دعواتكم لزميلنا المفكر د.الباقر العفيف بالشفاء العاجل
|
|
 رطانة الإنقاذ (Jargon)
|
خلال ال 19 سنة الماضية تركت الجبهة الاسلامية بصماتها على مختلف
اوجه الحياة في السودان. و رغم انها قد فشلت فشلا ذريعا في تمرير كامل
مشروعها (المغفور له المشروع الحضاري) و تواضعت المقولات التي
يتضمنها خطاب اهل الحكم اليوم بعد أن كانت مفرطة في الادعاء و الغرور
(اعادة صياغة الانسان السوداني – مثالا)..
المهم ادخل الكيزان بعض المفردات للغة الحوار اليومي بعد أن لاكوها
بدون ملل لمدة 19 سنة...هنا بعض ما اتذكره من هذه المفردات:
-تنوير...و القصود هنا الكلام الذي يقوله الوالي أو المحافظ لجماعة
من الكيزان في اجتماع و ليس التنوير بالمعنى الاوروبي.
-نفرة..و هذه تأتي بالالوان الطبيعية و بجميع الاحجام فهنالك نفرة
خضراء و نفرة كبرى..الخ.
-اشواق..عادة ما تحشر حشرا في الكلام و اظن أن من نجرها هو الصحفي
حسين خوجلي.
-احسب و نحسب ..و هي بمعنى اظن أو اعتقد ..و احسب أن
الترابي هو من نجرها.
-مفاصلة ..و هي الكلمة التى استخدمها الكيزان لوصف انقسامهم لمؤتمرين
وطني و شعبي.
اذا اتذكرت حاجات تانية برجع.
|
|
 
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
جميل يا دكتور سيف ان نجتر من ادب الاخوان المفردات المؤلمة التي
صرت اتحاشاهاوافر منها فرار الامي من الابرص
تماما حتي وان كانت من الكلمات الفصيحة والتي تزين الكلام
ولكني هنا تستوقفني جمل وليس مفردات كما تفضلت تصيبني ينوع من الغثيان .
عندما تناقش واحد من رجرجتهم يصك اذني بكلمات لا تخرج عن وصف (المكاواة)
يقولون لك ان الانقاذ ماضية ماضية ولا رجعة ...ولا تلتفت الي الوراء لا تصغي
للمرجفين والخونة ... ان قطار الانقاذ ماضي والثورة ماضية في الانجازات وو
وووووووان مثل هذه الكلمات تصيبني بنوع من التشنج الذي افقد معه صوابي
تماما .....
ــــــــــــــــــــــــــــــ
تخريمة :بس انت مالذي جعلك تتناول مثل هذه المواضيع التي ترفع الضغط
بالمناسبة الان لقد ارتفع ضغطي تماما ...لاني قد ذكرت الكلام اعلاه ولكن
الله يسامحك .....
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
مجاهدات..و هي تقال لكل ما يمارسه الكوز..فمجاهدات الأخ الوالي
مثلا هي كل ما يقع في اطار التوصيف الوظيفي لموقعه الرسمي..
و هذ المجاهدات تتم ما بين المكتب الفخم و اللاندكروزر المكيف.
و نفس هذه الاعمال عندما تصدر ممن ليس كوزا فهي مهام وظيفية عادية
يقوم بيها و لا على كيفو!
| |
|
|
|
|
|
|
|
|
|
Re: رطانة الإنقاذ (Jargon) (Re: Ashraf el-Halabi)
|
سلامات يا اشرف
عارف حكاية انك تتضرس من سماع بعض المفردات لما ينطقها كوز
السبب فيها كما اعتقد هو الطريقة العجيبة البيتبعوها..الواحد
تحس بيهو بيتمضمض بالكلمة في الأول حتين بعد داك يمرقها
دي بحاولوا ينطقوها مجودة عشان الواحد
يثبت للناس انو مجود القرآن و كدا..او انو بيقلد الترابي 100%.
| |
|
|
|
|
|
|
|
|
|
Re: رطانة الإنقاذ (Jargon) (Re: ibrahim alnimma)
|
Quote: تخريمة :بس انت مالذي جعلك تتناول مثل هذه المواضيع التي ترفع الضغط
بالمناسبة الان لقد ارتفع ضغطي تماما ...لاني قد ذكرت الكلام اعلاه ولكن
الله يسامحك |
صباح الخير/ ياود النعمة....اسع انت وسيف النصر وبقية المناضلين
لم نسمع لكم ركزا فى السخف والاساءات العنصرية التى تعرضت لها قلعة معرفية يشهد
لها الكل بدورها الريادى فى مسيرة وتقدم هذه الامة ...بجانب الاساءة والازدراء لمجتمع
باكمله مجانا هكذا...ارتفع ضغطكم من شوية تعبيرات سخيفة قالها اسلاميين؟؟؟ ماتخاف ياابراهيم
الاسبرين موجود.
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
يا شيخنا
ودى كانت بدايات الانقاذ فى 5 سنوات الاولى حت 95 وتعنى انا كوز سهل لى امورى حين يندة لك يا شيخنا
حاولت مرة اعملة لى ضابط شرطة كنت عايز ابدل الللوحات قال لى تعال بعد شهر
قلت ليهو يا شيخنا ما ممكن اقل من كدة ......هرشنى على طول شكلو ما كوز كان وما خايف
قال لى انا لا شيخك ولا زفت قلت ليك تعال بعد شهر....
| |
|
|
|
|
|
|
|
|
 Re: رطانة الإنقاذ (Jargon) (Re: زهير الزناتي)
|
| Quote: رتق النسيج الاجتماعي |
يا ابو الزهور و الله دي صعبة خلاص..دي اكيد من نجر واحد من
الفلاسفة الكبار و انا برشح امين حسن عمر
المهم زي العبارات الغميسة دي نحن ما بنقدر عليها ..
يا زول دي ما بقدر عليها الا ناس الداخل..
اما احتساب
فدي يبدو أنو الكوز بيقولها لما نصيبو من الاعفاءات الجمركية
او الميزات الضريبية ما يكون قدر تطلعاتو..اها في الحالة دي
ما بيكون قدامو الا أنو يلح و يضغط من أجل المزيد..أو يحتسب
| |
|
|
|
|
|
|
|
|
 Re: رطانة الإنقاذ (Jargon) (Re: سيف النصر محي الدين محمد أحمد)
|
ابتلاء و تجمع على ابتلاءات و هي الصيغة الأكثر استخداما..و لم يتوقف
اهل الانقاذ من الدخول في الابتلاءات..فما يكادوا يخرجون من ابتلاء حتى يدخلوا
في ابتلاء آخر و هكذا دواليك طيلة الفترة التي قضوها في السلطة..
الغريب أن مفردة ابتلاء اصبحت الشماعة التى تعلق عليها الاخفاقات و المشاكل
و كافة البلاوي.
| |
|
|
|
|
|
|
|
|
|
Re: رطانة الإنقاذ (Jargon) (Re: حيدر حسن ميرغني)
|
سلام يا حيدر حنين
| Quote: حلايف بالطلاق وحررررم وباطن الارض خير من ظاهرها |
حلايف الطلاق و حرررم ديل من المفردات السودانية الشائعة خصوصا
وسط اهلنا "الجلابة" بس الفضل يعود للكيزان في ادخال هذه المفردات
عالم المصطلحات السياسية و كدا..
اما حكاية باطن الارض الخ الخ ..ده جخ ساكت و ما عندو أي قيمة.
| |
|
|
|
|
|
|
|
|
 Re: رطانة الإنقاذ (Jargon) (Re: معاوية الأرباب)
|
Quote: اما باطن الارض خيرٌ من ظاهرهااعتقدأن المقصودهوان البترول المستخرج من باطن ارض المجلد
خيرٌ من من يمشي علي ظاهرها من مسيرية ودينكا |
يا معاوية الارباب
you are very thoughtful man
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
تفلتات..و دي مفردة غريبة و عجيبة دخلت في مجال الاستخدام اليومي
و اصبح من النادر أن تقرأ مقالا أو تستمع لاحدهم و هو يخطب ولا ترد هذه المفردة
و يبدو أنها قد ريحت الجماعة راحة شديدة فهي لافقة مع كل المشاكل التي تسود
السودان في هذا العهد..المظاهرات الطلابية تفلتات,,هجوم المتمردين على موقع ما
هو تفلتات..حرب قبلية بين قبيلتين برضه تفلتات..و يمكن زي كتابتنا دي ايضا
تعتبر نوع من التفلتات
| |
|
|
|
|
|
|
|
|
|
Re: رطانة الإنقاذ (Jargon) (Re: MAHJOOP ALI)
|
أخونا محجوب علي سلامات
Quote: سيف النصر
التدافع
ماتنساها |
و الله التدافع دي ما عارفها يا محجوب ..لكن بفتش وراها..
يكونوا قاصدين..و لولا دفع الله الناس بعضهم ببعض..؟؟
أظن انو مافي علاقة ظاهرة بين الدفع و التدافع ..
و بالانا شايفو الناس ديل غايتو من جونا و هم بيتدافعوا
تدافع شديد خلاص..و النتيجة بعضهم لسة ثابت و بعضهم في الحافة
و البعض الأخر ركب التونسية
| |
|
|
|
|
|
|
|
|
|
Re: رطانة الإنقاذ (Jargon) (Re: Samau'al Abusin)
|
مرحب بحسين نوباتيا الرجل الذي اناخ بعيره على باب المنبر
التوالي هذه تحمل معنى موجود فقط في بطن شاعرها و ناجرها و مخترع الحركة الاسلامية
في السودان الذي ناله نفس مصير الرجل الذي اخترع الوحش فرنكشتاين..و التوالي بحسب
الترابي تعني أن يوالي بعضنا بعضا و هي فكرة تؤدي للحزب الواحد لا للتعددية..
اما التمكين فهي مفردة باردة و قاسية و مملؤة بالكراهية..و عندي هي مثل قولك
لخصمك :تمكنت منك.. و ذلك قبل أن تشرع في خنقه.
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
قاصدة..و القاصدة تأتي في سياقات عدة فتكون مسيرة قاصدة
مرة أو دولة قاصدة مرة أخرى..و يمكن جمعية وللا لجنة شعبية قاصدة
المهم قاصدة هذه مفردة غامضة محملة بالدلالات الميتافيزيقية(قوية؟؟)
فالمسيرة أو الدولة قاصدة صوب هدف بعيييد يلوح في الأفق محمولا على
غمام ابيض و تحفه الملائكة..و لما تتقال قدام الكيزان المبتدئين
بقيفوا لمبة حرّم لما شعرة جلدهم تكلّب.
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
تذكرني هذه الكلمة العجيبة التي بدأنا نسمعها((( حقيقة)) من افواه
الجماعة تذكرني باحد اقاربي الذي اشتهر بالكذب وكان لايزيد
من جملتين احداها مقدمة لكذبة كبيرة تتوسطهما كلمة ((صدق))ثم تاتي الكذبة حتي
اننا اطلقنا علية اسم صدق وهو الي الان معروف باسم صدق....فهؤلاء
كصاحبنا مصدقين
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
بسط:و هذه من المفردات التي يبدو أن الجماعة "مبسوطين" منها
جدا و هي مفردة يحبها الترابي كما لاحظت و يكثر من استخدامها فمن
بسط الشورى و بسط الحريات الى بسط الأمن الشامل و هذا الأخير له حكاية
تستحق أن تروى..إذ أنه في وقت ما خلال التسعينيات من القرن الماضي
و في واحدة من تجاربها العجيبة التي اتحفتنا بها الأنقاذ اقيمت اكشاك
في كافة احياء الخرطوم"ما عارف باقي المدن" و وضع فيها صبيان صغار
يلبسون ملابس العسكر و السفنجات عرفوا بناس البسط و مكتبهم عرف بكشك البسط
تتشاجر مع سيد الدكان فتقول له :يا زول يلا على البسط..ينط في بيتك
حرامي يمسكه أهل الحلة فيودونه للبسط..بل أنني أذكر أن كلبنا في عام 97
كان قد عضّ احدى الفتيات في الشارع و درءا لغضب اهلها وديناه البسط
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
دول الاستكبار:و غالبا المعني بها امريكا و بريطانيا و احيانا فرنسا
و هذا المصطلح ربما تمت صناعته ليكون وريثا لمصطلح الامبريالية الذي ساد في
ايام المد اليساري..مع الفارق بين بين المصطلحين فالامبريالية مصطلح مدعوم
بجهد فكري عظيم و هو يعبر بدقة عن مرحلة من مراحل الرأسمالية..اما صاحبنا
دول الاستكبار هذا فهو صناعة ايرانية و القصد منه هو اثارة العاطفة الدينية
لدى الجماهير..
| |
|
|
|
|
|
|
|
|
|
Re: رطانة الإنقاذ (Jargon) (Re: sami Alzubair)
|
سامي الزبير شكرا يا خي على الاضافات المفيدة..و يبدو انك مخلي بالك تمام
من كلام الجماعة لأنو المجموعة الجبتها دي فعلا من بيت الكلاوي
بعض المرجفين:يرسم قائلها على وجهه علامات الغضب و يحاول أن يبدو صارما
تماما و هو ينطق بهذه الكلمات العجيبة.و هي تقال لكل من لا يتفق مع الجماعة
في مواقفهم أو لمن يتحدث محذرا من موقف ما يعتقد أنه سيؤدي لكارثة ..
و هكذا تعارض قيام سد ما لايمانك بعدم جدواه أو لخوفك على ارضك و ارض اجدادك
فأنت مرجف و ستين مرجف كمان.
الخونة والمارقين: و هذه يبدو أنها اقدم عنرا من المرجفين و هي عموما
مفردات قابلة للتشكيل و اعادة التشكيل فخونة ما و مارقين يصبحون مثالا في الوطنية
بمجرد توقيع اتفاق أو معاهدة مع الجماعة.
معارضة الفنادق: و هذه تقال بلا تحفظ أو استدراكات فكل المعارضين هم من
ساكني الفنادق ذات الخمس نجوم يقبضون ثمن معارضتهم بالدولارات من جهات غير محددة
بدقة..يتحدث المعارض عن معسكرات للنازحين و اراض محررة و يدلي بالتصريحات من الميدان
بواسطة الثريا و برضه لا يتغير تصنيفه...معارضة فنادق.
عمك: دي غلبتني يا ود الزبير
مقضي انشاء الله:و دي يطرشني برضه ما سمعتها.
| |
|
|
|
|
|
|
|
|
|
Re: رطانة الإنقاذ (Jargon) (Re: saber alhawatti)
|
Quote: أرموا قدام ورا مؤمن ...
الدبابين .... |
دي يا صابر مفردات سادت ثم بادت بنهاية برنامج ساحات الفداء و بعد انقسام
الجبهة الاسلامية و جهجة الكوادر ما بين الوطني و الشعبي..و الظاهر الآن أنو
ورا بتاع الناس ديل لا مؤمن و لا حاجة..و السادة الدبابين فيهم من قضى نحبه
و فيهم من كفر بالمشروع الحضاري و منهم من تحول لبزنس مان و هكذا..
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
يا سيف النصر
موضوعك رائع وفي السلك
وكمان مفيد جدآ لفك شفرة رطانة الكيزان
شكرآ لك
ولصديقتنا تراجيي التي دلتني على البوست
والدال على الخير وعلى المفيد أجره كفاعله
فتراجي شريكة لك
ثم
كنت عايز اشارك ب { يا شيخنا }
التي تنرفزني جدآ
لكن عمر سعد سهكها لينا
وكتر خير الضابط الهرشوا
ملاحظاتك في رطانتهم دقيقة جدآ
حتى كدت أظنك منهم
والذي يعرف رطانة قوم يأمن شرهم
في واحدة من مسهوكاتهم
ومنجوراتهم هي
المتوضئة
كانوا بيقولونها عن القناة الفضائية
كلما قالوها بكون متأكد من نجاسة القناة
ونجاستهم
نكرر شكرنا لك
ولتراجي
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
المفردات دي أكتر من يلاحظها الغايب عن البلد. وفي مرّة كنت في إجازة، وبقضي مشوار، إتنين شباب (بنات) أشروا لي، شفقت عليهم من الشمس الحارة، وقلت نمارس شوية (فضل ظهر) وأخدتهم معاي في طريقي. لما وصلوا قالوا لي بس أقيف هنا، وهم نازلين من العربية، واحد قالت لي (جزاك الله خيراً)، بدون ما أحس قلت ليها تعالي هنا، نحن أهلنا علمونا (كتّر خيرك)، لو عندِك أديني ياها، لو ما عندك حقتك المنوّنة دي ما لازماني .. شيليها معاك.
الناس داخل السودان بقوا يتعاملوا مع الكلمات دي بصورة عادية .. بس برضو في تعبيرات بتكون حكر على الجماعة.
شكراً ليك سيف النصر .. وده توثيق برضو مطلوب
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
Quote: -نفرة..و هذه تأتي بالالوان الطبيعية و بجميع الاحجام فهنالك نفرة
خضراء و نفرة كبرى..الخ. |
الأخ الفاضل سيف النصر محي الدين تحياتي
بوست أكثر من تحفه ، ولا تنس ( الخونه والمارقين ) وبالتأكيد ممكن يقوم بتفسيرها أو ( يتبرع ) بشرح المفرده أحد ( الإخوه/ات ) ( الكيزان ) ( جزاهم الله خيراً )
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
Quote: في واحدة من مسهوكاتهم
ومنجوراتهم هي
المتوضئة |
سلامات يا ابو ساندرا
المتوضئة دي برضه كانت بتستخدم في الدعاية الانتخابية لاتحادات الطلاب..يقولوا ليك:
انتخبوا الأيدي المتوضئة..و كأنما أيدي الآخرين ليست كذلك..و بعدين الأيدي دي ذاتها
ما عرفناها هل بتكون متوضئة 24/7 و للا كيف؟ و بعدين كيف الأيدي دي نفسها بتمتد لتزور
نتيجة انتخابات ما.. أو تتصرف في اموال الطلاب بغير وجه حق؟
| |
|
|
|
|
|
|
|
|
 Re: رطانة الإنقاذ (Jargon) (Re: سيف النصر محي الدين محمد أحمد)
|
التأمين : ويقال أنا ( بأمن ) على الموضوع الفلاني أو على النقطة الفلانية بمعنى تأكيد.
تثنية : مشتقة من (ثاني ) بمعنى مشاركة وجهة نظر في جزء معين من الموضوع.
التمكين :
التزكية :
أخوات نسيبة:
مبايعة: ويقصد بها البيعة لولي الأمر على الولاء ( إستخدام لمفردة قديمة ) في غير موضعها.
التوجه الحضاري:
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
كتب سيف النصر
وقوسه
Quote: ما عرفناها هل بتكون متوضئة 24/7 و للا كيف؟
و بعدين كيف الأيدي دي نفسها بتمتد لتزور
نتيجة انتخابات ما.. أو تتصرف في اموال الطلاب بغير وجه حق؟ |
والله حاجة عجيبة يا سيف
والأعجب لسع في ناس بيصدقوهم
زي فتحي شيلا
وحضرة الحلف طلاق يصوت للبشير
ياخ قومو لفو
| |
|
|
|
|
|
|
|
|
|
Re: رطانة الإنقاذ (Jargon) (Re: أبو ساندرا)
|
جزاك الله خير
قالها أحد الطلبه في اول ايام الانقاذ لأحد دكاترة جامعة الخرطوم الكبار فأفرد الدكتور سبابته في وجه الطالب وقاللو بغضب باين وصوت مرتفع
"جزاك الله خير انت ده"
فجزاك الله خير يا دكتور سيف على الفكرة الرائعة
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
الأخت دلال عزالدين...تحياتي
الكلام عن الأجندة و الأجندات و خصوصا الخارجية منها فعلا يكاد أن يكون قاسما مشتركا
في كل التبريرات التي تقدم للمشاكل و الاضطرابات التي يواجهها اهل الانقاذ باستمرار
منذ (تمكنهم)
| Quote: تحية طيبه ( دي بتعتي ) |
اعملي حسابك ما يلفحوها منك
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
البشريات وبتجي دائما مع بدايه المشاريع.
أو تسمع انو فلان شخص متين دلالة على إلتزامه (بشنو؟)
منسقية ودي في أي وحدة حكومية بتلقى اتنين تلاتة ومنها أستحدثت وظيفة المنسق (العام) او غير العام. ,يشار إليه ب (عمك) التي اوردها سامي الزبير
(عموما) مصطلح (عمك) يقصد به (كبير القعده)
الدابة وهي عربات أو (زمان كانت مواتر) التنظيم او الحكومة.
حافز الوزير هو مقدار مالي يستقطع من ايرادات الوزارة لصالح الوزير وبالذات وزارة الداخلية أيام (عمك) مخترع نظرية الاستدراج
!
| |
|
|
|
|
|
|
|
|
|
Re: رطانة الإنقاذ (Jargon) (Re: salah elamin)
|
سلامات يا أخت مها عبد الله
| Quote: ولا تنس ( الخونه والمارقين ) |
الخونة و المارقين ديل كانوا في بداية الانقاذ كل الناس الما كيزان
و الآن ضموا ليهم الكيزان بتاعين المؤتمر الشعبي(و للا يكونوا بيمثلوا علينا كمان؟)
| |
|
|
|
|
|
|
|
|
|
Re: رطانة الإنقاذ (Jargon) (Re: بدر الدين اسحاق احمد)
|
Quote: إطار: دي بترفع الضغط 100%
آلية : دي منتهى العوارة .
مصفوفة : دي جديدة في المصطلح |
سلام عبدالرحمن الحلاوي...مصفوفة دي غايتو فيها قدر كبير من التعالي و بعيدة تماما
من استيعاب جماهير شعبنا الكادحة في الهوامش و هم المعنيون اساسا بهذه(المصفوفة).
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
Quote: البشريات وبتجي دائما مع بدايه المشاريع.
أو تسمع انو فلان شخص متين دلالة على إلتزامه (بشنو؟)
منسقية ودي في أي وحدة حكومية بتلقى اتنين تلاتة ومنها أستحدثت وظيفة المنسق (العام) او غير العام. ,يشار إليه ب (عمك) التي اوردها سامي الزبير
(عموما) مصطلح (عمك) يقصد به (كبير القعده)
الدابة وهي عربات أو (زمان كانت مواتر) التنظيم او الحكومة.
حافز الوزير هو مقدار مالي يستقطع من ايرادات الوزارة لصالح الوزير وبالذات وزارة الداخلية أيام (عمك) مخترع نظرية الاستدراج |
يا صلاح الدين نادر مداخلتك دي قوية..دي Inside information عديل كده
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
Quote: عندنا خالنا كوز متمرد اظنك قابلته مرة
لما يكون معانا ما بستعمل لغة الكيزان
لكن شايفو لما يكون في مجتمع فيه كيزان بكثر من الكلمات
بتاعتهم دي وخاصة نعم ..نعم |
شبكشي سلامات و مشتاقين عديل
عارف المسألة دي موجودة في كل التنظيمات ..طريقة اعضاء التنظيم في الحديث غالبا ما
تكون متقاربة و يميلون لتكرار عبارات و مفردات بعينها و تجد عند بعضهم تأثرا بطريقة
زعيم الحزب في الكلام ..ابلغ مثال على ذلك هو تأثير الترابي على الكثيرين من الكيزان
و الصادق المهدي على اعداد من اعضاء حزب الأمة..و ناس الجبهة الديمقراطية برضه عندهم
طريقة مميزة في الكلام و عبارات اثيرة يحبون ترديدها و بعضها انتشر في اوساط الطلاب
حتى من غير اعضاء الجبهة الديمقراطية( زي في الحتة دي,أو الزول داير يقول,أو بالفهم ده)
و غيرها من العبارات و المفردات.
المشكلة في رطانة الكيزان هذه أنهم عملوا على ترويجها و ضخها اعلاميا لتصير لغة
للشارع السوداني بمختلف توجهاته...اثني على رأيك في أن هذا الموضوع يمكن أن يكون
نواة لدراسة لو عمل عليه أحد المتخصصين.
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
Quote: غايتو دى ما بتعرفوها ...
الـ حاءاءات الثلاثـــة ...
تعزيز ...
القيادات الوسيطة ...
الإســتوزار ... |
بدر الدين احمد اسحق..سلامات
الحاءات الثلاثة دي يطرشني ما سمعت بيهن ..اما بقية المصطلحات و العبارات من تعزيز
و قيادات وسيطة و استوزار تبدو مألوفة بالنسبة لي . بس اكيد معناها عند "كوز" عتيد زيك
اكيد بيكون مختلف عن محاولتي انا لايجاد معنى لها...غايتو يا زول حج حجك و تعال اشرح
لينا و ما تنسى تورينا هل هي من رطانة الوطني أم الشعبي
| |
|
|
|
|
|
|
|
|
 Re: رطانة الإنقاذ (Jargon) (Re: سيف النصر محي الدين محمد أحمد)
|
الجنائية : و هي المحكمة الجنائية الدولية و التي
درج ناس الانقاذ على الاشارة اليها اختصارا بالجنائية و تبعتهم في ذلك الصحافة المحلية
و اخبار الاذاعة و التلفزيون بل و كتبتها جماهير محلية أم ضبيبينة و الكريدة و ابكريميت
و كل الجماهير التي خرجت تضامنا مع الرئيس و استجابة لدعوات المؤتمر الوطني..
و الجنائية هذه في الحقيقة تمثل شيئا عجيبا و فريدا لم يمر على السودان في تاريخه الحديث
مثيلا له..و قد اجتهد أهل الانقاذ في الوصول لهذا الانجاز الفريد ايما اجتهاد و اصموا
آذانهم و أعموا اعينهم عن كل قول أو فعل من شأنه أن يجنبهم و البلاد و العباد معهم بلوغ
هذه المرحلة ..فلا حول و لا قوة إلا بالله.
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
سيف ورفاقه دا بوست ذكي ولماح،
كان الله هون جاييهو بمزاج،
أصلي الأيام دي بسمع الإذاعة في الإنترنيت،
عشان أفور دمي وكدا.
*
عجبتني دي شديد يا دكتور أبوحريرة، ممكن أستلفها؟
Quote: جزاك الله خير
قالها أحد الطلبه في اول ايام الانقاذ لأحد دكاترة جامعة الخرطوم الكبار فأفرد الدكتور سبابته في وجه الطالب وقاللو بغضب باين وصوت مرتفع
"جزاك الله خير انت ده"
|
| |
|
|
|
|
|
|
|
|
|
Re: رطانة الإنقاذ (Jargon) (Re: حذيفه ابراهيم الكباشي)
|
Quote: الاستصحاب (بمعني استبطان المرجعية
المناصحة: لغة تستخدم عند التفاوض مع طرف آخر
، التفويج : حشد الجماهير للتصويت أو لقاء المسئولين |
سلامات يا اسامة الكاشف ..
المصطلحات التي أوردتها في مداخلتك فعلا من الرطانة الانقاذية المهمة جدا و هي في ظني
تتوسل لغة تراثية تمدها بالشرعية اللازمة....المصيبة شوية شوية بقوا يقولوها ناس تانيين
ما عندهم علاقة بالانقاذ.
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
لمن يعرفو بعضهم
أخوكم في الله ان شاء الله الكوز الفلاني
وتيمتهم الشهيرة
..........
..............
...................
لا لدنيا قد عملنا شوف دي كيف
فليعد للدين مجده
فليعد للدين عزه
أو ترق منا الدماء
أو ترق منهم دماء
أو ترق كل الدماء عديل كدا
| |
|
|
|
|
|
|
|
|
|
Re: رطانة الإنقاذ (Jargon) (Re: الفاتح ميرغني)
|
Quote: دول الاستكبار:و غالبا المعني بها امريكا و بريطانيا و احيانا فرنسا
و هذا المصطلح ربما تمت صناعته ليكون وريثا لمصطلح الامبريالية الذي ساد في
ايام المد اليساري..مع الفارق بين بين المصطلحين فالامبريالية مصطلح مدعوم
بجهد فكري عظيم و هو يعبر بدقة عن مرحلة من مراحل الرأسمالية..اما صاحبنا
دول الاستكبار هذا فهو صناعة ايرانية و القصد منه هو اثارة العاطفة الدينية
لدى الجماهير.. |
سيفنا
لاحقا حايضيفو عليها اي دولة ماحتقدر تعبر اجواها طائرة البشير
يعني تشاد وبتسوانا برضو ممكن تكون مستكبرة
| |
|
|
|
|
|
|
|
|
|
Re: رطانة الإنقاذ (Jargon) (Re: الفاتح ميرغني)
|
وهدة: ودي بستخدموها..لم يقولو انهم انقذو البلد من حكم الاحزاب
مبروك:
الانجاز:
الاعجاز:
التاصيل:
التمكين:
محلية:
ولاية:
والي:
مجلس اربعيني:
بسط الامن:
الاخ المجاهد:
الاخ المرابط:
وحدة الصف الوطني:
المنشقين:
المندسين:
العمالة:
دول الاستكبار:
المأجورين:
في حضن الغرب:
شرطة شعبية:
دفاع شعبي:
نداء الجهاد:
النفرة:
تسيير:
ترسيخ مبدأ (كذا):
اها و لسه...
| |
|
|
|
|
|
|
|
|
|
Re: رطانة الإنقاذ (Jargon) (Re: عبد المنعم سليمان)
|
| Quote: الله ياخدكم ومن لف لفكم الي يوم الدين يا ابن تاج الدين |
اسع يا منعم اللمة فى
البوست ده كلها عشان شوية مصطلحات لا راحت لاجات....والله كان كدا ...الكيزان ديل خطرين خلاص
معقول اعملوا مشغولية للناس قدر كدا بشوية المصطلحات دى؟؟؟ومال بقية القاموس حاتكون كيف؟؟
ههههههههههه
| |
|
|
|
|
|
|
|
|
|
Re: رطانة الإنقاذ (Jargon) (Re: على تاج الدين على)
|
Quote: لا لدنيا قد عملنا شوف دي كيف
فليعد للدين مجده
فليعد للدين عزه
أو ترق منا الدماء
أو ترق منهم دماء
أو ترق كل الدماء عديل كدا |
سلامات يا محمد الحاج
هذه الاهازيج اصبحت تردد باصوات خافتة و قد زالت منها الحماسة القوية التي كانت
تصحبها زمان...هم الآن تأكدوا انهم يعملون للدنيا و أن مجد الدين ليس واقعا في
دائرة اهتماماتهم الحالية...قد ترق بعض او كل الدماء ، لكن ليس بسبب الدين بالتأكيد.
| |
|
|
|
|
|
|
|
|
 Re: رطانة الإنقاذ (Jargon) (Re: الطاهر ساتي)
|
| Quote: قوى الإستكبار ( مع ضرورة تفخيم حرف الراء بما يشبه التشديد)!!. |
الأخ الفاتح ميرغني..سلامات
شوف حيدر حسن ميرغني اضاف ليك اضافة مهمة لحكاية دول او قو الاستكبار:
Quote: لاحقا حايضيفو عليها اي دولة ماحتقدر تعبر اجواها طائرة البشير
يعني تشاد وبتسوانا برضو ممكن تكون مستكبرة |
فلله الأمر من قبل و من بعد..LOL
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
الطاهر يابلدينا
| Quote: جلسة إيمانية (أهم حاجة فيها البلح بالسمسمية والشاى بالزلابية ) |
ياخي جلسة ايمانية دي قديمة من زمن بندرس انا وسيف النصر ده في مصر
كانوا بيخموا بيها البرالمة
يخلعوك كده لامن تخاف على روحك
كأنك قادم للبقاء في تورابورا
وكانت بالفول والشاي بس
وصيام الخميس والاثنين
والجماعة التماسيح الكبار لا عليهم بصوم ولايحزنون
بدل وكرفتات وخلط جكس وصور
| |
|
|
|
|
|
|
|
|
|
Re: رطانة الإنقاذ (Jargon) (Re: سيف النصر محي الدين محمد أحمد)
|
منعم... سلامات
Quote: سد الذرائع
ااااخخخخخ دي كل ما اسمعها منهم بتجيب كثافتي طوالي .. |
البجيب الكثافة كتير يا منعم..بمناسبة الثوابت اهديك قصيدة شاهين
شاهين عن الثوابت:
ثوابت ثورة الانقاذ المنتصرة دوما بأذن الله
ثوابت , ثوابت
احب الثوابت بزيت مع بطاطس
وحبة شمار
خلطة مبأدى بشطة وطماطم
حلة كوارع
شوربة خضار
مواطن يا صالح
صباح الثوابت
بلاش المساخر
ثبت ثوابتك
مسامير مفاصلك
واوعك تعارض
بنعرف مصالحك , ونعرف نفاوض
حتعمل مناضل , بتتعب ونزعل
و (..) حيطلع
صلاح البلاد والعباد فى الثوابت
فظبط مسائلك .. حالك ومالك
وشيل هم عيالك
وجيب عيشة سخنة لدكوة طناشك
واهتف معايا (يعيش الوطن ثابت مثبت بلصقة ثوابت)
عزيزى المواطن
بطاقتك بتثبت بانك موله وعاشق مثابت
وارباب ثوابت
فشكرا جزيلا لهذا الكرم
بنشكر مدامك
نضالها الصبور
بدلكة وعطور
ورطلين بخور
اضاف ليل خميسكم فى بند الثوابت
فشكرا مدام
شكرا مواطن
شكرا شباب
وعاش الوطن .
الوطن .
شاهين
| |
|
|
|
|
|
|
|
|
|
Re: رطانة الإنقاذ (Jargon) (Re: Balla Musa)
|
كيف حالك يا سيف...
"حزمة" برضه من المفردات التي هلكنا بها مسؤولو الجبهة في تصريحاتهم (الكاذبة بالطبع)... "حزمة قرارات"..."حزمة إجراءات"... "حزمة قوانين"... حزمة تدابير"...الخ. وسرعان ما وجدت طريقها لقاموس مفردات صحافة عصر نظام الجبهة، لتنضم إلى أخريات مثل "عدائيات" و"تفُّلتات".
تحياتي،
| |
|
|
|
|
|
|
|
|
|
Re: رطانة الإنقاذ (Jargon) (Re: قيقراوي)
|
قريب من النص
__
والله يا سيف النصر اشهد لاهل الخراب و (الانقاذ!!) ديل انهم بحبوا التسمية وسمايين خلاص
مرة قريت لافتة بشارع القصر مكتوب عليها :
العيد الخامس عشر للدفاع الشعبي
تحت شعار : الخيول مُسرجة
....
مسرجة اتقول فتحوا بيها القسطنطينية
ما شفنا خيول في البلد دي الا وراها كارو
| |
|
|
|
|
|
|
| |
ibrahim alnimma
Ashraf el-Halabi
حليمة محمد عبد الرحمن
على تاج الدين على
عمر سعد
زهير الزناتي
حيدر حسن ميرغني
معاوية الأرباب
عصام علي أحمد
عزام حسن فرح
MAHJOOP ALI
حسين نوباتيا
Samau'al Abusin
saber alhawatti
Tragie Mustafa
NGABY AJOOZ
أبو ساندرا
محمد أبوالعزائم أبوالريش
Dalal Ezzaldin
مها عبد الله
عبدالرحمن الحلاوي
Ahmed Yousif Abu Harira
Salahaldeen Nadir
salah elamin
بدر الدين اسحاق احمد
اسامة الكاشف
A.Razek Althalib
Ahmed Elmardi
حذيفه ابراهيم الكباشي
azhary taha
Mohammed Elhaj
الفاتح ميرغني
عبد المنعم سليمان
هواري نمر
أحمد أمين
الطاهر ساتي
AnwarKing
قيقراوي
فيس بوك
تويتر
انستقرام
يوتيوب
بنتيريست