كثيرا ما نقرأ ان كلمات الغزل نادرا ما تحدث بين الأزواج بعد الزواج وان هذه الكلمات التي كانت تنهمر مثل المطر خلال فترة الخطوبة( التي سمتها الحبيبة عطوفي بفترة الغش التجاري) تقل كثيرا بعد اشهر قليلة من العودة بعد شهر العسل وتختفي هذه الكلمات تماما بعد السنة الخامسة من الزواج. وكثيرا ما نقرأ نكات عن حالة الزوج الذي يحاول ان يعبر عن حبه لزوجته برومانسية وهنا تصرخ الزوجة:" سجمي المات منو؟؟؟) وانا من هنا اناشد الحبيبة عطوفي ان تساعد في اثراء هذا البوست وتمسك الخيط من اوله وتدينا تلخيص بسيط عن المشكلة دي ومفاتيحها.. وكمان نريد ان نسمع من الطرفين، النساء والرجال فهل فعلا الزوجة تتوق لمساع كلمات الغزل من زوجها وانها على استعداد لنسيان اي مشكل تعترض الحياة الزوجية عبر هذه الرومانسيات والتي لا يستطيع الرجل التعبير عنها خوفا من القيل والقال او جهلا بمثل هذ الأمور أم ان الكلام ده كله كلام جرائد ساكت وان الواقع يختلف ؟؟؟ والله يديكم العافية
06-01-2013, 01:37 PM
Kabar Kabar
تاريخ التسجيل: 11-26-2002
مجموع المشاركات: 18537
Quote: كثيرا ما نقرأ ان كلمات الغزل نادرا ما تحدث بين الأزواج بعد الزواج وان هذه الكلمات التي كانت تنهمر مثل المطر خلال فترة الخطوبة( التي سمتها الحبيبة عطوفي بفترة الغش التجاري) تقل كثيرا بعد اشهر قليلة من العودة بعد شهر العسل وتختفي هذه الكلمات تماما بعد السنة الخامسة من الزواج. وكثيرا ما نقرأ نكات عن حالة الزوج الذي يحاول ان يعبر عن حبه لزوجته برومانسية وهنا تصرخ الزوجة:" سجمي المات منو؟؟؟) وانا من هنا اناشد الحبيبة عطوفي ان تساعد في اثراء هذا البوست وتمسك الخيط من اوله وتدينا تلخيص بسيط عن المشكلة دي ومفاتيحها.. وكمان نريد ان نسمع من الطرفين، النساء والرجال فهل فعلا الزوجة تتوق لمساع كلمات الغزل من زوجها وانها على استعداد لنسيان اي مشكل تعترض الحياة الزوجية عبر هذه الرومانسيات والتي لا يستطيع الرجل التعبير عنها خوفا من القيل والقال او جهلا بمثل هذ الأمور أم ان الكلام ده كله كلام جرائد ساكت وان الواقع يختلف ؟؟؟ والله يديكم العافية
الأميرة والله كلام زي العجب لكن دحين يا أخيتي من وين يجي كلام الغزل مع جنس دة ( تكسري رجلي .. تكسري يدي أنا راجل البيت دة)
مرحباحبابك استاذنا الكبير ول ابا كبر. وشرفتنا كثير والله في بيتنا.. بس نحن بنحاول ابعاد تهمة تبلد المشاعر والأحاسيس عن الزوجة السودانية لكن في نفس الوقت ما عاوزين كمان نظلم جميع الأزواج السودانيين ونتهمهم بعدم قدرتهم للرومانسيات .. وطبعا في بعض الأزواج بيقولوا ان رومانسيات الأفلام السينمائية دي ما بتتماشى مع الحياة القاسية في السودان.. ولكن قط شك هناك استثناءات..وتكيد راجعة عشان عاوزة اشير لرأي جرئ جدا جدا لصديقة ما حتعجب لا الأزواج ولا الزوجات... وشكرا على هذه اليفديوهات الحالمة والله يديك العافية
06-05-2013, 02:04 PM
وضاحة وضاحة
تاريخ التسجيل: 01-16-2005
مجموع المشاركات: 9116
قرجة يا حفيد بطلنا القومي ابو قرجة وهو في حب بدون نضمي يا قرجة.. ودحين عاوزين نشجع الأزواج يكتروا من النضمي .. لكن ما النضمي الفارغ ولكن نضمي الرومانسيات والله يديك العافية
الخلاني افكر اكتب البوست ده النكات البنقراها من وقت لآخر عن عدم استجابة الزوجة السودانية للرومانسيات التي يحاول الأزواج التعبير عنها ( طبعا مع قلتها وندرتها) .. وفي الجانب الاخر اتهام الزوجات للأزواج بأنهم فاقدي الأحاسيس والمشاعر وجامدي الشعور وانهم لا يعرفون التعبير عن الحب حتى ولو كان الزوجين بيحبوا بعض حب مبالغ فيه.. ولكن ليس هناك افصاح لهذا الحب .. وطبعا في فترة الخطوبة.. كما تسمينها فترة الخش التجاري..نلقى كلملت الحب والعشق تنهمر على اذن الخطيبة بدون توقف ولكن بعد الزواج تتبلد المشاعر والأحاسيس وتنحبس داخل الصدور والغرف المظلمة.. وعلماء الاجتماع بيقولوا ان الزوجة تحب دائما تسمع كلمات الغزل وكلمات الحب من زوجها حتى تتجدد الدماء في مسيرة الحياة الشاقة .. وحتى لا تبحث الزوجة عن كلمات الغزل والاعجاب من آخرين .. وتدخل في دائرة الحرام الذي يودي لمهالك نار جهنم.. والكلام هنا في المنبر العام عن الأزواج والزوجات السودانيين ومشاكل الزواج يثير الخوف في نفوس الفتيات والفتيان الذين لا يزالون خارج القفص الذهبي( أو بالأصح القفص الحديدي عند البعض) ونحاول هنا ان نستكشف طريقة تحويل القفص الحديدي إلى القفص الذهبي.. ومن ذلك كسر العقدة المسيطرة عند الأزواج .. والدليل في جملتك الأخيرة ::"" كان كسرتي رجلك .. او كسرتي يدك .. انا راجل البيت هنا.. ) .. واكيد راجعة ليك .. والله يديك العافية
الزوجة تريد نفس كلام الخطوبة تتردد من زوجها بعد الزواج.... ولا ندري لماذ يتوقف انهار الحب والعشق ؟؟؟ الزوجة تريد ان يتحول الحب إلى عشق .. لأن العشق اقوى من الحب... ويمكن ان ترى الحب في قصيدة نزار قباني " احبك جدا" ..
أحبك جدا واعرف ان الطريق إلى المستحيل طويل واعرف انك ست النساء وليس لدي بديل واعرف ان زمان الحنين انتهى ومات الكلام الجميل إلى ست النساء ماذا اقول احبك جدا احبك جدا واعرف اني اعيش بمنفى وانت بمنفى ريح وغيم وبرق ورعد وثلج ونار واعرف ان الوصول لعينيك وهم واعرف ان الوصول اليك انتحار ويسعدني ان امزق نفسي لأجلك ايتها الغالية ولو خيروني لكررت حبك للمرة الثانية يا من غزلت قميصك من ورقات الشجر أيا من حميتك بالصبر من قطرات المطر احبك جدا
وأعرف اني اسافر في بحر عينيك دون يقين واترك عقلي ورائي وأركض اركض خلف جنوني
أيا إمرأة تمسك القلب بين يديها سألتك بالله ان تتركيني لا تتركيني فماذا انا اذا لم تكوني احبك جدا وجدا جدا وما همني ان خرجت من الحب حيا وما همني ان خرجت قتيلا..
هذا هو الحب الذي عبر عنه الشاعر السوري الراحل نزار قباني.. ولكن العشق سأروي ما عبر عنه شاعر سوداني.. والعشق أعمق وأعمق .. والله يديكم العافية
06-05-2013, 07:55 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
اها يا بت السيد هسه اخوك شيقا دا لما يتصل بأولادو في السودان ويقوم واحد منهم يتشالق ويرد لي بقول ليهو هات ماماكم احدثها اول وبعد اشبع منها بجيكم و المدام جالسة وسامعة الكلام دا .
اها يلا وري اخوك انا بكون في نظرها كيف ؟
06-05-2013, 08:10 PM
احمد حمودى احمد حمودى
تاريخ التسجيل: 01-11-2013
مجموع المشاركات: 4364
البرود او تناسي المشاعر متلازمة تصيب الزوجين السودانيين بعد خمسة ستة سنين زواج وليس الزوجة وحدها عندنا واحد صاحبنا شايقي طبيعة شغلو برجع البيت اتنين صباحا عايز ينوم بس .. قامت زوجتو قالت ليهو انتا ما متذكر الليلة شنو من آخر نخرتو قال ليها شنو؟؟ قالت ليهو ذكرى زواجنا قال ليها ومعاها تثاوب طوييل (سممممممممح) يخسي عليك يا ابو محمد كان تجيب معاك اي هدية حتى ولو كرت معايدة بجنيه ونص انقلب على جنبتو التانية ومد ليها ايدو (هاك دي خمسة جنيه اشتري الكرت بكرة وكمان شيلي الباقي) وهاك يا شخير
والله جد
06-05-2013, 09:01 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
أ ها عايني زي ده عمره كلو سارح ورا النياق جاي يقول ليك ماما ـ الـ يما الـ تغتِس حجرك.
شفتي يا أميرة الناس دي فاقدة حنان كيف? عايني ليهن انكبوا في البوست قدر ايش?
غايتو انا البعرفو عن النسوان غتيتات خلاس. قَدُر ماتقول خلاس كشفت وَرَقِن ـ تلقاها غَيَّرت ليك القفلة.
عليكم بالسودانيات ـ ديل مفصلات عليكن تفصيل اسألوا مجرِّب ـ انا كنت متزوج غير سودانية النكتة الا اقعد اشرحا وافرتكا حتة حتة وكت تجي تضحك القاها بتضحك علي تعبي في شرح النكته.
انا بدبك وصفة سحرية وجربها وشوف انت بعد كده حتكون في نظرها كيف...
اول ما واحد من اولادك يرفع السماعة تقول ليه ، بعد السلام، اديني تؤأم روحي بالأول وبعدين نسمع اخباركم واخبار مدارسكم.. ولمن تجي المدام حيدور بيناتكم الحوار التالي .. ونفرض ان اسمها بسمات( بالمناسبة بسمات دي صديقتي وتوأم روحي).. ود شيقوق: إزيك يا بسمات وإزي احوالك.. والله والله يا بسمات اللحظة من بعدك عندي بتساوي سنين.. بسمات: يا راجل ده كلام شنو البتقول فيه ده.. وبعدين انت الكلام السمح ده جبته من وين؟؟؟ ود شيقوق: الكلام السمح موجود .. والكلام السمح اذا ما قالوه ليكي بيقولو لي منو؟؟ والله يا بسمات اي لحظة بعيد عنك بعتبرو ما من عمري .. بسمات: والله حيرتني معاك.. ولكن بصراحة كلامك عاجبني بالحيل.. ومن زمان مالك ما بتقول الكلام البدخل القلب ده.. ود شيقوق: يا بسمات دي والحالة لسع انا ما فضفضت الجواي وما فضفضت ولهي وعشقي وحبي ليكي كيف كان وكيف حيكون..وبعدين حكاية نعيش بعيدين من بعض دي خلاص كفاية.. والاجازة الجاية دي لمن ارجع .. يا تجو راجعين معاي كلكلم يا انا القعدت معاكم هناك... والعمر لازم نقضيه مع بعض .. وطبعا الحوار حيكون طويل شوية..وملئ بأحاديث الشجون وذكريات فترة الخطوبة ..... ولكن نكتفي بهذا القدر وبكره ممكن نتعمق اذا عاوز المزيد.. وطبعا بعد كدة المدام ثاني حليفتها حتكون:" وحياة ود شيقوق انا ما بقدر امشي معاكم العرس ده .. عشان...."" شغنت كيفن يا ود شيقوق.. والله يديك العافية
حكاية وليد دي حالة نادرة ان واحد يغني لزوجته يوم زواجه.. وبعدين الكلام كله بعد الزواج بخمس سنوات.. هل الكلام الحلو ده بيستمر.. وبعدين مش يمكن يكون وليد ده اساسا فنان وعمله الرسمي الغناء.. يعني ما قاعد يغني لزوجته.. ده اذا ما كان اساسا شال حق الغناء من والد زوجته...( وجه ضاحك).. والله يديك العاقية
Quote: ..عندنا واحد صاحبنا شايقي طبيعة شغلو برجع البيت اتنين صباحا عايز ينوم بس .. قامت زوجتو قالت ليهو انتا ما متذكر الليلة شنو من آخر نخرتو قال ليها شنو؟؟ قالت ليهو ذكرى زواجنا قال ليها ومعاها تثاوب طوييل (سممممممممح) يخسي عليك يا ابو محمد كان تجيب معاك اي هدية حتى ولو كرت معايدة بجنيه ونص انقلب على جنبتو التانية ومد ليها ايدو (هاك دي خمسة جنيه اشتري الكرت بكرة وكمان شيلي الباقي) وهاك يا شخير
والله جد
.................
عزيزي علي مرغني والله حلوة شديد ... لكن بصراحة ابو محمد ما عندو احساس خالص... يعني اذا قلنا بمشغولياته الكثيرة وسهره في الشغل خلته ينسى ذكرى الزواج.. مش كان يقول كلام حلو وشاعري لزوجته المنتظراه لحد 2 صباحا.. ولكن الغلط ما غلطو.. الغلط غلط الزوجة المساهرة لحدي الصباح لزول ما عنده مشاعر( وجه ضاحك).. والله يديك العافية
عزيزي ود الفاضلابي الناس دي ما فاقدة حنان.. ولكن فاقدة الكلام الشاعري وفاقدة التعبير عن الرومانسيات.. وهم لاقين الحنان الدافق ولكن يا خسارة رد الجميل بكون جزاء سنمار... يا ضرة .. يا تجاهل.. ويا سوء معاملة.. ويا انفصال وطلاق.. وبعدين نرجع ونقول :: نحن لا نتهم الكل ولكن البعض.. وهم السواد الأعظم.. أها وقوموا طبقوا نصيحتي لود شيقوق( والله يديك العافية
06-06-2013, 10:26 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
Quote: ولكن فاقدة الكلام الشاعري وفاقدة التعبير عن الرومانسيات
صحبة المدام شديد من المدرسة .. نزلناهم عندنا في البيت عشان زوجها عنده عمل لمدة شهر وشوية صحبتها دي بتدلع ليك زوجها دلع .. تجهز ليهو اكل خاص وما بتخوت حتة في خشمها الا بعد ما هو يرجع بعد المغرب بى شوية حتى هي تقعد تاكل وتاكلو بى يدها لقمة وراء لقمة وهو يبلع وانا اشيل واعاين .. ومستغرب من المنظر دا وهو يقول ليها كفاية وتقعد تحلفو .. عشان خاطري بس الحتة الصغيرة دي وهي تكون لحمة يمكن ربع كيلو .. وتسمعو ليك كلام من نوع حبيبي .. وعيوني الكلمتين ديل من انا اتزوجت ما سمعتهن الا في المسلسلات اصابني ليك نوع من الاحباط الشديد .. لامن قربت انحف وقلت ليه يعني اشمعنى انا .. انا فيني شنو ليه ما باكلوني وبدلعوني زي دا ناقص رجل ولا كراع ؟ انا مالي في ليلة ظلماء وانا جاي من عمل متواصل .. اتوكلت على الله وقلت ليها اسمعي انتي ما دلعيني زي ما صحبتك دي قاعدة تدلع راجلها تاكليني وتشربيني بي يدك .ومرة مرة معاها كلمتين حلوين وبعدين هو احسن مني في شنو يعني بالعكس انا مثقف اكتر منو قامت اتلفتت علي بى سرعة وقالت لي انت الظاهر ما عندك شغلة ساي وداير ليك سبب لي مشكلة لكن الله دا في
بس في حاجة واحدة انت ما عملتها.. كا مفروض تسأل صاحبة زوجتك وتقو ليها انتي بتدلعي زوجك ده الدلع ده كله لشنو؟؟ وردها حيكون كالآتي: راجلي راجل السرور والعظمة.. ده كل يوم بيسمعني كلام في الصباح كلام كله شوق وحنان وغرام.. وفي نص اليوم بيضرب لي تلفون بيسأل عن أحوالي ويبث غرامه في كل لحظة.. ولمن يرجع انا بنتظره جنب الباب وما بيدخل إلا وقبلة على الجبين .. وفي عيد الزواج بيدخل بهدية.. وما ضروري قيمة الهدية لأنه مرات بيدخل بوردة .. ويوم عيد ميلادي بنسوق الأولاد وبنتعشى بره البيت.. وفي عيد الأم بيعمل احتفال رسمي.. وفوق ده كله.. يوم واحد ما أساء لي بكلمة ولا احرجني قدام ضيوفنا... وبعد ده كله ما ادلعه .. ده انا بغطيه برموش عيني.. أها عرفت يا احمد الزوجة دي بتدلع زوجها لشنو؟؟ والله يديك العافية
06-07-2013, 11:47 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
Quote: انتي بتدلعي زوجك ده الدلع ده كله لشنو؟؟ وردها حيكون كالآتي: راجلي راجل السرور والعظمة.. ده كل يوم بيسمعني كلام في الصباح كلام كله شوق وحنان وغرام وفي نص اليوم بيضرب لي تلفون ويبث غرامه وفي عيد الزواج بيدخل بهدية ويوم عيد ميلادي بنسوق الأولاد وبنتعشى بره البيت. وفي عيد الأم بيعمل احتفال رسمي
عزيزتي اميرة السيد انا فعلا في الاول قلت الزول دا اكيد رومانسي ويمكن شاعر واول ما يجي بستقبلها بى قصيدة عصماء لكن بعد فترة لقيت انو ولا واحدة من الفوق الذكرتيهم ديل بعملها .. وخلال الشهر ونص ولا الشهرين ديل ما شفتو شايل ليهو لا هدية ولا كيس فاضى .. بس تقولي عليهو بروفسير وهو بيأكلوهو وبيأشر ليها بى صباعو اديني من دا في اشارة لى صحن من الصحون والله العظيم مرة هو بغسل ايدو لقاني بعاين ليهو قال لي .. براحة دي ماعندها شغلة ساي .... وانا كل يوم بجي متغدي
راجل السرور قال
لكن ما بتدي حريف
06-06-2013, 03:54 PM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
تعرفي أنا لا ألوم الزوجة وأستثني الزوج فكلهم في الهم شرق يعني زي ما قلت بعد شهر العسل بتسقط كل الأقنعة وما تشوفي إلا البلاك بلوك قدامك ..
عكس الجنسيات الثانية غزل حتى نهاية العمر يعني الواحد يوم تموت زوجته بيعتبر الدنيا انتهت ولكن عندنا الواحد في العزاء وعينه على البنات والعازبات
اما كلام الغزل فلأنسي تتحول الحياة إلى جفاف وتصحر عارفة انا كنت عايزة ارفع ليك صورة الكاركاتير بتاع تكسري رجلي تكسري يدي ياني راجل البيت ولكن الصورة طلعت كبيرة
أما الزوجة يا بعد عمري فكلام الخطوبة يمحوه الزواج ... وأناقة الخطوبة تتحول إلى عشكبة شديدة لزوم خلاص عرس وعرست ، ولادة وولدت وكأن الحياة تنتهي بالعرس والولادة
Quote: كلمات الغزل ) ممكن تزعل المحبوبة عندنا... تصدقي ؟؟؟؟
....................
عزيزي عاطف ما قلنا ليك اتغزل في بنات الناس .. لكن تغزل في زوجتك.. والزوجة ستسر ايما سرور عندما تسمع كلمات الغزل من زوجها..
وبعدين اهمس في اضانك.. حتى بنات الناس البتعمل نفسها زعلانة من كلام الغزل.. بتكون فرحانة داخل نفسها بانها تثير اعجاب المارة وانها فاتنة عصرها...لكن بس عشان ما توقع نفسك في الحرام وتغض بصرك كما امرك ديننا الحنيف فالأحسن ان تغزل في زوجتك.. والمحبوبة لازم تكون زوجتك والله يديك العافية
الحياة بتبقى جافة وصحراء بغياب اللحظات الرومانسية بين الزوج والزوجة.. وبعد ما تنتهي فترة الغش التجاري.. تجد العرسا ن رجعوا لأصلهم الطبيعي... وكان مفروض فترة الخطوبة تكون فترة الاختبار الحقيقي وليست فترة الغش التجاري.. يعني مفروض كل من زوجي المستقبل يخرج مساوئه بصراحة عشان الطرف الثاني ما يتفاجأ بعدين ... ويظهر الخطيب جميع مثالبه وسلبياته وبنفس القدر تظهر الخطيبة جميع مثالبها وسلبياتها عشان كل واحد فيهم يحدد اذا كانت الحياة حتستمر بعد عقد القران ولا لا؟؟ أما الحاجات الايجابية يخلوها مفاجأة.. واحتمال الكلام ده يكون ما منطقي لأن كل واحد من الطرفين عاوز يفوز برضى الجانب الآخر عشان كده الفشخرة بتكون كثيرة.. وبعد ذلك العيشة تكون عذاب في عذاب وتلقى الحياة مستمرة بصعوبة والمصيبة بعد الولادة ومجئ الأطفال.. تلقاهم بيقولوا نحن عايشين عشان اولادنا.. وهسع معقولة دي حتكون حياة ... ومفروض اذا الحياة اصبحت صعبة ، حتى ولو عندهم عشرين طفل، يبتعدوا من بعض وكل طرف يعيش حياتو.. وطبعا في ناس حيقولوا والأطفال يتربوا بعيدين من والديهم...؟؟ ونقول ليهم : احسن مما يتربوا في بيت كله مشاكل وضرب وانفعال ويطلع الطفال بأمراض نفسية ويفشلوا في حياتهم... معليش طولت في الكلام .. لأني بسمع قصص غريبة عن مشاكل زواج لا تنتهي.. وبعرف قصة زوجة معذبة عذاب شديد وتقول انا مستحملة وعايشة عشان عندي اطفال صغار..... الأطفال ليهم رب العالمين.. وعيشة زي دي تطير.. والله يا عطوفي انا بشوف هنا في امريكا زوج وزوجة وعمرهم اكثر من 80 سنة وتلقاهم قاعدين في الحدائق العامة ومتماسكين بعض وبيهمسوا لبعض ويضحكوا وكأنهم اطفال صغار... والله قاعدين نحسدهم عديل كده... والله يديك العافية
06-07-2013, 03:49 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
رايك شنو في غزل زمان : الواحد يقول لها : إنتي ساسوية قلبي الترجمة تلقيها عند المسنوح شيقوق.
واحد صاحبنا كان ماشي مع اصحابو في القاهرة ـ طلبة. كانوا طالعين بيه عشان يعلموه كيف يعاكس البنات ـ يتغزَّل يعني. هم كانوا شفوت وهو زول مسيكين ماعندو شدايد . مرت بيهم غزالة شاردة ـ قالوا ليه: عمر ـ عمر يلا شاغل دي. لما جات بيعندهم ـ قال ليها : ياسلاااام والله فيها إضنين.
Quote: والله يا عطوفي انا بشوف هنا في امريكا زوج وزوجة وعمرهم اكثر من 80 سنة وتلقاهم قاعدين في الحدائق العامة ومتماسكين بعض وبيهمسوا لبعض ويضحكوا وكأنهم اطفال صغار... والله قاعدين نحسدهم عديل كده...
ونفس الحاجة دي بشوفها في بريطانيا وفرنسا يعني ناس تخليكي تشعري إنك عايشة حالة جفاف عاطفي سبحان الله ثقافتنا تخلو من الحب التطبيقي والنظري ، بتصدقي بعض الأزواج لما الزوجة تقول ليه عايزة أسمع كلمة حلوة
يقوم يقول ليها أنا ما بعرف أقول بس ممكن أعبر بحاجة تانية فأيهما أسهل الكلام أم يمشي السوق يجيب ليها توب يمكن ما يعجبها هههه
06-13-2013, 05:36 PM
ماجدة عوض خوجلى ماجدة عوض خوجلى
تاريخ التسجيل: 12-25-2006
مجموع المشاركات: 7279
والله حبيبه شفت مداخلتك فى بوست عطوف بس متاخره شديد ...ولمن جيت ارد ليك عليها عطوف فتحت البوست الجديد ولقيت البوست ده ... اها قلت ارد ليك فيهو عارفه كلمات الغزل والتعبير عن احساسك ... النصيحه لله السودانيين بصفه عامه ماعندهم الثقافة دى ... الا قله لكن السواد الغالب ماعندو ... لكن على حسب ماشايفه انو الاجيال الجديدة .. . مختلفه والسبب يرجع للانفتاح على القريه الكبيرة والانفتاح على ثقافات مختلفه ومتنوعة .... حتى المفهيم فى البيت السودانى بدات تختلف عن قبل .. من المهم جدا انو العلاقه بين الزوج والزوجه تكون علاقه مفتوحه ... وكل واحد فيهم يعبر عن اعجابه بالاخر ... طبعا زى ماقلت فى الاول التربيه فى البيت وطريقه معامله الام والاب لبعضهم ليها اثر كبير على الابناء ... انا طبعا مابتكلم عن الاجيال القايمه جديد ... بتكلم عن جلينا والقبلنا ... ياخى هم اساسا فى الشارع ماكانو بيمشو مع بعض ....تلقى الاب هناك والام بعديه بخمسين متر ... اها ولو عندهم عربيه ياهاالراكبه ورا حتى ولو كان مافي غيرم الاتنين فيها ... لكن برضو في استثناء شفت البتوددو لبعضهم ومابيمشو اى حته الا يكونو فيها مع بعض ... واليوم كلو يكونو قاعدين مقابلين بعضم يتونسو ويضحكو ... وعلشان احكى ليك شوفى التربيه ماثره فينا كيف ... عندنا واحد من اصحابنا معانا في هنا اتزوج وزوجتو جات من السودان مشي المطار يستقبلا واشترى ليهو بوكيه كبير بتاع ورد ليها ... اتخيلي البوكيه اختفى بطريقة غريبه جدا وماادهو ليها لمن مرقت ... انا طبعا استغربت قمت براحه سالتو قلت وين الورد الانت اشترتيو ...قال يازوله اسكتي ورد شنو ماشفتي السودانيين ديل الليله قدر شنو فى المطار هسه كان اديتو ليها لندن كلها تتكلم علي .... وبكره يسمونى اسم وانا ماجايب خبر ... غير كده الزوله دى زاتا تقول على شنو اقلاهو هتقول زول خفيف ....اها انتي بس قيسي عل كده ده انسان قاعد فى بلد ثقافه تقديم الورد ...ثقافه منشرة ومعروفه واكتر من عاديه ... وبتمارس على كل المستويات كان فى فرح اوحزن لكن مع كل دلك بقت ليهو اكتر من تقيله
وياميرة ردى علي كلامك فى بوست عطوف كالاتي ... ماعايزاكي تخافي ابدا من التجربه وكلامي مقصدت اني اخوف بيهو ... الدايره او هو انو طريقه الاختيار اصلو ماهى المشكله ... فى النهايه كلهم بيوصلو لطريق واحد ... انا العايزه اقولو ليكى انتي الحياة دى الناس بتعيش فيها تجارب كتيرة ومسيخة ... وبنتعلم منها اها الزواج ده تجربه من ضمن التجارب الكتيرة الفي حياتنا ...ادخلى التجربه وانتي خاته كل الحسابات في راسك ... يعنى احتمال الفشل وارد بنفس احتمال النجاح ... والاهم من كده برضو انك تختى فى راسك وتكوني مقتنعه ... انو الطلاق مافيه حاجه بتخجل ولا بتقص من قيمتك كاانسانه وزى الزواج واحد ... الاتنين الاجهار فيهم مهم ومافي طرف خسران وطرف كسبان ....
Quote: قال يازوله اسكتي ورد شنو ماشفتي السودانيين ديل الليله قدر شنو فى المطار هسه كان اديتو ليها لندن كلها تتكلم علي .... وبكره يسمونى اسم وانا ماجايب خبر ... غير كده الزوله دى زاتا تقول على شنو اقلاهو هتقول زول خفيف ....اها انتي بس قيسي عل كده ده انسان قاعد فى بلد ثقافه تقديم الورد ...ثقافه منشرة ومعروفه واكتر من عاديه ... وبتمارس على كل المستويات كان فى فرح اوحزن لكن مع كل دلك بقت ليهو اكتر من تقيله
>>>>>>>>>>>>>>>>>>>
الحبيبة العزيزة ماجدة بت عوض خوجلي يا ها دي المصيبة ذاتها ،، انه انسان عائش في بلد ثاقفة تقديم الورد في المناسبات ويوقم يخجل من تقديم ورد لزوجته في المطار.. ليه شنو ..؟؟ خوفا من كلام القيل والقال.. والمصيبة الأكبر هو بيقول " الزولة دي ذاتها تقول علي شنو؟؟؟" وطبعا الزولة دي زوجته... وطبعا زوجته مفروضة تكون مبسوطة جدا جدا عشان زوجها قدم ليها ورد... على الرغم من انها جاية من بلد ما فيع ثقافة ورد ولكن فيه ثقافة عقد اللو لو يا لولو.. وعقد من الماس والزمرد ...يا ربي بتين ثقافة الذهب والماس تختفي من الحياة الزوجية عشان الرومانسيات تطغى كمان شوية على الماديات...والله كلمة حب وعشق من الأعماق اكثر وقعا وتأثيرا من ذهب العالم كله... ولكن المصيبة يا ماجدة ان كل الأزواج يعتقدون ان كل نساء العالمين لا يفكرن إلا في الذهب والماس .. وهذا ليس بصحيح.. والله يديك العافية
معقولة يا ماجدة تكوني عملت عملية قسطرة في القلب ونحن ما جايبين خبر... الآن فقط قريت موضوع :" ماجدة صاحبة القلب الكبير , وعرفنا انك خارجة من عملية في القلب,, سلامتك وان شاء الله أجر وعافية ... وما يصيبك شر ابدا .. ويواليك بالصحة والعافية يا حبيبة .. ونسأل الله سبحانه وتعالى ان يمتعك دائما وابدا بالصحة.. والله يديك العافية أميرة
Quote: بتصدقي بعض الأزواج لما الزوجة تقول ليه عايزة أسمع كلمة حلوة
يقوم يقول ليها أنا ما بعرف أقول بس ممكن أعبر بحاجة تانية فأيهما أسهل الكلام أم يمشي السوق يجيب ليها توب يمكن ما يعجبها هههه
...............
الحبيبة الغالية عطوفي
المشكلة يا عواطف ان الرجال لسع بيعتقدوا ان نسوان الزمن ده هن نفس نسوان الأزمان الغابرة لمن الواحدة ما بتفكر إلا في الذهب والماس والجواهر وما يهمها شئ من العواطف او كلمات الحب... وعاوزين نقول ليهم الزمن اتغير والكلام الحلو أجمل من اي شئ آخر حتى ولو كنوز قارون... بس كمان يا جماعة ما تمسكوا خلاص قوي جد في الكلام ده وتقولوا خلاص ما دام الكلام سمح ما في داعي لأي ذهب وجواهر... لآ .. لآ... بس ما تقرضوها كده .. الكلام الكثير مع شوية من الدرر( وجه ضاحك).. والله يديك العافية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
garjah
عواطف ادريس اسماعيل
وضاحة
الطيب شيقوق
احمد حمودى
عبدالعزيز الفاضلابى
Ahmed Yassin
عاطف عمر
ماجدة عوض خوجلى
فيس بوك
تويتر
انستقرام
يوتيوب
بنتيريست