تنويه: التأويل داخل النص على مسئولية صاحبه/صاحبته ، او كما قال.. قراية الجريدة، في السودان ، للزولة.. حاجة غير بريئة..لكن هنا قراية الله و رسولو الواحدة دي..عشان كده التأويل داخل النص على مسئولية صاحبه او صاحبته..
كبر
05-26-2012, 07:47 AM
Kabar Kabar
تاريخ التسجيل: 11-26-2002
مجموع المشاركات: 18537
التومة ، صديقة قديمة ، و اول مرة اعرف دروب النت..كتبت مقالة قصيرة للغاية عنوانها ( انا و التومة و أمريكا) عن اتفاقية نيفاشا2005..و كلما اذكر من تلك المقالة القصيرة ان الإتفاقية ستميل بالواقع اكثر مما هو مايل (ما كنت متصور المايل يقع عدييل)..و ان امر الإتفاقية هو ليس من اجلي ولا من اجل التومة ولا بقية التومات المشابهة في دار ام سودان..و انما من اجل عيون ماما امريكا..و ماما امريكا طوالي عندها شدرة كبيرة بتلد سيطان طويلة و متينة..ياخي السوط يضربوا بيهو مليون مرة لا ينقطع ولا ينكسر..في تلك المقالة و في اخر سطر كتبت عبارة (ما تغطوا النار بالعويش)..لأنو صراع السودان نار مولعة طوالي..و الإتفاقية كانت العويش..و اهو ده قدامكم..و قدام التومة..و قدامي انا ايضا..الحاصل..
كبر
05-26-2012, 07:49 AM
Kabar Kabar
تاريخ التسجيل: 11-26-2002
مجموع المشاركات: 18537
و لأنو 25 مايو ذكرى ما لذيذة تب في تأريخ السودان..و مافي طريقة الواحد يتناساها و يتحاشاها.. فقلت اعمل مناسبة بديلة..و اقوم اتذكر فيها التومة..و اقرأ ليها الأخبار..الأخبار المافي زول ولا زولة ممكن يحدث التومة عنها..و اكيد مع الضايقة المعيشة..و بحر الدموم السائل ..و الخطوة الماشة للخلف (على قول الروائي يوسف العطا)..التومة بتكون دايرة تشوف ليها موضوع تاني..
كبر
05-26-2012, 07:52 AM
Kabar Kabar
تاريخ التسجيل: 11-26-2002
مجموع المشاركات: 18537
العجيبة في السودان ، طوالي نظر القراية عندنا متجه شمالا..نقرا صحافة عربية..اوربية..امريكية..صينية..لكن نادرا ما نقرا صحافة افريقية..لأننا كسودانيين عندنا احساس انو نحن افضل الأفارقة ..و نقة الأفارقة ما بتضيف لينا حاجة..عكس الأفارقة و نظرتهم لينا.. طوالي بيفتكرو السودان (كما كان زمان حدادي مدادي) الأخ الأكبر أو الأخت الكبرى..يقروا عنو و ينشروا اخبارو..عشان كده الأفارقة بيعرفوا كتير عن السودان..و نحن السودانيين ما بنعرف عن الأفارقة التكتح..!
و كل مرة اختبر فيها نفسي و اقول ليها اذكر اسم صحيفة رئيسية في كينا؟ اثيوبيا ؟ تشاد؟ ارتريا؟ يوغندا؟ افريقيا الوسطى؟ السنغال؟ مالي ؟ نيجيريا ؟ غانا؟..الخ..و افشل في ذكر اسم صحيفة واحدة..و اقوم اطمن روحي و اقول: هو بالله ديل كمان عندهم جرايد مع الناس..!!!
ياخي حتى مع شيوع تكنولوجيا التواصل..الإهتمام بالصحف الأفريقية..غائب تماما..مع انو مرات لو اتيحت للواحد فرصة يقرأ الصحف الأفريقية.. ح يكتشف عالم متقدم اكتر من السودان..و فيهو عجايب لذيذة خلاص..و عشام اقوم اتناسى سئ الذكر 25 مايو..قلت اقرأ للتومة في الجرايد الأفريقية..
اها يا التومة..الليلة في صحيفة افريكا كونفيدنشيال .. و دي جريدة بتقول على روحها انها شبكة مترابطة من المراسلين و المراسلات في كل الدول الأفريقية..و بتهتم باخبار كل دولة افريقية..و بتقول انو مصدر للمعلومات بتنهل منو الحكومات ، المنظمات ، الهيئات الدبلوماسية..الخ..و جريدة شكلها صارم شوية..و فيها تحليلات عميقة..
العناوين الرئيسية يا التومة:
جنوب افريقيا: بوليس و حرامية.. طبعا يا التومة..ناس جنوب افريقيا عندهم حزب رئيسي اسمو المؤتمر الوطني..أي و الله زي المؤتمر الوطني حقنا ده..و برضك الجماعة هناك منقسمين مثل انقسامات المؤتمر الوطني السوداني..القبائل ماني عارف اساميها شنو..لكن الفرقة حاصلة.. اها الخبر بيقول.. انو اصحاب الرئيس جاكوب زوما (يعقوب الزومة يا التومة)..بيحاولوا استغلال المال و الأجهزة الأمنية عشان يوفروا الحماية لجاكوب من الإعتقال و المساءلة الجنائية..!! (عارفك ح تقول ليه هو اصلو البشير؟..لكن صدقيني كلهم في الهوى سوا)..
كبر
05-26-2012, 07:59 AM
Kabar Kabar
تاريخ التسجيل: 11-26-2002
مجموع المشاركات: 18537
و يبدو يا التومة.. الناس هناك ما فضل ليها حاجة غير استخدام العضلات.. لكن الخبر يذهب الى فكرة عجيبة.. انو الصراع لخلف موغابي اصبح معقد و فيهو كتير من الحقد..و الذ حاجة موغابي عجوز للغاية و متقد الذكاء..و بيقول انو قعادو في السلطة محمي بارواح القدماء.. يعني الألهة هي التي تحمي وجوده..(عشان كده ما تستغربي لمن البشير يقول للناس الزارعنا غير الله يجي يقلعنا..يعني هو قاعد و محروس بالأرواح.. أو الرب عدييل..شفتي الفكرة دي عجيبة كيف يا التومة..؟!!)..
و دي يا التومة ياها المثل البيقول (العصر بجيب الزيت)..و الخبر يفيد أنو الدولتين اتعصرن بالتهديد بالعقوبات..و انو المؤسسات الدولية وضعت ميقات عشان التفاوض يبدأ و يحقق نتائج و يوقف التداعيات الحاصلة.. طبعا الجريدة ذكرت انو المؤسسات دي شكلها مش منتظرة النتائج الإيجابية.. لكنها شايلة الكرباج و تبرم في الأشناب و منتظرة تشوف منو الح يبدأ اول بالهرجلة..و بعد داك عينك ما تشوف الإ النور..
السودان: صواريخ و اجتماعات
السودان يتهم اسرائيل بالغارة الجوية على مدينة بورتسودان (طبعا ح تقولي ياتا فيهن؟ اصلهن ، الغارات ، بقن اكتر من غنم ابليس..!) ، و المعارضة تجتمع لتدبير امرا ما..اها الإدانة هينة يا التومة.. لكن الإجتماعات دي من قبل تلاتة و عشرين سنة..و لسه الجماعة في كل مرة بيقولوا لينا اصبروا ح نجتمع لتدبير امرا ما..
كبر
05-26-2012, 08:08 AM
Kabar Kabar
تاريخ التسجيل: 11-26-2002
مجموع المشاركات: 18537
اها يا التومة.. ناس يوغندا منافسة شديدة لمنو يكون الرئيس الجاي..و عندهم مرشحين اتنين: رئيس الوزراء..و وزير العدل..لكن دخل طرف تالت في الترشح لرئاسة يوغندا..و هي المحامية ربيكا كاداقا..و ربيكا دي يا التومة زولة مهمة خلاص.. ووظيفتها الحالية انها رئيسة البرلمان اليوغندي طبعا عارفك ح تقولي لي ما هو برضك رئيس البرلمان عندنا محامي..!!..و هي اصلا خريجة قانون..و عندها دبلوم عالي في مهنة القانون من مركز تنمية القانون (أي و الله) في كمبالا..و دبلوم تاني في قانون المرأة من جامعة زمبابوي..و ماجستير في الأداب تخصص قانون المرأة من جامعة زمبابوي..غايتو يا التومة رئيس البرلمان بتاعنا صحي هو محامي.. لكن غير اجتياز امتحان المعادلة (و يتخيل لي الزول ده سابق للإمتحان ذاتو)..و البكالوريس بتاع القانون..تب ما عارف ليهو شهادة الإ كن شهادة تقدير السن (تسنين يا التومة)..و ما تسألين متين تومة من عندنا تصل رئيس برلمان..و تقوم تتفاصح و تنافس في انها تكون رئيس..!!!
الكنغو كينشاسا: رواندا تنتشر في كيفو..
اها يا التومة.. عشان تفهمي ليه رواند متجدعة قدر ده في يوغندا.. نقوم نوضح ليك.. اصلا ناس عمك كابيلا زمان لمن كانو ثوار في الغابة (متمردين بكلام الحكومة بتاعتهم) كانوا بيعتمدوا على جيوش كتيرة اصولها من رواندا..و الروانديين شكلهم عجيب خلاص.. يعني بعضهم بيكاتل عشان يسيطر على رواندا..و في نفس الوكت بعضهم بيساعد في ناس الكنغو عشان يقتلعوا نظام موبوتو من جذورو.. اوعك تقولي لي يا التومة الخالق الناطق زي الحركة الشعبية في السودان..اها قام قائد من اصول رواندية دق جرس للكنغوليين (متذكرة البدلة الكنغولية؟)..و اتمرد بوشو..و اها حكومة الكنغو لمن اتعصرت.. قالت يا ابو مروة الحقونا رواندا دخلت بلدنا.. يعني فكرة انو الموضوع فيهو دعم خارجي و تدخل اجنبي.. زي ما حكومة الخرطوم بتقول في دواسها مع ناس الجبهة الثورية..!!!
كبر
05-26-2012, 08:15 AM
Kabar Kabar
تاريخ التسجيل: 11-26-2002
مجموع المشاركات: 18537
أي و الله يا التومة..زي ما حاصل في الخرطوم..و انو الحكومة بتقول دايرة ترفع الدعم عن البنزين.. و الناس واقفة ليها الف احمر: ترفع الدعم يا حكومة..تسقطي زي السلامو عليكم.. هناك في نجيريا الموضوع مختلف شوية .. أنو في دعم موجود بسياسات الحيكومة..لكن في ناس استفادت منو كتير خلاص..و اثرت منو ثراء فاحش..و الحكومة عشان تلم الموضوع ده قالت: نعمل تحقيق جنائي و المجرم يتحاسب..و لأنو نيجيريا فيها فساد اداري و مالي اظرط من الحاصل في السودان..الشعب ما قاعد يثق في الحكومة و كلامها..و انو ذر للرماد في العيون..لا اكثر..!!!
الجزائر: وثبة الربيع.. و الربيع ياهو ما يسمى بالربيع العربي اياه..و الخبر بيقول انو حزب تحالف الخضر (الإسلاميين المعتدلين) في الجزائر محبط من نتائج الإنتخابات الحققها في مايو 2011..و انو ما بعيد يقوم يعمل ليهو حركة تشبها باخوانهم المسلمين في المغرب..! عارفك يا التومة..ح تضحك و تقول لي هو شنو الخضرة الحايمة دي؟..اما اذا دار محور سؤالك عن قريبتي رئيسة حزب الخضر السوداني ، ياخي دي فحطت بي دربها..قبال الحزب ما يفطموهو و يمشي بكرعينو..!
بالمناسبة دي ، قصد بتاعة الربيع و كده، ما تنتظري الربيع يا التومة.. لأنو بقى في حق الله.. و الربيع اهو فات.. و انتي ما جيتي ، و حزنت الساحات يا زهرة السوسن.. (الله يطراهم بالخير محل ما يقبلوا الشاعر عبد العال السيد و الفنان عبد الله محمد.. اوعك تقولي لي اتا بتجيب الأسامي دي من وين..!)
كبر
05-26-2012, 08:20 AM
Kabar Kabar
تاريخ التسجيل: 11-26-2002
مجموع المشاركات: 18537
و هي التومة اسمها ( اوول افريكا..طبعا ح تذكري حكاية سودان فور اوول..!!!)..
اها العناوين الرئيسية بتقول: المدعي العام الجديد في لاهاي للدفاع عن الضحايا (و دي قريبتنا يا التومة المحامية فاتو بن سوده..و قالت ح نمشي لأي حتة الضحايا محتاجين فيها لينا)..مرشح الأخوان المسلمين يواجه سادن (مصر) ، محكمة لاهاي ترفض استئناف قادة من كينيا لتلافي محاكمتهم في جرائم ضد الإنسانية (كينيا)..سباق الرئاسة ، سباق ثلاثة خيول (عن انتخابات الرئاسة في ليسيوتو..تلاتة مرشحين)..استراليا و جنوب افريقيا : شراكة في اكبر تلسكوب..سباق الرئاسة يستعر في جنوب افريقيا (شايفة يا التومة القارة شكلها كلها بتسوي انتخابات في وكت واحد: يوغندا ، زمبابوي ، جنوب ارفيقيا ، ليسيتو..!!).. لكن الذ حاجة في الجريدة دي يا التومة.. صفحة (اخبار اخرى)..و دي فيها عناوين و اخبار عجيبة خلاص..
كبر
05-26-2012, 08:26 AM
Kabar Kabar
تاريخ التسجيل: 11-26-2002
مجموع المشاركات: 18537
ابن آوى يا التومة ، برضك اسمو الشغبر(لم اسمع به من قبل في ابائي الأولين)..و بالإنجليزي جايكل..و عندنا في كردفان قاعدين نسميهو (جاكو).. لأنو عندو صياح اشبه بكلمة جاكو..و دايما بيصيح مع وكت صلاة المغرب..المهم..!
الجايكل بتاع نامبيا.. قالوا سعران..و قاعد يتحاوم في داخل وزارة الصحة و جنبها مستشفى كبير..و الجماعة (ناس الصحة) قاموا ليك تحذير شديد اللهجة و انو البتاع ده سعران و ممكن يسبب ضرر للبشر..ده غير ارهاب الدكاترة و السسترات و الممرضات و ناس السيكورتي ( أي و الله يا التومة جايكل واحد فقط و مجروح)..!!!..اها الجماعة لم يكتفو بالتحذير و انما قاموا بابلاغ الوزارة المختصة و هي وزارة البيئة و السياحة..و قال ليهم شوف شغلكم مع حيوانات الحياة البرية..
طبعا ح تتساءلي ، يا التومة ، انو هل عندنا وزارة بيئة و سياحة؟..و انو موضوع الكائنات الزمان هاجمت ناس امدرمان دي المسئول منها يا تو وزير في السودان؟..و بيني بينك لو قعدت تسألي عن المسئول منو في السودان عينك ح تطلع.. لأنو أي مسئول اول ما يستلم مسئولية ح يشوف ليهو خدامة اجنبية..و اوضة نوم اسكتي ساكت خليها..و يقعد يعرس ليك في البنات السمحات من طرف..و لو قلت ليهو الحلة فيها كلاب سعرانة.. يقول ليك ده تخلف.. ده توجه ضد التوجه الحضاري (بتاع الخدامات الأجنبيات و كده)..و ده شغل معارضة (مع انو المعارضة الوكت داك بتكون لسه ما شربت شاي الصباح)..!!!
كبر
05-26-2012, 08:30 AM
Kabar Kabar
تاريخ التسجيل: 11-26-2002
مجموع المشاركات: 18537
الخبر يا التومة بيقول.. انو الزولة دي غير متزوجة..و حاولت تجهض الحمل اكثر من كذا مرة..و لم تنجح..و اخيرا وضعت الطفل في كنيسة..اها الخبراء قالوا المكتوب في يد الطفل قرآن (مع انو مافي زول قال محتوى الكلام شنو بالضبط)..شيوخ الإسلام هناك قاموا زاروا الأم..و الأم اصبحت مسلمة (اسمها شريفة)..و اخوها صار مسلم و اسمو مسعود..اها باقي الكلام.. الزولة حكت انو الرسول زارها كم مرة قبل الوضوع و قال ليها الطفل ده ح يكون معجزة..و اوعك ترميهو..و في المستشفى الموضوع بقى مزار للفرجة العالم كلها تجي تتفرج.. طبعا مافي حكاية حد زنا ولا رجم (لأنو كانت مسيحية قبل الولادة)..و العالم كلها بتتكلم عن العلامات الطيبة..و الخير ..و هكذا.. لكن لغاية الليلة المكتوب هل هو صحي قرآن ولا لأ.. مافي زول قال حاجة..بس كل الناس بتقول انو قرآن..واحد خبير قال ليهم الحالات المشابهة خمسة في العالم..و اتنين موجودات..و انو كل واحد بيدأ من نهاية التاني..يتخيل لغاية ما نصل القراءات السبعة (دي من عندي)..اها ناس السودان لغاية اليوم ما عندهم خبر..و لو دايرة تفكي الشمار ما عندك مشكلة.. لأنو الناس هناك كايسة ليها معجزة تتعلق بيها (ملاحظة يا التومة انو الفقراء البؤساء هم اكتر الناس انتظارا للمعجزات ؟!!)..
كبر
05-26-2012, 08:33 AM
Kabar Kabar
تاريخ التسجيل: 11-26-2002
مجموع المشاركات: 18537
قاضية المحكمة العليا فلورنس مومبا: القضائية الزامبية ليست بقالة احد ..و الزولة دي يا التومة بتقول انو ناس زامبيا من حقهم يدقوا جرس و ينقوا حول فساد القضائية هناك..العجيبة يا التومة نحن في السودان عندنا قاضيات محكمة عليا من سنة حفروا البحر.. لكن يوم واحد مافي واحدة منهم اتكلمت مع الجرايد.. صم بكم عمي.. قاعدات في مكاتبهن..مافي ولا تعليق واحد..!!!
اها يا التومة.. قاعد اقرا في الجرايد..و الخص ليك.. تقوم الحيكومة (طبعا عارفة حقد الحكومات تجاه القرايات..!!)..طاخ كلفتني ليك بمهمة..طبعا نداء الوطن اولى بالتلبية ياخ..!!!
اما فيما يخص مغنية جزر الرأس الأخضر..المرحومة سيزاريا ايفوري..قلتي لي لقيتي دكتور قدر الضربة بتكلم عنها في صحف السودان؟..مافي مشكلة.. صحيحة جبناها هنا..و غناها و مافي زول قال لينا عينك في راسك..ووكتين عندنا دكاترة بتكلموا عنها..مالو ياخي..!!!
ابيت ما ح اسمع كلامك يا التومة.. اي حاجة عجبتني ح اشارك الناس فيها..و الداير يعمل ون مان شو..ولا ون ومان شو..مافي عوجة تب.. الفكرة نلقي حجر على البركة الآسنة..و الداير يتعلم حبابو..و الما داير برضك حبابو..!!
اما اذا دار محور سؤالك عنا ، فنحن بخير لا ينقصنا شئ سوى عدم مشاهدتكم الغالية..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست