها الحنابر والقنابر قادلة تختال في المنابر توزع الدجل المشاتر ودين الله انباع في المتاجر وشرع الله رايات للعواهر
قولي لولدك هذا الكجر هذا العرور المعتبر الكنت قايلاهو انضف من قمر وكنت قايلاهو مهدينا المنتظر أوكنت قايلاهو المك نمر
أبدا يمة المولى ما قسملك ولد ربما خلوا التبيعة عكس قانون الطبيعة ودفنوا في الارض الولد وجانا قلوطا أحد لم يلد ولم يفد هذا الكرور المستبد هذا الجبان المرتعد
عمر المشير المنكسر عمر البشير الما بشر عمر العساكر والكجر عمر المفاسد والغجر
قولي ليهو يا وليد وقف كفاية الوطن ماهو زريبة سعاية وارواحنا ماها لعبة هواية ودم الناس ماهو موية سقاية يا وليد يا هوي كفاية
قولي ليهو: ماعافية منك ماني امك وابرا منك وكيف تداري الليلة ذنبك يوم تموت وتلاقي ربك وماني قايلاك سفاحا محنك وماني قايلاك سراقا بفنك ابرا منك قايلاك راجلا زول مكارم زول عطايا شايل الناس في الحنايا بفرح الايتام بعطفو وبديهم الحب والعناية وقايلاك راجلا بشبع الناس الجعانة بستر الناس العرايا وقايلاك راجلا حقاني في ساعة المظالم بدي للمظلوم حماية وقايلاك راجلا ما بكضب ما بنافق دينو حقاني مو دعاية وقايلاك راجلا في كلامك في سلامك يا ضنايا ووب عليك قد ضاع شقايا ووب عليك قد طال اذايا ووب عليك من دم الضحايا وحق يتيما انت شارب دم ابوهو فاقد الريد والمحنة فاقد الحب والرعاية لكنو ما ناسي دم ابوهو وسيفو جاهز وتارو والع في الحنايا وما بهاب يوم المنايا ووب عليك يا جنايا من دم شهيدا يشهد انك مدمنا قتل الضحايا انصحيه وقولي ليهو : يا بهيم وقف كفاية ما عافية منك ماني امك وابرا منك ماك ضنايا وماك طالع من حشايا
واسألي يمة يا حاجة الهدية كل طويرات البلد الطايرة في عيد الضحية كان حدية او قمرية اوسمبرية كيف وليدك ضحي في عيد الضحية هناك في (العيلفون) لما رصاصو ولع في الدرافين الصغار والدمع سال مطر دافق هتون مالي العيون واهدى شفعنا حلاوة من طعم المنون شان رفضوا الحرب رفضوا الدمار وباسم الله كبر ولدك هذا الحمار نصة نهار وسال الدم ركب والبحر زاد احمرار واليوم قد كان عيد ضحية وكانوا شفعنا الضحية وانت يمة بتعرفي حرقة الحشا والاذية لانك زولة طيبة وصافية نية وبتعرفي كيف لمن ام تفقد ضناها وكيفن تعيش بلا جناها وكيفن تاني تحلم بعد حرقة حشاها وانت يمه عارفه الحكاية من البداية ومنتهاها فالكاتل ولدك عمر الدلاهة
والدنيا يا أمي اخرتا كوم تراب ويوم الحساب فيهو الحساب فيهو العقاب فيهو الجحيم ولظي وكل انواع العذاب والله شايف والله عارف حتي همسات الدواب وعارف وليدك عمر الحيوان وكلــب الكــــلاب عمر المنافق والمخادع الكضاب عمر الحيوان عمر الجبـــــان والفاسد النهاب وكاتل الاف الرقاب ولاتفه الاسباب في دارفور في كجبار في الجبال والهضاب وفي الخرتوم شفتي يمه براك مجازر الشباب
وبعد ده يمه عامل فيها حمامة للحب والسلام وصدق انو صانع الحب والوئام بعد ماكان بشجع لعبة الموت الزؤام يا سلام من كضب جاب الطمام ويا سلام من دجل ساكن النظام ويا سلام من عفن راكز تمام ويا سلام يا سلام من هذا السلام قولي ليهو : ماني امك ما عافية منك وابرا منك *** اسمعيني أمي يا حاجة الهدية انت عارفة الدنيا فانية ولينا مكتوبة النهاية والدين يا يمه قالوا النصيحة والسترة ديمة بارياها الفضيحة واتى يمة بتعرفي الله وبتخافي الله وبترضي بالكلمة الصريحة وتب ما بترضي بالفعلة القبيحة والليلة عندي ليك اخبارا ما مريحة في دولة وليدك عمر هذا التليحة دولة الدين المخستك والشعارات القبيحة وفي كل يوم تغرب شمس وفيها تسمع كم من فضيحة
وان شاء الله يمّة متابعة اخبار السياسة؟ وعارفة حالة البلد الليلة زي صاج العواسة والشغلة لا طايوق لافهم كسرة شايطة وحالة زايطة جايطة زي كوم كناسة ولا زلنا في سوق النخاسة باعونا في كل المواسم بالاحابيل والخساسة والفساد والعفن الليلة قد طال السياسة ونظام الزفت الليلة زايد في ا لنجاسة عايز ليهو مشاطة وصندوق برنجي وناس فايقة للحكي والكواسة
ويا ما ناس غنت عابدة للجاه والقروش وبالسحت والربا الليلة عبوها الكروش نهبوا العباد سرقوا البلاد اكلوها بوش ناس والله من صنف الوحوش وديل يا يمة شلة ولدك عمر الفشوش *** واظنك يمة سمعت بالبتاع اب ريالة عبدو البتاع سقط المتاع عبدو الحتالة عبدو الوزير عبدو الحقيرفاقد الرجالة بعد ما سرق ونهب البتاع بكل سفالة ومن فضيحتو البتاع قدم عديل استقالة والليلة وزيربتاعنا في الزمن الزبالة وده وليدك عمرالبتاع رقاهو بكل هبالة والليلة البتاع وزير دفاع وكمان زايد خمالة وزير دفاع في بلد شبعت عمالة بلد منكوحة بقوات اجانب في جنوبها وفي شمالها *** وبدور اسألك فد سؤال امي يا حاجة الهدية دحين (صراصر) نقلوها لكافوري والمنشية؟؟ وقالوا البنيات رطبّن فوق العمارات الغندرية والوليدات طاروا فوق العلالي و المقامات المنجهية وقالوا اللبع اصبح حلال بالفتاوي المنهجية وده كلو في جاه وليدك فاروقنا بعدالتو الهمبتية عدلو بس للاقارب والبطانات والمعية **** اسمعني يا هوي ياعمر الهوان ياالورل المشير اللابس كمان نيشان عارفك لابد في القيادة وحولك ديدبان مدجج بالسلاح وعامل سيد الفرسان تصدر في الاوامر ولابد في سلام و امان ولو كنت ضكرا جد ربوك من زمان و زمان امرقوا ولاقونا برّه Man to man الايد تلاقي الايد دواس رجال والخبت مليان ولا قوات لا جيوش ولا لبيد ورا الحيطان ولا سيمبويا لا ايقاد ولا جودية كوفي ود عنــــان امرقوا طالعونا الخلا او في اي مكان في الصومال في الواغ واغ اوفي جبال عمّان وخلوا الناس تشوف و تعرف كمان وتشوف الدواس ومنو الفينا البفز وجبان و كان بقيت راجلا صح و ربحت الرهان ليك حق بعد داك تلعلع وتطوّل علينا لسان وبنتوضى بموية البحر ونرجع للبلد ننهان زي رجعة الباعونا ودخلوا البلد عميان وباعوا دم الشهيد بكل خنوع وهوان لكني بالطلاق اسمع هوي يا بشير الضان ماني الافزر البندرش لزيك ضعيف خيبان وماني الهوين رويجلا ضعيف ايمان ماني الافندي زول معايش لابد ذليل وجبان نحن رجال اولاد رجال وفي الحارة لينا مكان وفي المكارم والمكاره حرم بنكرم الضيفان وماربونا عشان نركع لدلق سلطان وما ربونا عشان نسكت بالظلم ننهان وماجابونا تمومة عدد في البشربلا ميزان والاعور بنقولو اعور لو تحرق البلدان والساكت عن كلام الحق قالوا اخرسا شيطان ودينّا وعقيدتنا خدمة الشعب و السودان خدمة سودانا الكبير بلدنا و سيد الاوطان امرقوا لبرّة وخلوها Man to man
واسمع يا عمر الكلك ظلم وضلام نحن ما عندنا كبير الا المولى سيد الاقسام الرجالة ماها نياشين ورتب وهدوم حكام ولا دقون ضلال تهلل تكبر لاعبة بالاسلام الرجالة قيم واخلاق ومواقف موزونة باحكام الراجل ما بجي بالسرقة و الناس رقاد و نيام بجي بالباب عديل وبقول يا ناس يا عووك سلام وبعد داك بقلع عديل من غير نضم و كلام وما بياكل حق الغلابة بالظلم وحرام
لكنك يا زولنا يا هذا التعيس ورخيص جيتنا بالسرقة والخدعة والبلبيص غدرت بالصناديد ومتقوي بابليس ات ماك زول حارة وفارسا نبيل و جعيص ات زول دنيا ودينك فالصو في التدليس ات زول صفقة وفايقا شبع ترقيص وخليك حريص خليك حريص وانت القايد وانت الرئيس انت العريس وين المساكين الضاعوا في حرب الفطيس انباعوا بسجم الكلام انباعوا بتمنا بخيس وانغشوا في الزمن الهويس وخليك حريص خليك حريص انت القايد وانت الرئيس انت العريس واصل نكاحك ايها العر البخيس وبكرة ليكم نحن زي كلاب في قنيص وتب مافي ليكم ابدا والله ميس والبفرنب بكرة بلبس قرمصيص
وليك سلامي امي يا حاجة الهدية واعفي عني ماني قاصدك يا هدية و يا رضية بدور افش غبينتي الجوّه في الجوف والطوّية وماني راكب دبابة وشايل بندقية شايل قولة الحق والصدق بحسن نية وشايل في كلامي ملامح من قضية قضية ظلم واضحة فاتت الحد بل عصيّة والصدق يا يمة ضايع الليلة في خوف الرعية ما عمر العرور شايل عصا وقنبلية والبفتح خشمو ما ليهو حق في الشكية والشكية يمة قالوا لي ابو ايدا قوية لكن ما في زول مات قبل يومو في الدنيا الدنية والبقولو الحق قلال والله ما بخافوا الاذية وكم شهيدا بدمو ناضل وهو ناضل للقضية وكم مناضل في سجنو كاتل شامخ النفس الابيّة وكم مهاجر في المنافي لسه ماسك في الهوية وحواء والدة جابت التاية الشهيدة السمهرية واقدلي وتلّي ايدك ياشهيدة يا عنيدة يا بنيّة
وسلام عليك امي يا حاجة الهدية ودعتك الله واديك صحة واديك عافية وحجة لمكة العلية وقولي للمجرم وليدك ماني امك وابرا منك وانت سفاحا محنك وانت لفاحا محنك ماني امك وابرا منك وابرا منك يا اذيّة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
هشام هباني
ياسر منصور عثمان
فيس بوك
تويتر
انستقرام
يوتيوب
بنتيريست