|
|
|
 Re: صه يا كنار ... كابلي و ابو عركي ... كلام عجيب !!! (Re: يحي قباني)
|
اللقاء الصحفى كما وجدته على النت :
زوجة الصاغ محمود أبوبكر: كنت له كأكواب بابل على ألسنة البلابل..!
الخرطوم: حكايات
فاطمة مدني، حرم الكنار الراحل الصاغ محمود أبوبكر، كانت وهي تتحدث إلى للزميلة آيات مبارك كأنما تعرض وثائقاً، فتتري صوراً عبر درجات صوتها نكاد نشتم منها عبق الماضي الجميل الذي لا زال ممسكاً بتلابيب البيوت العتيقة التي تحكي رواية ذلك الزمن الجميل.
(1)
الوقت أصيل.. تعسجدت أطراف السماء، تخضب لون الأفق بالذهب عندما دخلتُ (خدر فاطمة) قالت بزهو: كان يناجيني في كل قصائده، مثلاً أغنية أحمد المصطفى الشهيرة (زاهي في خدره):
زاهي في خدره ماتألم
إلا يوم كلموه تكلم
هف بي الشوق قال وقال
قالوا القطر تقدم وكفرة نيرانا زي جهنم
حن قلبو ودمعه سال
كتبها وهو في ليبيا (الكفره) وكان الزمان حرباً عالميةً ثانية، إنه الحُب في زمن الحرب، وعندما سألتها عن مناسبة الأغنية قالت (يا بتي الغنية دي مناسبتها في بطنها).
(2)
بين قسمات ممعنة في الجمال وتقاطيع تتسامى في اختراق نبضات الزمن الجميل لأجمل قصة حب في زمن الحرب وأوتار أيامٍ ماضية تعزف مقطوعة في الحرب العالمية الثانية لتحكي حميمة العلاقة بينها وتلك الأيام التي تسربت خلسةٍ فانطرحت أساريرها وهي تحكي لنا عن أمسها الجميل، كنت حاضرة في صيغة (هند) أيضاً في أغنية أيه يامولاي للمرحوم خضر بشير:
وإذا البان تثنى وإذا البلبل غنى
فأعلمي ياهند أنا نكتم الحب ونفني
أعشق الطبع العليا فيك يا أخت الثُريا
لم يكن طبعك إلا عند من كان نبيا
وتواصل هند، عفواً فاطمة مدني، اجترار ذكرياتها مع صاحب (صه يا كنار) قائلة:
أسرته من أعيان قبيلة الحلنقة بكسلا، والدته شلاليه ووالده أبوبكر حسن كان ضابطاً (يوزباش)، ولد الصاغ في بور 1908م، ودرس بعطبرة الأمريكية ثم الأبيض الأميرية وحلفا الأميرية الوسطى وأكمل تعليمه الثانوي بكلية غردون العليا متخرجاً بإمتياز في قسم الكتبة وعندما بلغ الأربعة عشر عاماً أتخذه مدير قسم عموم إدارة السكة حديد سكرتيراً خاصاً لمراسلاته السرية، إلتحق بالجيش في العام 1937م وتخرج برتبة ملازم ثان وأشترك في الحرب العالمية الثانية في واحة الكفرة الليبية.
(3)
بمداخلات الدكتورة رجاء محمود (إبنة الصاغ) واصلت (زاهي في خدره) حديثها عن الكنار قائلة:
وعند إستقالته من العسكرية وإثر مزاح مع صديقه المحامي (عُقيل أحمد عقيل) كان الرد قصيدة بحجم وهول 'صه ياكنار' التي أصبحت شعاراً لمؤتمر الخريجين بعد أن أيقظت الضمائر الحرة وأزكت نار الوطنية بعد أن لحنها الموسيقار إسماعيل عبد المعين في صدفة جمعته بمحمود على متن (قطر) منتصف الأربعينيات:
صه يا كنار وضع يمينك في يدي
ودع المزاح لذي الطلاقة ودد
صه غير مأمورا وهات هواتنا
كالأرجوانة وأبك غير مصفد
فإذا صغرت فكن وضيئاً نيراً
مثل اليراعة في الظلام الأسود
وأبذل حياتك غير مغلول اليد
تمضي زوجته قائلة: له عدة دواوين منها (أكواب بابل من ألسنة البلابل) صدر في 1961م كما كتب للمسرح أعمالاً مميزة مثل (أميرة البحرين) و(أميرة فرنسا) التي كتبها في ذكرى وليم شكسبير وفازت بالجائزة الأولى وتبرع بقيمتها لإتحاد الكتاب العرب، كان عازفاً ماهراً للعديد من الآلات الموسيقية مثل الكمان والعود والبيانو إضافةً إلى إجادته الرسم والغناء.
| |
  
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: عاطف عمر)
|
وحاة الله الخالقني ، هي هترشة.. زيها و زي حكاية الناس السمحة البتقول ليك ( ابو كديس يعني شنو)...
هي هترشة و فيها... سب كتير من شاكلة ( قنطار شتيمة لعام يحتضر... دي واحدة من قصايد فضيلي جماع قدس الله سره...!!)...!!!..و لكن قبال ما نقلب ظهر المجن بتاع ناس معد يكرب ولا شنو كده ما عارف...خلينا نبدا بالتحيات الزاكيات الطيبات...!!
تحية لأمي فاطنة مدني...!!
تحية لروح صديقي الجميل خالد الحاج..
تحية لأستاذنا عبد الكريم قباني .. اينما كان و كيفما كان... فالصوت برضك ذاكرة ..وجدان...احزان.. و حاجات تانية حامياني على قول صديقنا التجاني حاج موسى...!!
تحية لأصدقاء الضجيج الخرافي.. وليد كوش.. ميسرة غاندي... طارق شنقا...(ديل اولاد الدهشة القاعدين يكشتفوا سر الحاجات السودانية و يعملوا بيها نايميين..!!)
تحية لأصدقاء الصمت الخرافي.. الكمنجست.. استاذنا حمد اسماعين..!!
التحية الي صوت ليلي المغربي لمن تقول ليك ( و تباع التذاكر باجزخانة/ صيدلية عباس رشوان..!!)...
التحية لعباس رشوان.. الكان قاعد يبيع تذاكر الفرح الجميل ز ي السلامو... عليكم..ومعاها لون المنقة يا الشايل المنقا ذاتو.. و مندكورو شكلة منقة..!!!!
وبعدها.. يا قريبي.. قنطار شتيمة لعام يحتضر ...تماما زي ما قال ليك فضيلي جماع قدس الله سره..!!
و انا اسمع لهذه المادة النادرة.. اول بالتبادي صرفت كم (دال) لعمك القال (هكذا كان الصاغ محمود....!!).. يعني كان بتفرق شنو لو صاحب الصوت ( و انت عارف كويس) تم باقي الحكاية .. اللهي نحنا عارفنها.. لكن خلق كتيرة ما جايبة خبر..؟!!!!!
ثم رجعت بي ذاكرة حزينة لأصوات جميلة و نبيلة.. زي مثلا .. عمك المرحوم وليم اندرية.. لمن يقول ليك (كفاية مزاح.. بدور ارتاح..) .. و القام بيها سداري استاذنا جيلاني الواثق.. ملك ملوك الجاز.. أو كما قال...!!..
انت معاي يا عمك ولا اقوم اتخارج..!!!!
بيد ان الأمر لا يقف هنا يا صديقي..!!
اصلا عركي ده زولنا..و لمن نعبر عن اعجابنا الشديد..ممكن نصرف ليهو (دال) و هو بيكون عارف..و بيهز اكتافو لاهيا..و يقول ليك (الجماعة انبسطو لمن خانم التعبير..!!)..
لكن...!!
عرجنت الكابلي.. دي مافي طريقة نصرف ليها المعلوم.. لأنو مهما كان الكابلي برضك استاذنا ( و من عجب قاعد يسمع كلامنا .. و لو مكضبني يا يحي اسأل و ح نجيب ليك بيان بالعمل.. لمن الكابلي ذاتو يستغرب..!!)..
ركز يا يحي في صوت الكابلي لمن يقول:
انا ، يا كنار ، مع الكواكب ساهد..
اسرى بخطى ،و ملئ بها المتعدد..
وعرفت اخلاق النجوم..
وكوكب يهدي البيان ،
وكوكبا لا يهتدي..
وكويكب جم الحياء..
وكوكب يعصى الصباح بضوئه المتمرد..
ياخي انا هنا ، اتجاهلت ليك الوطنية و شنو كده ما عارف ، و قمت شطحت و صرفت الــ(دال) المعلومة اياها لأبونا الصاغ في ذات نفسو ( عفوا امنا فاطنة مدني ، فنحن قوم لمن نطرب بنسوي البساط احمدي للطيش..!!)..
شفت يا يحي البلاغة قامت بينا.. كواكب عمك..حسبنا منها اربعة .. و الباقي ربك يعلم..!!
لكن الطلع ديكنا ذاتو... حكاية ( و كويكب جم الحياء..)..ياخي دي لا عندها علاقة بوطنية ولا يحزنون..ولا يعرف سرها الإ العظيم دكتور عقيل احمد عقيل..!!!.. انا برضي اعرف يا فاطنة مدني حكاية الكويكيب الجم الحياء دي..!!
وحاة الله الخالقني ، هي هترشة يا صديقي .. و ما تشتغل بيها كتير..!!
ثم هذا الحزن العجيب في دار امسودان ، يا يحي يا صديقي ، الصاغ من دار حلنقة..و صديقه سبب قصيدة صه يا كنار من دار عجيبة خلاص..!!استاذنا دكتور عقيل احمد عقيل.. من دار الرزيقات في غرب السودان..و هي الدار التي منها صديقنا مطر قادم ( الزول الوحيد الكتب سيرة دكتور عقيل في هذا المنبر..!!) و منها صديقنا عزت الماهري الذي كتب عن اغنية ( ليالي ا لأنس لذاذ بالحيل)..و سيرة الشاعر العميان الذي اخذ يستنجد بود باقير .. وبيقول ليه مستفسرا ( يا ود باقير.. ما قلت خبير وين السلمة ، وين درب البير..!!)...و الأغرب من كل ده.. ديل كلهم من دارفور.. و معاهم العظيم اسماعين عبد المعين..!!.. شفت العذاب ده ككيف يا يحي؟..
عقيل احمد عقيل ، مطر قادم ، عزت الماهري... من نفس الإثنية.. التي اشتاطت وجعا و أسى و حسرة.. لتنجب حميدتي..!!!!
غايتو نحن يا صديقي مع السودان القديم.. سودان الممكن فيهو تتوفر فرصة ان واحد من الحلنقة في شرق السودان ( الصاغ محمود ابوبكر) .. ممكن يكون عندو صاحب من الرزيقات في غرب السودان (دكتور عقيل احمد عقيل)..و يقوم يمازح صاحبو و يقول ليهو: صه يا كنار ، و ضع يمينك في يدي..!!.. من غير ما تقوم ثقافة الحنبكة والحقد تقول ليهو.. الموضوع جاب هامش و شنو كده ما عارف..!!
هنا واحدة من اشراقات الصاغ يا يحي..و كنت ساهديك حاجات تانية.. و لكني قلت لنفسي.. فلنحتفل بالصاغ ... و كنت ايضا سأجلبها بصوت العملاق .. ابونا و استاذنا خضر بشير (ناس الشي ذاتا) ، و لكني اخترت هذا الفيرشن..و الذي فيه هي بصوت العملاق النور الجيلاني.. اختياري للنور.. راجع لناس ( ابوكديس ديلك).. لأنو عندنا واحدين كده.. من جملة خلق المزيكا في السودان.. معجبين بشرحبيل احمد و النور الجيلاني..و الأخير عندهم فيهو تنظيرات كده ما انزل الله بها من سلطان.. اما عنا نحن.. فيصيبنا الغرور.. بانو حبنا للنور الجيلاني قد اصبح مسألة جينات تجري فيمن خلفنا..!!
ثم في هذا الشريط العجيب... تحية لزميلي و برلومي الطيب عبد الماجد.. التقيته زمن ما ، قريب من زمن الحفلة دي ثم ذهب لحاله و ذهبت انا لحالي.. ثم صديقي حكيم من جنوب السودان (ناس بحر الغزال ، جور شول) ، و الذي يعيش معي في نفس المدينة التي اسكن فيها الآن..!!
ثم الى بنات ابا ميري نون ، و لوشيا ...و واخي و صديقي الجميل.. عبدالكريم رجب.. و ديل اصدقائي من زمان السودان كان مليون ميل مربع ، و لآزالت الصداقة بيننا ممتدة..!!
ثم...
انا ، يا كنار ، مع الكواكب ساهد..
اسرى بخطى ،و ملئ بها المتعدد..
وعرفت اخلاق النجوم..
وكوكب يهدي البيان ،
وكوكبا لا يهتدي..
وكويكب جم الحياء..
وكوكب يعصى الصباح بضوئه المتمرد..
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
ثم بعد اذنك يا يحي... اضيف (ليالي الأنس) تحية لصحابي الجنجويد..عقيل احمد عقيل ، مطر قادم ، عزت المهري و الصاغ محمود ابوبكر..و هي بصوت نادر.. هو صوت استاذنا نجم الدين الفاضل...!!
هههه .. نسيت.. و الجنجويد ابو العركي البخيت.. القام سوا حفلة عرسو في نيالا... و بالطبع الجنجويداية.. بت ابا امنا و استاذتنا دكتورة عفاف الصادق..!!!
شفت السودان ده بقى حزين ككيف يا يحي..!!!!
و الأكثر لذاذة من ده كلو.. صديقنا السوداني القام رفع غنية ليالي الأنس في سيدنا اليوتوب..و بكل براءة كت عنوانها كالآتي:
Najm al-Din al-Fadil nights Humans Orchestra
أي و الله يا يحي.. ليالي الأنس تساوي: نايتس هيومانس...!!!!
وبرضك يا صديقي..
انا ، يا كنار ، مع الكواكب ساهد..
اسرى بخطى ،و ملئ بها المتعدد..
وعرفت اخلاق النجوم..
وكوكب يهدي البيان ،
وكوكبا لا يهتدي..
وكويكب جم الحياء..
وكوكب يعصى الصباح بضوئه المتمرد..
عفوا..
هل قرأت ابراهيم كوجان في ( فراشات سيسليا الحزينة)..؟.. ياخي ده ماركيز عدييل..!!
عفوا للهترشة..
و سلاما..
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: عاطف عمر)
|
Quote: إنه مجموعة عبقريات يا قبة
عبقرية الكلمات
عبقرية اللحن
عبقرية الأداء
ثم
عبقرية الإختيار والتقديم
ثم عبقرية ( إختيار الوقت المناسب ) للتقديم
فصدقاً قد آن الأوان لنقول لقومنا
صه يا كنار |
و عبقرية امثالكم ممن يهزهم مثل هذا الكلام يا صديقي ...
بالله هل يصدق ان هذا العمل حبيس مكتبة الاذاعة ..؟
وهل يصدق ان صاحب المقام الرفيع عبد الكريم الكابلي يعيش في المهجر ؟
و هل يصدق ان العبقري ابوعركي البخيت يعيش كفافا في بلد امتلأت فيه كروش الجهلاء و اشباه المثقفين ؟
مسكين السودان ... به ابتلاء اسمه الحكومات الديكتاتورية ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
| Quote: وحاة الله الخالقني ، هي هترشة.. زيها و زي حكاية الناس السمحة البتقول ليك ( ابو كديس يعني شنو)... |
الاقتباس الاولاني ده يا صديقي كبر ...
بس عشان اقول اول حاجة جات في راسي لما قريت ردك ...
( إنّا لله ياخي ... مالك علينا .؟ )
__________________________________
و حياتك كلامك داير اقتباس و رد سطر سطر ...
الله يقدرني اكون قدر الكلام العجيب الكتبتو ده يا زول ...
اصلوا الكلام الزى ده بودر بي يا كبر ... وانحنا عايشين علي هبشة و ننفجر من الوحشة ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
انا ، يا كنار ، مع الكواكب ساهد..
اسرى بخطى ،و ملئ بها المتعدد..
وعرفت اخلاق النجوم..
فكوكب يهب البيان ،
وكوكبا لا يهتدي..
وكويكب جم الحياء..
وكوكب يعصى الصباح بضوئه المتمرد..
__________________________
اما انا يا صديقي فصرفت الــ(دال) لهذا الزمن المعكر ...
لقد اصبحنا صغاراً جداً يا كبر ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: عاطف عمر)
|
Quote: أنا لو كنت في مكانك يا قبة ....
أدور لى شكلة من مافيش مع أى زول يجي ماشي بالشارع عشان بكري يسحب البوست دا
ياخي أنا قريت كلام أستاذنا كبر زى عشرمية مرة
وفي كل مرة أفهم حاجة جديدة
سجم خشمك إنت يا المطالب أدبياً بالرد عليه |
بقت فيني يا عاطف قولة عمنا ود الرضي
يردد لي نغيماً ... تشتاقله المسامع ...
اعاين فيه و اضحك .. و اجري و اجيهو راجع ...
___________________________________
طبعاً بضحك علي روحي و الورطة الوقعت فوقها ...
___________________________________
ياخي كلام فيهو ترف و بذخ ... و يسوى وجع القلب ...
الله يقدرنا بس نقطر لينا قطره في بحر كبر ده ...!!!
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
Quote: و الأكثر لذاذة من ده كلو.. صديقنا السوداني القام رفع غنية ليالي الأنس في سيدنا اليوتوب..و بكل براءة كت عنوانها كالآتي:
Najm al-Din al-Fadil nights Humans Orchestra
أي و الله يا يحي.. ليالي الأنس تساوي: نايتس هيومانس...!!!! |
للمجتهد أجران، هسي دا يأجروا كيف
لكن بتحسين النية نقول: أليس الأنس من الناس؟ وتيب!
أقول هذا للمخارجة من التعليق على سِفر (سَفَر) كبر
ــــــــ
ثم أول مرة أسمع نشيد يهتف بلحنٍ حزين
---------
أتمنى أن يضيف صديقنا قباني هذا البوست إلى فرع أبو كديس
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: عواطف ادريس اسماعيل)
|
تحياتي قباني وضيوفه الكرام :
هذا البوست وهذه الكتابة من النوع الذي يهدئ الخاطر ويرخي عصب الروح المشدود على وتر الغربة والزمن البئيس .
يعلم الله أنني أدخرت هذا البوست وماخطه يراع استاذنا كبر من نهارأ بدري للحظة خاصة وخاصة جداً تحضرت لها جيداً .
فنحن ياصحاب صرنا نسرق من الزمن بعلمه لحظات نستعيد فيها بعضا من الذات وشيئاً من الذكريات والكثير من الألم ،،
عركي وكابلي وخضر بشير والنور الجيلاني وزمناً أخضر وشوقاً كان وطناً كان ، ياله من شجن أبله يجتاحني الآن .
ياكبر انك تهدينا في أحايين كثيرة إلى صراط السودان القديم ولكن أسمعت إذ ناديت حياً . ولكني والكثيرون مثلي وانت منا
سنكون الفرقة الناجية شاء من شاء وابى من أبى . وإن تفرقوا وإن تششتوا ستظل سوداناويتنا محجة بيضاء ورثناها كابر عن كابر
بتاريخنا وغنانا وحكاوينا وليالينا وعركينا وخضر بشيرنا وذكرياتنا التي لاتخون أبداَ فيا كبر أحيانا يصيبني الهم والله على ما أقول شهيد
حين أراك قد خضت وحل السياسة القذر وأخاف على نضميك السمح من ان تجور عليه وعثاء السياسة . ولكنا نحن هكذا وهذا ماجبلنا عليه .
وأرجو منك صادقاً أن تجر الدال لكفيلي الذي أرهقني من أمري عسرا . ولتكن كما كانت في تلك الليالي البهية .
وياقباني
انشاء الله تسعد ايامك كما اسعدتني في هذه اللحظات
وياليت المخضرم / أحمد الأمين أحمد يمر من هنا ،،
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: عمر مصطفى مضوي)
|
| Quote: فنحن ياصحاب صرنا نسرق من الزمن بعلمه لحظات نستعيد فيها بعضا من الذات وشيئاً من الذكريات والكثير من الألم ،، |
جملة ... يا ود مضوي لخصت فيها حياتنا ...مبداها و منتهاها ...
لا ادري هل كبرنا ... ام صغرت الاشياء في هذا الزمن ...
استاذنا محمد النور كبر ... والذي كنت اتمني انا اناديه عمنا كبر ... احتراما و تبجيلاً ...
لولا انه سرد قصة كانت في العام 1984 وهو طالب في الثانوي في كادقلي ...
ومع الاسف الشديد العام 1984 انا مهندس معمارى ... اعمل في مكتب عبدالوهاب و عبود ( كاربلن الاستشاريه ) ...!!!
فانفلتت مسألة العمومة ...:)
و بت انا في مقام العم سناً و لكنه يبقي في مقام العم ادباً و حكمه ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: معاوية الزبير)
|
Quote: للمجتهد أجران، هسي دا يأجروا كيف
لكن بتحسين النية نقول: أليس الأنس من الناس؟ وتيب!
أقول هذا للمخارجة من التعليق على سِفر (سَفَر) كبر
ــــــــ
ثم أول مرة أسمع نشيد يهتف بلحنٍ حزين
---------
أتمنى أن يضيف صديقنا قباني هذا البوست إلى فرع أبو كديس |
ابوكديس ونص كمان معاوية ...
بالله اعدت سماع الكوبليهات الاربعه زي 750 مره ...
و في كل مره اتعجب علي الاداء و نطق الكلمات و مخارج الحروف ...
ثم تقع عيني علي بعض من يكتب ( تغمضه ) الله بواسع رحمته ... و ( الجسمان ) ...
لا انتقد من كتب ربما كتبوها علي عجل ... ولكن صار هذا ديدننا ...
كل شئ جميل بات من الماضي و اهل الماضي ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
يحي..يا صديقي..حبابك
وحباب سمار الصفا هنا..
انت قلت صرنا صغارا..ونعم القول يا صديقي..
اهلك البقارة عندهم مثل بيقول (الشدرة كن مالت بتميل على اختها)..وهو ما يعادله كلام ناس البندر بتاع الإشجار تموت واقفة..ولكن مجازفة معنى الموت البتقوم ثقافة ناس الخلا بتديك ليهو بجرعة هادئة و دبلوماسية بهية..فيكون الأمر مجرد ميلان ساكت..لا علينا..!!
والصاغ تناول الحتة بتاعة انو الناس ممكن تكون صغار..والأمم برضك..فانظر قوله:
فإذا صغرت فكن وضيئاً نيراً
مثل اليراعة في الظلام الأسود
وانا يا صديقي شفت اليراعة الحنونة في الضلام الكاحل..فهي فعلا كائن جميل وعميق..يصنع البهجة في اغرب الظروف..فهكذا يا صديقي كانت اشجار ذاك الزمان الماضي..يعني حتى لو ادلهمت عليك الخطوب وصابك الياس تجد من ينصحك بان يكون يأسك مشرقا كما اليراعة في الضلام الأسود..!!
ونفس فلسفة الصاغ التي اطلقها في عبارته تلك (ونحن قوم يا صديقي مع كل سفة تمباك نرميها ،نرمي معها حكمة بليغة)..نفسها تنطبق على الأمم..بعض الأمم يدرك انه صغير الحجم والجغرافيا والإرث..ولكنه يتفاءل ويعمل على اكتشاف نقاط القوة والإشراق فيه فيعمل على تطويرها..ثم يخرج للدنيا بنهجه الخاص..فيصير له اسم..كوستاريكا يا يحي..امة صغيرة..ولكنها اختارت نقطة تحديها التي تعرفها وعزفت انغامها الخاصة التي تعرفها ثم كانت..اليوم خلق كتيرة لا تعرف عن كوستاريكا الإ بعد ما تراجع الخرائط ومعجزة الزمان (غوغل) ..قامة مثل نعوم شومسكي..يعتر لسانو كتير على دويلات مثل غواتيمالا ونيكارغوا..وغيرها من امم الكاريبي..وياحليل فاطنة السمحة لمن رمت شليلها في الكاريبي..!!
السودان يا صديقي..لمن تشوفوا في عيون الغرباء..تقول لذاتك (انا لله)..بلد ليها شان خطير في ذاكرة اهل الضمير..الإ اهلها..فهم لا يعرفون عنها..وما يعرفونه من جمال يقومون بتدميره بصورة شريرة للغاية...نحن الأمة الوحيدة التي تحرص على قتل ذاكرتها الجميلة بلؤم تحسد عليه..احد الصديقات الأجنبيات..ذات مرة قالت لي..ياخي انتو مجانين مفروض يربطوكم عدييل كده.. !!..لأنها بتقرا السودان في الأخبار مكان بؤس وشر وضبح وكتل واغتصاب..وبتقرا السودان في صور اخرى كتيرة..سودان الأسرار..الجمال..الحضارة..والإنسان الخلاق..!!
هي كن وقفت على (القطيع) هين يا قريبي..الخوف الإصرار على المحو بصورة تدميرية..!!
الهترشة يا حبيب ما بتستاهل الرد ..خطو الحافر..فيكفي انها احدثت الدهشة وفتحت عيون الذاكرة قدر الفنجال..الله يستر ما يجينا واحد يسأل الفنجال ده شنو..وليهو الثفافة السودانية..هي الثقافة الوحيدة التي تشبه به العيون..!!
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
صديقي عاطف..حبابك
ياخي كملتك دي قاعد افرح بيها فرح ما ح تتخيلو..!!
حبوبتي ام سماح ام عسكرية بت نصر السكران..كانت حينما تغضب مني امي وانا صغير..تتولي هي امر عقابي..اها بتقوم تشيل ليها مطرق (سوط شدر) ما يوجع ضبانة.. تضربني بيهو في الأرجل (بعدها عرفت ليه العسكر بتكون الوصية ليهم اضرب في الرجل لأنها ليس مكان مقتل)..وتقوم تقول لأمي: الزول ده شغلو فسالة ساكت..!!
نعم ياصديقي..لم تخطئ مطلقا حينما تصفني بالفسالة المنبرية..لأن تواقيع زمنا والريتم بتاعنا الخاص ريتم مزاجي..والأغرب نعرف محاسن الأشياء فينا..لكنا نقتلها بالخوض في مخاضة اخرى..!!
نعم يا صديقي متذكر حكاية محلات عباس رشوان..الكان قاعد يبيع تذاكر الفرح والبهجة..ومتذكر حكاية الترابيز واسعارها..وايضا تلك الأصوات النبيلة الحزينة..!!
في مدن كندا..ويا سبحان الله يا عاطف..بتلاقي نفس التفاصيل..والملامح الكانت زمان في مدن السودان الكبرى..توتو كورة..اخبار دور السنما..اخبار الحفلات..!!
اقول بهذا..ونحن كنا نقرا في صحف الخرطوم تفاصيل من شاكلة (اين تسهر هذا المساء)..شوف حميمية العبارة دي كيف يا عاطف..!!..يعني رغم البؤس والغم..لكن برضك كان هناك تفاؤل..ولك ان تتخيل كيف كنا نسهر في ذاك المساء..بعضنا يجلس ليناقش كتاب..بعضنا يجلس ليناقش مقطوعة مزيكا..بعضنا يجلس ليسمع انطوان بارود..فيروز..كوتي فيلا..امو سنغراي..بوب مارلي..البي جيز..ترافولتا..بوب مارلي..أبا..وبعضنا يجلس يستمع لدندنة حميمة قد تكون هي (صه يا كنار )..!!
ايام الشباب يا عاطف..كنا وقتها في جامعة الخرطوم..وكانت عقد الجلاد في عز وضوحها (يا بحر قم حرك تحرك..لأنك عندي كل الخير..الصدق اصبح في عيون الناس مظنة.. الأهلية..)..وكانت لهم اغنية مطلعها بيقول (يا جمال الليل والخرطوم بالليل)..فقالت احد الصويحبات: هي الخرطوم بالليل فيها شنو يعني؟..فحكيت ..هترشة ما انزل الله بها من سلطان..فكانت تلك الصديقة كلما تسمع تلك الأغنية..بتقول شرحو:الهترشة بتاعة كبر..!!..الأغرب التقيتها بعد سنين من التخرج..وقالت لي:تصدق اي حاجة حكيتها عن الخرطوم بالليل..اكتشفت انها صح..لكن العارفنها شوية (نظام عواجيز بعبارتها)..!!
نحن شعب عجيب يا صديقي..نقتل ذاكرتنا باصرار وسبق ترصد..في حين بعض الأمم بتنجر ليها لحظة تاريخية وبتقوم بتسويها تاريخ عدييل..!!
واحدة من اشراقات اين تسهر هذا المساء..ان تستحم..تتعطر..تولع شمع معطر..وتصمت ستين دقيقة..فتسمع (صه يا كنار) وفق الفيرشن بتاع عركي والكابلي..ياخي بهجة اسكت ساكت خليها..!!
كتر خيرك يا صديقي..زمان الواحد قايل الفسالة مشاغبة طفولة..لكن اليوم ..اتفق معاك تماما بقت فعل مقصود..و الله يجازي الكان السبب..!!
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
معاوية ..حبابك يا صديقي..
تتخارج ككيف يعني؟..ماهو الحكاية هترشة..ونحن قوم في الهترشة اكثر افصاحا من خطابنا الرسمي..!!
فكرة صاحبنا لذيذة جدا..وفيها اجتهاد شديد..عني انو الزول ده من شدة الأغنية ما عجبتو..قال اخير يقدمها لشعوب غير ناطقة بيها..!!
واحدة صومالية يا معاوية..شافت البعيو بيغني (ست الودع)..واهلك الصواميل عندنا في كندا..متمسكين شديد خلاص..اها في بداية الغنية البعيو في حتة بيقول (يا لطيف)..اها الزولة مصرة انو الغنية دي مدحة ولا غنية دينية ولا شنو كده ما عارف..!!..
طبعا اول حاجة فكرت فيها انو اصحح للزولة دي المفهوم..واشرح ليها الغنية..لكن قام صاحبي السنغالي الحاج صو( ياخي ده بيعرف حاجات عن موسيقار نوبي اسمو حمزة علاء الدين..ياريت اكون ما لخبطت في الأسماء لأنو هم اتنين..واحد في السودان وواحد كان في امريكا)...وقال لي: الفكرة طالما هناك شغل مزيكا خلق تواصل مع الزولة دي..خليها تعيش في تصورها..!!!
طبعا هو نوع من الغش.. لكن برضك يا معاوية خلي الجماهير تعيش في حكاية نايتس هيومانس..والباقي هين..!!
ودمت..
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
عمر..حبابك يا صديقي
يازول تلاتة (دال) لكفيلك..والرابعة من عاطف ويحي..ومعاوية الزبير شوال ان لزم..!!
كتر خيرك على المطايبة..عندي سؤال صغنوني..والهترشة بتجيب الهترشة..!!
في 1984 كنا طلبة في مدرسة كادقلي الثانوية (تلو)..وقمنا عملنا رحلة..مشينا فيها بحيرة كيلك..في الرحلة دي كان معانا شريط كاسيت واحد كنا قاعدين نشغلو على طول..وكان الشريط ده للفنان الليجند..فنان عطبرة استاذنا مصطفى مضوي..وقع ليك السؤال؟..
كانت في الشريط اغنيات مثل (تاتي..تاتي يا رشا تاتي..مسكين انا..الوليد الضيف ودرتنو كيف..الخ)..
هل عندك علاقة باستاذنا مصطفى مضوي ولا اسم على اسم؟..
تحياتي ليك وليه..
والله يا عمر السياسة دي فسالة ساكت مننا على قول صديقنا عاطف عمر..وهي اصلا شغلة ما حقتنا لكن الظروف جبارة..وهي شغلة سرقت اجمل اوقاتنا وبرضك ما جابت حقها..وليك وعد مني (اصدقاء غيرك برضك ذكروا لينا الحكاية دي من باب المحبة)..ح نقوم نجليها ..وسوف نعمل بيها بالمشاهرة..يعني شوية شوية..!!
الأمم يا صديقي..بتشتغل بمبدأ تقسيم العمل..ناس تدير الدولة..ناس تداوس الدولة..وناس تكتب ذاكرة الأمة بحميمية..عشان الأجيال الجاية ما تتعقد من روحها وتجيها نفسيات..وهنا بعض الإشراقات النادرة..والأسعد يا عمر ان تجد من يلطقتها وتكون عندو محطة دهشة بتثير التأمل والحنين..!!
عبرك يا عمر..اسال صديقنا واستاذنا يحي قباني..ان يلتفت برهة لفنان نادر اسمو سليمان ود الحاوي (ما شقيتك انتا الشقيتني..)..ياخي الزول ده عندو صوت واحساس بالغنا عجيب خلاص (والله يا يحي نحن ديل ياهم اللمن نقوم الصباح ونقرا الجرايد بنلقى الناس شايلة صوتنا و مفحطة بيهو من شاكلة مهمشين..كارهين لذاتهم..و شنو كده ماعارف..شرحو..العاصمة لم تكن هي الخرتوم فقط..وانما هنا امدرمان التي كانت تعبر الفيافي في حكاية صديق عباس بتاعة عبر الأثير بكتب خطاب لست هواي وارسله..تقراها لأخر حرف ..تبداها تاني من اولا.. الخ).
فلنكن يا صديقي يا عمر نحن الفرقة الناجية على قولك..ونكتب الذاكرة بحميمية..مين عارف..جايز النفوس تهدا شوية وتعيد ترتيب امورها..!!
استاذي وصديقي احمد الأمين..اجزم انو قرا البوست ده كم مرة..واكيد سوف يشرق هنا..فاحمد زول اشراق..يجذبه الوصل الصادق..هو صوفي جميل في محاريب الجمال..!!
واقول له..
عرفت اخلاق النجوم يا احمد..
كتر خيرك يا عمر..والفرح بالفينات يا صاحب..
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
احبابنا أهل الزوق ،،،Quote:
كتر خيرك يا عمر..والفرح بالفينات يا صاحب.. |
هل تصدق ياكبر ياصاحب إنو الفرح صغر لدرجة التلالشي أحيانا فنحن حيث نقيم نفرح فرحاُ طاغيا إذا لحقت إشارة المرور خضراء
أو لحقنا البقالة قبل الآذان أو رجعت بيتك قبل ما الكفيل يتصل عليك ياخ نحن صرنا كومة من الأمال الصغيرة والتافهة جداً .
ولم يجود علينا الزمن بمثل هكذا كتابة يتغير طعم الفرح في حلوقنا ونصبح مرة أخرى أسوياء كما البشر نشتهي الغمام وصوت الريح وريحة الدعاش
ونغني كما الأطفال للزمن الفلاني .
هل تصدق ياكبر مازلت اطرب طربا حنينا وشجيا حين اسمع بلال موسى يغني ( ثلاثة سنة ويوم ورا يوم بصير جميل مننظرك أنا ) لا لسبب غير أن هذه
الأغنية أهدتني أياها في غابر ثمانينات القرن الماضي بنية مازالت ايدينا ترتعش حين نتقابل . ومازالت عينيها تحمل نفس السحر الذي كان .
ياكبر السودان ده لحظات الفرح التي أهذانا أياها لاتعوض . ولاتعادلها أي لحظات أخرى زائفة مخاتلة في أي غربة لعينة كانت .
أما مصطفى مضوي من نواحي عطبرة فإني قد سمعته كما سمعته انت في تلك الايام الحنينة على أطراف النيل في بلدي التي قال عنها شاعرها
قلب الطبيعة في جنيبيك خفاق والنهر خلف رباك الفيح دفاق .
عمنا يحي قباني وقد آن لي الآن أناديك عمنا ، مع أني والعهدة على البوست ده راكب مع كبر في سرج واحد .
مافتئت أرقبك منذ أن بدأت الكتابة هنا ولكن كما قال كبر الفرح بالفينات .
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: عمر مصطفى مضوي)
|
Quote: ابوكديس ونص كمان معاوية ...
بالله اعدت سماع الكوبليهات الاربعه زي 750 مره ...
و في كل مره اتعجب علي الاداء و نطق الكلمات و مخارج الحروف ...
ثم تقع عيني علي بعض من يكتب ( تغمضه ) الله بواسع رحمته ... و ( الجسمان ) ...
لا انتقد من كتب ربما كتبوها علي عجل ... ولكن صار هذا ديدننا ... |
ما عارف العلاقة شنو، لكن طاما الموضوع هترشة كما يسّر لنا حبيبنا كبر الأمر:
يوم الأحد الفات صادفت في واحدة من القنوات السودانية نهاية حلقة للقاء مع مغني شاب
سأله المقدم: ما هي نصيحتك للفنانين الشباب!!
خليك من فاقد الشئ والكلام دا..
مقدم البرنامج زي المطرة الشكشاكة، يتوقف، ولمّ الولد يبدأ يجاوب، المقدم يستطرد بتفسير السؤال بعد جهد بالماء
وهكذا لعدة شكشكات مطرية، ثم أعقبته شريكته المقدمة بنفس الشكشاكة المطرية وتفسير جهد التفسير
المهم في النهاية المطرة وقفت (وليتها لم تقف) قام الشاب قال:
انصحم بأن يغنوا ما يرضيهم ويرضي أهلم (هكذا والله صحي)
ثم شرع في لحن الختام: ... شنو كدا و قلوبنا بقت هبابة.
زمان كنت بتمنى لو ولدتني أمي في الأربعينيات حتى أحضر العصر الذهبي شاباً
لكن تلك الليلة حمدت ربنا وشكرت أمي على مطلع الستينيات، برضو مكسب.
يا كبر ح نقرأ ليك بالمهلة
وكذلك يا ود مضوي
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Hamid Elsawi)
|
أي و الله ياعمر..نفس الملامح والشبه..
كنا في الدلنج وقتها..الجواب بتكون بدايتو غنية نادرة منسوبة لسيد خليفة..ولم نسمعها عنده كثيرا..لكن في زمنا كان بيغنيها واحد من عندكم..من عيال سنار اسمو سليمان محمود..فتكون بداية الجواب يائسة (في بحور من موية بكتب..بحروف حبي المحال..ما اظن في حبي يبقى ساسو ثابت في الرمال..او نحو ذلك)..ثم في نص الجواب تجي غنية بلال موسى (تلاتة سنة ..يوم ورا يوم منتظرك انا)..ثم تكون الخاتمة بكلمات لغنية سمعناها من استاذنا الجيلاني الواثق (مع السلامة ..ابقي زي ما قلتا ليكي..خلي بالك من عيونك..والحنان الفي عينيكي..او نحو ذلك)..
ظواهر يا صديقي كانت تهدينا الفر ح المعبأ في الكاسيت..استريو فيصل بي سنار (سمعنا منو..بلال موسى..سليمان محمود..عصام محمد نور..محمد عجيب..ازهري اب راسين..وفتاح السقيد..صديق متولي..وصديق سرحان..)..ثم استريو النجوم بالأبيض..(نور الجيلاني..واخرين كثر)..ثم استريو واستديو سارة بالصافية..اها ده محل الفرح الباهي ذاتو..زيها وزي محلات عباس رشوان الزاغ منها استاذنا وصديقنا حي قباني..!!
ساخرج من هنا..طبعا بعد اضافة حاجة لصديقنا نيو سوداني.. لأنو يحي صوتو/حسو طلع..ودي يا عمر جزء من ثقافتنا في الدلنج..لمن الواحد ينادوهو..بنقول ليهو فلان حسك طلع..وهي ظاهرة وثقها صديقنا الجميل ابكر ادم اسماعيل في روايته (الضفة الأخرى)..على لسان شخصية اسمها سليمان..!!
وصديقنا يحي (ما عارف احتار عشان نحن طلعنا شفع صغار ،ولا فعلا حس ان اللحظة كبيرة وموسعة)..حسو طلع..لمن قام ول ابا الصادق اسماعين ناداهو في مشرع الجاز اياه..؟!!..جميل يايحي الصادق يخش عوالم المزيكا الحميمة.. لكن النقة الهنا دي يعني نقوم خلاص نقول انتهت ولا شنو يعني..!!
المهم..
الخيط كان حميم..واكيد ح يفضل..لكن نحن من قوم من شاكلة (البكا بيحرروه اسيادو)..
تحياتي يا عمر..وسعيد..انو نكون من نفس اللحظة الوجدانية اياها..احب سماع بلال ،سليمان محمود ، عصام محمد نور..وأي حاجة من سنار..ياخي دي لو رفعت لينا دال ساكت برضك بنقول نور في نور..!!
الله يستر ما نحصل شطحات بلال موسى بتاعة (الصلاح رجال كسلا)..لأنو لو لحقنا هناك..الصاغ ذاتو ح يقوم من قبرو..ويكب معانا الجرسة..جرسة الله والرسول الواحدة دي..!!!!
كتر خيرك يا صديقي..
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
نيو سوداني..
ياخي الواحد مكجنك زي كجنتنا لروضة الحاج عليها السلام..
لكن..!!
هناك فيرشن نادر برضك لغنية/نشيد صه يا كنار..بصوت الكاشف (عليه السلام) وعثمان حسين (رضي الله عنه) والليجند حسن عطية عليه السلام..والليجند احمد المصطفى عليه السلام..والأغرب الفيرشن ده من مكتبة المهندس عزالدين احمد المصطفى (وهو واحد من عجايب الزمان عندنا واستمتعنا بحفلاتو في طيبة الذكر جامعة الخرطوم..خصوصا الميدان الغربي الكانوا فيهو ناس يحي قباني قاعدين يلعبوا دافوري..!!)..طبعا ما ح نضيف الفيرشن ده هنا لأنو شطبنا خلاص..!!
هنا مادة توثيقية عن الصاغ..طبعا عملتها روضة الحاج..وحاة الله يا نيو سوداني ر وضة دي مكجنها لله ورسولو..لأني اعرف انها شاعرة حقة منذ 1988..لكنها قامت جات الخراطيم وركبت ليك وش كده ما يعلم بيهو الإ الله.. وهي من بنات كسلا..فروضة بتاعة كسلا كانت حاجة حقيقية..لكن روضة بتاعة الخراطيم والخليج فهي مصنوعة وبيش ساكت (سجن سجن..غرامة غرامة)..!!
اذار يا صاغ؟..ياخي نحن ، قلة منا تعرف ما الفرق بين كانون وكانون..وتشرين حافظ الأسد..والأعجب ايار جعفر نميري..!!!!
في هذه المادة ، الحاجة الوحيدة الدايرين الناس تشوفها هي صورة الصاغ محمود ابوبكر..لأنو الصورة ..زي الجواب..هي برضك نص المشاهدة..ولو جاز سؤالكم عنا فنحن بخير لا ينقصنا شيئنا الإ سوي عدم مشاهدتكم المرضية (متذكر الصيغة دي يانيو سوداني؟..هل صدفة انو كل شباب السودان في لحظة ما كان قاعد يكتبها في الجوابات؟..تاني اسمعك تقول بريمة كان من المحايدين وشنو كده ما عارف...!!!!)..
المهم..
كدت ان اضيف طرفة بليغة عن تعليق الليجند العاقب الحسن على واحدة من قصايد سيدنا محمد بشير عتيق رضي الله عنوززلكن يا يحي دي الإ بالتلفون...!!!..وانا زول راعي ساكت التلفون ده..خصوصا اترك رسالة صوتية..براجعو في العمر مرة...!!..ولو مكضب اسأل استاذنا البروف عبد الرحمن ابراهيم...ووليد كوش (ياخي ده اجمل كائن على وجه الأرض..ما عندو حاجة اسمها يأس كلو كلو..)..
هو الموضوع شنو؟..عركي كضاب من يستطيع سماعو باخوي واخوك..كابلي..ده زمن المزاج..اما الصاغ..فيا صاغ...الله يهديك ياااااااااااااخ..!!
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
رجع بنا الزمن اليوم الي ذكريات عجيبة جداً ...
فرغم سماعي لأسم حسن محمود كثيراً جداً من شقيقي الذي يكبرني ...
وهو من خريجي الخرطوم القديمة عام 1971 ...
الا انني اكتشفت منذ أيام قلائل ان ذاك الحسن محمود صديقهم هو و مصطفي عمر نواري
و قائدهم في ( الكديت ) في الخرطوم القديمة ... هو حسن محمود أبو بكر ابن الصاغ محمود أبو بكر ...
فكان الحديث مع اخي محمد نجيب حديثاً ذو شجون ... بدأناه اليوم ... وسنكمله انشاء الله لآتي منه بذكرياته عن والد حسن محمود
فقد كان ثلاثتهم ( شلة ) واحده و جمعتهم منازلنا كثيراً .. فحتما سآتي بأشياء تزيد من معلوماتنا عن ذلك الرجل الجميل ...
________________________________________________________________________________
فاجأني صديقي نواري عمر نواري بأن حسن محمود أبو بكر ما زال علي اتصال بهم و يواصل زياراتهم و تفقد اسرته بحلة حمد ...
كلي شوق للجلوس مع أخي للرجوع معه لذلك الزمن الجميل ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
تحية وتقدير قبانى من وحى هذا البوست كتاب البروف عبدالله على إبراهيم مقالا مقتضبا بسودنايل والمقال يقرأ :
***
صه يا كنار: سيوبر وطنية .. بقلم: د. عبد الله علي إبراهيم طباعة أرسل إلى صديق
الأربعاء, 24 كانون1/ديسمبر 2014 08:37
طربت في احتفال العيد الخمسين للاستقلال في 2006 لقول الأستاذ أحمد أدهم بالتلفزيون بإن ما يميز "صه ياكنار" أنه نشيد غير إيدلوجي أومتحيز لفريق دون آخر. وقد أجاد حين واصل القول إنه حتى "صرخت روت دمي" ، وهو نشيد مؤتمر الخريجين الرسمي، إيدلوجي لأنه يقول" أمة أصلها للعرب ودينها خير دين يحب". كما أعجبني قول الدكتور أنس العاقب الذي كاد يعتبر فيه "صه ياكنار" محض موسيقي من الدرج الأعلى. وهذا حجة في حيدة النشيد الجميل المتجاوز للقيل والقال السياسي.
وتسمرت أمس أمام اللابتوب عند بوست للأستاذ يحي قباني على السودانيزأونلاين جاء فيه بتسجيل نادر ل"صه ياكنار" بأداء الكابلي وأبوعركي. وغنى فيه الكابلي مقطعاً من القصيدة لم أسمع به من قبل عند سائر المؤدين لها. ولم يكن بوسعي الرجوع إلى ديوان الصاغ محمود أبو بكر (أكواب بابل من ألسنة البلابل) لمواضعة المقطع على أصل القصيدة. والمقطع عجيبة العجائب رسخت به قناعتي أن "صه يا كنار" ليس نشيداً وطنياً. وإذا كان لابد من نسبته إلى الوطنية المعروفة لقلنا عنه إنه "سيوبر وطنية". فجاء في المقطع بصوت الكابلي الفصيح الأغر:
أنا يا كنار مع الكواكب ساهر
أَسري بخفق وميضها المتعدد
وعرفت أخلاق النجوم
فكوكب يهدي البيان
وكوكب لا يهتدي
وكويكبٌ جمُ الحياءِ
وكوكبُ يعصي الصباحَ بضوئه المتمرد
ولم أتمالك نفسي. لم أصدق أن بوسع الشعر أن يطالع "أخلاق النجوم" فيبسطها fسطا. وبدا لي في هذا المقطع طلوع على "الكفر" الشعري الذي هو سلطنة تعجبني في أماديح الكباشي التي تتقحم السيريانية لأن اللغة قاصرة في حضرة من يهوى. ولم أرتو من إصاخة السمع مكرراً لأخلاق هذا الكوكب:
وكوكب يعصى الصباح بضوئه المتمرد
وسألت: هل قيل مثل هذا من قبل يا ربي! لا حول الله.
ثم وجدت أن الأستاذ كبر علق في سودانيزأونلاين على مقطع الكابلي المبتكر. وصرعه البيت:
وكويكب جم الحياء
وأضاف إن "الطلع ديكنا ذاتو حكاية وكويكب جم الحياء". واتفق معي ومع محمد أدهم أن "صه يا كنار" ليس نشيداً وطنياً: "يا خي دي لا عندها علاقة بوطنية ولا يحزنون". بله، هي عندي وطنية لم نكتشفها بعد؟ فلربما هي من قواف المتنبي التي إدخرها لسيف الدولة. فهن لا يختصصن من الأرض دارا، ومتى أطلق عقالها "وثبن الجبال وخضن البحارا" وتسري إلى مناح لم يطرقها قمر من قبل. وهذه حالة ندرت من التنزيل الشعري.
****
الرابط:
http://www.sudanile.com/index.php/2008-05-19-17-39-36/56-8-0-6-0-1-4-6/75930-2014-12-24-07-38-42http://www.sudanile.com/index.php/2008-05-19-17-39-36/56-8-0...-2014-12-24-07-38-42
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: احمد الامين احمد)
|
Quote: تحية وتقدير قبانى من وحى هذا البوست كتاب البروف عبدالله على إبراهيم مقالا مقتضبا بسودنايل والمقال يقرأ :
***
صه يا كنار: سيوبر وطنية .. بقلم: د. عبد الله علي إبراهيم طباعة أرسل إلى صديق
|
شكراً استاذي احمد الامين علي جلب مقال البروف عبد الله علي إبراهيم
و اتمني ان تدلو بدلوك في هذا الامر و سأعود حتما لتبادل الآراء في ما طرح في ذلك المقال ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
Quote: أخي يحي قباني
لك الود والتحايا الطيبات
وددت التداخل في هذا البوست منذ زمن ولكن موضوع صه ياكنار وشاعر صه ياكنار ليس بالأمر السهل الذي يكفيه تعليق سريع مقتضب ولكن ثمة مادفعني الآن دفعاً للتعليق حول جزئية صغيرة تتعلق بالوطنية الكامنة في ثنايا هذا الشعر الراقي وتتعلق بحقائق تاريخ لم يتطرق لها مؤرخونا .... شهدت جزءاً يسيراً من برنامج تلفزيوني بثه تلفزيون السودان يوم الجمعة الماضي 19 12/2014م عبارة عن حلقة عن الأغنية الوطنية بمناسبة قرب أعياد الاستغلال قدمته المذيعة إيمان أحمد دفع الله إستضافت فيه ثلاثة من المتحدثين وكان الجزء الأخير من الحلقة الذي شهدته يتحدث عن قصيدة صه ياكنار فلفت انتباهي البرنامج لأن هذا البوست يملأ علي مخيلتي ويثير فيها أفكاراً (عجيبة) .. لم يرضني الحديث عن صه ياكنار كأن المتحدثين يتحدثون عن شئ لا يعرفونه .. لعل مكامن الوطنية تتمثل في فترة الاستعمار والكفاح الذي كان يقوم به عظماء تاريخنا الحديث من أمثال الدكتور عقيل أحمد عقيل والشاعر الفذ العبقري الصاغ محمود أبو بكر (النسر) .. اتخذ الكفاح ضد المستعمر إتجاهين .. أحدهما الكفاح الذي كان يقوده المدنيين وكانوا يسمون بالـ "كنار" وهو يشكل مدرسة قائمة بذاتها, والآخر يقوده العسكريون ويشكل مدرسة قائمة بذاتها يقودها الشاعر الصاغ محمود أبوبكر وتعرف بالـ (نسور) ومن هنا كان لقب الصاغ محمود أبوبكر الذي عرف به هو (النسر) وفي التبادل الشعري بين الشاعرين خاطب النسر صديقه بالـ"كنار" أي أيها المناضل المدني .. وعلى ضوء ذلك تتضح المعاني الراقية التي تحملها القصيدة .. وكما ظللت أردد دائماً عن كل شخصية من عظمائنا أتناولها ومن بينهم محمود أبوبكر أنه شخصية تحتاج للمزيد من الدراسة والإضافة ولاكتشاف عظمته في عطائه لهذا الشعب ولتراث هذا الشعب ولتاريخ هذا الشعب .... لك ودي وتحياتي وتقديري صديقي قباني .... > |
سلامات يا بابكر ...
اريد تأكيد نقطتين هنا ...
صه يا كنار كانت موجهة من الصاغ الي صديقه الدكتور عقيل احمد عقيل او علي الأقل كان المعني بها هو الدكتور عقيل احمد عقيل ...
و التأكيد علي ان الصاغ كان معروف باسم النسر في رد الدكتور عقيل حينما خاطبه في قصيدة طويلة منها :
يا نسرُ هل انساك هنداً و الهوى *** داعي الجهاد بجمره المتوقدِ
فرد الصاغ عليه باقصيدة زفرات هند :
حرقت فؤادك يا (كناري) شعلة * * باتت (كناري) كم تروح وتغتدي
وكأن من زفرات (هند) شــرارةً * * مسّت ثيابك بالعــذاب الموقد
مزّقت يا (هند) الفـــــؤاد تجبّـراً * * بمفوق من مقلتيك مُســـدّدِ
ورتقت بالروقين مُتقد الحشا * * كالسهم يمرقُ من وضئ الأثمد
وجعلت حظي فوق رأسك رايةً * *ومآربي في ثغـــــرك المتنضد
وكفى بدمعي إن وددت شهادةً * * ونحول جسمي في الزمان الأرغد
مالي رأيتك تقرأين (عروسة * * الفردوس) وهي تلهفي وتوجـدي
فترقرقت في مقلتيك سلاسل * * من فضةٍ في ظرف مسك اسود
وسألتني (من هنـــــد؟) يــوم * * قرأتها بتلهُفٍ.. وتأثـرٍ. وتنهـــدٍ
وذرفت في الصفصافة الــــدم * * حسرةً حتى توسم جذعها بالاثمد
فرأيت في المرآة مني وجهها * * فأحمرّ باهـــرُ خدك المتـــــورد
__________________________________________
مشكلة القصيدة ( صه يا كنار )
ان هناك أربعة طبعات علي حقب مختلفه الاولي عام 1961
و الأخيرة عام 2000 ... و هناك اختلافات مزعجة بين الطبعات ...
هناك نسخ مكتوبة بخط اليد سنحاول الوصول اليها انشاء الله ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: ودقاسم)
|
Quote: والله يا يحيى ألف شكر ليك ..
هذا العمل الجميل من الأستاذين الكبيرين كابلي وعركي جعلني كالدرويش في حلقة ذكر
أعدت سماعه عددا من المرات وسمعته بمشاركة أسرتي
طربنا وسالت منا الأدمع
شكرا كثيفا ..
عليك الله أمانة سلم لي على ابو وائل |
استاذنا ود قاسم ....
اسعدني مرورك ..
لا عجب ان اطربك هذا العمل فانت من الزمن الذي نعشق ...
تحياتي لك و للأسرة الكريمة .. و سيصل سلامك لأبوحميد اليوم انشاء الله ...
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
Quote: يعني هسه انا اعمل شنو ..
واقبل وين ..
واقابل كبر كيف وامشي لعم يحي متين .. حالتي صعبة خلاس و الموضوع لا يقوي علي التأخير أها يا الحبان وروني الدبارة شنو والا اكون ما فشيت غبينتي معاكم؟
قلت اكلمكم احتمال تلقو لي مخارجة.
ياحبان ما كان تخلونا مع ناس الهامش والعنصرية والسلفية والنصرانية ..
تورتو نفسناوما خليتونا خيار غير ما اصرف ليكم من دال كبر .. |
اخونا ناصر نور من الفيسبوك...
التحية لك و انت في حالة الطرب و الانسجام هذه ...
الجمال لا يأتي الا بالناس الجميلة يا ناصر ...
هكذا كان السودان و هكذا يجب ان يكون ...
اغمض عينيك ... و اسكب علي اذنيك ( أسمنت مسلح ) و انت تتجول في هذا المنبر ...
فبوستات الجمال يراها القلب قبل العين ...... ( فخلي قلبك دليلك ) :)
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: يحي قباني)
|
Quote: سلامات يا بابكر ...
اريد تأكيد نقطتين هنا ...
صه يا كنار كانت موجهة من الصاغ الي صديقه الدكتور عقيل احمد عقيل او علي الأقل كان المعني بها هو الدكتور عقيل احمد عقيل ...
و التأكيد علي ان الصاغ كان معروف باسم النسر في رد الدكتور عقيل حينما خاطبه في قصيدة طويلة منها :
يا نسرُ هل انساك هنداً و الهوى *** داعي الجهاد بجمره المتوقدِ
فرد الصاغ عليه باقصيدة زفرات هند |
أخي يحي قباني
لك الود والتحايا الطيبات
صحيح جداً ما أوضحته ياصديقي وأبصم عليه (بالعشرة) وقد سقط إسم الدكتور عقيل من مداخلتي
بسبب الاستعجال فاختل المعنى وفسدت الفكرة التي أردت توضيحها فقد أردت توضيح لماذا خاطب
الصاغ صديقه عقيل بالكنار .. وحقيقة أن قصة تبادل الشاعرين للقصائد والتبادل الشعري الرائع
بينهما قد وردت فيه قصيدة صه ياكنار والقصائد التي تفضلت بذكرها وقصائد أخر .... وقد قمت بتعديل مداخلتي
لاستيعاب ملاحظتك وتأكيداتك فلك شكري وتقديري عليها ولك مودتي التي تعرف ولي عودات لك
ولهذا البوست الدسم.
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: بابكر قدور)
|
Quote: مشكلة القصيدة ( صه يا كنار )
ان هناك أربعة طبعات علي حقب مختلفه الاولي عام 1961
و الأخيرة عام 2000 ... و هناك اختلافات مزعجة بين الطبعات ...
|
أخي يحي قباني
هذه نسخة 2010 من ديوان الصاغ محمود أبوبكر وهي نسخة يمكن الإعتماد عليها
فقد قام بتحقيقها بنت الشاعر الدكتورة رجاء محمود أبوبكر وإبنه العميد شرطة م/حسن محمود أبوبكر
حيث تم تصحيح كافة الأخطاء في النسخ السابقة .... تحياتي وتقديري
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: بابكر قدور)
|
صديقي يحي..حبابك
وحباب الأصدقاء هنا..
تحية لصديقي واستاذي احمد الأمين احمد..الذي قام بنقل قطعة استاذنا دكتور عبد الله علي ابراهيم..
وتحية لصديقنا نصر/ناصر..حاجات كتيرة يا صديقي بتدي القلب رحمن..
تحية خاصة لأستاذنا وصديقنا دكتور عبد الله على ابراهيم..وسعيد جدا يا دكتور بتوقفك امام هكذا هترشات..والأسعد اتفاق وجهة نظري مع موقفك وموقف استاذنا محمد ادهم..ورأيك قريت قبل كم سنة في خيط لصديقنا الجميل خالد الحاج (ده اول زول مرق صه يا كنار في فيافي الأسافير ، هو برضك او زول قام دخل الميديا في حكاية حروب دافور..ومرقها في العالمية..!!!!) !
المقطع الشعري.. اسرني يا دكتور..ومثلك لم اسمع به في اداء السابقين للعمل الأ لماما (يعني زي كورال جامعة السودان ، كان جايط جدا)....ولكنه جنون الشعر يكشف عن مكنوناته ويجذب الذائقة نحوها تماما كما يفعل المغناطيس..!!
نعم يا صديقي قد تكون هي مفردات ومفاهيم وطنية لم نكتشفها بعد..ونحن في امسودان حدودنا الطرب..وقليلا ما نتوقف في المعاني..ويبدو لي حال نصوصنا تحتاج دان بروان..او ادوات منهج مغايرة للسمع والتلقي ..وقلتها لود المكي من قبل وانا اتفاعل مع قصيدته قطار الغرب..كيف لي ان اتفاعل مع نص كتب قبل اربعين سنة؟..نفس الأمر في صه يا كنار..وغيرها من مناجم المعني الغنية في امسودان..باقي اليومين ديل نحن ساكين الدهب ومناجم الدهب..وهذا خسران..ولكنا لا نجتهد كثيرا في اكتشاف مناجم المعني في نصوصنا القديمة..كدت انا اقول ما احوجنا لدان بروان بيننا..يعلمنا كيف نكتشف النفائس في مكنون خطابنا الثقافي الغنائي...
ككيف ما تكون سيوبر يا استاذي..ودي الغنية الوحيدة في تاريخ امسودان جمعت: اسماعيل عبد المعين (ملحنها ، والأدهش كان واقف كورس) ، عبد العزيز محمد داوؤد ، احمد المصطفى ، عبد القادر سالم ، عثمان الشفيع ، صلاح مصطفى ، سيد خليفة ، الكابلي ، عثمان حسين ، وقبلهم اداها الكاشف.. ثم شارك ابو عركي البخيت في ادائها في بعض من المراحل..فهي منجم معاني و مباني طيبة وذكية..!!
ولازلت ابحث عنها بصوت خضر بشير..!!
كتر خيرك يا دكتور..وانا الأسعد بهذا التفاعل الطيب..
وكتر خير صديقنا يحي الذي جعل هذه الأيكة الطريفة..
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
نصر/ناصر..حبابك يا صديق
عارف يا نصر.. امسودان دي عندها عجايب ما بيعرفوها الإ اهلها.. و مرات قاعدين يجلوا معرفتهم لحاجاتهم.. واليوم يا صديقي..نفس الناس البتعافر دي ..وبتقول ليك هامش وشنو كده ما عارف.. نفسها ما ح تقدر تجاوبك على سؤال: ليه من نفس المناطق مرقت ناس زي اسماعين عبد المعين..ملحن صه يا كنار..واعمال اخرى.. وهو صحيح مولود في حلة حمد في بحري..لكنو بيفتخر بجذورو الماشة لغاية حبوبتو (فور).. عقيل احمد عقيل (سبب غنية صه يا كنار)..و جذرو بتعود لجنوب دارفور..!!
الفنان حسن سليمان الهاوي.. انا قصدت أنو استاذنا يحي يبرنا بخيط عنو.. لأنو..ولغرابة الحاجات.. مثلا.. غنية صه يا كنار ظهر فيها ، وفي تسجيل نادر..اسماعين عبد المعين ، عبد العزيز محمد داوؤود..احمد المصطفى ، عبد القادر سالم ، عثمان الشفيع ، صلاح مصطفى ، سيد خليفة ، وغيرهم ممن لم تسعفنا الذاكرة بذكر اسمائهم.. نفس هذه الأيقونة الغريبة.. بنلقاها متجلية في بعض من اعمال حسن سليمان الهاوي..فنلاحظ مجموعة من كبار الفنانين كانت بتردد بعض من اعمالو بصورة جماعية.. مثل ان يغني واحدة من اغنياتو: عبد العزيز محمد داوؤد ، محجوب عثمان ، حسن عطية ، سيد خليفة..وفي غنية تانية ليهو..بتلاقي حسن عطية ، صلاح محمد عيسى ، وابو داوؤد.. ياخي دي عالم ما بتتلم في شغل باخوي واخوك..ولمن يقوموا يشتغلوا مع بعض فاكيد ده بيكون شغل مميز..عشان كده حسن سيلمان الهاوي (حسن سليمان عبد الرحمن ابو حنك)..زول ما ساهل تب..!!
واحدة من اجمل اعمال حسن سليمان الهاوي ، بجانب ما شقيتك ، هي غنية ( محبوبي لاقاني ، وبي بسمة حياني)..ودي مهمة عشان حكاية الهامش وشنو كده ما عارف..وهي من كلمات استاذنا حميدة ابو عشر..وحميدة كل حياتو كانت بين الرهد اب دكنة..و مدينة الأبيض..يعني من ناس المهمشين ذاتهم..لكن ليه المحاصصة ما قاعدة تذكر حاجات زي دي؟..
زمان يا صديقي.. قبال التهميش والوهم..ده .. السودان كان فيهو انسياب تلقائي.. مابيعرف الحدود والمحاصصة.. بس المشكلة .. أنو الناس السوت الشغل السمح ده..نحن الأجيال اللاحقة ما احترمناهم كلو كلو..وكل واحد فينا عامل فيها ضبان ضكر..!!
ما تعمل حاجة يا نصر.. بس لو لقيت ليك فرقة ارجع اسمع (محبوبي لاقاني).. باستغراق.. ودي بتكون ليك حجاب..والله صحي..!!
كتر خيرك..
كبر
| |
|
|
|
|
|
|
|
|
|
Re: صه يا كنار ... كابلي و ابو عركي ... كلام عجيب !!! (Re: Kabar)
|
كتر خيرك يا وائل يا صديقي..
ياخي..الواحد قرب يمرق عمك على فاركا توري من قبرو..و يقول ليهو..عليك دخل لينا جيتار صحراوي في صه يا كنار..!!
ونطلب من الشباب بتاعين المزيكا من السودانيين الحايمين بره السودان.. ينتبهوا للقصة دي.. لو الكلمات صعبة.. يشتغلوا لينا مزيكة الله والرسول دي..!!
كتر خيرك يا صديقي..والسماح بالفينات..
كبر
| |
|
|
|
|
|
|
| |
يحي قباني
الجنيد حمد
عاطف عمر
Kabar
معاوية الزبير
عواطف ادريس اسماعيل
عمر مصطفى مضوي
Hamid Elsawi
احمد الامين احمد
بابكر قدور
ودقاسم
فيس بوك
تويتر
انستقرام
يوتيوب
بنتيريست