|
|
|
 Re: شقة الأحلام في أميز موقع في الخرطوم والأسعار مغرية (Re: عزيز)
|
الاخ الفاضل /عزيز ،،
والله حب استطلاع ساكت كده قلت اشوف شقة الاحلام دي! شفت النموزج الاول عكبني شديد ،عاينت للسعر تأكدت فعلا انها ليست شقة الاحلام بل انها شقة للاحلام 1001250 الف جنيه بالجديد ! يعني بالقديم مليار و مليون و متين و خمسين الف جنيه !!! نحلم بس ،
لك التحايا و الاحترام
| |
  
|
|
|
|
|
|
|
 Re: شقة الأحلام في أميز موقع في الخرطوم والأسعار مغرية (Re: manal eltahir)
|
Quote: انت يا رضا كمان ما تبقي طماع ...بعد ڤيلتك صوروها ناس التلفزيون من سماحتها.... دائر تزاحمنا في الشقق كمان؟
|
الأخت منال
سلام ..
الشئ المزعلني أهلنا باعوا كميات أراضي كتيرة قبل كدا
بي تراب الفلوس اليوم سعرها ذي ماشايفة بالمليارات
عشان كدا أصلا في حكاية شراء الأراضي دي مابتردد أبدا
وعامل ( قاموس ) خاص بي ( مافي بيع أبدا ) شراء وبس !!
.
.
أمنياتي للجميع بالتوفيق .
خالص تحياتي .
| |
|
|
|
|
|
|
|
|
|
شقة الاحلام (Re: Ridhaa)
|
سلام عزيز
غالية جدا فهي شقة ، قد يكون الموقع ممتاز ولكن بعد ارتفاع سعر الدولار سيكون كل شئ بسعر خرافي
نسال الله التوفيق للجميع
| |
|
|
|
|
|
|
|
|
|
Re: شقة الاحلام (Re: العوض المسلمي)
|
أخونا شيخ العوض
سلام واشواق
من قندهار ما سعدنا بسماع صوتك تاني
نعم إرتفعت الأسعار قليلا ولكن بالنسبة للموقع والتصميم أعتقد بأن الأسعار معقولة جداً
الموقع بكل الأمتياز أفضل من المنشية والرياض والطائف والمعمورة ثم موقع العمارة في مفترق طرق واسعة أوي التهوية موجودة والبلكونات كبيرة وجميلة
ربنا يوفق وبفتش على الجيرة الحسنة
محبتى كاملة
عزيز
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: صديق الموج)
|
اخي الجميل الموج
سلام وتقدير وامنيات
الأكل من سنام سنين الغربة يا صديق
ميزة هذا البرج هو لجهه اعتبارية وهي شركة من رحم بنك فيصل الاسلامي والبنك لا يفرط في سمعته
كما ان البرج مشطب ومنتهي اي ليس هناك انتظار للاستلام
ولك ان تجلس على البلكونة وتشاهد النيل من الطوابق العليا من البلكونات الشمالية وعلى بعد مشوار أمسية على رصيف النيل من برج الاتصالات والى مطعم فينسيا
البيز عبارة عن موقف للسيارات وبها صهريج ماء كبير ومولد كهرباء وبئرين للتصريف.
مودتى والأمنيات
عزيز
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عزيز)
|
Quote: والله حب استطلاع ساكت كده قلت اشوف شقة الاحلام دي! شفت النموزج الاول عكبني شديد ،عاينت للسعر تأكدت فعلا انها ليست شقة الاحلام بل انها شقة للاحلام 1001250 الف جنيه بالجديد ! يعني بالقديم مليار و مليون و متين و خمسين الف جنيه !!! نحلم بس ،
|
...............
بصراحة حكاية القروش الجديدة والقديمة ملخبطة راسنا وما قادرين نعرف سعر الشقة دي بالضبط كم وهل فعلا باستطاعتنا نشتريها .. عشان كده بالله ورونا السعر ده بالدولار يساوي كم ؟؟
والله يديكم العافية
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عزيز)
|
إنتظروا شوية ... ما تستعجلوا ..... الأسعار كلها (في العاصمة ) حتدق الدلجة ...
سيكون هناك هروب جماعي (و سيحلمون فقط ما خف وزنه و غلا ثمنه ... )
أو الخطة ي ...
عادة الناس في حال فشل الخطة (أ) .. لديها الخطة ب ... ثم الخطة ت ثم الخطة ج ... و هكذا دوليك (أو حسب الحروف الأبجدية)
الحرف ي هو آخر الحروف الأبجدية ....
و الخطة (ي) تعني الخطة: يا روحي !!
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: Mohamed Suleiman)
|
الاخ الفاضل محمد سليمان
مساك الله بالخيرات والطيب
عملت بنظريتك هذه عندما اعلن ان بعد الانفصال سيبيع اهل الجنوب منازلهم في الشمال وستنخفض أسعار العقارات
أثبتت الايام ان سوق العقارات في السودان لا ينتمي للمنطق ولا علاقة له بالأسعار العالمية ولكن!!
لابد من عشه صغيرة تاوينا عندما نكون في أحضان الوطن.
التفاؤل شئ جميل ولكن منذ ان شبيت لم ينقص سعر سلعة بعد ارتفاعها وخاصة العقارات.
لك خالص المنى
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عزيز)
|
امتيازات البرج
من الجهة الغربية امتداد شارع الستين وهو شارع كبير جداً وبينه والبرج مساحة ممتازة لموقف سيارات الزوار ويفتح عليه باب سلم الطواري للشقق الغربية
اما الجهة الشمالية وبها المدخل الرئيس تطل على شارع معرض الخرطوم الدولي كما بها مدخل جراج سيارات السكان حيث ان البيز منت بمساحة البرج هو عبارة عن موقف سيارات
الجهة الجنوبية تحتوي على باب مواجه لباب المدخل الرئيس الشمالي وبه مساحة مسورة وغرفة لسكن حارس العمارة (تستخدم مخزن الان) وللمساحة باب حديدي كبير من الجهة الغربية
الجهة الشرقية يفتح بها باب الطواري للشقق الشرقية
بالبرج صهريج ماء كبير جداً يكفي لحاجة البرج من المياه في حالة الحاجة
وبالبرج أيضاً مولد كهرباء يعمل تلقائيا عند انقطاع التيار الكهربائي
وكذلك يوجد بئرين (سايفون) للتصريف
اثنين مصعد كهربائي
سلم بسعة كبيرة
المساحة بين الشقق كبيرة ومتسعة وفي الطابق اربعة شقق
التشطيب تقول الشركة بأفضل المواد
أمنياتي لمن يرغب بالتوفيق
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عزيز)
|
كدى نضرب من الابتدائي لحد الان
جبت المليار ده من وين. ونحسب معاها حق الفطور موفرو من الابتدائي
بالله خليكم منطقييين مليار شقه فى الخرطوم انت سمعت فيصل القاسم قال لى ربيع عبد العاطى ايه انتو عندكم جنه عدن ولا ايه هاهاها
كيفك يا فرده تحياتى للمدام وشوف لى شغل معاكم. لى نص شقه كده هاهاهاها
طيب الدعايه دى حقها كم وقع ليك اهاهاهاهاهاهاهاهاهاهاهاهاهاهاه
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عمر سعد)
|
عمر سعد يا حبيب
شوق وامنيات وتحايا
يالحبيب لسه ما بقينا قدر ام مليار والعافية درجات
هي حصيلة نضال سنوات في المهجر عسى ان تظلنا في خريف العمر واواخيره.
ويا عمر هي شقة ما عايزة ليها قروش فطور!
اخوانا ما شاء الله امتلكوا منازل فسيحة وطوابق مترادفة الظاهر جمعوها من قروش الكريش (الحضانة).
انت اعملها فسحة لندن وماليزيا والهند وآخر عمرك ترجع بانت ههههههه.
شوووووق شدييييييد والله وراجينك.
| |
|
|
|
|
|
|
|
|
 Re: شقة الأحلام في أميز موقع في الخرطوم والأسعار مغرية (Re: منصوري)
|
الاخ باشمهندس منصوري
مساء الخير يا امير
شكرًا جميلاً وحباً جزيلاً على هذه المداخلة الثرة. ولكن اسمح لي اخي وانا غير مهندس ان أخالفك الرأي في الشكل الهندسي
البرج شكله العام من الخارج جميل في بساطتة واكثر معقولية والمهندس المنفذ شاب في مقتبل العمر وهو من المتفوقين اكاديماً
البلكونات التي تظهر في الصورة التى أنزلتها هي البلكونات الصغيرة وهذه هي الجهة الغربية للبرج اما البلكونات الكبيرة شمالاً للشقق الشمالية وجنوباً للشقق الجنوبية وتبلغ مساحتها 7 أمتار في واحد ونصف متر
اهم ما يميز البرج التهوية الممتازة للشقق.
المقارنة بين دبي والخرطوم ما هو فير يا باش.
اما مصر فخوفنا من الانهيارات كما حدث اليوم بالإسكندرية لعدم الالتزام بالتصاريح الصادرة.
وأهلنا قديماً قالوا العرجى لمراحة ولذلك كان الخيار الخرطوم عن القاهرة مع كل المفارقات والفرق في الأسعار.
لك اخي كامل الود
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عزيز)
|
تسلم عزيز القوم على التعليق الراقي
ههههههههه
لكن العرجا لى مراحا
دي ضحكتني كتير
يا ريت يجي الزمن البي ننفذ حاجات في مستوى الناس البرة يا عزيز
وياريت الطيور المهاجرة ترجع عزيزة مكرمة مستمتعا بي بلدا.. وتشيد ما ينافس ما رأته عيونهم خارج البلاد. وياريت الناس ما ترجع عرج ومكاسير . ترجع في شقق راقية وحياة طيبة. ووضع يكون شبيه بما كانوا فيه هم واطفالهم.
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: منصوري)
|
باشمهندس منصوري يا جميل
صباحك بنكهة القرنفل
الجميل لا يرد إلا جميلا
نعم أخي أتمنى أن يأتي اليوم الذي نشهد فيه الطفرة والتطور العمراني وأن تكون لنا مدن كهذه التي نعيش فيها في الغرب
تخطيط طرقات وسفلتة وحدائق غناءة ونظافة وخدمات تنظرها في كل ملمح، جمال خلاب وخضرة على مد البصر وماء ووجوه مشرقة بالإبتسام..
من أقصى جنوب شرق آسيا حضرت لأقصى شمال غرب أوربا وما بين الحداثة والأصالة إمتلأت العين جمالا.. ولكننا
ما زلنا ننشد بأضعف الإيمان أن ينهض السودان يوماً.. ونرى الجمال الآن بهذا الحراك والجهد الذي يبذل وشركة الفيصل العقارية إحدى هذه الصروح التي تسهم في هذا التطور
لا نقارن بما نراه في الخارج ولكن نبحث عن الجمال في دواخلنا عندما يكون الحال بالسودان وينعكس ذلك جلياً في جمال مبنى برج الفيصل الأول..
نتمنى أن نعود للوطن يوماً بأرجل ثابته وذهن متقد عسى أن نسهم في إنشاء ذلك الجمال المنشود..
دمت أخاً كريماً
صادق الأمنيات
عبدالعزيز خطاب
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عزيز)
|
عزيز. اللذيذ
كيفك يا. فره
انا عندى اقتراح انت اشترى بيت فى هولندا دى ولما تنوى ترجع السودان العظيم. انا باخد منك الشقه هناك وبسكن ناك وانت امشى شقه الاحلام دى لو رجعته ولسه فى احلام ممكن تحلم بيها
ولما تجى كل صيف تصيف انا. بمشى فندق. لحدى ما ترجعو اها كده كيف. شوف الاحلام ابواقعيه دى تقول لى مليار والله الا ابقى كوز. وبعد ده الكيزان زاتهم حا يفلسو زينا كده
قلت لى مصر والانهيارات انت قايل السودان فيهو جوده بس الابراج ما ظهرت لسه حتى نقيم التجربه وما تجربه الرباط ببعيده ما تدخلنا مع ابورياله ده كمان فى مشكله
اقتراح انك تشترى ارض فى توتى وتبنيها بالقش مالو التهويه احن وطبيعيه والزرع حولك تاكل مما تزرع والماء الخضره وعندك الوجوة الحسان تانى داير طربوش مغربى
ليه ما نفكر انو نشترى اراضى فى حتات بعيده ع العاصمه نبنيها ونسكن فيها. ليه مافى التفكير ده كلو عايز يسكن فى كرش الفيل دى
انا لو جات حكومه تانى بقترح عليهم انهم يحولو العاصمه لمكان تانى حتى يتحول المركز ونصبح هامش
لك ودى ساتى لكم فى سبتمبر. ان شا الله بدايه الاسبوع الاول
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عزيز)
|
سلامات يا عزيز
في حاجة غريبة ما فاهمها
Quote:
النموذج الرابع
مساحة النموزج 158 م مربع
يحتوي على 3 غرف نوم ، 2 حمام ، 1 مطبخ ، 1 غرف معيشة ، 2 بلكونة ، هول
سعر المتر 900 دولار
-------------------------------------------------
مساحة النموزج 142 م مربع
يحتوي على : 3 غرف نوم ، 3 حمامات ، 1 مطبخ ، 1 هول ، 1 غرفة معيشة ، بلكونة
سعر المتر 900 دولار
------------------------------------------------- |
يعني يا عبدالعزيز النموذج الرابع ده فيهو بلكونة زيادة عن النموذج الثالث
وناقص حمام (فيهو حمامين بس مقارنة بى 3 حمامات في النموذج الثالث)
وأغلى منه برضو
...
Quote: طلع على الطابق الأول ستجد النموذج الثالث والشقة بمساحة 142 متر مربع بنصف المبلغ للنموذج الأول والثاني
ثم أطلع على النموذج الرابع بمساحة 158 متر مربع وبمبلغ 900 دولار للمتر المربع وهذا كان خياري ولله الحمد
|
شايفك فضلت الخيار أبو حمامين وبلكونتين وهو الاغلى برضو
طبعاً انا زي ما مستغرب للبناء العجيب ده فبرضو مستغرب لاختيارك
ما اعتقد انو البلكونة الاضافية مهمة خالص مقارنة بى حمام ثالث
طبعاً اكيد في حمام مخصص لغرفة النوم الرئيسة بتاعتكم
يبقى ليك حمام واحد يشترك فيهو الشفع وباقي العائلة والضيوف
ياخي ديل الا تعمل ليهم مكتب حجز للحمام 
...
| |
|
|
|
|
|
|
|
|
|
Re: شقة الأحلام في أميز موقع في الخرطوم والأسعار مغرية (Re: عوض عبدالله طه)
|
يا دكتور عوض
اسعد الله اوقاتك
سلام وأشواق ليك وللأهل الهناك
أضحك الله أيامك فلقد صنعت يومي..
النموذج الثالث وهو 142 متر مربع أصغر مساحة وبه بلكونه واحدة كبيرة وغرفة المعيشة صغيرة وأستفيد من الجهة الشرقية بإضافة حمام ثالث وصدقني ليس لدي تفسير هندسي لأنني لست من أهل الإختصاص
وهذه هي صورة النموذج للمقارنة مع النموذج الرابع..
أما النموذج الرابع وهو 152 متر غرفة المعيشة به 3.5x8 متر وتفتح بها كل ابواب الغرف والمطبخ وبه بلكونه غربية مع ركن نصف دائري وتشعر بأن الشقة أكثر وساعاً ونعم بها حمام داخلي مع غرفة النوم زائداً الخارجي.
وياسيدي كلها أسبوعين في السنة لو الشباب قبلوا يمشوا سنوياً وباقي السنة مغلقة.. والفكرة لو ربنا مدى في العمر فترة الشتاء أهرب من هنا ستة أشهر لهناك والصيف أهرب من هناك لهنا أشبه بلعبة القط والفأر ههههههه
تحياتي والود وسلم لي على العمدة
عبدالعزيز خطاب
| |
|
|
|
|
|
|
| |
عزيز
Ridhaa
Haytham Mansour
العوض المسلمي
عبدالرحيم أبراهيم العبيد
صديق الموج
Mohamed Suleiman
إبراهيم عبد الحليم
عمر سعد
عوض عبدالله طه
فيس بوك
تويتر
انستقرام
يوتيوب
بنتيريست