|
رأى --- عثمان النو صمت دهرا وتدفق نهرا
|
أمس وبالصدفة الما محضة، ما محضة بحكم عادة "اللواسه" بين فجج القنوات الفضائية على طريقة "سيد الرايحة" لقيت عثمان النو فى الفضائية السودانية ومعاه ثلة من الجميلين على رأسهم طارق كبلو، احسن مقدم برامج حسب رأى حضرتنا المتواضع جدا
ولما الزول يلقى عثمان النو، صدفة أو عن قصد، فأكيد بلقى عنده كلام وحضور وجمال فى كل شى تقريبا وبكون فى شى بتقال
عثمان الزول الإنسان الفنان، الموسيقار الواعى والمثقف والخلاق كتير جدا بكون فى موسيقى لكين ما بالضرورة يكون زول مبدع وخلاق و ممكن يعمل "من الفسيخ غنوات"
موضوع الحلقة كان عبارة عن بريسنتيشن للمجموعة الغنائية الوليدة والجديدة "رأى" والكلام ببدأ من الإسم ذات نفسه وقطعا الإسم ده ما بكون جا ساى وعثمان بكون "راقد ليهو فوق راى" وشكله كده الفرقة متعوب عليها زى ما بقولو، وفيها كومبنيشن وتوافق جميل جدا فى الأصوات، أربعة أصوات رجالية وصوت نسائى واحد من الفنانة لمياء الفاضل
النماذج الشويه المختارة الكانت فى الحلقة بتشى وتفصح عن خطوط المشروع الفنى الغنائى للفرقة، ويبدو انه حيكون فيه حضور مميز للشاعر والدرامى عماد الدين ابراهيم، اتقدم ليهو عملين، بلاد النور حقت المبدعة حنان النيل وعمل تانى
الألحان والتوزيع كالعادة كان مدهش والله وأكيد عثمان النو بكون خت فيه كل ما اوتى من فن وتميز وجمال بحكم انه ده اول ظهور وتقديم للمجموعة، وبحكم اشياء تانى طبعا معروفة لكل الناس المهتمين بسيرة عثمان النو وبالضرورة مسيرة موطنه الأول "مجموعة عقد الجلاد"
أجمل ما فى "طعم" المزيكا والغناء الإتقدم، هو حضور "الطرب والتطريب" المارق من الألحان ومن المزيكا وحتى من طريقة دمج الأصوات وتوظيفها وإن كان ده كله زى ما الزول حس، كان بجرعات صغيرة، وده الشى الكان مفقود تقريبا فى طريقة واسلوب عقد الجلاد على حساب اعتبارات تانية معروفة ومحسوسة يمكن للمتلقين، على سبيل التركيز على توصيل المعنى والفكرة الفى الكلام وتخفيف الحضور الموسيقى والنغمى على حساب الأداء الصوتى
وقبل ده كله، أول شى نط فى نافوخ الزول وبدا يناوش فى لحظات السماع والاستمتاع، هو هاجس الإستمرارية للمجموعة الوليدة، على طريقة الضايق قرصة الدابى ديك والبقى يخاف من جر الحبل، وقرصة دابى الفرق والمجموعات الغنائية والموسيقية من السمندل لغاية آخر فرقة، الى الآن قاعدة "تحرق" فى الناس
لكين خلونا نأمل ونشحد الله ونتمنى استمرار وبقاء ومواصلة "رأى" لمشروعها الجديد، وانها تواصل بذل الرأى المموسق وانه عثمان النو يستصحب معاه كل زخم التجارب الجميلة العنده ويحفظ ويحافظ على تدفق وجريان موية النهر الجديد
آمين
|
|
|
|
|
|
|
|
Re: رأى --- عثمان النو صمت دهرا وتدفق نهرا (Re: أبوذر بابكر)
|
أبوذر سلامات وتحايا
اتاح لى الزمان فى فترة بعيدة ان اتعرف على عثمان النو وما عاوزة اشكرو وامدحو لا على المستوى الشخصى لا على المهنى عشان ما اخش فى ضيق اللغة الاختلاف فى الفرق الموسيقية قااااعد فى الدنيا كلها ونشر الغسيل المصاحب ليهو لا مفر منه وتنتهى الزوبعة ويبقى ما ينفع الناس تبقى عقد الجلاد بجمالها ويخرج عثمان النو بجمال جديد تغرق فيهو جماهير السميعة الذواقة
________________________ دحين اختيار اسم "رأى" من وجهة نظرى مافيهو بعد جمالى و مباشر شديد بما لايناسب و اسم مجموعة غنائية ولا يخفى على النو انو مع لهجتنا السودانية الناس ح تقول "راى" من غير الهمزة فيضيع حتى المعنى المباشر
و أهو برضو رأى ارجو ان يتسع له صدر النو وبلاهى يا ابوذر ابلغه تحياتى وقول ليهو بت المجمر تسلم عليك
| |
|
|
|
|
|
|
Re: رأى --- عثمان النو صمت دهرا وتدفق نهرا (Re: Siham Elmugammar)
|
تحياتى يا سهام وكل المعزة والتقدير
عساك واهلك كلهم طيبين وشديدين وسعيدين
كل القلتيهو صحيح وما زح تب من درب الكلام الزين فى حق النو وحقين عقد الجلاد
وكله خيرين وتلاتة لى سمع الناس امتاعهم ومؤانستهم
الإسم فعلا والله يا سهام مليان حاجات كتيرة شوية تفرد وكتير اسئلة، وبين ده وداك المهم بس "الآوت بت" وما يطرب الناس وينفعهم
والناس كان قالو "رأى" ولا قالو "راى" غالبا المعنى بصل
وإن شاء الله بس قولى الفرقة "شايلا اسما"
ونسمع منهم المزيد من التجلى الجميل ومن الجمال المتجلى
والأهم من الأهم
الإستمرارية
وهنا مربط النغم
| |
|
|
|
|
|
|
Re: رأى --- عثمان النو صمت دهرا وتدفق نهرا (Re: أبوذر بابكر)
|
ٍسلامات يا ابوذر
Quote: الإسم فعلا والله يا سهام مليان حاجات كتيرة شوية تفرد وكتير اسئلة، وبين ده وداك المهم بس "الآوت بت" وما يطرب الناس وينفعهم والناس كان قالو "رأى" ولا قالو "راى" غالبا المعنى بصل |
معليش الاسم ممكن يكون متفرد لكن اعتقد انه غير مناسب لفرقة موسيقية لانو هو زاتو مافيهو موسيقى ..يعنى ممكن اقبلو اسم لجريدة لكن لفرقة مؤسسها عثمان النو؟؟!!!!! ياخ شوف الابداع الكان فى اختيار اسم عقد الجلاد مميز ..مبتكر ..جاذب ومدوذن لكن "رأى" !!!!! اهو وجهة نظر شخصية
ما عندنا خلاف حول اهمية ما ستقدمه الفرقة للجمهور كمرسوم رسمى لنجاحها بس الاسم كان بيديها حبت دفرة
| |
|
|
|
|
|
|
Re: موسيقى الـ"راي"؟ (Re: farda)
|
الاخ farda سلامات شكرا لايراد الرابط قرأت الموضوع واعتقد انه متعجل جدا وفيهو ريحة موجدة شخصية اكتر من انو نقد بناء
| |
|
|
|
|
|
|
Re: رأى --- عثمان النو صمت دهرا وتدفق نهرا (Re: Siham Elmugammar)
|
كيفنك يا سهام
الغريبة الشى الوحيد الما جابو سيرته فى الحلقة الأنا سمعتها هو دلالة أو معنى الإسم
كنت منتظر يكون فى سؤال فى الخصوص ده
وأكيد الإسم ده بكون فوق "راى"
لسه برضو خلينا ننتظر ونشوف الجاى قدام
المشكلة تعرفى يا سهام انه الزول بعيد من البلد عشان كده مافى امكانية عشان "نتقص" الأخبار ونلاقى الناس
| |
|
|
|
|
|
|
Re: رأى --- عثمان النو صمت دهرا وتدفق نهرا (Re: صبري طه)
|
الحكاية مجرد راي ولكل واحد راي وبالمناسبة اهم غناء في افريقيا هو غناء الراي للمجاميع المغاربية وبطول المدة بتبقى الكلمة راي اخف على كل زول وبتكون اسم جميل جدا والمسألة مجرد راي لكم جميعا محبتي الابدية وسعادة لاتوصف بهذه الفرقة البديعة راي
| |
|
|
|
|
|
|
Re: رأى --- عثمان النو صمت دهرا وتدفق نهرا (Re: محمد سنى دفع الله)
|
السنى السمح
كيفك يا فنان
الراى حق اهلنا الامازيغ فى شمال القلب المسمى افريقيا حاجة سمحة والله مع انه الزول ما بفهم معظم الكلام المموسق لكين تحس بانه شى قريب لى روحك من كل الشبان المعروفين ناس الشاب خالد والتانين
وزى ما قلت لى اختنا سهام
ان شاء الله فرقة "راينا" نحن
شايلا اسما
وليك محبتنا اضعاف
| |
|
|
|
|
|
|
|