|
|
 مشروع نكتة اهديها لقريبي ( النكتنجي) محمد موسى!
|
قالوا كوز أصلي بتاع جهاد ودفاع شعبي النوع الدقنو مترين وعلامة الصلاة دويرية خمسة بوصة وصاحبنا من النوع المشى الجنوب تزعة مرات وما خلا معسكر دفاع شعبي ما دخلو وماخلا مسيرة شعبية الا وكان فيها اول المهللين والمكبرين يعني ماخد الموضوع جد جد وفجأة لمن صحي من غيبوبة الهوس وما مات من ضمن (فطايس) الترابي قام لقى اصحابو المجاهدين ابان دقون احوالن اتغيرت وبقوا غرقانين في عسل الدنيا ولقف وختف ونهب وقلع في مال الحرام عملوها عمارات وشركات وعربات ونسوان واسفار وكروش وراحات وفجأة لمت في صاحبنا الكوز الفقران في ليلة من ليالي الفلس والحال شلش الحاجة ام العيال ووقعت فيهو زلة شديدة وتقول ليهو : انت الشي يا كوز السجم لاك زي الرجال اخوانك المجاهدين الشي لا بتختف لا بتنهب لا بتقلع زيهم ولاك سويت لناحتى بيت طوب عفين ولا عيشة سمحة ولا حتى ركشة.....على طول قال ليها صاحبنا :لكن يا حاجة ديل ما حرامية وناس دنيا ساكت وما بخافوا الله ومال الحرام عمرو ما بودي زولو لي قدام...على طول ردت عليهو: وما دام هم حرامية ونصابين ات مباريهم لي هسع مالك ما تمرق تخليهم بدل ما يركبك زنبهم وما دام اتبلبلت ابقى يا خوي حرامي متلهم و سوى زي ما بسووا والحي الله والكاتل الله؟ قالوا صاحبنا على طول مرق من البيت زعلان و مشي لو احد كوز صاحبو من النوع الهمباتي الكبير حكى ليهو مشكلتو مع المرة البقت تحرضوا علي اكل مال الحرام وعلى طول صاحبو نصحو امشي محل الناس بتفتش على الدهب امكن القى ليه كيلو كيلوين اصلح بيهم احوالو وقام صاحبو وفر ليهو جهاز تفتيش الدهب..... وبالفعل اداهو الجهاز ولكن قبل ما امرق منو قال ليهو : والله اقول ليك حاجة.يا شيخنا..شوف يا اخوى حكاية تفنش الدهب وتمرق في العتمور دي فيها مخاطرة كبيرة امكن تلقى وامكن ما تلقى الدهب وامكن تموت في روحك زي عشرات ماتوا في الصحرا بالعطش والجوع وهم لا لموا في الدهب ولا لموا في الحياة ونصيحتى ليك خليك حريف زينا كده شيل الجهاز ده واشتغل بهو حرامي في الحلة تتلب بيهو البيوت وبيهو بتعرف الناس خاته دهبها وين وبعد داك شيل الفي النصيب لاضرر ولا ضرار بس اعمل حسابك حنظبطوا ليك بكاتم صوت ما حيعمل اي ازعاج عشان ما تنقبض وحيولع ليك نور احمر بس لمن يصل محل الدهب.
اها قالوا صاحبنا استخار و اتوكل على الله وقرر ابتدى الليلة السرقة في حلة بعيدة من حلتو واول بيت راح متلب فيهو وبدا اتسلل حبة حبة والبيت ضلام شديد يبدو بيت ناس فقرانين حالتهم شلش وفجاة النور الاحمر ولع وقام كده صاحبنا فرح فرح شديد وقام مبارى الجهاز لحدى ما دخل اوضة في البيت وهو مبارى الجهاز المولع وفجاة توقف في المحل الحددو الجهاز والدنيا ضلام...اقوم صاحبنا براااحة يمد ايدو محل وين ما حدد الجهاز الهدف متخيل انو خلاص حيحصل على الدهب وفجاة صاحبنا الكوز ضرب الكواريك والجعير واكورك.:..بسم الله بسم الله الدبيب الدبيب عضاني افتحوا النور يا اهل البيت وبالفعل النور ولع وفجاة لقى صاحبنا ايدو في خشم مرة عجوز عاضة عليها عضة بت هرمة لمن جابت الدم وهي تكورك فيهو بصوت عجوز متهدج بسبب الكبر: الشي يا ناس مولانا شكيتكم على الله السرقة في البلد كملتوها وبقيتوا اخيرا دايرين تسرقوا حتى سن الدهب الوحيدة الفي خشمي من سنة طهوري سنة ردموا البحر!
|
|
  
|
|
|
|
|
| |
هشام هباني
nazar hussien
فيس بوك
تويتر
انستقرام
يوتيوب
بنتيريست